ယေဟောဝါကိုခန့်ညား၍ သန့်ရှင်းသောနာမတော်ကိုချီးမွမ်းကြလော့

“ယေဟောဝါ၊ ကိုယ်တော်သာလျှင် သစ္စာစောင့်သိတော်မူသောကြောင့် ကိုယ်တော်ကို အမှန်တကယ်ခန့်ညားခြင်း၊ နာမတော်ကိုချီးမွမ်းခြင်းမပြုဘဲ မည်သူနေဝံ့သနည်း။”—ဗျာဒိတ် ၁၅:၄၊ ကဘ။

၁၊ ၂။ (က) ၁၉၉၁ ခုနှစ်အတွင်း မိုးကောင်းကင်ပြတင်းပေါက်များကို ယေဟောဝါမည်သို့ဖွင့်တော်မူခဲ့သနည်း။ (ခ) သစ္စာရှိသာသနာပြုတစ်ဦး “ယေဟောဝါကိုခန့်ညားကြပါ” ဟူ၍ အကြံပေးစကားပြောကြားစေရန် မည်သည့်ဘဝအတွေ့အကြုံက စေ့ဆော်ပေးခဲ့သနည်း။ (၁၉၉၁ ခု၊ နှစ်ချုပ်စာအုပ်၊ စာမျက်နှာ ၁၈၇-၉ ၌ကြည့်ပါ။)

ယေဟောဝါသည် ‘မိုးကောင်းကင်ပြတင်းပေါက်များကိုဖွင့်၍ လိုလျက်မနေရအောင် ကောင်းချီးမင်္ဂလာသွန်းလောင်း’ တော်မူ၏။ ဤစကားများသည် မျက်မှောက်ခေတ်ယေဟောဝါသက်သေများနှင့် အထပ်ထပ်သက်ဆိုင်ပေသည်။ (မာလခိ ၃:၁၀) ဥပမာအားဖြင့် ၁၉၉၁ ခုအမှုတော်ဆောင်နှစ်အတွင်း တောင်အမေရိကရှိ ဗျူးနို့အေရီမြို့နှင့်အရှေ့တိုင်းရှိ မနီလာ၊ ထိုက်ပေ၊ ဘန်ကောက်မြို့များတွင် ကျင်းပခဲ့သည့် “စင်ကြယ်သောဘာသာစကား” စည်းဝေးပွဲကြီးများမှသည် အရှေ့ဥရောပရှိဘူဒါပက်စ်၊ ပရက်ဂ်နှင့်ဇာဂရက် (၁၉၉၁၊ ဩဂုတ် ၁၆-၁၈) မြို့များတွင်ကျင်းပခဲ့သည့် “လွတ်လပ်မှုချစ်မြတ်နိုးသူများ” စည်းဝေးပွဲများအထိ ကမ္ဘာတစ်လွှားကျင်းပခဲ့သည့် အထူးစည်းဝေးပွဲကြီးများ၌ ဧည့်သည်တော်သက်သေခံများနှင့် ဌာနေရွှေပွဲလာတို့၏ စိတ်အားထက်သန်မှုသည်ခရစ်ယာန်ပေါင်းသင်းဆက်ဆံမှုတွင် ပြည့်လျှံလျက်ရှိခဲ့သည်။

^၂ ရေမြေရပ်ခြား တိုင်းတစ်ပါးမှရောက်လာကြသော ကိုယ်စားလှယ်တို့အဖို့ ထိုဒေသများရှိ နှစ်ရှည်လများ သစ္စာရှိကြသောသက်သေခံများနှင့် တွေ့ဆုံခွင့်ရသည်မှာ မည်မျှဝမ်းသာစရာပါတကား။ ဥပမာအနေနှင့် ဘန်ကောက်မြို့၌ တစ်ချိန်က ထိုင်းနိုင်ငံတွင် တစ်ဦးတည်းသောဘုရားသခင့်နိုင်ငံတော်ကြေညာသူဖြစ်ခဲ့သူ ဖရန့်ဂျူးဝါးက သူ၏ ၅၈ နှစ်ကြာသာသနာပြုလုပ်ငန်းအကြောင်းပြောပြသည်။ သူလှုပ်ရှားဆောင်ရွက်ခဲ့သည့်နယ်ပယ်များမှာ ပစိဖိတ်ကျွန်းစုများမှသည် အရှေ့တောင်အာရှဒေသသာမက တရုတ်ပြည်အထိပင်ကျယ်ဝန်းသည်။ သူသည် သင်္ဘောပျက်ခြင်းဘေး၊ တောရိုင်းတိရစ္ဆာန်တို့၏ဘေး၊ အပူပိုင်းဒေသရောဂါဘေးများနှင့် ဂျပန်အာဏာပိုင်တို့၏ အုပ်ချုပ်မှုတို့ကို ကြုံတွေ့ခဲ့ရသည်။ ရွှေပွဲလာပရိသတ်များအား မည်သည့်အကြံပေးလိုပါသနည်းဟု မေးမြန်းရာ သူ့အဖြေမှာ ရိုးရိုးလေးသာဖြစ်သည်။ “ယေဟောဝါကိုခန့်ညားကြပါ။”

