စာရှုသူများထံမှမေးခွန်းလွှာ

လူတစ်ဦးသည် မိန်းမပျိုတစ်ဦးအား လိမ္မာပါးနပ်စွာသွေးဆောင်သည့်နည်းကို “အလွန်အံ့သြဖွယ်” ဖြစ်သည်ဟု သု၊ ၃၀:၁၉ ကိုရေးသားသူကယူမှတ်ခဲ့သလော။

ယင်းသည် ဤနားလည်ရန်မလွယ်ကူသော သု၊ ၃၀:၁၉ ၏ဖြစ်နိုင်ခြေရှိသည့်အဓိပ္ပာယ်ဖြစ်သည်။

ဤကျမ်းပိုဒ်၏ဆိုလိုရင်းကိုရှာဖွေကြည့်ရာတွင် အထက်အောက်စကားများကို ကျွန်ုပ်တို့လျစ်လျူမရှုသင့်ပေ။ ဤအခန်းငယ်မတိုင်မီကလေးတွင် မှုတ်သွင်းခံကျမ်းရေးသူသည် အလိုဆန္ဒမပြေနိုင်သောအရာလေးခုကို ဖော်ပြထားသည်။ (သု၊ ၃၀:၁၅၊ ၁၆) ထိုနောက်ဤအကြောင်းအရာများကို ဆက်၍ဖော်ပြထားသည်။ “ငါ့ဉာဏ်မမီနိုင် [အလွန်အံ့သြဖွယ်၊ ကဘ] သောအရာသုံးပါးမက ငါမသိနားမလည်နိုင်သောအရာလေးပါးဟူမူကား လေ၌ရွှေလင်းတသွားရာလမ်းတစ်ပါး၊ ကျောက်ပေါ်မှာမြွေသွားရာလမ်းတစ်ပါး၊ ပင်လယ်အလယ်၌သင်္ဘောသွားရာလမ်းတစ်ပါး၊ အပျိုမနှင့်ယောက်ျားသွားရာလမ်းတစ်ပါးတည်း။”—သု၊ ၃၀:၁၈၊ ၁၉။

ဤအရာလေးမျိုးသည် မည်ကဲ့သို့ “အံ့သြဖွယ်” ဖြစ်နိုင်သနည်း။

“အံ့သြဖွယ်” သောခံစားချက်သည် အကောင်းသဘောဘက်မှနေ၍ အဓိပ္ပာယ်သက်ရောက်ခြင်းဖြစ်နိုင်သည်ဟုယူဆပေမည်။ အချို့ကျမ်းပညာရှင်များက ထိုအရာတစ်ခုစီသည် ဘုရားသခင်၏ဖန်ဆင်းခြင်းဆိုင်ရာဉာဏ်ပညာတော်ကို ဖော်ကျူးသည်ဟုဆိုကြသည်။ ကြီးမားသောငှက်တစ်ကောင်မည်သို့ပျံသန်းနိုင်ကြောင်း၊ ခြေမရှိသောမြွေသည် ကျောက်ပေါ်တွင်မည်သို့ရွေ့ရှားနိုင်ကြောင်း၊ လေးလံသည့်သင်္ဘောသည် လှိုင်းလေထန်သည့်ပင်လယ်တွင် မည်သို့ပေါ်နေနိုင်ကြောင်း၊ ကျန်းမာသန်စွမ်းသည့်လူငယ်သည် မည်သည့်နည်းဖြင့် သဘောကောင်းသည့်မိန်းမပျိုတစ်ဦးအား မတားဆီးနိုင်လောက်အောင်ချစ်ကျွမ်းဝင်သွားပြီး သူမကိုလက်ထပ်ကာ အံ့ဖွယ်ကောင်းသည့်လူသားကလေးများကိုထုတ်လုပ်နိုင်ကြောင်း စသည့်အံ့ဖွယ်ရာများပင်ဖြစ်သည်။ ပါမောက္ခတစ်ဦးက ထိုအရာလေးမျိုးကို အခြားဆင်တူသည့်နည်းတစ်နည်းဖြင့်ရှုမြင်သည်။ လင်းယုန်၊ မြွေ၊ သင်္ဘောတို့သွားလာခြင်းသည် သွားလမ်းမထင်ဘဲအသစ်အသစ်ဖြစ်သကဲ့သို့ လူမောင်နှံတို့၏ချစ်ခြင်းမေတ္တာပေါက်ဖွားလာခြင်းတို့သည် အမြဲသစ်လွင်နေကြောင်းပင်ဖြစ်သည်။

