ယေဟောဝါ၏ ဖန်ဆင်းခြင်းလက်ရာ ခံ့ညားထည်ဝါမှု ‘မြစ်တို့သည် လက်ခုပ်တီးကြစေ’

ကမ္ဘာ့မြေပုံကိုကြည့်သည့်အခါ နေရာဒေသအများစု၌ ကုန်းမြေပေါ်တွင် ယှက်နွှယ်နေသည့် မြွေလိမ်မြွေကောက်လိုင်းများစွာကို သင်တွေ့ရပေမည်။ ၎င်းတို့သည် လွင်ပြင်များ၊ ကန္တာရများနှင့် မြက်ခင်းပြင်များကို ဖြတ်ကျော်သွားကြသည်။ ချိုင့်ဝှမ်းများ၊ ချောက်နက်ကြီးများနှင့် သစ်တောများထဲ ကွေ့ကောက်ရစ်ပတ်သွားကြသည်။ (ဟဗက္ကုတ် ၃:၉) ၎င်းတို့မှာ ကျွန်ုပ်တို့ကမ္ဘာဂြိုဟ်၏ အသက်သွေးကြောဖြစ်သော မြစ်ချောင်းများဖြစ်သည်။ ထိုရေစီးကြောင်းများသည် မြေကြီးကိုဖန်ဆင်းသောအရှင် ယေဟောဝါ၏ ဉာဏ်ပညာနှင့် တန်ခိုးတော်တို့ကို ထင်ရှားစေသည်။ ယင်းတို့ကို ကျွန်ုပ်တို့သတိပြုကြည့်သည့်အခါ ဤသို့သီဆိုခဲ့သော ဆာလံဆရာ၏ သဘောထားမျိုးရှိကြပေမည်– “ထာဝရဘုရား[သခင်]ရှေ့တော်၌ ... မြစ်တို့သည် လက်ခုပ်တီး၍ တောင်ရှိသမျှတို့သည်လည်း ရွှင်လန်းကြစေ။”—ဆာလံ ၉၈:၇၊ ၈။a

မြစ်များသည် လူ့သမိုင်းနှင့် အလွန်ဆက်စပ်သည်။ ဧဒင်အရပ်ထဲမှ စီးထွက်သောမြစ်တစ်စင်းသည် လေးဖြာကွဲ၍ မြစ်မလေးသွယ်ဖြစ်သွားသည့်အကြောင်းကို သမ္မာကျမ်းစာကဖော်ပြ၏။ (ကမ္ဘာဦး ၂:၁၀-၁၄) အရှေ့အလယ်ပိုင်းဒေသမှ တိုက်ဂရစ္စမြစ်နှင့် ယူဖရေးတီးစ်မြစ်အကြားရှိ မြေသြဇာကောင်းသော ချိုင့်ဝှမ်းဒေသတွင် အစောဆုံးလူ့ယဉ်ကျေးမှုတစ်ခု ထွန်းကားခဲ့သည်။ တရုတ်ပြည် မြစ်ဝါမြစ်၊ အာရှတိုက်တောင်ပိုင်းရှိ ဂင်္ဂါမြစ်နှင့် အိန္ဒုမြစ်၊ အီဂျစ်ပြည်၏ နိုင်းလ်မြစ်တို့ကြောင့် ယဉ်ကျေးမှုကြီးများ ထွန်းကားလာနိုင်ခဲ့သည်။

ထို့ကြောင့် မြစ်များ၏စွမ်းအား၊ ယင်းမှရသောအလျှံပယ်အထောက်အပံ့များ၊ မြစ်တို့၏ လှပတင့်တယ်မှုတို့ကို လူတို့မြင်သည့်အခါ အမြဲလိုလို မှင်တက်မိကြခြင်းကို နားလည်သဘောပေါက်နိုင်ပါသည်။ အီဂျစ်ပြည်မှ နိုင်းလ်မြစ်သည် မိုင်ပေါင်း ၄,၁၅၀ ခန့်ရှည်သည်။ တောင်အမေရိကမှ အမေဇုန်မြစ်ကို အကြီးမားဆုံးမြစ်အဖြစ် သတ်မှတ်ကြသည်။ မြစ်အချို့သည် ကြီးကျယ်ခမ်းနားသော်လည်း မြစ်ပြင်ငယ်ပြီး ရေစီးသန်သည့် ဂျပန်နိုင်ငံမှ ထိုနဲမြစ်ကဲ့သို့ အခြားမြစ်ငယ်လေးများသည် အလွန်လှပသည်။

