သန့်ရှင်းသောစွမ်းအားတော် တိုက်တွန်းခြင်းဖြင့် လူတို့ ပရောဖက်ပြု

“ပရောဖက်ပြုချက်မည်သည်ကား လူ့အလိုအားဖြင့် မည်သည့်အခါမျှ ဖြစ်ပေါ်လာသည်မဟုတ်။ သန့်ရှင်းသောစွမ်းအားတော် တိုက်တွန်းခြင်းအားဖြင့် ဘုရားသခင်ထံတော်မှစကားကို လူတို့ ပရောဖက်ပြုခြင်းဖြစ်၏။”—၂ ပေ. ၁:၂၁။

စဉ်းစားသုံးသပ်ရမယ့်အချက်များ

ဘုရားသခင်က မိမိရေးစေချင်တဲ့အချက်တွေကို ကျမ်းရေးသူတွေသိအောင် ကူညီပေးရာမှာ သန့်ရှင်းသောစွမ်းအားတော်ကို ဘယ်လိုအသုံးပြုခဲ့သလဲ။

သမ္မာကျမ်းစာက ဘုရားသခင်ထံကလာတယ်ဆိုတာ ယုံကြည်နိုင်တဲ့ ဘယ်အကြောင်းရင်းတွေရှိသလဲ။

သမ္မာကျမ်းစာအတွက် ကျေးဇူးတင်ကြောင်း သင် နေ့စဉ် ဘယ်လိုတင်ပြနိုင်သလဲ။

၁။ ကျွန်ုပ်တို့ ဘာကြောင့် သမ္မာကျမ်းစာ လိုအပ်သလဲ။

ကမ္ဘာတစ်ဝန်းမှာရှိတဲ့လူတွေက ဒီမေးခွန်းတွေရဲ့အဖြေကို သိချင်ကြတယ်– ကျွန်ုပ်တို့ ဘယ်ကဖြစ်လာတာလဲ။ ကျွန်ုပ်တို့ ဘာကြောင့် ဒီကမ္ဘာမြေကြီးပေါ်မှာ ရှိနေတာလဲ။ ကျွန်ုပ်တို့ရဲ့အနာဂတ် ဘယ်လိုရှိသလဲ။ ကမ္ဘာကြီး ဘာကြောင့် ဒီလိုဖြစ်နေတာလဲ။ ကျွန်ုပ်တို့ သေဆုံးသွားတဲ့အခါ ဘာဖြစ်သွားသလဲ။ ကျွန်ုပ်တို့မှာ ဘုရားသခင့်တရားတော်၊ သမ္မာကျမ်းစာ မရှိဘူးဆိုရင် ဒီမေးခွန်းတွေအပြင် တခြားအရေးကြီးတဲ့မေးခွန်းတွေရဲ့ အဖြေကို သိရမှာမဟုတ်ဘူး။ သမ္မာကျမ်းစာမရှိရင် ကျွန်ုပ်တို့ရဲ့ ဘဝအတွေ့အကြုံတွေကနေပဲ သင်ယူနိုင်မယ်။ အတွေ့အကြုံတွေကနေပဲ သင်ယူတယ်ဆိုရင် ယေဟောဝါရဲ့တရားတော် အပေါ်ထားရှိတဲ့ ဆာလံဆရာရဲ့ ခံစားချက်မျိုး ကျွန်ုပ်တို့မှာ ရှိနိုင်မှာမဟုတ်ဘူး။—ဆာလံ ၁၉:၇ ကိုဖတ်ပါ။

၂။ သမ္မာကျမ်းစာအတွက် ကျေးဇူးတင်လေးမြတ်စိတ် ဆက်ရှိနေဖို့ ကျွန်ုပ်တို့ကို ဘာက ကူညီပေးမလဲ။

