ဘုရားရှင်နှင့်ခရစ်တော်၌ ယုံကြည်ခြင်းကိုထိန်းသိမ်းလော့

ကောလောသဲမှပေါ်လွင်ချက်များ

ယေဟောဝါဘုရားရှင်နှင့်ယေရှုခရစ်တွင် ယုံကြည်ခြင်းသည်ကယ်တင်ခြင်းအတွက် အရေးကြီး၏။ သို့သော်ထိုသို့သောယုံကြည်ခြင်းကို ထိန်းသိမ်းထားခြင်းသည် စိန်ခေါ်ချက်တစ်ရပ်ပင်။ ယင်းသည်အာရှမိုင်းနားရှိဧဖက်အရှေ့ဘက်၊ ကောလောသဲမြို့မှ ခရစ်ယာန်များအတွက်စိန်ခေါ်ချက် ဖြစ်ခဲ့သည်။ အဘယ့်ကြောင့်နည်း။ အကြောင်းမှာ၊ ထိုတွင်ရှိမှားယွင်းသောသွန်သင်သူများက ကယ်တင်ခြင်းသည် အရေဖျားလှီးခြင်း၊ အစားအသောက်နှင့် ကျင့်ဆောင်မှုအချို့အပေါ်မူတည်ကြောင်း မှားယွင်းစွာခံယူထားခြင်းအားဖြင့်ဖြစ်သည်။

ထို့ကြောင့်ပင်တမန်တော်ပေါလုသည် ကောလောသဲရှိခရစ်ယာန်များ၏ ဝိညာဏကောင်းကျိုးကိုစိုးရိမ်ပြီး၊ သူတို့သည်ဘုရားရှင်နှင့်ခရစ်တော်တွင် သူတို့၏ယုံကြည်ခြင်းကို ထိန်းသိမ်းထားရန် သူအမှန်ပင်လိုလားခဲ့သည်။ ထို့ကြောင့်ရောမတွင်တမန်တော်ပေါလု၏ ပထမဆုံးအကျဉ်းကျစဉ်အကုန်ပိုင်းလောက်တွင် (စီအီး ၆၀-၆၁ခန့်) မှားယွင်းသောအမြင်များကို တိုက်ဖျက်ရန်နှင့် သူတို့၏ယုံကြည်ခြင်းကိုတည်ဆောက်ရန်ရည်စူး၍ ကောလောသဲမြို့သားများထံ စာတစ်စောင်ရေးခဲ့သည်။ ကျွန်ုပ်တို့လည်းသူ၏မေတ္တာပါသောစကားများမှ မည်သို့အကျိုးရယူနိုင်ကြောင်း ကြည့်ကြပါစို့။

ခရစ်တော်၏နေရာအဆင့်ကိုလေးစားခြင်း

သူ၏စောစောပိုင်းစာတွင် ပေါလုကယေရှု၏အဆင့်ကိုလေးမြတ်ရန် ပေါ်လွင်စေခဲ့သည်။ (၁:၁–၂:၁၂) ကောလောသဲမြို့သားများအား ခရစ်တော်နှင့်ဆက်နွယ်၍ သူတို့၏ယုံကြည်သူဘက်သားများအပေါ် သူတို့၏မေတ္တာကို ချီးမွမ်းခဲ့သည်။ ပေါလုကအခြားအရာများကို ကိုယ်တော်အားဖြင့်ဖန်ဆင်းသူအဖြစ် ခရစ်တော်၏ထူးမြတ်ပုံ၊ အသင်းတော်၏ဦးခေါင်းဖြစ်ပုံနှင့် သေသောသူတို့တွင် သားဦးဖြစ်ပုံတို့ကို ဖော်ပြသည်။ ဉာဏ်ပညာနှင့် အသိပညာရတနာများသိုဝှက်ထားရာ ခရစ်တော်အားဖြင့်ဘုရားရှင်နှင့်မိဿဟာရဖွဲ့နိုင်သည်။ ဤအရာအားလုံးကိုထောက်ရှုခြင်းဖြင့် ခရစ်ယာန်များသည်ခရစ်တော်နှင့် တစ်လုံးတစ်ဝတည်းလိုက်လျှောက်သင့်ပြီး၊ မည်သူမျှသူတို့အား လူ့အတွေးအခေါ်၏သားကောင်အဖြစ် သယ်ဆောင်သွားရန်မဟုတ်ချေ။

ယေရှုခရစ်အားဖြင့်ဘုရားရှင်သည် ပညတ်တရားကိုပယ်ရှားလိုက်သည်။ (၂:၁၃-၂၃) ယင်းကိုယေရှုသေဆုံးခဲ့သော နှက်တိုင်ပေါ်တွင်ပုံဆောင်ချက်အရ ရိုက်လိုက်သည်။ ပညတ်တော်၏တောင်းဆိုချက်များသည် “နောင်လာလတံ့သောအရာတို့၏ အရိပ်ဖြစ်ကြ၏။ ကိုယ်မူကားခရစ်တော်၏ကိုယ်ဖြစ်၏။” ခရစ်တော်ကိုခိုင်ခိုင်မြဲမြဲစွဲကိုင်ထားခြင်းဖြင့် ကောင်းကင်တွင်မသေနိုင်သော အသက်ဆုကျေးဇူးကို သူတို့ထံမှလုယူရန်မည်သူ့ကိုမျှ ခွင့်ပြုမည်မဟုတ်ချေ။

