ဘုရားသခင့်နိုင်ငံတော်ကြွေးကြော်သူများမှတ်တမ်း

ယခင်ကဆန့်ကျင်သူတစ်ဦး အမှန်တရားသိရှိလာ

လိုင်ဘေးရီးယားပြည်တွင်းစစ်အကြောင်း သတင်းတွင် များစွာဖော်ပြခဲ့သည်။ ထောင်ပေါင်းများစွာတို့သည် အသက်ဆုံးခဲ့ရပြီး ပို၍များသောသူတို့သည် စစ်ပြေးဒုက္ခသည်များဖြစ်ခဲ့ကြရသည်။ ဤအခက်အခဲများကြားမှ နှလုံးရိုးဖြောင့်သူများသည် အောက်ပါတွေ့ ကြုံမှုကဖော်ပြသည့်အတိုင်း အမှန်တရားကို ဆက်၍လက်ခံနေကြသည်။

အသက်ဆယ်နှစ်မှစ၍ ဂျိမ်းစ်သည် လူသရင်ချာ့ချ်တွင် ပညာသင်ခဲ့သည်။ ချာ့ချ်၏သတင်းစာအယ်ဒီတာတစ်ဦးဖြစ်လာပြီးနောက် သူသည် မိမိ၏ရာထူးကိုအသုံးပြုကာ ယေဟောဝါသက်သေများအကြောင်း ဆန့်ကျင်ရေးသားခဲ့သည်။ သူတို့ကို တစ်ခါမျှမတွေ့ ဖူးပါလျက်နှင့် ထိုသို့ရေးသားခဲ့ခြင်းဖြစ်၏။

အချိန်အတန်ကြာသော် ဂျိမ်းစ်သည် ချာ့ချ်သတင်းစာမှထွက်ပြီး အောင်မြင်သောမိုတယ်ပိုင်ရှင်တစ်ဦးဖြစ်လာလေသည်။ တစ်နေ့ သူ၏မိုတယ်ဧည့်ခန်းတွင်ထိုင်နေစဉ် သပ်သပ်ရပ်ရပ်ဝတ်ဆင်ထားသောညီအစ်မနှစ်ယောက်သည် သူ့ထံရောက်လာသည်။ သပ်ရပ်စွာဝတ်ဆင်ထားသည်ကို တွေ့ရသည့်အခါ သူတို့အား အထဲသို့ဖိတ်ခေါ်ခဲ့သည်။ သို့သော် သူတို့လည်ပတ်မှု၏ရည်ရွယ်ချက်ကို ရှင်းပြသည့်အခါ သူက “စကားပြောဖို့ အချိန်မရှိဘူး” ဟုဆို၏။ သက်သေခံများသည် သူ့အား ကင်းမျှော်စင်နှင့် နိုးလော့!နှစ်စဉ်ကြေးကမ်းလှမ်းရာ သူတို့ကိုထွက်သွားစေလိုသောကြောင့်သာ လက်ခံခဲ့သည်။ ၁၂ လတိုင် မဂ္ဂဇင်းများ သူ့အိမ်သို့ရောက်လာသော်လည်း မဂ္ဂဇင်းပတ်စက္ကူကိုပင်မခွာဘဲ ယင်းတို့ကို ပလတ်စတစ်အိတ်တစ်ခုထဲထည့်ထားသည်။

ပြည်တွင်းစစ်အပြင်းအထန်ဖြစ်ပွားလေရာ ဂျိမ်းစ်သည် တိုက်ပွဲအရိပ်အခြည်စတွေ့သည်နှင့် ထွက်ပြေးရန် ငွေနှင့်အဖိုးတန်ပစ္စည်းများကို အိတ်တစ်လုံးဖြင့်ထုပ်ပိုးပြင်ဆင်ထား၏။ နံနက်ခင်းတစ်ခု၌ သူ၏အိမ်နောက်ဖေးတံခါးနောက်တွင် လက်ပစ်ဗုံးတစ်လုံးပေါက်ကွဲရာ ကြောက်အားလန့်အားဖြင့် သူ့အိတ်ကိုဆွဲယူကာ အသက်လုပြေးခဲ့သည်။ ထောင်နှင့်ချီသော ရှောင်ပြေးကြရသည့်အရပ်သားများနှင့်အတူ သူသည် စစ်ဆေးရေးဂိတ်အတော်များများကို ဖြတ်ကျော်ခဲ့ရသည်။ ထိုတွင် အပြစ်မဲ့သောအရပ်သားများသည် အကြောင်းထွေထွေထူးထူးမရှိဘဲ အလုခံရ၊ အသတ်ခံရလေ့ရှိသည်။

