မျက်မမြင်အမျိုးသမီးတစ်ယောက်ရဲ့ ဆုတောင်းချက်တွေ ဖြေကြားခံရ

အာရှတိုက်က ယန်မေဆိုတဲ့ ယေဟောဝါသက်သေတစ်ယောက်ဟာ မင်ဂျီဆိုတဲ့ မျက်မမြင် အမျိုးသမီးကို လမ်းကူးဖို့ ကူညီပေးခဲ့တယ်။a မင်ဂျီက “ကျေးဇူးတင်ပါတယ်။ ဘုရားသခင် ကောင်းချီးပေးပါစေ” လို့ ပြောတယ်။ သူ အဲဒီလို ပြောပြီးနောက်မှာ ယန်မေက မင်ဂျီကို အတူ ကျမ်းစာလေ့လာချင်သလားလို့ မေးလိုက်တယ်။ ဘုရားသခင်ရဲ့ အသင်းတော်စစ်ဆီ လမ်းညွှန်ပေးပါလို့ နေ့တိုင်း ဆုတောင်းတဲ့အကြောင်း နောက်ပိုင်းမှာ မင်ဂျီက ပြောပြတယ်။ သူ ဘာကြောင့် အဲဒီလို ဆုတောင်းသလဲ။

၂၀၀၈ ခုနှစ်တုန်းက မသန်စွမ်းသူတွေကို ကူညီပေးနေတဲ့ ချာ့ချ်တစ်ခုကို တက်ဖို့ မျက်မမြင် မိတ်ဆွေတစ်ယောက် ဖိတ်ခေါ်လို့ သွားတက်ခဲ့တယ်လို့ မင်ဂျီ ပြောပြတယ်။ တရားဟောတာကို နားထောင်ပြီးနောက်မှာ မင်ဂျီက ဘုန်းကြီးကို ဘယ်စာအုပ်ကို ကိုးကားပြီးဟောတာလဲလို့ မေးလိုက်တယ်။ ဘုရားရဲ့ တရားစကားတော် သမ္မာကျမ်းစာထဲကလို့ ဘုန်းကြီးက ပြောတယ်။ အဲဒါကို မင်ဂျီ ဖတ်ချင်စိတ် ပေါ်လာတယ်။ ဒါနဲ့ ၃၂ တွဲရှိတဲ့ တရုတ်မျက်မမြင်ကျမ်းစာကို ရလိုက်ပြီး ၆ လကြာ ဖတ်ခဲ့တယ်။ မင်ဂျီဟာ ကျမ်းစာဖတ်ရင်းနဲ့ သူတက်နေတဲ့ ချာ့ချ်က သင်ပေးနေတဲ့ သုံးပါးတစ်ဆူအယူဝါဒ မှားနေမှန်း၊ ဘုရားရဲ့နာမည်က ယေဟောဝါဖြစ်မှန်း သိလာတယ်။

နောက်ပိုင်းမှာ မင်ဂျီဟာ ချာ့ချ်အသင်းသားတွေရဲ့ အပြုအမူကြောင့် စိတ်ပျက်ခဲ့ရတယ်။ အသင်းသားတွေဟာ ကျမ်းစာမှာ သူဖတ်ရတဲ့အတိုင်း မနေထိုင်ကြမှန်း မင်ဂျီ သိလာတယ်။ ဥပမာ၊ မျက်စိမြင်တဲ့သူတွေကို အစားအသောက် လတ်လတ်ဆတ်ဆတ် ပေးပေမဲ့ မျက်မမြင်တွေကိုတော့ အကျန်တွေပဲ ပေးတယ်။ အဲဒီလို မမျှတမှုတွေကို တွေ့ရတဲ့အခါ မင်ဂျီ စိတ်ထိခိုက်လာတယ်။ ဒါနဲ့ သူ့ဒေသမှာရှိတဲ့ တခြားချာ့ချ်တွေကို လိုက်ရှာတယ်။ အဲဒါကြောင့် ခရစ်ယာန်အသင်းတော်စစ်ကို ရှာတွေ့ဖို့ မင်ဂျီ ဆုတောင်းနေတာ။

