“သင်တို့သည် ယုံကြည်ခြင်း၌ တည်သလောမတည်သလောဟု ကိုယ့်ကိုယ်ကိုစစ်ကြောကြလော့”

ကောရိန္သု ဒုတိယစောင်မှ ပေါ်လွင်ချက်များ

တ မန်တော်ပေါလုသည် ကောရိန္သုမြို့ရှိခရစ်ယာန်များအတွက် အလွန်စိုးရိမ်နေသည်။ သူရေးပို့လိုက်သည့် ပထမစာစောင်ပါသြဝါဒကို သူတို့မည်သို့သဘောထားကြမည်နည်း။ ထိုစာစောင်ကြောင့် ကောရိန္သုအသင်းသားများအလွန်ဝမ်းနည်းလျက်နောင်တယူခဲ့သည့်သတင်းကို တိတုယူဆောင်လာချိန်တွင် သူမာကေဒေါနိပြည်တွင်ရှိနေသည်။ ယင်းကြောင့် ပေါလုအလွန်ဝမ်းမြောက်ခဲ့သည်တကား။—၂ ကောရိန္သု ၇:၈-၁၃။

ကောရိန္သုဒုတိယစာစောင်ကို မာကေဒေါနိပြည်မှ စီအီး ၅၅ ခုနှစ်၊ နှစ်အလယ်ပိုင်းအချိန်ခန့်တွင် ပေါလုရေးသားခဲ့သည်။ ဤစာစောင်တွင် အသင်းတော်ကိုသန့်ရှင်းစေရန်နည်းလမ်းများကိုသူဆွေးနွေးတင်ပြ၍ ယုဒနယ်ရှိချို့ငဲ့နေသောယုံကြည်သူများအား ပေးကမ်းစွန့်ကြဲချင်စိတ်ကိုတိုးပွားစေခဲ့၍၊ မိမိ၏တမန်တော်အရာကို ခုခံပြောဆိုခဲ့သည်။ ကျွန်ုပ်တို့သည် “ယုံကြည်ခြင်း၌ တည်သလော၊ မတည်လောဟု ကိုယ့်ကိုယ်ကိုစစ်ကြောကြ” ရန် ပေါလုစကားများသည် များစွာအထောက်အကူပြုသည်။ (၁၃:၅) ထိုကြောင့် ဤစာစောင်မှ ကျွန်ုပ်တို့အဘယ်အကျိုးများကောက်နှုတ်နိုင်သနည်း။

သက်သာခြင်းဘုရား၏ ဓမ္မအမှုဆောင်

ဒုက္ခဆင်းရဲခြင်းအမျိုးမျိုးထဲမှ ဘုရားသခင်သည် ကျွန်ုပ်တို့ကိုသက်သာခြင်းရှိစေသကဲ့သို့ သူတစ်ပါးကိုလည်းသက်သာခြင်းပေး၍ သူတို့အတွက်ဆုတောင်းသင့်ကြောင်း တမန်တော်တင်ပြပါသည်။ (၁:၁–၂:၁၁) ပေါလုနှင့်သူ၏အပေါင်းအပါများသည် အလွန်အမင်းဒုက္ခရောက်နေသော်လည်း ဘုရားသခင်သူတို့ကိုကယ်လွှတ်ပေးခဲ့သည်။ ထိုအချိန်တွင် ကောရိန္သုအသင်းသားများသည် သူတို့အဖို့ဆုတောင်းပေးခြင်းဖြင့် ကူညီနိုင်ခဲ့သကဲ့သို့ စစ်မှန်သောယုံကြည်ခြင်းကို လက်ခံသူများအတွက်လည်း ကျွန်ုပ်တို့ဆုတောင်းပေးသင့်သည်။ ၁ ကောရိန္သု အခန်းကြီး ၅ တွင်ဖေါ်ပြထားသည့် သီလယိုယွင်းသူကိစ္စကော။ သူ့ကိုအသင်းမှနှင်ထုတ်ခဲ့ပြီးနောက် နောင်တရခဲ့ပုံရှိသည်။ ကောရိန္သုအသင်းသားများ သူ့အားခွင့်လွှတ်၍ သူတို့နှင့်ပြန်ပေါင်းသင်းခွင့်ပြုသည့်အခါ သူစိတ်သက်သာမှုအမှန်ပင်ရရှိခဲ့မည်။