၃။ ဘုရားတရားကြည်ညိုခန့်ညားခြင်း အဘယ်ကြောင့်ပြသသင့်သနည်း။

^၃ “ယေဟောဝါကိုခန့်ညားကြပါ။” ကောင်းကျိုးပြုသော ဤခန့်ညားကြောက်ရွံ့ခြင်းကို ကျွန်ုပ်တို့အားလုံးမွေးမြူရန် မည်မျှအရေးကြီးသည်တကား။ “ထာဝရဘုရား [ယေဟောဝါ၊ ကဘ] ကိုခန့်ညားခြင်းသည် ဉာဏ်ပညာ၏စတည်ရာဖြစ်၏။” (ဆာလံ ၁၁၁:၁၀၊ သမ ) ဤခန့်ညားခြင်းမျိုးမှာ ယေဟောဝါအားထိတ်လန့်ကြောက်ရွံ့ခြင်းမဟုတ်ဘဲ ဘုရားသခင်၏နှုတ်ကပါဌ်တော်ကို လေ့လာရာမှရရှိသည့် ထိုးထွင်းဉာဏ်အပေါ်အခြေပြု၍ ကိုယ်တော်၏စိုးရွံ့ဖွယ်ကြီးမြတ်တော်မူခြင်းနှင့် ဘုရားရေးရာဂုဏ်ရည်တော်များကို အလွန့်အလွန်ရိုသေကိုင်းရှိုင်းခြင်းသာဖြစ်သည်။ ဗျာဒိတ် ၁၅:၃၊ ၄ မှမောရှေ၏သီချင်းနှင့် သိုးသငယ်၏သီချင်းတို့၌ ဤသို့အတိအလင်းဆိုထားသည်။ “အနန္တတန်ခိုးရှင်ယေဟောဝါဘုရားသခင်၊ အမှုတော်များသည် ကြီးမြတ်၍အံ့သြဖွယ်ကောင်းလှပေ၏။ ထာဝရဘုရင်မင်းမြတ်၊ နည်းလမ်းတော်များသည် ဖြောင့်မတ်၍မှန်ကန်လှပေ၏။ ယေဟောဝါ၊ ကိုယ်တော်သာလျှင် သစ္စာစောင့်သိတော်မူသောကြောင့် ကိုယ်တော်ကိုအမှန်တကယ်ခန့်ညားခြင်း၊ နာမတော်ကိုချီးမွမ်းခြင်းမပြုဘဲ မည်သူနေဝံ့သနည်း။” (ကဘ ) မိမိကိုကိုးကွယ်ကြသူတို့အပေါ် သစ္စာစောင့်သိသောအားဖြင့် ယေဟောဝါသည် “ထာဝရဘုရား [ယေဟောဝါ၊ ကဘ] ကိုကြောက်ရွံ့၍ နာမတော်ကိုအောက်မေ့သောသူတို့အဖို့ ရှေ့တော်တွင်စာရင်း၌မှတ်သားလျက်ရှိ၏။” ထိုသူတို့သည် ထာဝရအသက်ဖြင့် ချီးမြှင့်ခြင်းခံကြရ၏။—မာလခိ ၃:၁၆။ ဗျာဒိတ် ၂၀:၁၂၊ ၁၅။

ဘုရားရေးရာခန့်ညားခြင်းအောင်ပွဲခံ

၄။ ယေဟောဝါကိုခန့်ညားရန် အဘယ်ရှေးကယ်တင်ခြင်းက ကျွန်ုပ်တို့ကို အားတက်စေသနည်း။

^၄ ဖာရောမင်းအုပ်ချုပ်သည့် အီဂျစ်ပြည်မှ ဣသရေလလူမျိုးထွက်ခွာခဲ့ကြစဉ်က မောရှေသည် ယေဟောဝါတစ်ပါးတည်းကိုသာ ခန့်ညားကြောက်ရွံ့ကြောင်း ရှင်းလင်းပြတ်သားစွာပြသခဲ့သည်။ များမကြာမီ ဣသရေလလူမျိုးသည် ပင်လယ်နီနှင့်အီဂျစ်၏အင်အားကြီးမားသော စစ်ယန္တရားတို့ကြားတွင် ပိတ်မိလျက်ရှိသည်။ သူတို့ဘာလုပ်နိုင်သနည်း။ “မောရှေကလည်း ‘မစိုးရိမ်နှင့်။ ငြိမ်ဝပ်စွာရပ်နေကြ။ ထာဝရဘုရား [ယေဟောဝါ၊ ကဘ] သည်ယနေ့ပြတော်မူသော ကယ်တင်ခြင်းကို ကြည့်ရှုကြလော့။ သင်တို့သည် ယနေ့မြင်သောအဲဂုတ္တုလူတို့ကို နောက်တစ်ဖန်အလျှင်းမမြင်ကြရ။ သင်တို့ဘက်၌ ထာဝရဘုရား [ယေဟောဝါ၊ ကဘ] သည်စစ်တိုက်တော်မူလိမ့်မည်။ သင်တို့သည် ငြိမ်ဝပ်စွာနေကြရမည်’ ဟုလူများတို့အားဆို၏။” အံ့ဖွယ်တန်ခိုးအားဖြင့် ယေဟောဝါသည် ပင်လယ်ရေကိုခွဲလိုက်တော်မူသည်။ ဣသရေလလူတို့သည် ပင်လယ်ကြမ်းပြင်အတိုင်း ချီတက်သွားကြ၏။ ထိုနောက် ရေထုသည် ပြန်လည်ပြိုကျလာသည်။ ဖာရောမင်း၏တပ်မတော်ကြီးသည် အစအနမကျန် ဖျက်ဆီးခံရသည်။ ယေဟောဝါသည် ဘုရားသခင်အားခန့်ညားသောလူမျိုးကို ကယ်တင်ရင်းနှင့်တစ်လက်စတည်း ဘုရားကိုမခန့်လေးစားပြုသည့် အီဂျစ်ပြည်အပေါ် တရားစီရင်တော်မူခဲ့သည်။ အလားတူစွာ၊ ယနေ့လည်း ကိုယ်တော်သည် ဘုရားခန့်ညားသော မိမိ၏သက်သေခံများအား စာတန်၏လောကမှကယ်နှုတ်ခြင်းအားဖြင့် မိမိ၏သစ္စာစောင့်သိမှုကို ပြသတော်မူလိမ့်မည်။—ထွက်မြောက်ရာ ၁၄:၁၃၊ ၁၄။ ရောမ ၁၅:၄။

၅၊ ၆။ ယောရှုလက်ထက်မှ အဘယ်ဖြစ်ရပ်များက လူထက်ယေဟောဝါကို ခန့်ညားကြောက်ရွံ့သင့်ကြောင်း တင်ပြသနည်း။

^၅ အီဂျစ်ပြည်မှထွက်မြောက်ပြီးနောက် မောရှေက သူလျှို ၁၂ ယောက်ကို ကတိထားရာပြည်တော်သို့စေလွှတ်လိုက်၏။ ဆယ်ယောက်က ဘီလူးနှင့်တူသော ထိုပြည်သားတို့ကိုတွေ့သည့်အခါ ကြောက်လန့်သဖြင့် ထိုပြည်သို့မသွားရန် ဣသရေလလူတို့အား ကြိုးစား၍ဖျောင်းဖျတားမြစ်ကြ၏။ သို့သော်ကျန်နှစ်ယောက်ဖြစ်သော ယောရှုနှင့်ကာလက်တို့က ဤသို့အစီရင်ခံတင်ပြ၏။ “[ထို] ပြည်သည် အလွန်တရာကောင်းသောပြည်ဖြစ်ပါ၏။ ထာဝရဘုရား [ယေဟောဝါ၊ ကဘ] သည် ငါတို့ကို နှစ်သက်လျှင်၊ နို့နှင့်ပျားရည်စီးသော ထိုပြည်သို့ ငါတို့ကိုဆောင်သွင်း၍ အပိုင်ပေးတော်မူလိမ့်မည်။ ထာဝရဘုရား [ယေဟောဝါ၊ ကဘ] ကိုမပုန်ကန်ကြပါနှင့်။ ထိုပြည်သူပြည်သားတို့ကို မကြောက်ကြနှင့်။ သူတို့သည် ငါတို့စားစရာဖို့ဖြစ်ကြ၏။ သူတို့၌အမှီတကဲမရှိ။ ထာဝရဘုရား [ယေဟောဝါ၊ ကဘ] သည်ငါတို့ဘက်၌ရှိတော်မူ၏။ သို့ဖြစ်၍ သူတို့ကို မကြောက်ကြနှင့်။”—တောလည်ရာ ၁၄:၇-၉။

