ဘုရားသခင်သည် ဆုတောင်းချက်များကို ဖြေကြားတော်မူ

မကြာခဏ နှလုံးပါပါဆုတောင်းခြင်းဖြင့် ကော်နေလိသည် ဘုရားသခင့်မျက်နှာသာရဖို့ ကြိုးစားခဲ့သူတစ်ဦးဖြစ်သည်။ ထို့အပြင် တပ်မှူးတစ်ဦးအနေနှင့် သူ၏ရာထူးကို ကောင်းစွာအသုံးချခဲ့သည်။ သမ္မာကျမ်းစာအရ သူသည် ဆင်းရဲသူတို့အား “များစွာသောစွန့်ကြဲခြင်းကိုပြု” ခဲ့သည်။—တမန်တော် ၁၀:၁၊ ၂။

ထိုအချိန်က ခရစ်ယာန်အသင်းတော်ကို ယုံကြည်သူဂျူးများ၊ ဘာသာဝင်များနှင့် ရှမာရိလူတို့ဖြင့် ဖွဲ့စည်းထားသည်။ ကော်နေလိသည် အရေဖျားမလှီးသောတစ်ပါးအမျိုးသားဖြစ်ကာ ခရစ်ယာန်အသင်းတော်သားတစ်ဦးမဟုတ်ခဲ့ပေ။ ယင်းကြောင့် သူ၏ဆုတောင်းချက်များသည် အချည်းနှီးဖြစ်ခဲ့သည်ဟု ဆိုလိုပါသလော။ မဆိုလိုပါ။ ယေဟောဝါဘုရားသခင်သည် ကော်နေလိနှင့် သူ၏စိတ်အားထက်သန်သောလုပ်ရပ်များကို သတိပြုမှတ်သားခဲ့သည်။—တမန်တော် ၁၀:၄။

ကောင်းကင်တမန်၏ညွှန်ကြားမှုဖြင့် ကော်နေလိသည် ခရစ်ယာန်အသင်းတော်နှင့် အဆက်အသွယ်ရခဲ့သည်။ (တမန်တော် ၁၀:၃၀-၃၃) ရလဒ်အနေနှင့် သူနှင့်သူ၏အိမ်သားများသည် အရေဖျားမလှီးသောတစ်ပါးအမျိုးသားများတွင် ဦးဆုံးခရစ်ယာန်အသင်းတော်သားများဖြစ်ခွင့် ရရှိခဲ့ကြသည်။ ကော်နေလိ၏ကိုယ်ပိုင်တွေ့ ကြုံမှုကို သမ္မာကျမ်းစာမှတ်တမ်း၌ပါသင့်သည်ဟု ယေဟောဝါဘုရားသခင်ယူမှတ်ခဲ့သည်။ သူ၏အသက်တာကို ဘုရားသခင့်စံနှုန်းများနှင့် လုံးဝညီညွတ်စေရန် အပြောင်းအလဲများစွာပြုလုပ်ခဲ့မည်မှာသေချာသည်။ (ဟေရှာယ ၂:၂-၄; ယောဟန် ၁၇:၁၆) ကော်နေလိ၏တွေ့ ကြုံမှုသည် ယနေ့ ဘုရားသခင့်မျက်နှာသာတော်နှင့်တွေ့လိုသူ လူမျိုးအပေါင်းမှလူတို့အတွက် ကြီးမားသည့်အားပေးမှုဖြစ်သင့်သည်။ နမူနာအချို့ကို သုံးသပ်ကြည့်ပါ။

မျက်မှောက်ခေတ်နမူနာများ

အိန္ဒိယနိုင်ငံရှိ အမျိုးသမီးငယ်တစ်ဦးသည် နှစ်သိမ့်မှုအကြီးအကျယ်လိုအပ်နေသည်။ အသက် ၂၁ တွင်အိမ်ထောင်ကျကာ ကလေးနှစ်ယောက်ရခဲ့သည်။ သို့သော် ဒုတိယမြောက်ကလေးမွေးပြီးမကြာမီ သူ၏ခင်ပွန်းသေဆုံးသွားသည်။ ရုတ်တရက်မမျှော်လင့်ဘဲ သူ၏အသက် ၂၄ နှစ်တွင် ၂ လသမီးကလေးတစ်ဦး၊ ၂၂ လသားကလေးတစ်ဦးတို့နှင့် မုဆိုးမဖြစ်ခဲ့ရသည်။ သူ နှစ်သိမ့်မှုလိုအပ်နေသည်မှာ အံ့ဩစရာမဟုတ်ပါ! မည်သူ့ကိုအားကိုးနိုင်မည်နည်း။ တစ်ညတွင် အလွန်ဝမ်းနည်းကြေကွဲစွာဖြင့် “ကောင်းကင်ခမည်းတော်၊ ကျေးဇူးပြု၍ ကိုယ်တော့်နှုတ်မြွက်စကားတော်အားဖြင့် ကျွန်မကိုနှစ်သိမ့်တော်မူပါ” ဟူ၍ဆုတောင်းလေသည်။

