လူမျိုးအပေါင်းတို့၊ ယေဟောဝါ၏ဘုန်းကို ထင်ရှားစေကြလော့!

“သူတို့သည် အလင်းရှိရာအရပ်၌ ယေဟောဝါ၏ဘုန်းကို ထင်ရှားစေကြရမည်။”—ဟေရှာယ ၂၄:၁၅၊ ကဘ။

၁။ ယေဟောဝါ၏ပရောဖက်များသည် ကိုယ်တော်၏နာမတော်အပေါ် အဘယ်အလေးအမြတ်သဘောတင်ပြခဲ့သနည်း။ ယင်းသည် ယနေ့ခရစ်ယာန်ဘောင်ရှိ အဘယ်သဘောထားနှင့် ကွာခြားသနည်း။

ယေဟောဝါ—ဘုရားသခင်၏ ထူးမြတ်သောနာမတော်ပါတကား! နာမတော်ကိုအမှီပြု ပြောဆိုခွင့်ရသော ရှေးသစ္စာရှိပရောဖက်များသည် အလွန်အားရရွှင်လန်းခဲ့ကြပါသည်တကား! သူတို့သည် နာမတော်က ကြီးမြတ်တော်မူသောရည်ရွယ်တော်မူရှင်အဖြစ် ဖော်ပြစေသည့် ပိုင်သအုပ်စိုးရှင် ယေဟောဝါ၏ဘုန်းတော်ကို ဝမ်းမြောက်ရွှင်လန်းစွာဖြင့် ထင်ရှားစေခဲ့ကြသည်။ (ဟေရှာယ ၄၀:၅; ယေရမိ ၁၀:၆၊ ၁၀; ယေဇကျေလ ၃၆:၂၃) ပရောဖက်ငယ်ဟု အခေါ်ခံရသူများပင် ယေဟောဝါ၏ဘုန်းတော်ကို အလွန်ရှင်းလင်းပြတ်သားစွာထင်ရှားစေခဲ့ကြပါသည်။ ဤသူတို့အနက်တစ်ဦးသည် ဟဂ္ဂဲဖြစ်သည်။ အခန်းငယ် ၃၈ ခုမျှသာရှိသောဟဂ္ဂဲကျမ်းတွင် ဘုရားသခင်၏နာမတော်ကို ၃၅ ကြိမ်အသုံးပြုထား၏။ ခရစ်ယာန်ဘောင်၏ထူးမြတ်သောတမန်တော်များ ဘာသာပြန်ထားသည့်ကျမ်းစာများတွင်ကဲ့သို့ ယေဟောဝါဟူသော ဂုဏ်အသရေရှိနာမတော်နေရာတွင် “ထာဝရဘုရား” ဟူသည့်ဘွဲ့အမည်ကို အစားထိုးလိုက်သောအခါ ၎င်းပရောဖက်ပြုချက်သည် အသက်မဝင်တော့ပေ။—၂ ကောရိန္သု ၁၁:၅ နှိုင်းယှဉ်။

၂၊ ၃။ (က) ဣသရေလနိုင်ငံ ပြန်လည်တည်ထောင်ခြင်းနှင့်ပတ်သက်သည့် ထူးခြားသောပရောဖက်ပြုချက်တစ်ခုသည် မည်သို့ပြည့်စုံခဲ့သနည်း။ (ခ) ဂျူးအကြွင်းအကျန်နှင့် သူတို့၏အပေါင်းအဖော်များသည် အဘယ်ပျော်ရွှင်မှုကို ခံစားခဲ့ကြရသနည်း။

^၂ ဟေရှာယ ၁၂:၂ (ကဘ) တွင်နာမတော်မြတ်၏ နှစ်ထပ်ကွမ်းပုံစံကို အသုံးပြုထားသည်။a ပရောဖက်က “ဘုရားသခင်သည် ငါ့ကိုကယ်တင်သောအရှင်ဖြစ်တော်မူ၏။ ကြောက်လန့်သောစိတ်မရှိဘဲ ယုံကြည်ကိုးစားမည်။ ဂျားယေဟောဝါသည် ငါ့ခွန်အား၊ ငါ့တန်ခိုး၊ ငါ့ကိုကယ်တင်တော်မူသောအရှင်ဖြစ်တော်မူ၏။” (ဟေရှာယ ၂၆:၄၊ ကဘလည်းရှု။) သို့ဖြစ်၍ ဂျားယေဟောဝါသည် တန်ခိုးကြီးမားသောကယ်တင်ရှင်ဖြစ်တော်မူကြောင်း ဗာဗုလုန်သုံ့ပန်းဘဝမှ ဣသရေလလူမျိုးမလွတ်မြောက်မီ နှစ်ပေါင်း ၂၀၀ ခန့်က ပရောဖက်ဟေရှာယအားဖြင့် ယုံကြည်စိတ်ချစေတော်မူခဲ့သည်။ ထိုသုံ့ပန်းဘဝသည် ဘီ.စီ.အီး. ၆၀၇ မှ ၅၃၇ အထိကြာရှည်ရလိမ့်မည်ဖြစ်သည်။ ဟေရှာယက ဤကဲ့သို့လည်း ရေးသားခဲ့သေးသည်– ‘ငါသည်ခပ်သိမ်းသောအရာတို့ကိုဖန်ဆင်းတော်မူသော ထာဝရဘုရားဖြစ်၏။ ကုရုမင်းကိုလည်း၊ “‘သင်သည်ငါ့သိုးထိန်းဖြစ်၏။ ငါအလိုရှိသမျှကိုပြည့်စုံစေလျက်၊ ယေရုရှလင်မြို့တည်ဆောက်စေ၊ ဗိမာန်တော်တိုက်မြစ်ကျစေ’ ဟု စီရင်လိမ့်မည်” ဟူ၍ . . . ငါဆို၏။’ ဤကုရုမင်းကား မည်သူနည်း။ ထိုသူသည် ဘီ.စီ.အီး. ၅၃၉ တွင်ဗာဗုလုန်ကိုသိမ်းပိုက်ခဲ့သော ပေရသိနိုင်ငံ၏ဘုရင်ကုရုဖြစ်ခြင်းကား အလွန်ထူးခြားပေသည်။—ဟေရှာယ ၄၄:၂၄၊ ၂၈။

