မေရှိယ

မေရှိယကို လူတွေ ဘယ်လို ခွဲခြားသိမြင်နိုင်ကြမလဲ။

သမ္မာကျမ်းစာကြိုဟောထားတဲ့အတိုင်း မေရှိယ ဒါမှမဟုတ် ခရစ်တော်ဟာ တာဝန်နှစ်ရပ်ကို ထမ်းဆောင်ပါလိမ့်မယ်။a ပထမတာဝန်ကို လူသားအနေနဲ့ ထမ်းဆောင်မယ်။ ဒါကြောင့် မေရှိယက ဘယ်သူဖြစ်သလဲဆိုတာကို ကောင်းကောင်း ခွဲခြားသိမြင်နိုင်ဖို့ သူ့ဘဝအကြောင်းနဲ့ အမှုဆောင်ခြင်းအကြောင်းကို ကျမ်းစာမှာ ကြိုတင် ရေးသားဖော်ပြထားတယ်။ ကျမ်းစာမှာ ကြိုဟောထားတာအားလုံးလိုလိုက “ယေရှုအကြောင်း သက်သေခံ” တယ်။—ဗျာဒိတ် ၁၉:၁၀။

သမ္မာကျမ်းစာပြောဆိုရာ

မေရှိယဟာ . . .

• ဘုရင်ဒါဝိဒ်ရဲ့မျိုးရိုးကနေ ဆင်းသက်လာမယ်။—ဟေရှာယ ၉:၇; လုကာ ၃:၂၃-၃၁။b

• ဘက်သလီဟင် (ဗက်လင်) မြို့မှာ မွေးဖွားမယ်။—မိက္ခာ ၅:၂; လုကာ ၂:၄-၇။

• နှိမ့်ချစွာ ‘သတင်းကောင်းကြေညာ’ မယ်။—ဟေရှာယ ၆၁:၁၊ ကဘ; လုကာ ၄:၄၃။

• မထီမဲ့မြင်ပြုခံရမယ်၊ ရှုတ်ချခံရမယ်။—ဟေရှာယ ၅၃:၃; မဿဲ ၂၆:၆၇၊ ၆၈။

• ငွေ ၃၀ နဲ့ သစ္စာဖောက်ခံရမယ်။—ဇာခရိ ၁၁:၁၂၊ ၁၃; မဿဲ ၂၆:၁၄၊ ၁၅။

• မတရားစွပ်စွဲ၊ သတ်ချင်သူတွေရှေ့မှာ နှုတ်မဖွင့်ဘဲ နေမယ်။—ဟေရှာယ ၅၃:၆၊ ၇; မဿဲ ၂၇:၁၂-၁၄။

• ဘုရားသခင်ရှေ့ စင်ကြယ်တဲ့အနေအထားကို လူတွေရရှိနိုင်ဖို့ အပြစ်ဖြေရာ “သိုးသငယ်” ဖြစ်လာမယ်။—ဟေရှာယ ၅၃:၇; ယောဟန် ၁:၂၉၊ ၃၄၊ ၃၆။

• အသတ်ခံရတဲ့အခါ အရိုးတစ်ချောင်းမှ မကျိုးမပဲ့ရ။—ဆာလံ ၃၄:၂၀; ယောဟန် ၁၉:၃၃၊ ၃၆။

• သူဌေးတွေနဲ့အတူ သင်္ဂြိုဟ်ခံရမယ်။—ဟေရှာယ ၅၃:၉၊ ကဘ; မဿဲ ၂၇:၅၇-၆၀။

• သုံးရက်မြောက်တဲ့နေ့မှာ အသက်ပြန်ရှင်လာမယ်။—မဿဲ ၁၆:၂၁; ၂၈:၅-၇။

ယေရှုက ဒီမှာဖော်ပြထားတဲ့ ကြိုဟောချက်တွေထက်မက ပြည့်စုံစေခဲ့ပါတယ်။ ကိုယ်တော်က လူနာတွေကို ကုသပေးပြီး လူသေတွေကိုလည်း အသက်ပြန်ရှင်စေခဲ့ပါတယ်။ ဒီနည်းနဲ့ ယေရှုက မိမိဟာ မေရှိယဖြစ်ကြောင်း သက်သေပြရုံမက သမ္မာကျမ်းစာမှာပါတဲ့ကတိတော်တွေကို ယုံကြည်စိတ်ချနိုင်အောင် လုပ်ဆောင်ပေးခဲ့တယ်၊ ဘုရားသခင့်ကတိတော်တွေကို အနာဂတ်မှာ ကမ္ဘာချီအတိုင်းအတာနဲ့ အကောင်အထည်ဖော်ပါလိမ့်မယ်။ (လုကာ ၇:၂၁-၂၃; ဗျာဒိတ် ၂၁:၃၊ ၄) ယေရှုဟာ ရှင်ပြန်ထမြောက်ပြီးနောက် ဘုရားသခင်ရဲ့ “လက်ယာဘက်” မှာ ထိုင်ပြီး မေရှိယသခင်ရဲ့တာဝန်ကို ပြီးအောင် လုပ်ဆောင်ပေးဖို့ စောင့်မျှော်နေပါတယ်။—ဆာလံ ၁၁၀:၁-၆။

“မေရှိယအရှင်ကြွတော်မူသောအခါ ဤအရှင်ပြသည်ထက် ပိုမိုများပြားသော အံ့သြဖွယ် နိမိတ်လက္ခဏာများကို ပြတော်မူမည်လော။”—ယောဟန် ၇:၃၁၊ ခမ။

