လောကစိတ်ဓာတ်ကိုမခံယူဘဲ ဘုရားသခင့်စွမ်းအားတော်ကိုခံယူပါ

“ငါတို့သည် လောကစိတ်ဓာတ်ကို မခံယူကြ။ ဘုရားသခင် ပေးသနားတော်မူသော အရာများကို သိနိုင်မည်အကြောင်း ဘုရားသခင်ထံမှ စွမ်းအားတော်ကို ခံယူကြ၏။”—၁ ကော. ၂:၁၂။

၁၊ ၂။ (က) စစ်မှန်တဲ့ခရစ်ယာန်တွေက ဘယ်သဘောနဲ့ တိုက်ပွဲဆင်နွှဲနေရသလဲ။ (ခ) ဘယ်မေးခွန်းတွေကို ကျွန်ုပ်တို့ သုံးသပ်ကြမလဲ။

စစ်မှန်တဲ့ ခရစ်ယာန်တွေဟာ တိုက်ပွဲဆင်နွှဲနေရတယ်။ ကျွန်ုပ်တို့ရဲ့ ရန်သူက တန်ခိုးကြီး၊ ပရိယာယ်များပြီး စစ်ရည်ဝသူဖြစ်တယ်။ သူ့မှာ အလွန်အစွမ်းထက်တဲ့လက်နက်တစ်မျိုးရှိပြီး ဒီလက်နက်ကြောင့် လူသားများစွာက သူ့လက်အောက် ကျရောက်သွားကြတယ်။ ဒါပေမဲ့ ကျွန်ုပ်တို့ ဘာမှမတတ်နိုင်တော့ဘူး ဒါမှမဟုတ် မျှော်လင့်ချက်မရှိတော့ဘူးလို့ ယူဆစရာမလိုဘူး။ (ဟေရှာ. ၄၁:၁၀) ကျွန်ုပ်တို့မှာ ဘယ်လိုတိုက်ခိုက်မှုမျိုးကိုမဆို ခံရပ်နိုင်တဲ့ အကာအကွယ်တစ်ခုရှိထားပါတယ်။

^၂ ဒီတိုက်ပွဲက တကယ့်တိုက်ပွဲမဟုတ်ဘဲ ပုံဆောင်သာဖြစ်တယ်။ ကျွန်ုပ်တို့ရဲ့ရန်သူက စာတန်ဖြစ်ပြီး သူအသုံးပြုတဲ့ အဓိကလက်နက်က “လောကစိတ်ဓာတ်” ဖြစ်တယ်။ (၁ ကော. ၂:၁၂) ကျွန်ုပ်တို့ရဲ့ အဓိကအကာအကွယ်က ဘုရားသခင့်စွမ်းအားတော်ဖြစ်တယ်။ ဒီတိုက်ပွဲမှာ အောင်မြင်ဖို့နဲ့ ဘုရားသခင်နဲ့ ရင်းနှီးတဲ့ဆက်ဆံရေးကို ဆက်ထိန်းထားနိုင်ဖို့ ဘုရားသခင့်စွမ်းအားတော် တောင်းလျှောက်ရမှာဖြစ်ပြီး ကျွန်ုပ်တို့ရဲ့အသက်တာမှာ စွမ်းအားတော်ကြောင့် ဖြစ်ပေါ်လာတဲ့ အရည်အသွေးတွေကို တင်ပြရမှာဖြစ်တယ်။ (ဂလ. ၅:၂၂၊ ၂၃) လောကစိတ်ဓာတ်ဆိုတာ ဘာလဲ၊ ဘယ်လိုနည်းနဲ့ အလွန်ပျံ့နှံ့လာသလဲ။ ကျွန်ုပ်တို့အပေါ် လောကစိတ်ဓာတ်လွှမ်းမိုးနေ၊ မနေဆိုတာ ဘယ်လိုသိနိုင်သလဲ။ ဘုရားသခင့်စွမ်းအားတော်ရရှိခြင်း၊ လောကစိတ်ဓာတ်ကိုတွန်းလှန်ခြင်းနဲ့ပတ်သက်ပြီး ယေရှုထံကနေ ဘာသင်ယူနိုင်သလဲ။

လောကစိတ်ဓာတ် ဘာကြောင့် အလွန်ပျံ့နှံ့နေ

၃။ လောကစိတ်ဓာတ်ဆိုတာ ဘာလဲ။

^၃ ဒီလောကရဲ့စိတ်ဓာတ်က “ဤလောကကိုအစိုးရသောမင်း” စာတန်ထံက အရင်းခံပြီး ဘုရားသခင့်သန့်ရှင်းသောစွမ်းအားတော်နဲ့ ဆန့်ကျင်တဲ့အရာဖြစ်တယ်။ (ယော. ၁၂:၃၁; ၁၄:၃၀; ၁ ယော. ၅:၁၉) ဒါက လောက,ကတင်ပြတဲ့ အဓိကသဘောထားဖြစ်ပြီး လူတွေကို လက်တွေ့လုပ်ဆောင်ဖို့ သွေးထိုးလှုံ့ဆော်ပေးတယ်။ ဒီလှုံ့ဆော်အားက လူ့အဖွဲ့အစည်းကို ဘုရားသခင့်အလိုတော်၊ ရည်ရွယ်ချက်နဲ့ ဆန့်ကျင်ရာကို လုပ်ဆောင်စေတယ်။