ပေါလု၏စကားများသည် ခရစ်ယာန်ဓမ္မအမှုကို တန်ဖိုးထားလေးစားမှုတိုးပွားစေပြီး၊ စစ်မှန်သောယုံကြည်မှုဘက်ရပ်တည်ခြင်းကို ပို၍မြဲမြံခိုင်ခံ့စေနိုင်သည်။ (၂:၁၂–၆:၁၀) ပဋိညာဉ်သစ်၏ဓမ္မအမှုဆောင်များဘုရားသခင်ဦးစီးသည့် “အောင်ပွဲခံစီတန်းလှည့်လည်ခြင်း” ၌ပါဝင်ခွင့်ရခြင်းသည် ထူးမြတ်လှပါသည်တကား။ ပေါလုနှင့်သူ၏လုပ်ဖေါ်ဆောင်ဖက်တို့သည် သူတို့အားပြသသည့်ကရုဏာကြောင့် တန်ဖိုးရှိရှိဓမ္မအမှုဆောင်ခွင့်ရရှိကြသည်။ သူတို့နည်းတူ မျက်မှောက်ခေတ်ဘိသိက်ခံများသည် မိတ်သဟာယတရားဟောခွင့်ရသည့် ဓမ္မအမှုဆောင်များဖြစ်ကြသည်။ သို့ဖြစ်စေကာမူ ယေဟောဝါသက်သေအားလုံးသည်လည်း သူတို့၏ဓမ္မအမှုအားဖြင့် သူတစ်ထူးအားကြွယ်ဝချမ်းသာစေသည်။

သန့်ရှင်းခြင်းပါရမီကိုပြည့်စုံစေခြင်းနှင့် ရက်ရောစွာပြုခြင်း

ခရစ်ယာန်ဓမ္မအမှုဆောင်များသည် ယေဟောဝါကိုကြောက်ရွံ့၍ သန့်ရှင်းခြင်းပါရမီကို ပြည့်စုံစေရမည်အကြောင်း ပေါလုတင်ပြခဲ့သည်။ (၆:၁၁–၇:၁၆) ယုံကြည်ခြင်း၌တည်ကြည်ရန် မယုံကြည်သူတို့နှင့်တွဲဖက်ခြင်းကို ကျွန်ုပ်တို့ရှောင်ကြဉ်ရမည်။ ကာယနှင့်ဝိညာဏအညစ်အကြေးတို့မှလည်း ကင်းစင်ရန်လိုအပ်သည်။ သီလယိုယွင်းသူအား အသင်းတော်မှနှင်ထုတ်ပစ်ခြင်းအားဖြင့် ကောရိန္သုအသင်းသားများ သန့်ရှင်းစင်ကြယ်မှုကိုပြုမူခဲ့သည်။ မိမိ၏ပထမစာစောင်ကြောင့် သူတို့သည် ကယ်တင်ခြင်းအလိုငှာ နောင်တယူသည်အထိ ဝမ်းနည်းခဲ့သဖြင့် ပေါလုလည်းအားရဝမ်းသာခဲ့သည်။

ဘုရားသခင်ကိုကြောက်ရွံ့သောဓမ္မအမှုဆောင်များသည် သူတို့၏ရက်ရောပြည့်ဝသောသဘောထားကြောင့် ဆုကျေးဇူးခံစားရကြောင်းလည်းသိရသည်။ (၈:၁–၉:၁၅) ချို့ငဲ့သော “သန့်ရှင်းသူများ” အတွက်အလှူငွေအကြောင်းနှင့်စပ်လျဉ်း၍ မာကေဒေါနိအသင်းသားများ၏ ပုံသက်သေကောင်းကို ပေါလုတင်ပြခဲ့သည်။ သူတို့တတ်စွမ်းနိုင်သည်ထက်မက စေတနာပြသခဲ့ကြသည်။ ကောရိန္သုအသင်းသားများလည်း ထပ်တူစေတနာမျိုးတင်ပြကြရန် သူမျှော်လင့်သည်။ သူတို့သာမက ကျွန်ုပ်တို့၏ပေးကမ်းမှုသည် နှလုံးတွင်းမှဖြစ်သင့်သည်။ အကြောင်းမူကား၊ “ဘုရားသခင်သည်စေတနာစိတ်နှင့်လှူသောသူကိုသာ နှစ်သက်တော်မူသည်။” မိမိလူမျိုးတော်၏ စေတနာစိတ်နှင့် အမျိုးမျိုးသောစွန့်ကြဲခြင်းတို့ကို ဘုရားသခင်ကြွယ်ဝစွာကျေးဇူးပြုတော်မူသည်။

