အခန်း ၁

သမ္မာကျမ်းစာကို အဘယ်ကြောင့်ဖတ်ရသနည်း

ပြဿနာပေါင်း သောင်းခြောက်ထောင်နှင့် ပြည့်နေသော်လည်း ဖြေရှင်းချက်နည်းလှသည့်လောကတွင် ကျွန်ုပ်တို့အသက်ရှင်နေရကြသည်။ လူသန်းပေါင်းများစွာ အမြဲတမ်း အငတ်ဘေးဆိုက်နေကြသည်။ မူးယစ်ဆေးစွဲသူဦးရေ တိုးများလာသည်။ ပို၍ပို၍ များပြားသည့် မိသားစုများ ပြိုကွဲလျက်ရှိကြသည်။ သွေးသားနီးစပ်သူချင်း၊ မိသားစုချင်း အကြမ်းဖက်မှုသတင်းများသည် မကြားချင်အဆုံးဖြစ်နေသည်။ ကျွန်ုပ်တို့ရှူရှိုက်သည့်လေ၊ သောက်သုံးသည့်ရေများသည် တဖြည်းဖြည်း အဆိပ်သင့်လျက်ရှိသည်။ ဤကြားထဲ ကျွန်ုပ်တို့ထဲမှ ပို၍ပို၍ များပြားသည့်သူတို့သည် ရာဇဝတ်မှု၏သားကောင်များ ဖြစ်လာကြသည်။ ဤကဲ့သို့သောပြဿနာများသည် တစ်နေ့နေ့ပြေလည်သွားမည်ဟု သင်ထင်သလော။

၁။ (နိဒါန်းအပါအဝင်) အဘယ် မျက်မှောက်ခေတ်ပြဿနာများက လူသားသည် လမ်းညွှန်မှုလိုအပ်ကြောင်း ပြသနည်း။

ထို့အပြင် ကျွန်ုပ်တို့သည် ခက်ခက်ခဲခဲ ရွေးချယ်ရသည့်ခေတ်တွင် အသက်ရှင်ကြရသည်။ ဥပမာအနေနှင့် သန္ဓေသားသတ်ဖြတ်မှုဟုခေါ်သည့် ကိုယ်ဝန်ဖျက်ချခြင်းကို မကျေမချမ်း ဆန့်ကျင်ကန့်ကွက်သူ များစွာရှိသည်။ အခြားသူများကမူ အမျိုးသမီးများအနေဖြင့် မိမိခန္ဓာကို မိမိပိုင်ကြောင်း၊ ဤကဲ့သို့သောကိစ္စများကို မိမိတို့ဘာသာ ဆုံးဖြတ်ပိုင်ခွင့်ရှိကြောင်း အခိုင်အမာ လက်ခံထားကြပြန်သည်။ လူအများက လိင်တူဆက်ဆံခြင်း၊ အိမ်ထောင်ရေးဖောက်ပြားခြင်းနှင့် အိမ်ထောင်မပြုခင် သံဝါသပြုခြင်းတို့ကို အကျင့်ယိုယွင်းမှုအဆင့်တွင် ထားကြသည်။ အခြားသူများကမူ ဤအကျင့်စရိုက်များသည် ကိုယ်ပိုင်ရွေးချယ်ရမည့်ကိစ္စဖြစ်သည်ဟု ခံယူထားကြသည်။ မည်သူမှားသည်၊ မည်သူမှန်သည်ကို အဘယ်ပုဂ္ဂိုလ်က အဆုံးအဖြတ်ပေးမည်နည်း။

