အဓိပ္ပာယ်ရှိရှိ မိသားစုကျမ်းစာသင်အံမှုများ ကျင်းပခြင်း

^၁ မိဘများပြုရမည့် အရေးအကြီးဆုံးလုပ်ငန်းတစ်ခုမှာ သားသမီးများကို သမ္မာတရားသွန်သင်ပေးခြင်းဖြစ်သည်။ ယင်းသည်ယေဟောဝါပေးတာဝန်ဖြစ်၏။ (တရား၊ ၆:၆၊ ၇) ဘုရားမဲ့လောကတွင် မှန်ကန်စွာပြုမူရန် သားသမီးများသည် လမ်းပြညွှန်ကြားမှုလိုသည်။ ယေဟောဝါနှင့်သမ္မာတရားကိုချစ်မြတ်နိုးကာ စွဲမြဲစွာဆုပ်ကိုင်ထားတတ်ကြရမည်။ အသင့်မှာ အခြားတာဝန်များ၊ အခက်အခဲများရှိနေဦးတော့ သားသမီးများအား အချိန်ပေးခြင်းကို ဦးစားထားပြုလုပ်ရမည်။ သားသမီးများ၏နှလုံးကိုစောင့်ရှောက်ပေး၍ လမ်းမှန်ပေါ်ပို့ဆောင်စေမည့် ဝိညာဏတန်ဖိုးရှိရာတို့ကို သူတို့နှလုံးထဲ ထည့်သွင်းပေးပါ။

^၂ ဘုရားသခင့်နှုတ်ကပတ်တော်ပါ လမ်းပြတို့ကို မိသားစုများလိုက်လျှောက်ကြရန် မိသားစုသင်အံမှုအတွက် အချိန်မှန်မှန်ဖယ်ထားရမည်။ မိသားစု၏ဝိညာဉ်ရေးကို အိမ်ထောင်ဦးစီးများဦးစားပေးပြုစုရမည်။ အိမ်ထောင်၏ဝိညာဏလိုအပ်ရာကို ယခုဂရုမစိုက်လျှင် နောင်တွင် ကြီးမားသောပြဿနာများကို မိဘများဖြေရှင်းပေးရန်အကြောင်း ပေါ်လာနိုင်သည်။

လေ့လာစရာအကြောင်းနှင့်နည်းနိဿယ

^၃ ဘာကိုလေ့လာရမည်နည်း။ မိသားစုလိုအပ်ရာကို အိမ်ထောင်ဦးစီးအသိဆုံးဖြစ်သည်။ အဘယ်အကြောင်းလေ့လာရန် အကျိုးရှိမည်ကို အိမ်ထောင်စုမှအကြံတောင်းခံ၍ဆုံးဖြတ်နိုင်သည်။ တော်သင့်စွာပြုပြင်ပြောင်းလဲပေးခြင်းသည် မိသားစုသင်အံမှုကိုလက်တွေ့ကျစေရုံမက အားတက်စရာလည်းဖြစ်စေမည်။ ပတ်စဉ်ကင်းမျှော်စင်သင်တန်း၌လေ့လာရမည့်အကြောင်းကို အတူတကွပြင်ဆင်ရန် မိသားစုအများ ရွေးချယ်ပြုလုပ်ကြသည်။ သို့ရာတွင် ကျောင်း၌လူငယ်များရင်ဆိုင်နေရသည့် အခက်အခဲများကိုဆွေးနွေးပေးရန် လိုအပ်လာမည့်အချိန်များရှိပေမည်။ ချိန်းတွေ့ခြင်း၊ ကျောင်းပြင်ပလုပ်ရပ်များ၊ အားကစား၊ သီလယိုယွင်းခြင်းခြေလှမ်းများတို့ကို တည်ဆောက်မှုဖြစ်စွာ၊ အားပေးတိုက်တွန်းမှုဖြစ်စေသည့်နည်းများဖြင့် သုံးသပ်ဆင်ခြင်နိုင်သည်။ မိသားစုအဘယ်အရာလိုအပ်သည်၊ သူတို့နှလုံးထိမိစေမည့်အကောင်းဆုံးနည်းကား အဘယ်နည်းဖြစ်သည်ကို အိမ်ထောင်ဦးစီးအစဉ်အမြဲစစ်ဆေးသုံးသပ်နေရန် အရေးကြီးသည်။

