မျှော်လင့်ချက်—စိတ်ညှိုးငယ်စရာလောကတွင် အရေးကြီးသည့်အကာအကွယ်

ကိုရီးယားလူငယ်လေးတစ်ဦးသည် ကောလိပ်ကျောင်းသူတစ်ယောက်ကို အနာဂတ်မျှော်လင့်ချက်ရှိရန်မည်မျှအရေးကြီးကြောင်း သဘောပေါက်အောင်ပြောရာတွင် မိခင်ဖြစ်သူအားသူကူညီလိုခဲ့သည်။ ခရစ်ယာန်အစည်းအဝေးတွင် သူကြားခဲ့ရသည့်ပုံဥပမာတစ်ခုကိုသတိရပြီး ကျောင်းသူအား ပဟေဠိတစ်ပုဒ်ကိုအဖြေရှာမည်လောဟုမေးခဲ့သည်။ သူမသဘောတူခဲ့သည်။ သို့နှင့်သူက “မိသားစုနှစ်ခုရှိတယ်။ နှစ်ခုလုံးက သိပ်ကိုဆင်းရဲကြတယ်။ မိုးတွေအကြီးအကျယ်ရွာလာတဲ့အခါမှာ မိသားစုနှစ်စုလုံးရဲ့အိမ်မိုးတွေဟာ မိုးယိုနေတယ်။ မိသားစုတစ်ခုက သိပ်ဝမ်းနည်းနေကြပြီး မိုးယိုတာကို အရမ်းမြည်တမ်းညည်းတွားနေကြတယ်။ နောက်မိသားစုကတော့ ပျော်ပျော်ပါးပါးနဲ့ပဲအိမ်ခေါင်မိုးကို ဖာထေးကြတယ်။ ဒီမိသားစုနှစ်ခုဟာ ဘာကြောင့်ဒီလောက်ကွာခြားကြရတာလဲ။” လူငယ်ကစိတ်ဝင်စားမှုနှိုးဆွလိုက်သည်။ မိန်းကလေးက သူမမသိကြောင်းပြောသည်။ လူငယ်က “အင်း၊ ဒုတိယမိသားစုပျော်ရခြင်းအကြောင်းက မြို့တော်အာဏာပိုင်တွေဆီက သူတို့အိမ်အသစ်ရမယ်ဆိုတဲ့သတင်းကို မကြာမီကလေးကရကြလို့ပဲ။ ဒါကြောင့် သူတို့မှာ မျှော်လင့်ချက်ရှိခဲ့တယ်။ အဲဒါက ကွာခြားချက်ပဲ။”

လူငယ်၏ပဟေဠိသည် ရိုးစင်းသောအမှန်တရားကို သရုပ်ဖော်သည်။ မျှော်လင့်ချက်သည် ကျွန်ုပ်တို့၏အခြေအနေမည်သို့ပင်ရှိစေကာမူ ဘဝနှင့်ပတ်သက်သောကျွန်ုပ်တို့၏အမြင်ကို ပြောင်းလဲစေသည်။ သူဖော်ပြသည့်မိသားစုနှစ်ခုကဲ့သို့ ကျွန်ုပ်တို့အများစုသည် ကျန်းမာရေးပြဿနာ၊ ငွေကြေးစိုးရိမ်ကြောင့်ကြမှုများ၊ မိသားစုတင်းမာမှုများ၊ ရာဇဝတ်မှုနှင့် အခြားအခြားသောမရေမတွက်နိုင်သည့် စုံစမ်းခြင်းများနှင့်မတော်မတရားမှုများဖြစ်သည့် ဘဝမုန်တိုင်းကို ရင်ဆိုင်နေကြရသည်။ မိုးသက်မုန်တိုင်းကို ကျွန်ုပ်တို့အနီးအနားမှဝေးကွာသွားအောင် ကျွန်ုပ်တို့အမိန့်မပေးနိုင်သကဲ့သို့ ထိုပြဿနာများကိုလည်း ပပျောက်သွားအောင် ကျွန်ုပ်တို့မလုပ်နိုင်ကြချေ။ ထို့ကြောင့် ကျွန်ုပ်တို့စိတ်ဓာတ်ကျပြီးအထီးကျန်ဆန်ကာ အကူအညီမဲ့သကဲ့သို့ခံစားရပေမည်။ ပြဿနာကိုပို၍ဆိုးစေသည်ကား အပြစ်သားအများစုအတွက် အနာဂတ်သည် ရင်လေးဖွယ်ရာဖြစ်ပြီး ထာဝရပြစ်ဒဏ်စီရင်ခံရခြင်းလည်းပါဝင်သည်ဟူသော ချာ့ချ်များတွင် ကျွန်ုပ်တို့သွန်သင်ခံရခြင်းဖြစ်သည်။

