ဘုရားသခင့်နှုတ်မြွက်စကားတော်လေ့လာဖို့ စိတ်ဝင်စားသူများကို ရှာတွေ့ရန်နိုးကြားနေပါ

^၁ ယေဟောဝါက “‘လာကြလော့!’ . . . ဆန္ဒရှိသူတိုင်း အသက်ရေကို အခမဲ့ယူပါစေ” ဟုဖိတ်ခေါ်နေပါသည်။ (ဗျာ. ၂၂:၁၇၊ ကဘ) ယေရှုက မိမိ၏နောက်လိုက်များအား “တပည့်ဖြစ်စေလျက် . . . ငါသည် သင်တို့အား ပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမသြဝါဒပေးကြလော့” ဟုညွှန်ကြားခဲ့သည်။ (မ. ၂၈:၁၉၊ ၂၀) သွန်သင်ခံလိုသူများကို ကျွန်ုပ်တို့မည်သို့ရှာတွေ့နိုင်သနည်း။

^၂ သတင်းကောင်းဟောပြောရန် မိမိ၏တမန်တော်များကိုမစေလွှတ်မီ ယေရှုက “မည်သည့်မြို့ရွာကိုမဆိုဝင်သော် မည်သူထိုက်တန်ကြောင်း စူးစမ်းရှာဖွေပြီးလျှင် ထိုမြို့ရွာမှမထွက်သွားမီ သူ့အိမ်၌တည်းခိုကြလော့” ဟုမိန့်ဆိုခဲ့သည်။ (မ. ၁၀:၁၁၊ သမ) ယနေ့ ကျွန်ုပ်တို့သည် ထိုက်တန်သူများကို ‘ရှာဖွေ’ သို့မဟုတ် ကျမ်းစာလေ့လာလိုသော စိတ်ဝင်စားသူများကို ရှာဖွေကြကာ ‘ထိုမြို့ရွာမှမထွက်သွားမီ သူ့အိမ်၌တည်းခိုကြ’ သို့မဟုတ် သမ္မာတရားသည် သူတို့ကိုယ်ပိုင်ဖြစ်လာသည့်အထိ သမ္မာတရားသွန်သင်ပေးဖို့ သူတို့ထံမှန်မှန်လည်ပတ်ကြသည်။

^၃ ကျွန်ုပ်တို့သည် ကျမ်းစာလေ့လာလိုသူများကိုရှာတွေ့ရန် နိုးကြားနေရမည်။ ယင်းကို ကျွန်ုပ်တို့ မည်သို့လုပ်ဆောင်မည်နည်း။ သူတို့စိတ်ဝင်စားမှုပြသည်ဖြစ်စေ၊ မပြသည်ဖြစ်စေ သင်သည် လူတို့ကိုကျမ်းစာအခမဲ့သင်ပေးကြောင်း၊ ယင်းသည် တစ်ပတ်လျှင်တစ်ကြိမ် မိနစ်အနည်းငယ်သာကြာမည်ဖြစ်ကြောင်း ပါးနပ်စွာပြောဆိုပါ။ သင်သည် ကျွန်ုပ်တို့သင်အံမှုမည်သို့ကျင်းပသည်ကိုပြပေးမည်ဟု ကမ်းလှမ်းနိုင်သည်။ ထို့နောက် တောင်းဆို ဘရိုရှာ သင်ခန်းစာတစ်ကိုသုံးကာ ၅ မိနစ်ခန့်ပြလျှင် လုံလောက်သင့်သည်။ ယင်းကို ရိုးရိုးကလေးဖြစ်စေပါ။ သင်အံမှုပြုပြီးနောက် သင်အံမှုအတွက်ပြန်လာရန်စီစဉ်ပါ။ သင်သည် သင်အံမှုအတွက် ပြန်သွားသောအခါ အိမ်ရှင်က အချိန်ကြာကြာသင်လိုစိတ်မရှိလျှင် ၅ မိနစ် သို့မဟုတ် ၁၀ မိနစ်သာကြာစေပါ။

^၄ ကျွန်ုပ်တို့အများစု၏အိမ်တွင် ‘ထိုက်တန်’ သူများရှိပါသည်။ မှန်ပါသည်၊ ကျွန်ုပ်တို့သည် မိမိတို့၏သားသမီးများနှင့် သင်အံမှုကျင်းပသင့်သည်။ ယေဟောဝါဘုရားသခင်က မိဘတို့သည် မိမိတို့၏သားသမီးများအား သမ္မာတရားသင်ပေးသင့်သည်ဟု အတိအကျမိန့်မှာခဲ့သည်။ ကိုယ်တော်က “ယနေ့ငါမှာထားသောစကားကို . . . သင်၏သားသမီးတို့အား ကြိုးစား၍သွန်သင်ရမည်” ဟုမိန့်ဆိုခဲ့သည်။ (တရား. ၆:၆၊ ၇) တစ်ခါတစ်ရံ သူတို့၏အသက်အရွယ်နှင့် အစွမ်းအစများကြောင့် ကလေးအားလုံးကို တစ်ပြိုင်တည်းသင်၍ရနိုင်မည်မဟုတ်။ ဖခင်က ကြီးသည့်ကလေး(များ) ကို သင်ပေးနိုင်ပြီး မိခင်ကမူ ငယ်သည့်ကလေး(များ) ကို သင်ပေးနိုင်သည်။

^၅ သားသမီးများအား ၎င်းတို့၏အသက်အရွယ်နှင့် အစွမ်းအစများအရ သူတို့၏ကျောင်းနေဖက်တို့နှင့် သင်အံမှုကျင်းပရန် အားပေးသင့်သည်။ မိဘတို့သည် မိမိတို့၏သားသမီးများ ကျမ်းစာသင်အံမှုများစရန် ကူညီပေးနိုင်သည်။ မိမိတို့တွင်ကလေးမရှိသူအချို့ရှိပါသည်။ သမ္မာတရား၌မရှိသော မိဘတို့၏ကလေးများကို ရှာဖွေကာ သူတို့နှင့်သင်အံမှုကျင်းပပါလေ။

^၆ မြန်မာနိုင်ငံတွင် ဆယ်စုနှစ်များစွာအထိ ကျွန်ုပ်တို့၏ပျမ်းမျှကျမ်းစာသင်အံမှုမှာ ၀.၂ ဖြစ်နေပါသည်။ ကျွန်ုပ်တို့သည် မိမိတို့၏ကျမ်းစာသင်အံမှုလုပ်ငန်းတိုးတက်ရန် ကြိုးစားကြရမည်။ ကြေညာသူတိုင်းတွင် တစ်ဦးလျှင် ကျမ်းစာသင်အံမှုတစ်ခုစီ သို့မဟုတ် ထိုထက်မကရှိရမည်။ ထို့ကြောင့် ဘုရားသခင့်နှုတ်မြွက်စကားတော်သမ္မာကျမ်းစာကို လေ့လာလိုသူများအား ရှာတွေ့ရန် နိုးကြားနေကြစို့။