အခြားသူများနှင့် ကျိုးကြောင်းဆင်ခြင်ရာတွင် ကျွမ်းကျင်မှုရှိပါ

၁။ အဘယ်ကျမ်းစာမှတ်တမ်းကို ကျွန်ုပ်တို့ဆန်းစစ်ကြမည်နည်း၊ အဘယ်ကြောင့်နည်း။

^၁ ပိသိဒိပြည်၊ အန္တိအုတ်မြို့ရှိ တရားဇရပ်တစ်ခုတွင်ဟောခဲ့သည့် တမန်တော် ၁၃:၁၆-၄၁ ပါ တမန်တော်ပေါလု၏ဟောပြောချက်က အခြားသူများနှင့် ကျိုးကြောင်းဆင်ခြင်ပုံနှင့်စပ်လျဉ်းသည့် နမူနာကောင်းတစ်ခုကိုဖော်ပြသည်။ ပေါလုသည် နားထောင်နေသူများ၏ နောက်ခံနှင့် စိတ်နေသဘောထားကို ထည့်တွက်စဉ်းစားကာ သူ၏သတင်းကောင်းတင်ဆက်မှုကို ၎င်းနှင့်အညီ ပြုပြင်ပြောင်းလဲခဲ့သည်။ ဤမှတ်တမ်းကို ကျွန်ုပ်တို့ဆန်းစစ်စဉ် ကျွန်ုပ်တို့၏ဓမ္မအမှုတွင် အလားတူပြုလုပ်နိုင်ပုံကို သုံးသပ်ကြည့်ကြစို့။

၂။ ပေါလု၏ ဟောပြောချက်နိဒါန်းပျိုးပုံမှ ကျွန်ုပ်တို့ အဘယ်အရာ သင်ယူသိရှိရသနည်း။

^၂ အခြေခံတူညီမှုများကိုရှာယူပါ– ဘုရားသခင်၏ရည်ရွယ်တော်မူချက် အကောင်အထည်ဖော်ရာတွင်ပါဝင်သည့် ယေရှု၏အခန်းကဏ္ဍအပေါ် မိမိ၏သတင်းတရားကို အခြေပြုထားသော်လည်း ပေါလုသည် ထိုအရာကိုဖော်ပြခြင်းဖြင့် ဟောပြောချက်ကို နိဒါန်းမပျိုးခဲ့ချေ။ ယင်းအစား သူနှင့် အဓိက ဂျူးပရိသတ်တို့တွင် အခြေခံအားဖြင့် တူညီသည့်အကြောင်းအရာ—ဂျူးလူမျိုးတို့၏သမိုင်း—ကိုပြောဆိုခဲ့သည်။ (တ. ၁၃:၁၆-၂၂) ထိုနည်းတူ ကျွန်ုပ်တို့သည် မိမိတို့နှင့် အခြားသူတို့တွင် အခြေခံတူညီမှုများတွေ့ရှိရန် ရှာဖွေမည်ဆိုလျှင် သူတို့၏နှလုံးကို ပို၍ထိမိစေပါလိမ့်မည်။ ထိုသို့ဖြစ်ရန် ကျွန်ုပ်တို့သည် လိမ္မာပါးနပ်စွာ မေးခွန်းများမေး၍ သူတို့၏သဘောထားကိုနှိုက်ထုတ်ကာ သူတို့အတွက် တကယ်အရေးကြီးသောအရာကို သိမြင်ရန် ဂရုတစိုက်နားထောင်ပေးဖို့လိုသည်။

၃။ ယေရှုအား ကတိထားရာမေရှိယအဖြစ်လက်ခံရန် ပေါလု၏ပရိသတ်ကို အဘယ်အရာက အခက်တွေ့စေခဲ့သနည်း။

^၃ ဂျူးသမိုင်းကိုဆွေးနွေးရာတွင် ပေါလုသည် နားထောင်နေသူများအား ဒါဝိဒ်၏အမျိုးအနွယ်မှ ကယ်တင်ရှင်ပေါ်ထွန်းမည်ဟူသော ဘုရားသခင့်ကတိတော်ကို သတိရစေခဲ့သည်။ သို့သော် ဂျူးများစွာသည် ရောမအုပ်ချုပ်မှုအောက်မှ လွတ်မြောက်စေကာ ဂျူးလူမျိုးကို အခြားလူမျိုးတို့အပေါ် မြှင့်တင်ပေးမည့် စစ်သူရဲကောင်းတစ်ဦးကို စောင့်မျှော်နေကြသည်။ ယေရုရှလင်မြို့ရှိ ဂျူးဘာသာရေးခေါင်းဆောင်များသည် ယေရှုကို ငြင်းပယ်ပြီး ရောမအာဏာပိုင်များထံလွှဲအပ်ကာ ကွပ်မျက်ခဲ့ကြောင်း သူတို့ အမှန်ပင်သိထားကြသည်။ ဤပုဂ္ဂိုလ်သည် ကတိထားရာမေရှိယဖြစ်ကြောင်း သူတို့ယုံကြည်လာရန် ပေါလုမည်သို့ပြုလုပ်နိုင်ခဲ့သနည်း။