၂၊ ၃။ ယနေ့လူအများက သမ္မာကျမ်းစာကို မည်သို့ရှုမြင်ကြသနည်း။

^၂ သမ္မာကျမ်းစာက ကိုယ်ကျင့်တရားကိစ္စရပ်များတွင် လမ်းညွှန်ချက်ပေးထားပြီး ရာဇဝတ်မှု၊ ငတ်မွတ်မှုနှင့် ညစ်ညမ်းမှုပြဿနာများအတွက် ထိရောက်သောဖြေရှင်းချက်များကို ဖော်ပြပေးထားသည်။ ခက်နေသည်မှာ လူအများစုက သမ္မာကျမ်းစာကို အဆိုပါကိစ္စများတွင် အာဏာပိုင်အဖြစ် သဘောမထားကြတော့ခြင်းဖြစ်သည်။ တစ်ချိန်က သမ္မာကျမ်းစာကို—အနည်းဆုံး အနောက်နိုင်ငံများတွင်—တလေးတစားဖြင့် နားထောင်ခဲ့ကြသည်။ သမ္မာကျမ်းစာသည် လူသားများရေးခဲ့ရာဖြစ်သော်လည်း ယခင် ခရစ်ယာန်ဘောင်ရှိလူအများစုက ဘုရားသခင့်နှုတ်မြွက်စကားတော်အဖြစ် လက်ခံပြီး ပါရှိသည့်အကြောင်းအရာများကို ဘုရားသခင်ကိုယ်တော်တိုင်မှုတ်သွင်းသည်ဟု ယုံကြည်ခဲ့ကြသည်။

^၃ သို့သော် ယနေ့မှာမူ အရာရာအပေါ်—ဓလေ့ထုံးစံ၊ အယူအဆ၊ ကိုယ်ကျင့်တရားနှင့် ဘုရားသခင်တည်ရှိမှုအထိပင်—သံသယဝင်ခြင်းသည် ရေပန်းစားလျက်ရှိသည်။ အထူးသဖြင့် သမ္မာကျမ်းစာ၏တန်ဖိုးကို လူတို့သံသယဝင်ကြသည်။ အများစုက ယင်းသည် ခေတ်ကုန်သွားပြီ၊ အံမဝင်တော့ဟု ယူဆကြပုံရှိသည်။ သမ္မာကျမ်းစာကို ဘုရားသခင့်နှုတ်မြွက်စကားတော်အဖြစ်ယူမှတ်သည့် ခေတ်ပညာတတ် မရှိသလောက်ပင်။ လူအများစုက စာပေပညာရှင် ဂျိမ်းစ်ဘားရ်နှင့် အတော်ပင်သဘောတိုက်ဆိုင်ကြသည်– “ကျမ်းစာ၏ ရိုးရာအစဉ်အလာ ဖြစ်ပေါ်တည်ရှိလာမှုဆိုင်ရာမှတ်တမ်းသည် လူသားလက်ရာမှတ်တမ်းဖြစ်သည်ဟု ကျွန်ုပ်ယုံကြည်သည်။ ကိုယ့်ယုံကြည်ချက်များကို ဖော်ပြထားသည့် လူ့ရေးသားချက်ဖြစ်သည်။”^၁

၄၊ ၅။ သမ္မာကျမ်းစာသည် ဘုရားသခင့်မှုတ်သွင်းရာ ဟုတ်မဟုတ်သိရန် အဘယ်ကြောင့် အရေးကြီးသနည်း။ ဤစာအုပ်၏ရည်ရွယ်ချက်ကား အဘယ်နည်း။

^၄ သင်လည်းဤသို့ပင် ယူဆသလော။ သမ္မာကျမ်းစာကို ဘုရားသခင့်နှုတ်မြွက်စကားတော်ဟုထင်သလော၊ သို့မဟုတ်လူ့နှုတ်ထွက်စကားဟုထင်သလော။ ဤမေးခွန်းကို သင်မည်သို့ပင် ဖြေစေကာမူ ဤအချက်ကို သုံးသပ်ပါ– သမ္မာကျမ်းစာသည် လူ့နှုတ်ထွက်စကားမျှသာဖြစ်ပါမူ ယုတ္တိသဘောအရ လူ့ပြဿနာများအတွက် ရှင်းလင်းသောအဖြေ ရှိမည် မဟုတ်ပေ။ လူသားတို့သည် မိမိတို့ကိုယ်ကို အဆိပ်သင့် သေကျေပျက်ပြုန်းစေမည့်အခြေအနေ သို့မဟုတ် နျူကလီးယားစစ်ပွဲတွင် မိမိတို့ကိုယ်ကို အစိတ်စိတ်အမြွှာမြွှာ ပေါက်ကွဲလွင့်စင်သွားစေမည့် အခြေအနေကို တစ်နည်းနည်းဖြင့် ရှောင်လွဲနိုင်မည့်မျှော်လင့်ချက်ဖြင့် အိုးနင်းခွက်နင်းနှင့် အစွမ်းကုန် ကြိုးပမ်းလုပ်ဆောင်သွားကြရန်သာ ရှိတော့သည်။ သို့သော် သမ္မာကျမ်းစာသည် ဘုရားသခင်၏နှုတ်မြွက်စကားတော် ဖြစ်ခဲ့ပါမူ ဤခက်ခဲသောကာလကို ဖြတ်ကျော်ရန် ကျွန်ုပ်တို့လိုအပ်သည့်အရာ စင်စစ်ပင်ဖြစ်သည်။