^၆ သို့သော်လည်း၊ ထိုဣသရေလလူတို့သည် လူကိုကြောက်ရွံ့ခြင်း၌ ကျော့မိခဲ့ကြသည်။ သို့နှင့်သူတို့သည် ကတိထားရာပြည်တော်သို့ လုံးဝမရောက်ခဲ့ရချေ။ သို့သော်ယောရှုနှင့်ကာလက်တို့မူကား ဣသရေလလူမျိုး မျိုးဆက်သစ်တစ်ခုနှင့်အတူ အထူးကောင်းမွန်သော ထိုပြည်သို့ဝင်ရောက်၍ စပျစ်ဥယျာဉ်၊ သံလွင်ဥယျာဉ်တို့ကို ထွန်ယက်စိုက်ပျိုးသည့် အခွင့်အရေးရရှိခဲ့သည်။ စုဝေးနေသည့် ဣသရေလလူထုအား နောက်ဆုံးနှုတ်ခွန်းဆက် မိန့်ခွန်းပြောကြားရာတွင် ယောရှုက “ယေဟောဝါကို ခန့်ညားလျက် အပြစ်ကင်းခြင်းနှင့်လည်းကောင်း၊ သမ္မာတရားနှင့်လည်းကောင်း ဝတ်ပြုကြလော့” ဟူ၍သြဝါဒပေးခဲ့သည်။ ထို့ပြင် “ငါနှင့်ငါ့အိမ်ထောင်မှာ ယေဟောဝါကိုသာဝတ်ပြုမည်” ဟူ၍ ထပ်ဆင့်ပြောကြားခဲ့သည်။ (ယောရှု ၂၄:၁၄၊ ၁၅၊ ကဘ ) ဘုရားသခင်၏ဖြောင့်မတ်သော ကမ္ဘာသစ်အတွင်းသို့ကူးဝင်ရန် ကျွန်ုပ်တို့ပြင်ဆင်လျက်နေကြစဉ် အိမ်ထောင်ဦးစီးများနှင့် ကျန်သူအားလုံးအတွက် ယေဟောဝါကို ခန့်ညားရန် မည်မျှအားတက်ဖွယ်ကောင်းသော အားပေးစကားများပါတကား။

၇။ ဘုရားသခင်ကိုခန့်ညားကြောက်ရွံ့ခြင်းအကြောင်းကို ဒါဝိဒ်ကမည်သို့အလေးအနက် တင်ပြခဲ့သနည်း။

^၇ သိုးထိန်းလုလင်လေး ဒါဝိဒ်သည်လည်း ဘုရားသခင်၏နာမတော်ဖြင့် ဂေါလျတ်နှင့်ယှဉ်ပြိုင်တိုက်ခိုက်ခဲ့စဉ်က ယေဟောဝါကိုခန့်ညားခြင်းနှင့်ပတ်သက်၍ စံနမူနာပြသခဲ့သည်။ (၁ ဓမ္မရာဇဝင် ၁၇:၄၅၊ ၄၇) သေခါနီး အိပ်သည့်ညောင်စောင်းပေါ်မှ ဒါဝိဒ်ဤသို့အတိအလင်းပြောဆိုခဲ့သည်။ “ထာဝရဘုရား [ယေဟောဝါ၊ ကဘ] ၏ဝိညာဉ်တော်သည် ငါ့အားဖြင့်မိန့်တော်မူ၏။ နှုတ်ကပါဌ်တော်သည် ငါ့လျှာ၌တည်၏။ ဣသရေလလူမျိုး၏ ဘုရားသခင်၊ ဣသရေလလူမျိုး၏ကျောက်သည် ငါ့အားဖြင့် မိန့်မြွက်တော်မူသည်ကား ‘လူတို့အပေါ်တွင် တရားသဖြင့်စီရင်၍ ဘုရားသခင်ကိုကြောက်ရွံ့လျက် အုပ်စိုးသောသူသည် မိုးမအုံ့၊ နေထွက်သောနံနက်အလင်းကဲ့သို့ . . . ဖြစ်လိမ့်မည်။’” (၂ ဓမ္မရာဇဝင် ၂၃:၂-၄၊ သမ္မ ) ဤလောက၏အုပ်စိုးရှင်များ၌ ဘုရားသခင်ကိုခန့်ညားခြင်း သိသိသာသာကင်းမဲ့နေသဖြင့် မည်မျှဝမ်းနည်းဖွယ်ကောင်းသော ဆိုးကျိုးများကြုံတွေ့နေရကြသည်တကား။ “ဒါဝိဒ်၏သားတော်” ယေရှုသည် ယေဟောဝါကိုခန့်ညားခြင်းသဘောနှင့် ကမ္ဘာမြေကြီးကိုအုပ်ချုပ်သည့်အခါ အခြေအနေမည်မျှကွာခြားသွားမည်တကား။—မဿဲ ၂၁:၉။

ယေဟောဝါကိုခန့်ညားလျက် လုပ်ဆောင်ခြင်း

၈။ ယုဒပြည်သည် ယောရှဖတ်လက်အောက်တွင် အဘယ်ကြောင့် ဖွံ့ဖြိုးစည်ပင်ခဲ့သနည်း။ ယခုခေတ်အတွက် ဘာကိုတင်ပြသနည်း။