၄၊ ၅။ စာတန်အားပေးအားမြှောက်ပြုတဲ့ လောကစိတ်ဓာတ်က ဘယ်လိုနည်းနဲ့ အလွန်ပျံ့နှံ့လာသလဲ။

^၄ စာတန်အားပေးအားမြှောက်ပြုတဲ့ လောကစိတ်ဓာတ်က ဘယ်လိုနည်းနဲ့ အလွန်ပျံ့နှံ့လာသလဲ။ ဦးဆုံး၊ ဧဒင်ဥယျာဉ်မှာ စာတန်က ဧဝကို လှည့်ဖြားခဲ့တယ်။ ဘုရားသခင်နဲ့ ကင်းကင်းရှင်းရှင်းနေမယ်ဆိုရင် ဧဝရဲ့ဘ၀က ပိုကောင်းလာမယ်လို့ အယုံသွင်းခဲ့တယ်။ (က. ၃:၁၃) တကယ့်လိမ်ညာမှုကြီးပါပဲ။ (ယော. ၈:၄၄) ပြီးတဲ့နောက် အမျိုးသမီးကိုအသုံးချပြီး ယေဟောဝါကိုသစ္စာဖောက်ဖို့ အာဒံကို သွေးဆောင်ခဲ့တယ်။ အာဒံရဲ့ ရွေးချယ်မှုကြောင့် လူသားတွေဟာ အပြစ်တရားလက်အောက် ကျရောက်ခဲ့ပြီး စာတန်ရဲ့မနာခံတဲ့စိတ်ဓာတ်ကို အမွေခံခဲ့ကြရတယ်။—ဧဖက် ၂:၁-၃ ကိုဖတ်ပါ။

^၅ စာတန်က အတော်အတန်များတဲ့ ကောင်းကင်တမန်တွေကိုလည်း ဩဇာလွှမ်းမိုးခဲ့ပြီး သူတို့တွေဟာ နာမ်ဝိညာဉ်ဆိုးတွေဖြစ်လာတယ်။ (ဗျာ. ၁၂:၃၊ ၄) ဒီသစ္စာဖောက်မှုက နောဧခေတ်ရေလွှမ်းမိုးမှုမတိုင်မီ တစ်ချိန်ချိန်မှာ ဖြစ်ပျက်ခဲ့တယ်။ အဲဒီကောင်းကင်တမန်တွေက ကောင်းကင်မှာရှိတဲ့ သူတို့ရဲ့အခွင့်အရာကိုစွန့်ပြီး မြေကြီးပေါ်မှာ သဘာဝနဲ့ဆန့်ကျင်တဲ့ဆန္ဒကို အရှက်မဲ့စွာပြုကျင့်ခြင်းက ပိုကောင်းမယ်လို့ ယုံကြည်လာခဲ့တယ်။ (ယု. ၆) အခု နာမ်ဝိညာဉ်ဘောင်ကို ပြန်ရောက်နေပြီဖြစ်တဲ့ ဒီနာမ်ဝိညာဉ်ဆိုးတွေရဲ့ အကူအညီနဲ့ စာတန်က “လူနေထိုင်ရာမြေတစ်ပြင်လုံးကိုလှည့်စား” နေတယ်။ (ဗျာ. ၁၂:၉) ဝမ်းနည်းစရာက လူသားအများစုက နာမ်ဝိညာဉ်ဆိုးတွေရဲ့လွှမ်းမိုးမှုကို သတိမပြုမိကြဘူး။—၂ ကော. ၄:၄။

သင့်အပေါ် လောကစိတ်ဓာတ် လွှမ်းမိုးနေသလား

၆။ လောကစိတ်ဓာတ်က ဘယ်နည်းနဲ့သာ ကျွန်ုပ်တို့အပေါ် လွှမ်းမိုးနိုင်သလဲ။

^၆ လူအများစုက စာတန့်လွှမ်းမိုးမှုကို သတိမပြုမိကြပေမဲ့ စစ်မှန်တဲ့ခရစ်ယာန်တွေက သူဘယ်လိုနည်းနဲ့ လွှမ်းမိုးနေတယ်ဆိုတာကို သမ္မာကျမ်းစာကတစ်ဆင့် သိကြတယ်။ (၂ ကော. ၂:၁၁) ကျွန်ုပ်တို့သာ ခွင့်မပြုဘူးဆိုရင် လောကစိတ်ဓာတ်က ကျွန်ုပ်တို့ကို မလွှမ်းမိုးနိုင်ပါဘူး။ ကျွန်ုပ်တို့အပေါ် ဘုရားသခင့်စွမ်းအားတော် လွှမ်းမိုးနေသလား၊ လောကစိတ်ဓာတ်လွှမ်းမိုးနေသလားဆိုတာ သိနိုင်ဖို့ မေးခွန်းလေးခုကို သုံးသပ်ကြည့်ကြစို့။