^၅ ဤစာအုပ်က သမ္မာကျမ်းစာသည် အမှန်ပင် ဘုရားသခင်၏နှုတ်မြွက်စကားတော်ဖြစ်ကြောင်း အထောက်အထား တင်ပြပါလိမ့်မည်။ ၎င်းအထောက်အထားကို သုံးသပ်ပြီးနောက် သမ္မာကျမ်းစာတွင် လူ့ပြဿနာအတွက် တစ်ခုတည်းသော ခိုင်လုံခြေမြစ်သည့်အဖြေများပါရှိကြောင်း သင်နားလည်သဘောပေါက်လာမည်ဟု ထုတ်ဝေသူများက မျှော်လင့်ပါသည်။ သို့သော် ဦးဆုံးအနေနှင့် သမ္မာကျမ်းစာသည် လေ့လာသုံးသပ်ထိုက်သည့်စာအုပ်ဖြစ်ကြောင်း ထင်ရှားစေသည့် အချက်အချို့ကို သင့်အား အာရုံစိုက်စေလိုပါသည်။

ခေတ်အဆက်ဆက် အရောင်းစွံသောစာအုပ်

၆၊ ၇။ သမ္မာကျမ်းစာနှင့်ပတ်သက်သည့် အဘယ် တစ်မူထူးခြားသည့်အချက်များကို ကျွန်ုပ်တို့အာရုံစိုက်အပ်သနည်း။

^၆ အစချီပြောရလျှင် သမ္မာကျမ်းစာသည် သမိုင်းတစ်လျှောက် အရောင်းစွံသောစာအုပ်၊ ထုတ်ဝေမှုအကျယ်ပြန့်ဆုံးသောစာအုပ် ဖြစ်၏။ ၁၉၈၈ ခုနှစ်ထုတ် ဂင်းနက်စ်ကမ္ဘာ့စံချိန်စာအုပ်အရ ၁၈၁၅ နှင့် ၁၉၇၅ ခုနှစ်ကြားကာလအတွင်း ခန့်မှန်းခြေအရ အုပ်ရေ ၂,၅၀၀,၀၀၀,၀၀၀ ပုံနှိပ်ထုတ်ဝေခဲ့သည်။ ကိန်းဂဏန်းကြီးပင်။ ထုတ်ဝေသည့်အရေအတွက်၌ သမိုင်းတွင် မည်သည့်စာအုပ်မျှ သမ္မာကျမ်းစာအုပ်ရေကို မမီချေ။