^၈ ဒါဝိဒ်အနိစ္စရောက်၍ နှစ်ပေါင်းတစ်ရာခန့်အကြာတွင် ယောရှဖတ်သည် ယုဒပြည်တွင် ရှင်ဘုရင်ဖြစ်လာ၏။ ယေဟောဝါကို ခန့်ညားခြင်းသဘောနှင့် ကိုယ်တော်ကိုဝတ်ပြုသောရှင်ဘုရင်တစ်ပါးပေါ်လာပြန်သည်။ သူသည် ယုဒပြည်တွင် သီအိုခရက်တစ်အစီအစဉ်ကို ပြန်လည်တည်ထောင်လျက် နိုင်ငံတစ်ဝန်းတွင် တရားသူကြီးများကိုခန့်အပ်ပြီးနောက် အောက်ပါညွှန်ကြားချက်များကိုပေးခဲ့သည်။ “လူ၏အမှုကိုစောင့်၍ တရားစီရင်သည်မဟုတ်။ သင်တို့စီရင်ရာတွင်၊ ရှိတော်မူသော ထာဝရဘုရား [ယေဟောဝါ၊ ကဘ] ၏အမှုတော်ကိုစောင့်၍စီရင်ကြရ၏။ သို့ဖြစ်၍ ထာဝရဘုရား [ယေဟောဝါ၊ ကဘ] ကိုကြောက်ရွံ့သောစိတ်ရှိ၍ သတိပြုကြလော့။ ငါတို့ဘုရားသခင်သည် မတရားသောအမှုကိုလက်ခံခြင်း၊ လူမျက်နှာကိုထောက်ခြင်း၊ တံစိုးစားခြင်းအခွင့်ရှိတော်မမူ။ . . . သင်တို့သည် စုံလင်သောစိတ်နှလုံးနှင့် ထာဝရဘုရား [ယေဟောဝါ၊ ကဘ] ကိုကြောက်ရွံ့လျက် သစ္စာစောင့်လျက်စီရင်ကြလော့။” (၂ ရာဇဝင်ချုပ် ၁၉:၆-၉) သို့ဖြင့်ယုဒပြည်သည် ယေဟောဝါကိုခန့်ညားခြင်းအားဖြင့် စည်ပင်ဖွံ့ဖြိုးခဲ့လေသည်။ ယခုခေတ်တွင် ကရုဏာပြည့်ဝသော ကြီးကြပ်မှူးများ၏အကျိုးဆောင်မှုကြောင့် ဘုရားသခင့်လူမျိုးတော် အကျိုးကျေးဇူးခံစားရသည့်နည်းတူပင်ဖြစ်သည်။

၉၊ ၁၀။ ယောရှဖတ်သည် ယေဟောဝါကိုခန့်ညားခြင်းအားဖြင့် မည်သို့အောင်ပွဲခံခဲ့သနည်း။

^၉ သို့သော်လည်း ယုဒပြည်အတွက် ရန်သူများရှိနေသည်။ ထိုရန်သူများက ဘုရားသခင့်လူမျိုးကို သုတ်သင်ဖယ်ရှားပစ်ရန် သန္နိဌာန်ချထားကြသည်။ အမ္မုန်အမျိုးသား၊ မောဘအမျိုးသားနှင့် စိရတောင်သားတို့၏ မဟာမိတ်တပ်ဖွဲ့သည် ယုဒပြည်အတွင်းသို့အလုံးအရင်းနှင့် ချဉ်းနင်းဝင်ရောက်ကာ ယေရုရှလင်မြို့ကို ခြိမ်းခြောက်လာသည်။ အလွန်အင်အားကြီးသော တပ်မတော်ဖြစ်သည်။ “ယုဒလူအပေါင်းတို့သည် သားမယား သူငယ်တို့နှင့်တကွ ထာဝရဘုရား [ယေဟောဝါ၊ ကဘ] ရှေ့တော်၌ရပ်နေကြ” စဉ် ယောရှဖတ်သည် ယေဟောဝါထံဆုတောင်းလျက် ချဉ်းကပ်လေသည်။ ထိုအခါ ထိုဆုတောင်းပတ္ထနာကိုဖြေကြားသည့်အနေနှင့် ယေဟောဝါ၏ဝိညာဉ်တော်သည် လေဝိအမျိုးသား ယဟာဇေလပေါ်သို့သက်ရောက်ရာ ထိုသူက “ထာဝရဘုရား [ယေဟောဝါ၊ ကဘ] မိန့်တော်မူသည်ကား ‘ထိုအလုံးအရင်းကြီးကြောင့် မကြောက်ကြနှင့်။ စိတ်မပျက်ကြနှင့်။ စစ်မှုသည် သင်တို့တာမဟုတ်၊ ဘုရားသခင့် တာဖြစ်၏။ နက်ဖြန်နေ့သူတို့ရှိရာသို့ချီသွားကြလော့။ . . . သင်တို့သည် စစ်တိုက်စရာအကြောင်းမရှိသည်ဖြစ်၍ တည်ကြည်စွာမတ်တတ်နေလျက် ထာဝရဘုရား [ယေဟောဝါ၊ ကဘ] ကယ်တင်တော်မူခြင်းကျေးဇူးကို ကြည့်ရှုကြလော့။ မကြောက်ကြနှင့်။ စိတ်မပျက်ကြနှင့်။ နက်ဖြန်နေ့ ချီသွားကြလော့။ ထာဝရဘုရား [ယေဟောဝါ၊ ကဘ] သည် သင်တို့နှင့်အတူ ရှိတော်မူလိမ့်မည်’” ဟုမြွက်ဆို၏။—၂ ရာဇဝင်ချုပ် ၂၀:၅-၁၇။

^၁၀ နောက်တစ်နေ့နံနက်တွင် ယုဒအမျိုးသားတို့သည် စောစောထကြ၏။ နာခံမှုရှိရှိဖြင့် ရန်သူများကိုရင်ဆိုင်ရန် ထွက်သွားကြသည့်အခါ ယောရှဖတ်က မတ်တတ်ရပ်လျက် “အိုယုဒပြည်သူ၊ ယေရုရှလင်မြို့သားတို့၊ နားထောင်ကြလော့။ သင်တို့၏ဘုရားသခင်ကို ယုံကြည်ကြလော့။ သို့ပြုလျှင် တည်ကြည်ကြလိမ့်မည်။ ပရောဖက်တော်တို့ကို ယုံကြည်ကြလော့။ သို့ပြုလျှင် အောင်မြင်ကြလိမ့်မည်” ဟုမိန့်တော်မူ၏။ ယေဟောဝါအဖို့ ခန့်ထားသောသီချင်းသည်တို့သည် လက်နက်ကိုင်တပ်ဖွဲ့ရှေ့မှ ချီသွားကြစဉ် “ထာဝရဘုရား [ယေဟောဝါ၊ ကဘ] ၏ကရုဏာတော်သည် အစဉ်အမြဲတည်သောကြောင့် ဂုဏ်ကျေးဇူးတော်ကိုချီးမွမ်းကြလော့” ဟူ၍သံပြိုင်သီဆိုကြ၏။ ယေဟောဝါကလည်း ရန်သူတို့အား အချင်းချင်းတိုက်ခိုက်ဖျက်ဆီးကြရန် ရှုပ်ထွေးအောင်ပြုလုပ်ခြင်းဖြင့် မေတ္တာကရုဏာတော်ကို ပြသတော်မူ၏။ ယုဒလူတို့သည် တော၌ရှိသောကင်းမျှော်စင်သို့ ရောက်သောအခါ ရန်သူတို့၏အလောင်းများသာ ကျန်ရစ်တော့သည်။—၂ ရာဇဝင်ချုပ် ၂၀:၂၀-၂၄။