^၃ ဟေရှာယမှတ်တမ်းတင်ခဲ့သော ယေဟောဝါ၏မိန့်တော်မူချက်အတိုင်းပင် ကုရုမင်းသည် သုံ့ပန်းဘဝရှိဣသရေလလူမျိုးကို ဤသို့မိန့်မှာခဲ့၏– “သင်တို့တွင် အဘယ်သူသည် ဘုရားသခင်၏လူဖြစ်သနည်း။ ထိုသူနှင့်အတူ ဘုရားသခင်ရှိတော်မူပါစေသော။ ယုဒပြည်ယေရုရှလင်မြို့သို့သွား၍ ဣသရေလအမျိုး၏ဘုရားသခင် ထာဝရဘုရား၏အိမ်တော်ကို တည်ဆောက်စေ။ ယေရုရှလင်မြို့၌ရှိတော်မူသော ဘုရားသည် [“စစ်မှန်သော၊” ကဘ] ဘုရားသခင်ဖြစ်တော်မူ၏။” အလွန့်အလွန်ပျော်ရွှင်သော ဂျူးအကြွင်းအကျန်နှင့်အတူ ဣသရေလလူမျိုးမဟုတ်သည့် နက်သနင်များနှင့် ရှောလမုန်၏အစေခံကျွန်အပေါင်းတို့သည် ယေရုရှလင်မြို့သို့ ပြန်သွားကြသည်။ ဘီ.စီ.အီး. ၅၃၇ တွင် သကေနေပွဲအမီ သူတို့ပြန်ရောက်လာကြ၏။ ယေဟောဝါ၏ပလ္လင်တော်တွင် ယဇ်ပူဇော်ခဲ့ကြသည်။ နောက်နှစ် ဒုတိယလတွင် ယေဟောဝါ၏ဂုဏ်တော်ကို ကြီးစွာသောအသံနှင့်ကြွေးကြော်ချီးမွမ်းလျက် ဒုတိယဗိမာန်တော်၏အုတ်မြစ်ကိုချကြလေသည်။—ဧဇရ ၁:၁-၄; ၂:၁၊ ၂၊ ၄၃၊ ၅၅; ၃:၁-၆၊ ၈၊ ၁၀-၁၃။

၄။ ဟေရှာယအခန်းကြီး ၃၅ နှင့် ၅၅ တို့သည် မည်သို့အမှန်ဖြစ်ပျက်လာသနည်း။

^၄ ယေဟောဝါ၏ ပြန်လည်တည်ထောင်ခြင်းဆိုင်ရာ ပရောဖက်ပြုချက်သည် ဣသရေလနိုင်ငံတွင် ဂုဏ်ကျက်သရေထင်ရှားစွာပြည့်စုံရမည်ဖြစ်သည်– “တောနှင့်လွင်ပြင်သည်ဝမ်းမြောက်လိမ့်မည်။ဆိတ်ညံသောအရပ်သည်လည်း ရွှင်လန်း၍၊ နှင်းပွင့်ကဲ့သို့အပွင့်ပွင့်လိမ့်မည်။ . . . ထာဝရဘုရား၏ဘုန်းတော်ကိုလည်းကောင်း၊ ငါတို့ဘုရားသခင်၏ တန်ခိုးအာနုဘော်တော်ကိုလည်းကောင်း မြင်ရကြလိမ့်မည်။” “သင်တို့သည် ဝမ်းမြောက်သောစိတ်နှင့်ထွက်၍၊ ချမ်းသာစွာပို့ခြင်းကိုခံရကြလိမ့်မည်။ တောင်ကြီးတောင်ငယ်တို့သည် သင်တို့ရှေ့မှာသီချင်းဆိုသံနှင့်ကြွေးကြော်၍၊ . . . ထိုအမှုသည် ထာဝရဘုရားရှေ့တော်၌အောက်မေ့ဖို့ရာ၊ မပျောက်မပျက်ရသောထာဝရသက်သေဖြစ်ရလိမ့်မည်။”—ဟေရှာယ ၃၅:၁၊ ၂; ၅၅:၁၂၊ ၁၃။

၅။ ဣသရေလနိုင်ငံ၏ဝမ်းမြောက်ခြင်းသည် အဘယ်ကြောင့်ကြာရှည်မခံခဲ့သနည်း။

^၅ သို့ရာတွင် ထိုဝမ်းမြောက်ခြင်းသည် ကြာရှည်မခံခဲ့ပါ။ အိမ်နီးချင်းလူမျိုးများသည် ယုံကြည်ခြင်းရောနှောပြီး ဗိမာန်တော်တည်ဆောက်ခြင်းအမှု၌ ပါဝင်လိုကြသည်။ အစပိုင်းတွင် ဂျူးများက “ငါတို့၏ဘုရားသခင်အဖို့ ဗိမာန်တော်တည်ခြင်းအမှုကို၊ သင်တို့သည် ငါတို့နှင့်ဝိုင်း၍မလုပ်ရ။ ပေရသိရှင်ဘုရင်ကုရုမင်းကြီးအမိန့်တော်အတိုင်း၊ ဣသရေလအမျိုး၏ဘုရားသခင် ထာဝရဘုရားအဖို့ ငါတို့သည် ကိုယ်တိုင်တည်ရမည်” ဟုအစပိုင်းတွင် သူတို့ကိုငြင်းပယ်ပြောဆိုခဲ့ကြ၏။ ထိုအခါ အိမ်နီးချင်းလူမျိုးများသည် အပြင်းအထန်ရန်ဘက်ပြုကြလေသည်။ သူတို့သည် “ယုဒအမျိုးတို့ကို လက်အားလျော့စေ၍၊ တည်ဆောက်ခြင်းအမှုကို နှောင့်ယှက်ကြ၏။” ထို့ပြင် ကုရုမင်းကိုဆက်ခံသည့် အာတဇေရဇ်မင်းကြီးကို အထင်လွဲမှားစေခဲ့ကြရာ သူက ဗိမာန်တော်ဆောက်လုပ်ခြင်းကို ပိတ်ပင်လေသည်။ (ဧဇရ ၄:၁-၂၄) ယင်းလုပ်ငန်းသည် ၁၇ နှစ်တိုင်ရပ်စဲသွားလေသည်။ ဝမ်းနည်းစရာမှာ ထိုအချိန်အတွင်း ဂျူးများသည် ရုပ်ပစ္စည်းကိုပဓာနထားသည့်အသက်တာတွင်ကျင်လည်ခဲ့ကြလေသည်။