^၇ ထို့အပြင် သမ္မာကျမ်းစာလောက် ဘာသာစကားများစွာဖြင့် ဘာသာပြန်ဆိုသော အခြားမည်သည့်စာအုပ်မျှ မရှိပေ။ ယခုဆိုလျှင် သမ္မာကျမ်းစာကို လုံးချင်းအနေနှင့်ဖြစ်စေ၊ တစ်စိတ်တစ်ပိုင်းအနေနှင့်ဖြစ်စေ ဘာသာစကားပေါင်း ၂,၀၀၀ ကျော်ဖြင့် ဖတ်နိုင်ကြပြီ။ အမေရိကန်ကျမ်းစာအသင်း၏မှတ်တမ်းအရ ယခုဆိုလျှင် ကမ္ဘာ့လူဦးရေ ၉၈ ရာခိုင်နှုန်းသည် သမ္မာကျမ်းစာကို ရယူပိုင်ဆိုင်နိုင်ကြပြီ။ ဤမျှများသော ဘာသာပြန်ကျမ်းကို ထုတ်လုပ်ဖို့ အကြီးအကျယ်ကြိုးစားအားထုတ်ခဲ့ရမည်ကို မြင်ယောင်ကြည့်ပါလေ! အခြားမည်သည့်စာအုပ်သည် ဤမျှလောက်အာရုံစိုက်ခံရသနည်း။

ဩဇာရှိသည့်စာအုပ်

၈၊ ၉။ သမ္မာကျမ်းစာ၏ ဩဇာအရှိန်ကိုဖော်ပြသည့် အဘယ်ထုတ်ဖော်ပြောဆိုချက်များကို အချို့သူများ ပြောဆိုကြသနည်း။

^၈ ဗြိတဲန်နစ်ကာစွယ်စုံကျမ်းသစ်က ကျမ်းစာကို “လူ့သမိုင်းတွင် ဩဇာအကြီးဆုံးဖြစ်ဖွယ်ရှိသည့် စာအုပ်ပေါင်းချုပ်”^၂ ဟုသမုတ်သည်။ ၁၉ ရာစုနှစ် ဂျာမန်ကဗျာဆရာ ဟိန်းရစ်ချ်ဟိန်းက ဤသို့ဝန်ခံသည်– “ကျွန်ုပ်ဉာဏ်အလင်းရသည်မှာ . . . ကျမ်းစာကို ဖတ်ရှုခြင်းကြောင့်သာဖြစ်သည်။ ယင်းကို သမ္မာကျမ်းစာဟု မှန်ကန်စွာခေါ်ထိုက်သည်။ ဘုရားပျောက်နေသူသည် ထိုစာအုပ်တွင်ပင် ကိုယ်တော်ကို ရှာတွေ့နိုင်သည်။”^၃ ၎င်းရာစုနှစ်တွင်ပင် ကျွန်ဆန့်ကျင်ရေးလှုပ်ရှားသူ ဝီလျံ ဟိတ်ချ်. စီးဝဒ်က ဤသို့ကြွေးကြော်ခဲ့သည်– “လူသားတို့၏ ဘဝတိုးတက်ရေး မျှော်လင့်ချက်တစ်ရပ်လုံးသည် သမ္မာကျမ်းစာ၏ ကြီးထွားလျက်ရှိသည့် ဩဇာအရှိန်ပေါ်တွင် တည်မှီနေပါသည်။”^၄

^၉ အမေရိကန်ပြည်ထောင်စု၏ ၁၆ ယောက်မြောက်သမ္မတဖြစ်သူ အာဗြဟံလင်ကွန်းက သမ္မာကျမ်းစာကို “လူသားတို့အားဘုရားသခင် ပေးခဲ့သမျှတွင် အကောင်းဆုံးလက်ဆောင်ဖြစ်သည်။ . . . ဤစာအုပ်သာမရှိလျှင် အမှားနှင့်အမှန်ကို ကျွန်ုပ်တို့ ဝေခွဲနိုင်မည်မဟုတ်” ဟုဆိုခဲ့သည်။^၅ ဗြိတိသျှတရားသူကြီး ဆာဝီလျံ ဘလက်စတုန်းက ကျမ်းစာ၏လွှမ်းမိုးနိုင်မှုကို ဤသို့ပြောကာ ပေါ်လွင်စေခဲ့သည်– “သဘာဝနိယာမတရားနှင့် ဖွင့်ပြခြင်းဆိုင်ရာ [သမ္မာကျမ်းစာ] နိယာမတရားတည်းဟူသော အုတ်မြစ်နှစ်ခုပေါ်တွင် လူ့ ဥပဒေအားလုံး မူတည်လျက်ရှိ၏; တစ်နည်းဆိုရလျှင် ဤအုတ်မြစ်တို့ကို ဆန့်ကျင်ဘက်ပြုရန် မည်သည့်လူ့ ဥပဒေများကိုမျှ ခွင့်မပြုသင့်ပေ။”^၆

