စာရှုသူများထံမှမေးခွန်းလွှာ

“အခြားသိုး” နှင့် “လူအုပ်ကြီး” ဟူသောကျမ်းဝေါဟာရများသည် သဘောတရားအားဖြင့် ကွဲပြားပါသလော။

ကွဲပြားသည်၊ သို့သော် ယင်းစကားလုံးများကို အသုံးပြုနည်းနှင့်ပတ်သက်၍လည်းကောင်း၊ ရံဖန်ရံခါ ဤစကားလုံးနှစ်လုံးကို နေရာချင်းဖလှယ်၍ အသုံးပြုလေ့ရှိသည့်အတွက်လည်းကောင်း စိတ်အနှောင့်အယှက်မဖြစ်သင့်ပါ။

ဤဝေါဟာရများပါသည့် ကျမ်းပိုဒ်များကို ခရစ်ယာန်အများစု အကျွမ်းတဝင်ဖြစ်ကြသည်။ တစ်ခုမှာ ယောဟန် ၁၀:၁၆ ဖြစ်သည်။ ထိုတွင် ယေရှုက ဤသို့ဆိုသည်– “ဤသိုးခြံသို့မဝင်သော အခြားသိုးတို့ကိုလည်း ငါပိုင်သေး၏။ ထိုသိုးတို့ကို ငါဆောင်ခဲ့ရမည်။ သူတို့သည်လည်း ငါ့စကားသံကိုနားထောင်သဖြင့် သိုးခြံတစ်ခု သိုးထိန်းတစ်ပါးတည်း ရှိရလိမ့်မည်။” “လူအုပ်ကြီး” ဟူသောဝေါဟာရကိုမူကား ဗျာဒိတ် ၇:၉ တွင် ဤသို့ဖတ်ရ၏– “ထိုနောက်မှ ငါကြည့်လျှင် အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှထွက်၍ အဘယ်သူမျှ မရေတွက်နိုင်သော လူများအပေါင်းတို့သည် ဖြူသောဝတ်လုံကိုဝတ်ဆင်လျက် စွန်ပလွံခက်ကိုကိုင်လျက်၊ ပလ္လင်တော်ရှေ့၊ သိုးသငယ်ရှေ့မှာ ရပ်နေကြ၏။”

ဦးဆုံး ယောဟန် ၁၀:၁၆ ကို သုံးသပ်ကြည့်ကြစို့။ သိုးများကား မည်သူတို့နည်း။ မှန်သည်၊ ယေရှု၏ သစ္စာရှိတပည့်နောက်လိုက်အားလုံးကို “သိုး” ဟုရည်ညွှန်းကြောင်း စိတ်တွင်ထားလျှင် ကောင်းမည်။ လုကာ ၁၂:၃၂ တွင် ကောင်းကင်အမွေခံမည့်သူတို့အား “သိုးစုငယ်” ဟုကိုယ်တော်ခေါ်တော်မူသည်။ “သိုးစုငယ်” အဝင် “သိုး” တို့သည် ကောင်းကင်နိုင်ငံတော်အဝင် ဖြစ်ကြလိမ့်မည်။ သို့ရာတွင် သိုးအဖြစ် ယေရှုယူမှတ်သော ခြားနားသည့် မျှော်လင့်ချက်ရှိ အခြားသူများလည်း ရှိပါသည်။