ပေါလု—ကြည့်ရှုပြုစုတတ်သောတမန်တော်

ဓမ္မအမှုဆောင်များအဖြစ် ယေဟောဝါ၏အမှုတော်တွင် အောင်မြင်မှုတစ်ခုခုရရှိသောအခါ မိမိကိုယ်ကိုမဟုတ်ပဲ၊ ဘုရားသခင်၌သာဝါကြွားကြပါစို့။ (၁၀:၁–၁၂:၁၃) အမှန်မှာ “ဘုရားသခင်၏တန်ခိုးတော်အားဖြင့်” အစွမ်းရှိသော ဝိညာဏလက်နက်များဖြင့်သာ မှောက်မှားသောအတွေးအခေါ်များကို ဖြိုဖျက်နိုင်သည်။ ကောရိန္သုအသင်းသားများအလယ်ရှိ ဝါကြွားတတ်သော “အကြီးဆုံးတမန်တော်များ” သည် ခရစ်တော်၏ဓမ္မအမှုဆောင်တစ်ဦးအနေနှင့် ပေါလု၏ခံနိုင်ရည်ကို မယှဉ်နိုင်ကြချေ။ သို့နှင့်ပင် သူ့အားအလွန်အမင်းချီးမြှင့်ခြင်းမရှိစေရန် မျက်စိမှုန်ခြင်း၊ သို့မဟုတ် ထိုမှောက်မှားသောတမန်တော်များဖြစ်ကောင်းဖြစ်မည့် “သူ၏ကိုယ်၌စူးသောဆူးကို” ဘုရားသခင်မဖယ်ပစ်ခဲ့ပေ။ မည်သို့ရှိစေကာမူ ‘ခရစ်တော်၏တန်ခိုးသည် သူ့အပေါ်၌ကျိန်းဝပ်မည်အကြောင်း’ သူ၏အားနည်းချက်များ၌ ပေါလုဝါကြွားလိုခဲ့သည်။ ယုံကြည်ခြင်း၌တည်ကြည်သောသူတစ်ဦးအနေနှင့် အကြီးဆုံးသောတမန်တော်များထက်မယုတ်ညံ့ကြောင်း သူသက်သေထူခဲ့ပေပြီ။ “သည်းခံခြင်းနှင့်တကွ၊ နိမိတ်လက္ခဏာအံ့ဖွယ်သောအမှု၊ ထူးဆန်းသောတန်ခိုးများအားဖြင့်” ပေါလု၏တမန်တော်လက္ခဏာများကို ကောရိန္သုအသင်းသားများ တွေ့မြင်ခဲ့ပေပြီ။

ဓမ္မအမှုဆောင်တမန်တော်အနေနှင့်ပေါလုသည် ယုံကြည်သူချင်းတို့၏ဝိညာဏကောင်းကျိုးများကို ထောက်ထားကြည့်ရှုခဲ့သည်နည်းတူ ကျွန်ုပ်တို့လည်း ထပ်တူပြုသင့်သည်။ (၁၂:၁၄–၁၃:၁၄) ပေါလုသည် ‘ညီအစ်ကိုများအသက်ရှင်ရေးအတွက် ကိုယ်ဥစ္စာကိုလည်းကောင်း၊ ကိုယ်ကိုလည်းကောင်း ကုန်စေခြင်းငှာ အလွန်စေတနာရှိ၏။’ သို့သော် ကောရိန္သုမြို့သို့ရောက်လာသောအခါ အချို့တို့သည် ဇာတိအကျင့်များကိုနောင်တမရပဲနေကြသည်ကို သူတွေ့ရမည်မှာ စိုးရိမ်ခဲ့သည်။ သို့ဖြစ်၍ သူတို့သည် ယုံကြည်ခြင်း၌တည်သည်မတည်သည်ကို စစ်ကြောစီရင်နေကြရန် အားလုံးကိုအကြံပေးခဲ့သည်။ “မကောင်းသောအကျင့် တစ်စုံတစ်ခုကိုမျှ မကျင့်မည်အကြောင်း” သူဆုတောင်းပေးခဲ့သည်။ နိဂုံးတွင် သူတို့အားဝမ်းမြောက်ကြရန်၊ ပြန်၍ပြုပြင်ကြရန်၊ သက်သာခြင်းရရန်၊ စိတ်တစ်ညီတစ်ညွတ်တည်းရှိရန်၊ အချင်းချင်းအသင့်အတင့်နေရန် တိုက်တွန်းအားပေးခဲ့သည်။ ကျွန်ုပ်တို့အတွက်လည်း ကောင်းမြတ်လှသောသြဝါဒပါတကား။