အမုန်းလည်းခံရ၊ အချစ်လည်းခံရ

၁၀။ သမ္မာကျမ်းစာကို ဆန့်ကျင်ကြောင်း မည်သို့ဖော်ပြခဲ့ကြသနည်း။

^၁၀ တစ်ချိန်တည်းမှာပင် သမ္မာကျမ်းစာလောက် အဘယ်စာအုပ်မျှ ဆိုးဆိုးရွားရွားဆန့်ကျင်မှု၏ ပစ်မှတ်မဖြစ်ခဲ့ဖူးကြောင်း၊ သမိုင်းတစ်လျှောက် အမုန်းတီးပင်ခံခဲ့ရကြောင်းကို ကျွန်ုပ်တို့သတိပြုသင့်သည်။ အလယ်ခေတ်မှသည် ကျွန်ုပ်တို့၏ ၂၀ ရာစုနှစ်အထိ သမ္မာကျမ်းစာအုပ်များသည် လူထုရှေ့တွင် မီးပုံရှို့ခြင်းခံခဲ့ရသည်။ သမ္မာကျမ်းစာကို ဖတ်ရှုခြင်း၊ ဖြန့်ဝေခြင်းကြောင့် ယနေ့အချိန်တွင်ပင် ဒဏ်တပ်ခံရ၊ ထောင်ချခံရကြသည်။ လွန်ခဲ့သည့်ရာစုနှစ်များတွင် ဤကဲ့သို့သော “ပြစ်မှုများ” သည် ညှဉ်းဆဲခြင်းနှင့် အသတ်ခံရခြင်းသို့ ဦးတည်စေလေ့ရှိသည်။

၁၁၊ ၁၂။ တင်ဒေးသည် သမ္မာကျမ်းစာကို ချစ်မြတ်နိုးကြောင်း မည်သို့ပြခဲ့သနည်း။

^၁၁ ယင်းနှင့်တစ်ပြိုင်တည်းတွင် သမ္မာကျမ်းစာ စေ့ဆော်ဖြစ်ပေါ်စေသည့် ကြီးမားသောမေတ္တာလည်း ရှိခဲ့သည်။ လူများစွာတို့သည် မညှာမတာ နှိပ်စက်ညှဉ်းပန်းသည့်ကြားမှ သမ္မာကျမ်းစာကို စွဲစွဲမြဲမြဲဖတ်ရှုခဲ့ကြသည်။ ၁၆ ရာစုနှစ်က အင်္ဂလိပ်လူမျိုး ဝီလျံတင်ဒေးအကြောင်း သုံးသပ်ကြည့်ပါလေ၊ သူသည် အောက်စ်ဖို့ဒ်တက္ကသိုလ်တွင် ပညာဆည်းပူးခဲ့ပြီး ကဲမ်းဘရစ်ချ်တက္ကသိုလ်တွင် လေးစားခံရသော နည်းပြဆရာတစ်ဦးဖြစ်လာသည်။