ပထမဂိတ်တွင် ဂျိမ်းစ်အား မေးခွန်းအနည်းအကျဉ်းမေးကာ အိတ်ကိုဖွင့်ခိုင်းသည်။ သူသည် အိတ်ကိုဖွင့်ပြီး သေသေချာချာကြည့်လိုက်ရာ အလွန်အံ့အားသင့်ခဲ့ရသည်။ သူယူလာသည့်အိတ်သည် အဖိုးတန်ပစ္စည်းများထည့်ထားသည့်အိတ် မဟုတ်မှန်းသိလိုက်ရ၍ တုန်လှုပ်ချောက်ချားသွား၏။ သူသည် ကမန်းကတန်းဖြင့် မဖွင့်ရသေးသော ကင်းမျှော်စင်နှင့် နိုးလော့!မဂ္ဂဇင်းများထည့်ထားသည့်အိတ်ကို ကောက်ယူမိခဲ့သည်။ သို့ရာတွင် စစ်သားက မဂ္ဂဇင်းများကိုကြည့်ပြီး ကပ်ထားသည့်စာတန်းပါ သူ့နာမည်ကိုဖတ်ရသောအခါ သူက “အိုး၊ မင်းဟာ ယေဟောဝါသက်သေတစ်ဦးပဲ။ မင်းတို့ကို ငါတို့ရှာနေတာမဟုတ်ဘူး၊ မင်းတို့ မလိမ်ကြဘူးဆိုတာ ငါတို့သိတယ်” ဟုပြောသည်။ အိတ်ထဲမှ မဂ္ဂဇင်းအချို့ကိုယူပြီးနောက် စစ်သားက ဂျိမ်းစ်အား ဆက်သွားခိုင်းသည်။

ဂျိမ်းစ်စစ်ဆေးခံခဲ့ရသည့် ဂိတ်ကိုးဂိတ်စလုံးတွင် စစ်ဗိုလ်အားလုံးက သူ့အား ယေဟောဝါသက်သေတစ်ဦးဟုထင်ကာ ဘာမျှအန္တရာယ်မပြုဘဲ လွှတ်ပေးခဲ့သည့်အဖြစ်ကြုံတွေ့ ခဲ့ရသည်။ ယခုမှ ဂျိမ်းစ်သည် သူ၏အဖိုးတန်ပစ္စည်းများကို မယူလာခဲ့မိသည်ကို ကျေးဇူးတင်နေသည်။ အကြောင်းမှာ သူမြင်ခဲ့ရသည့်အတိုင်း သူသည် သူ့အဖိုးတန်ပစ္စည်းများကြောင့် အသတ်ခံရဖို့ သေချာလုနီးပါးဖြစ်သောကြောင့်ပင်။

သူသည် နောက်ဆုံးဖြစ်သည့် ကြောက်စရာအကောင်းဆုံးဂိတ်ကိုရောက်သည့်အခါ လူသေအလောင်းအတော်များများကိုတွေ့ ခဲ့ရ၍ အလွန်ထိတ်လန့်သွားသည်။ ကြောက်အားလန့်အားဖြင့် ယေဟောဝါ၏နာမတော်ကို သူအော်ခေါ်လိုက်သည်။ ဘုရားသခင်သည် မိမိအား ဤလူသတ်ကွင်းမှလွတ်အောင် ကူညီပေးမည်ဆိုလျှင် ကိုယ်တော်အားတစ်သက်လုံးဝတ်ပြုပါမည်ဟု သူဆုတောင်းခဲ့၏။

ဂျိမ်းစ်သည် သူ့အိတ်ကို စစ်သားများအားပေးလိုက်ရာ သူတို့က “ဒီလူတွေကို ငါတို့ရှာနေတာမဟုတ်ဘူး” ဟုပြောပြန်သည်။ သူ့ဘက်လှည့်၍ သူတို့က “မင်းရဲ့ညီအစ်ကိုတစ်ယောက် ဒီတောင်ကုန်းအောက်မှာနေတယ်။ သူနဲ့အတူသွားနေချေ” ဟုထပ်ပြော၏။ ဤအချိန်တိုင်လေသော် ယေဟောဝါသက်သေများအပေါ် ဂျိမ်းစ်၏သဘောထား လုံးဝပြောင်းလဲသွားလေပြီ။ ထိုအခါ သူသည် ချက်ချင်းပင် ညီအစ်ကိုနှင့်သွားရောက်တွေ့ဆုံကာ သင်သည်ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည်စာအုပ်ဖြင့် ကျမ်းစာလေ့လာရန်စီစဉ်ခဲ့သည်။a

ရက်အနည်းငယ်ကြာသော် ချင်းနင်းဝင်ရောက်တိုက်ခိုက်မှုတစ်ခုကြောင့် သူထွက်ပြေးတိမ်းရှောင်ခဲ့ရ၏။ ဤအချိန်တွင် ဂျိမ်းစ်သည် သူ၏ထာဝစဉ်အသက်ရှင်စာအုပ်ကိုသာ ကျစ်ကျစ်ပါအောင်ဆုပ်ပြီး ချုံပုတ်ထဲသို့ပြေး၏! ယေဟောဝါသက်သေများနှင့် ၁၁ လအဆက်အသွယ်ပြတ်နေချိန်တွင် သူသည် စာအုပ်တစ်အုပ်လုံးကို ငါးကြိမ်တိုင်ဖတ်ပြီးသားဖြစ်နေသည်။ နောက်ဆုံး သူသည် မြို့သို့ပြန်လာနိုင်သည့်အခါ ယေဟောဝါသက်သေများနှင့် ကျမ်းစာပြန်သင်ကာ အလျင်အမြန်တိုးတက်လာလေသည်။ မကြာမီမှာပင် သူသည် နှစ်ခြင်းခံယူကာ ယခုအခါ သူ၏ဝိညာဉ်ရေးညီအစ်ကိုများနှင့်အတူ သစ္စာရှိစွာအမှုတော်ဆောင်လျက်ရှိပါသည်။

[အောက်ခြေမှတ်ချက်များ]