၇။ ကျွန်ုပ်တို့ ယေဟောဝါထံကနေ ဝေးကွာသွားအောင် စာတန်ကြိုးစားတဲ့နည်းတစ်နည်းက ဘာလဲ။

^၇ ငါရွေးချယ်တဲ့ဖျော်ဖြေမှုက ငါ့အကြောင်း ဘာဖော်ပြသလဲ။ (ယာကုပ် ၃:၁၄-၁၈ ကိုဖတ်ပါ။) အကြမ်းဖက်မှုကို နှစ်သက်လာအောင် သွေးဆောင်ခြင်းအားဖြင့် ကျွန်ုပ်တို့ ဘုရားသခင်နဲ့ ဝေးကွာသွားအောင် စာတန်ကြိုးစားနေတယ်။ ယေဟောဝါက အကြမ်းဖက်မှုနှစ်သက်သူကို မုန်းတယ် ဆိုတာ စာတန်သိတယ်။ (ဆာ. ၁၁:၅) ဒါကြောင့် ကျွန်ုပ်တို့ရဲ့ သွေးသားဆန္ဒကိုဆွဲဆောင်ဖို့ စာတန်က စာပေ၊ ရုပ်ရှင်၊ တေးဂီတနဲ့ အီလက်ထရောနစ်ဂိမ်းတွေကို အသုံးပြုတယ်၊ တချို့ဂိမ်းတွေက ကစားသူရဲ့စိတ်မှာ ညစ်ညမ်းတဲ့ အကျင့်ပျက်မှုတွေကို လိုက်စားလိုစိတ်၊ ရက်စက်ကြမ်းတမ်းလိုစိတ်ပေါ်လာအောင် လှုံ့ဆော်ပေးတယ်။ ကျွန်ုပ်တို့ရဲ့နှလုံးတစ်စိတ်တစ်ပိုင်းက မှန်ရာကိုနှစ်သက်ပြီး ကျန်တဲ့တစ်ပိုင်းက သူအားပေးအားမြှောက်ပြုနေတဲ့ မကောင်းမှုတွေကို နှစ်သက်တယ်ဆိုရင်တောင် စာတန်ကျေနပ်တယ်။—ဆာ. ၉၇:၁၀။

၈၊ ၉။ ဖျော်ဖြေမှုနဲ့ပတ်သက်တဲ့ ဘယ်မေးခွန်းတွေကို မိမိကိုယ်ကို မေးသင့်သလဲ။

^၈ ဒါပေမဲ့ ဘုရားသခင့်စွမ်းအားတော်က စွမ်းအားတော်ရရှိသူတွေကို စင်ကြယ်ဖို့၊ သင့်မြတ်စွာနေဖို့၊ သနားကြင်နာခြင်းနဲ့ပြည့်စုံဖို့ လှုံ့ဆော်ပေးတယ်။ ကျွန်ုပ်တို့ ကိုယ့်ကိုယ်ကိုယ် ဒီလိုမေးသင့်တယ်– ‘ငါရွေးချယ်တဲ့ ဖျော်ဖြေမှုတွေက အရည်အသွေးကောင်းတွေမွေးမြူဖို့ အားပေးသလား။’ အထက်မှလာတဲ့ ဉာဏ်ပညာက “အရေခြုံခြင်း” မရှိဘူး။ ဘုရားသခင့်စွမ်းအားတော်လွှမ်းမိုးခံရသူတွေက လူတွေကို စင်ကြယ်ခြင်းနဲ့ ငြိမ်သက်ခြင်းအကြောင်း ဟောပြောပြီး အိမ်မှာတော့ ရက်စက်ကြမ်းကြုတ်မှု၊ အကျင့်ယိုယွင်းမှုတွေနဲ့ အပန်းဖြေမှာ မဟုတ်ဘူး။

^၉ ယေဟောဝါက ကိုယ်တော့်ကို အကြွင်းမဲ့ဝတ်ပြုဖို့ တောင်းဆိုတယ်။ ဒါပေမဲ့ စာတန်ကတော့ ယေရှုကိုသွေးဆောင်ခဲ့တုန်းကလို သူ့ကို တစ်ကြိမ်ပဲဝတ်ပြုကိုးကွယ်တာနဲ့ ကျေနပ်တယ်။ (လု. ၄:၇၊ ၈) မိမိကိုယ်ကို ဒီလိုမေးနိုင်ပါတယ်– ‘ငါရွေးချယ်တဲ့ဖျော်ဖြေမှုက ဘုရားသခင်ကို အကြွင်းမဲ့ဝတ်ပြုဖို့ ဖြစ်စေနိုင်သလား။ ငါ့ရဲ့ရွေးချယ်မှုက လောကစိတ်ဓာတ်ကိုတွန်းလှန်ဖို့ ခက်ခဲစေသလား၊ လွယ်ကူစေသလား။ နောက်နောင် ဖျော်ဖြေမှုရွေးချယ်ရာမှာ ပြုပြင်ပြောင်းလဲဖို့လိုသလား။’

၁၀၊ ၁၁။ (က) ရုပ်ပစ္စည်းပိုင်ဆိုင်ရာတွေနဲ့ပတ်သက်ပြီး လောကစိတ်ဓာတ်က ဘယ်သဘောထားကို အားပေးအားမြှောက်ပြုသလဲ။ (ခ) သမ္မာကျမ်းစာက ဘယ်သဘောထားမွေးမြူဖို့ အားပေးသလဲ။

