ကောင်းကင်

အဓိပ္ပာယ်သတ်မှတ်ချက်– ယေဟောဝါဘုရားသခင်နှင့် ကိုယ်တော့်သစ္စာရှိ နာမ်ဝိညာဉ်သတ္တဝါများကျိန်းဝပ်ရာနေရာ။ လူ့မျက်စိဖြင့်မမြင်နိုင်သောနယ်ပယ်။ သမ္မာကျမ်းစာက “ကောင်းကင် (များ)” ဟူသောအသုံးအနှုန်းကို အခြားအဓိပ္ပာယ်အမျိုးမျိုးဖြင့်လည်း သုံးနှုန်းထားသည်။ ဥပမာ၊ ဘုရားသခင်ကိုယ်တော်တိုင်၊ ကိုယ်တော့်သစ္စာရှိနာမ်ဝိညာဉ်သတ္တဝါများအဖွဲ့အစည်း၊ မျက်နှာသာတော်ရအနေအထား၊ ကမ္ဘာနှင့်အလှမ်းဝေးသောရုပ်ပိုင်းစကြဝဠာ၊ ကမ္ဘာဂြိုဟ်တစ်ဝိုက်ရှိလေဟာနယ်၊ စာတန့်စိုးမိုးမှုအောက်ရှိလူ့အစိုးရများ၊ ယေဟောဝါ၏အခွင့်အာဏာဖြင့်အုပ်စိုးသော ယေရှုခရစ်နှင့်သူ့အမွေတော်ခံဖက်များ၏ ဖြောင့်မတ်သောကောင်းကင်အစိုးရသစ်တို့ ဖြစ်ကြသည်။

ကျွန်ုပ်တို့အားလုံး လူဖြစ်မလာမီ နာမ်ဝိညာဉ်ဘောင်၌ အသက်ရှင်ခဲ့ဖူးသလော

ယော. ၈:၂၃၊ သက– “ကိုယ်တော်[ယေရှုခရစ်] က ‘သင်တို့သည် အောက်ဘုံသားများဖြစ်ကြ၏။ ငါမူကား အထက်ဘုံမှလာ၏။ သင်တို့သည် ဤလောကသားများဖြစ်ကြ၏။ ငါမူကား ဤလောကသားမဟုတ်’ ဟုမိန့်တော်မူ၏။” (ယေရှု တကယ်ပင် နာမ်ဝိညာဉ်ဘောင်မှလာ၏။ သို့သော် ယေရှုမိန့်ဆိုသည့်အတိုင်း အခြားသူများမှာ ထိုသို့မဟုတ်။)

ရော. ၉:၁၀-၁၂– “ရေဗက္ကသည် ငါတို့အဘဣဇာက်နှင့်စုံဖက်၍ ပဋိသန္ဓေစွဲယူသောအခါ ဘုရားသခင်ရွေးကောက်တော်မူခြင်းနှင့်ယှဉ်သောအကြံတော်သည် အကျင့်အားဖြင့်မတည် ခေါ်တော်မူသောသူ၏အလိုတော်အားဖြင့်တည်မည်အကြောင်း၊ သားမဖွားမီ၊ ထိုသားတို့သည် ကောင်းသောအကျင့်၊ မကောင်းသောအကျင့်ကိုမကျင့်မီ သားအကြီးသည် သားအငယ်၌ကျွန်ခံရလိမ့်မည်ဟုထိုမိန်းမအား ဗျာဒိတ်ပေးတော်မူ၏။” (အကယ်၍ အမြွှာညီနောင် ယာကုပ်နှင့်ဧသောတို့သည် တစ်ချိန်ကနာမ်ဝိညာဉ်ဘောင်တွင်အသက်ရှင်ခဲ့ဖူးသည်မှန်လျှင် မိမိတို့အကျင့်အလျောက် ထိုတွင် အမည်သတင်းထင်ကျန်ခဲ့မည်မဟုတ်လော။ သို့သော် မွေးလာသည့်နောက်မှသာ ထိုအမည်သတင်းရှိလာကြသည်။)

လူကောင်းမှန်သမျှ ကောင်းကင်သို့သွားသလော

တ. ၂:၃၄၊ သက– “[ယေဟောဝါစိတ်တော်နှင့်တွေ့သူအဖြစ်ကျမ်းစာ၌ညွှန်းဆိုခံရသော] ဒါဝိဒ်မင်းသည် . . .ကောင်းကင်ဘုံသို့ တက်ကြွသည်မဟုတ်။”

မ. ၁၁:၁၁– “ငါအမှန်ဆိုသည်ကား မိန်းမမွေးသောသူတို့တွင် ဗတ္တိဇံဆရာယောဟန်ထက် ကြီးမြတ်သောသူတစ်ယောက်မျှ မပေါ်မထွန်းသေး။ သို့သော်လည်း ကောင်းကင်နိုင်ငံတော်တွင် အငယ်ဆုံးသောသူသည် ထိုသူထက်သာ၍ ကြီးမြတ်၏။” (ထို့ကြောင့် ယောဟန်သေဆုံးစဉ် ကောင်းကင်သို့မသွားချေ။)