“ဗိုလ်ခြေတို့၏အရှင် ယေဟောဝါ” မိန့်တော်မူ

၆။ ယေဟောဝါသည် ဣသရေလနိုင်ငံအတွင်းရှိအခြေအနေကို မည်သို့တုံ့ပြန်သနည်း။ (ခ) ဟဂ္ဂဲအမည်၏အဓိပ္ပာယ်သည် ဘာဖြစ်ပုံရသနည်း။

^၆ သို့တိုင် ယေဟောဝါသည် ဂျူးများကို မိမိတို့တာဝန်သိစေရန် ဟဂ္ဂဲနှင့်ဇာခရိအစရှိသည့်ပရောဖက်များကို ဣသရေလလူမျိုးထံ စေလွှတ်တော်မူခြင်းဖြင့် ‘ကိုယ်တော်၏အစွမ်းသတ္တိ’ ကိုထင်ရှားစေတော်မူခဲ့သည်။ ဟဂ္ဂဲအမည်၏အဓိပ္ပာယ်မှာ “ပွဲခံချိန်၌မွေးဖွားသည်” ဖြစ်ပုံရလေရာ ပွဲနေ့နှင့်သက်ဆိုင်နေ၏။ ဂျူးများ ‘အမှန်ရွှင်လန်းခြင်းကိုပြုရမည့်’ သကေနေပွဲမတိုင်မီလေးဖြစ်သည့်ဆဋ္ဌမလ၏ ပထမနေ့ရက်တွင် သူစတင်ပရောဖက်ပြုခဲ့ပါသည်။ (တရားဟောရာ ၁၆:၁၅) ယေဟောဝါသည် ဟဂ္ဂဲမှတစ်ဆင့် ၁၁၂ ရက်အတွင်း သတင်းလေးခုကြေညာတော်မူခဲ့သည်။—ဟဂ္ဂဲ ၁:၁; ၂:၁၊ ၁၀၊ ၂၀။

၇။ ဟဂ္ဂဲ၏နိဒါန်းစကားများသည် ကျွန်ုပ်တို့အားယူစရာ မည်သို့ဖြစ်သင့်သနည်း။

^၇ ဟဂ္ဂဲက “ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား” ဟူ၍သူ၏ပရောဖက်ပြုချက်ကို နိဒါန်းပျိုးခဲ့သည်။ (ဟဂ္ဂဲ ၁:၂က) ၎င်း ‘ဗိုလ်ခြေများ’ ကားမည်သူတို့ဖြစ်လိမ့်မည်နည်း။ ကျမ်းစာတွင် စစ်တပ်များဟုဖော်ပြလေ့ရှိသည့် ယေဟောဝါ၏ကောင်းကင်တမန်များဖြစ်သည်။ (ယောဘ ၁:၆; ၂:၁; ဆာလံ ၁၀၃:၂၀၊ ၂၁; မဿဲ ၂၆:၅၃) ပိုင်သအုပ်စိုးရှင်ယေဟောဝါကိုယ်တော်တိုင်သည် ကမ္ဘာပေါ်တွင် စစ်မှန်သောဝတ်ပြုရေးပြန်လည်တည်ရှိစေခြင်းလုပ်ငန်းကို ညွှန်ကြားပေးရန် တိုက်၍မနိုင်သော ဤကောင်းကင်ဗိုလ်ခြေတို့ကို အသုံးပြုနေတော်မူခြင်းသည် ယနေ့ကျွန်ုပ်တို့ အားရှိစရာမဖြစ်ပေလော။—၄ ဓမ္မရာဇဝင် ၆:၁၅-၁၇ နှိုင်းယှဉ်။

၈။ ဣသရေလနိုင်ငံတွင် အဘယ်စိတ်ထားဝင်ခဲ့သနည်း။ ယင်းကြောင့်ဘာဖြစ်ပျက်ခဲ့သနည်း။

^၈ ဟဂ္ဂဲ၏ပထမသတင်းတွင် အဘယ်အကြောင်းပါဝင်သနည်း။ လူတို့က “အချိန်မရောက်သေး၊ ထာဝရဘုရား၏အိမ်တော်ကိုတည်ဆောက်ရသောအချိန် မရောက်သေး” ဟုပြောဆိုခဲ့ကြပြီ။ မြင့်မြတ်သောဝတ်ပြုရေး ပြန်လည်တည်ထောင်ခြင်းကိုပုံဆောင်သည့် ဗိမာန်တော်ဆောက်လုပ်ခြင်းသည် သူတို့အဓိကထား ဆောင်ရွက်သည့်လုပ်ငန်းမဟုတ်တော့ပေ။ သူတို့သည် ကြီးကျယ်ခမ်းနားသောအိမ်များကို ဆောက်လုပ်ဖို့အာရုံစိုက်နေကြသည်။ ရုပ်ပစ္စည်းကိုပဓာနပြုသောစိတ်ထားက ယေဟောဝါ၏ဝတ်ပြုရေးအပေါ် စိတ်အားထက်သန်မှုကို လျော့နည်းသွားစေခဲ့ပြီ။ ယင်းကြောင့် ကိုယ်တော်၏ကောင်းချီးကို သူတို့မခံစားရတော့ချေ။ သူတို့၏လယ်မြေအသီးအနှံနည်းပါးပြီး ပြင်းထန်သောဆောင်းရာသီအတွက် အဝတ်အစားမရှိ ဖြစ်ကြလေပြီ။ ဝင်ငွေနည်းသွားသဖြင့် အိတ်ပေါက်နှင့်ဖားကောက်သကဲ့သို့ဖြစ်ချေပြီ။—ဟဂ္ဂဲ ၁:၂ခ-၆။