စိတ်ဓာတ်ကျဆင်းရသည့်နည်းလမ်းမှာ အကူညီမဲ့ခြင်းနှင့် မျှော်လင့်ချက်မဲ့ခြင်းတို့၏ပေါင်းစပ်မှုအားဖြင့်ဖြစ်သည်ဟု ဆိုကြသည်။ သို့သော် ထိုနှစ်ခုပေါင်းမှတစ်ခုကိုမူ ကျွန်ုပ်တို့မုချဖယ်ရှားပစ်နိုင်သည်။ ကျွန်ုပ်တို့တစ်ယောက်မျှ မျှော်လင့်ချက်ကင်းမဲ့စရာမလိုပါ။ မျှော်လင့်ချက်ကိုယ်နှိုက်က အခြားတွဲဖက်တစ်ခုဖြစ်သည့် အကူအညီမဲ့ဖြစ်ခြင်းကို ဖယ်ထုတ်ပစ်ရန် အကောင်းဆုံးလက်နက်တစ်ခုဖြစ်နိုင်သည်။ ကျွန်ုပ်တို့၌မျှော်လင့်ချက်ရှိပါက စက်ဆုပ်ရင်နာဖွယ်ဆင်းရဲဒုက္ခများထဲတွင် ယက်ကန်ယက်ကန်ဖြစ်နေမည့်အစား ဘဝမုန်တိုင်းဒဏ်ကို တော်သင့်သည့်ငြိမ်သက်မှုနှင့် ရောင့်ရဲကျေနပ်မှုတို့ဖြင့် ကြံ့ကြံ့ခံနိုင်ကြမည်။ မှန်ပါသည်။ မျှော်လင့်ချက်သည် မရှိမဖြစ်လိုအပ်သည့်အကာအကွယ်တစ်ခုဖြစ်သည်။

အဆိုပါဖော်ပြချက်သည် သင့်အတွက်သံသယဖြစ်စေသလော။ မျှော်လင့်ချက်သည် ထိုမျှကြီးမားသည့်ကွာခြားမှုကိုဖြစ်စေသည့်တိုင် စွမ်းအားကြီးမားသလော။ ကျွန်ုပ်တို့တစ်ဦးစီသည် အားထားနိုင်သည့်မျှော်လင့်ချက်ကို ရရှိနိုင်ကြမည်လော။

သံခမောက်လုံးကဲ့သို့

မျှော်လင့်ချက်၏ မှတ်သားလောက်ဖွယ်အစွမ်းတန်ခိုးကို ဆေးပညာလောကက စတင်အသိအမှတ်ပြုလာသည်။ ဘဝပြဿနာအများစုတွင် “ယင်းတို့၏ခက်ခဲမှုအပေါ် ကျွန်ုပ်တို့၏အဓိပ္ပာယ်ဖွင့်ဆိုချက်များမှ ဒုက္ခဖိစီးမှုများဖြစ်ပေါ်လာခြင်းဖြစ်သည်။ ပြဿနာကိုယ်၌ကမဟုတ်ချေ။ မျှော်လင့်ချက်က ယင်းတို့၏ဖိစီးမှုများကိုလျှော့ပါးစေသည်” ဟု နာဇီတို့၏မီးလောင်တိုက်သွင်းခြင်းမှ လွှတ်မြောက်လာခဲ့သော ဖိစီးမှုဆိုင်ရာပါရဂူဒေါက်တာရှလိုမိုဘရက်စ္စနစ်က ပြောပြသည်။ The Journal of the American Medical Association စာစောင်က မျှော်လင့်ချက်သည် “အစွမ်းထက်သည့်ဆေးတစ်ခွက်” ဖြစ်သည်ဟု အခိုင်အမာပြောဆိုသည်။ American Health မဂ္ဂဇင်းက “အထူးသဖြင့် ကင်ဆာရောဂါဝေဒနာရှင်ကဲ့သို့သော လူနာများသည် တစ်စုံတစ်ခုကြောင့်မျှော်လင့်ချက်ကင်းမဲ့သွားပါက အခြေအနေရုတ်ခြည်းဆိုးဝါးလာသည်၊ သို့မဟုတ် ဆက်လက်အသက်ရှင်ရန် အကြောင်းအရာသစ်တစ်ခုကိုတွေ့သောအခါ အခြေအနေရုတ်ခြည်းတိုးတက်ကောင်းမွန်လာသည် ဟူသောသာဓကအမြောက်အမြားရှိသည်” ဟု ဖော်ပြသည်။—သု၊ ၁၇:၂၂ နှိုင်းယှဉ်။

ကျမ်းစာကျောင်းသားများသည် မျှော်လင့်ချက်၏အရေးကြီးမှုကို ကြာမြင့်စွာကတည်းကသိရှိလာခဲ့ကြသည်။ ၁ သက်သာလောနိတ် ၅:၈ တွင် တမန်တော်ပေါလုက “သမ္မာသတိရှိကြကုန်အံ့။ . . . ကယ်တင်ခြင်းသို့ရောက်မည်ဟု မျှော်လင့်ခြင်း တည်းဟူသော သံခမောက်လုံးကို ယူတင်ဝတ်ဆောင်ကြကုန်အံ့” ဟု တိုက်တွန်းခဲ့သည်။ ‘ကယ်တင်ခြင်းမျှော်လင့်ချက်’ သည် မည်သည့်နည်းဖြင့် သံခမောက်နှင့်တူသနည်း။

