ကျမ်းပိုဒ် ရှင်းပြချက်များ
ဟေရှာယ ၄၂:၈—“ငါသည် ထာဝရဘုရား ဖြစ်၏”
“ငါဟာ ယေဟောဝါပဲ။ ဒါဟာ ငါ့နာမည်ပဲ။ ငါ့ရဲ့ ဘုန်းအသရေကို ဘယ်သူ့ကိုမှ မပေးဘူး။ ငါရထိုက်တဲ့ ချီးမွမ်းခြင်းကိုလည်း ရုပ်တုတွေကို မပေးဘူး။”—ဟေရှာယ ၄၂:၈၊ ကမ္ဘာသစ်ဘာသာပြန်ကျမ်း။
“ငါသည် ထာဝရဘုရား ဖြစ်၏။ ထိုနာမသည် ငါ့နာမ ဖြစ်၏။ ငါ့ဘုန်းကို အခြားသောသူအားလည်းကောင်း၊ ငါ့အသရေကို ရုပ်တုဆင်းတုတို့အားလည်းကောင်း ငါမပေး။”—ဟေရှာယ ၄၂:၈၊ ယုဒသန်ကျမ်း။
ဟေရှာယ ၄၂:၈ ရဲ့ အဓိပ္ပာယ်
ဘုရားသခင်က မိမိရဲ့ နာမည်ကို ပြောပြတယ်၊ မိမိကို ရုပ်တုတွေနဲ့ တစ်တန်းစားတည်း ထားပြီး ချီးမွမ်းဂုဏ်တင်တာ လက်မခံကြောင်းလည်း ပြောပြတယ်။
ဘုရားသခင့်နာမည်ကို မြန်မာလို “ယေဟောဝါ” ဆိုပြီး ပြန်ဆိုလေ့ရှိတယ်။a (ထွက်မြောက်ရာ ၃:၁၄၊ ၁၅) ဓမ္မဟောင်းကျမ်း (ဟီဘရူး-အာရမိတ်ကျမ်းစောင်) မှာ ဘုရားသခင့်နာမည် အကြိမ် ၇,၀၀၀ နီးပါး ပါပေမဲ့ ဘာသာပြန်ကျမ်း အတော်များများမှာ နာမတော်ကို “သခင်” ဆိုတဲ့ ဘွဲ့နဲ့ အစားထိုးလိုက်တယ်။ ဥပမာတစ်ခုကတော့ ယေဟောဝါနဲ့ ယေရှု နှစ်ပါးစလုံးနဲ့ပတ်သက်ပြီး ကြိုဟောထားတဲ့ ဆာလံ ၁၁၀:၁ ပါ။ ဂျိမ်းဘုရင် ဘာသာပြန်ကျမ်း မှာ ‘သခင်ဘုရား [ယေဟောဝါ] က ... ငါ့သခင် [ယေရှု] အား မိန့်တော်မူသည်’ လို့ ဖော်ပြထားတယ်။ (တမန်တော် ၂:၃၄-၃၆) ကမ္ဘာသစ်ဘာသာပြန်ကျမ်း ကတော့ ဘုရားနာမည်ကို သူ့နေရာနဲ့သူ ထည့်ပေးထားတဲ့အတွက် ဘယ် ‘သခင်’ လဲဆိုတာ မရှုပ်တော့ဘူး။ “ယေဟောဝါက၊ ‘ရန်သူတွေကို မင်းရဲ့ ခြေအောက်မှာ မချခင်အထိ ငါ့ညာဘက်မှာ ထိုင်နေပါ’ လို့ ငါ့သခင်ကို ပြောတယ်” ဆိုပြီး ပြန်ဆိုထားတယ်။
ဘုရားသခင့်နာမည်ဟာ “ကိုယ်တော် ဖြစ်လာစေတယ်” လို့ အဓိပ္ပာယ်ရတယ်ဆိုပြီး ကျမ်းပညာရှင်တွေ ယူဆကြတယ်။ တစ်ဆူတည်းသော စစ်မှန်တဲ့ ဘုရားသခင်သာ ဒီနာမည်နဲ့ ကိုက်ညီတယ်။ ကိုယ်တော်တစ်ပါးတည်းသာ မိမိရဲ့ ရည်ရွယ်ချက်တွေ ပြည့်စုံစေဖို့ ကိုယ်တိုင်ရော၊ ဖန်ဆင်းရာတွေကိုပါ ဘာမဆို ဖြစ်စေနိုင်စွမ်း ရှိလို့ပါပဲ။