ဘုရားရှင်နှင့်ခရစ်တော်ကိုလေးမြတ်ခြင်း

ပေါလုကကောလောသဲမြို့သားများအား ပုံသဏ္ဌာန်သစ်ကိုဝတ်ဆင်၍ ယေရှုခရစ်၏အုပ်ချုပ်မှုအောက်ဝန်ခံရန် ဆက်အားပေးသည်။ (၃:၁-၁၇) သူတို့၏စိတ်ကို အထက်မှအရာများအပေါ်ထားခြင်းဖြင့် ဘဝတွင်ဝိညာဏရေးရာကိုသူတို့ ဦးစားပေးရာရောက်သည်။ ယင်းတွင်မှားယွင်းသောသဘောထားနှင့် စကားများဖယ်ရှားပစ်ရန် လိုအပ်သည်။ သူတို့ကိုယ်ကိုထိုသို့သောအရည်အချင်းများဖြစ်သည့် ကြင်နာသနားခြင်း၊ နှိမ့်ချခြင်းနှင့် မေတ္တာဖြင့်ဝတ်ဆင်ခြင်းဖြင့်သူတို့သည် မည်မျှကောင်းချီးခံစားရမည့်သူများ ဖြစ်မည်ပါတကား။ သူတို့သည်ယေရှု၏နာမ၌ အရာရာကိုပြုကျင့်ပြီး၊ ကိုယ်တော်မှတစ်ဆင့်ဘုရားရှင်အား ကျေးဇူးတင်ရှိလျှင် ခရစ်တော်၏ငြိမ်သက်ခြင်းသည် သူတို့၏နှလုံးတွင် လွှမ်းမိုးပေလိမ့်မည်။

ယေဟောဝါရှင်နှင့်ခရစ်တော်အပေါ်လေးမြတ်ခြင်းသည် အခြားသူများနှင့်ခရစ်ယာန်ဆက်ဆံရေးကိုလည်း လွှမ်းမိုးသင့်သည်။ (၃:၁၈–၄:၁၈) ဇနီးသည်များ၊ လင်ယောက်ျားများ၊ သားသမီးများ၊ ကျွန်များ၊ သခင်များသည် ဘုရားကိုကြောက်ရွံ့၍ ခရစ်တော်ကိုအသိအမှတ်ပြုလျက် သူတို့၏တာဝန်များကို ထမ်းဆောင်ရန်ဖြစ်သည်။ ဆုတောင်းခြင်းတွင်စွဲမြဲရန်နှင့် ဉာဏ်ပညာနှင့်လိုက်လျှောက်ရန်လည်း မည်မျှလိုအပ်ပါသည်တကား။

ပေါလု၏ကောလောသဲမြို့သားများထံစာသည် အသက်ဆုကျေးဇူးကိုလုယူသွားစေနိုင်သည့် မှောက်မှားသောသွန်သင်ချက်များကိုရှောင်ရှားရန် ကျွန်ုပ်တို့အားကူညီပေးနိုင်သည်။ တမန်တော်၏ယေဟောဝါနှင့်ကိုယ်တော်.သားတော်၏ ဩဇာအာဏာအပေါ်အသိအမှတ်ပြုရန် အလေးပေးခြင်းသည် အခြားသူများနှင့်ကျွန်ုပ်တို့၏ဆက်ဆံရေးအပေါ် ကောင်းသောလွှမ်းမိုးမှုကို ဖြစ်စေနိုင်သည်။ ဘုရားရှင်နှင့်ယေရှုခရစ်တွင်ကျွန်ုပ်တို့၏ယုံကြည်ခြင်းကို ထိန်းသိမ်းထားပါက ကြွယ်ဝသောကောင်းချီးများကို ကျွန်ုပ်တို့ခံစားရမည့်အကြောင်း စိတ်ချစေသည်။

[စာမျက်နှာ ၃၂ ပါ လေးထောင့်ကွက်/ ရုပ်ပုံ]

လောဒိကိသို့စာစောင်- ပေါလုကကောလောသဲမြို့သားများထံ ဤသို့ရေးသားခဲ့သည်။ “ဤစာကိုသင်တို့သည်ဖတ်ပြီးမှ လောဒိကိမြို့အသင်းတော်ကို ဖတ်စေကြလော့။ ထိုမြို့မှရသောစာကိုလည်း သင်တို့ဖတ်ကြလော့။” (ကောလောသဲ ၄:၁၆) လောဒိကိသည်အာရှမိုင်းနားအရှေ့ပိုင်းတွင် ကြွယ်ဝသောမြို့ဖြစ်ပြီး၊ ဖိလဒေလဖိနှင့်ဧဖက်ကဲ့သို့သောမြို့များကို လမ်းများဖြင့်ဆက်သွယ်ထားသည်။ လောဒိကိတွင်ပေါလုအမှုမဆောင်ခဲ့သော်လည်း ဧဖက်တွင်ပေါလု၏လုပ်ငန်းသည် ထိုမြို့အထိရောက်ခဲ့ပုံရသည်။ သူကလောဒိကိရှိခရစ်ယာန်များထံ စာတစ်စောင်ပို့ခဲ့သည်။ အချို့ပညာရှင်များက ယင်းသည်ဧဖက်သို့သူရေးခဲ့သည့်စာစောင်၏မိတ္တူဟု ယုံကြည်ကြသည်။ လောဒိကိသို့ရေးသောစာစောင်သည် သမ္မာကျမ်းစာတွင်မတွေ့ရချေ။ အကြောင်းမှာ၊ ယင်းစာစောင်တွင် ယနေ့ကျွန်ုပ်တို့လိုအပ်သော အချက်များမပါဝင်၍ သို့မဟုတ် ယင်း၏ထပ်ဆင့်ပြောသောအချက်များသည် အခြားကျမ်းစောင်များတွင် အလုံအလောက်ပါဝင်ပြီးဖြစ်သောကြောင့် ဖြစ်နိုင်သည်။

[ရုပ်ပုံ]

လောဒိကိရှိ အပျက်အစီးများ