^၁၀ ရုပ်ပစ္စည်းပိုင်ဆိုင်ရာတွေအပေါ် ငါဘယ်လိုသဘောထားသလဲ။ (လုကာ ၁၈:၂၄-၃၀ ကိုဖတ်ပါ။) လောကစိတ်ဓာတ်က လိုဘကြီးပြီး ရုပ်ပစ္စည်းတပ်မက်လာအောင် အားပေးခြင်းအားဖြင့် “မျက်စိတပ်မက်ခြင်း” ကိုအားပေးအားမြှောက်ပြုတယ်။ (၁ ယော. ၂:၁၆) လူများစွာကို ချမ်းသာဖို့စိတ်ပိုင်းဖြတ်စေတယ်။ (၁ တိ. ၆:၉၊ ၁၀) ဒီစိတ်ဓာတ်က ရုပ်ပစ္စည်းများစွာပိုင်ဆိုင်ထားမယ်ဆိုရင် တည်မြဲတဲ့လုံခြုံမှုခံစားရမယ်လို့ ယူမှတ်စေတယ်။ (သု. ၁၈:၁၁) ဒါပေမဲ့ ကျွန်ုပ်တို့က ဘုရားသခင်ထက် ငွေကိုပိုချစ်မယ်ဆိုရင် စာတန်အနိုင်ရသွားပါလိမ့်မယ်။ မိမိကိုယ်ကို ဒီလိုမေးသင့်ပါတယ်– ‘ငါ့ရဲ့အသက်တာက ရုပ်ပစ္စည်းပိုင်ဆိုင်ဖို့နဲ့ စည်းစိမ်ယစ်ဖို့ကို ပိုအာရုံစိုက်နေသလား။’

^၁၁ အဲဒါနဲ့ဆန့်ကျင်ပြီး ဘုရားသခင့်စွမ်းအားတော်တိုက်တွန်းမှုနဲ့ရေးတဲ့ သမ္မာကျမ်းစာက ငွေအပေါ်မျှတတဲ့အမြင်ရှိဖို့၊ မိမိကိုယ်တိုင်နဲ့ မိသားစုအတွက် လိုအပ်ရာတွေရရှိအောင် အလုပ်ကြိုးစားလုပ်ဖို့ အားပေးတယ်။ (၁ တိ. ၅:၈) စွမ်းအားတော်က ဘုရားသခင့်စွမ်းအားတော်ရရှိသူတွေ ယေဟောဝါရဲ့ရက်ရောမှုကို တုပဖို့လည်း ကူညီပေးတယ်။ သူတို့ကို ရယူသူတွေအဖြစ်မဟုတ်ဘဲ ပေးကမ်းသူတွေအဖြစ် လူတွေသိကြတယ်။ သူတို့က ပစ္စည်းဥစ္စာတွေထက် လူတွေကို ပိုတန်ဖိုးထားကြပြီး သူတို့တတ်နိုင်တဲ့အခါ သူတို့မှာရှိတဲ့အရာကို တလိုတလားဝေမျှပေးကြတယ်။ (သု. ၃:၂၇၊ ၂၈) သူတို့က ဘုရားသခင့်အမှုဆောင်ခြင်းထက် ငွေရှာခြင်းကို ဘယ်တော့မှ ဦးစားမပေးကြဘူး။

၁၂၊ ၁၃။ လောကစိတ်ဓာတ်နဲ့မတူဘဲ ဘုရားသခင့်စွမ်းအားတော်က ကျွန်ုပ်တို့အတွက် ဘယ်လို ကောင်းကျိုးဖြစ်စေသလဲ။

^၁၂ ငါ့ရဲ့အပြုအမူနဲ့ စိတ်သဘောထားက ဘယ်စိတ်ဓာတ်ကို ထင်ဟပ်ပြနေသလဲ။ (ကောလောသဲ ၃:၈-၁၀၊ ၁၃ ကိုဖတ်ပါ။) လောကစိတ်ဓာတ်က လူ့ဇာတိနဲ့ဆိုင်တဲ့အကျင့်တွေကို အားပေးအားမြှောက်ပြုတယ်။ (ဂလ. ၅:၁၉-၂၁) ကျွန်ုပ်တို့မှာ ဘယ်စိတ်ဓာတ်လွှမ်းမိုးနေတယ်ဆိုတာက အခြေအနေကောင်းနေတဲ့အချိန်မှာ မပေါ်ဘူး။ ညီအစ်ကို၊ ညီအစ်မတစ်ဦးဦးက ကျွန်ုပ်တို့ကို အရေးမစိုက်၊ ထိခိုက်နစ်နာစေပြီး ပြစ်မှားတဲ့အခါမျိုးမှာမှ ပေါ်လာတတ်တယ်။ အဲဒီအပြင် အိမ်မှာ မိသားစုကို ကျွန်ုပ် ကြင်ကြင်နာနာ ပြောဆိုဆက်ဆံသလား။ အိမ်သားတွေအပေါ် ကျွန်ုပ်တို့ရဲ့ ပြုမူဆက်ဆံပုံက ကျွန်ုပ်တို့အပေါ် ဘယ်စိတ်ဓာတ်လွှမ်းမိုးနေသလဲဆိုတာ ပေါ်နိုင်တယ်။ မိမိကိုယ်ကိုဆန်းစစ်ခြင်းက ကောင်းပါတယ်။ မိမိကိုယ်ကို ဒီလိုမေးပါ– ‘လွန်ခဲ့တဲ့ခြောက်လအတွင်း ငါ့ရဲ့အပြုအမူ၊ အပြောအဆိုက ခရစ်တော်နဲ့ပိုတူလာသလား ဒါမှမဟုတ် အကျင့်ဆိုးတွေကိုပဲ ပြန်ကျင့်မိသလား။’