သံခမောက် မည်သို့အသုံးဝင်ကြောင်းကို စဉ်းစားကြည့်ပါ။ ကျမ်းစာခေတ်ကစစ်သားများသည် သက္ကလပ်ကြမ်း၊ သိုးမွေး သို့မဟုတ် သားရေအုပ်ဆောင်းပေါ်တွင် ကြေး သို့မဟုတ် သံဖြင့်စွပ်ထားသော ခမောက်များကို ဆောင်းကြသည်။ ယင်းသံခမောက်သည် လေထဲမှဖြတ်သန်းလာသည့်မြား၊ လွှဲရိုက်လာသည့်တင်းပုတ်နှင့် ပိုင်းဝင်လာသည့်ဓားချက်များမှ သူ၏ခေါင်းကိုကာကွယ်ပေးသည်။ ထိုအချိန်က စစ်သားအချို့တို့သည် သံခမောက်ရှိလျက်နှင့်ဆောင်းရန်ဝန်လေးပေမည်။ သို့သော် သံခမောက်ဆောင်းခြင်းသည် ထိုစစ်သားကိုတိုက်၍မနိုင် သို့မဟုတ် သူ့ခေါင်းထိခိုက်ခံရသောအခါ ဘာမျှမခံစားရဟု မဆိုလိုပါ။ သံခမောက်သည် သေလောက်သည့်ထိခိုက်ဒဏ်ရာဖြစ်စေမည့်အစား တိုက်ခိုက်မှုအများစုကို လွဲချော်သွားစေနိုင်သောကြောင့်ဖြစ်သည်။

သံခမောက်သည် ဦးခေါင်းကိုကာကွယ်သကဲ့သို့ မျှော်လင့်ချက်သည် စိတ်နှလုံးကိုကာကွယ်၏။ မျှော်လင့်ချက်သည် ယင်းအကြပ်အတည်းများ သို့မဟုတ် ရှုံးနှိမ့်မှုများကို ဘာမျှမဟုတ်သကဲ့သို့ ဘေးချိတ်ထားစေနိုင်မည်တော့မဟုတ်ပါ။ သို့သော် မျှော်လင့်ချက်သည် ထိုတိုက်ခိုက်မှုများကို အခံရသက်သာစေပြီး ကျွန်ုပ်တို့၏စိတ်ပိုင်းဆိုင်ရာ၊ စိတ်လှုပ်ရှားမှုဆိုင်ရာ၊ ဝိညာဏပိုင်းဆိုင်ရာကျန်းမာမှုများ အန္တရာယ်မဖြစ်စေရေးအတွက် စိတ်ချမှုကိုဖြစ်စေသည်။

သစ္စာရှိသူအာဗြဟံသည် ဤပုံဆောင်သံခမောက်ကို ဆောင်းခဲ့သည်။ ယေဟောဝါက သူ၏ချစ်လှစွာသောသားဣဇာက်ကို ယဇ်ပူဇော်ရန်တောင်းခဲ့သည်။ (ကမ္ဘာဦး ၂၂:၁၊ ၂) အာဗြဟံအတွက် စိတ်ဓာတ်ကျဆင်းသွားရန်၊ ဘုရားသခင်အား နာခံမှုကင်းခြင်းသို့ပို့ဆောင်သည့် ခံစားချက်များဝင်လာရန် မည်မျှလွယ်ကူလှပါသည်တကား။ ထိုခံစားချက်များမှ သူ့စိတ်ကို မည်သည့်အရာကကာကွယ်ပေးခဲ့သနည်း။ မျှော်လင့်ချက်က အဓိကကျသွားသည်။ ဟေဗြဲ ၁၁:၁၉ အရ “[ဣဇာက်အား] သေခြင်းမှထမြောက်စေခြင်းငှာ ဘုရားသခင်တတ်နိုင်တော်မူသည်ကို သူသည်အောက်မေ့၏။” ထိုနည်းတူ ရှင်ပြန်ထမြောက်ခြင်းတွင် ယောဘ၏မျှော်လင့်ချက်က သူ၏စိတ်ကို ဘုရားသခင်အားကျိန်ဆဲစေနိုင်သည့်နာကြည်းမှုမှ ကာကွယ်ပေးခဲ့သည်။ (ယောဘ ၂:၉၊ ၁၀။ ၁၄:၁၃-၁၅) ယေရှုခရစ်သည် အပြင်းအထန်ဝေဒနာခံစားရပြီး သေခြင်းကိုရင်ဆိုင်ရသည့်တိုင် အနာဂတ်အတွက်ရွှင်လန်းဖွယ်မျှော်လင့်ချက်မှ ခွန်အားနှင့်နှစ်သိမ့်မှုရယူနိုင်ခဲ့သည်။ (ဟေဗြဲ ၁၂:၂) ဘုရားသခင်သည် မည်သည့်အခါမျှအမှားပြုမည်မဟုတ်ကြောင်း၊ မည်သည့်အခါမျှကတိတော်ပျက်ကွက်မည်မဟုတ်ကြောင်း ယုံကြည်စိတ်ချခြင်းသည် စစ်မှန်သောမျှော်လင့်ခြင်း၏ အုတ်မြစ်ဖြစ်သည်။—ဟေဗြဲ ၁၁:၁။

