ယောဟန်ကိုပေးတဲ့ ဗျာဒိတ်တော်

တမန်တော် ယောဟန်ဟာ ပတ်မုကျွန်းပေါ်မှာ အကျဉ်းကျနေတုန်း ယေရှုက သူ့ကို အနာဂတ်နဲ့ပတ်သက်ပြီး စိတ်အာရုံ ဒါမှမဟုတ် ပုံရိပ် ၁၆ ခုကို တစ်ခုပြီး တစ်ခုပြခဲ့တယ်။ ဒီစိတ်အာရုံတွေက ယေဟောဝါရဲ့နာမည် ဘယ်လို သန့်ရှင်းမြင့်မြတ်လာမယ်၊ နိုင်ငံတော် ဘယ်လို လာမယ်၊ အလိုတော်ဟာ ကောင်းကင်မှာပြည့်စုံသလို မြေကြီးပေါ်မှာ ဘယ်လို ပြည့်စုံမယ်ဆိုတာ ဖော်ပြတယ်။

စိတ်အာရုံတစ်ခုမှာ ရာဇပလ္လင်ပေါ် ထိုင်နေတဲ့ ယေဟောဝါကို ယောဟန် မြင်ရတယ်။ အဲဒီရာဇပလ္လင်ပတ်လည်မှာ အဖြူရောင်ဝတ်ဆင်ပြီး ရွှေသရဖူဆောင်းထားတဲ့ အကြီးအကဲ ၂၄ ယောက်ကိုလည်း မြင်တယ်။ ရာဇပလ္လင်ကနေ လျှပ်စီးတွေ၊ မိုးခြိမ်းသံတွေကိုလည်း ကြားခဲ့တယ်။ အကြီးအကဲ ၂၄ ယောက်က ယေဟောဝါရှေ့ ပျပ်ဝပ်ပြီး ကိုးကွယ်နေကြတယ်။ တခြားစိတ်အာရုံတစ်ခုမှာတော့ ယေဟောဝါကို ကိုးကွယ်တဲ့ လူမျိုးတွေ၊ မျိုးနွယ်တွေ၊ လူစုတွေနဲ့ ဘာသာစကားအမျိုးမျိုး ပြောတဲ့ လူအုပ်ကြီးကို မြင်တယ်။ သိုးသငယ်ဖြစ်တဲ့ ယေရှုက သူတို့ကို ထိန်းကျောင်းပြီး အသက်စမ်းရေဆီ ပို့ဆောင်ပေးတယ်။ နောက်စိတ်အာရုံတစ်ခုမှာကျတော့ ယေရှုဟာ ကောင်းကင်မှာ ဘုရင်အဖြစ် အကြီးအကဲ ၂၄ ယောက်နဲ့အတူ အုပ်စိုးနေတယ်။ နောက်စိတ်အာရုံတစ်ခုထဲမှာ ယေရှုဟာ စာတန်ဖြစ်တဲ့ နဂါးနဲ့ နတ်ဆိုးတွေကို တိုက်ခိုက်ပြီး သူတို့ကို ကောင်းကင်ကနေ မြေကြီးပေါ် ပစ်ချလိုက်တယ်။

အဲဒီနောက် ယောဟန်ဟာ သိပ်လှတဲ့ ပုံရိပ်ကို မြင်တယ်။ အဲဒီထဲမှာ သိုးသငယ်နဲ့ ရွေးချယ်ခံထားရသူ ၁၄၄,၀၀၀ ဟာ ဇိအုန်တောင်ပေါ်မှာ ရပ်နေကြတယ်။ ပြီးတော့ မြေကြီးပတ်လည် ပျံဝဲနေတဲ့ ကောင်းကင်တမန်တစ်ပါးကိုလည်း ယောဟန်မြင်တယ်။ သူက ဘုရားသခင်ကို ကြောက်ရွံ့ရိုသေပြီး ဘုန်းတော်ကို ချီးမွမ်းကြပါလို့ ကြွေးကြော်နေတယ်။

စိတ်အာရုံတစ်ခုမှာ အာမဂေဒုန်စစ်ပွဲဖြစ်နေတာ သူမြင်တယ်။ အဲဒီစစ်ပွဲမှာ ယေရှုနဲ့ သူ့တပ်က စာတန်ရဲ့ အစီအစဉ် စနစ်ဆိုးကို စစ်နိုင်တယ်။ နောက်ဆုံးစိတ်အာရုံမှာတော့ ကောင်းကင်နဲ့မြေကြီးဟာ ဘုရားသခင်ရဲ့ အလိုတော်နဲ့အညီ ဖြစ်နေတာကို ယောဟန်မြင်လိုက်တယ်။ စာတန်နဲ့ သူ့နောက်လိုက်တွေကို လုံးလုံး ဖျက်ဆီးပစ်လိုက်ပြီ။ ကောင်းကင်ပေါ်၊ မြေကြီးပေါ်ရှိသူအားလုံး ယေဟောဝါရဲ့ နာမတော်ကို သန့်ရှင်းမြင့်မြတ်စေပြီး ကိုယ်တော်ကိုပဲ ဝတ်ပြုကိုးကွယ်နေကြတယ်။