နောက်နေ့နံနက်တွင် သူ့ထံသို့ ဧည့်သည်တစ်ဦးရောက်လာသည်။ ထိုသူသည် ယေဟောဝါသက်သေတစ်ဦးဖြစ်သည်။ ထိုနေ့၌ တစ်အိမ်မှတစ်အိမ် သူအမှုဆောင်ရာတွင် အိမ်တံခါးဖွင့်ပေးမည့်သူမရှိသလောက်ဖြစ်သောကြောင့် စိတ်ပျက်နေရသည်။ မောပန်းပြီး အတော်ပင်စိတ်ဓာတ်ကျနေရာ သူအိမ်ပြန်တော့မည်ဆဲဆဲတွင် နောက်ထပ်တစ်အိမ်ကိုဆက်သွားရန် တိုက်တွန်းခံခဲ့ရသည်။ ထိုအိမ်တွင် မုဆိုးမငယ်ကို သူတွေ့ခဲ့သည်။ အမျိုးသမီးငယ်သည် သူ့အား အိမ်ထဲဖိတ်ခေါ်ကာ သမ္မာကျမ်းစာကိုရှင်းပြသည့် စာပေတစ်ခုကိုလက်ခံယူလိုက်သည်။ ထိုစာပေကိုဖတ်ရှုရခြင်း၊ သက်သေခံနှင့်ဆွေးနွေးရခြင်းတို့မှ ထိုအမျိုးသမီးသည် အလွန်နှစ်သိမ့်မှုရခဲ့သည်။ လူသေများကို ရှင်ပြန်ထမြောက်စေမည်ဟူသော ဘုရားသခင့်ကတိတော်နှင့် မကြာမီ မြေကြီးကိုပရဒိသုဖြစ်စေမည့် ဘုရားသခင့်နိုင်ငံတော်အကြောင်းတို့ကို သူသိခဲ့ရသည်။ အရေးအကြီးဆုံးမှာ သူ၏ဆုတောင်းချက်ကိုနားညောင်းသည့် စစ်မှန်သောဘုရားသခင် ယေဟောဝါကို သိ၍ချစ်မြတ်နိုးလာခြင်းပင်ဖြစ်သည်။

တောင်အာဖရိကနိုင်ငံ၊ ဂျော့ဂ်ျမြို့တွင်နေထိုင်သော နိုရာ သည် အချိန်ပြည့်ဧဝံဂေလိလုပ်ငန်းတွင်ပါဝင်ရန် လတစ်လကိုသတ်မှတ်ထားသည်။ လုပ်ငန်းမစမီ ကျမ်းစာကို အမှန်တကယ်လေ့လာလိုသူတစ်ဦးနှင့် တွေ့ရှိရရန်ကူညီပေးဖို့ ယေဟောဝါထံ စိတ်အားထက်သန်စွာ သူဆုတောင်းခဲ့သည်။ အမှုဆောင်ရန် သူ့ကိုပေးထားသည့်ရပ်ကွက်တွင် ယခင်လည်ပတ်စဉ်က နိုရာအား အလွန်ရိုင်းစိုင်းစွာဆက်ဆံခဲ့သူတစ်ဦး၏အိမ်ရှိသည်။ နိုရာသည် သတ္တိမွေးကာ ထိုအိမ်သို့ပြန်သွားခဲ့သည်။ နိုလင်းဟုအမည်ရှိသောအိမ်ငှားအသစ်တစ်ဦးသည် ထိုအိမ်သို့ပြောင်းရွှေ့လာသည်ကိုတွေ့ရ၍ သူအံ့သြခဲ့ရသည်။ ထို့အပြင် နိုလင်းနှင့် သူ၏မိခင်သည် ကျမ်းစာကိုနားလည်ရန်အကူအညီရဖို့ ဘုရားသခင်ထံ ဆုတောင်းထားကြသည်။ “သူတို့ကို ကျွန်မကျမ်းစာသင်အံမှုကမ်းလှမ်းတဲ့အခါ သူတို့ဝမ်းသာကြတယ်” ဟူ၍နိုရာကရှင်းပြသည်။ နိုလင်းနှင့်သူ၏မိခင်သည် အလျင်အမြန်တိုးတက်လာသည်။ အချိန်တန်သော် သူတို့နှစ်ဦးစလုံးသည် နိုရာနှင့်အတူ ဝိညာဉ်ရေးကုသမှုလုပ်ငန်းတွင် စတင်ပါဝင်ခဲ့ကြသည်။

