ဘုရားသခင့်နိုင်ငံတော်သတင်းကောင်း ယင်းကားအဘယ်နည်း

ယမန်နှစ်က ကမ္ဘာတစ်ဝန်းနိုင်ငံပေါင်း ၂၃၅ နိုင်ငံတွင် လူကြီးလူငယ် ၆,၀၃၅,၅၆၄ ဦးတို့သည် ၎င်းအကြောင်းကို အခြားသူတို့အား ပြောပြရာ၌ ၁,၁၇၁,၂၇၀,၄၂၅ နာရီအသုံးပြုခဲ့ကြသည်။ သူတို့သည် ၎င်းကို နှုတ်ဖြင့်ကြားသိစေသည့်အပြင် ၎င်းကိုကြေညာ၍ ရှင်းပြပေးဖို့ ပုံနှိပ်စာစောင်သန်းပေါင်း ၇၀၀ ကျော်ကို လူထုလက်သို့ ဝေငှခဲ့ကြသည်။ ၎င်းကိုပျံ့နှံ့စေဖို့ ထောင်နှင့်ချီသောကက်ဆက်ခွေများနှင့် ဗီဒီယိုခွေများကိုလည်း သူတို့ဖြန့်ဝေခဲ့ကြသည်။ “၎င်း” ကားအဘယ်နည်း။

“၎င်း” မှာ ဘုရားသခင့်နိုင်ငံတော်သတင်းကောင်းဖြစ်၏။ လူ့သမိုင်းတွင် “[ဘုရားသခင့်] နိုင်ငံတော်နှင့်ဆိုင်သော ဤသတင်းကောင်း” ကို ယနေ့ကျွန်ုပ်တို့တွေ့မြင်နေရသည့် အတိုင်းအတာအထိ ယခင်ကတစ်ခါမျှမဟောပြောခဲ့ဖူးသည်မှာ အမှန်ပင်။—မဿဲ ၂၄:၁၄၊ ကဘ။

ဤကမ္ဘာချီဟောပြောခြင်းနှင့် သွန်သင်ခြင်းလုပ်ငန်းကို လုပ်ဆောင်နေကြသူတို့အားလုံးမှာ စေတနာ့ဝန်ထမ်းများဖြစ်ကြ၏။ လောကအမြင်မှကြည့်လျှင် သူတို့သည် လုပ်ငန်းအတွက် အရည်အချင်းမပြည့်ပုံပေါ်ပေမည်။ သို့ဖြစ်လျှင် သူတို့ရဲစွမ်းသတ္တိရှိပြီး အောင်မြင်ရသည့် အကြောင်းရင်းကားအဘယ်နည်း။ အဓိကအကြောင်းရင်းမှာ ဘုရားသခင့်နိုင်ငံတော်သတင်းကောင်း၏တန်ခိုးဖြစ်၏၊ အကြောင်းမှာ ၎င်းသည် လူသားတို့ထံရောက်ရှိလာမည့် ကောင်းချီးမင်္ဂလာသတင်းဖြစ်သောကြောင့်တည်း။ လူအားလုံးလိုချင်တမ်းတကြသော ဤကောင်းချီးများမှာ ပျော်ရွှင်မှု၊ စီးပွားရေးကျပ်တည်းမှုမှလွတ်ကင်းခြင်း၊ ကောင်းသောအစိုးရ၊ ငြိမ်သက်မှု၊ လုံခြုံမှုနှင့် လူအများစဉ်းပင်မစဉ်းစားဝံ့သည့်—ထာဝစဉ်အသက်ရှင်ခြင်းတို့ဖြစ်သည်! ယင်းသည် ဘဝရည်ရွယ်ချက်ကို ရှာဖွေနေကြသူတို့အတွက် အမှန်ပင်သတင်းကောင်းဖြစ်သည်။ မှန်ပါသည်၊ ဘုရားသခင့်နိုင်ငံတော်သတင်းကောင်းကြေညာခြင်းကို အသင်တလိုတလားတုံ့ပြန်မည်ဆိုလျှင် ဤကောင်းချီးများမက သာ၍များသောကောင်းချီးများကို သင်ရရှိနိုင်မည်။