ယန်မေရဲ့ ကြင်နာတဲ့ လုပ်လုပ်ကြောင့် မင်ဂျီဟာ ကျမ်းစာလေ့လာဖို့ လက်ခံလိုက်တယ်။ နောက်ပိုင်း မင်ဂျီဟာ ယေဟောဝါသက်သေတွေရဲ့ အစည်းအဝေးကို ပထမဆုံးအကြိမ် လိုက်တက်ခဲ့တယ်။ မင်ဂျီ ဒီလို ပြောပြတယ်– “ကျွန်မတက်ခဲ့တဲ့ ပထမဆုံးအစည်းအဝေးကို ဘယ်တော့မှ မမေ့ဘူး။ ညီအစ်ကို၊ ညီအစ်မတွေက ကျွန်မကို လှိုက်လှိုက်လှဲလှဲ နှုတ်ဆက်ကြတယ်။ ကျွန်မရဲ့စိတ်နှလုံးကို တကယ် ထိမိခဲ့တယ်။ ကျွန်မက မျက်မမြင်ဖြစ်ပေမဲ့ မျက်နှာမလိုက်တဲ့ မေတ္တာကို ခံစားခဲ့ရတယ်။”

မင်ဂျီဟာ ကောင်းကောင်းတိုးတက်လာပြီး အစည်းအဝေးတွေကို မှန်မှန် တက်တယ်။ နိုင်ငံတော်သီချင်းတွေ ဆိုရတာ ကြိုက်ပေမဲ့ မျက်မမြင်စာနဲ့ သီချင်းစာအုပ်မရှိလို့ အခက်တွေ့နေတယ်။ ဒါပေမဲ့ မင်ဂျီဟာ အသင်းတော်ရဲ့ အကူအညီနဲ့ ကိုယ်ပိုင်သီချင်းစာအုပ် လုပ်နိုင်ခဲ့တယ်။ သီချင်း ၁၅၁ ပုဒ်ကို ဘာသာပြန်ဖို့ ၂၂ နာရီကြာခဲ့တယ်။ ၂၀၁၈၊ ဧပြီလမှာ မင်ဂျီဟာ အမှုဆောင်လုပ်ငန်းမှာ စတင်ပါဝင်တယ်။ အဲဒီနောက်ပိုင်းမှာ မင်ဂျီဟာ ဟောပြောခြင်းလုပ်ငန်းမှာ လတိုင်း နာရီ ၃၀ ပါဝင်ခဲ့တယ်။

မင်ဂျီနှစ်ခြင်းခံဖို့အတွက် ယန်မေက နှစ်ခြင်းမေးခွန်းနဲ့ ယေဟောဝါရဲ့ အလိုတော်ဆောင်ဖို့ ဖွဲ့စည်းထားခြင်းစာအုပ်ထဲက ကျမ်းချက်တွေကို အသံသွင်းပေးတယ်။ ၂၀၁၈၊ ဇူလိုင်လမှာ မင်ဂျီ နှစ်ခြင်းခံတယ်။ သူဒီလို ပြောတယ်– “ခရိုင်အစည်းအဝေးမှာ ညီအစ်ကို၊ ညီအစ်မတွေပြတဲ့ မေတ္တာကြောင့် ကျွန်မရဲ့စိတ်နှလုံး ထိမိခဲ့တယ်။ ဘုရားသခင့် အသင်းတော်စစ်ရဲ့ အသင်းသားဖြစ်ခွင့်ရလို့ ကျွန်မ ဝမ်းသာမျက်ရည် ကျခဲ့တယ်။ (ယောဟန် ၁၃:၃၄၊ ၃၅) အခု မင်ဂျီဟာ သူခံစားရတဲ့ မေတ္တာကို ပြန်ပြဖို့ စိတ်ပိုင်းဖြတ်ပြီး အချိန်ပြည့်သတင်းကောင်း ဟောပြောသူအဖြစ် အမှုဆောင်နေပါပြီ။