ကျွန်ုပ်တို့သည် ယောဟန် အခန်းကြီး ၁၀ တွင် ယင်းကိုတွေ့နိုင်ပါသည်။ ကောင်းကင်အသက်တာသို့ ခေါ်ဆောင်တော်မူမည့် မိမိ၏တမန်တော်များကဲ့သို့သော သိုးများအကြောင်း ပြောဆိုပြီးနောက် အငယ် ၁၆ တွင် ယေရှုဤသို့ထပ်ဆင့်ပြောဆိုသည်– “ဤသိုးခြံသို့မဝင်သော အခြားသိုးတို့ကိုလည်း ငါပိုင်သေး၏။ ထိုသိုးတို့ကို ငါဆောင်ခဲ့ရမည်။” ယေဟောဝါသက်သေများသည် ဤအခန်းငယ်တွင် ယေရှုက မြေကြီးဆိုင်ရာ မျှော်လင့်ချက်ရှိသူတို့အကြောင်း ပြောဆိုနေကြောင်းကို ကြာမြင့်စွာကပင် အသိအမှတ်ပြုခဲ့ကြသည်။ အာဗြဟံ၊ စာရာ၊ နောဧ နှင့် မာလခိတို့ကဲ့သို့သော ခရစ်ယာန်ခေတ်မတိုင်မီက သစ္စာရှိသူများစွာတို့သည် ထိုမျှော်လင့်ချက်မျိုးရှိခဲ့ကြသည်။ ယင်းကြောင့် သူတို့အား ယောဟန် ၁၀:၁၆ ပါ “အခြားသိုး” အဝင်အဖြစ် မှန်ကန်စွာယူမှတ်နိုင်သည်။ အနှစ်တစ်ထောင်ကာလအတွင်း ခရစ်ယာန်ခေတ်မတိုင်မီက ဤသစ္စာရှိ သက်သေခံများသည် ရှင်ပြန်ထမြောက်လာကြမည်။ ထိုအခါ ခရစ်တော်ယေရှုကို သူတို့သိရှိလာကာ လက်ခံကြမည်ဖြစ်ပြီး ကောင်းသောသိုးထိန်း၏ “အခြားသိုး” ဖြစ်လာကြလိမ့်မည်။

ကောင်းကင်အတန်းအစားကို ယေဘုယျခေါ်တော်မူခြင်း ပြီးဆုံးကတည်းက သန်းနှင့်ချီ၍ခရစ်ယာန်စစ်များဖြစ်လာကြကြောင်းကိုလည်း ကျွန်ုပ်တို့သိရှိထားကြသည်။ ဤသူတို့သည် “သိုးစုငယ်” အဝင်မဟုတ်ကြသောကြောင့် သူတို့အားလည်း “အခြားသိုး” ဟု မှန်ကန်စွာခေါ်နိုင်ပါသည်။ အမှန်ပင်၊ ယနေ့အခြားသိုးများသည် ကမ္ဘာ့ပရဒိသုတွင် အမှန်ပင်အသက်ရှင်နေထိုင်ရန် မျှော်လင့်ကြသည်။

ယခုသော် ဗျာဒိတ် ၇:၉ ပါ “လူအုပ်ကြီး” သည် မည်သူမည်ဝါဖြစ်ကြောင်း မည်သို့ဆိုနိုင်မည်နည်း။ ကောင်းပြီ၊ အငယ် ၁၃ ကိုကြည့်ပြီး မေးစရာမေးခွန်းမှာ “ဤသူတို့သည် အဘယ်သူနည်း။ အဘယ်အရပ်ကလာကြသနည်း” ဖြစ်သည်။ ဗျာဒိတ် ၇:၁၄ တွင် အဖြေကို ကျွန်ုပ်တို့ဤသို့တွေ့နိုင်သည်– “ဤသူတို့သည် ကြီးစွာသောဆင်းရဲဒုက္ခအထဲက ထွက်မြောက်” လာသူများဖြစ်သည်။ ထို့ကြောင့် “လူအုပ်ကြီး” အဝင်ဖြစ်သူများသည် ကြီးစွာသောဒုက္ခကိုကပ်ကျော် သို့မဟုတ် ထွက်မြောက်ကြသူတို့ဖြစ်သည်။ အခန်းငယ် ၁၇ ကဆိုသကဲ့သို့ သူတို့အား ‘အသက်စမ်းရေတွင်းသို့ လမ်းပြလိမ့်မည်။’