ဆာ. ၃၇:၉၊ ၁၁၊ ၂၉– “ပြစ်မှားသောသူတို့သည် ပယ်ရှင်းခြင်းကိုခံရကြလိမ့်မည်။ . . . စိတ်နှိမ့်ချသောသူတို့မူကား ပြည်တော်[“မြေကြီး၊” ကဘ] ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။ ဖြောင့်မတ်သောသူတို့သည် ပြည်တော်[“မြေကြီး၊” ကဘ] ကိုအမွေခံ၍အစဉ်အမြဲနေရကြလိမ့်မည်။”

အာဒံအပြစ်မပြုခဲ့ပါက နောက်ဆုံး၌ ကောင်းကင်သို့သွားခဲ့မည်လော

က. ၁:၂၆– “တစ်ဖန် ဘုရားသခင်က ငါတို့ပုံသဏ္ဌာန်နှင့်တညီတသဏ္ဌာန်တည်းလူကိုဖန်ဆင်းကြစို့။ သူသည် ပင်လယ်ငါးတို့ကိုလည်းကောင်း၊ မိုးကောင်းကင်ငှက်တို့ကိုလည်းကောင်း၊ သားယဉ်တို့ကိုလည်းကောင်း၊ မြေတစ်ပြင်လုံးနှင့်တကွ မြေပေါ်မှာတွားတတ်သောတိရစ္ဆာန်အပေါင်းတို့ကိုလည်းကောင်း အုပ်စိုးစေဟု အမိန့်တော်ရှိ၏။” (ထို့ကြောင့် အာဒံသည် မြေကြီးနှင့် မြေကြီးပေါ်ရှိတိရစ္ဆာန်များကို စောင့်ရှောက်ရန် ဘုရားသခင်ရည်ရွယ်တော်မူ၏။ ကောင်းကင်တက်မည့်အကြောင်း ဘာမျှမဆိုပါ။)

က. ၂:၁၆၊ ၁၇– “ထာဝရအရှင်ဘုရားသခင်ကလည်း ကောင်းမကောင်းကိုသိကျွမ်းရာအပင်မှတစ်ပါး ထိုဥယျာဉ်၌ရှိသမျှသောအပင်တို့၏အသီးကိုသင်သည်စားရသောအခွင့်ရှိ၏။ ထိုအပင်၏အသီးကိုကား မစားရ။ စားသောနေ့တွင် ဧကန်အမှန်သေရမည်ဟုလူကိုပညတ်ထားတော်မူ၏။” (လူသည်တစ်နေ့သေရန် ဘုရားသခင်မရည်ရွယ်ခဲ့။ အထက်၌ကိုးကားသောဘုရားသခင့်ပညတ်တော်က သေခြင်းသို့ပို့သောလမ်းကိုမလျှောက်ရန်အာဒံအားသတိပေးတော်မူကြောင်း သိသာစေသည်။ သေခြင်းသည် မနာခံမှုအတွက်ပေးသောအပြစ်ဒဏ်ဖြစ်သည်။ သာ၍မြတ်သောကောင်းကင်အသက်တာသို့ပို့သည့်လမ်းမဟုတ်။ လူသာနာခံခဲ့လျှင် သူ့အားပေးသနားတော်မူသော ပရဒိသု၌ အဆက်မပြတ် ထာဝစဉ်အသက်ရှင်မွေ့လျော်ခွင့်ဖြင့် ဆုချခြင်းခံခဲ့ရမည်ဖြစ်သည်။ ဟေရှာယ ၄၅:၁၈ ကိုရှု။)

လူသည် ကောင်းကင်သွားမှသာ တကယ်ပျော်ရွှင်သောအနာဂတ်ကိုရမည်လော

ဆာ. ၃၇:၁၁– “စိတ်နှိမ့်ချသောသူတို့မူကား ပြည်တော်[“မြေကြီး၊” ကဘ] ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။”

ဗျာ. ၂၁:၁-၄– “ကောင်းကင်သစ်နှင့်မြေကြီးသစ်ကိုလည်းငါမြင်၏။ . . .ကောင်းကင်မှကြီးသောအသံကား ဘုရားသခင်၏တဲတော်သည် လူတို့တွင်ရှိ၏။ လူတို့နှင့်အတူ ကျိန်းဝပ်တော်မူမည်။ သူတို့သည် ကိုယ်တော်၏လူဖြစ်ကြလိမ့်မည်။ ဘုရားသခင်သည် ကိုယ်တော်တိုင် သူတို့နှင့်အတူရှိနေ၍ သူတို့၏ဘုရားသခင်ဖြစ်တော်မူမည်။ ဘုရားသခင်သည် သူတို့၏မျက်စိ၌ မျက်ရည်ရှိသမျှတို့ကိုသုတ်တော်မူမည်။ နောက်တစ်ဖန်သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား၊ ရှေးဖြစ်ဖူးသောအရာတို့သည် ရွေ့သွားကြပြီ။”