ဘုရားသခင့်နိုင်ငံတော်ဟူသည် အဘယ်နည်း

သို့သော် သတင်းကောင်းအဖြစ် ကြေညာနေကြသော ဘုရားသခင့်နိုင်ငံတော်ဟူသည် အဘယ်နည်း။ ၎င်းသည် ရင်းနှီးပြီးသားဖြစ်သည့် ဤစကားများဖြင့် သန်းပေါင်းများစွာသောသူတို့ ဆုတောင်းရန် သွန်သင်ခံခဲ့ရသည့် ဘုရားသခင့်နိုင်ငံတော်ဖြစ်သည်– “ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။ နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေသော။”—မဿဲ ၆:၉၊ ၁၀။

၎င်းသည် လွန်ခဲ့သော ၂၅ ရာစုကျော်ကျော်က ဟေဗြဲပရောဖက်ဒံယေလ ဤသို့ရေးသားပြောဆိုခဲ့သော ဘုရားသခင့်နိုင်ငံတော်ပင်ဖြစ်၏– “ပျက်စီးခြင်းသို့မရောက်နိုင်သောနိုင်ငံကို ထိုဘုရင်များလက်ထက်၌ ကောင်းကင်ဘုံရှင်ဘုရားသခင်သည် တည်ထောင်တော်မူမည်။ ထိုနိုင်ငံသည်လည်း အခြားအဘယ်လူမျိုး၏လက်သို့မျှမရောက်ဘဲ အထက်ဆိုခဲ့ပြီးသောနိုင်ငံရှိသမျှကိုချိုးဖဲ့ဖျက်ဆီး၍ အစဉ်အမြဲတည်လိမ့်မည်။”—ဒံယေလ ၂:၄၄၊ ကဘ။

ထို့ကြောင့် သတင်းကောင်းဆိုသည်မှာ ဆိုးသွမ်းမှုအားလုံးကို ဖယ်ရှားပစ်ပြီးနောက် မြေတစ်ပြင်လုံးကို ငြိမ်းချမ်းစွာအုပ်ချုပ်မည့် ဘုရားသခင့်နိုင်ငံတော် သို့မဟုတ် အစိုးရဖြစ်သည်။ ၎င်းသည် လူသားများနှင့် မြေကြီးအတွက် ဖန်ဆင်းရှင်၏မူလရည်ရွယ်ချက်ကို အမှန်အကောင်အထည်ပေါ်စေပါလိမ့်မည်။—ကမ္ဘာဦး ၁:၂၈။

“ကောင်းကင်နိုင်ငံတော်သည် တည်လုနီးပြီ”

လွန်ခဲ့သောနှစ်ပေါင်း ၂,၀၀၀ နီးပါးက ဘုရားသခင့်နိုင်ငံတော်သတင်းကောင်းကို ဆက်ကပ်အပ်နှံထားသူတစ်ဦး ဦးဆုံးကြေညာခဲ့သည်။ ထိုသူ၏ပုံပန်းသဏ္ဌာန်နှင့် မူပိုင်အကျင့်တို့ကို လူများစွာအာရုံစိုက်ခဲ့ရသည်။ သူသည် ဂျူးယဇ်ပုရောဟိတ်ဇာခရိနှင့် သူ၏ဇနီးဧလိရှဗက်တို့၏သား နှစ်ခြင်းဆရာယောဟန်ဖြစ်၏။ ယောဟန်သည် သူ့ကိုပုံဆောင်ခဲ့သည့် ပရောဖက်ဧလိယ၏ပုံပန်းအရ ခါး၌ သားရေခါးပန်းကိုစည်းကာ ကုလားအုတ်အမွေးနှင့်ရက်သောအဝတ်အထည်ကို ဝတ်ဆင်ခဲ့သည်၊ သို့သော် လူအများ၏အာရုံကိုဆွဲဆောင်ခဲ့သည်မှာ သူ၏သတင်းဖြစ်၏။ သူက “ကောင်းကင်နိုင်ငံတော်သည် တည်လုနီးပြီ။ ထို့ကြောင့် နောင်တရကြလော့” ဟုကြေညာခဲ့သည်။—မဿဲ ၃:၁-၆။