၁၁။ ကြောက်ရွံ့ခြင်းနှင့်ပတ်သက်၍ တိုင်းနိုင်ငံများသည် ဘုရားသခင့်လူမျိုးတော်နှင့် မည်သို့ကွာခြားကြသနည်း။

^၁၁ ဤအံ့ဖွယ်ကယ်တင်ခြင်းကို ပတ်ဝန်းကျင်တိုင်းနိုင်ငံတို့ကြားသိကြသောအခါ “ဘုရားသခင့်ထံမှ ထိတ်လန့်ခြင်း” သင့်ရောက်လေ၏။ တစ်ဖက်တွင် ယေဟောဝါကို ခန့်ညားလျက်နာခံခဲ့ကြသောလူမျိုးသည် ယခုအခါ ‘အရပ်ရပ်၌ ငြိမ်းချမ်းသာယာ’ လေ၏။ (၂ ရာဇဝင်ချုပ် ၂၀:၂၉၊ ၃၀) ထိုနည်းတူစွာ အာမဂေဒုန်၌ ယေဟောဝါတရားစီရင်တော်မူသည့်အခါတိုင်းနိုင်ငံတို့သည်ဘုရားသခင်နှင့်ကိုယ်တော့်လက်မရွံ့အာဏာသား ယေရှုခရစ်တော်တို့ကို ထိတ်လန့်ကြမည့်အပြင် ဘုရားသခင်၏အမျက်တော်နေ့ကြီး၌ ခံရပ်နိုင်ကြမည်မဟုတ်ပေ။—ဗျာဒိတ် ၆:၁၅-၁၇။

၁၂။ ရှေးခေတ်အခါများ၌ ယေဟောဝါကိုခန့်ညားခြင်းဖြင့် မည်သို့ဆုချခြင်းခံခဲ့ကြရသနည်း။

^၁၂ ယေဟောဝါကို ဤသို့ကောင်းကျိုးပြုသည့်နည်းဖြင့် ခန့်ညားကြောက်ရွံ့ခြင်းသည် ကြွယ်ဝသောဆုကျေးဇူး ရရှိစေသည်။ နောဧသည် ဘုရားတရားကြည်ညို “ကြောက်ရွံ့သောစိတ်ရှိ၍ မိမိအိမ်သူအိမ်သားတို့ကို ကယ်တင်ခြင်းငှာ သင်္ဘောကိုတည်လေ၏။” (ဟေဗြဲ ၁၁:၇) ၄င်းပြင် ပထမရာစုခရစ်ယာန်များအဖို့ နှိပ်စက်ညှဉ်းပန်းခြင်းကာလပြီးဆုံးသည့်နောက် အသင်းတော်တို့သည် “ငြိမ်သက်၍တည်ဆောက်ခြင်းရှိကြ၏။ ထာဝရဘုရား [ယေဟောဝါ၊ ကဘ] ကိုကြောက်ရွံ့ခြင်း၌လည်းကောင်း၊ သန့်ရှင်းသောဝိညာဉ်တော်၏ အဆုံးအမ၌လည်းကောင်း မွေ့လျော်သောအားဖြင့် ပွားများကြ၏” ဟုမှတ်တမ်းတင်ထားသည်။ ယခုခေတ် အရှေ့ဥရောပ၌ဖြစ်ပျက်သည်နှင့် များစွာဆင်တူလှပေသည်။—တမန်တော် ၉:၃၁။

အကောင်းကိုချစ်၍ အဆိုးကိုမုန်းလော့

၁၃။ မည်သို့အားဖြင့်သာလျှင် ယေဟောဝါ၏ကောင်းချီးမင်္ဂလာကို ခံစားနိုင်မည်နည်း။

^၁၃ ယေဟောဝါသည် လုံးလုံးလျားလျား ကောင်းမြတ်တော်မူ၏။ ထို့ကြောင့် “ထာဝရဘုရား [ယေဟောဝါ၊ ကဘ] ကိုကြောက်ရွံ့သောသဘောကား၊ ဒုစရိုက်ကိုမုန်းသောသဘောတည်း။” (သု၊ ၈:၁၃) ယေရှုအကြောင်းနှင့်ပတ်သက်၍ ဤသို့ရေးသားထားသည်။ “ကိုယ်တော်သည်ဖြောင့်မတ်ခြင်းတရားကိုနှစ်သက်၍ မတရားသောအမှုကိုမုန်းတော်မူ၏။ ထိုကြောင့် အိုဘုရားသခင် ကိုယ်တော်၏ဘုရားသခင်သည် ကိုယ်တော်၏အပေါင်းအဖော်တို့ထက် ကိုယ်တော်ကိုချီးမြှောက်၍ ဝမ်းမြောက်ခြင်းဆီနှင့် ဘိသိက်ပေးတော်မူပြီဟု လာသတည်း။” (ဟေဗြဲ ၁:၉) ကျွန်ုပ်တို့သည် ယေရှုနည်းတူ ယေဟောဝါ၏ကောင်းချီးကိုရလိုသည့်ဆန္ဒရှိလျှင် စာတန်၏ မာနထောင်လွှားသောလောကနှင့်ဆိုင်သော ဒုစရိုက်မှု၊ စာရိတ္တပျက်ပြားမှု၊ အဓမ္မမှုနှင့် လောဘတို့ကို ရွံမုန်းကြရပေမည်။ (သု၊ ၆:၁၆-၁၉ နှင့်နှိုင်းယှဉ်။) ယေဟောဝါချစ်တော်မူသည့်အရာကိုချစ်၍မုန်းတော်မူသည့်အရာကိုမုန်းရပေမည်။ ယေဟောဝါစိတ်တော် ငြိုငြင်စရာဖြစ်အောင် ပြုလုပ်မိမှာကို စိုးရိမ်ကြောက်ရွံ့ရမည်။ “ထာဝရဘုရား [ယေဟောဝါ၊ ကဘ] ကိုကြောက်ရွံ့သောသဘောအားဖြင့် ဒုစရိုက်ကိုရှောင်တတ်၏။”—သု၊ ၁၆:၆။

