‘ကြောက်ရွံ့ခြင်းမရှိဘဲ နှုတ်ကပါဌ်တရားတော်ကို ဟောပြောကြ’

^၁ ကျောင်းနှင့်အလုပ်ခွင်တွင် သင့်ယုံကြည်ချက်ကိုဝေမျှရန် အခွင့်အရေးရသည့်အခါ တစ်ခါတစ်ရံ တွန့်ဆုတ်နေသလော။ ဆွေမျိုးများ၊ အိမ်နီးချင်းများနှင့် သူစိမ်းများကို အလွတ်သဘောသက်သေခံရန် အခက်တွေ့နေသလော။ အခွင့်အရေးရသည့်အခါ ‘ကြောက်ရွံ့ခြင်းမရှိဘဲ နှုတ်ကပါဌ်တရားတော်ကိုဟောပြော’ နိုင်ရန် အဘယ်အရာက ကူညီပေးမည်နည်း။—ဖိ. ၁:၁၄။

^၂ မတွန့်ဆုတ်နှင့်– မိတ်ဆွေရင်း သို့မဟုတ် ဆွေမျိုးတစ်ဦး မတရားစွပ်စွဲခံနေရသည်ဆိုလျှင် သူ့ဘက်မှ ချေပပြောဆိုရန် သင်တွန့်ဆုတ်နေမည်လော။ ကျွန်ုပ်တို့၏အရင်းနှီးဆုံးမိတ်ဆွေ ယေဟောဝါရှင်သည် ရာစုနှစ်များတစ်လျှောက် မတရားစွပ်စွဲခံနေရသည်။ ကျွန်ုပ်တို့သည် ကြီးမြတ်လှသောဘုရားသခင်၏ သက်သေတစ်ဦးဖြစ်ရသည့် အခွင့်ထူးရရှိထားကြ၏။ (ဟေရှာ. ၄၃:၁၀-၁၂) ယေဟောဝါကို နှစ်နှစ်ကာကာချစ်ခြင်းက အရှက်အကြောက်ကြီးသည့်စိတ် လျော့နည်းစေပြီး အမှန်တရားကို ရဲရဲရင့်ရင့်သက်သေခံရန် စေ့ဆော်ပေးနိုင်သည်။—တ. ၄:၂၆၊ ၂၉၊ ၃၁။

^၃ ကျွန်ုပ်တို့ဟောသောသတင်းမှာ သတင်းကောင်းဖြစ်ကြောင်း အမှတ်ရပါ။ ယင်းကိုလက်ခံသူများသည် ထာဝရတည်မြဲသော အကျိုးကျေးဇူးများခံစားရမည်။ မိမိကိုယ်ကို သို့မဟုတ် အတိုက်အခံပြုသူများကိုမဟုတ်ဘဲ ဟောပြောခြင်းလုပ်ငန်း၏တန်ဖိုးကို အာရုံစိုက်ခြင်းက ရဲရဲရင့်ရင့်ဟောပြောစေနိုင်သည်။

^၄ အခြားသူများ၏ပုံနမူနာ– ဘုရားသခင့်နှုတ်ကပါဌ်တော်ကို မကြောက်မရွံ့ဟောပြောခဲ့သူများ၏ သစ္စာရှိလမ်းစဉ်မှ ကျွန်ုပ်တို့ခွန်အားရနိုင်ပါသည်။ ဥပမာ၊ ဧနောက်သည် ဘုရားတရားမဲ့ လူဆိုးများအား ယေဟောဝါ၏တရားစီရင်ခြင်းသတင်းကို သတ္တိရှိရှိကြေညာခဲ့သည်။ (ယု. ၁၄၊ ၁၅) နောဧသည် ဥပက္ခာပြုသူများကို သစ္စာရှိရှိဟောပြောခဲ့သည်။ (မ. ၂၄:၃၇-၃၉) “လူတတ်မဟုတ်၊ လူသာမညသာဖြစ်” သော ပထမရာစုခရစ်ယာန်များသည် ဆန့်ကျင်မှုအပြင်းအထန်ကြုံရသည့်ကြားမှ ဆက်ဟောပြောကြသည်။ (တ. ၄:၁၃၊ ၁၈-၂၀) ယနေ့ခေတ်တွင်လည်း ယေဟောဝါအားယုံကြည်သောကြောင့် လူကိုမကြောက်ရွံ့တော့ဘဲ ထက်သန်စွာ သတင်းကောင်းဟောပြောနေသူများ၏ ဘဝအတ္ထုပ္ပတ္တိများကို ကင်းမျှော်စင်နှင့်နိုးလော့! စာစောင်များတွင် တွေ့ရလေ့ရှိသည်။

^၅ အခက်အခဲများရင်ဆိုင်ခဲ့ရသော ရှေးခေတ်သစ္စာရှိကျေးကျွန်များ၏ ဘဝလမ်းစဉ်ကို သုံးသပ်ခြင်းမှ ကျွန်ုပ်တို့ခွန်အားရရှိနိုင်ပါသည်။ (၃ ရာ. ၁၉:၂၊ ၃; မာ. ၁၄:၆၆-၇၁) သူတို့သည် ‘ဘုရားသခင်ကိုအမှီပြု၍ ရဲရင့်စွာဟောပြောကြ၏။’ ကျွန်ုပ်တို့လည်း ထပ်တူပြုနိုင်ပါသည်။—၁ သက်. ၂:၂။