အမှုဆောင်လုပ်ငန်းမှာ တိုးတက်အောင် လုပ်ဆောင်ခြင်း—သွန်သင်ရာစာအုပ်ကို ဝေငှပါ

ဘာကြောင့်အရေးကြီး– သွန်သင်ခြင်းမှာအသုံးပြုတဲ့ အဓိကကိရိယာတစ်ခုက သွန်သင်ရာစာအုပ် ဖြစ်တယ်။ လူတစ်ဦးနဲ့ ကျမ်းစာမလေ့လာခင် သူ့ကို ဒီစာအုပ် ဝေငှထားဖို့လိုပါတယ်။ ဒါကြောင့် အမှုဆောင်မှာ သွန်သင်ရာစာအုပ်ကို ကျွမ်းကျင်စွာဝေငှနိုင်အောင် ကျွန်ုပ်တို့အားလုံး ကြိုးစားသင့်တယ်။ (သု. ၂၂:၂၉) ဝေငှနိုင်တဲ့နည်းတွေ အများကြီးရှိတယ်။ ညီအစ်ကို/မတို့အတွက် ထိရောက်မှုရှိတဲ့ တခြားနည်းတွေကိုလည်း သုံးနိုင်ပါတယ်။

လုပ်ဆောင်နိုင်ပုံ–

စာအုပ်ထဲက အခန်းတစ်ခုခုကို အိမ်ရှင်ကို ညွှန်ပြပေးနိုင်ဖို့ သူစိတ်ဝင်စားနိုင်မယ့် မေးခွန်းတစ်ခုမေးပါ။ အခန်းတစ်ခန်းစီရဲ့ အစပိုင်းမှာပါတဲ့ မေးခွန်းတွေထဲကတစ်ခုကို သင်ရွေးချယ်ပြီး မေးနိုင်ပါတယ်။ မေးခွန်းကို အိမ်ရှင်ဖြေပြီးနောက် သင့်တော်တဲ့ကျမ်းချက်တစ်ချက်ကို ဖတ်ပြပါ။ ဆွေးနွေးမယ့်အကြောင်းအရာနဲ့ဆိုင်တဲ့ စာပိုဒ်ကိုပြပြီး အတိုချုပ်ဆွေးနွေးပါ။
နောက်တစ်နည်းက အိမ်ရှင်စိတ်ဝင်စားလာဖို့အတွက် နိဒါန်း စာမျက်နှာကိုပြပြီး စာအုပ်ထဲက ကျမ်းစာအဖြေကို သူ့ကိုပြပေးပါ။ ဥပမာ– သတင်းစာပါ ဝမ်းနည်းစရာသတင်း တစ်ခုခုကိုပြောပြပြီး စာမျက်နှာ ၃ က မေးခွန်းတွေရဲ့အဖြေကို လူတွေသိချင်ကြကြောင်း ရှင်းပြပါ။ ဒါမှမဟုတ် ပိုကောင်းလာမယ့်အနာဂတ်အကြောင်း မိတ်ဆွေကို လာပြောပြတာပါဆိုပြီး ပြောနိုင်တယ်။ သူ့ကို စာမျက်နှာ ၄၊ ၅ ကပုံကိုပြပြီး “ဒီပုံတွေထဲမှာ မိတ်ဆွေ အဖြစ်ချင်ဆုံး၊ အမြင်ချင်ဆုံးအရာက ဘာလဲ” ဆိုပြီး မေးနိုင်တယ်။ နောက်ပြီး၊ ဘဝမှာအရေးပါတဲ့ မေးခွန်းတွေရဲ့အဖြေကို ရှာတွေ့နိုင်အောင် မိတ်ဆွေဆီ လာလည်ပတ်တာပါလို့ပြောပြီး စာမျက်နှာ ၆ က မေးခွန်းတွေကိုပြပါ၊ ပြီးနောက် ဘယ်မေးခွန်းကို စိတ်ဝင်စားသလဲလို့ မေးပါ။
သင်အံမှုစဖို့ တိုက်ရိုက်ချဉ်းကပ်နည်းကိုသုံးပါ။ အခုလို ပြောနိုင်တယ်– “ကျမ်းစာလေ့လာရာမှာ ထောက်ကူပေးတဲ့ စာအုပ်တစ်အုပ်ရှိတယ်။ မိတ်ဆွေ မြင်ဖူးလား။ [အဖြေကို စောင့်ပါ။] အချိန်နည်းနည်းပေးနိုင်မယ်ဆိုရင် ဒီစာအုပ်ကို မိတ်ဆွေရဲ့ကိုယ်ပိုင်ကျမ်းစာနဲ့ ဘယ်လို လေ့လာနိုင်မလဲဆိုတာ ပြပေးချင်တယ်” လို့ပြောနိုင်တယ်။

ဒီလအတွင်း ကြိုးစားကြည့်ပါ–

မိသားစုဝတ်ပြုမှုမှာ လက်တွေ့လေ့ကျင့်ပါ။
အမှုဆောင်မှာ တခြားညီအစ်ကို/မတွေကို ကိုယ်ပြင်ထားတဲ့ တင်ဆက်နည်းပြောပြပါ။ (သု. ၂၇:၁၇) တင်ဆက်နည်းက မထိရောက်ဘူးဆိုရင် တခြားနည်း ပြောင်းသုံးပါ။