မိ. ၄:၃၊ ၄– “တစ်ပြည်ကိုတစ်ပြည်စစ်မတိုက်၊ စစ်အတတ်ကိုလည်းနောက်တစ်ဖန်မသင်ရကြ။ လူအပေါင်းတို့သည် ကိုယ်ပိုင်သောစပျစ်ပင်၊ ကိုယ်ပိုင်သောသင်္ဘောသဖန်းပင်အောက်မှာထိုင်ကြလိမ့်မည်။ ကြောက်စေသောသူတစ်ယောက်မျှမရှိရ။ ကောင်းကင်ဗိုလ်ခြေအရှင် ထာဝရဘုရား၏နှုတ်တော်ထွက်အမိန့်တော်ရှိ၏။”

ယေရှုသည် မိမိထက်အရင်သေလွန်ခဲ့သူတို့အတွက် ကောင်းကင်သွားလမ်းဖွင့်ခဲ့သလော

၁ ပေတရု ၃:၁၉၊ ၂၀ (သက) က ဘာကိုဆိုလိုသနည်း။ “[ယေရှုသည် ထမြောက်တော်မူသည့်နောက်၌] ထိုဝိညာဉ်တော်အားဖြင့်လည်းကြွသွားတော်မူ၍ ယခုထောင်ထဲမှာလှောင်ထားသောဝိညာဉ်တို့အား တရားဟောတော်မူ၏။ ထိုဝိညာဉ်တို့မူကား ရှေးကာလ၊ နောဧလက်ထက်၌ နည်းသောသူတည်းဟူသောလူ[“စိုးလ်၊” ကဘ; KJ, Dy; “လူ” TEV, JB; “ပုဂ္ဂိုလ်၊” RS] ရှစ်ယောက်တို့ကို ရေအားဖြင့် ကယ်ဆယ်သောသင်္ဘောကို တည်လုပ်စဉ်တွင် ဘုရားသခင်၏ခန္တီတော်သည် ဆိုင်းလင့်တော်မူသော်လည်း နားမထောင်သောဝိညာဉ်[များ] ဖြစ်သတည်း။” (“အကျဉ်းကျလျက်နေသောဝိညာဉ်များ” သည် ရေလွှမ်းမိုးခြင်းမတိုင်မီ နောဧသတိပေးချက်ကို နားမထောင်ခဲ့သော လူသားများ၏စိုးလ်များလော။ ယခုသူတို့ကောင်းကင်သွားရန် လမ်းပွင့်ခဲ့ပြီလော။ ၂ ပေတရု ၂:၄ နှင့် ယုဒ ၆ တို့ကို ကမ္ဘာဦး ၆:၂-၄ နှင့်နှိုင်းယှဉ်သောအခါ ထိုဝိညာဉ်များမှာ နောဧလက်ထက် လူ့အသွင်ကိုဆောင်ပြီး အိမ်ထောင်ပြုကြသော ဘုရားသခင့်ကောင်းကင်တမန်သားများဖြစ်ကြောင်း သိရှိရသည်။ ၁ ပေတရု ၃:၁၉၊ ၂၀ ပါ “ဝိညာဉ်များအတွက် ဂရိစကားလုံးမှာ pneuʹma·sin (နယူးမားစင်း) ဖြစ်၍ “စိုးလ်များ” ဟူ၍ပြန်ဆိုသော ဂရိစကားလုံးမှာ psykhai (ဆိုက်ခိုက်) ဖြစ်၏။ ထို“ဝိညာဉ်တို့” သည် ရုပ်ခန္ဓာချွတ်ထားသော“စိုးလ်များ” မဟုတ်။ နာမခံသောကောင်းကင်တမန်များတည်း။ ဤတွင်ဆိုသော“စိုးလ်” များမှာ အသက်ရှင်လျက်ရှိသောလူသားများ၊ နောဧနှင့်သူ့အိမ်သားများတည်း။ ထို့ကြောင့် “ထောင်ထဲမှာလှောင်ထားသောဝိညာဉ်တို့” အား ဟောတော်မူသောတရားသည် တရားစီရင်ချက်သာဖြစ်ရပေမည်။)

၁ ပေတရု ၄:၆ ၏အဓိပ္ပာယ်ကား အဘယ်နည်း။ “ထိုအကြောင်းကြောင့် လူတို့ရှေ့၌ ကိုယ်ခန္ဓာအားဖြင့် အပြစ်စီရင်ခြင်းကိုခံရသော်လည်း ဘုရားသခင့်ရှေ့တော်၌ စိတ်ဝိညာဉ်အားဖြင့် အသက်ရှင်မည်အကြောင်း သေသောသူတို့သည် ဧဝံဂေလိတရားကိုကြားရကြ၏။” (ဤတွင်ဆိုသော“သေသောသူတို့” သည် ခရစ်တော်မသေမီက သေခဲ့ကြသူများလော။ အထက်ဆိုနှင့်ခဲ့သည့်အတိုင်း ထိုလူသေတို့သည် “အကျဉ်းကျလျက်နေသောဝိညာဉ်များ” မဟုတ်။ ထိုဝိညာဉ်များမှာ မနာခံသောကောင်းကင်တမန်များဖြစ်ကြသည်။ ရုပ်ခန္ဓာ၌သေသောသူတို့အား တရားဟောလျှင်လည်း အကျိုးရှိမည်မဟုတ်။ အကြောင်းမှာ ဒေသနာ ၉:၅ က သူတို့သည် “အဘယ်အရာကိုမျှမသိ” ဟုဆို၏။ ဆာလံ၁၄၆:၄က ထပ်ဆင့်၍ လူသေသောအခါ “အကြံအစည်တို့သည် ပျက်စီးကြ၏” ဟုဆို၏။ သို့ရာတွင် ဧဖက် ၂:၁-၇၊ ၁၇ က ဝိညာဉ်ရေးဘက်သေခဲ့သော်လည်း သတင်းကောင်းကိုလက်ခံရာမှ ဝိညာဉ်ရေးဘက်ပြန်ရှင်လာသူများအကြောင်း ဖော်ပြထားပေသည်။)