သို့သော် အရာလေးမျိုးသည် အကောင်းသဘောဘက်မှနေ၍ပင် “အံ့သြဖွယ်” ဟုယူမှတ်ရန်မလိုပါ။ ယင်းတို့သည် ဖြစ်ရိုးဖြစ်စဉ်အရာများသာဖြစ်ကြသည်။ သု၊ ၆:၁၆-၁၉ တွင် “ယေဟောဝါမုန်းသောအရာ” များကိုဖော်ပြထားသည်။ မေးခွန်းတွင်ပါသောအခန်းငယ်များမတိုင်မီကလေးတွင် သု၊ ၃၀:၁၅၊ ၁၆ က “တော်ပြီ” ဟုမည်သည့်အခါမျှမပြောသောအရာများ (သင်္ချိုင်း၊ မြုံသောမိန်းမဝမ်း၊ ရေမဝနိုင်သောမြေ နှင့် မီး) ကို ဖော်ပြထားသည်။ ယင်းတို့သည် အံ့သြလောက်အောင်ကောင်းသည့်အရာများမဟုတ်ကြပါ။

သု၊ ၃၀:၁၈ တွင် “အံ့သြဖွယ်ကောင်းသော” ဟုဖော်ပြထားသောဟေဗြဲစကားလုံး၏အဓိပ္ပာယ်မှာ “သီးခြားဖြစ်စေရန်၊ ခွဲခြားရန်၊ ကွဲကွဲပြားပြားဖြစ်စေရန်၊ သာမန်ထက်ထူးကဲသော၊ အံ့သြဖွယ်ကောင်းသော” စသည်တို့ဖြစ်သည်။ အရာတစ်ခုသည် မကောင်းဘဲလျက်ပင် ခွဲခြားဖော်ပြနိုင်၊ သာမန်ထက်ထူးကဲနိုင် သို့မဟုတ် အံ့ဖွယ်ကောင်းနိုင်သည်။ ဒံယေလ ၈:၂၃၊ ၂၄ တွင် ခက်ထန်သောမင်းတစ်ပါးသည် “အံ့သြဖွယ်နည်းအားဖြင့်” ဖျက်ဆီးခြင်းကိုပြုပြီး “စွမ်းအားကြီးသောလူစု၊ သန့်ရှင်းသောလူစုကိုပင် ဖျက်ဆီးလိမ့်မည်” ဟုကြိုတင်ဖော်ပြထားခဲ့သည်။—တရားဟောရာ ၁၇:၈။ ၂၈:၅၉။ ဇာခရိ ၈:၆ နှိုင်းယှဉ်။

သု၊ ၃၀:၁၈၊ ၁၉ နှင့်ဆက်လျက်အခန်းငယ်က စာရေးသူနားလည်ရန်ခက်ခဲသည့်အချက်ကို သဲလွန်စပေးထားသည်။ “အစာစားပြီးမှ မိမိပါးစပ်ကိုသုတ်၍ ‘ဒုစရိုက်မှုကိုငါမပြုမိဟုဆိုတတ်၏’” ဟုဆိုသော မျောက်မထားသည့်မိန်းမအကြောင်းကို အခန်းငယ် ၂၀ တွင်ဖော်ပြထားသည်။ သူမသည် လျှို့ဝှက်စွာနှင့်ပရိယာယ်ကြွယ်ဝစွာဖြင့် အပြစ်ပြုခဲ့ခြင်းဖြစ်နိုင်သည်။ သို့ရာတွင် သူမ၏အပြစ်များသည် ခြေရာလက်ရာမပေါ်သဖြင့် သူမသည်မိမိအပြစ်မရှိကြောင်း ပြောနိုင်ခြင်းဖြစ်သည်။

ယင်းအခန်းငယ်မတိုင်မီအချက်သည်လည်း အလားတူပင်ဖြစ်နိုင်သည်။ ကောင်းကင်တွင်ပျံဝဲနေသောလင်းယုန်ငှက်၊ ကျောက်ပေါ်မှာဖြတ်သွားသောမြွေ၊ လှိုင်းများကိုကျော်ဖြတ်သွားသောသင်္ဘောတို့သည် အရာထင်ကျန်ခဲ့ခြင်းမရှိဘဲ ယင်းတို့၏သွားရာလမ်းကိုလိုက်၍ဖော်ထုတ်ရန် အလွန်ခက်ခဲလှသည်။ ယင်းတို့သည် အရာသုံးမျိုး၏ဖြစ်ရိုးဖြစ်စဉ်များဖြစ်ကြလျှင် “အပျိုမနှင့်ယောက်ျားသွားရာလမ်း” ဖြစ်သောလေးခုမြောက်အရာကားမည်သို့နည်း။