^၁၃ ဘုရားသခင့်စွမ်းအားတော်က “ပင်ကိုစရိုက်ဟောင်းနှင့်တကွ ယင်း၏အကျင့်အကြံများကို ချွတ်ပယ်” ပြီး “စရိုက်သစ်” ကိုဝတ်ဆင်ဖို့ ကူညီပေးနိုင်တယ်။ ဒါက ကျွန်ုပ်တို့ကို ပိုပြီးချစ်ခင်ကြင်နာတတ်သူတွေ ဖြစ်စေတယ်။ မကျေနပ်စရာအကြောင်းရှိရင်တောင်မှ အကြွင်းမဲ့ခွင့်လွှတ်လိုစိတ်ရှိစေတယ်။ မတရားဆက်ဆံခံရရင်တောင် “ခါးသီးနာကြည်းခြင်း၊ စိတ်ဆိုးခြင်း၊ အမျက်ထွက်ခြင်း၊ အော်ဟစ်ငေါက်ငမ်းခြင်း၊ ဆဲဆိုခြင်း” နဲ့တုံ့ပြန်မှာမဟုတ်ဘူး။ အဲဒီအစား “သနားစာနာ” တတ်သူဖြစ်ဖို့ ကြိုးစားကြပါလိမ့်မယ်။—ဧ. ၄:၃၁၊ ၃၂။

၁၄။ လောကမှာရှိသူများစွာက သမ္မာကျမ်းစာကို ဘယ်လိုရှုမြင်ကြသလဲ။

^၁၄ သမ္မာကျမ်းစာမှာဖော်ပြထားတဲ့ ကိုယ်ကျင့်တရားစံနှုန်းတွေကို ငါလေးမြတ်ပြီး နှစ်သက်သလား။ (သု. ၃:၅၊ ၆ ကိုဖတ်ပါ။) လောကစိတ်ဓာတ်က သမ္မာကျမ်းစာနဲ့ဆန့်ကျင်တဲ့ သဘောထားကို အားပေးအားမြှောက်ပြုတယ်။ ဒီစိတ်ဓာတ်လွှမ်းမိုးခံရသူတွေက သူတို့မနှစ်သက်တဲ့ကျမ်းစာအပိုင်းတွေကို လျစ်လျူရှုပြီး လူ့ထုံးတမ်းစဉ်လာတွေနဲ့ အတွေးအခေါ်တွေကို ပိုနှစ်သက်ကြတယ်။ (၂ တိ. ၄:၃၊ ၄) တချို့သူတွေကျတော့ သမ္မာကျမ်းစာတစ်အုပ်လုံးကို လက်မခံကြဘူး။ သူတို့တွေက သမ္မာကျမ်းစာရဲ့ လက်တွေ့ကျမှုနဲ့ စစ်မှန်မှုကို သံသယဝင်ပြီး မိမိတို့ကိုယ်ကို ပညာရှိလို့ထင်နေကြတယ်။ အိမ်ထောင်ရေးဖောက်ပြန်မှု၊ လိင်တူမေထုန်၊ ကွာရှင်းခြင်းနဲ့သက်ဆိုင်တဲ့ စင်ကြယ်တဲ့စံနှုန်းတွေကို ပေါ့ပျက်စေကြတယ်။ သူတို့က “မကောင်းကိုအကောင်း၊ အကောင်းကိုမကောင်း” လို့သင်ပေးတယ်။ (ဟေရှာ. ၅:၂၀) ကျွန်ုပ်တို့အပေါ် ဒီစိတ်ဓာတ် လွှမ်းမိုးနေပြီလား။ ပြဿနာတွေနဲ့ရင်ဆိုင်ရတဲ့အခါ မိမိကိုယ်တိုင်ရဲ့အယူအဆအပါအဝင် လူ့ဉာဏ်ပညာကို အားကိုးသလား။ ဒါမှမဟုတ် ကျမ်းစာအကြံပေးချက်ကို ကြိုးစားလိုက်နာသလား။