“ဓမ္မသစ်ကျမ်း” ပါကောင်းကင်အသက်တာသည် ခရစ်ယာန်အားလုံးအတွက် မျှော်လင့်ချက်လော

ယော. ၁၄:၂၊ ၃– “ငါ့အဘ၏အိမ်တော်၌ နေစရာအခန်းအများရှိ၏။ သို့မဟုတ်လျှင်မဟုတ်ကြောင်းကို သင်တို့အား ငါမပြောဘဲမနေ။ သင်တို့နေစရာအရပ်ကိုပြင်ဆင်ခြင်းငှာ ငါသွားရ၏။ ငါသည်သွား၍ သင်တို့နေစရာအရပ်ကိုပြင်ဆင်ပြီးမှ တစ်ဖန်လာပြန်၍ ငါရှိရာအရပ်၌ သင်တို့ရှိစေခြင်းငှာ သင်တို့ကို ငါ့ထံသို့သိမ်းဆည်းမည်။” (ဤတွင်ယေရှုက မိမိ၏သစ္စာရှိတမန်တော်များသည် အချိန်တန်လျှင် ခမည်းတော်“အိမ်တော်” ၌ မိမိနှင့်အတူနေကြလိမ့်မည်ဖြစ်ကြောင်း မိန့်ဆိုနေသည်။ သို့သော် အခြားသူမည်မျှလည်း ကောင်းကင်သို့သွားမည်ဟု မိန့်တော်မမူ။)

ယော. ၁:၁၂၊ ၁၃– “ထိုသူ[ယေရှု] ကိုလက်ခံသမျှသောသူတည်းဟူသောကိုယ်တော်ကိုယုံကြည်သောသူတို့အား ဘုရားသခင်၏သားဖြစ်ရသောအခွင့်ကို ပေးတော်မူ၏။ ထိုသားတို့မူကား လူမျိုးနှင့်စပ်ဆိုင်၍ ဖွားသောသားမဟုတ်။ မေထုန်သံဝါသအားဖြင့်ဖွားသောသားမဟုတ်။ လူအလိုအလျောက်ဖွားသောသားမဟုတ်။ ဘုရားသခင်ဖွားတော်မူသောသားဖြစ်သတည်း။” (ရှေ့နောက်စကားက အခန်းငယ် ၁၁ ၌ ယေရှု၏လူမျိုးတော် ဂျူးများကိုပြောနေကြောင်း သတိပြုပါ။ ပထမရာစု၌ သူတို့ထံကိုယ်တော်ကြွလာစဉ် ကိုယ်တော်အားလက်ခံသမျှဂျူးတို့သည် ကောင်းကင်အသက်တာမျှော်လင့်ချက်နှင့်အတူ ဘုရားသခင့်သားသမီးများဖြစ်ခဲ့ကြပေသည်။ ကျမ်းချက်ပါကြိယာများသည် အတိတ်ကာလဖြစ်သောကြောင့် ဤအပိုဒ်သည် ထိုအချိန်မှစ၍ခရစ်ယာန်များဖြစ်လာကြသောလူအားလုံးကို ရည်ညွှန်းနေသည်မဟုတ်။)