၁၄။ ယေရှုသည် ကျွန်ုပ်တို့အဖို့စံနမူနာတစ်ခု မည်သို့ထားတော်မူခဲ့သနည်း။

^၁၄ ယေရှုသည် မိမိခြေတော်ရာအတိုင်း ကျွန်ုပ်တို့လိုက်နာစိမ့်သောငှာ စံနမူနာကို ထားတော်မူခဲ့၏။ “ကဲ့ရဲ့ခြင်းကိုခံရသောအခါ ပြန်၍မကဲ့ရဲ့။ အသေခံရသောအခါ ခြိမ်းခြောက်ခြင်းကို မပြု။ တရားသဖြင့်စီရင်တော်မူသောသူ၌ ကိုယ်ကိုယ်ကိုအပ်နှံတော်မူ၏။” (၁ ပေတရု ၂:၂၁-၂၃) ယေဟောဝါကိုခန့်ညားခြင်းအားဖြင့် ကျွန်ုပ်တို့လည်း စာတန့်လောကသက်ရောက်စေသည့် ပြစ်တင်ရှုတ်ချမှုများ၊ သရော်ပြောင်လှောင်မှုများနှင့် နှိပ်စက်ညှဉ်းပန်းမှုများကို ကြံ့ကြံ့ခံနိုင်မည်ဖြစ်သည်။

၁၅။ ကိုယ်ခန္ဓာကိုသတ်နိုင်သူများထက် ယေဟောဝါကိုအဘယ်ကြောင့် ခန့်ညားကြောက်ရွံ့သင့်သနည်း။

^၁၅ မဿဲ ၁၀:၂၈ ၌ကျွန်ုပ်တို့အား ယေရှုဤသို့သတိပေးဆုံးမထားသည်။ “ကိုယ်ခန္ဓာကိုသာသတ်၍ စိတ်ဝိညာဉ် [စိုးလ်] ကိုမသတ်နိုင်သော သူတို့ကိုမကြောက်ကြနှင့်။ ကိုယ်ခန္ဓာနှင့် စိတ်ဝိညာဉ် [စိုးလ်] ကို [ဂေဟင်္နာ] ၌ဖျက်ဆီးနိုင်သောသူကို သာ၍ကြောက်ကြလော့။” ယေဟောဝါကိုခန့်ညားကြောက်ရွံ့သူတစ်ဦးသည် ရန်သူအားဖြင့်အသတ်ခံရသည့်တိုင်အောင် ထိုသေခြင်းဝေဒနာမှာ ယာယီအခိုက်အတန့်မျှသာဖြစ်သည်။ (ဟောရှေ ၁၃:၁၄) ရှင်ပြန်ထမြောက်လာသည့်အခါ ထိုသူသည် “အိုသေမင်း၊ သင်၏အောင်မြင်ခြင်း၊ အိုသေမင်း၊ သင်၏အစွယ်သည် အဘယ်မှာနည်း” ဟူ၍ပြောနိုင်ပေလိမ့်မည်။—၁ ကောရိန္သု ၁၅:၅၅၊ သမ။

၁၆။ ယေရှုသည် ယေဟောဝါကို ခန့်ညား၍ ချီးမွမ်းကြောင်း မည်သို့ပြသတော်မူခဲ့သနည်း။

^၁၆ ယေဟောဝါ၏ဖြောင့်မတ်ခြင်းတရားကိုချစ်၍ ဒုစရိုက်ကိုမုန်းသူအပေါင်းအတွက် ယေရှုကိုယ်တော်တိုင်က အထူးကောင်းမွန်သောစံနမူနာပြသတော်မူ၏။ ယောဟန် ၁၆:၃၃ ၌တွေ့ရသည့်အတိုင်း တပည့်တော်များအား နောက်ဆုံးမှာကြားခဲ့သည့်သြဝါဒစကား၌ ယေဟောဝါကိုခန့်ညားသည့်သဘော ထင်ဟပ်လျက်ရှိသည်။ “သင်တို့သည် ငါ့ကိုအမှီပြု၍ ငြိမ်သက်ခြင်းရှိစေခြင်းငှာ ဤစကားကိုငါဟောပြောပြီ။ သင်တို့သည် လောက၌ဆင်းရဲဒုက္ခကိုခံကြရလိမ့်မည်။ သို့သော်လည်း မစိုးရိမ်ကြနှင့်။ ငါသည် လောကကိုအောင်ပြီ။” ယောဟန်၏မှတ်တမ်း၌ ဤသို့ဆက်လက်ဖော်ပြထားသည်။ “ထိုသို့မိန့်တော်မူပြီးမှ ယေရှုသည် ကောင်းကင်သို့ကြည့်မျှော်၍ ‘အိုအဘ၊ အကျွန်ုပ်အချိန်ရောက်ပါပြီ။ . . . သားတော်သည် ကိုယ်တော်၏ဘုန်းကို ထင်ရှားစေပါမည်အကြောင်း သားတော်၏ဘုန်းကိုထင်ရှားစေတော်မူပါ။ . . . ဤလောကထဲမှယူ၍ အကျွန်ုပ်၌အပ်ပေးတော်မူသောသူတို့အား အကျွန်ုပ်သည် ကိုယ်တော်၏နာမကို ပြပါပြီ။”—ယောဟန် ၁၇:၁-၆။