ယောဟန်ကိုနားဆင်သူတို့မှာ စစ်မှန်သောဘုရားသခင် ယေဟောဝါအားဝတ်ပြုသည်ဟုဆိုကြသော ဂျူးများဖြစ်ကြသည်။ လူမျိုးတစ်မျိုးအနေနှင့် သူတို့သည် အစောပိုင်းအနှစ် ၁,၅၀၀ ခန့်ကမောရှေမှတစ်ဆင့် ပညတ်ပဋိညာဉ်ကိုရရှိခဲ့ကြသည်။ ယေရုရှလင်မြို့တွင် ကြီးကျယ်ခမ်းနားသောဗိမာန်တော်တစ်ခု တည်ရှိဆဲဖြစ်ပြီး ထိုတွင် ပညတ်တရားနှင့်အညီ ယဇ်များကိုပူဇော်ခဲ့ကြသည်။ မိမိတို့၏ဝတ်ပြုကိုးကွယ်မှုသည် ဘုရားသခင့်မျက်မှောက်တွင် မှန်ကန်သည်ဟု ဂျူးများအခိုင်အမာယူမှတ်ခဲ့ကြသည်။

သို့သော် ယောဟန်အားနားထောင်ကြရာ၌ မိမိတို့၏ဘာသာရေးသည် မိမိတို့ထင်ခဲ့သည့်အတိုင်းမဟုတ်ကြောင်း လူအချို့စသိရှိလာကြ၏။ ဂရိယဉ်ကျေးမှုနှင့် အတွေးအခေါ်သည် ဂျူးဘာသာရေးသွန်သင်ချက်များသို့ စိမ့်ဝင်လာခဲ့ပြီ။ မောရှေမှတစ်ဆင့် ဘုရားသခင်ထံတော်မှရရှိခဲ့သောပညတ်တော်မှာ ယခုရောနှောခံရပြီး လူ့ယုံကြည်ချက်နှင့် ရိုးရာထုံးတမ်းများဖြင့် အချည်းနှီးပင်ဖြစ်စေခဲ့ပြီ။ (မဿဲ ၁၅:၆) စိတ်နှလုံးခိုင်မာ၍ ကြင်နာမှုကင်းမဲ့သော ဘာသာရေးခေါင်းဆောင်များက လူတို့ကိုလမ်းလွဲစေခဲ့ကြရာ အများသောသူတို့သည် ဘုရားသခင်နှစ်သက်လက်ခံနိုင်သောနည်းဖြင့် ဝတ်မပြုကြတော့ချေ။ (ယာကုပ် ၁:၂၇) သူတို့သည် ဘုရားသခင်နှင့် ပညတ်ပဋိညာဉ်ကိုဆန့်ကျင်သည့်အပြစ်များမှ နောင်တယူဖို့လိုလာခဲ့ကြသည်။

ထိုအချိန်တွင် ဂျူးများစွာတို့သည် ကတိထားရာမေရှိယ သို့မဟုတ် ခရစ်တော်၏ပေါ်ထွန်းခြင်းကို မျှော်လင့်နေခဲ့ကြပြီး အချို့က ယောဟန်သည် ‘ခရစ်တော်ဖြစ်ကောင်းဖြစ်မည်လော’ ဟုတွေးတောဆင်ခြင်နေခဲ့ကြသည်။ သို့ရာတွင် ယောဟန်က မိမိမဟုတ်ကြောင်းငြင်းဆိုခဲ့ပြီး ယင်းအစား “ထိုသူ၏ခြေနင်းတော်ကြိုးကိုမျှ ဖြေခြင်းငှာမထိုက်” ဟုသူဆိုခဲ့သူတစ်ဦးထံ သူတို့ကိုလမ်းညွှန်ပေးခဲ့သည်။ (လုကာ ၃:၁၅၊ ၁၆) ယေရှုကို မိမိ၏တပည့်တော်များနှင့်မိတ်ဆက်ပေးကာ ယောဟန်က ဤသို့ကြေညာခဲ့သည်– “ဤလောက၏အပြစ်ကိုဆောင်သွားသော ဘုရားသခင်၏သိုးသငယ်ကိုကြည့်လော့။”—ယောဟန် ၁:၂၉။