ရော. ၈:၁၄၊ ၁၆၊ ၁၇၊ သက– “ထာဝရဘုရား၏ဝိညာဉ်တော်ရှေ့ဆောင်လမ်းပြမှုကိုခံယူသောသူတို့သည် ထာဝရဘုရား၏သားများ ဖြစ်ကြ၏။ ငါတို့သည် ထာဝရဘုရား၏သားများဖြစ်ကြကြောင်းကို ဝိညာဉ်တော်ကိုယ်တိုင်ပင်လျှင် ငါတို့၏ဝိညာဉ်နှင့်အတူ သက်သေခံတော်မူ၏။ ငါတို့သည် ထာဝရဘုရား၏သားသမီးများဖြစ်သဖြင့် ကိုယ်တော်၏လူစုအတွက် ကိုယ်တော်လျာထားတော်မူသောကောင်းချီးမင်္ဂလာများကို ခံစားကြရမည်။ ခရစ်တော်အတွက် ထာဝရဘုရားလျာထားတော်မူသည့်ဂုဏ်အသရေကိုလည်း ခံစားကြရမည်။ အဘယ်ကြောင့်ဆိုသော် ငါတို့သည် ကိုယ်တော်နှင့်အတူ ဝေဒနာခံစားကြပါလျှင် ကိုယ်တော်နှင့်အတူ ဘုန်းအသရေတော်ဝင်စားကြရမည်ဖြစ်သောကြောင့်တည်း။” (ဤစာရေးချိန်၌ ဘုရားသခင့်ဝိညာဉ်တော်လမ်းပြမှုခံယူသူရှိသမျှ ဘုရားသခင့်သားများဖြစ်လာပြီး ခရစ်တော်နှင့်အတူ ဘုန်းဝင်စားကြရမည်မှန်၏။ သို့သော် ယခင်ကထိုသို့မဟုတ်ခဲ့ချေ။ လုကာ၁:၁၅က နှစ်ခြင်းဆရာယောဟန်သည် သန့်ရှင်းသောဝိညာဉ်တော်ဖြင့်ပြည့်မည်ဟုဆိုသော်လည်း မဿဲ၁၁:၁၁က သူသည် ကောင်းကင်နိုင်ငံတော်ဘုန်း ဝင်စားမည်မဟုတ်ကြောင်း ရှင်းလင်းစွာဆိုထားသည်။ ထို့ကြောင့် ကောင်းကင်နိုင်ငံတော်အမွေခံများကိုစုရုံးပြီးသည့်နောက်၌လည်း သားတော်၏နောက်လိုက်များအနေနှင့်ဘုရားသခင်ကိုဝတ်ပြုမည့်အခြားသူများရှိဦးမည်ဖြစ်သော်လည်း ထိုသူတို့သည် ကောင်းကင်ဘုန်းဝင်စားကြမည်မဟုတ်။)

ခရစ်ယာန်များအား မြေကြီးပေါ်ထာဝရအသက်ဆုချီးမြှင့်ခြင်းနှင့်စပ်လျဉ်း၍ “ဓမ္မသစ်ကျမ်း”၌ အဘယ်သိသာတိကျသောရည်ညွှန်းချက်များ ရှိသနည်း

မ. ၅:၅– “စိတ်နူးညံ့သိမ်မွေ့သောသူတို့သည် မင်္ဂလာရှိကြ၏။ အကြောင်းမူကား ထိုသူတို့သည် ပြည်တော်[“မြေကြီး၊” ကဘ; AS, KJ] ကိုအမွေခံရကြလတ္တံ့။”

မ. ၆:၉၊ ၁၀– “ကောင်းကင်ဘုံ၌ရှိတော်မူသောအကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။ နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်မှာ ပြည့်စုံပါစေသော။” (မြေကြီးနှင့်ပတ်သက်သောရည်ရွယ်တော်မူချက်ကား အဘယ်နည်း။ ကမ္ဘာဦး၁:၂၈နှင့်ဟေရှာယ ၄၅:၁၈ တို့က ဘာကိုပြသနည်း။)

မ. ၂၅:၃၁-၃၃၊ ၄၀၊ ၄၆– “လူသားသည် မိမိဘုန်းအာနုဘော်ကိုဆောင်လျက် သန့်ရှင်းသောကောင်းကင်တမန်များအခြံအရံတို့နှင့်တကွ ကြွလာတော်မူသောအခါ ဘုန်းရှိသောပလ္လင်တော်ပေါ်မှာ ထိုင်၍ ရှေ့တော်၌ လူမျိုးအပေါင်းတို့ကိုစုဝေးစေသဖြင့် သိုးထိန်းသည် သိုးနှင့်ဆိတ်တို့ကို တခြားစီခွဲထားသကဲ့သို့ လူအပေါင်းတို့ကို အသီးအခြားခွဲ၍ သိုးတို့ကို လက်ယာတော်ဘက်၊ ဆိတ်တို့ကိုလက်ဝဲတော်ဘက်၌ ထားတော်မူလတ္တံ့။ . . . မင်းကြီးက ငါအမှန်ဆိုသည်ကား သင်တို့သည် ဤသူတည်းဟူသောငါ့ညီတို့တွင် အငယ်ဆုံးသောသူတစ်ယောက်အားပြုကြသမျှတို့ကို ငါ့အားပြုကြပြီဟု [သိုးတို့အား] ပြန်၍မိန့်တော်မူလတ္တံ့။ ထိုသူတို့[ဆိတ်တို့] သည် ထာဝရအပြစ်ဒဏ်ခံရာသို့လည်းကောင်း၊ ဖြောင့်မတ်သောသူတို့[သိုးတို့] မူကား ထာဝရအသက်ရှင်ရာသို့လည်းကောင်း သွားရကြလတ္တံ့။” (“သိုးတို့” သည် “ကောင်းကင်ဘုံနှင့်စပ်ဆိုင်သောခေါ်ဖိတ်တော်မူခြင်းကျေးဇူးကိုခံရသောသူ” များဖြစ်သော မင်းကြီး၏ညီတော်များ နှင့်မတူကြောင်း သတိပြုပါ။ [ဟေဗြဲ ၂:၁၀-၃:၁] ခရစ်တော် ပလ္လင်တော်ပေါ်စံမြန်းစဉ်၊ “ညီတော်များ” မြေကြီးပေါ်ဆင်းရဲကြုံကြိုက်ဆဲအချိန်တွင် ဤသိုးလိုပုဂ္ဂိုလ်များသည် အသက်ရှင်လျက်ရှိကြမည်ဖြစ်သည်။)