ယေဟောဝါကိုခန့်ညား၍ ချီးမွမ်းကြလော့

၁၇။ အဘယ်နည်းများဖြင့် ယေရှု၏စံနမူနာကို ကျွန်ုပ်တို့အတုယူနိုင်ကြသနည်း။

^၁၇ ယေရှု၏ရဲရင့်သောစံနမူနာကို ယနေ့ကျွန်ုပ်တို့အတုယူနိုင်သလော။ ယေဟောဝါကိုခန့်ညားခြင်းဖြင့် ကျွန်ုပ်တို့မုချအတုယူနိုင်ပါသည်။ ယေရှုသည် ယေဟောဝါ၏ထင်ရှားကျော်ကြားသောနာမတော်နှင့် ဂုဏ်ရည်တော်များကို ကျွန်ုပ်တို့အား ပြသခဲ့ပြီးဖြစ်သည်။ ယေဟောဝါကို ကျွန်ုပ်တို့၏ အုပ်စိုးပိုင်သရှင်သခင်အဖြစ် ခန့်ညားလျက် ကျွန်ုပ်တို့သည် ခရစ်ယာန်ဘောင်၏ အမည်နာမမဲ့သော နက်နဲသည့်သုံးပါးပေါင်းတစ်ဆူဘုရား အပါအဝင် ရှိရှိသမျှဘုရားများထက် ကိုယ်တော်ကို ချီးမွမ်းကြသည်။ ယေရှုသည် ပုထုဇဉ်လူသားကို ကြောက်ရွံ့ခြင်းကျော့ကွင်း၌ အမိမခံဘဲ ကျန်းခံ့သောခန့်ညားခြင်းနှင့် ယေဟောဝါအား ဝတ်ပြုတော်မူခဲ့သည်။ “ခရစ်တော်သည် လူ့ခန္ဓာ၌ရှိနေစဉ်၊ သေခြင်းမှ ကယ်တင်နိုင်သော အရှင့်ထံ ပြင်းစွာငိုကြွေးဟစ်ခေါ်လျက် တောင်းလျှောက်ခြင်း၊ အသနားတော်ခံခြင်းများကို ပြုပြီးနောက်ဘုရားတရားကြည်ညို (ခန့်ညား] သည့်အတွက် မျက်နှာသာရတော်မူ၏။” ယေရှုနည်းတူ ကျွန်ုပ်တို့လည်း ခံရသောဆင်းရဲဒုက္ခများအားဖြင့် နာခံခြင်းကို ဆက်လက်သင်ယူသွားရာတွင် ယေဟောဝါကို ခန့်ညားနိုင်ကြပါစေ။ ထာဝရကယ်တင်ခြင်းကို ပန်းတိုင်အဖြစ် အမြဲထားနိုင်ကြပါစေ။—ဟေဗြဲ ၅:၇-၉၊ သမ။

၁၈။ ဘုရားတရားကြည်ညိုခန့်ညားခြင်းသဘောနှင့် ဘုရားဝတ်ကို ကျွန်ုပ်တို့မည်သို့ပြသတော်မူခဲ့သနည်း။

^၁၈ ဟေဗြဲခရစ်ယာန်များထံပေးပို့သည့် ထိုစာ၏နောက်ပိုင်းတွင် ဘိသိက်ခံခရစ်ယာန်များအား ပေါလုက ဤသို့တိုက်တွန်းနှိုးဆော်ထားသည်။ “ငါတို့သည် မလှုပ်နိုင်သော နိုင်ငံကိုရသည်ဖြစ်၍ ခန့်ညားကြောက်ရွံ့သောသဘောနှင့် ဘုရားသခင်ကို လျောက်ပတ်စွာ ဝတ်ပြုနိုင်မည်အကြောင်း ကျေးဇူးတော်ကို စွဲလမ်းကြကုန်အံ့။” ယနေ့ “လူအုပ်ကြီး” သည်လည်း ထိုဘုရားဝတ်၌ ပါဝင်လာကြသည်။ ထိုဘုရားဝတ်၌ မည်သည့်အရာများ ပါဝင်သနည်း။ သားတော်ယေရှုခရစ်တော်အားဖြင့် ပူဇော်သက္ကာပြင်ဆင်ပေးရာတွင် ယေဟောဝါပြသတော်မူသည့် မေတ္တာကရုဏာတော်အကြောင်း ဆွေးနွေးတင်ပြပြီးနောက် ပေါလုက ဤသို့ဆို၏။ “ထိုအရှင်အားဖြင့် ငါတို့သည် နာမတော်ကိုဝန်ခံသော နှုတ်ခမ်းအသီးတည်းဟူသော ချီးမွမ်းခြင်းယဇ်ကို ဘုရားသခင်အား အစဉ်ဆက်ကပ်ပူဇော်ကြကုန်အံ့။” (ဟေဗြဲ ၁၂:၂၈။ ၁၃:၁၂၊ ၁၅၊ သမ္မ ) ယေဟောဝါ၏ မခံစားထိုက်သော ကရုဏာတော်ကို လေးမြတ်သောအားဖြင့် ကျွန်ုပ်တို့သည် ရနိုင်သမျှအချိန်တိုင်းကို ဘုရားဝတ်အတွက် ဆက်ကပ်လိုကြသည်။ ဘိသိက်ခံခရစ်ယာန်အကြွင်းအကျန်တို့၏ သစ္စာစောင့်သိသောအပေါင်းအဖော်များအနေနှင့် ယနေ့လူအုပ်ကြီးသည် ထိုအမှုတော်၏အဓိကအပိုင်းများစွာကို အောင်မြင်စွာထမ်းဆောင်နေကြသည်။ ဤသူတို့သည် တင်စားသည့်အနေနှင့် ဘုရားသခင်၏ပလ္လင်တော်ရှေ့၌ရပ်လျက် “ဘုရားဝတ်ကို နေ့ညမပြတ်ပြု” လျက်နေကြစဉ် ဘုရားသခင်နှင့်ခရစ်တော်တို့သည် ကယ်တင်ခြင်းကျေးဇူးရှိကြောင်း ဝန်ခံကြ၏။—ဗျာဒိတ် ၇:၉၊ ၁၀၊ ၁၅။

ယေဟောဝါကို ထာဝစဉ်ချီးမွမ်းခြင်း

၁၉၊ ၂၀။ “ယေဟောဝါ၏နေ့ရက်” အတွင်း အဘယ်ကြောက်ရွံ့ခြင်းနှစ်မျိုး ထင်ရှားလာမည်နည်း။

^၁၉ ယေဟောဝါမှန်ကန်ကြောင်းထင်ရှားမည့် ဂုဏ်ကျက်သရေပြည့်စုံသောနေ့ရက်သည် လျင်မြန်စွာကပ်လာလျက်ရှိသည်။ “မီးဖို၌ မီးလောင်သကဲ့သို့ လောင်သောနေ့ရက်ကာလသည် ရောက်လိမ့်မည်။ မာနကြီးသောသူနှင့် ဒုစရိုက်ကိုပြုသောသူအပေါင်းတို့သည် အမှိုက်ခြောက်ဖြစ်ကြလိမ့်မည်။ သူတို့အရင်းအဖျားမျှ မကျန်ကြွင်းစေခြင်းငှာ ထိုနေ့ရက်သည် လောင်လိမ့်မည်ဟု ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏။” ဘေးဒုက္ခကျရောက်သည့် ထိုကာလသည် ‘ယေဟောဝါ၏ကြောက်မက်ဖွယ်သောနေ့ရက်ကြီး’ ပင်ဖြစ်သည်။ (မာလခိ ၄:၁၊ ၅) ထိုနေ့ရက်သည် ဆိုးယုတ်သူတို့၏ စိတ်နှလုံးထဲ၌ ‘ကြောက်လန့်ခြင်း’ ဖြစ်ပေါ်စေမည်ဖြစ်ပြီး သူတို့အတွက် “လွတ်ခြင်းအခွင့်” ရှိမည်မဟုတ်ပေ။—ယေရမိ ၈:၁၅။ ၁ သက်သာလောနိတ် ၅:၃။