^၁၂ တင်ဒေးသည် သမ္မာကျမ်းစာကို ချစ်မြတ်နိုးသည်။ သို့သော် သူ့အချိန်တွင် ဘာသာရေးအာဏာပိုင်များက သမ္မာကျမ်းစာကို နေ့စဉ်သုံးစကားအဖြစ်မှ တိမ်ကောသွားသည့် ဘာသာစကားဖြစ်သော လက်တင်ဘာသာဖြင့် ဆက်၍ထားရန် အပြင်းအထန်ကြိုးစားကြသည်။ ထို့ကြောင့် တင်ဒေးသည် မိမိ၏နိုင်ငံသားချင်းတို့ သမ္မာကျမ်းစာကို ရရှိပိုင်ဆိုင်နိုင်ရေးအတွက် အင်္ဂလိပ်ဘာသာသို့ပြန်ဆိုရန် ဆုံးဖြတ်လိုက်သည်။ ယင်းသို့ပြုခြင်းသည် ဥပဒေကို ဆန့်ကျင်ရာရောက်သည့်အတွက် ပြည့်စုံကုံလုံသည့် ပညာရေးအသက်မွေးမှုလုပ်ငန်းကို စွန့်လွှတ်ပြီး ဥရောပတိုက်သို့ ထွက်ပြေးခဲ့ရသည်။ သူသည် ဂရိကျမ်း (“ဓမ္မသစ်ကျမ်း”) နှင့် ဟေဗြဲကျမ်း (“ဓမ္မဟောင်းကျမ်း”) မှအချို့ကို သူ၏တိုင်းရင်းဘာသာစကားသို့ ပြန်ဆိုနိုင်ဖို့အရေး ဝရမ်းပြေးဘဝဖြင့် ခက်ခက်ခဲခဲအသက်မွေးခဲ့ရသည်; သို့သော် နောက်ဆုံးတွင် သူအဖမ်းခံခဲ့ရသည်၊ အယူမှားသူဟု ပြစ်ဒဏ်စီရင်ခံရပြီး လည်ညှစ်သတ်ခံရကာ ရုပ်ကလာပ်ကို မီးရှို့ပစ်ခဲ့သည်။

၁၃။ သမ္မာကျမ်းစာကို အမှန်ပြိုင်စံရှားစေသည့် အကြောင်းတစ်ခုကား အဘယ်နည်း။

^၁၃ တင်ဒေးသည် သမ္မာကျမ်းစာကိုဖတ်ရှုရန်၊ အခြားသူများ သမ္မာကျမ်းစာ ရရှိနိုင်ရန် လုပ်ဆောင်ရာတွင် အရာရာကိုစွန့်လွှတ်ခဲ့သည့်လူများစွာထဲမှ တစ်ယောက်သာဖြစ်သည်။ ဤမျှများပြားသည့် အမျိုးသား အမျိုးသမီးများကို ဤမျှအထိ ရဲစွမ်းသတ္တိရှိအောင် စေ့ဆော်ပေးနိုင်သည့် အခြားမည်သည့်စာအုပ်မျှ မရှိပေ။ ဤအင်္ဂါရပ်တွင် သမ္မာကျမ်းစာသည် အမှန်ပင်ပြိုင်ဘက်ကင်းသည်။

ဘုရားသခင့်နှုတ်မြွက်စကားတော်ဖြစ်သည်ဟူသည့်အဆို

၁၄၊ ၁၅။ ကျမ်းရေးသူများက မည်သည့်အဆိုကို အကြိမ်ကြိမ်ထုတ်ဖော်ပြောကြသနည်း။

^၁၄ ကျမ်းရေးသူများစွာ၏ အဆိုကြောင့်လည်း သမ္မာကျမ်းစာသည် ပြိုင်စံရှားရခြင်းဖြစ်သည်။ ဘုရင်များ၊ သိုးထိန်းများ၊ တံငါသည်များ၊ အရပ်ဘက်ဝန်ထမ်းများ၊ ယဇ်ပုရောဟိတ်များ၊ အနည်းဆုံး ဗိုလ်ချုပ်တစ်ဦးနှင့် သမားတော်တစ်ဦးအပါအဝင် လူအယောက် ၄၀ ခန့်က သမ္မာကျမ်းစာအပိုင်းအသီးသီးကို ပါဝင်ရေးသားခဲ့ကြသည်။ သို့သော် ကျမ်းရေးသူများက မိမိတို့သည် ကိုယ့်အကြံအစည်များကို ရေးနေခြင်းမဟုတ်ဘဲ ဘုရားသခင်၏အကြံအစည်တော်များကို ရေးနေခြင်းဖြစ်ကြောင်း အကြိမ်ကြမ်အဖန်ဖန် တစ်သံတည်းထွက်ဆိုခဲ့ကြသည်။