ယင်းသည်လည်း လိုက်၍မဖော်ထုတ်နိုင်သောအရာဖြစ်သည်။ လူငယ်သည် အပြစ်ကင်းစင်သည့်မိန်းမပျို၏စွဲလမ်းတွယ်တာမှုထဲသို့လျှိုဝင်နိုင်ရန် ကောက်ကျစ်စဉ်းလဲခြင်း၊ အပေါယံချောမွေ့ပြေပြစ်ခြင်းနှင့် လိမ္မာပါးနပ်သောနည်းများကို အသုံးပြုပေမည်။ အတွေ့အကြုံမရှိသောကြောင့် သူ၏လှည့်ဖြားမှုများကို သူမရိပ်မိမည်မဟုတ်ပေ။ သူမသည် လှည့်ဖြားခံရပြီးနောက်ပိုင်း၌ပင် မိမိအားသူမည်သို့ရယူအောင်နိုင်ကြောင်းကို မပြောပြတတ်လောက်အောင်ပင်ဖြစ်မည်။ ရှုမြင်နေသူများသည်လည်း ယင်းကိုရှင်းပြတတ်ရန်ခက်ခဲပေလိမ့်မည်။ မိန်းမငယ်များစွာတို့သည် ပရိယာယ်ကြွယ်ဝသောလှည့်ဖြားသူများအားဖြင့် အပျိုရည်ပျက်ပြားညှိုးနွမ်းကြရသည်။ ထိုကဲ့သို့သောသစ္စာမရှိသည့်လူမျိုးတို့သွားရာလမ်းကို ခြေရာခံမိရန်မလွယ်ကူချေ။ သို့သော် သူတို့သည် ပျံသန်းနေသောလင်းယုန်ငှက်၊ တွားသွားနေသောမြွေ၊ ပင်လယ်ထဲရှိသင်္ဘောများကဲ့သို့ ပန်းတိုင်ရှိကြသည်။ သွေးဆောင်သူများ၏ရည်မှန်းချက်မှာ လိင်မှုကိစ္စတွင်မတရားအမြတ်ထုတ်ရန်ပင်ဖြစ်သည်။

ဤသို့အားဖြင့် သု၊ ၃၀:၁၈၊ ၁၉ ပါအချက်သည် ဖန်ဆင်းခြင်းဆိုင်ရာ သိပ္ပံ သို့မဟုတ် စက်မှုနှင့်ဆိုင်သောအရာများကို ဖော်ပြနေခြင်းမဟုတ်ပါ။ ယင်းအစား သု၊ ၇:၁-၂၇ တွင် သွေးဆောင်တတ်သည့်ပြည်တန်ဆာမ၏အန္တရာယ်ကို ရှောင်ရှားရန်သတိပေးချက်ကဲ့သို့ပင် ဤအပိုဒ်ပါအကြောင်းများသည် စာရိတ္တပိုင်းဆိုင်ရာများကို ကျွန်ုပ်တို့အားသတိပေးနေခြင်းဖြစ်သည်။ သု၊ ၃၀:၁၈၊ ၁၉ ကိုခရစ်ယာန်ညီအစ်မများနှလုံးသွင်းနိုင်သည့်နည်းတစ်နည်းမှာ ကျမ်းစာကိုစိတ်ဝင်စားပါသည်ဟုဆိုသောယောက်ျားများကို သတိပြုရန်ပင်ဖြစ်သည်။ ရည်မွန်ဖော်ရွေသောသူ၊ မိမိ၏လုပ်ဖော်ဆောင်ဖက်ပင်ဖြစ်ပါစေ ထိုသို့စိတ်ဝင်စားမှုရှိဟန်ပြပါက ညီအစ်မတစ်ဦးသည် အသင်းတော်ရှိညီအစ်ကိုတစ်ဦးဦးဖြင့် ဆက်သွယ်ပေးသင့်သည်။ ညီအစ်ကိုသည် “အပျိုမနှင့်ယောက်ျားသွားရာလမ်း” ၏အန္တရာယ်မရှိဘဲနှင့် စစ်မှန်သောစိတ်ဝင်စားသူ၏အလိုကို ဖြည့်စွက်ပေးနိုင်ပါသည်။