ယော. ၁၀:၁၆– “ဤသိုးခြံသို့မဝင်သောအခြားသိုးတို့ကိုလည်း ငါပိုင်သေး၏။ ထိုသိုးတို့ကို ငါဆောင်ခဲ့ရမည်။ သူတို့သည်လည်းငါ့စကားသံကို နားထောင်သဖြင့် သိုးခြံတစ်ခု သိုးထိန်းတစ်ပါးတည်းရှိရလိမ့်မည်။” (ဤ“အခြားသိုး” သည် မည်သူများနည်း။ သိုးထိန်းမြတ်ယေရှုခရစ်၏နောက်လိုက်များဖြစ်ကြသည်။ သို့သော် ကောင်းကင်အသက်တာမျှော်လင့်ချက်နှင့်အတူ “ပဋိညာဉ်သစ်” သိုးခြံအဝင်မဟုတ်။ သို့တစေ ထိုသိုးခြံထဲကပုဂ္ဂိုလ်များနှင့်ရင်းနှီးစွာပူးပေါင်းကြပေသည်။)

၂ ပေ. ၃:၁၃– “ဖြောင့်မတ်ခြင်းတရားတည်နေရာ မိုးကောင်းကင်သစ်နှင့်မြေကြီးသစ်ကို ငါတို့သည် ကတိတော်နှင့်အညီ မျှော်လင့်ကြ၏။” (ဗျာဒိတ် ၂၁:၁-၄ ကိုလည်းရှု။)

ဗျာ. ၇:၉၊ ၁၀၊ သက– “ငါကြည့်လိုက်သောအခါ အဘယ်သူမျှမရေမတွက်နိုင်သောလူအုပ်ကြီးကိုတွေ့ရ၏။ သူတို့သည် ဘာသာစကားအမျိုးမျိုးကိုပြောဆိုသောလူအမျိုးအနွယ်ခပ်သိမ်းတို့မှလာရောက်ကြသူများဖြစ်ကြ၏။ သူတို့သည် ဝတ်လုံဖြူများကိုဝတ်လျက် စွန်ပလွံခက်များကိုကိုင်ကာ ပလ္လင်တော်နှင့်သိုးသငယ်တော်၏အရှေ့တွင်ရပ်လျက်နေကြ၏။ သူတို့က ‘ကယ်တင်ခြင်းကျေးဇူးသည် ပလ္လင်တော်ပေါ်မှာစံတော်မူသောငါတို့ထာဝရဘုရားနှင့်သိုးသငယ်တော်ထံမှသက်ရောက်လာ၏’ ဟု ကြွေးကြော်ကြ၏။”

သမ္မာကျမ်းစာက လူမည်မျှအား ကောင်းကင်အသက်တာမျှော်လင့်ချက်ကိုပေးသနည်း

လု. ၁၂:၃၂– “သိုးစုငယ်၊ သင်တို့သည် မကြောက်ကြနှင့်။ သင်တို့အဘသည် သင်တို့အား နိုင်ငံကိုပေးခြင်းငှာ အလိုရှိတော်မူ၏။”

ဗျာ. ၁၄:၁-၃– “ငါကြည့်လျှင် သိုးသငယ်[ယေရှုခရစ်] သည် [ကောင်းကင်ရှိ] ဇိအုန်တောင် ပေါ်မှာရပ်နေ၏။ [ဟေဗြဲ ၁၂:၂၂-၂၄ ကိုရှု။] သူ၏နာမနှင့်ခမည်းတော်၏နာမကိုနဖူး၌အက္ခရာတင်သောသူတစ်သိန်းလေးသောင်းလေးထောင်လည်း သူနှင့်အတူရှိကြ၏။ . . . သူတို့သည် အသစ်သောသီချင်းကိုဆိုကြ၏။ မြေကြီးမှရွေးနုတ်သောသူတစ်သိန်းလေးသောင်းလေးထောင်မှတစ်ပါး အဘယ်သူမျှ ထိုသီချင်းကို သင်၍မရနိုင်။”

၁၄၄,၀၀၀ အားလုံး ပကတိဂျူးများချည်းလော

ဗျာ. ၇:၄-၈– “တံဆိပ်ခတ်ခြင်းကိုခံရသောသူအရေအတွက်ကိုငါကြား၍ ဣသရေလအမျိုးသားတို့၌ အသီးအသီးသောအမျိုးအနွယ်ထဲက လူတစ်သိန်းလေးသောင်းလေးထောင်တို့သည် တံဆိပ်ခတ်ခြင်းကိုခံရကြ၏။ . . .ယုဒ. . .ရုဗင်. . .ဂဒ်. . .အာရှာ. . .နဿလိ. . .မနာရှေ. . .ရှိမောင်. . .လေဝိ. . .ဣသခါ. . .ဇာဗုလုန်. . .ယောသပ်. . .ဗင်ယာမိန်. . . ။” (ဤသူတို့သည် ပကတိဣသရေလလူမျိုးမဖြစ်နိုင်။ အကြောင်းမှာ၊ ယောသပ်အနွယ်ဟူ၍မရှိခဲ့ဖူးချေ။ ဧဖရိမ်နှင့်ဒန်တို့သည် ဤစာရင်းထဲ၌မပါဝင်ကြ။ လေဝိသည် ဗိမာန်တော်အမှုတော်အတွက် သီးသန့်ထားသည်ဖြစ်၍ ၁၂ နွယ်အဝင်မဟုတ်ခဲ့ချေ။ တောလည်ရာ ၁:၄-၁၆ ကိုရှု။)

