ဘုရားသခင်၌ ချဉ်းကပ်ကြလော့
‘ဘုရားသခင်၏မေတ္တာတော်နှင့် ငါတို့ကိုကွာစေနိုင်’ သည့်အရာ ရှိသလော။
ချစ်မြတ်နိုးမှု မခံလိုသူ မည်သူရှိသနည်း။ မှန်ပါသည်၊ မိသားစုနှင့်မိတ်ဆွေများ၏ ချစ်မြတ်နိုးမှုခံရသောအခါ ကျွန်ုပ်တို့ တိုးတက်အောင်မြင်ကြသည်။ သို့သော် ဝမ်းနည်းစရာကား လူလူချင်းဆက်ဆံရေးသည် အခြေအနေအမျိုးမျိုးကြောင့် အလွယ်တကူပျက်ပြယ်ပြီး ပြောင်းလဲသွားနိုင်သည်။ ချစ်မြတ်နိုးရသူတို့သည် ကျွန်ုပ်တို့ကို နာကျင်စေနိုင်ပြီး လျစ်လျူရှုကာ စွန့်ခွာသွားပေမည်။ သို့သော် ဘယ်သောအခါမျှ မပြောင်းမလဲ ချစ်မြတ်နိုးတတ်သူတစ်ဦး ရှိပါသည်။ မိမိအားဝတ်ပြုကိုးကွယ်သူများအပေါ်ထားရှိသည့် ယေဟောဝါဘုရားသခင်၏ မေတ္တာတရားကို ရောမ ၈:၃၈၊ ၃၉ တွင် လှပစွာဖော်ကျူးထား၏။
မူရင်းကျမ်းတွင် “ငါ ယုံကြည်စိတ်ချ၏” ဟုတမန်တော်ပေါလု ဆိုသည်။ သူအဘယ်အရာကို ယုံကြည်စိတ်ချသနည်း။ မည်သည့်အရာကမျှ “ဘုရားသခင်၏မေတ္တာတော်နှင့် ငါတို့ကိုမကွာစေနိုင်” ဟူသောအချက်ကိုဖြစ်သည်။ ပေါလုသည် မိမိအတွက်သာမဟုတ်ဘဲ ဘုရားသခင်ကိုတည်ကြည်စွာကိုးကွယ်နေသော “ငါတို့” အားလုံးအတွက် ပြောဆိုနေခြင်းဖြစ်သည်။ ထိုအချက်ကိုလေးနက်စေရန် မိမိ၏သစ္စာနှံကျေးကျွန်များအပေါ်ထားရှိသော ယေဟောဝါ၏မေတ္တာတော်အား မတားဆီးနိုင်သောအရာများကို ပေါလု စာရင်းပြုစုခဲ့သည်။
“သေခြင်းဖြစ်စေ၊ အသက်ရှင်ခြင်းဖြစ်စေ . . . ဘုရားသခင်၏မေတ္တာတော်နှင့် ငါတို့ကို မကွာစေနိုင်။” မိမိလူမျိုးကိုချစ်သည့် ယေဟောဝါ၏မေတ္တာသည် သူတို့သေဆုံးသောအခါ မပျောက်ပျက်သွားပါ။ မိမိမေတ္တာကိုသက်သေထူသည့်အနေဖြင့် ဘုရားသခင်သည် မှတ်ဉာဏ်ထဲတွင် ထိုသူတို့ကိုသိမ်းဆည်းထားပြီး ဖြောင့်မတ်သည့်ကမ္ဘာသစ်တွင် ရှင်ပြန်ထမြောက်စေတော်မူမည်။ (ယောဟန် ၅:၂၈၊ ၂၉; ဗျာ. ၂၁:၃၊ ၄) မိမိကိုတည်ကြည်စွာ ဝတ်ပြုကိုးကွယ်သူများသည် ဤအစီအစဉ်စနစ်တွင် မည်သည့်အသက်တာကိုပင် ကြုံတွေ့ရပါစေ သူတို့အပေါ်ထားရှိသော ဘုရားသခင့်မေတ္တာမှာ ဆက်လက်ခိုင်မြဲနေသည်။
“ကောင်းကင်တမန်ဖြစ်စေ၊ အထွတ်အမြတ်ဖြစ်စေ . . . ဘုရားသခင်၏မေတ္တာတော်နှင့် ငါတို့ကို မကွာစေနိုင်။” လူတို့သည် တန်ခိုးကြီးသူ သို့မဟုတ် အခွင့်အာဏာကြီးသူတို့၏ လွှမ်းမိုးမှုကို မလွန်ဆန်နိုင်ကြသော်လည်း ယေဟောဝါမူ ထိုသို့မဟုတ်ပါ။ စာတန်ဖြစ်လာသည့်ကောင်းကင်တမန်ကဲ့သို့သော တန်ခိုးကြီးဝိညာဉ်သတ္တဝါများသည် ဘုရားသခင်အား