ကျမ်းစာစိတ်ဝင်စားမှုကို ချီးမွမ်းခဲ့
မာရီယာနာသည် အသက် ၁၈ နှစ်ရှိ အထက်တန်းနောက်ဆုံးနှစ်ကျောင်းသူ၊ အီတလီတောင်ပိုင်းမှ ယေဟောဝါသက်သေတစ်ဦး ဖြစ်သည်။ သူ့ကျောင်းတွင် အခြားသက်သေခံလူငယ်များလည်းရှိသည်။
“ကျွန်မတို့ သူငယ်ချင်းတချို့ အားလပ်ချိန်မှာစုပြီး ကျမ်းစာကိုနေ့စဉ်စေ့စေ့ကြည့်ရှုခြင်းစာအုပ်ကို အတူဖတ်ကြတာ နှစ်နဲ့ချီရှိပြီ” ဟုမာရီယာနာ စာရေးပြောပြသည်။ “ဒီလိုဖတ်နိုင်တဲ့နေရာဆိုလို့ ဆရာ/ဆရာမတွေ အနားယူတဲ့အခန်းနားက လမ်းကြားလေးတစ်ခုပဲရှိတယ်။ အရမ်းတိတ်ဆိတ်တဲ့ နေရာတော့မဟုတ်ဘူး။ ကျွန်မတို့ဘာလုပ်နေကြတယ်ဆိုတာကို ဆရာ/ဆရာမတွေ ဖြတ်သွားတဲ့အခါတွေ့တယ်၊ တချို့ဆိုရင် ရပ်တောင်ကြည့်သွားကြသေးတယ်။ အဲဒါကြောင့် သူတို့မေးခွန်းမေးတဲ့အခါ ဖြေဖို့အခွင့်အရေးရခဲ့ဖူးတယ်။ နေ့တိုင်းလိုလို ဆရာ/ဆရာမတစ်ယောက်ယောက်ကတော့ မေးတတ်တယ်။ ကျွန်မတို့ကျမ်းချက်ဖတ်ပြီးဆွေးနွေးတာကို ဆရာ/ဆရာမတချို့ ရပ်နားထောင်ပြီး သက်သေခံတွေ ဝိညာဉ်ရေးရာကို စိတ်ဝင်စားကြတဲ့အတွက် ချီးမွမ်းစကားပြောကြတယ်။ တစ်ခါဆိုရင် ဆရာ/ဆရာမ အနားယူတဲ့အခန်းထဲမှာ ဝင်ဆွေးနွေးကြဖို့ လက်ထောက်ကျောင်းအုပ်ကြီးက ကျွန်မတို့ကို ခွင့်ပြုဖူးတယ်။
“ကျွန်မတို့နေ့စဉ်ကျမ်းချက်ဆွေးနွေးကြတဲ့နေရာကို မြင်ပြီး ကျွန်မရဲ့ဆရာက ပိုတိတ်ဆိတ်တဲ့ စာသင်ခန်းတစ်ခန်းကို ကျွန်မတို့အသုံးပြုနိုင်မလားလို့ ကျောင်းအုပ်ကြီးကို မေးပေးတယ်။ ကျောင်းအုပ်ကြီးက ခွင့်ပြုလိုက်တယ်၊ အဲဒီအပြင် ကျွန်မရဲ့ဆရာက တစ်တန်းလုံးရှေ့မှာ ကျွန်မတို့ရဲ့ကောင်းတဲ့ပုံသက်သေကို ချီးမွမ်းပြောဆိုခဲ့တယ်။ ယေဟောဝါပေးသနားတဲ့ မဟာအခွင့်ထူးအတွက် ကျွန်မတို့အားလုံး အရမ်းဝမ်းသာမိတယ်။”