၎င်းသည် အမှန်ပင်သတင်းကောင်းဖြစ်၏၊ အမှန်မှာ ယောဟန်သည် အသက်ရှင်ခြင်းနှင့်ပျော်ရွှင်မှုသို့ပို့ဆောင်သောလမ်း၊ “ဤလောက၏အပြစ်ကိုဆောင်သွားသော” သူ၊ ယေရှုထံ လူအားလုံးကိုညွှန်ပြနေသောကြောင့်ဖြစ်သည်။ အာဒံနှင့်ဧဝတို့၏မျိုးဆက်များအနေနှင့် လူသားအားလုံးတို့သည် အပြစ်နှင့်သေခြင်း စိုးမိုးမှုအောက် မွေးဖွားလာခဲ့ကြသည်။ ရောမ ၅:၁၉ ကဤသို့ရှင်းပြသည်– “တစ်ယောက်သောသူ [အာဒံ] သည် နားမထောင်သောအားဖြင့်၊ လူများတို့သည် အပြစ်ရောက်သည်နည်းတူ၊ တစ်ယောက်သောသူ [ယေရှု] သည် နားထောင်သောအားဖြင့်၊ လူများတို့သည် ဖြောင့်မတ်ရာသို့ရောက်ကြ၏။” ယဇ်သကာဆိုင်ရာသိုးသငယ်ကဲ့သို့ ယေရှုသည် ‘အပြစ်ကိုယူဆောင်သွား’ ကာ လူ့ရေးရာများ၏ဝမ်းနည်းဖွယ်အခြေအနေကို ပြောင်းပြန်လှန်ပစ်လိမ့်မည်ဖြစ်သည်။ သမ္မာကျမ်းစာက ဤသို့ရှင်းပြသည်– “အပြစ်တရား၏အခကား သေခြင်းပေတည်း။ ဘုရားသခင်ပေးတော်မူသော ဆုကျေးဇူးတော်ကား၊ ငါတို့သခင်ယေရှုခရစ်အားဖြင့် ထာဝရအသက်ပေတည်း။”—ရောမ ၆:၂၃။

စုံလင်သူ—အမှန်မှာ အသက်ရှင်ခဲ့သမျှတွင် အကြီးမြတ်ဆုံးလူသား—တစ်ဦးအနေနှင့် ယေရှုသည် သတင်းကောင်းကိုဟောပြောခဲ့သည်။ မာကု ၁:၁၄၊ ၁၅ မှကျမ်းစာမှတ်တမ်းက ဤသို့ပြောပြသည်– “ယောဟန်သည် ထောင်ထဲသို့ရောက်သည်နောက်၊ ယေရှုသည် ဂါလိလဲပြည်သို့ကြွတော်မူလျှင်၊ ‘အချိန်ပြည့်စုံပြီ၊ ဘုရားသခင်၏နိုင်ငံတော်သည်တည်လုနီးပြီ၊ နောင်တရကြလော့။ ဧဝံဂေလိတရားကိုယုံကြည်ကြလော့’ ဟူသော ဘုရားသခင့်နိုင်ငံတော်နှင့်ယှဉ်သော ဧဝံဂေလိတရားကိုဟောတော်မူ၏။”

ယေရှု၏သတင်းကိုတုံ့ပြန်ပြီး သတင်းကောင်းကို ယုံကြည်သူတို့သည် ကောင်းချီးများစွာခံစားခဲ့ရကြသည်။ ယောဟန် ၁:၁၂ က “ထိုသူ [ယေရှု] ကိုလက်ခံသမျှသောသူတည်းဟူသော ကိုယ်တော်ကိုယုံကြည်သောသူတို့အား၊ ဘုရားသခင်၏သားဖြစ်ရသောအခွင့်ကို ပေးတော်မူ၏” ဟုဆိုသည်။ ဘုရားသခင်၏သားသမီးများ သို့မဟုတ် သားများဖြစ်ကြရာ သူတို့သည် ထာဝရအသက်ဆုကျေးဇူးကို ရရှိကြမည်ဖြစ်သည်။—၁ ယောဟန် ၂:၂၅။

သို့သော် ဘုရားသခင့်နိုင်ငံတော်ကောင်းချီးများ ရရှိမည့်အခွင့်ထူးသည် ပထမရာစုမှလူတို့အတွက်သာ ကန့်သတ်ထားခြင်းမဟုတ်ပါ။ အစောပိုင်း၌ဖော်ပြခဲ့သကဲ့သို့ ဘုရားသခင့်နိုင်ငံတော်သတင်းကောင်းကို ယနေ့ မြေတစ်ပြင်လုံး၌ ကြေညာ၍သွန်သင်လျက်ရှိသည်။ ထို့ကြောင့် ဘုရားသခင့်နိုင်ငံတော်ကောင်းချီးများကို ရနိုင်ဆဲဖြစ်သည်။ ထိုသို့သောကောင်းချီးများကိုခံစားရဖို့ အသင် အဘယ်အရာပြုလုပ်ရမည်နည်း။ နောက်ဆောင်းပါးကရှင်းပြပါမည်။