^၁၅ ထို့ကြောင့် သမ္မာကျမ်းစာထဲတွင် “ထာဝရဘုရား၏ဝိညာဉ်တော်သည် ငါ့အားဖြင့်မိန့်တော်မူ၏။ နှုတ်[မြွက်]တော်သည် ငါ့လျှာ၌တည်၏၊” သို့မဟုတ် “ကောင်းကင်ဗိုလ်ခြေသခင် အရှင်ထာဝရဘုရားမိန့်တော်မူသည်ကား” ဟူသည့် စကားအသုံးအနှုန်းများကို ဖတ်ရလေ့ရှိသည်။ (၂ ဓမ္မရာဇဝင် ၂၃:၂; ဟေရှာယ ၂၂:၁၅) ဧဝံဂေလိဟောသူချင်းတစ်ဦးထံ ပေးပို့လိုက်သည့်စာတစ်စောင်တွင် တမန်တော်ပေါလုက “ထိုကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍၊ ဘုရားသခင်၏လူသည် စုံလင်သောသူ၊ ကောင်းသောအမှုအမျိုးမျိုးတို့ကိုပြုစုခြင်းအလိုငှာ ပြင်ဆင်သောသူဖြစ်မည်အကြောင်း၊ [ဆုံးမ]ပေးခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်းကျေးဇူးများကို ပြုတတ်၏” ဟုရေးသားခဲ့သည်။—၂ တိမောသေ ၃:၁၆၊ ၁၇။

၁၆။ ကျမ်းစာက အဘယ်မေးခွန်းများကို ဆွေးနွေးထားသနည်း။

^၁၆ သမ္မာကျမ်းစာသည် ဘုရားသခင့်နှုတ်မြွက်စကားတော်ဖြစ်ပြီး လူ့နှုတ်ထွက်မဟုတ်ဟူသည့်အဆိုနှင့်အညီ ကျမ်းစာက ဘုရားသခင်တစ်ပါးတည်းသာ အဖြေပေးနိုင်သည့် မေးခွန်းများကို ဖြေဆိုထားသည်။ ဥပမာ လူ့အစိုးရများသည် အဓွန့်ရှည်တည်တံ့သည့်ငြိမ်းချမ်းရေးကို အဘယ်ကြောင့် မစွမ်းဆောင်ပေးနိုင်ကြကြောင်း၊ လူသားများအနေဖြင့် ဘဝတွင် စိတ်အကျေနပ်ကြီးကျေနပ်မှုကို မည်သို့တွေ့ရှိနိုင်ကြောင်း၊ ကမ္ဘာနှင့် ကမ္ဘာပေါ်ရှိလူသားတို့အတွက် အနာဂတ် မည်သို့ရှိကြောင်းတို့ကို ရှင်းပြသည်။ ယခု တွေးတောတတ်သော ပုဂ္ဂိုလ်တစ်ယောက်အနေဖြင့် သင်သည် ဤမေးခွန်းတို့ကိုဖြစ်စေ၊ အလားတူမေးခွန်းများကိုဖြစ်စေ အကြိမ်ပေါင်းများစွာ စဉ်းစားခဲ့ပေမည်။ သမ္မာကျမ်းစာသည် ဘုရားသခင့်နှုတ်မြွက်စကားတော်ဖြစ်သဖြင့် ခိုင်လုံယုံကြည်လောက်သောအဖြေများကို ပေးနိုင်သည့် တစ်ခုတည်းသောစာအုပ်ဖြစ်သည်ဟူသည့် ဖြစ်နိုင်ခြေအလားအလာကို မည်သည့်နည်းဖြင့်မဆို သုံးသပ်ကြည့်ပါလေ။

၁၇၊ ၁၈။ (က) သမ္မာကျမ်းစာကိုထိုးနှက်ဖို့ချိန်ရွယ်သည့် အဘယ်စွပ်စွဲချက်အချို့ကို ဤစာအုပ်တွင် ဆွေးနွေးထားသနည်း။ (ခ) အဘယ်ထပ်ဆင့်အကြောင်းအရာများကို ခြုံငုံတင်ပြမည်နည်း။