၉။ ယေဟောဝါသည် တည်ဆောက်မှုပေးသော အဘယ်ခိုင်မာသည့်သြဝါဒပေးတော်မူခဲ့သနည်း။

^၉ ယေဟောဝါက “ကိုယ်ကျင့်သောအကျင့်တို့ကို ဆင်ခြင်ကြလော့” ဟုနှစ်ကြိမ်တိုင် အခိုင်အမာသြဝါဒပေးတော်မူခဲ့သည်။ ယေရုရှလင်၏မြို့ဝန်ဇေရုဗဗေလနှင့် ယဇ်ပုရောဟိတ်ယောရှုb တို့သည် နာခံမှုပြကြပြီး လူအပေါင်းတို့သည် “မိမိတို့ဘုရားသခင်ထာဝရဘုရား၏အမိန့်တော်ကိုလည်းကောင်း၊ မိမိတို့ဘုရားသခင် ထာဝရဘုရားစေခိုင်းတော်မူသော ပရောဖက်ဟဂ္ဂဲစကားကိုလည်းကောင်း နားထောင်သဖြင့်၊ ထာဝရဘုရားရှေ့တော်၌ ကြောက်ရွံ့ကြ” ရန်ရဲရင့်စွာတိုက်တွန်းလေသည်။ ထို့ပြင် “ထာဝရဘုရားမှာထားတော်မူသည်အတိုင်း ထာဝရဘုရား၏တမန်ဟဂ္ဂဲက၊ ‘“ငါသည် သင်တို့နှင့်အတူရှိ၏” ဟုထာဝရဘုရားမိန့်တော်မူကြောင်း’ ကို လူများတို့အားဆင့်ဆိုလေ၏။”—ဟဂ္ဂဲ ၁:၅၊ ၇-၁၄။

၁၀။ ယေဟောဝါသည် ဣသရေလနိုင်ငံ၏အကျိုးအတွက် တန်ခိုးတော်ကို မည်သို့အသုံးပြုတော်မူခဲ့သနည်း။

^၁၀ ယေရုရှလင်ရှိ ရှေ့မီနောက်မီအချို့က ယခင်ဗိမာန်တော်နှင့်နှိုင်းယှဉ်လျှင် ပြန်ဆောက်သောဗိမာန်တော်၏ဘုန်းသည် “အဘယ်မျှမဟုတ်” ဟုအထင်ရှိကြပေမည်။ သို့ရာတွင် နောက် ၅၁ ရက်အကြာတွင် ယေဟောဝါသည် ဟဂ္ဂဲကို ဒုတိယသတင်းကြားပြောစေသည်။ သူက “‘အိုဇေရုဗဗေလ၊ အားယူလော့’ ဟုထာဝရဘုရားမိန့်တော်မူ၏။ ‘အိုယဇ်ပုရောဟိတ်မင်းယောဇဒက်သား ယောရှု၊ အားယူလော့။ အိုပြည်သူပြည်သားအပေါင်းတို့၊ အားယူကြလော့’ ဟုထာဝရဘုရားမိန့်တော်မူ၏။ . . . ငါသည် သင်တို့နှင့်အတူရှိ၏။ . . . မစိုးရိမ်ကြနှင့်’ ဟုကောင်းကင်ဗိုလ်ခြေအရှင်ထာဝရဘုရားမိန့်တော်မူ၏” ဟုဆိုသည်။ အချိန်တန်လေသော် . . . တန်ခိုးကိုအသုံးပြုတော်မူပြီး ‘ကောင်းကင်နှင့်မြေကြီးကိုလှုပ်’ တော်မူမည့်ယေဟောဝါသည် ဘုရင့်အမိန့်နှင့်ပိတ်ပင်ထားခြင်းပါအပါအဝင် အတိုက်အခံရှိရှိသမျှကို ကျော်လွှားစေတော်မူမည်။ ဗိမာန်တော်ဆောက်လုပ်ရေးသည်ငါးနှစ်အတွင်း အောင်မြင်စွာပြီးစီးသွားလေသည်။—ဟဂ္ဂဲ ၂:၃-၆။

၁၁။ ဘုရားသခင်သည် ဒုတိယဗိမာန်တော်ကို မည်သို့ “ဘုန်းသာ၍ကြီး” စေတော်မူသနည်း။

^၁၁ ထိုအခါ အလွန်ထူးခြားသောကတိတော်တစ်ခု ပြည့်စုံလေသည်– “‘လူမျိုးအပေါင်းတို့နှစ်သက်ဖွယ်ရာသောအရာသည် ရောက်၍၊ ဤအိမ်ကိုဘုန်းနှင့်ငါပြည့်စေမည်’ ဟုကောင်းကင်ဗိုလ်ခြေအရှင်ထာဝရဘုရားမိန့်တော်မူ၏။” (ဟဂ္ဂဲ ၂:၇) ထို “နှစ်သက်ဖွယ်သောအရာ” သည် တန်ခိုးကြီးရှင် ရောက်ရှိနေတော်မူခြင်း၏ ဘုန်းအသရေတော်ကို ထင်ဟပ်သည့် ၎င်းဗိမာန်တော်တွင် လာရောက်ဝတ်ပြုသော ဣသရေလလူမျိုးမဟုတ်သူများဖြစ်ကြလေသည်။ ဤပြန်လည်တည်ဆောက်ထားသည့်ဗိမာန်တော်သည် ရှောလမုန်ခေတ်ကဗိမာန်တော်နှင့် မည်သို့ခြားနားသနည်း။ ဘုရားသခင်၏ပရောဖက်က “‘နောက်တည်သောဤအိမ်တော်သည် အရင်အိမ်တော်ထက်ဘုန်းသာ၍ကြီးလိမ့်မည်’ ဟုကောင်းကင်ဗိုလ်ခြေအရှင်ထာဝရဘုရားမိန့်တော်မူ၏” ဟုကြွေးကြော်ခဲ့သည်။ (ဟဂ္ဂဲ ၂:၉) ပရောဖက်ပြုချက်၏ပထမပြည့်စုံချက်တွင် ပြန်လည်တည်ဆောက်သောဗိမာန်တော်သည် ပထမအိမ်တော်ထက် ပိုကြာကြာတည်ရှိခဲ့သည်။ မေရှိယပေါ်ထွန်းသည့် စီ.အီး. ၂၉ အထိ ရှိနေဆဲဖြစ်သည်။ ထို့ပြင် စီ.အီး. ၃၃ ၌ဖောက်ပြန်သောရန်သူများ၏ သတ်ဖြတ်မှုကိုမခံရမီ မေရှိယကိုယ်တော်တိုင်သည် ထိုတွင် သမ္မာတရားကိုဟောပြော၍ ယင်းကို ဘုန်းအသရေရှိစေတော်မူခဲ့သည်။

