တပည့်ဖြစ်စေခြင်းလုပ်ငန်းတွင် ကျွန်ုပ်တို့အားလုံး ပါဝင်နိုင်

^၁ တစ်ဦးတစ်ယောက်တည်း၏ကြိုးစားမှုဖြင့် တပည့်သစ်တစ်ဦးဖြစ်မလာနိုင်ပါ။ ကျမ်းစာသင်သားများ၏ ဝိညာဉ်ရေးတိုးတက်လာစေရန် ယေဟောဝါသည် မိမိ၏ “အလုပ်လုပ်သောသူချင်း” အားလုံးကို အသုံးပြုနိုင်သည်။ (၁ ကော. ၃:၆-၉) ခရစ်ယာန်အစည်းအဝေးများတွင် အားတက်သရောမှတ်ချက်ပေးခြင်း၊ ကျွန်ုပ်တို့အသက်တာတွင် ဘုရားသခင့်ဝိညာဉ်တော်သက်ရောက်သည့် အထောက်အထားဖြစ်သော အမူအကျင့်ကောင်းများတင်ပြခြင်းဖြင့် လူသစ်များကို ကူညီပေးနိုင်သည်။ (ယော. ၁၃:၃၅; ဂလ. ၅:၂၂၊ ၂၃; ဧ. ၄:၂၁-၂၃) လူသစ်များကိုကူညီပေးရန် အခြားအဘယ်အရာ လုပ်ဆောင်နိုင်သေးသနည်း။

^၂ အသင်းသားအားလုံးအနေဖြင့်– ကျွန်ုပ်တို့အားလုံးသည် အစည်းအဝေးများ စတင်တက်ရောက်လာသူတို့ကို လှိုက်လှိုက်လှဲလှဲကြိုဆိုနှုတ်ဆက်ခြင်း၊ အစည်းအဝေးမတိုင်မီနှင့်ပြီးနောက် စကားစမြည်ပြောဆိုခြင်းဖြင့် စိတ်ဝင်စားမှုပြနိုင်သည်။ အမျိုးသားတစ်ဦးက သူအစည်းအဝေးစတက်ခဲ့ချိန်ကို အမှတ်ရကာ ဤသို့ပြောသည်– “ကျွန်တော်ငယ်ငယ်ကတည်းကတက်လာတဲ့ ချာ့ချ်ကလူတွေထက် တကယ်ချစ်ခင်ရင်းနှီးစိတ်ရှိတဲ့ သူစိမ်းတွေကို တစ်နေ့ထဲမှာ တွေ့ဆုံခဲ့တယ်။ ကျွန်တော် အမှန်တရားတွေ့ပြီဆိုတာ သေချာတယ်။” အစည်းအဝေးစတက်ချိန်မှ ခုနစ်လကြာပြီးနောက် သူနှစ်ခြင်းခံခဲ့လေသည်။

^၃ သင်သားသည် ဝိညာဉ်ရေးတွင် တိုးတက်လာသည်နှင့်အမျှ သူ့ကိုချီးမွမ်းပေးပါ။ သူသည် ဆန့်ကျင်မှုများကို ခံရပ်နေသလော။ အစည်းအဝေးများ မှန်မှန်တက်ရောက်နေသလော။ မှတ်ချက်များပေးနေပြီလော။ သီအိုကရက်တစ်ဓမ္မအမှုကျောင်းတွင် စာရင်းသွင်းပြီလော။ ဓမ္မအမှုတွင် ပါဝင်နေပြီလော။ သူ၏တိုးတက်မှုများအတွက် ချီးမွမ်းပေးပါ။ ယင်းက သူ့ကိုလန်းဆန်းစေပြီး ခွန်အားရှိစေမည်ဖြစ်၏။—သု. ၂၅:၁၁။

^၄ ကျမ်းစာသင်ပေးသူအနေဖြင့်– ကြေညာသူအချို့သည် သင်အံမှုတွင် အခြားကြေညာသူများကို ဖိတ်ခေါ်ခြင်းဖြင့် မိမိတို့၏ကျမ်းစာသင်သားများနှင့် အသင်းတော်ရှိအခြားသူများ ရင်းနှီးလာစေရန် ကူညီပေးနိုင်သည်။ အသင်းတော်အစည်းအဝေးများကို အမြန်ဆုံးတက်ရောက်ရန် သင်သားအား ဖိတ်ခေါ်ပါ။ အစည်းအဝေးများစတက်သည့်အခါ အခြားသူများနှင့် မိတ်ဆက်ပေးပါ။ ဆေးလိပ်သောက်ခြင်းကဲ့သို့သော အကျင့်ဆိုးတစ်ခုခုကို သူကြိုးစားတိုက်လှန်နေရသလော။ သူကျမ်းစာသင်နေသည်ကို အိမ်သားတစ်ဦးဦး ဆန့်ကျင်သလော။ အလားတူပြဿနာများကို ရင်ဆိုင်ကျော်လွှားခဲ့သော ကြေညာသူတစ်ဦးနှင့် စကားပြောဆိုခြင်းက အကျိုးပြုပေမည်။—၁ ပေ. ၅:၉။

^၅ လူသစ်များသည် အသင်းတော်မှ ဝိညာဏထောက်မမှု လိုအပ်သည်။ ကျွန်ုပ်တို့အားလုံး ပုဂ္ဂိုလ်ရေးစိတ်ဝင်စားမှုပြခြင်းဖြင့် သူတို့တိုးတက်လာစေရန် ကူညီပေးနိုင်သည်။