မြစ်ရေကို အဘယ်အရာက စီးစေသနည်း။ စကားလုံးတစ်လုံးတည်းဖြင့် ပြောရလျှင် ကမ္ဘာ့ဆွဲငင်အားကြောင့်ဖြစ်သည်။ ကမ္ဘာ့ဆွဲငင်အားသည် မြေမျက်နှာပြင်အမြင့်ပိုင်းမှရေများကို မြေနိမ့်ပိုင်းသို့စီးဆင်းစေသည့်အခါ တစ်ခါတစ်ရံ တဝေါဝေါမြည်သော ရေတံခွန်ကြီးများ ဖြစ်ပေါ်စေသည်။ ယင်းတို့၏ စွမ်းအားနှင့် ရင်သပ်ရှုမောဖွယ်အလှကို သမ္မာကျမ်းစာက ဤသို့ဖော်ပြ၏– “အိုထာဝရဘုရား မြစ်တို့သည် ထကြပါ၏။ မြစ်တို့သည် ဟုန်းသံကိုပေးကြပါ၏။ မြစ်တို့သည် လှိုင်းတံပိုးခတ်ကြပါ၏။”—ဆာလံ ၉၃:၃။

‘လူမရှိသောမြေနှင့် လူမနေသောတော၌ အဘယ်သူမိုးရွာစေ’ သနည်းဟု ဘုရားသခင်ဝတ်၌မွေ့လျော်သူ ယောဘကို ယေဟောဝါမေးတော်မူခဲ့သည်။ (ယောဘ ၃၈:၂၅-၂၇) မှန်ပါ၏၊ မိုးရေတို့သည် အဘယ်အရပ်မှလာသနည်း။ ရေသံသရာဟုခေါ်ဆိုကြသည့် နက်နဲရှုပ်ထွေးသော စနစ်တစ်ခုကြောင့်ဖြစ်သည်။ ကမ္ဘာပေါ်မှရေများသည် နေ၏စွမ်းအင်နှင့် ကမ္ဘာ့ဆွဲငင်အားတို့ကြောင့် အဆက်မပြတ်လှည့်ပတ်နေသည်။ ရေသည် ရေငွေ့ပြန်ပြီးနောက် လေထုထဲသို့တက်သွားသည်။ နောက်ဆုံးတွင် ရေငွေ့များအေးခဲလာရာ ငွေ့ရည်ဖွဲ့ကာ တိမ်များဖြစ်ပေါ်လာသည်။ အတန်ကြာသော် ထိုရေခိုးရေငွေ့သည် ဆီးနှင်း၊ သို့မဟုတ် မိုးရေအဖြစ် ကမ္ဘာမြေပေါ်သို့ ပြန်ရွာကျလာသည်။ ရေအများစုကို သမုဒ္ဒရာများ၊ အင်းအိုင်များ၊ မြစ်များ၊ ရေခဲမြစ်များ၊ ဝင်ရိုးစွန်းရေခဲပြင်ကြီးများနှင့် မြေအောက်ရေစုဝေးရာ နေရာများတွင် တွေ့ရှိရသည်။

အံ့ဖွယ်ကောင်းသော ဤသံသရာနှင့်ပတ်သက်၍ သမ္မာကျမ်းစာက ဤသို့ဆို၏– “ခပ်သိမ်းသောမြစ်တို့သည် ပင်လယ်ထဲသို့ရောက်ကြ၏။ သို့သော်လည်း ပင်လယ်သည်မပြည့်တတ်။ မြစ်ရေသည် စီးထွက်ရာအရပ်သို့ တစ်ဖန်ပြန်သွားတတ်၏။” (ဒေ. ၁:၇) အတိုင်းအဆမဲ့ ဉာဏ်ပညာရှင်ဖြစ်ပြီး မေတ္တာဖြင့် ဂရုစိုက်စောင့်ရှောက်တော်မူသော ဘုရားသခင် ယေဟောဝါတစ်ပါးတည်းသာလျှင် ထိုကဲ့သို့သော သံသရာတစ်ခုကို ဖန်တီးနိုင်သည်။ ကျွမ်းကျင်လိမ္မာသော ထိုဒီဇိုင်းပုံစံက ဘုရားသခင်သည် မည်သို့သောပုဂ္ဂိုလ်ဖြစ်ကြောင်း ဖော်ပြသနည်း။ ကိုယ်တော်သည် ဉာဏ်ပညာကြီးမားပြီး မေတ္တာပါစွာဂရုစိုက်စောင့်ရှောက်သော ဘုရားသခင်ဖြစ်တော်မူ၏။—ဆာလံ ၁၀၄:၁၃-၁၅၊ ၂၄၊ ၂၅; သု. ၃:၁၉၊ ၂၀။