စစ်မှန်သောမျှော်လင့်ခြင်း၏အခြေအမြစ်

ယုံကြည်ခြင်းကဲ့သို့ပင်၊ စစ်မှန်သောမျှော်လင့်ခြင်းသည်လည်း ဖြစ်ရပ်မှန်၊ အကြောင်းရင်းမှန်၊ အမှန်တရားများပေါ်တွင် အခြေပြုသည်။ ယင်းသည် အချို့သူများအတွက် အံ့ဩစရာဖြစ်မည်။ စာရေးဆရာတစ်ဦးဤသို့ယူမှတ်သည်။ “မျှော်လင့်ချက်သည် အမှန်တရားကိုငြင်းပယ်သော မိုက်မဲသည့်ပုံစံဖြစ်သည်ဟု လူအများစုက ထင်မှတ်ပုံရကြသည်။” သို့ရာတွင် စစ်မှန်သောမျှော်လင့်ချက်သည် ကျွန်ုပ်တို့လိုသမျှရမည် သို့မဟုတ် အသေးအမွှားကလေးများမှအစ အဆင်ချောမည်ဟူသည့် အနှစ်မပါပေါ့ပျက်သည့်မျှော်လင့်ချက်ဖြစ်သော လေဖမ်းဒန်းစီးအပြုသဘောသက်သက်မဟုတ်ပါ။ ဘဝတွင် ယင်းကဲ့သို့သော အရှိန်အဝါကြီးမားသည့်ယုံကြည်ချက်မှားများကို ဘက်မလိုက်အမှန်တရားမြောက်မြားစွာဖြင့် ဖယ်ရှားပစ်ရန် နည်းလမ်းရှိသည်။—ဒေသနာ ၉:၁၁။

စစ်မှန်သောမျှော်လင့်ချက်သည် ထူးခြားသည်။ ယင်းသည် ဆန္ဒမှမဟုတ်ဘဲ အသိပညာမှလာသည်။ အထက်ကဖော်ပြခဲ့သော ပဟေဠိပါဒုတိယမိသားစုကို စဉ်းစားကြည့်ပါ။ သူတို့၏ဦးစီးပုဂ္ဂိုလ်များသည် ကတိမတည်ခြင်းတွင်နာမည်ပျက်ရှိခဲ့ဘူးပါက သူတို့အတွက် မည်သို့သောမျှော်လင့်ချက်ရှိမည်နည်း။ ယုံကြည်အားထားလောက်သည့်အထောက်အထားများဖြင့် ပေါင်းစပ်ထားသောကတိကသာလျှင် ထိုမိသားစုအား အခြေခိုင်သည့်မျှော်လင့်ချက်ကိုပေးနိုင်သည်။

အလားတူပင် ယနေ့ ယေဟောဝါသက်သေများလည်း ဘုရားသခင်၏နိုင်ငံတော်တည်းဟူသော အုပ်ချုပ်မှုတစ်ခုနှင့် လုံးဝပတ်သက်နေသည့်မျှော်လင့်ချက် ရှိထားကြသည်။ ဤအုပ်ချုပ်မှုသည် သမ္မာကျမ်းစာသတင်း၏ အဓိကအချက်ပေါ်တွင် မူတည်နေသည်။ ယင်းသည် အာဗြဟံကဲ့သို့သော လူယောက်ျား၊ မိန်းမများအတွက် နှစ်ထောင်ပေါင်းများစွာ မျှော်လင့်ချက်၏အခြေအမြစ်ဖြစ်လာခဲ့သည်။ (ဟေဗြဲ ၁၁:၁၀) ဘုရားသခင်သည် မိမိ၏နိုင်ငံတော်အားဖြင့် ဤယိုယွင်းဖောက်ပြန်သည့် လောကအစီအစဉ်စနစ်ကိုနိဂုံးချုပ်ပြီး စနစ်အသစ်တစ်ခုဖြင့်အစားထိုးမည်ဟု ကတိပြုတော်မူသည်။ (ရောမ ၈:၂၀-၂၂။ ၂ ပေတရု ၃:၁၃) ဤဘုရားနိုင်ငံတော်မျှော်လင့်ချက်သည် စစ်မှန်သောမျှော်လင့်ချက်ဖြစ်သည်။ အိပ်မက်မဟုတ်။ ယင်း၏မူလအမြစ်ဖြစ်တော်မူသော စကြဝဠာအကြွင်းမဲ့ပိုင်သအုပ်စိုးရှင်ယေဟောဝါသည် ထောက်ကွက်မရှိသောဘုရားဖြစ်တော်မူသည်။ ကျွန်ုပ်တို့ကသာ၊ ဘုရားသခင်တည်ရှိတော်မူပြီး မိမိ၏ကတိတော်အားလုံးကို ပြည့်စုံစေနိုင်သည့်ကြွယ်ဝသောတန်ခိုးတော်ရှိကြောင်း သိမြင်နိုင်ရန် ကိုယ်တော့်ရူပဖန်ဆင်းရာကို စစ်ဆေးကြည့်သင့်သည်။ (ရောမ ၁:၂၀) ကိုယ်တော်သည် မည်သည့်အခါမျှ ကတိတော်မပျက်ကွက်ကြောင်းကိုသိရန် လူသားများနှင့်ကိုယ်တော်၏ဆက်ဆံပုံမှတ်တမ်းများကို ကျွန်ုပ်တို့စေ့စေ့ပေါက်ပေါက်ဆန်းစစ်သင့်သည်။—ဟေရှာယ ၅၅:၁၁။

