ဂျေရုဆလင်မြို့ဟာ အမည်ခံခရစ်ယာန်ဘာသာကို တင်စားသလား

အယူဖောက်ပြန်တဲ့ ဂျေရုဆလင်ဟာ အမည်ခံခရစ်ယာန်ဘာသာကို တင်စားတယ်လို့ အရင်က ကျွန်တော်တို့စာပေတွေမှာ ဖော်ပြခဲ့တယ်။ ရုပ်တုကိုးကွယ်မှု၊ ပျံ့နှံ့နေတဲ့ အကျင့်ပျက်မှုတို့ အပါအဝင် သစ္စာမဲ့ ဂျေရုဆလင်မြို့ အခြေအနေတွေက အမည်ခံခရစ်ယာန်ဘာသာမှာ ဖြစ်ပျက်နေတာတွေကို သတိရစေတယ်။ ဒါပေမဲ့ ရှင်းလင်းခိုင်လုံတဲ့ ကျမ်းစာအထောက်အထား မရှိဘူးဆိုရင် ဒီစာအုပ် အပါအဝင် မကြာသေးခင်နှစ်တွေက ထုတ်ဝေတဲ့ စာအုပ်တွေမှာ ပရောဖက်ပြုချက်တွေကို အနှိုင်းနဲ့ အနှိုင်းခံဆိုပြီး မရှင်းပြတော့ဘူး။ ဂျေရုဆလင်မြို့ဟာ အမည်ခံခရစ်ယာန်ဘာသာကို တင်စားကြောင်း ခိုင်လုံတဲ့ ကျမ်းစာအထောက်အထား ရှိသလား။ မရှိပါဘူး။

အောက်ပါ အချက်တွေကို သုံးသပ်ကြည့်ပါ။ တစ်ချိန်တုန်းက ဂျေရုဆလင်မြို့ဟာ စင်ကြယ်တဲ့ ဝတ်ပြုကိုးကွယ်မှုရဲ့ ဗဟို ဖြစ်ခဲ့တယ်။ နောက်ပိုင်း မြို့သူမြို့သားတွေ အယူဖောက်ပြန်သွားကြတယ်။ အမည်ခံခရစ်ယာန်ဘာသာကတော့ ဘယ်တုန်းကမှ စင်ကြယ်တဲ့ ဝတ်ပြုကိုးကွယ်မှုမှာ မပါဝင်ခဲ့ဖူးဘူး။ အေဒီ လေးရာစုမှာ အမည်ခံခရစ်ယာန်ဘာသာ ပေါ်ပေါက်လာချိန်ကတည်းက မှားယွင်းတဲ့ အယူဝါဒတွေကို အမြဲ သွန်သင်ခဲ့တယ်။

ဒီ့ပြင် ဂျေရုဆလင်မြို့ဟာ ဗာဗုလုန်တွေရဲ့ ဖျက်ဆီးခြင်း ခံရပြီးတဲ့နောက်မှာ ယေဟောဝါရဲ့ မျက်နှာသာ ပြန်ရခဲ့လို့ စစ်မှန်တဲ့ ဝတ်ပြုကိုးကွယ်မှုရဲ့ ဗဟို ပြန်ဖြစ်လာတယ်။ ဒါပေမဲ့ အမည်ခံခရစ်ယာန်ဘာသာဟာ ဘုရားမျက်နှာသာ ဘယ်တုန်းကမှ မရခဲ့ဖူးဘူး။ ကြီးစွာသောဒုက္ခအတွင်း ဖျက်ဆီးခံရပြီးတာနဲ့ ဘယ်တော့မှ ပြန်ပေါ်လာတော့မှာ မဟုတ်ဘူး။

ဘာကောက်ချက် ချနိုင်သလဲ။ သစ္စာမဲ့ ဂျေရုဆလင်မြို့နဲ့ပတ်သက်ပြီး ပြည့်စုံခဲ့ပြီးတဲ့ ကျမ်းစာပရောဖက်ပြုချက်တွေကို ဆန်းစစ်တဲ့အခါ ‘ဒီအချက်က ဒီနေ့ အမည်ခံခရစ်ယာန်ဘာသာမှာ တွေ့နေရတာတွေနဲ့ အတော်လေး ဆင်တူတာပဲ’ လို့ ပြောမိနိုင်တယ်။ ဒါပေမဲ့ ဂျေရုဆလင်မြို့က အမည်ခံခရစ်ယာန်ဘာသာကို တင်စားတယ်လို့ ပြောဖို့တော့ ကျမ်းစာအထောက်အထား မရှိဘူး။