ဆုတောင်းခြင်း၏တန်ခိုးကိုဖော်ပြသည့် အခြားနမူနာတစ်ခုမှာ တောင်အာဖရိကနိုင်ငံရှိ ဂျိုဟန်နက်စ်ဘာ့ဂ်မြို့တွင်နေထိုင်ကြသော မောင်နှံတစ်စုံ၏အကြောင်းဖြစ်သည်။ ၁၉၉၆ ခုနှစ်၊ စနေနေ့တစ်ညတွင် ဒဲနစ္စနှင့် ကယ်ရယ်လ် တို့၏အိမ်ထောင်သည် ပြိုကွဲလုဆဲဆဲဖြစ်ခဲ့သည်။ နောက်ဆုံးအနေဖြင့် သူတို့အကူအညီရရှိရန် ဆုတောင်းဖို့ဆုံးဖြတ်ကြပြီး ညဉ့်နက်သည်အထိ အကြိမ်ကြိမ်ဆုတောင်းခဲ့ကြသည်။ နောက်နေ့နံနက် ၁၁ နာရီတွင် ယေဟောဝါသက်သေနှစ်ဦးသည် သူတို့၏တံခါးကိုလာခေါက်သည်။ တံခါးကိုဒဲနစ္စဖွင့်ပေးခဲ့ရာ မိမိ၏ဇနီးကိုခေါ်ပေးမည်၊ စောင့်နေပါဟု သူတို့အားပြောသည်။ ထို့နောက် ဒဲနစ္စက သက်သေခံများကို အထဲသို့ဖိတ်ခေါ်လိုက်လျှင် ပြန်မောင်းထုတ်ဖို့ခက်နေမည်ဟု ကာရယ်လ်အားသတိပေးခဲ့သည်။ ကယ်ရယ်လ်က မိမိတို့သည် အကူအညီရဖို့ဆုတောင်းထားရာ ဤမည်ကား မိမိတို့၏ဆုတောင်းချက်များကို ဘုရားသခင်ဖြေကြားခြင်းဖြစ်နိုင်သည်ဟု ဒဲနစ္စအားပြန်ပြောသည်။ သို့နှင့် သက်သေခံများကို အထဲသို့ဖိတ်ခေါ်လိုက်ကာ ထာဝရအသက်ရစေသောအသိပညာ စာအုပ်ဖြင့် ကျမ်းစာသင်အံမှုစခဲ့ကြသည်။ ဒဲနစ္စနှင့် ကယ်ရယ်လ်တို့သည် သူတို့သိရှိလာသည့်အကြောင်းများကြောင့် ဝမ်းသာပီတိဖြစ်ကြသည်။ ထိုနေ့မွန်းလွဲပိုင်းတွင်ပင် ယေဟောဝါသက်သေတို့၏ ဒေသခံဘုရားသခင့်နိုင်ငံတော်ခန်းမတွင် ပထမဆုံးအနေဖြင့် စည်းဝေးတက်ခဲ့ကြသည်။ သမ္မာကျမ်းစာမှ လေ့လာသိရှိခဲ့ရသည့်အသိပညာကို လက်တွေ့ကျင့်သုံးခြင်းအားဖြင့် ဒဲနစ္စနှင့် ကယ်ရယ်လ်တို့သည် သူတို့၏အိမ်ထောင်ရေးပြဿနာများအတွက် ဖြေရှင်းနည်းများကို တွေ့ရှိခဲ့ကြသည်။ ယခု သူတို့သည် ပျော်ရွှင်သည့် နှစ်ခြင်းခံပြီးသော ယေဟောဝါအားချီးမွမ်းသူများဖြစ်ကြကာ သူတို့၏ကျမ်းစာအခြေပြုယုံကြည်ချက်များကို အိမ်နီးချင်းများအား မှန်မှန်ဝေမျှနေကြသည်။