မြစ်၏အရွယ်အစား မည်မျှကြီးကြီး၊ အရေအတွက် မည်မျှများပါစေ မြစ်ရေသည်မသန့်ပါ။ သို့သော် ယင်းသည် အသက်ရှင်နေထိုင်ရေးအတွက် အရေးပါသည်။ “ရေမရှိ၊ ရေကို အတိုင်းအတာတစ်ခုအထိ ထိန်းချုပ်မှုမရှိပါက လူ့ဘဝအသက်တာ၏ အရိုးရှင်းဆုံးနှင့် အရှုပ်ထွေးဆုံး လိုအပ်ရာများကို ဖြည့်ဆည်းပေးနိုင်မည်မဟုတ်ပါ။ ယင်းကို လူတို့တုံ့ပြန်ပုံ၏မှတ်တမ်းသည် လူ့ယဉ်ကျေးမှုသမိုင်းတွင် အဓိကအချက်ဖြစ်ခဲ့ပြီ” ဟုရေဟူသောစာအုပ်က ဆိုသည်။

မြစ်ရေများသည် လူတို့ကို ရေငတ်ပြေစေခဲ့ပြီး ဥယျာဉ်များကို ရေပေးခဲ့သည်မှာ နှစ်ပေါင်းထောင်နှင့်ချီပြီ။ မြစ်ဘေးရှိ မြေသြဇာကောင်းသောမြေသည် ကောက်ပဲသီးနှံစိုက်ပျိုးရေးအတွက် အကောင်းဆုံးဖြစ်သည်။ ယေဟောဝါ၏ကျေးကျွန်များကို ကောင်းချီးပေးချိန်တွင် ဤအချက်ကို မည်သို့ဖော်ပြထားကြောင်း သတိပြုပါ– “အိုယာကုပ်အမျိုး သင်တို့၏တဲများ၊ အိုဣသရေလအမျိုး သင်တို့၏ဘုံဗိမာန်များတို့သည် အဘယ်မျှလောက် တင့်တယ်ကြသည်တကား။ ကျယ်ဝန်းသောချိုင့်များ၊ မြစ်နားမှာရှိသောဥယျာဉ်များ၊ ထာဝရဘုရား[သခင်]စိုက်တော်မူသော အကျော်ပင်များ၊ ရေနားမှာပေါက်သော အာရဇ်ပင်များကဲ့သို့ ဖြစ်ကြသည်တကား။” (တောလည်ရာ ၂၄:၅၊ ၆) မြစ်များသည် ဤတွင်တွေ့ရသော ဝမ်းဘဲများနှင့် ခွေးအများကဲ့သို့သော တိရစ္ဆာန်များကို ဆက်အသက်ရှင်နေထိုင်စေသည်။ မှန်ပါသည်၊ မြစ်များအကြောင်း ကျွန်ုပ်တို့လေ့လာလေလေ၊ ယေဟောဝါအား ကျေးဇူးတင်ချီးမွမ်းစရာအကြောင်း ပိုများလာလေလေဖြစ်သည်။

[အောက်ခြေမှတ်ချက်]

[စာမျက်နှာ ၈ ပါ လေးထောင့်ကွက်/ ရုပ်ပုံ]

အာဂျင်တီးနားနှင့် ဘရာဇီးလ်နိုင်ငံနယ်စပ်တွင်ရှိသော အီဂွါစူး ရေတံခွန်သည် ရေတံခွန်များထဲတွင် အကျယ်ဆုံးရေတံခွန်ဖြစ်သည်။ နှစ်မိုင်ကျော်ကျယ်သော ရေတံခွန်တစ်ခုဖြစ်သည်။ ယင်းသည် အမြဲစိမ်းစိုသန့်ရှင်းနေသည့် အပူပိုင်းသစ်တောတွင်ရှိပြီး ရေတံခွန်ငယ် ၃၀၀ နီးပါးဖြင့် ဖွဲ့စည်းထား၏။ မိုးရာသီကာလအတွင်း စက္ကန့်တိုင်းတွင် ၁၃,၀၀၀ ကုဗကိုက်ခန့်ရှိသောရေများ စီးဆင်းသည်။

[စာမျက်နှာ ၉ ပါ ရုပ်ပုံ]

ထိုနဲမြစ်၊ ဂျပန်