ရော. ၂:၂၈၊ ၂၉– “အပြင်အားဖြင့်သာ ယုဒလူဖြစ်သောသူသည် ယုဒလူမှန်မဟုတ်။ အပြင်အားဖြင့်သာကိုယ်အသား၌အရေဖျားလှီးခြင်းသည် အရေဖျားလှီးခြင်းအမှန်မဟုတ်။ အတွင်းအားဖြင့်ယုဒလူဖြစ်သောသူသည် ယုဒလူမှန်၏။ အရေဖျားလှီးခြင်းလည်း ကျမ်းဟောင်းတရားအားဖြင့်မဟုတ်ဘဲ ဝိညာဉ်တော်တရားအားဖြင့် စိတ်နှလုံးနှင့်စပ်ဆိုင်၏။”

ဂလ. ၃:၂၆-၂၉– “သင်တို့အပေါင်းသည် ယေရှုခရစ်ကိုယုံကြည်သဖြင့် ဘုရားသခင်၏သားဖြစ်ကြ၏။ . . . ယေရှုခရစ်၌ ယုဒလူမရှိ၊ ဟေလသလူမရှိ၊ ကျွန်မရှိ၊ လူလွတ်မရှိ၊ ယောက်ျားမရှိ၊ မိန်းမမရှိ၊ ထိုသခင်၌ သင်တို့အပေါင်းသည် တစ်လုံးတစ်ဝတည်းဖြစ်ကြ၏။ ခရစ်တော်နှင့်စပ်ဆိုင်လျှင် အာဗြဟံ၏အမျိုးအနွယ်ပင်ဖြစ်၍ ကတိတော်အတိုင်း အမွေခံ၏အရာ၌တည်ကြ၏။”

၁၄၄,၀၀၀ သည် ပုံဆောင်အရေအတွက်သာလော

ကျမ်းစာက တိကျသောအရေအတွက် ၁၄၄,၀၀၀ကိုဖော်ပြပြီးနောက် ဗျာဒိတ် ၇:၉ (သက) ၌ “အဘယ်သူမျှမရေမတွက်နိုင်သောလူအုပ်ကြီး” အကြောင်းကိုဆို၏။ ဤအချက်ကိုထောက်၍ အဖြေကိုသိနိုင်သည်။ ၁၄၄,၀၀၀သည် ပကတိအရေအတွက်တစ်ခုမဟုတ်လျှင် “လူအုပ်ကြီး” နှင့်ခြားနားသောအဓိပ္ပာယ်ရှိတော့မည်မဟုတ်။ ၎င်းအရေအတွက်ကို ပကတိအဖြစ်မှတ်လျှင် မဿဲ ၂၂:၁၄ ပါ ယေရှု၏အောက်ပါစကားနှင့် ကိုက်ညီလိမ့်မည်။ “ထိုသို့ခေါ်တော်မူသောသူအများရှိသော်လည်း ရွေးကောက်တော်မူသောသူနည်းသည်။”

ဗျာဒိတ် ၇:၉၊ ၁၀ပါ“လူအုပ်ကြီး” လည်း ကောင်းကင်သို့သွားသလော

ဗျာဒိတ်ကျမ်းက သူတို့သည် ၁၄၄,၀၀၀ နည်းတူ ခရစ်တော်နှင့်အတူ ကောင်းကင်ဇိအုန်တောင်ပေါ်၌ စံမြန်းရန်“မြေကြီးမှရွေးနုတ်” ခြင်းခံရသည်ဟုမဆိုချေ။​—ဗျာ. ၁၄:၁-၃။

သူတို့သည် “ပလ္လင်တော်နှင့်သိုးသငယ်တော်၏ရှေ့တွင်ရပ်လျက်နေကြ” သည်ဟူသည့်အချက်က သူတို့ရပ်သောနေရာကိုဆိုလိုသည်ဟူ၍အဓိပ္ပာယ်ကောက်ရန်မလိုပါ။ မျက်နှာသာတော်ရအခြေအနေကိုဆိုလို၏။ (ဗျာဒိတ် ၆:၁၇၊ လုကာ ၂၁:၃၆ တို့နှင့်နှိုင်း။) “ပလ္လင်တော်ရှေ့” (ဂရိလို e·noʹpi·on tou throʹnou (အယ်နိုးပီယော်န်အိုသရောနို) ၏ပကတိအဓိပ္ပာယ်မှာ “ပလ္လင်တော်မြင်ကွင်းအတွင်း” ဖြစ်သည်။) ဟူသောစကားကြောင့် သူတို့သည် ကောင်းကင်တွင်ရှိရမည်ဟုဆိုရန်မလို။ သူတို့၏အနေအထားမှာ ဘုရားသခင့်“မြင်ကွင်းအတွင်း” သာဖြစ်သည်။ ကိုယ်တော်က မိမိသည် ကောင်းကင်မှ လူသားတို့အားရှုမြင်၏ဟု မိန့်တော်မူသည်။​—ဆာ. ၁၁:၄; မဿဲ ၂၅:၃၁-၃၃၊ လုကာ ၁:၇၄၊ ၇၅၊ တမန်တော် ၁၀:၃၃ တို့နှင့်နှိုင်း။

