ခရစ်ယာန်အသက်တာလမ်းစဉ်
ကျမ်းစာကို ဂရုတစိုက် လေ့လာတဲ့သူ ဖြစ်ပါ
စမ်းသပ်မှု ခံရတဲ့အခါ ဒံယေလလို သစ္စာရှိချင်သလား။ ဒံယေလဟာ နက်နဲတဲ့ ပရောဖက်ပြုချက်တွေ အပါအဝင် ကျမ်းစာကို ဂရုတစိုက် လေ့လာတယ်။ (ဒံ. ၉:၂) ကျမ်းစာကို ဂရုတစိုက်လေ့လာရင် သစ္စာရှိဖို့ အကူအညီရတယ်။ ဘယ်လိုဖြစ်နိုင်မလဲ။ ယေဟောဝါရဲ့ကတိတွေ ပြည့်စုံလာမယ်ဆိုတာကို ပိုယုံကြည်စေတယ်။ (ယောရှု ၂၃:၁၄) ဘုရားကို ချစ်တဲ့မေတ္တာ တိုးပွားလာပြီး မှန်ရာကို ပိုလုပ်ချင်စေတယ်။ (ဆာ. ၉၇:၁၀) ဒါဆို ဘယ်လို စလုပ်မလဲ။ အကြံပြုချက်တွေ ဖော်ပြထားတယ်။
ဘာကို လေ့လာရမလဲ။ အသင်းတော် အစည်းအဝေးတွေအတွက် ပုံမှန်ကြိုတင်ပြင်ဆင်ရမယ်။ ပတ်စဉ်ကျမ်းစာဖတ်ရှုခြင်းကို ဖတ်တဲ့အခါ ကိုယ်နားမလည်တဲ့ အချက်တွေကို အချိန်ပေး လေ့လာရင် ပိုအကျိုးရှိတယ်။ တချို့က ကျမ်းစာကြိုဟောချက်တွေ၊ စွမ်းအားတော်အရည်အသွေး တစ်မျိုးစီ၊ ပေါလုရဲ့ သာသနာပြု ခရီးစဉ်တွေ၊ ယေဟောဝါရဲ့ ဖန်ဆင်းခြင်းလက်ရာတွေကို ရွေးချယ် လေ့လာကြတယ်။ တကယ်လို့ ကျမ်းစာနဲ့ပတ်သက်တဲ့ မေးခွန်းပေါ်လာရင် အဲဒါကို မှတ်ထားပြီး နောက်လေ့လာမှုလုပ်တဲ့အခါ သုံးသပ်ပါ။
သိချင်တာတွေကို ဘယ်မှာရှာရမလဲ။ ကျမ်းစာ အဖိုးတန်ဘဏ္ဍာ ရှာတွေ့ဖို့ အကူကိရိယာများ ဗီဒီယိုကို ကြည့်ပါ။ စမ်းကြည့်တဲ့အနေနဲ့ ဒံယေလ ၇ မှာပါတဲ့ သားရဲတွေဟာ ဘယ်အာဏာစက်ကို ပုံဆောင်သလဲဆိုတာ ရှာဖွေပါ။
လေ့လာမှုအတွက် အချိန်ဘယ်လောက် ပေးရမလဲ။ ဘုရားနဲ့ ရင်းနှီးတဲ့ ဆက်ဆံရေးရှိဖို့ ပုံမှန်လေ့လာရမယ်။ အစပိုင်းမှာ အချိန်နည်းနည်းနဲ့ စပါ၊ နောက်ပိုင်း တဖြည်းဖြည်း အချိန်တိုးပေးနိုင်တယ်။ ကျမ်းစာလေ့လာတာက ဝှက်ထားတဲ့ ရတနာကို ရှာတာနဲ့တူတယ်၊ ရတနာတွေ တွေ့လာလေ ပိုလေ့လာချင်လေပဲ။ (ပညာ. ၂:၃-၆) ကျမ်းစာအသိပညာ ပိုသိချင်စိတ် တိုးများလာမယ်၊ ကိုယ်ပိုင်လေ့လာမှုလည်း ပုံမှန်ဖြစ်နေမယ်။—၁ ပေ. ၂:၂။
ဒံယေလ ၇ မှာပါတဲ့ သားရဲတွေဟာ ဘယ်အာဏာစက်ကို ပုံဆောင်သလဲ။
ထပ်ဆင့်မေးခွန်း–
ဒံယေလ ၇:၈၊ ၂၄ ဘယ်လို ပြည့်စုံခဲ့သလဲ။
နောက်ထပ် လေ့လာရန်–
ဗျာဒိတ် ၁၃ မှာပါတဲ့ သားရဲတွေက ဘာကို ပုံဆောင်သလဲ။