^၄ သင်အံမှုကိုမည်သို့ကျင်းပရမည်နည်း။ သက်သောင့်သက်သာအနေအထားနှင့် တစ်ချိန်တည်းလေးစားရိုသေသမှုရှိရှိပြုလုပ်ပါ။ လွန်ကဲစွာစည်းမျဉ်းတကျကျင်းပခြင်းကို ရှောင်ပါ။ တွေးတောဆင်ခြင်မှုကိုနှိုးဆွပေးရန်၊ လူတိုင်းနှင့်သက်ဆိုင်စေရန် ထပ်ဆင့်မေးခွန်းများမေးမြန်း၍ ဥပမာများကိုလည်းအသုံးပြုပါ။ မြေပုံများနှင့်ဇယားကွက်များ အစရှိသည့်အကူအညီပေးပစ္စည်းများနှင့် လေ့လာရာကိုပိုစိတ်ဝင်စားစေနိုင်သည်။ ကလေးငယ်များပါဝင်နိုင်သည့်အရွယ်ရောက်သည်နှင့် ပါဝင်ဖြေဆိုပါလေစေ။ လွယ်ကူသောအမေးများကို သူတို့အား မေးမြန်းနိုင်သည်။ သင်အံမှုပြုချိန်ကို သားသမီးများအားဆိုဆုံးမချိန် မဖြစ်ပါစေနှင့်။ ၄င်းအစား သူတို့ကိုချီးမွမ်းပါ။ သူတို့ကြိုးစားလေသမျှကို တွေ့မြင်သည့်အကြောင်းအသိပေးပါ။ သိမြင်စရာဝိညာဏအချက်အလက်များကို သူတို့နှင့်အားတက်သရောဆွေးနွေးပါ။

^၅ သူတို့နှလုံးထိမိနေမနေ မည်သို့သေချာနိုင်မည်နည်း။ ကိုယ်ပိုင်စကားဖြင့် အဖြေပေးကြရန်အားပေးပါ။ နှလုံးထားကိုသိရှိရန် သိမြင်ချက်မေးခွန်းများကို လိမ္မာပါးနပ်စွာမေးမြန်းပါ။ ဤသို့မေးနိုင်သည်။ “ကျောင်းနေကလေးများ ဒီကိစ္စကိုဘယ်လိုယူဆသလဲ။ ဒါကိုသံသယရှိနေသလား။” သိမြင်ချက်မေးခွန်းများကို ကလေးများဖြေဆိုပုံကြောင့် စိတ်အနှောင့်အယှက်မဖြစ်ရန် ဂရုပြုပါ။ သို့မဟုတ်လျှင် သားသမီးများသည် သူတို့စိတ်ရှိရာကို မှန်မှန်ကန်ကန် မတင်ပြဝံ့တော့ဘဲဖြစ်မည်။ ထုတ်ဖေါ်ပြောဆိုရန် အချိန်ပေးပါ။ သူတို့၏အခက်အခဲများနှင့် သူတို့၌ သင်စိတ်ဝင်စားကြောင်း သူတို့သိထားခြင်းသည် သင့်သွန်သင်မှုကို ပိုလွယ်ကူစေမည်။​—၁၉၈၇၊ နိုဝင်ဘာ ၁၊ ကင်းမျှော်စင်၊ စာမျက်နှာ ၁၄-၁၇ ကိုရှု။

^၆ သင့်မိသားစုသင်အံမှု၏အဓိကရည်ရွယ်ချက်မှာ အသင်းတော်အစည်းအဝေးတွင် အဖြေပေးစရာအတွက်မဟုတ်ဘဲ ယေဟောဝါ၏အကြံအစည်များကို နှလုံးသွင်းရန်ဖြစ်ကြောင်း စွဲမှတ်ထားပါ။ (ဧ၊ ၃:၁၇-၁၉) ယင်းကြောင့် နှလုံးထဲအချက်အလက်များစွဲမှတ်ထားနိုင်ရန် ကြိုးစားအားထုတ်ရပေမည်။ ဘုရားသခင်၏အလိုတော်ကို အဘယ်ကြောင့်ဆောင်ရွက်သင့်ကြောင်း၊ ယင်းသည် ဘဝအတွက်အကောင်းဆုံးလမ်းစဉ် အဘယ်ကြောင့်ဖြစ်ကြောင်း မိသားစုအားသဘောပေါက်စေပါ။

^၇ မိသားစု၏ဝိညာဏတည်ဆောက်မှုအတွက် မိသားစုကျမ်းစာသင်အံမှုကို မှန်မှန်ပြုလုပ်ပေးရန် အရေးကြီးသည်။ ယင်းသည် သားသမီးများအား ဘဝပြဿနာများကိုကိုင်တွယ်တတ်ရန် လေ့ကျင့်ပေး၍ အသင့်ရှိစေသည်။ မိဘများသာ သားသမီးများကို အကူအညီပေးနိုင်ဆုံးသူများဖြစ်သည်။ ဤဘုရားပေးတာဝန်ကို ကျေပွန်စွာဆောင်ရွက်ပါ။ အဓိပ္ပာယ်ရှိရှိ မိသားစုကျမ်းစာသင်အံမှုများကို မှန်မှန်ကျင်းပရန် သင်ကြိုးစားလေသမျှကို ယေဟောဝါအမှန်တကယ်ကောင်းချီးပေးတော်မူမည်။