၁၂။ ပထမဗိမာန်တော်နှစ်ခုကား မည်သို့အရေးပါခဲ့သနည်း။

^၁၂ ယေရုရှလင်ရှိ ပထမနှင့်ဒုတိယဗိမာန်တော်များသည် မေရှိယ၏ယဇ်ပုရောဟိတ်လုပ်ငန်းဆိုင်ရာ အရေးကြီးချက်များကို ပုံဆောင်ရာ၌လည်းကောင်း၊ မေရှိယပေါ်ထွန်းချိန်အထိ ယေဟောဝါ၏စစ်မှန်သောဝတ်ပြုရေးကို ရှင်သန်စေရာ၌လည်းကောင်း အလွန်အရေးပါအရာရောက်ခဲ့သည်။—ဟေဗြဲ ၁၀:၁။

ဘုန်းထွန်းတောက်သော ဝိညာဏဗိမာန်တော်

၁၃။ (က) ဝိညာဏဗိမာန်တော်နှင့်ပတ်သက်၍ စီ.အီး. ၂၉ မှ ၃၃ အထိအဘယ်အမှုများ ဖြစ်ပျက်ခဲ့သနည်း။ (ခ) ဤအဖြစ်အပျက်များတွင် ယေရှု၏ရွေးဖိုးပူဇော်သကာသည် မည်သို့အရေးပါသနည်း။

^၁၃ ဟဂ္ဂဲ၏ပြန်လည်တည်ထောင်ရေး ပရောဖက်ပြုချက်သည် နောက်ပိုင်းကာလအတွက် အထူးအဓိပ္ပာယ်ရှိပါသလော။ မုချရှိပါပေသည်! ယေရုရှလင်၌ ပြန်ဆောက်ထားသော ဗိမာန်တော်သည် ကမ္ဘာပေါ်တွင် စစ်မှန်သောဝတ်ပြုရေးရှိရှိသမျှ၏ အာရုံစူးစိုက်ရာအရပ်ဖြစ်လာလေသည်။ သို့သော် ယင်းသည် ထိုထက်သာ၍ ဘုန်းရှိသောဝိညာဏဗိမာန်တော်ကို တင်စားပါသေးသည်။ ၎င်းသည် ယော်ဒန်မြစ်တွင် ယေရှုနှစ်ခြင်းခံပြီး သန့်ရှင်းသောဝိညာဉ်တော်သည် ကိုယ်တော့်အပေါ်သို့ ချိုးငှက်ပမာဆင်းသက်၍ ယဇ်ပုရောဟိတ်မင်းကြီးအဖြစ် ယေရှုကို ယေဟောဝါဘိသိက်ပေးခဲ့သည့် စီ.အီး. ၂၉ ၌စတင်သည်။ (မဿဲ ၃:၁၆) ယေရှုသည် ယဇ်ပူဇော်သကာအဖြစ်သေဆုံး၍ မြေကြီးပေါ်ဓမ္မအမှုဆောင်ပြီးသည့်နောက် ဗိမာန်တော်၏အသန့်ရှင်းဆုံးအခန်းပုံဆောင်သည့် ကောင်းကင်သို့ရှင်ပြန်ထမြာက်သွားပြီး ပူဇော်သကာ၏အကျိုးကျေးဇူးကို ယေဟောဝါအား တင်ဆက်တော်မူခဲ့သည်။ ယင်းက တပည့်တော်များ၏အပြစ်ကိုဖုံးအုပ်ပေးသည့် ရွေးဖိုးအဖြစ်လုပ်ဆောင်ကာ စီ.အီး. ၃၃ ပင်တေကုတ္တေပွဲနေ့ရောက်သော် ယေဟောဝါ၏ဝိညာဏဗိမာန်တော်၌ လက်ထောက်ယဇ်ပုရောဟိတ်များအဖြစ် ဘိသိက်ခံခွင့်ရရှိရန် လမ်းဖွင့်ပေးလေသည်။ သူတို့သည် မြေကြီးပေါ်ဗိမာန်တော်တံတိုင်းအတွင်း သေသည်တိုင်သစ္စာရှိရှိအမှုထမ်းခြင်းကြောင့် ယဇ်ပုရောဟိတ်လုပ်ငန်းကို အဆက်မပြတ်ထမ်းဆောင်နိုင်ဖို့ ကောင်းကင်သို့ရှင်ပြန်ထမြောက်ခွင့်ကို အနာဂတ်တွင် ရရှိကြမည်ဖြစ်သည်။

၁၄။ (က) ရှေးခရစ်ယာန်အသင်းတော်၏ ဇွဲရှိသောလုပ်ငန်းကြောင့် အဘယ်ရွှင်လန်းခြင်းခံစားခဲ့ကြရသနည်း။ (ခ) ဤရွှင်လန်းခြင်းသည် အဘယ်ကြောင့်ကြာရှည်မခံခဲ့သနည်း။

^၁၄ နောင်တရသောဂျူးများနှင့် နောက်ပိုင်းတွင် တစ်ပါးအမျိုးသား ထောင်ပေါင်းများစွာတို့သည် ထိုခရစ်ယာန်အသင်းတော်ထဲစုပြုံဝင်လာကြပြီး မြေကြီးတစ်ဝန်း ဘုရားသခင်၏နိုင်ငံတော်အုပ်စိုးလုပြီဟူသောသတင်းကောင်းကို ပါဝင်ကြေညာကြလေသည်။ နှစ်ပေါင်း ၃၀ ခန့်အကြာတွင် “ကောင်းကင်အောက်၌ရှိသမျှသော ဝေနေယျသတ္တဝါတို့အား” သတင်းကောင်းဟောပြောခဲ့ပြီဟု တမန်တော်ပေါလုက ပြောဆိုနိုင်လေသည်။ (ကောလောသဲ ၁:၂၃) သို့သော် တမန်တော်များသေဆုံးပြီးနောက် အကြီးအကျယ်ယုံကြည်ခြင်းဖောက်ပြန်ခဲ့ကြရာ သမ္မာတရားအလင်းသည် မှိတ်တုတ်မှိတ်တုတ်ဖြစ်လာလေသည်။ စစ်မှန်သောခရစ်ယာန်ဘာသာတရားသည် [အယူမှားသော] သွန်သင်ချက်များနှင့် အတွေးအခေါ်များပေါ်အခြေပြုသည့် ခရစ်ယာန်ဘောင်၏ဂိုဏ်းဂဏများကြောင့် သေးသိမ်မှေးမှိန်သွားလေသည်။—တမန်တော် ၂၀:၂၉၊ ၃၀။