ဝမ်းနည်းဖွယ်ရာကား ခရစ်ယာန်အမည်ခံအများစုတို့သည် စစ်မှန်သောမျှော်လင့်ချက်ကို မျက်ခြည်ပြတ်သွားကြသည်။ ဓမ္မပညာဆရာ ပေါလ်တေးလစ်က မကြာမီကထုတ်ဝေသော သူ၏ဟောပြောချက်စာစောင်တွင် “[ရှေး] ခရစ်ယာန်များသည် အဆုံးကိုစောင့်မျှော်လာခဲ့ကြသည်။ သို့သော် တဖြည်းဖြည်းနှင့် ယင်းသို့မပြုကြတော့ဘဲ . . . သခင့်ပတ္ထနာတွင်ပါသည့် အလိုတော်သည်ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေသောဟုဆုတောင်းသော်လည်း မြေကြီးပေါ်ရှိအခြေအနေသစ်ကို မျှော်လင့်ခြင်းများ အားနည်းလာကြသည်” ဟုပြောထားသည်။

ဝမ်းနည်းစရာပါတကား။ သန်းပေါင်းများစွာမက သန်းထောင်ပေါင်းများစွာသောလူများသည် မျှော်လင့်ရာကို အလွန့်အလွန်လိုအပ်နေသော်လည်း လုံးဝကင်းမဲ့နေကြသည်။ သို့သော် မိမိတို့၏ကိုယ်ပိုင်ကျမ်းစာအုပ်များတွင် ယင်းကိုလွယ်လင့်တကူရရှိနိုင်သည်။ မျှော်လင့်ချက်မဲ့ခြင်း၏အကျိုးရလဒ်ကိုလည်းကြည့်ပါဦး။ မိမိတို့၏စိတ်ကိုကာကွယ်ရန် အခြေခိုင်သည့်မျှော်လင့်ချက်မရှိဘဲ “သဘောတော်မကျသောစိတ်” က လူများစွာတို့အား အထိန်းအကွပ်မဲ့ပျံ့နှံ့နေသော စာရိတ္တပျက်ပြားမှုနှင့် ရာဇဝတ်မှုများအားဖြင့် လောကကိုညစ်ညမ်းစေသည့်အခြေအနေတွင် စိတ်ပျက်လက်မှိုင်ချနေရခြင်းသည် အဆန်းဖြစ်သလော။ (ရောမ ၁:၂၈၊ သမ) အလားတူထောင်ချောက်ထဲသို့ ကျွန်ုပ်တို့မကျဆင်းရန် အရေးကြီးသည်။ မျှော်လင့်ချက်သံခမောက်ကို ကျွန်ုပ်တို့လွှင့်ပစ်မည့်အစား ယင်းကို အမြဲတိုးတက်ကောင်းမွန်နေစေသင့်သည်။

သင့်မျှော်လင့်ချက်ကိုတည်ဆောက်နည်း

မျှော်လင့်ချက်တည်ဆောက်ရန် အကောင်းဆုံးနည်းကား ယင်း၏ပင်ရင်းအမြစ်ဖြစ်သော ယေဟောဝါဘုရားအား အရေးထားခြင်းအားဖြင့်ဖြစ်သည်။ ကိုယ်တော့်နှုတ်ကပါဌ်တော်သမ္မာကျမ်းစာကို လုံ့လစိုက်၍လေ့လာပါ။ ရောမ ၁၅:၄ က “ငါတို့သည် ကျမ်းစာ၌ပါသော သည်းခံခြင်း၊ သက်သာခြင်းအကြောင်းများကို အမှီပြု၍ မျှော်လင့်ရသောအခွင့်ရှိစေခြင်းငှာ ကျမ်းစာ၌အထက်ကရေးထားသမျှသည် ငါတို့ကိုဆုံးမသြဝါဒပေး၍ ရေးထားသတည်း” ဟုဖော်ပြထားသည်။