ဆုတောင်းဖို့ မထိုက်တန်ဟု သင်ခံစားရလျှင်ကော

စိတ်ရင်းမှန်ရှိသူအချို့သည် သူတို့၏ဘဝလမ်းဆိုးကြောင့် ဆုတောင်းဖို့မထိုက်တန်ဟု ခံစားရပေမည်။ ယေရှုခရစ်က ထိုကဲ့သို့သောသူတစ်ဦးဖြစ်သည့် အထင်အမြင်သေးခံရသောအခွန်ခံတစ်ဦး၏အကြောင်းကို ပြောပြခဲ့သည်။ ဤသူသည် ဗိမာန်တော်ဝင်းထဲသို့ဝင်ပြီး ထုံးစံအရဆုတောင်းသည့်နေရာသို့သွားရန် မထိုက်တန်ဟု ခံစားခဲ့ရသည်။ “အဝေးကရပ်၍ . . . [သူသည်] ရင်ပတ်ကိုခတ်လျက် ‘အိုဘုရားသခင် အပြစ်များသောအကျွန်ုပ်ကို သနားခြင်းကရုဏာစိတ်ရှိတော်မူပါ’ ဟုဆုတောင်းလေ၏။” (လုကာ ၁၈:၁၃) ယေရှုပြောပြချက်အရ ဤသူသည် နားညောင်းခံခဲ့ရ၏။ ယေဟောဝါဘုရားသခင်သည် စိတ်ရင်းမှန်သော နောင်တရသည့်အပြစ်သားများကို အမှန်တကယ်ပင် သနားခြင်းကရုဏာစိတ်ရှိပြီး အကူအညီပေးလိုကြောင်း ယင်းကသက်သေထူသည်။

ပေါလ် အမည်ရှိ တောင်အာဖရိကမှလူငယ်တစ်ဦးကို သုံးသပ်ကြည့်ပါ။ ကလေးဘဝတွင် ပေါလ် သည် သူ၏မိခင်နှင့်အတူ ခရစ်ယာန်အစည်းအဝေးများကိုတက်ရောက်ဖူးသည်။ သို့သော် အထက်တန်းပညာသင်နှစ်များအတွင်း ဘုရားသခင့်လမ်းစဉ်ကိုမလိုက်လျှောက်သည့် လူငယ်များနှင့် သူစတင်ပေါင်းသင်းလာလေသည်။ ကျောင်းထွက်ပြီးနောက် တောင်အာဖရိကနိုင်ငံ၏ ယခင်လူဖြူလူမည်းခွဲခြားသည့်အစိုးရ၏စစ်တပ်တွင် သူအမှုထမ်းခဲ့သည်။ ထိုနောက် မမျှော်လင့်ဘဲ သူ့ရည်းစားက သူ့ကိုအဆက်ဖြတ်ခဲ့သည်။ ဤဘဝင်မကျသောဘဝလမ်းစဉ်က ပေါလ်ကို အလွန်စိတ်ဓာတ်ကျစေ၏။ “ဘုရားသခင်ကို စိတ်ရင်းမှန်နဲ့မချဉ်းကပ်တာ နှစ်ချီရှိပေမဲ့ တစ်ညနေခင်းမှာ ယေဟောဝါကို ကျွန်တော်ဆုတောင်းပြီး အကူအညီတောင်းတယ်” ဟူ၍သူပြန်ပြောပြသည်။

