ကတိထားရာပြည်မှမြင်ကွင်းများ

သိနာအရပ်၌ ဣသရေလလူမျိုးကို ကိုယ်တော်ထောက်ပံ့

စဉ်းစားကြည့်ပါ။ ယောက်ျား၊ မိန်းမ၊ ကလေးသူငယ်များပါဝင်သည့် သန်းပေါင်းများစွာသောသူတို့သည် “မီးမြွေ၊ ကင်းမြီးကောက်များ၍ ရေမရှိ၊ ရေငတ်ခံရာအရပ်၊ ကြောက်မက်ဖွယ်သောတောကြီးအလယ်” သို့ပို့ဆောင်ခံနေရသည်။

တရားဟောရာ ၈:၁၅ ပါထိုစကားများသည် အီဂျစ်ပြည်မှထွက်လာ၍ သိနာတောအရပ်သို့ချီတက်ကြစဉ် ဣသရေလလူမျိုးရှေ့ရှိ ကြောက်မက်ဖွယ်ခရီးစဉ်ဖြစ်ဟန်တူသည့် လမ်းခရီးကို အာရုံပြုစေသည်။ စိုးရိမ်ဖွယ်ရာကြီးတစ်ခုမှာ-အစာရေစာအလုံအလောက်ရှိရန် မည်သူပြုစုပေးမည်နည်း။

နိုင်းလ်မြစ်တရိဂံနယ်မြေအရပ်တွင် ဣသရေလလူမျိုးသည် ကျွန်ဖြစ်ခဲ့သော်လည်း လိုလေသေးမရှိခဲ့ပါ။ သူတို့စားစရာဓာတ်စာစုံလင်သည့် စပျစ်သီး၊ ဖရဲသီးနှင့်အခြားသီးနှံများအပြင် ငါးနှင့်ကြက်တို့ကိုပါဖော်ပြထားသည့် ရှေးဟောင်းသင်္ချိုင်းဂူများရှိ နံရံပေါ်ရုပ်ပုံများ၌ တွေ့ရှိရ၏။ ထိုကြောင့်တောအရပ်၌ ဤသို့တောင်းတညည်းတွားခဲ့သည်ဟုဆိုခြင်းသည် မှန်ကန်လှသည်။ “ငါတို့စားစရာဖို့ အမဲသားကို အဘယ်သူပေးလိမ့်မည်နည်း။ အဲဂုတ္တုပြည်၌ အလိုအလျောက်စားရသော ငါးသား၊ သခွားသီး၊ ဖရဲသီး၊ ကြက်သွန်အနီ၊ အဖြူ၊ အရိုင်းအမျိုးမျိုးတို့ကို အောက်မေ့၏။”—တောလည်ရာ ၁၁:၄၊ ၅။ ၂၀:၅။

ပင်လယ်နီကို ဣသရေလလူမျိုး ဖြတ်သန်းသွားပြီးနောက် သိနာအရပ်သည် မည်သို့မည်ပုံရှိကြောင်းကို များမကြာမီအချိန်တွင် သဘောပေါက်ကြလေသည်။ ကုန်သည်များအသုံးပြုကြသည့် မြောက်ဘက်ခရီးစဉ်အတိုင်းမသွားကြဘဲ တရိဂံပုံရှိကျွန်းဆွယ်၏ ထိပ်ဖျားသို့ ဦးတည်သွားကြသည်။ တောအရပ်အတွင်း မိုင် ၅၀ ခန့်ရောက်လာသည့်အခါ ရေရှားပါးမှုနှင့် ကြုံရကြသည်။ တွေ့ကရာရေကို သူတို့သောက်၍လည်းမရ။ အကြောင်းမှာ ရေ၏အရသာသည် ခါးသည့်အပြင် ရောဂါပိုးများလည်း ပါကောင်းပါမည်ဟု စိုးရိမ်ရ၏။ ထိုအခါ “အဘယ်သို့သောက်ရပါမည်နည်း” ဟုမြည်တမ်းကြသည်။ သို့ဖြစ်၍ဘုရားသခင်ကူညီမစတော်မူပြီး ရေကိုချိုမြိန်စေသည်။—ထွက်မြောက်ရာ ၁၅:၂၂-၂၅။

အထက်ပါရှုခင်းတွင် ကုလားအုတ်များစီတန်းသွားနေပုံကို ကြည့်ပါ။ သိနာတောင်အရပ်သို့ တောတောင်များကိုဖြတ်ကျော်ကာ ဣသရေလလူမျိုး ခရီးဆက်ရမည့်ပြဿနာကို သဘောပေါက်နိုင်လိမ့်မည်။ သိုးနွားတိရစ္ဆာန်များအပြင် မိမိတို့အသက်ရှင်နိုင်ရန်အစာရေစာအလုံအလောက် မည်သို့ရရှိနိုင်ကြမည်နည်း။—ထွက်မြောက်ရာ ၁၂:၃၈။

