ဘုရားသခင့်နိုင်ငံတော်ကြွေးကြော်သူများမှတ်တမ်း

ကိုလံဘီယာတွင် ဝိညာဏလွတ်မြောက်မှု

စပိန်လူမျိုးစစ်အောင်ပွဲခံသူများအချိန်မှစ၍ တောင်အမေရိကတိုက်တွင် ကက်သလစ်ဘာသာကြီးစိုးခဲ့သည်။ ထိုဘာသာသည် နှစ်ပေါင်းများစွာ တရားဝင်နိုင်ငံတော်ဘာသာဖြစ်ခဲ့သည်။ လွန်ခဲ့သည့် ၁၀၅ နှစ်လုံးလုံး ဗာတီကန်သည် ချာ့ချ်ကိုကာကွယ်ရန်နှင့် ပညာရေးနှင့်အိမ်ထောင်မင်္ဂလာကဏ္ဍများတွင် အထူးအခွင့်အရေးများပေးရန် ကိုလံဘီယာအစိုးရနှင့် သဘောတူညီမှုရရှိခဲ့သည်။

၁၉၉၀ ဒီဇင်ဘာ၌ ကိုလံဘီယာနိုင်ငံသားများသည် ဖွဲ့စည်းပုံအခြေခံဥပဒေသစ်တစ်ခုကိုရေးဆွဲပေးရန် ကော်မရှင်အဖွဲ့တစ်ဖွဲ့ကို မဲရွေးတင်မြှောက်ဖွဲ့စည်းခဲ့ရာ ၁၉၉၁ အလယ်လောက်တွင် အထမြောက်သွားခဲ့သည်။ ဥပဒေသစ်သည် ကိုလံဘီယာရှိဘာသာရေးအခြေအနေကို ပြောင်းလဲပစ်လိုက်သည်။ ယခုအခါ ဘာသာရေးအားလုံးသည် ဥပဒေအရ သာတူညီမျှအခွင့်အရေးခံစားကြရပြီး ကျောင်းများတွင် ကလေးများအား ဘာသာရေးသွန်သင်မှုများကို အတင်းအကြပ်မပြုနိုင်တော့ပေ။ ဗာတီကန်နှင့်သဘောတူညီချက်သည် ပြောင်းလဲသွားသောဥပဒေနှင့်အညီ ပြန်လည်ပြင်ဆင်ရန်အချိန်ကျရောက်လာခဲ့သည်။

သာ၍ကြီးမားသော ဤဘာသာရေးဆိုင်ရာလွတ်မြောက်မှုသည် ကက်သလစ်ချာ့ချ်များ၏သြဇာလွှမ်းမိုးမှုကို လျှော့ပါးစေပြီး စိတ်ထားရိုးသားသူများအား ကျမ်းစာအသိပညာကိုရရှိစေ၍ ဝိညာဏလွတ်လပ်မှုကို ရရှိစေနိုင်သည်။

ဤဝိညာဏလွတ်မြောက်မှုကိုရည်မျှော်၍ နိုင်ငံအတွင်းရှိယေဟောဝါသက်သေ ၅၁,၀၀၀ တို့သည် ဝိညာဏဒုက္ခသည်များကိုစောင့်ရှောက်ရန် ကြိုတင်ပြင်ဆင်မှုများပြုလုပ်ခဲ့ကြသည်။ အမြန်ရိုက်ရောင်စုံအော့ဖ်စက်ပုံနှိပ်တိုက်အပါအဝင် ဌာနခွဲတိုးချဲ့အဆောက်အအုံသစ်များသည် ပြီးစီးလုပြီဖြစ်သည်။ ယေဟောဝါ၏ပျောက်သောသိုးများကိုရှာဖွေရန် မြို့ငယ်ကလေးများသို့ ယာယီအထူးရှေ့ဆောင်များစေလွှတ်ခဲ့ရာ ကျမ်းစာပညာပေးလုပ်ငန်းများ မယုံနိုင်လောက်အောင်ဖြစ်ထွန်းအောင်မြင်ခဲ့သည်။ လူဦးရေ ၁၀,၀၀၀ ခန့်စီရှိသောမြို့ ၆၃ မြို့တွင် အသင်းတော်နှင့်အုပ်စုသစ် ၄၇ ခုဖွဲ့စည်းနိုင်ခဲ့သည်။

ယေဟောဝါ၏ဝိညာဉ်တော်သည် စိတ်ထားရိုးသားသူများအား ဆက်၍လှုံ့ဆော်ရာ လူငယ်များစွာတို့လည်း တုံ့ပြန်ကြသည်။ Questions Young People Ask — Answers That Work စာအုပ်သည် လူငယ်များအတွက်ကော သူတို့၏မိဘများအတွက်ပါ တန်ဖိုးမဖြတ်နိုင်သည့်အကူအညီဖြစ်သည်။ သက်သေခံတစ်ဦးသည် တစ်အိမ်မှတစ်အိမ်သွားစဉ် လူတစ်ဦးသည် မိမိအိမ်နီးချင်းတစ်ဦးထံမှငှားထားသောထိုစာအုပ်ကို ဖတ်နေသည်ကိုတွေ့ရသည်။ မိသားစုပြဿနာများနှင့်ပတ်သက်၍ ဆွေးနွေးထားရာတွင် လက်တွေ့ကျသည့်ဉာဏ်ပညာကို သူအလွန်သဘောတွေ့သွားသည်။ အထူးသဖြင့်သူသဘောတွေ့သည့်အကြောင်းမှာ “အမေနဲ့အဖေဘာကြောင့်ကွဲသွားရတာလဲ” ဟူသည့်အခန်း ၄ ဖြစ်သည်။ သူနှင့်သူ့ဇနီးတို့သည် ကွဲလုကွဲခင်အခြေအနေတွင်ရှိနေသောကြောင့်ဖြစ်သည်။ ထိုစာအုပ်သည် အလွန်ဝမ်းနည်းပူဆွေးရမည့်အဖြစ်မှ သူ့အားကယ်တင်ခဲ့သည်ဟုသူပြောခဲ့သည်။ ယခုသူနှင့်သူ့မိသားစုသည် ယေဟောဝါသက်သေများနှင့်ကျမ်းစာလေ့လာနေကြပြီး အသင်းတော်အစည်းအဝေးအားလုံးကို တက်ရောက်နေကြပြီ။ သူတို့သည် သမ္မာကျမ်းစာနှင့်ကိုယ်တော်၏အဖွဲ့အစည်းမှတစ်ဆင့် ယေဟောဝါပေးတော်မူသည့် လက်တွေ့ကျဉာဏ်ပညာအတွက် အလွန်ကျေးဇူးတင်ကြသည်။

ဤတွေ့ကြုံမှုက ကိုလံဘီယာတွင် ဝိညာဉ်ရေးဆာငတ်နေသူများအား ယေဟောဝါ၏ထူးမြတ်သောရည်ရွယ်တော်မူချက်များနှင့် မကြာမီရောက်ရှိလာတော့မည့်ကိုယ်တော်၏ကမ္ဘာသစ်အကြောင်းကိုလေ့လာရန် ယေဟောဝါသက်သေများကူညီပေးနေစဉ် တွေ့ကြုံရသည့်ဝိညာဏလွတ်မြောက်မှုကို ဖော်ပြသည်။—၂ ပေတရု ၃:၁၃။