၄။ ပေါလုသည် ဂျူးပရိသတ်နှင့် မည်သို့ကျွမ်းကျင်စွာ ကျိုးကြောင်းဆင်ခြင်ခဲ့သနည်း။

^၄ သင့်ချဉ်းကပ်နည်းကို ပြုပြင်ပြောင်းလဲပါ– နားထောင်နေသူများ၏သဘောထားကို သိရှိထားရာ ပေါလုသည် သူတို့လက်ခံထားပြီးသား အကြောင်းအရာများအပေါ်အခြေပြု၍ သူတို့နှင့် ကျိုးကြောင်းဆင်ခြင်ရန် ကျမ်းစာကို အသုံးပြုခဲ့သည်။ ဥပမာ၊ သူသည် ယေရှုအား ဒါဝိဒ်၏မျိုးနွယ်ဖြစ်ကြောင်း၊ ဘုရားသခင်၏ပရောဖက်တစ်ပါးအဖြစ် အများယူမှတ်ထားကြသည့် နှစ်ခြင်းဆရာယောဟန်က ကိုယ်တော်သည် မည်သူမည်ဝါဖြစ်သည်ဟု ဖော်ပြခဲ့ကြောင်း နိဒါန်းပျိုးခဲ့သည်။ (တ. ၁၃:၂၃-၂၅) ယေရှုအား ငြင်းပယ်ပြီး သေဒဏ်ချမှတ်ခဲ့ခြင်းဖြင့် ဘာသာရေးခေါင်းဆောင်များသည် “ပရောဖက်တို့၏စကားကို ပြည့်စုံစေကြ” ကြောင်း ပေါလုထောက်ပြခဲ့သည်။ (တ. ၁၃:၂၆-၂၈) ထို့ပြင် သေခြင်းမှ ယေရှုထမြောက်ခဲ့သည်ကိုတွေ့ မြင်သူ မျက်မြင်သက်သေများရှိကြောင်း ရှင်းပြကာ ယေရှုရှင်ပြန်ထမြောက်ခြင်းဖြင့် ပြည့်စုံခဲ့ပြီဖြစ်သည့် သူတို့အကျွမ်းတဝင်ရှိသောကျမ်းပိုဒ်များကို အာရုံစိုက်စေခဲ့သည်။—တ. ၁၃:၂၉-၃၇။

၅။ (က) ပေါလုသည် ဂရိပရိသတ်ကိုဟောပြောသည့်အခါ သူ၏ချဉ်းကပ်နည်းကို မည်သို့ပြုပြင်ပြောင်းလဲခဲ့သနည်း။ (ခ) ဒေသခံရပ်ကွက်တွင် သက်သေခံသည့်အခါ ပေါလု၏ပုံသက်သေကို ကျွန်ုပ်တို့ မည်သို့တုပနိုင်သနည်း။

^၅ အာသင်မြို့ရှိ အာရေတောင်တွင် ဂရိပရိသတ်ကို ဟောပြောသည့်အခါတွင်မူ ပေါလုသည် အခြားချဉ်းကပ်နည်းတစ်ခုကို အသုံးပြုခဲ့သည်။ (တ. ၁၇:၂၂-၃၁) သို့သော် သူသည် အခြေခံတူညီသောသတင်းတရားကို တင်ဆက်ခဲ့ရာ ထိုဖြစ်ရပ်နှစ်ခုစလုံးတွင် ကြိုးစားမှုရလဒ်ကောင်းများရရှိခဲ့သည်။ (တ. ၁၃:၄၂၊ ၄၃; ၁၇:၃၄) အလားတူ ယနေ့လည်း ကျွန်ုပ်တို့နှင့် ကျွန်ုပ်တို့ကို နားထောင်နေသူများတွင်ရှိသော အခြေခံတူညီမှုများရှာဖွေပြီး သူတို့၏နောက်ခံ၊ သဘောထားနှင့်အညီ ချဉ်းကပ်နည်းကို ပြုပြင်ပြောင်းလဲမည်ဆိုလျှင် ဓမ္မအမှုတွင် ပို၍ထိရောက်မှုရှိပါလိမ့်မည်။