၁၅၊ ၁၆။ (က) ၁၉၁၄ ၌ပရောဖက်ပြုချက်သည် မည်သို့ပြည့်စုံခဲ့သနည်း။ (ခ) ၁၉ ရာစုအကုန်မှ ၂၀ ရာစုအစောပိုင်း၌ အဘယ်စုသိမ်းခြင်းဖြစ်ပျက်ခဲ့သနည်း။

^၁၅ ရာစုနှစ်များစွာ ကုန်လွန်သွားသည်။ ထို့နောက် ၁၈၇၀ ပြည့်လွန်နှစ်များတွင် စိတ်ရင်းမှန်သောခရစ်ယာန်တစ်စုသည် ကျမ်းစာကို နက်နက်နဲနဲ စတင်လေ့လာလေသည်။‘တစ်ပါးအမျိုးသားတို့၏အချိန်ကာလ’ သည် ၁၉၁၄ ခုနှစ်တွင်ကုန်ဆုံးမည်ဖြစ်ကြောင်း သူတို့ညွှန်ပြနိုင်ကြ၏။ ထိုအချိန်တွင် ပုံဆောင်ရာခုနစ် “နှစ်ပတ်လုံး” (သားရဲကဲ့သို့သော လူ့အုပ်ချုပ်မှု နှစ်ပေါင်း ၂,၅၂၀) သည်ကမ္ဘာ့မေရှိယဘုရင်အဖြစ် “အစိုးပိုင်သောသူ” ခရစ်တော်ယေရှု၊ ကောင်းကင်တွင်နန်းတင်ခံရခြင်းဖြင့် ကုန်ဆုံးလေသည်။ (လုကာ ၂၁:၂၄; ဒံယေလ ၄:၂၅; ယေဇကျေလ ၂၁:၂၆၊ ၂၇) အထူးသဖြင့် ၁၉၁၉ ကတည်းက ယနေ့ယေဟောဝါသက်သေများဟုအမည်တွင်သော ဤကျမ်းစာကျောင်းသားများသည် ရောက်လုနီးပြီဖြစ်သော ဘုရားသခင့်နိုင်ငံတော်ဆိုင်ရာသတင်းကောင်းကို ကမ္ဘာတစ်ဝန်းပျံ့နှံ့စေခဲ့ကြပြီ။ ၁၉၁၉ ခုနှစ်တွင် အမေရိကန်နိုင်ငံ အိုဟိုင်အိုပြည်နယ်၊ စီဒါပဝိုင့်မြို့စည်းဝေးကြီး၌ ထုတ်ဆင့်ခဲ့သောဖိတ်ခေါ်ချက်ကို သက်သေခံထောင်ဂဏန်းအနည်းငယ်က လက်ခံခဲ့ကြပါသည်။ ၁၉၃၅ ခုနှစ်တွင် လယ်ကွင်းလုပ်ငန်း၌ပါဝင်သူ ၅၆,၁၅၃ ယောက်ရှိသည်အထိ သူတို့၏အရေအတွက်တိုးများလာပါသည်။ ထိုနှစ်၌ ယေရှုသေခြင်း၏ နှစ်ပတ်လည်သတိရအောက်မေ့ပွဲတွင် မုန့်နှင့်စပျစ်ရည်သောက်သုံးသူ ၅၂,၄၆၅ ယောက်ရှိရာ ဤသူတို့သည် ခရစ်တော်ယေရှုနှင့်အတူ ကောင်းကင်တွင် ယေဟောဝါ၏မဟာဝိညာဏဗိမာန်တော်၌ ယဇ်ပုရောဟိတ်များဖြစ်ရန်မျှော်လင့်ကြောင်း တင်ပြကြသည်။ ကိုယ်တော်၏မေရှိယနိုင်ငံတော်တွင် တွဲဖက်ဘုရင်များအဖြစ် သူတို့ပါအမှုထမ်းကြမည်ဖြစ်သည်။—လုကာ ၂၂:၂၉၊ ၃၀; ရောမ ၈:၁၅-၁၇။

^၁၆ သို့ရာတွင် ဤဘိသိက်ခံခရစ်ယာန်များ၏ စုစုပေါင်းအရေအတွက်ကို ၁၄၄,၀၀၀ ဖြင့်ကန့်သတ်ထားပြီး အကြီးအကျယ်ယုံကြည်ခြင်းဖောက်ပြန်မှုမဖြစ်မီ ပထမရာစုတွင် ၎င်းတို့အများစုကို စုသိမ်းပြီးဖြစ်ကြောင်း ဗျာဒိတ် ၇:၄-၈ နှင့် ၁၄:၁-၄ ကတင်ပြသည်။ ၁၉ ရာစုအကုန်ပိုင်းမှစ၍ ၂၀ ရာစုအတွင်းတွင် ယေဟောဝါသည် မိမိ၏နှုတ်ကပါဌ်တော်ရေဖြင့် ဆေးကြောသန့်စင်စေ၍ ယေရှု၏အပြစ်ဖြေရာယဇ်၌ ယုံကြည်ခြင်းကြောင့် ဖြောင့်မတ်ကြောင်းကြေညာပြီး ၁၄၄,၀၀၀ သော ဘိသိက်ခံခရစ်ယာန်များ၏ နောက်ဆုံးအဖွဲ့ဝင်များဖြစ်လာစေရန် လူစုတစ်စုကို တံဆိပ်ခတ်စုသိမ်းနေတော်မူသည်။

၁၇။ (က) ၁၉၃၀ ပြည့်လွန်နှစ်များကတည်းက အဘယ်စုသိမ်းခြင်းဖြစ်ပျက်ခဲ့သနည်း။ (ခ) ဤတွင် ယောဟန် ၃:၃၀ သည်အဘယ်ကြောင့်စိတ်ဝင်စားစရာဖြစ်သနည်း။ (လုကာ ၇:၂၈ လည်းရှု။)