၁၅။ ကိုယ့်ဉာဏ်ကိုအားကိုးမယ့်အစား ဘာလုပ်သင့်သလဲ။

^၁၅ ဘုရားသခင့်စွမ်းအားတော်က သမ္မာကျမ်းစာကိုလေးမြတ်ဖို့ လှုံ့ဆော်ပေးတယ်။ ဆာလံဆရာလိုပဲ ကျွန်ုပ်တို့က သမ္မာကျမ်းစာကို ကျွန်ုပ်တို့ခြေရှေ့မှာရှိတဲ့ မီးခွက်၊ လမ်းခရီးအတွက် အလင်းအဖြစ် ရှုမြင်ကြတယ်။ (ဆာ. ၁၁၉:၁၀၅) အမှားနဲ့အမှန်ကို ပိုင်းခြားရာမှာ ကိုယ့်ဉာဏ်ကိုအားကိုးမယ့်အစား သမ္မာကျမ်းစာကို လုံးလုံးယုံကြည်စိတ်ချ အားကိုးကြတယ်။ သမ္မာကျမ်းစာကို လေးမြတ်ဖို့သာမက ဘုရားသခင့်ပညတ်တွေကို နှစ်သက်ဖို့ပါ သင်ယူကြတယ်။—ဆာ. ၁၁၉:၉၇။

ယေရှုရဲ့ပုံသက်သေကနေ သင်ယူပါ

၁၆။ “ခရစ်တော်၏စိတ်သဘောထားမျိုး” ရှိဖို့ ဘာလုပ်ဖို့လိုသလဲ။

^၁၆ ဘုရားသခင့်စွမ်းအားတော်ရရှိဖို့ “ခရစ်တော်၏စိတ်သဘောထားမျိုး” ကျွန်ုပ်တို့ မွေးမြူရမယ်။ (၁ ကော. ၂:၁၆) “ခရစ်တော်ယေရှု၌ရှိသော စိတ်သဘောထားမျိုး” ရှိဖို့ ကိုယ်တော်ရဲ့ စဉ်းစားတွေးခေါ်ပုံနဲ့ ပြုမူကျင့်ကြံပုံတွေကို သိရှိပြီး တုပဖို့လိုတယ်။ (ရော. ၁၅:၅; ၁ ပေ. ၂:၂၁) ဒီလိုလုပ်နိုင်တဲ့ နည်းတချို့ကို သုံးသပ်ကြည့်ပါ။

၁၇၊ ၁၈။ (က) ဆုတောင်းခြင်းနဲ့ပတ်သက်ပြီး ယေရှုထံက ကျွန်ုပ်တို့ ဘာသင်ယူနိုင်သလဲ။ (ခ) ဘာကြောင့် “တောင်းမြဲတောင်း” သင့်သလဲ။

^၁၇ ဘုရားသခင့်စွမ်းအားတော်ရဖို့ ဆုတောင်းပါ။ စမ်းသပ်မှုတွေမကြုံရခင်မှာ ယေရှုက စွမ်းအားတော်အကူအညီရဖို့ ဆုတောင်းခဲ့တယ်။ (လု. ၂၂:၄၀၊ ၄၁) ကျွန်ုပ်တို့လည်း ဘုရားသခင့်သန့်ရှင်းသောစွမ်းအားတော်ကို တောင်းခံဖို့လိုတယ်။ ယုံကြည်ခြင်းနဲ့တောင်းခံသူတွေကို ယေဟောဝါ ရက်ရောစွာပေးတော်မူတယ်။ (လု. ၁၁:၁၃) ယေရှုဒီလိုပြောခဲ့တယ်– “တောင်းမြဲတောင်းကြလော့။ တောင်းလျှင် ရလိမ့်မည်။ ရှာမြဲရှာကြလော့။ ရှာလျှင် တွေ့လိမ့်မည်။ ခေါက်မြဲခေါက်ကြလော့။ ခေါက်လျှင် တံခါးဖွင့်ပေးလိမ့်မည်။ တောင်းသောသူတိုင်း ရ၏။ ရှာသောသူတိုင်း တွေ့၏။ ခေါက်သောသူတိုင်းအားလည်း တံခါးကိုဖွင့်ပေးလိမ့်မည်။”—မ. ၇:၇၊ ၈။

^၁၈ ယေဟောဝါရဲ့စွမ်းအားတော်နဲ့ အကူအညီရဖို့တောင်းခံရာမှာ အလွယ်တကူလက်မလျှော့ပါနဲ့။ မကြာခဏနဲ့ စွဲစွဲမြဲမြဲတောင်းဖို့လိုတယ်။ တစ်ခါတစ်ရံ ယေဟောဝါက ဆုတောင်းချက်တွေကိုမဖြေကြားမီ တောင်းလျှောက်သူတွေ ဘယ်လောက်အထိ အလေးအနက်ထားသလဲ၊ သူတို့ရဲ့ယုံကြည်ခြင်း ဘယ်လောက်အထိ စစ်မှန်သလဲဆိုတာတင်ပြဖို့ အခွင့်အရေးပေးတယ်။a

၁၉။ ယေရှု ဘာကိုအမြဲလုပ်ဆောင်ခဲ့သလဲ၊ ကျွန်ုပ်တို့ ဘာကြောင့် ကိုယ်တော့်ကို တုပသင့်သလဲ။