သို့သော် ဤသူတို့သည် ချဉ်းကပ်လာနေသော ကြီးစွာသောဒုက္ခကို ကပ်ကျော်ရန်အတွက် သိုးသငယ်၏အသွေး၌ သူတို့၏ဝတ်လုံများကို ဦးစွာဆေးကြောထားပြီး စစ်မှန်သောဝတ်ပြုသူများဖြစ်ကြရမည်ဖြစ်ကြောင်း နားလည်သဘောပေါက်နိုင်ပါသည်။ သို့ဖြစ်သောကြောင့် ဗျာဒိတ် ၇:၉ ကကြီးစွာသောဒုက္ခပြီးနောက်တွင် တွေ့ရှိရသောလူအုပ်ကို ဖော်ပြနေသည်မှန်သော်လည်း ဗာဗုလုန်ဘာသာတရားအပေါ် တိုင်းနိုင်ငံများ၏ထိုးနှက်တိုက်ခိုက်မှုဖြင့်စတင်သည့် ကြီးစွာသောဒုက္ခမတိုင်မီလေးဖြစ်သော ယခုအချိန်တွင် ဘုရားသခင်၏ မြင့်မြတ်သောလုပ်ငန်းတော်ကိုထမ်းဆောင်နေသည့် မြေကြီးဆိုင်ရာမျှော်လင့်ချက်ရှိသူအပေါင်းအား “လူအုပ်ကြီး” ဟူ၍ခေါ်ဆိုနိုင်ပေသည်။

အကျဉ်းချုပ်အားဖြင့် “အခြားသိုး” ဟူသောစကားလုံးသည် ကမ္ဘာပေါ်အသက်ရှင်ရန် မျှော်လင့်သူ ဘုရားသခင့်ကျေးကျွန်ရှိရှိသမျှပါဝင်သော ကျယ်ပြန့်သည့်အသုံးအနှုန်းအဖြစ် ကျွန်ုပ်တို့ယူမှတ်နိုင်သည်။ ယင်းတွင် ကျရောက်အံ့ဆဲဆဲကြီးစွာသောဒုက္ခကို ကပ်ကျော်အသက်ရှင်ရန် မျှော်လင့်သူ “လူအုပ်ကြီး” အဖြစ် ယနေ့စုသိမ်းခံနေရသော သိုးကဲ့သို့သောပို၍အကန့်အသတ်ရှိသည့်အုပ်စုပါဝင်ပါသည်။ ယင်းကြောင့် ယနေ့တွင်အသက်ရှင်နေကြသော သစ္စာရှိခရစ်ယာန်အများစုသည် “အခြားသိုးများ” ဖြစ်ကြပြီး သူတို့သည် “လူအုပ်ကြီး” အဝင်လည်းဖြစ်နေကြသည်။

သို့ရာတွင် ထပ်မံပြောဆိုစရာကား ဤအချက်အလက်တို့ကို ရှင်းလင်းပြတ်သားစွာ သဘောပေါက်ထားခြင်းသည် ကောင်းသော်လည်း စကားလုံးများအား အလွန်အမင်းဂရုပြုနေခြင်း—စကားကပ်ခြင်းကဲ့သို့—ကို မည်သည့်ခရစ်ယာန်မဆိုသည် လုပ်ဖို့မလိုပါ။ ပေါလုက “မာနနှင့်ယစ်မူး၍” “စကားကြောင့်သာငြင်းခုံ” နေသူတချို့အကြောင်း သတိပေးခဲ့သည်။ (၁ တိမောသေ ၆:၄) ဝေါဟာရအချို့သည် တစ်ခုနှင့်တစ်ခု ကွဲပြားခြားနားကြောင်း ကျွန်ုပ်တို့သိမြင်နားလည်ခဲ့ပြီဆိုလျှင် ကောင်းပေသည်။ သို့သော် ကျမ်းစာစကားလုံးများကို အခြားသူတစ်ဦးသည် ကျွန်ုပ်တို့ကဲ့သို့ အတိအကျအသုံးမပြုခဲ့ပါမူ သူ့အား စိတ်ထဲတွင်လည်းကောင်း၊ ဖွင့်ဟ၍လည်းကောင်း ပြစ်တင်ပြောဆိုစရာမလိုပါ။