အမြဲစစ်ကြောနေ

ထိုကြောင့် ကောရိန္သုခရစ်ယာန်များထံ ပေါလုရေးပို့သောဒုတိယစာစောင်သည် ကျွန်ုပ်တို့ယုံကြည်ခြင်း၌ရှိမရှိ စစ်ကြောနေရန်နည်းအမျိုးမျိုးကိုတင်ပြသည်။ ဘုရားသခင်သည် ကျွန်ုပ်တို့၏ဒုက္ခဆင်းရဲအမျိုးမျိုးတွင် သက်သာမှုရစေသည်နည်းတူ သူတစ်ပါးအားသက်သာမှုပေးရန် ပေါလု၏စကားများကတိုက်တွန်းထားသည်။ ယေဟောဝါကိုကြောက်ရွံ့ခြင်း၌ သန့်ရှင်းခြင်းပါရမီကိုပြည့်စုံနေစဉ် ဓမ္မအမှုကိုဆောင်ရွက်နေရန် ခရစ်ယာန်ဓမ္မအမှုဆောင်ခြင်းအကြောင်း တမန်တော်ပြောဆိုခဲ့သမျှသည် ကျွန်ုပ်တို့အားလှုံ့ဆော်တိုက်တွန်းမှုဖြစ်စေသင့်သည်။

ပေါလု၏သြဝါဒကိုလက်တွေ့ကျင့်သုံးခြင်းအားဖြင့် စေတနာစိတ်နှင့်ပိုရက်ရောစွာအကူအညီပေးဖို့ တိုက်တွန်းခံရပေမည်။ သို့တစေ သူ၏စကားများသည် မိမိကိုယ်ကိုမဟုတ်ပဲ ယေဟောဝါ၌သာဝါကြွားရန် တိုက်တွန်းသင့်သည်။ ယုံကြည်သူချင်းတို့အပေါ် စိုးရိမ်ကြောင့်ကြစိတ်တိုးများလာရန် လှုံ့ဆော်ပေးသင့်သည်။ ကောရိန္သု ဒုတိယစာစောင်ပါ ဤအချက်များနှင့် အခြားအချက်များသည် ကျွန်ုပ်တို့ ‘ယုံကြည်ခြင်း၌ တည်သလောမတည်သလောဟု ကိုယ့်ကိုယ်ကိုစစ်ကြောကြ’ ရန် များစွာအကူအညီပေးနိုင်သည်။

[စာမျက်နှာ ၂၉ ပါ လေးထောင့်ကွက်/ရုပ်ပုံ]

ယေဟောဝါ၏ဘုန်းတော်ကို ရောင်ပြန်ဟပ်လော့။ မောရှေသည် သက်သေခံချက်ကျောက်ပြားနှစ်ပြားနှင့် သိနာတောင်မှဆင်းလာချိန်တွင် ဘုရားသခင်သည် သူနှင့်နှုတ်မြွက်ခဲ့သောကြောင့် သူ၏မျက်နှာသည်ရောင်ခြည်တော်ထွန်းတောက်ခဲ့သည်။ (ထွက်မြောက်ရာ ၃၄:၂၉၊ ၃၀) ဤအကြောင်းကို ပေါလုဤသို့ဖေါ်ပြခဲ့သည်။ “ငါတို့ရှိသမျှသည် မျက်နှာဖုံးကိုဖွင့်လျက် မှန်ကိုကြည့်သကဲ့သို့၊ ယေဟောဝါ၏ဘုန်းအသရေတော်ကိုကြည့်မြင်၍ ဝိညာဉ်တော်တရား၏အရှင်ယေဟောဝါသည် ရောင်ခြည်တော်ကိုလွှတ်တော်မူသည်အတိုင်း ငါတို့သည် ဘုန်းအသရေတိုးပွား၍ ပုံသဏ္ဌာန်တော်နှင့်အညီ ပြောင်းလဲခြင်းရှိရကြ၏။” (၂ ကောရိန္သု ၃:၇–၁၈) ရှေးခေတ်ကလက်ကိုင်မှန်များသည် ကြေးနီသတ္တုဖြင့်ပြုလုပ်ထား၍ ကြည်လင်သောမျက်နှာပြင်ဖြစ်ရန် ကောင်းစွာပွတ်သပ်တိုက်ချွတ်ထားကြသည်။ ဤမှန်များနည်းတူ ဘိသိက်ခံများသည် ယေရှုခရစ်ထံတော်မှတစ်ဆင့်ထွန်းပသော ဘုရားသခင့်ဘုန်းအသရေတော်ကို ရောင်ပြန်ဟပ်ကြသည်။ ဤနည်းဖြင့် ဘုန်းထင်ရှားစေသောယေဟောဝါ၏သားတော်တင်ပြသည့် “ပုံသဏ္ဌာန်တော်နှင့်အညီ ပြောင်းလဲခြင်းရှိရကြ၏။” (၂ ကောရိန္သု ၄:၆။ ဧဖက် ၅:၁) သန့်ရှင်းသောဝိညာဉ်တော်နှင့် သမ္မာကျမ်းစာအားဖြင့် ကိုယ်တော်၏အရည်အချင်းများကို ရောင်ပြန်ဟပ်ခြင်းဖြစ်သည့် “လူသစ်” ကိုသူတို့၌ဘုရားသခင်ဖန်ဆင်းတော်မူသည်။ (ဧဖက် ၄:၂၄။ ကောလောသဲ ၃:၁၀) ကျွန်ုပ်တို့မျှော်လင့်ချက်သည် ကောင်းကင်နှင့်ဆိုင်သည်ဖြစ်စေ၊ မြေကြီးနှင့်ဆိုင်သည်ဖြစ်စေ ထိုလူသစ်ကိုတင်ပြကြစို့။ ကျွန်ုပ်တို့၏ဓမ္မအမှုဆောင်ရာတွင် ဘုရားသခင့်ဘုန်းအသရေတော်ကို ရောင်ပြန်ဟပ်နိုင်ဖို့လေးမြတ်တန်ဖိုးထားကြစို့။