ထို့ပြင် အနာဂတ်ဆိုင်ရာကျွန်ုပ်တို့၏မျှော်လင့်ချက်သည် မပီပြင်သည့်စိတ်ကူးစိတ်သန်းမျှသာမဖြစ်ရန် သေချာစေရမည်။ ယင်းသည် ကျွန်ုပ်တို့၏စိတ်တွင် အမှန်စင်စစ်ဖြစ်အောင်ပြုရမည်။ သင်သည် မြေကြီးပရဒိသုတွင် ထာဝစဉ်အသက်ရှင်ရန် မျှော်လင့်သလော။ သေဆုံးသွားသော သင်၏ချစ်မြတ်နိုးသူများ မြေကြီးပေါ်တွင်ရှင်ပြန်ထမြောက်လာသောအခါ သူတို့ကိုသင်ပြန်တွေ့လိုသလော။ သို့ဖြစ်လျှင် ထိုအချိန်နှင့်နေရာတွင် သင့်ကိုယ်ကို မြင်ယောင်ကြည့်သလော။ ဥပမာ၊ ဟေရှာယ ၆၅:၂၁၊ ၂၂ တွင် လူတိုင်း မိမိအိမ်ကိုဆောက်ပြီး နေထိုင်ကြရမည့်အကြောင်း ဖော်ပြထားသည်။ သင့်အိမ်သစ်၏အမိုးပေါ်၌ နောက်ဆုံးအုတ်ကြွပ်ကို တပ်ဆင်ပြီးလိုက်သည်ကို မျက်စိမှိတ်၍စဉ်းစားကြည့်နိုင်မည်လော။ သင့်ပတ်ပတ်လည်ကိုကြည့်လိုက်ပြီး သင့်အစီအစဉ်နှင့်အလုပ်အကိုင်များ၏ ပြီးစီးအောင်မြင်မှုကိုမြင်တွေ့ရသည်ဟု တွေးကြည့်ပါ။ ဆောက်လုပ်ရေးတွင် ရွှင်လန်းတက်ကြွသည့်အသံများ ဆိတ်ငြိမ်သွားသောအခါ နေ့လည်ပိုင်းနေရိပ်များကျရောက်နေသော ပတ်ဝန်းကျင်ရှုခင်းကို သင်စစ်ဆေးကြည့်ရှုလိုက်သည်။ လေပြေလေညင်းကလေးက သစ်ကိုင်းများကို ယိမ်းနွဲ့ရုံတိုက်ခတ်လာပြီး အလုပ်ကြောင့်ပူအိုက်သောသင့်ကိုယ်ကို ချွေးသိပ်ပေးမည်။ ကလေးငယ်များ၏ရယ်မောသံသည် ငှက်ကလေးများ၏တေးဆိုသံနှင့်ရောနှော၍ သင့်နားဆီသို့ပျံ့လွင့်လာမည်။ အိမ်ထဲမှ သင်ချစ်မြတ်နိုးသူများ၏စကားသံကို သင်ကြားနေရမည်။

ထိုသို့သောရွှင်လန်းဖွယ်အချိန်ကလေးကို မြင်ယောင်ကြည့်လိုက်ခြင်းသည် အခြေအမြစ်မရှိသောအတွေးမဟုတ်ပါ။ ယင်းအစား ပြည့်စုံရန်သေချာသည့် ပရောဖက်ပြုချက်တစ်ခုကို တွေးတောဆင်ခြင်ခြင်းမျှသာဖြစ်သည်။ (၂ ကောရိန္သု ၄:၁၈) ဖြစ်လာမည့်အရာသည် ပို၍စစ်မှန်မှုရှိလေလေ၊ ထိုတွင်သင်ရောက်ရှိမည်ဟူသော သင့်မျှော်လင့်ချက်သည်လည်း သာ၍ခိုင်ခံ့လာလေလေပင်ဖြစ်သည်။ ထိုခိုင်မြဲသော၊ ထိတွေ့ခံစားနိုင်သော မျှော်လင့်ချက်သည် သတင်းကောင်းကြေညာရန်တာဝန်ကို သင်ရှောင်လွဲအောင်ပြုနိုင်သည့် “ဧဝံဂေလိတရားကြောင့်ရှက်ကြောက်ခြင်း” မှ သင့်အားကာကွယ်မှုပေးမည်။ (ရောမ ၁:၁၆) သတင်းကောင်းကို ယုံကြည်စိတ်ချစွာ သူတစ်ပါးအားဝေငှခြင်းအားဖြင့် တမန်တော်ပေါလုကဲ့သို့ သင်သည် ‘မျှော်လင့်ခြင်းတွင်ဝါကြွား’ လိုပေမည်။—ဟေဗြဲ ၃:၆။

မျှော်လင့်ချက်ကိုပေးသည့် ထာဝရအနာဂတ်ထက်မက ရှိပါသည်။ လတ်တလော မျှော်လင့်ချက်ကိုဖြစ်စေသည့် အခြေအမြစ်များရှိသည်။ မည်သို့အားဖြင့်နည်း။ စီ၊ အီး ငါးရာစုက ရောမနိုင်ငံခေါင်းဆောင်တစ်ဦးဖြစ်သူ ကက်စီယိုဒိုးရပ်စ်ဤသို့ပြောခဲ့သည်။ “ဖြစ်ပြီးခဲ့သော အကျိုးဖြစ်ထွန်းမှုကို အသိအမှတ်ပြုသောသူသည် အကျိုးဖြစ်ထွန်းသောအနာဂတ်မျှော်လင့်ချက်ကို ရရှိသည်။” ပညာရှိစကားများပါတကား။ လတ်တလောကောင်းချီးများကို ကျွန်ုပ်တို့ကောင်းစွာနားမလည်နိုင်ပါက အနာဂတ်ကောင်းချီးများနှင့်ပတ်သက်သည့် မျှော်လင့်ချက်မှ ကျွန်ုပ်တို့မည်သို့ နှစ်သိမ့်မှုခံစားရမည်နည်း။

