သင် သိပါသလား

အီဂျစ်ပြည်မှာ အစ္စရေးတွေ ကျွန်ခံခဲ့ရကြောင်း ကျမ်းစာဖော်ပြချက်အပြင် တခြား ဘာအထောက်အထား ရှိသေးသလဲ။

ယောသပ်ကို မိဒျန်လူမျိုးတွေ အီဂျစ်ပြည်ဆီ ခေါ်သွားပြီးနောက် ဘိုးဘေးယာကုပ်နဲ့ မိသားစုဟာ ခါနန်ပြည်ကနေ အီဂျစ်ပြည်ကို ပြောင်းရွှေ့သွားတယ်လို့ ကျမ်းစာ မှတ်တမ်းမှာ ဖော်ပြထားတယ်။ နိုင်းမြစ်ဝကျွန်းပေါ်ဒေသ၊ ဂေါရှင်အရပ်မှာ သူတို့ အခြေချ နေထိုင်ခဲ့ကြတယ်။ (က. ၄၇:၁၊ ၆) ‘လူဦးရေ များသည်ထက် များပြီး အင်အားကြီးမားလာ’ တယ်။ ဒါကြောင့် အစ္စရေးတွေကို အီဂျစ်တွေ ကြောက်လာပြီး ကျွန်အဖြစ် ခိုင်းစေကြတယ်။—ထွ. ၁:၇-၁၄။

ဝေဖန်ရေးသမားတချို့က အထက်ပါ ကျမ်းမှတ်တမ်းကို ဒဏ္ဍာရီလို့ ပြောပြီး သရော်ကြတယ်။ ဒါပေမဲ့ ရှေးအီဂျစ်ပြည်မှာ ဆီးမိုက်လူမျိုးတွေa ကျွန်ခံခဲ့ရကြောင်း အထောက်အထားတွေ ရှိတယ်။

ဥပမာ၊ အီဂျစ်ပြည် မြောက်ပိုင်းမှာ အခြေချ နေထိုင်သူတွေ ရှိခဲ့ကြောင်း ရှေးဟောင်း သုတေသီတွေ ရှာဖွေတွေ့ရှိခဲ့တယ်။ အဲဒီဒေသမှာ ဆီးမိုက်တွေ အခြေချနေထိုင်ခဲ့တယ်ဆိုတဲ့ အထောက်အထား ၂၀ ကျော် ရှိတယ်လို့ ကျမ်းပညာရှင် ဂျွန် ဘင်စန် ပြောတယ်။ ဒါ့အပြင် “ဘီစီ ၁၈၀၀ ကနေ ၁၅၄၀ အတွင်း အီဂျစ်ပြည်ဟာ အနောက်အာရှကနေ ပြောင်းလာတဲ့ ဆီးမိုက်စကားပြောသူတွေ အကြိုက်ဆုံး နေရာပဲ။ အဲဒီအချိန်ကာလဟာ ကမ္ဘာဦးကျမ်းမှာ ဖော်ပြထားတဲ့ အချိန်၊ ဖြစ်ရပ်တွေနဲ့ ကိုက်ညီနေတယ်” လို့ အီဂျစ်သမိုင်းပညာရှင် ဂျိမ်း ကေ ဟော့ဖ်မီးယား ပြောတယ်။

အီဂျစ်ပြည် တောင်ပိုင်းမှာလည်း နောက်ထပ် အထောက်အထား ရှိသေးတယ်။ ဘီစီ ၂၀၀၀ ကနေ ၁၆၀၀ ခန့် ရက်စွဲတပ်ထားတဲ့ ကျူစာတစ်ခုမှာ အီဂျစ်ပြည် တောင်ပိုင်းက အိမ်တစ်အိမ်မှာ အလုပ်လုပ်တဲ့ ကျွန်တွေရဲ့ နာမည်ကို ဖော်ပြထားတယ်။ အဲဒီထဲမှာ ဆီးမိုက်နာမည် ၄၀ ကျော် ပါတယ်။ အဲဒီကျွန်တွေဟာ ထမင်းချက်၊ ရက်ကန်းသမား၊ အလုပ်ကြမ်းသမားတွေ ဖြစ်တယ်။ “အီဂျစ်ပြည် တောင်ပိုင်း အိမ်တစ်အိမ်တည်းမှာတင် ဆီးမိုက်လူမျိုး ၄၀ ကျော်လောက် အလုပ်လုပ်တယ်ဆိုရင် အီဂျစ်တစ်ပြည်လုံး၊ အထူးသဖြင့် မြစ်ဝကျွန်းပေါ်ဒေသမှာ ဆီးမိုက်လူမျိုး အတော်များနိုင်တယ်” လို့ ဟော့ဖ်မီးယား ပြောတယ်။

စာရင်းမှာ ပါတဲ့ ကျွန်နာမည်တချို့ဟာ “ကျမ်းစာမှာ ပါတဲ့ နာမည်တွေနဲ့ ဆင်တူတယ်” လို့ ရှေးဟောင်း သုတေသီ ဒေးဗစ် ရိုးလ် ရေးတယ်။ ဥပမာ၊ အိသခါ၊ အာရှာ၊ ရှိဖရစတဲ့ နာမည်တွေနဲ့ ဆင်တယ်။ (ထွ. ၁:၃၊ ၄၊ ၁၅) “ဒါက အစ္စရေးတွေ အီဂျစ်ပြည်မှာ ကျွန်ခံခဲ့ရတယ်ဆိုတဲ့ တကယ့်အထောက်အထားပါပဲ” လို့ ရိုးလ် ကောက်ချက်ချတယ်။

“အီဂျစ်ပြည်မှာ ကျွန်ခံတာ၊ လွတ်မြောက်တာနဲ့ပတ်သက်တဲ့ ကျမ်းစာဖော်ပြချက်အတွက် ခိုင်လုံတဲ့ သမိုင်းအထောက်အထား ရှိပါတယ်” လို့ ဘင်စန် ပြောတယ်။