ဗျာဒိတ်ကျမ်း ၁၉:၁၊ ၆ (သက) ပါ“ကောင်းကင်ပရိသတ်ကြီး” သည် “ဗျာဒိတ် ၇:၉ ပါ “လူအုပ်ကြီး” နှင့်မတူပါ။ “ကောင်းကင်ပရိသတ်ကြီး” သည် “လူအမျိုးအနွယ်ခပ်သိမ်းတို့မှလာ” ကြသည်မဟုတ်။ သိုးသငယ်ကြောင့် မိမိတို့ကယ်တင်ခြင်းရသည်ဟုလည်းမဆိုကြချေ။ သူတို့သည် ကောင်းကင်တမန်များဖြစ်ကြသည်။ သမ္မာကျမ်းစာ၌ “ပရိသတ်” (သက) ဟူသောစကားလုံးကို အမျိုးမျိုးသောဇာတ်ကွက်များတွင် သုံးထားသည်။​—မာ. ၅:၂၄; ၆:၃၄; ၁၂:၃၇။

ကောင်းကင်သို့သွားသူများ ထိုတွင်ဘာပြုကြမည်နည်း

ဗျာ. ၂၀:၆– “ဘုရားသခင်၏ယဇ်ပုရောဟိတ်၊ ခရစ်တော်၏ယဇ်ပုရောဟိတ်ဖြစ်၍ အနှစ်တစ်ထောင်ပတ်လုံး ခရစ်တော်နှင့်အတူ စိုးစံရကြလိမ့်မည်။” (ဒံယေလ ၇:၂၇ ကိုလည်းရှု။)

၁ ကော. ၆:၂– “သန့်ရှင်းသူတို့သည် လောကီနိုင်ငံကို တရားစီရင်မည်ဟု မသိကြသလော။”

ဗျာ. ၅:၁၀– “အကျွန်ုပ်တို့၏ဘုရားသခင့်ရှေ့မှာ ရှင်ဘုရင်အရာ၌လည်းကောင်း၊ ယဇ်ပုရောဟိတ်အရာ၌လည်းကောင်းခန့်ထား၍ မြေကြီးပေါ်မှာ[“ပေါ်မှာ၊” RS,KJ,Dy; “အပေါ်၊” AT,Da,Kx,CC] စိုးစံရသောအခွင့်ကို ပေးတော်မူ၏။” (ထိုဂရိစကားလုံးနှင့် အလားတူသဒ္ဒါတည်ဆောက်ပုံကို ဗျာဒိတ်၁၁:၆၌တွေ့ရသည်။ ထိုတွင် RS,KJ,Dyအားလုံးက “အပေါ်” ဟုပြန်ဆိုကြသည်။)

ကောင်းကင်သွားမည့်သူများကို မည်သူကရွေးချယ်သနည်း

၂ သက်. ၂:၁၃၊ ၁၄– “သခင်ဘုရားချစ်တော်မူသောညီအစ်ကိုတို့၊ သင်တို့သည် စိတ်သန့်ရှင်းခြင်း၊ သမ္မာတရားကိုယုံကြည်ခြင်းအားဖြင့် ကယ်တင်ခြင်းသို့ရောက်စိမ့်သောငှာ ဘုရားသခင်သည် ရှေ့ဦးစွာကပင် သင်တို့ကို ရွေးကောက်တော်မူသည်ဖြစ်၍ ငါတို့သည် သင်တို့ကြောင့် ဘုရားသခင်၏ကျေးဇူးတော်ကို အစဉ်မပြတ်ချီးမွမ်းရကြမည်။ ထိုသို့အလိုငှာ ငါတို့ဧဝံဂေလိတရားအားဖြင့် သင်တို့ကိုခေါ်တော်မူပြီ။ အကြောင်းမူကား၊ သင်တို့သည် ငါတို့သခင်ယေရှုခရစ်၏ဘုန်းကိုပိုင်ရမည်အကြောင်းတည်း။”

ရော. ၉:၆၊ ၁၆– “ဣသရေလနှင့်ဆက်နွှယ်သောသူအပေါင်းတို့သည် ဣသရေလလူမှန်မဟုတ်။ . . .[“ထာဝရဘုရား၏ရွေးချယ်မှုသည် လူ၏အလိုဆန္ဒ သို့မဟုတ် လူ၏ကြိုးစားအားထုတ်မှုအပေါ်တွင် မတည်။ ကိုယ်တော်၏ကရုဏာတော်အပေါ်၌သာ တည်ပေသည်။” သက]”