ယေဟောဝါဟာ ဖန်ဆင်းရှင်၊ တစ်ဆူတည်းသော စစ်မှန်တဲ့ ဘုရားသခင် ဖြစ်လို့ ကျွန်တော်တို့ရဲ့ အကြွင်းမဲ့ ကိုးကွယ်ဆည်းကပ်မှုကို ရထိုက်တယ်။ ရုပ်တုဆင်းတု အပါအဝင် တခြားဘယ်သူ၊ ဘယ်အရာကမှ ကျွန်တော်တို့ရဲ့ ဝတ်ပြုမှုကို မရထိုက်ဘူး။—ထွက်မြောက်ရာ ၂၀:၂-၆။ ၃၄:၁၄။ ၁ ယောဟန် ၅:၂၁။
ဟေရှာယ ၄၂:၈ ရဲ့ အထက်အောက်စကား
ဟေရှာယ အခန်းကြီး ၄၂ အစမှာ ယေဟောဝါက မိမိ “ရွေးချယ်တဲ့သူ” လုပ်ဆောင်မယ့်အရာကို ကြိုပြောထားတယ်။ မိမိမြတ်နိုးရတဲ့ ကျွန်က ‘လူမျိုးတွေကို တရားမျှတခြင်းအကြောင်း ကြားသိစေမယ်’ လို့ ဘုရား ပြောတယ်။ (ဟေရှာယ ၄၂:၁) “အခု အသစ်သောအရာတွေအကြောင်း ငါ ကြေညာနေတယ်။ အဲဒါတွေ မဖြစ်လာခင်ကတည်းက အခု ငါပြောပြနေတယ်” လို့လည်း ဆိုထားတယ်။ (ဟေရှာယ ၄၂:၉) ရာစုနှစ်တွေ ကြာပြီးနောက် မေရှိယ၊ ဒါမှမဟုတ် ခရစ်တော် ရောက်လာပြီး မြေကြီးပေါ် အမှုဆောင်ချိန်မှာ “ရွေးချယ်တဲ့သူ” နဲ့ပတ်သက်တဲ့ ကြိုဟောချက် ဖြစ်လာ၊ ပြည့်စုံလာတယ်။—မဿဲ ၃:၁၆၊ ၁၇။ ၁၂:၁၅-၂၁။
ဟေရှာယ ၄၂:၈ ကို တခြားဘာသာပြန်ကျမ်းတွေ ပြန်ဆိုထားပုံ
“ငါသည် ယေဟောဝါ ဖြစ်၏။ နာမတော်ကား ထိုသို့ပင်တည်း။ ငါ့ဘုန်းတော်ကို သူတစ်ထူးအားလည်းကောင်း၊ ငါ့ဂုဏ်တော်ကို ရုပ်ပွားဆင်းတုအားလည်းကောင်း၊ လွှဲအပ်မည် မဟုတ်။”—သမာကျမ်း။
“ငါသည် မှန်ကန်သော ဘုရားသခင် ယေဟောဝါ ဖြစ်၏။ ထိုနာမသည် ငါ့နာမ ဖြစ်၏။ ငါ့ဘုန်းကို အခြားတစ်ပါးသူအားလည်းကောင်း၊ ငါ့အသရေကို ရုပ်တုဆင်းတုတို့အားလည်းကောင်း မပေး။”—သမ္မာကျမ်း။
a ဟီဘရူးဗျည်းလေးလုံးနဲ့ ဖော်ပြတဲ့ ဘုရားသခင့်နာမည်ကို အင်္ဂလိပ်လို YHWH၊ မြန်မာလို (ယဟဝဟ) လို့ ဖော်ပြလေ့ရှိတယ်။ အင်္ဂလိပ်ဘာသာပြန်ကျမ်းတချို့က “ယာဝေး” လို့ ပြန်ဆိုကြတယ်။ ပိုသိချင်ရင် ကမ္ဘာသစ်ဘာသာပြန်ကျမ်း နောက်ဆက်တွဲ က၄ “ဟီဘရူးကျမ်းစောင်တွေမှာ ပါတဲ့ ဘုရားသခင့်နာမည်” ကို ကြည့်ပါ။