ဆုတောင်းခြင်းသည်လည်း မျှော်လင့်ချက်ကို လတ်တလောတည်ဆောက်တတ်သည်။ ရေရှည်အနာဂတ်အတွက်ဆုတောင်းခြင်းသာမက ကျွန်ုပ်တို့လက်ရှိလိုအပ်ရာအတွက်လည်း ဆုတောင်းသင့်သည်။ မိသားစုနှင့်ခရစ်ယာန်ချင်းတို့နှင့် ဆက်ဆံရေးတိုးတက်ကောင်းမွန်ရေး၊ ကျွန်ုပ်တို့အတွက် နောက်ထပ်ဝိညာဏအစာနှင့် ကျွန်ုပ်တို့၏ရုပ်ပစ္စည်းလိုအပ်ရာများအတွက်ပင် မျှော်လင့်၍ဆုတောင်းနိုင်သည်။ (ဆာလံ ၂၅:၄။ မဿဲ ၆:၁၁) ထိုမျှော်လင့်ချက်များကို ယေဟောဝါထံတော်တွင်အပ်နှံထားခြင်းက ကျွန်ုပ်တို့နေ့စဉ်ရက်ဆက်ခံရပ်သွားနိုင်ရန် အကူအညီဖြစ်စေမည်။ (ဆာလံ ၅၅:၂၂) ကျွန်ုပ်တို့ခံရပ်သွားသည်နှင့်အမျှ ယင်းကိုယ်နှိုက်က မျှော်လင့်ချက်သံခမောက်ကို အားရှိခိုင်ခံ့သွားစေမည်။—ရောမ ၅:၃-၅။

လူများကို မျှော်လင့်ချက်ဖြင့်ရှုမြင်ခြင်း

အပျက်မြင်သဘောသည် မျှော်လင့်ချက်သံခမောက်ပေါ်တွင်တက်သော သံချေးနှင့်တူသည်။ ယင်းသည် တဖြည်းဖြည်းဆွေးမြေ့လှိုက်စားစေပြီး နောက်ဆုံး သံခမောက်ကိုသုံးမရတော့အောင်ဖြစ်စေသည်။ အပျက်မြင်သဘောကို သတိထားမိပြီး တိုက်လှန်ရန် သင်အားထုတ်သလော။ အပြစ်ချည်းမြင် သဘောမကျသော၊ ပြစ်တင်ဝေဖန်တတ်သော၊ အပျက်မြင်သဘောထားများသည် ဉာဏ်ပညာနှင့်အတူတူပင်ဖြစ်သည်ဟူသော မှားယွင်းသည့်အယူအဆဖြင့် လှည့်ဖြားမခံပါနှင့်။ အမှန်အားဖြင့် အပျက်မြင်သဘောရှိရန် ဉာဏ်ပညာမလိုအပ်ပါ။

လူသားချင်းအပေါ် မျှော်လင့်ချက်မဲ့သည့်အမြင်ဖြင့် ရှုမြင်တတ်ဖို့လည်း လွယ်ကူပါသည်။ အချို့လူများသည် အတိတ်က နောင်ကြဉ်ဖွယ်တွေ့ကြုံမှုများကြောင့် သူတစ်ပါးထံမှအကူအညီ သို့မဟုတ် နှစ်သိမ့်မှုကိုရယူရန် စိတ်ပျက်နေကြသည်။ “တစ်ခါသေဖူး ပျဉ်ဖိုးနားလည်” ဟူသောဆောင်ပုဒ်သည် သူတို့၏ဆောင်ပုဒ်ဖြစ်သည်။ သူတို့၏ပြဿနာများကို ဝိုင်းဝန်းကူညီရန် အကြီးအကဲများထံချဉ်းကပ်ဖို့ပင် ဝန်လေးကြသည်။

လူများနှင့်ပတ်သက်၍ သာ၍မျှတသောအမြင်ဖြင့်မြင်တတ်ရန် သမ္မာကျမ်းစာက ကျွန်ုပ်တို့အားအကူအညီပေးထားသည်။ လူသားများအပေါ် ကျွန်ုပ်တို့၏မျှော်လင့်ချက်အားလုံးပုံအပ်ခြင်းသည် ပညာမဲ့ရာကျသည်တော့မှန်ပါသည်။ (ဆာလံ ၁၄၆:၃၊ ၄) သို့သော် ခရစ်ယာန်အသင်းတော်ရှိအကြီးအကဲများသည် ယေဟောဝါထံတော်မှ “လူတို့အားဆုလာဘ်များ” အဖြစ်အမှုထမ်းဆောင်ကြသည်။ (ဧဖက် ၄:၈၊ ၁၁)သူတို့သည် တာဝန်ကျေပွန်ပြီး အတွေ့အကြုံရှိကာ စိတ်ရင်းခံဖြင့် “လေလုံ၍ မိုးသက်မုန်တိုင်းကွယ်ရာအရပ်” ကဲ့သို့ ဖြစ်လိုသူများဖြစ်ကြပါသည်။—ဟေရှာယ ၃၂:၂။