မေရှိယက တာဝန်တွေကို ဘယ်လို ပြီးစီးစေမလဲ။

မေရှိယဟာ ရောမလက်အောက်ကနေ အစ္စရေးလူမျိုးကို လွတ်မြောက်စေမယ်၊ အစ္စရေးနိုင်ငံကို ပြန်လည်တည်ထောင်ပေးမယ်လို့ ယေရှုခေတ်က ဂျူးတွေ ထင်ခဲ့ကြတယ်။ (တမန်တော် ၁:၆) ဒါပေမဲ့ ယေရှုဟာ အခွင့်အာဏာရှိသမျှအပ်နှင်း ခံရတဲ့ တန်ခိုးကြီးကောင်းကင်တမန်တစ်ပါးအနေနဲ့ ကောင်းကင်ကနေ တာဝန်တွေကို ပြီးစီးအောင်လုပ်ဆောင်မယ်ဆိုတာ နောက်ပိုင်းကျမှ ဂျူးလူမျိုးတပည့်တွေ နားလည်ခဲ့ကြတယ်။—မဿဲ ၂၈:၁၈။

သမ္မာကျမ်းစာပြောဆိုရာ

မေရှိယဟာ . . .

• ဘုရားသခင့်နိုင်ငံတော်ဘုရင်အနေနဲ့ ကမ္ဘာတစ်ဝန်းလုံးကို အုပ်စိုးမယ်။—ဒံယေလ ၇:၁၃၊ ၁၄; ဗျာဒိတ် ၁၁:၁၅။

• မိမိကို ယုံကြည်ကြောင်းတင်ပြတဲ့ လူအားလုံးအတွက်တော့ ကောင်းချီးမင်္ဂလာဖြစ်မယ်။—ကမ္ဘာဦး ၂၂:၁၇၊ ၁၈; ဆာလံ ၇၂:၇၊ ၈။

• ဆန့်ကျင်သူတွေကို ချေမှုန်းတဲ့အခါ ရှင်ဘုရင်တွေနဲ့ ‘လူမျိုးတွေကို ထိတ်လန့်စေ’ မယ်။—ဟေရှာယ ၅၂:၁၅၊ ကဘ; ဗျာဒိတ် ၁၉:၁၉၊ ၂၀။

• လူအမျိုးမျိုးပါဝင်တဲ့၊ ဖြောင့်မတ်သူတွေနဲ့ဖွဲ့စည်းထားတဲ့ “လူအုပ်ကြီး” ကို ငြိမ်းချမ်းသာယာတဲ့ ကမ္ဘာသစ်ထဲ ဆောင်သွင်းပေးမယ်။—ဗျာဒိတ် ၇:၉၊ ၁၀၊ ၁၃-၁၇။

• ယေဟောဝါဘုရားနဲ့အတူ လူသေတွေကို ကမ္ဘာမြေ ပရဒိသုဥယျာဉ်ကြီးထဲမှာ အသက်ပြန်ရှင်စေမယ်။—လုကာ ၂၃:၄၃; ယောဟန် ၅:၂၁၊ ၂၈၊ ၂၉။

• မိမိကို လက်အောက်ခံတဲ့ပြည်သူပြည်သားတွေကို စစ်မှန်တဲ့ ငြိမ်သက်မှုရစေတဲ့နည်းလမ်းတွေကို သင်ပေးမယ်။—ဟေရှာယ ၁၁: ၁၊ ၂၊ ၉၊ ၁၀။

• အို၊ နာ၊ သေခြင်းကို ဖြစ်ပေါ်စေတဲ့ အပြစ်တရားကို ဖယ်ရှားပေးမယ်။—ယောဟန် ၁:၂၉; ရောမ ၅:၁၂။

• နောက်ဆုံးမှာ စာတန့်အမှုအရာအားလုံးကို ဖျက်ဆီးပစ်မယ်၊ ပြီးတော့ လူ့မိသားစုကြီးကို ယေဟောဝါ ဘုရားသခင်ရဲ့အုပ်ချုပ်မှုအောက်မှာ စုစည်းပေးမယ်။—၁ ကောရိန္သု ၁၅:၂၅-၂၈; ၁ ယောဟန် ၃:၈။

ယေရှုဟာ မေရှိယအဖြစ် ကြိုဟောထားတဲ့အတိုင်း ပထမတာဝန်ကို ထမ်းဆောင်ခဲ့တယ်။ ဒုတိယတာဝန်ကိုလည်း အကောင်အထည်ဖော်ပါတော့မယ်။ ယေရှုက “ငါသည် လမ်းခရီးလည်းဖြစ်၏။ အမှန်တရားလည်း ဖြစ်၏။ အသက်လည်း ဖြစ်၏” လို့ မိန့်ဆိုခဲ့တာကြောင့် ကိုယ်တော့်အကြောင်း အသေးစိတ် လေ့လာတာက ပညာရှိရာ ရောက်ပါတယ်။—ယောဟန် ၁၄:၆။

‘မင်းကြီးရဲ့လက်ထက်မှာ ဖြောင့်မတ်သူတွေကြီးပွားလိမ့်မယ်။ လမင်းတည်နေသရွေ့ ငြိမ်သက်ခြင်းတိုးပွားလိမ့်မယ်။ မင်းကြီးကို လက်အောက်ခံတဲ့ပြည်သူပြည်သားတွေက မြေကြီးစွန်းအထိ ရှိလိမ့်မယ်။’—ဆာလံ ၇၂:၇၊ ၈၊ ကဘ။