ဤသို့ဆုတောင်းပြီးမကြာမီတွင် ပေါလ် ၏မိခင်သည် သူ့အား နှစ်စဉ်ကျင်းပသော ခရစ်တော်၏သေခြင်းဆိုင်ရာ အောက်မေ့ရာပွဲကို တက်ရောက်ရန်ဖိတ်ခေါ်သည်။ (လုကာ ၂၂:၁၉) သူသည် ထင်ရာစိုင်းခဲ့ပြီး ကျမ်းစာကိုနည်းနည်းမျှစိတ်ဝင်စားမှုမပြခဲ့သော်လည်း သူ၏မိခင်က ဤသို့ဖိတ်ခေါ်ခြင်းသည် ထူးခြား၏ဟု ပေါလ်ထင်မှတ်ခဲ့သည်။ “ဒီဖိတ်ခေါ်ချက်ဟာ ကျွန်တော့်ရဲ့ဆုတောင်းချက်ကို ယေဟောဝါဖြေကြားပေးတာပဲဖြစ်မယ်လို့ ကျွန်တော်ရှုမြင်ပြီး ပြန်တုံ့ပြန်ရမယ်လို့ ယူဆခဲ့တယ်။” ထိုအချိန်မှစ၍ ပေါလ်သည် ခရစ်ယာန်အစည်းအဝေးအားလုံးကို ပြန်တက်လေသည်။ လေးလသာကျမ်းစာသင်ပြီးနောက် နှစ်ခြင်းခံရန်အရည်အချင်းပြည့်မီလာသည်။ ထို့အပြင် သူသည် အင်ဂျင်နီယာသင်တန်းများကို မတက်တော့ဘဲ အချိန်ပြည့်ဧဝံဂေလိလုပ်ငန်းကို လုပ်ကိုင်ဖို့ရွေးချယ်ခဲ့သည်။ ယနေ့ ပေါလ်သည် ပျော်ရွှင်သူတစ်ဦးဖြစ်ကာ သူ၏ယခင်အသက်တာနှင့်ပတ်သက်၍ စိတ်ဓာတ်မကျတော့ချေ။ သူသည် လွန်ခဲ့သည့် ၁၁ နှစ်လုံးလုံး တောင်အာဖရိကရှိ ကင်းမျှော်စင်အသင်း၏ဌာနခွဲရုံးတွင် အမှုထမ်းခဲ့သည်။

မှန်ပါသည်၊ ယေဟောဝါဘုရားသခင်သည် ဆုတောင်းချက်များကို သနားခြင်းကရုဏာစိတ်ဖြင့် ဖြေကြားတော်မူပြီး “ကိုယ်တော်အား ထက်သန်စွာရှာသူတို့ကို ဆုချတော်မူသောအရှင်ဖြစ်” သည်။ (ဟေဗြဲ ၁၁:၆၊ ကဘ) မကြာမီ ယေဟောဝါ၏နေ့ကြီးသည် ရောက်လာကာ ဆိုးသွမ်းမှုမှန်သမျှကို အဆုံးတိုင်စေမည်ဖြစ်သည်။ ဤအချိန်အတောအတွင်း အရေးကြီးသောသက်သေခံခြင်းလုပ်ငန်းတွင် ဇွဲနပဲနှင့်ပါဝင်နေကြစဉ် ခွန်အားနှင့်လမ်းညွှန်မှုပေးပါရန်တောင်းဆိုသော မိမိလူမျိုး၏ဆုတောင်းချက်များကို ယေဟောဝါဖြေကြားပေးနေပါသည်။ သို့ဖြင့် လူမျိုးအပေါင်းမှ သန်းပေါင်းများစွာသောသူတို့သည် ခရစ်ယာန်အသင်းတော်နှင့်အဆက်အသွယ်ရကာ ထာဝရအသက်ရစေသောကျမ်းစာအသိပညာသိရှိရန် ကောင်းချီးကိုခံစားနေကြရပါသည်။—ယောဟန် ၁၇:၃။

[စာမျက်နှာ ၅ ပါ ရုပ်ပုံ]

ကော်နေလိ၏နှလုံးပါပါတောင်းသော ဆုတောင်းချက်ကြောင့် တမန်တော်ပေတရု၏လည်ပတ်ခြင်းကိုခံခဲ့ရ

[စာမျက်နှာ ၆ ပါ ရုပ်ပုံ]

စိတ်သောကရောက်ရသည့်ကာလများ တစ်လျှောက် ဆုတောင်းခြင်းသည် များစွာသောသူတို့ကို ကူညီပေးခဲ့ပြီ

[စာမျက်နှာ ၇ ပါ ရုပ်ပုံ]

သမ္မာကျမ်းစာကိုနားလည်ရန် အကူအညီရဖို့အတွက် ဆုတောင်းလျှင်ကောင်းသည်

မောင်နှံစုံတို့သည် မိမိတို့၏အိမ်ထောင်ခိုင်မြဲရန် အကူအညီရဖို့ ဆုတောင်းနိုင်