ခရစ်ယာန်အသင်းတော်ရှိ အခြားသူများစွာတို့သည်လည်း မိမိတို့ကိုယ်ကို မျှော်လင့်ရာအခြေအမြစ်ဖြစ်စေရန် အလေးအနက်ဂရုစိုက်ကြသည်။ သူတို့အထဲမှ ရာပေါင်းထောင်ပေါင်းများစွာသောသူတို့သည် မိသားစုဆုံးရှုံးသူများအတွက် မိခင်များ၊ ဖခင်များ၊ ညီအစ်မများ၊ ညီအစ်ကိုများနှင့် ကလေးများအဖြစ် မည်သို့လုပ်ဆောင်ပေးကြသည်ကို စဉ်းစားကြည့်ပါ။ ဘေးဒုက္ခရောက်နေသူများအတွက် “ညီအစ်ကိုထက်သာ၍စွဲကပ်” သောမိတ်ဆွေများအဖြစ် မည်မျှများစွာလုပ်ဆောင်နေကြသည်ကိုလည်း စဉ်းစားကြည့်ပါ။—သု၊ ၁၈:၂၄။ မာကု ၁၀:၃၀။

အကူအညီအတွက် ယေဟောဝါထံသင်ဆုတောင်းသောအခါ မျှော်လင့်ခြင်းပျောက်ဆုံးမသွားပါစေနှင့်။ တစ်ကြိမ်က သင့်လိုအပ်ရာကိုဖော်ပြထား၍ ယခုသင့်အားကူညီရန်အသင့်ဖြစ်နေကြသည့် အကြီးအကဲများ၊ အခြားသောပါရမီရင့်သည့်ခရစ်ယာန်များအားဖြင့် ကိုယ်တော်သင့်အား အဖြေပေးနှင့်ပြီးသားဖြစ်နိုင်သည်။ လူများအပေါ်မျှတသောမျှော်လင့်ချက်ထားရှိခြင်းသည် တစ်ကိုယ်ကောင်းဆန်ပြီး လက်တွေ့မကျသောလုပ်ရပ်များကိုလုပ်စေနိုင်သည့် လူအားလုံးနှင့်သီးခြားနေလိုသည့်အဖြစ်မှ ကျွန်ုပ်တို့အား ကာကွယ်ပေးသည်။—သု၊ ၁၈:၁၊ ကဘ။

ထို့အပြင် ခရစ်ယာန်ချင်းတို့နှင့်ပြဿနာဖြစ်ပါက ကျွန်ုပ်တို့သည် မျှော်လင့်ချက်မဲ့ပြီး အပျက်သဘောဖြင့်ချဉ်းကပ်ရန် မလိုပါ။ ခြုံပြောရလျှင် “မေတ္တာသည် . . . ခပ်သိမ်းသောအရာကိုမျှော်လင့်တတ်၏။” (၁ ကောရိန္သု ၁၃:၄-၇) ခရစ်ယာန်ညီအစ်ကိုညီအစ်မများကို ယေဟောဝါရှုမြင်သည့်အတိုင်း မျှော်လင့်ချက်ဖြင့်ရှုမြင်နိုင်ရန် ကြိုးစားပါ။ သူတို့၏ကောင်းသည့်အရည်အချင်းများအပေါ်အာရုံစိုက်ပါ။ သူတို့အားယုံကြည်စိတ်ချမှုပြပါ။ ပြဿနာဖြေရှင်းနိုင်ရန် ဦးတည်၍ကြိုးစားပါ။ ထိုကဲ့သို့သောမျှော်လင့်ချက်သည် မည်သူအားမျှအကျိုးမပေးသော ရန်ငြိုးနှင့်ရန်ဖြစ်ခြင်းတို့မှ ကျွန်ုပ်တို့အား ကာကွယ်ပေးသည်။

ဤကုန်ဆုံးတော့မည့်စနစ်ဟောင်းအတွင်းတွင် မျှော်လင့်ချက်ဆုံးရှုံးရမည့်အဖြစ်မျိုးမခံပါနှင့်။ ကျွန်ုပ်တို့၏ထာဝရအနာဂတ်နှင့် ကျွန်ုပ်တို့၏လောလောဆယ်ပြဿနာများစွာကိုဖြေရှင်းနည်းနှစ်မျိုးလုံးအတွက် မျှော်လင့်ချက်ရှိပါသည်။ သင်သည် မျှော်လင့်ချက်ကိုစွဲကိုင်ထားမည်လော။ အကာအကွယ်ပေးသည့်သံခမောက်နှင့်တူသော ကယ်တင်ခြင်းမျှော်လင့်ချက်ကို ဝတ်ဆင်ထားမည်ဆိုလျှင် အခြေအနေမည်မျှဆိုးဝါးနေစေကာမူ ယေဟောဝါ၏ကျေးကျွန်တစ်ဦးတစ်ယောက်မျှ မျှော်လင့်ချက်မဲ့နေမည်မဟုတ်ပါ။ ကျွန်ုပ်တို့ကိုယ်ကိုအားတင်းထားပါက ကောင်းကင်၌ဖြစ်စေ၊ မြေကြီး၌ဖြစ်စေ မည်သည့်အရာကမျှ ကျွန်ုပ်တို့အား ယေဟောဝါပေးသည့်မျှော်လင့်ချက်ကို လုယူသွားနိုင်မည်မဟုတ်ပါ။—ရောမ ၈:၃၈၊ ၃၉ နှိုင်းယှဉ်။