အကျွန်ုပ် ဆက်၍ ပြောင်းလဲရန် လိုသလော
ကျွန်ုပ်တို့၏နိုင်ငံတော်ဓမ္မအမှု စာစောင်တိုင်းတွင် သက်သေခံရာ၌ ကျွန်ုပ်တို့အသုံးပြုနိုင်သည့် ကျမ်းစာဆိုင်ရာ တင်ဆက်ပုံအမျိုးမျိုး ပါရှိသည်။ လှုပ်လှုပ်ရှားရှားရှိသော ကြေညာသူ မြောက်မြားစွာတို့သည် အကြံဉာဏ်အသစ်များနှင့် ချဉ်းကပ်နည်းအမျိုးမျိုးကို ရရှိလိုကြသည်။ ကျွန်ုပ်တို့၏နိုင်ငံတော်ဓမ္မအမှုက လစဉ်လတိုင်း အကြံပြုချက်အသစ်များကို တင်ပြပေးပါသည်။
သို့ရာတွင် အသင်အသုံးပြုသောအရာကို ပြုပြင်ပြောင်းလဲပေးရန်မလိုဟု အသင်ယူဆနေပေမည်။ တစ်အိမ်မှတစ်အိမ်လုပ်ငန်းတွင် လစဉ်ပါဝင်ရန် အချိန်နာရီ အနည်းငယ်သာ ရှိကောင်းရှိပေမည်။ နှစ်ကာလတစ်လျှောက် သင်အကျင့်သားရနေသည့် တင်ဆက်ဟောပြောနည်းအချို့ ရှိထားနေမည်။ ယင်းတို့ကိုအသုံးပြုခဲ့၍လည်း အကျိုးဖြစ်ထွန်းနေပေမည်။ ဆာလံ ၃၇:၉-၁၁၊ ၂ ပေတရု ၃:၁၃၊ ဗျာဒိတ် ၂၁:၄ စသည့် အသုံးပြုနေကျ ကျမ်းချက်တစ်ခု (ဝါ) နှစ်ခုများကိုသာ သုံးလေ့သုံးထရှိနေမည်။ ထိုသို့ဖြစ်လျှင် အပြောင်းအလဲရှိစေရန် ပြုပြင်ပြောင်းလဲရမည်ဟု ယူမှတ်စရာအကြောင်းမရှိပါ။ ကျွန်ုပ်တို့၏အဓိကပန်းတိုင်မှာ သူတစ်ပါးအား နိုင်ငံတော်ကို မျှော်လင့်စေလို၍ သူတို့လည်း ယေဟောဝါ၏ကောင်းချီးများခံစားရန် ပြုလုပ်ရမည့်အလုပ်ကို လုပ်ဆောင်ကြရန် ကူညီပေးဖို့ဖြစ်သည်။ ကျိုးကြောင်းဆင်ခြင်စာအုပ်တွင် သင်အသုံးပြုလိုသည့် အခန့်သင့်၍နှစ်လိုဖွယ်ဖြစ်သော ဟောပြောနည်းများ တွေ့ရှိပြီး ယင်းတို့ကိုအသုံးပြုလျက် တုံ့ပြန်မှုကောင်းကောင်း ရရှိနေသည်ဆိုလျှင် ယင်းတို့ကို အသုံးမပြုဘဲ မနေပါနှင့်။