^၁၇ ဘိသိက်ခံအရေအတွက်ပြည့်အောင် ရွေးချယ်ပြီးနောက် မည်သို့ဖြစ်မည်နည်း။ ၁၉၃၅ ၌ အမေရိကန်နိုင်ငံ ဝါရှင်တန်ဒီ.စီ.မြို့တွင်ကျင်းပခဲ့သော အလှည့်အပြောင်းဖြစ်သည့်စည်းဝေးကြီးတစ်ခု၌ ဗျာဒိတ် ၇:၉-၁၇ ပါ ‘လူအုပ်ကြီး’ သည် ၁၄၄,၀၀၀ ပြည့်ပြီး “နောက်ပိုင်း” မှသိသာထင်ရှားလာမည့်အုပ်စုဖြစ်ပြီး ဤသူများအတွက်အကျိုးရလဒ်မှာ ပရဒိသုကမ္ဘာပေါ် ထာဝစဉ်အသက်ရှင်ခြင်းဖြစ်ကြောင်း သိရှိခဲ့ရသည်။ “အခြားသိုး” တစ်ဦးအဖြစ်ကမ္ဘာမြေကြီးပေါ်သို့ ရှင်ပြန်ထမြောက်လာမည့် နှစ်ခြင်းဆရာယောဟန်က ဘိသိက်ခံရှင်ယေရှုကို ရှင်းလင်းပြတ်သားစွာဖော်ပြပြီးနောက် “ထိုသခင်သည်တိုးပွားခြင်းရှိရမည်။ ငါမူကားဆုတ်ယုတ်ခြင်းရှိရမည်” ဟုမေရှိယနှင့်ပတ်သက်၍ ပြောဆိုခဲ့သည်။ (ယောဟန် ၁:၂၉; ၃:၃၀; ၁၀:၁၆; မဿဲ ၁၁:၁၁) ၁၄၄,၀၀၀ ၌ပါဝင်မည့်သူများကို ယေရှုရွေးချယ်တော်မူ၍ အရေအတွက်တိုးများလာနေစဉ် မေရှိယအတွက် တပည့်တော်များပြင်ဆင်ပေးခြင်းဖြစ်သည့် နှစ်ခြင်းဆရာယောဟန်၏လုပ်ငန်းသည် ပြီးဆုံးနေပါသည်။ ၁၉၃၀ ပြည့်လွန်နှစ်များ၌မူ အခြေအနေသည် ပြောင်းပြန်ဖြစ်သွားပါသည်။ ၁၄၄,၀၀၀ ၌ပါဝင်ရန် “အခေါ်ခံရပြီး ရွေးချယ်ခံရ” သူအရေအတွက် လျော့နည်းလာပြီး “အခြားသိုး” မှ “လူအုပ်ကြီး” အရေအတွက်သည် အကြီးအကျယ်တိုးများလာပါသည်။ လောကအစီအစဉ်သည် အာမဂေဒုန်တွင် အဆုံးတိုင်ရန်နီးလာသည်နှင့်အမျှ ယင်းလူအုပ်ကြီး၏အရေအတွက်သည် ဆက်လက်တိုးများလာနေပါသည်။—ဗျာဒိတ် ၁၇:၁၄ခ။

၁၈။ (က) “ယခုအသက်ရှင်သူ သန်းပေါင်းများစွာ ဘယ်တော့မျှမသေကြရ” ဟုအဘယ်ကြောင့်ယုံကြည်စိတ်ချစွာမျှော်လင့်နိုင်သနည်း။ (ခ) ဟဂ္ဂဲ ၂:၄ ကိုအဘယ်ကြောင့် ဇွဲရှိရှိလိုက်နာသင့်သနည်း။

^၁၈ ၁၉၂၀ ပြည့်လွန်နှစ်များ၏အစောပိုင်း၌ ယေဟောဝါသက်သေများသည် “ယခုအသက်ရှင်သူ သန်းပေါင်းများစွာ ဘယ်တော့မျှမသေကြရ” အမည်ရှိလူထုဟောပြောချက်ကို ပေးခဲ့ကြသည်။ ထိုစဉ်က ယင်းစကားသည် မျှော်လင့်ချက်ကြီးမားလွန်းဟန်ရှိပုံဖြစ်ပေမည်။ သို့သော် ယနေ့ထိုစကားများကို ယုံကြည်စိတ်ချမှုအပြည့်နှင့် ပြောဆိုနိုင်ကြပေပြီ။ စာတန့်စနစ်ကုန်ဆုံးချိန်သည် အလွန့်အလွန်နီးကပ်နေကြောင်း ကျမ်းစာပရောဖက်ပြုချက်များကို တိုး၍တိုး၍သိနားလည်လာခြင်းနှင့် အသက်ငင်နေသော ဤလောက၏မင်းမဲ့စရိုက်တို့က ကြွေးကြော်နေသည်တကား! ၁၉၉၆ သတိရအောက်မေ့ပွဲမှတ်တမ်းအရ တက်ရောက်သူ ၁၂,၉၂၁,၉၃၃ အနက် ၈,၇၅၇ (.၀၆၈ ရာခိုင်နှုန်း) ယောက်သာ မုန့်နှင့်စပျစ်ရည်ကိုသုံးဆောင်ခြင်းဖြင့် ကောင်းကင်မျှော်လင့်ချက်ရှိကြောင်းတင်ပြကြပါသည်။ စစ်မှန်သောဝတ်ပြုရေး ပြန်လည်တည်ထောင်ခြင်းသည် ပြီးပြည့်စုံတော့မည်ဖြစ်သည်။ သို့သော် ယင်းလုပ်ငန်းကို ဘယ်သောအခါမျှ လျော့ပေါ့မလုပ်ကြစို့နှင့်။ မှန်ပါသည်၊ ဟဂ္ဂဲ ၂:၄၊ ၅ က ဤသို့ဆိုသည်– “‘အိုပြည်သူပြည်သားအပေါင်းတို့၊ အားယူကြလော့၊ . . . ငါသည် သင်တို့နှင့်အတူရှိ၏’ ဟုထာဝရဘုရားမိန့်တော်မူ၏။” ပစ္စည်းဥစ္စာသာပဓာနစိတ်ထား သို့မဟုတ် လောကီဆန်မှုကြောင့် ယေဟောဝါ၏လုပ်ငန်းတော်အတွက် ကျွန်ုပ်တို့၏စိတ်အားထက်သန်မှုကို မလျော့ပါးသွားစေရန် စိတ်ဆုံးဖြတ်ထားကြစို့လေ။—၁ ယောဟန် ၂:၁၅-၁၇။