^၁၇ ဤစာအုပ်တွင် တင်ပြထားသည့် သာဓကကို ဂရုစိုက်ဆန်းစစ်ကြည့်ရန် သင့်အား ကျွန်ုပ်တို့ တိုက်တွန်းပါသည်။ အခန်းအချို့တွင် ကျမ်းစာနှင့်ပတ်သက်ပြီး မကြာခဏကြားရလေ့ရှိသော ဝေဖန်ချက်များကို ဆွေးနွေးသွားမည်။ သမ္မာကျမ်းစာသည် သိပ္ပံနည်းမကျသလော။ အတွင်းသဘောချင်း ဆန့်ကျင်သလော။ ပါဝင်သည့်အကြောင်းများသည် သမိုင်းအစစ်လော၊ ဒဏ္ဍာရီမျှသာလော။ သမ္မာကျမ်းစာတွင်မှတ်တမ်းတင်ထားသည့် အံ့ဖွယ်အမှုများသည် အမှန်တကယ်ဖြစ်ပျက်ခဲ့၏လော။ ယင်းမေးခွန်းများကို ဖြေဆိုရန်အတွက် ယုတ္တိရှိသောသာဓကများကို တင်ပြထားသည်။ ယင်းအပြီးတွင် သမ္မာကျမ်းစာသည် ဘုရားသခင်မှုတ်သွင်းရာဖြစ်ကြောင်းထောက်ခံသော တာသွားသည့် သက်သေထင်ရှားပြချက်များကို ဆွေးနွေးမည်– သမ္မာကျမ်းစာ၏ ပရောဖက်ပြုချက်များ၊ ယင်း၏နက်နဲသောဉာဏ်ပညာနှင့် လူတို့၏အသက်တာအပေါ်သက်ရောက်သည့် အံ့ချီးဖွယ်အကျိုးတို့ဖြစ်သည်။ နောက်ဆုံးတွင် သင့်အသက်တာပေါ် သမ္မာကျမ်းစာက အဘယ်အကျိုးသက်ရောက်နိုင်ကြောင်း ကျွန်ုပ်တို့ လေ့လာကြည့်ပါမည်။

^၁၈ သို့သော် ဦးဆုံးအနေဖြင့် သမ္မာကျမ်းစာကို ကျွန်ုပ်တို့မည်သို့ရရှိလာပုံကို ဆွေးနွေးကြမည်။ ဤအံ့မခန်းဖွယ်စာအုပ်၏ သမိုင်းကြောင်းကပင် ယင်းသည် လူသားတို့အစထွင်လိုက်သည့်အရာမဟုတ်ကြောင်း သက်သေပြပါသည်။

[စာမျက်နှာ ၄ ပါ စာမျက်နှာအပြည့်ရုပ်ပုံ]

[စာမျက်နှာ ၆ ပါ ရုပ်ပုံ]

သမ္မာကျမ်းစာသည် သမိုင်းတစ်လျှောက်တွင် အကျယ်ပြန့်ဆုံး ထုတ်ဝေဖြန့်ချိခြင်းခံရပြီး ဘာသာစကား အများဆုံးဖြင့် ပြန်ဆိုခြင်းခံရသည့်စာအုပ်ဖြစ်သည်

[စာမျက်နှာ ၉ ပါ ရုပ်ပုံ]

ဤ ၁၅ ရာစု သစ်ထွင်းပန်းပုပုံ သရုပ်ဖော်ထားသကဲ့သို့ လူများစွာတို့သည် သမ္မာကျမ်းစာဖတ်ခြင်း “ပြစ်မှု” ဖြင့် အရှင်လတ်လတ်မီးရှို့ခံခဲ့ကြရသည်

[စာမျက်နှာ ၁၁ ပါ ရုပ်ပုံ]

ကျမ်းရေးသူများက မိမိတို့သည် ဘုရားသခင့်မှုတ်သွင်းခြင်း ခံရသည်ဟုဆိုကြ၏