^၂၀ သို့သော်ယေဟောဝါ၏လူမျိုးတော်မူကား ကွဲပြားသည့်ကြောက်ရွံ့ခြင်းတစ်မျိုး၏ လှုံ့ဆော်ခြင်းခံကြရသည်။ “ထာဝရသတင်းကောင်း” အပ်နှံခြင်းခံရသော ကောင်းကင်တမန်က “တရားစီရင်တော်မူသောအချိန် ရောက်လာပြီဖြစ်၍ ဘုရားသခင်ကိုခန့်ညား၍ ဘုန်းတော်ကိုချီးမွမ်းကြလော့” ဟုကျယ်သောအသံနှင့် ကြွေးကြော်လျက် ထိုသူတို့ကိုစုစည်းခဲ့သည်။ (ဗျာဒိတ် ၁၄:၆၊၇၊ ကဘ) စာတန့်လောကကို အာမဂေဒုန်၏ ပူပြင်းသည့်အပူရှိန်က လောင်မြိုက်ပစ်သည့်အခါ ကျွန်ုပ်တို့သည် ထိုတရားစီရင်ခြင်းကိုကြည့်၍ အံ့သြမိန်းမောလျက်နေကြပေမည်။ ကောင်းကျိုးပြုသောနည်းဖြင့် ယေဟောဝါကိုခန့်ညားခြင်းသည် ကျွန်ုပ်တို့၏နှလုံးသားပေါ်တွင် ဖျောက်ဖျက်၍မရနိုင်အောင် အက္ခရာတင်ရစ်နေပေမည်။ ‘ယေဟောဝါ၏နာမတော်ကို ပတ္ထနာပြုသောကယ်တင်ခံရသူတို့’ တွင်ကျွန်ုပ်တို့လည်း ပါဝင်ခွင့်ရနိုင်ကြပါစေ။—ယောလ ၂:၃၁၊ ၃၂။ ရောမ ၁၀:၁၃။

၂၁။ ယေဟောဝါကိုခန့်ညားခြင်းက အဘယ်ကောင်းချီးများကို ရရှိစေမည်နည်း။

^၂၁ အစဉ်ထာဝရတည်သွားမည့် “အသက်နှစ်ပေါင်းကာလ” အပါအဝင် အံ့ချီးဖွယ်ကောင်းချီးမင်္ဂလာများ ရွာသွန်းဖြိုးလိမ့်မည်။ (သု၊ ၉:၁၁။ ဆာလံ ၃၇:၉-၁၁၊ ၂၉) သို့ဖြစ်သောကြောင့် ကျွန်ုပ်တို့၏မျှော်လင့်ချက်သည် ဘုရားသခင့်နိုင်ငံတော်အမွေခံရသည်ဖြစ်စေ၊ ဘုရားသခင့်နိုင်ငံတော်၏ နယ်ပယ်ဖြစ်သော မြေကြီးပေါ်တွင် အမှုတော်ဆောင်ရသည်ဖြစ်စေ ဘုရားရေးရာကြည်ညိုခန့်ညား စိုးရွံ့ခြင်းသဘောနှင့် ဘုရားဝတ်ကိုယခုမှစ၍ စဉ်ဆက်မပြတ် ပြုသွားကြပါစို့။ ကိုယ်တော်၏ သန့်ရှင်းသော နာမတော်ကို ဆက်လက်ချီးမွမ်းသွားကြပါစို့။ အဘယ်ကောင်းမြတ်သောအကျိုးကျေးဇူး ရရှိမည်နည်း။ ယေဟောဝါကို အစဉ်ခန့်ညားကြပါ ဟူသောပညာရှိသြဝါဒကို နှလုံးသွင်းခြင်းအတွက် ကျေးဇူးတော်ကို ထာဝစဉ်သိတတ်ခြင်းပင်ဖြစ်သတည်း။

သင်မည်သို့ဖြေမည်နည်း

▫ “ယေဟောဝါကိုခန့်ညားခြင်း” ကားမည်သည့်အဓိပ္ပာယ်ရှိသနည်း။

▫ ဘုရားသခင်ကိုခန့်ညားခြင်းသည် ကိုယ်တော်၏ရှေးလူမျိုးတော်ကို မည်သို့အကျိုးပြုခဲ့သနည်း။

▫ ကျွန်ုပ်တို့အဖို့ ဘုရားတရားကြည်ညိုခန့်ညားခြင်းဆိုင်ရာ အဘယ်စံနမူနာကို ယေရှုထားတော်မူခဲ့သနည်း။

▫ ယေဟောဝါကိုခန့်ညားလျက် ကျွန်ုပ်တို့မည်သို့သမာဓိစောင့်သိနိုင်မည်နည်း။

[စာမျက်နှာ ၂၀ ပါ ရုပ်ပုံ]

ဗျာဒိတ်ကျမ်းစောင်၌ ယေရှု၏ညီတော်များသည် “မောရှေ၏သီချင်း” တည်းဟူသော ယေဟောဝါကိုချီးမွမ်းသည့်သီချင်းကို သီဆိုနေကြကြောင်းတွေ့ရသည်

[စာမျက်နှာ ၂၀ ပါ ရုပ်ပုံ]ယောရှဖတ်၏တပ်သည် ယေဟောဝါကိုခန့်ညားခြင်းအားဖြင့် အောင်ပွဲခံကြသည်

[စာမျက်နှာ ၂၀ ပါ ရုပ်ပုံ]အစဉ်ထာဝရတည်သွားမည့်အသက် နှစ်ပေါင်းကာလသည် ယေဟောဝါကိုခန့်ညားသူတို့ရရှိမည့်ဆုလာဘ်ဖြစ်လတ္တံ့