၁၉။ ဟဂ္ဂဲ ၂:၆၊ ၇ ၏ပြည့်စုံချက်တွင် ကျွန်ုပ်တို့အဘယ်ကြောင့်ပါဝင်နိုင်မည်နည်း။

^၁၉ “ကောင်းကင်ဗိုလ်ခြေအရှင်ထာဝရဘုရားမိန့်တော်မူသည်ကား၊ ကာလမကြာမမြင့်မီ ကောင်းကင်၊ မြေကြီး၊ ပင်လယ်၊ ကုန်းတို့ကို တစ်ဖန်ငါလှုပ်ဦးမည်။ လူမျိုးအပေါင်းတို့ကိုလည်းငါလှုပ်ဦးမည်။ လူမျိုးအပေါင်းတို့နှစ်သက်ဖွယ်ရာသောအရာသည်ရောက်၍၊ ဤအိမ်ကိုဘုန်းနှင့်ငါပြည့်စုံစေမည်ဟု၊ ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏” ဟုဖော်ပြထားသော ဟဂ္ဂဲ ၂:၆၊ ၇ ၏မျက်မှောက်ခေတ်ပြည့်စုံချက်တွင် ပါဝင်ခွင့်ရခြင်းသည် ဝမ်းသာစရာပါတကား။ ဤ ၂၀ ရာစုနှစ်လောကတွင် လောဘစိတ်၊ ယိုယွင်းမှုနှင့် မုန်းတီးစိတ်တို့ကို အနှံ့အပြားတွေ့ရှိနေရကြ၏။ ဤလောကကြီး၏အဆုံးသည် အမှန်နီးပြီဖြစ်ရာ ယေဟောဝါသည် ကိုယ်တော်၏သက်သေများအား “ဘုရားသခင်အပြစ်ပေးတော်မူရာနေ့ရက်ကာလကို” ကြွေးကြော်စေခြင်းအားဖြင့် စတင် “လှုပ်” နေတော်မူပြီဖြစ်သည်။ (ဟေရှာယ ၆၁:၂) ယင်း ကြိုတင်လှုပ်ခြင်းသည် ဤလောကကြီးပျက်စီးသွားမည့် အာမဂေဒုန်တွင် အထွတ်အထိပ်သို့ရောက်လိမ့်မည်ဖြစ်သော်လည်း ထိုအချိန်မတိုင်မီ ယေဟောဝါသည် စိတ်နှိမ့်ချသော သိုးကဲ့သို့သောသူများဖြစ်သည့် “လူမျိုးအပေါင်းတို့နှစ်သက်ဖွယ်သောအရာ” ကိုမိမိ၏လုပ်ငန်းတော်အတွက် စုသိမ်းနေတော်မူသည်။ (ယောဟန် ၆:၄၄) ဤ “လူအုပ်ကြီး” သည်ကိုယ်တော့်ဝတ်ပြုရာအိမ်တော်၏ မြေကြီးရင်ပြင်တော်တွင် ယခု ‘ဘုရားဝတ်ကိုပြု’ နေကြပါသည်။—ဗျာဒိတ် ၇:၉၊ ၁၅။

၂၀။ တန်ဖိုးအရှိဆုံးဘဏ္ဍာကို အဘယ်မှာတွေ့ရှိနိုင်သနည်း။

^၂၀ ယေဟောဝါ၏ဝိညာဏဗိမာန်တော်တွင် အမှုတော်ထမ်းခြင်းသည် မည်သည့်ဘဏ္ဍာထက်မဆို သာ၍တန်ဖိုးရှိပါသည်။ (သု. ၂:၁-၆; ၃:၁၃၊ ၁၄; မဿဲ ၆:၁၉-၂၁) ထို့ပြင် ဟဂ္ဂဲ ၂:၉ ကဤသို့ဆိုသည်– “နောက်တည်သောဤအိမ်တော်သည် အရင်အိမ်တော်ထက် ဘုန်းသာ၍ကြီးလိမ့်မည်ဟု ကောင်းကင်ဗိုလ်ခြေအရှင်ထာဝရဘုရား မိန့်တော်မူ၏။ ဤအရပ်၌လည်း ငြိမ်သက်ခြင်းကိုငါပေးမည်ဟု ကောင်းကင်ဗိုလ်ခြေအရှင်ထာဝရဘုရားမိန့်တော်မူ၏။” ဤစကားများကား ယနေ့ကျွန်ုပ်တို့အတွက် အဘယ်အဓိပ္ပာယ်ရှိသနည်း။ နောက်ဆောင်းပါးက ဖော်ပြပါလိမ့်မည်။

[အောက်ခြေမှတ်ချက်များ]

ပြန်လည်စစ်ဆေးရန် မေးခွန်းများ

◻ ယေဟောဝါ၏နာမတော်နှင့်ပတ်သက်၍ ပရောဖက်များ၏ အဘယ်ပုံနမူနာကိုလိုက်သင့်သနည်း။

◻ ပြန်လည်တည်ထောင်လာသော ဣသရေလနိုင်ငံကို ယေဟောဝါမိန့်မြွက်တော်မူသည့် တန်ခိုးပါသတင်းမှ အဘယ်အားပေးမှုရရှိသနည်း။

◻ ယနေ့ အဘယ်ဘုန်းထွန်းတောက်သော ဝိညာဏဗိမာန်တော်ပြုပြင်ဆောင်ရွက်နေသနည်း။

◻ ၁၉ ရာစုနှင့် ၂၀ ရာစုများအတွင်း အစီအစဉ်လိုက်အဘယ်စုသိမ်းခြင်းများဖြစ်ပျက်ခဲ့၍ အဘယ်ကြီးမြတ်သောမျှော်လင့်ချက်အတွက်ဖြစ်သနည်း။

[စာမျက်နှာ ၇ ပါ ရုပ်ပုံ]

ယေဟောဝါ၏ကောင်းကင်ဗိုလ်ခြေတို့သည်ကမ္ဘာပေါ်ရှိ ကိုယ်တော်၏သက်သေခံများကိုညွှန်ကြားထောက်မပေး