ဝတ်ပြုကိုးကွယ်နေသူများအပေါ် မေတ္တာမထားတော့ရန် ကိုယ်တော်ကို မသွေးဆောင်နိုင်ကြချေ။ (ဗျာ. ၁၂:၁၀) ခရစ်ယာန်စစ်များကို ဆန့်ကျင်ကောင်းဆန့်ကျင်ကြမည့် အထွတ်အမြတ် သို့မဟုတ် လူ့အုပ်စိုးရှင်များသည် ဘုရားသခင်၏ကျေးကျွန်များအပေါ် ကိုယ်တော့်အမြင်ကို မပြောင်းလဲစေနိုင်ပေ။—၁ ကောရိန္သု ၄:၁၃။
“မျက်မှောက်အရာဖြစ်စေ၊ နောင်လာလတ္တံ့သောအရာဖြစ်စေ . . . ဘုရားသခင်၏မေတ္တာတော်နှင့် ငါတို့ကို မကွာစေနိုင်။” ဘုရားသခင့်မေတ္တာတော်သည် အချိန်ကြာလာသည်နှင့်အမျှ လျော့နည်းမသွားချေ။ ကိုယ်တော့်ကျေးကျွန်များအပေါ် ဘုရားသခင့်မေတ္တာတော်ကို တားဆီးမည့်အရာသည် ယခုရော အနာဂတ်ကာလတွင်ပါ မရှိနိုင်ပါ။
“အာဏာတန်ခိုးဖြစ်စေ . . . ဘုရားသခင်၏မေတ္တာတော်နှင့် ငါတို့ကို မကွာစေနိုင်။” ပေါလုသည် ကောင်းကင်နှင့်မြေကြီးပေါ်ရှိ အင်အားစုများဖြစ်သော “ကောင်းကင်တမန်” နှင့် “အထွတ်အမြတ်” သို့မဟုတ် လူ့အုပ်စိုးရှင်များအကြောင်း ဖော်ပြပြီးနောက် “အာဏာတန်ခိုး” အကြောင်း ယခုဖော်ပြသည်။ ဤတွင်သုံးနှုန်းထားသော ဂရိစကားလုံးသည် အဓိပ္ပာယ်ကျယ်ပြန့်၏။ အဓိပ္ပာယ်အတိအကျသည် မည်သို့ပင်ဖြစ်ပါစေ သေချာသည့်အရာတစ်ခုမှာ ကောင်းကင်ပေါ် သို့မဟုတ် မြေကြီးပေါ်ရှိ မည်သည့်အာဏာတန်ခိုးကမျှ မိမိလူမျိုးအပေါ်ထားရှိသော ယေဟောဝါ၏မေတ္တာတော်ကို မဟန့်တားနိုင်ပါ။
“အမြင့်ဖြစ်စေ၊ အနိမ့်ဖြစ်စေ . . . ဘုရားသခင်၏မေတ္တာတော်နှင့် ငါတို့ကို မကွာစေနိုင်။” မိမိလူမျိုး၏အခြေအနေမှာ မြင့်နေသည်ဖြစ်စေ၊ နိမ့်ကျနေသည်ဖြစ်စေ ယေဟောဝါသည် သူတို့ကို ချစ်မြတ်နိုးတော်မူသည်။
‘အဘယ်အရာမျှ . . . [“အခြားမည်သည့်ဖန်ဆင်းခံအရာမျှ၊” ကဘ] ဘုရားသခင်၏မေတ္တာတော်နှင့် ငါတို့ကို မကွာစေနိုင်။’ မည်သည့်အရာကမျှ မိမိအား တည်ကြည်စွာဝတ်ပြုသူများအပေါ် ယေဟောဝါ၏မေတ္တာတော်ကို မကွာစေနိုင်ကြောင်း ဖန်ဆင်းရာအားလုံးအကျုံးဝင်သော ထိုစကားများဖြင့် ပေါလုဖော်ပြပြောဆိုခဲ့၏။
ပြောင်းလဲနိုင်သော သို့မဟုတ် မှေးမှိန်သွားနိုင်သော လူ့မေတ္တာနှင့်မတူဘဲ ဘုရားသခင့်မေတ္တာသည် မိမိအား ယုံကြည်စွာ မျှော်လင့်နေသူများအတွက် မပြောင်းမလဲထာဝစဉ်တည်မြဲ၏။ ယင်းကိုသိရှိခြင်းသည် ဘုရားသခင်ထံချဉ်းကပ်ရန်နှင့် ကိုယ်တော့်အပေါ် ကျွန်ုပ်တို့၏မေတ္တာကို အတတ်နိုင်ဆုံးသက်သေထူရန် အမှန်ပင်လှုံ့ဆော်ပေးပါသည်။