[စာမျက်နှာ ၃၁ ပါ လေးထောင့်ကွက်/ရုပ်ပုံ]

“ဖြောင့်မတ်ခြင်းလက်နက်တန်ဆာများ”။ “ဖြောင့်မတ်သောအကျင့်တည်းဟူသောလက်နက်များကို လက်ယာဘက်၊ လက်ဝဲဘက်၌ဝတ်ဆောင်ခြင်းအားဖြင့်” ပေါလုနှင့်သူ၏အပေါင်းအပါတို့သည် မိမိတို့ကိုယ်ကို ဘုရားသခင်၏ဓမ္မအမှုဆောင်များအဖြစ် ထောက်ခံခဲ့ကြသည်။ (၂ ကောရိန္သု ၆:၃–၇) လက်ယာဘက်တွင်ဓားကိုကိုင်၍ဝှေ့ယမ်းပြီး လက်ဝဲဘက်တွင်ဒိုင်းလွှားကိုကိုင်ကြသည်။ အဘက်ဘက်မှတိုက်ခိုက်ခံခဲ့ရသော်လည်း၊ ပေါလုနှင့်သူ၏လုပ်ဖေါ်ဆောင်ဖက်များသည် ဝိညာဏစစ်ပွဲကိုဆင်နွှဲရန် အသင့်ရှိကြသည်။ ကောရိန္သုအသင်းတော်သည် ခရစ်တော်ကိုချစ်မြတ်နိုးခြင်းဝတ်မှ သွေဖည်မသွားရန် ၄င်းလက်နက်များကို မှောက်မှားသောဆရာများနှင့် “အကြီးဆုံးသောတမန်တော်များ” တစ်ဘက် အသုံးပြုခဲ့ရကြသည်။ ဇာတိပကတိအပြစ်သားတို့၏လက်နက်များဖြစ်သည့် ကောက်ကျစ်စဉ်းလဲ၊ လိမ်လည်လှည့်ဖြားခြင်းကို ပေါလုအသုံးမပြုခဲ့ပေ။ (၂ ကောရိန္သု ၁၀:၈–၁၀။ ၁၁:၃၊ ၁၂–၁၄၊ ၁၂:၁၁၊ ၁၆) ထိုလက်နက်မျိုးကိုအသုံးပြုမည့်အစား ဖြောင့်မတ်ခြင်းတရားဆိုင်ရာ “လက်နက်များ” နှင့် အတိုက်အခံပြုသမျှကို စစ်မှန်သောဝတ်ပြုရေးအောင်လံထူနိုင်ရန် အသုံးပြုခဲ့သည်။ ယခုလည်း ယေဟောဝါသက်သေများသည် “ဖြောင့်မတ်သောလက်နက်များ” ကို ထပ်တူရည်ရွယ်ချက်မျိုးဖြင့် အသုံးပြုနေကြသည်။