^၁၉ ယေဟောဝါကို အပြည့်အဝနာခံပါ။ ယေရှုက ခမည်းတော်နှစ်သက်ရာကို အမြဲပြုလုပ်ခဲ့တယ်။ တစ်ကြိမ်မှာတော့ ကိစ္စရပ်တစ်ခုနဲ့ပတ်သက်ပြီး ယေရှုလုပ်လိုရာနဲ့ ယေဟောဝါဖြစ်စေလိုရာ မကိုက်ညီခဲ့ဘူး။ ဒါပေမဲ့ ကိုယ်တော်က မိမိရဲ့ခမည်းတော်ကို “ကျွန်ုပ်၏အလိုအတိုင်း မဖြစ်ပါစေနှင့်။ ကိုယ်တော်၏အလိုတော်အတိုင်း ဖြစ်ပါစေ” ဆိုပြီး ယုံကြည်စိတ်ချမှုအပြည့်နဲ့ ပြောခဲ့တယ်။ (လု. ၂၂:၄၂) ‘နာခံမှုပြဖို့မလွယ်ကူတဲ့အခါမှာတောင် ဘုရားသခင်ကို ငါ နာခံသလား’ ဆိုပြီး မိမိကိုယ်ကိုမေးပါ။ ကျွန်ုပ်တို့ရဲ့အသက်က ဘုရားသခင်ကိုနာခံခြင်းအပေါ် မူတည်တယ်။ ကျွန်ုပ်တို့ရဲ့ဖန်ဆင်းရှင်၊ အသက်ပေးရှင်၊ အသက်ကိုထောက်ပံ့ပေးရှင်အနေနဲ့ ကိုယ်တော်က ကျွန်ုပ်တို့ရဲ့အကြွင်းမဲ့နာခံမှုကို ရထိုက်တယ်။ (ဆာ. ၉၅:၆၊ ၇) နာခံမှုကို ဘာနဲ့မှအစားထိုးလို့မရဘူး။ နာခံမှုမတင်ပြဘူးဆိုရင် ဘုရားသခင့်မျက်နှာသာမရနိုင်ဘူး။

၂၀။ ယေရှုအသက်တာမှာ လုပ်ဆောင်ခဲ့သမျှက ဘာနဲ့ပတ်သက်နေသလဲ၊ ကျွန်ုပ်တို့ ကိုယ်တော့်ကို ဘယ်လိုတုပနိုင်သလဲ။

^၂၀ သမ္မာကျမ်းစာကို ကောင်းစွာသိကျွမ်းပါ။ စာတန်ရဲ့တိုက်ရိုက်သွေးဆောင်မှုခံရချိန်မှာ ယေရှု ကျမ်းစာကိုကိုးကားခဲ့တယ်။ (လု. ၄:၁-၁၃) ဝတ်ပြုရေးခေါင်းဆောင်တွေရဲ့ ဆန့်ကျင်မှုတွေကိုကြုံရတဲ့အခါ ယေရှုက သမ္မာကျမ်းစာကို အသုံးပြုပြီး အဖြေပေးခဲ့တယ်။ (မ. ၁၅:၃-၆) ယေရှုအသက်တာမှာ လုပ်ဆောင်ခဲ့သမျှက ဘုရားသခင့်ပညတ်တွေကိုသိရှိပြီး အဲဒါတွေကိုပြည့်စုံစေဖို့ဖြစ်တယ်။ (မ. ၅:၁၇) ကျွန်ုပ်တို့လည်း ကျွန်ုပ်တို့ရဲ့စိတ်နှလုံးကို ယုံကြည်ခြင်းသန်စွမ်းစေတဲ့ ကျမ်းစာစကားတွေနဲ့ ဖြည့်ထားလိုကြတယ်။ (ဖိ. ၄:၈၊ ၉) တချို့သူတွေအတွက် ကိုယ်ပိုင်လေ့လာမှုနဲ့ မိသားစုလေ့လာမှုပြုလုပ်ဖို့ အချိန်ရှာရတာ ခက်ခဲနိုင်တယ်။ ကျွန်ုပ်တို့က အချိန်ကိုရှာရုံသာမဟုတ်ဘဲ အချိန်ရအောင် လုပ်ရမယ်။—ဧ. ၅:၁၅-၁၇။

၂၁။ သမ္မာကျမ်းစာအကြောင်း ကောင်းစွာသိရှိပြီး လက်တွေ့ကျင့်သုံးဖို့ ဘယ်အစီအစဉ်ကို အသုံးပြုနိုင်သလဲ။