တောင်ဘက်ဆက်သွားကြလေသော် များမကြာမီပင် ဧလိမ်ရွာ၌ အစာရေစာဝစွာစားသုံးရကြလေသည်။ (ထွက်မြောက်ရာ ၁၅:၂၇) သို့သော် သူတို့ခရီးလမ်းဆုံးသို့ မရောက်သေးပါ။ “ဘုရားသခင်၏တောင်တော်” သိနာတောင်သို့ သူတို့ဦးတည်နေကြသည်။ (ထွက်မြောက်ရာ ၃:၁။ ၁၈:၅။ ၁၉:၂။ ၂၄:၁၂-၁၈) ကြမ်းတမ်း၍ရေခေါင်သော ၇၅ မိုင်ခရီးစဉ်ကို ဆက်သွားရကြဦးမည်ဖြစ်သည်။

ဤလူအုပ်သည် သိနာတောင်အရပ်သို့သွားစဉ် ဖာရန်အမည်ရှိ စိမ်းလန်းသော အိုအေစစ်အနီးရောက်ခဲ့မည်ဖြစ်၍ ထိုတွင်ခေတ္တရပ်နားကြမည်အမှန်။ မျက်နှာချင်းဆိုင် စာမျက်နှာပါ ရုပ်ပုံတွင် ထိုအိုအေစစ်ပုံ တစ်ပိုင်းပေါ်နေသည်။aပင်လယ်နီ (စူးအက်ဇ်ပင်လယ်ကွေ့) ဘက်ရှိ တောတောင်အရပ် တောင်ကြားတစ်ခုတစ်လျှောက် တည်ရှိသည်။ ထိုအရပ်တွင် အားပြည့်လန်းဆန်းလာကြမည်အမှန်။

သိနာတောအရပ်သည် “ကြောက်မက်ဖွယ်သောတောကြီး” ပုံသဏ္ဌာန် အများအားဖြင့်ဖြစ်မည်မှန်သော်လည်း ဖာရန်အိုအေစစ်အရပ်၌မူကား ဣသရေလလူမျိုးသည် ခန့်ညားသောစွန်ပလွံပင်များနှင့် အခြားအပင်များအရိပ်ခိုခဲ့မည်။ ထိုအရပ်၌ ချိုမြိန်သောစွန်ပလွံသီးများ ဆွတ်ခူးစားသုံးကြမည့်အပြင် များစွာလည်း သယ်ဆောင်သွားကြလိမ့်မည်။

ဤသို့တွေ့ရှိရခြင်းမှာ မြေအောက်ရေသည် ဖာရန်အရပ်တွင် မြေမျက်နှာပြင်ကို စိုပြေစေသောကြောင့်ဖြစ်သည်။ အသင်သည် သဲကန္တရတောအရပ်တွင်ရှိနေ၍ ရုတ်တရက် သောက်ဖို့ရန်လတ်ဆတ်သောရေရသည့်အခါ မည်မျှဝမ်းသာလိုက်မည်နည်း။ သိနာကဲ့သို့သောအရပ်မျိုးတွင်ပင် ရေရရှိနိုင်ကြောင်း ယင်းအဖြစ်အပျက်က တင်ပြပါသည်။ တစ်ခါတစ်ရံ ရေတွင်းနက်နက်တူးရ၏။ ဤရေတွင်းမျိုး၌ သိုးနွားတိရစ္ဆာန်တို့အတွက် ရေခပ်ပေးဖို့ရန် အတော်ပင်ပန်းခံရလိမ့်မည်။ ယနေ့ထိတိုင်အောင် သိနာအရပ်၌ လှည့်လည်နေသော အာရပ်လူမျိုးသည် မိမိတို့နှင့်ကုလားအုတ်များအတွက် ရေရရန် ဤရေတွင်းများရှိရာသို့ သွားလာနေထိုင်ကြသည်။—ကမ္ဘာဦး ၂၄:၁၁-၂၀၊ ၂၆:၁၈-၂၂နှိုင်းယှဉ်။

မှန်သည်။ အစာရေစာခေါင်းပါးလှသည်ဟု အထင်ရှိသောအချိန်အခါမျိုးတွင် သူတို့မြည်တမ်းညည်းညူခဲ့ကြသော်လည်း ဣသရေလလူမျိုးသည် စားစရာမပြတ်ခဲ့ပါ။ တစ်ခါတစ်ရံ အံ့ဖွယ်နည်းဖြင့် ဘုရားသခင်ကျွေးမွေးတော်မူသည်။ (ထွက်မြောက်ရာ ၁၆:၁၁-၁၈၊ ၃၁။ ၁၇:၂-၆) အခြားအချိန်အခါများတွင်မူ “စခန်းချရာအရပ်” သို့ကိုယ်တော်ပို့ဆောင်ပေးခဲ့ရာ ထိုတွင်စားနပ်ရိက္ခာများကို ကျေနပ်သည်တိုင် ဖြည့်ဆည်းပေးနိုင်ကြသည်။ (တောလည်ရာ ၁၀:၃၃-၃၆) ကတိထားရာနယ်မြေတွင် သစ္စာတည်ကြည်သူများအတွက် အလျှံပယ်ရမည်အကြောင်းကို ခရီးစဉ်တစ်လျှောက်လုံး ဘုရားသခင်သိနားလည်စေတော်မူခဲ့သည်။—တရားဟောရာ ၁၁:၁၀-၁၅။

[အောက်ခြေမှတ်ချက်များ]

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24]

Pictorial Archive (Near Eastern History) Est.

[Picture Credit Line on page 24, 25]

Pictorial Archive (Near Eastern History) Est.

[Picture Credit Line on page 25]

Pictorial Archive (Near Eastern History) Est.