^၂၁ ကိုယ်ပိုင်လေ့လာမှုနဲ့ မိသားစုဝတ်ပြုမှုအတွက် အချိန်ရစေဖို့ “သစ္စာနှင့်သတိပညာရှိသောကျွန်” က ပတ်စဉ်မိသားစုဝတ်ပြုမှုအစီအစဉ် ပြုလုပ်ပေးတယ်။ (မ. ၂၄:၄၅) ဒီအစီအစဉ်ကို သင် အကျိုးရှိရှိအသုံးချနေသလား။ ခရစ်တော်ရဲ့စိတ်သဘောထားမျိုးရှိဖို့ သင့်လေ့လာမှုအစီအစဉ်မှာ ယေရှုသွန်သင်ပေးခဲ့တဲ့အကြောင်းအရာတွေကို တစ်ခုပြီးတစ်ခုလေ့လာခြင်း ပါဝင်စေပါ။ သင်လေ့လာနေတဲ့အကြောင်းနဲ့ပတ်သက်တဲ့ ထပ်ဆင့်အချက်အလက်တွေကိုသိဖို့ ကင်းမျှော်စင်စာပေများအညွှန်းကို အသုံးပြုနိုင်ပါတယ်။ ဥပမာ၊ ၂၀၀၈ ခုနှစ်ကနေ ၂၀၁၀ ပြည့်နှစ်အထိထုတ်ဝေထားတဲ့ လူထုအတွက်မဂ္ဂဇင်းမှာ “ယေရှုထံမှ ကျွန်ုပ်တို့သင်ယူရရှိရာ” ဆိုတဲ့ ဆောင်းပါး ၁၂ ပုဒ် ပါဝင်တယ်။ ဒီဆောင်းပါးတွေကို သင့်လေ့လာမှုမှာ ထည့်သွင်းသုံးသပ်နိုင်ပါတယ်။ ၂၀၀၆ ခုနှစ်ကစပြီး နိုးလော့! မှာ “သင် မည်သို့ဖြေဆိုမည်နည်း” ဆိုတဲ့ ကဏ္ဍပါလာတယ်။ ဒီအပိုင်းက ကျမ်းစာအသိပညာကို နက်နက်နဲနဲ၊ ကျယ်ကျယ်ပြန့်ပြန့် သိရှိစေပါတယ်။ ဒါတွေကို သင့်မိသားစုဝတ်ပြုမှုအစီအစဉ်မှာ အခါအားလျော်စွာ ထည့်သွင်းသုံးသပ်ပါ။

ကျွန်ုပ်တို့ လောကကိုအောင်နိုင်

၂၂၊ ၂၃။ လောကကို အောင်နိုင်ဖို့ ကျွန်ုပ်တို့ ဘာလုပ်ရမလဲ။

^၂၂ ဘုရားသခင့်စွမ်းအားတော်ရရှိဖို့ လောကစိတ်ဓာတ်ကို တွန်းလှန်ရမှာဖြစ်တယ်။ ဒီလိုတွန်းလှန်ဖို့ဆိုတာ မလွယ်ကူပါဘူး။ ခက်ခက်ခဲခဲကြိုးစားရမှာဖြစ်တယ်။ (ယု. ၃) ဒါပေမဲ့ ကျွန်ုပ်တို့ အောင်မြင်နိုင်ပါတယ်။ ယေရှုက တပည့်တွေကို ဒီလိုပြောခဲ့တယ်– “သင်တို့သည် ဤလောက၌ ဆင်းရဲဒုက္ခကို ခံရကြ၏။ သို့သော်လည်း အားယူကြလော့။ ငါသည် လောကကို အောင်ပြီ။”—ယော. ၁၆:၃၃။

^၂၃ ကျွန်ုပ်တို့လည်း လောကစိတ်ဓာတ်ကို တွန်းလှန်ပြီး ဘုရားသခင့်စွမ်းအားတော်ရရှိဖို့ အတတ်နိုင်ဆုံးလုပ်ဆောင်မယ်ဆိုရင် လောကကိုအောင်မြင်နိုင်ပါတယ်။ အမှန်ပါပဲ၊ “ဘုရားသခင်သည် ငါတို့ဘက်၌ရှိတော်မူလျှင် ငါတို့ကို မည်သူဆန့်ကျင်နိုင်မည်နည်း။” (ရော. ၈:၃၁) ဘုရားသခင့်စွမ်းအားတော်ရရှိပြီး စွမ်းအားတော်တိုက်တွန်းမှုနဲ့ရေးထားတဲ့ သမ္မာကျမ်းစာလမ်းညွှန်မှုအတိုင်း လုပ်ဆောင်ခြင်းက ကျေနပ်ရောင့်ရဲမှု၊ စိတ်ငြိမ်သက်မှု၊ ပျော်ရွှင်မှုခံစားရစေပြီး ရောက်လာတော့မယ့် ကမ္ဘာသစ်မှာ ထာဝရအသက်ရမယ်ဆိုတဲ့အာမခံချက်ကို ရရှိစေတယ်။

[အောက်ခြေမှတ်ချက်]

သင် မှတ်မိသလား

• လောကစိတ်ဓာတ်က ဘာကြောင့် ဒီလောက်ပျံ့နှံ့နေရသလဲ။

• ကျွန်ုပ်တို့ကိုယ်ကို ဘယ်မေးခွန်းလေးခု မေးသင့်သလဲ။

• ဘုရားသခင့်စွမ်းအားတော်ရရှိဖို့ ယေရှုထံက ဘယ်အချက်သုံးချက်ကို သင်ယူသိရှိခဲ့သလဲ။

[စာမျက်နှာ ၈ ပါ ရုပ်ပုံ]

ကောင်းကင်တမန်တချို့ ဘာကြောင့် နာမ်ဝိညာဉ်ဆိုးတွေဖြစ်သွားသလဲ

[စာမျက်နှာ ၁၀ ပါ ရုပ်ပုံ]

စာတန်က လူတွေကိုထိန်းချုပ်ဖို့ လောကစိတ်ဓာတ်ကိုအသုံးပြုတယ်၊ ဒါပေမဲ့ သူ့ရဲ့သြဇာလွှမ်းမိုးမှုကနေ ကျွန်ုပ်တို့ လွတ်မြောက်နိုင်