^၂ ဒါပေမဲ့ ဝမ်းနည်းစရာကောင်းတာက တချို့သူတွေဟာ သမ္မာကျမ်းစာကို သူတို့ အရင်ကချစ်မြတ်နိုးခဲ့သလို မချစ်ကြတော့ဘူး။ (ဗျာဒိတ် ၂:၄ နဲ့နှိုင်းယှဉ်ပါ။) ယေဟောဝါနှစ်သက်တဲ့နည်းလမ်းအတိုင်း ဆက်မနေထိုင်ကြတော့ဘူး။ (ဟေရှာ. ၃၀:၂၁) ကျွန်ုပ်တို့ကတော့ အဲဒီလို မဖြစ်ရဘူး။ သမ္မာကျမ်းစာနဲ့ ကျမ်းစာမှာပါတဲ့သွန်သင်ချက်တွေအတွက် ကျေးဇူးတင်လေးမြတ်စိတ် ဆက်ရှိနေဖို့ အတတ်နိုင်ဆုံး ကြိုးစားနိုင်တယ်၊ ကြိုးစားသင့်တယ်။ သမ္မာကျမ်းစာက ကျွန်ုပ်တို့ရဲ့မေတ္တာရှင် ဖန်ဆင်းရှင်ပေးတဲ့ အရေးကြီးတဲ့လက်ဆောင်တစ်ခုဖြစ်တယ်။ (ယာ. ၁:၁၇) ဒါကြောင့် “ဘုရားသခင်၏တရားတော်” အတွက် ကျေးဇူးတင်လေးမြတ်စိတ် တိုးများလာအောင် ကျွန်ုပ်တို့ကို ဘာက ကူညီပေးမလဲ။ သမ္မာကျမ်းစာကို ရေးသားရာမှာ လူတွေကို ဘုရားသခင် ဘယ်လိုအသုံးပြုခဲ့သလဲဆိုတာကို စဉ်းစားသုံးသပ်ဖို့နဲ့ သမ္မာကျမ်းစာက တကယ်ပဲ ဘုရားသခင်ဆီကလာတယ်ဆိုတာ ယုံကြည်စိတ်ချနိုင်တဲ့ အကြောင်းရင်းတချို့ကို လေ့လာဆန်းစစ်ဖို့ လိုတယ်။ ဒါက ဘုရားသခင့်တရားစကားတော်ကို နေ့စဉ်ဖတ်ရှုလိုစိတ်ရှိလာအောင်၊ ကျမ်းစာမှာပါတဲ့ သွန်သင်ချက်ကို လိုက်လျှောက်လိုစိတ် ရှိလာအောင် ကူညီပေးမှာဖြစ်တယ်။—ဟေဗြဲ ၄:၁၂။

သန့်ရှင်းသောစွမ်းအားတော် တိုက်တွန်းပုံ

၃။ ပရောဖက်တွေနဲ့ ကျမ်းရေးသူတွေက “သန့်ရှင်းသောစွမ်းအားတော် တိုက်တွန်းခြင်း” ခံကြရတယ်ဆိုတာ ဘာကိုဆိုလိုတာလဲ။

^၃ သမ္မာကျမ်းစာကို ရေးသားရာမှာ နှစ်ပေါင်း ၁,၆၁၀ ကြာပြီး ဘီစီ ၁၅၁၃ ကနေ အေဒီ ၉၈ အထိဖြစ်တယ်။ လူပေါင်း ၄၀ လောက်က သမ္မာကျမ်းစာကို ရေးသားခဲ့ကြတယ်။ တချို့က ပရောဖက်တွေဖြစ်ပြီး သူတို့က “သန့်ရှင်းသောစွမ်းအားတော် တိုက်တွန်းခြင်း” ခံရတယ်လို့ သမ္မာကျမ်းစာကပြောတယ်။ (၂ ပေတရု ၁:၂၀၊ ၂၁ ကိုဖတ်ပါ။) ဒီအခန်းငယ်မှာပါတဲ့ “တိုက်တွန်း” လို့ဘာသာပြန်ဆိုတဲ့ ဂရိစကားလုံးက “တစ်နေရာကနေ နောက်တစ်နေရာကို သယ်ဆောင်တာ ဒါမှမဟုတ် ရွေ့ရှားတာ၊ တွန်းပို့တာ၊ ရွေ့ရှားနိုင်အောင် တစ်ဦးတစ်ယောက်က လုပ်ဆောင်ပေးတာ ဆိုပြီး အမျိုးမျိုးပြန်ဆိုနိုင်တယ်။” တမန်တော် ၂၇:၁၅ မှာ လေဟုန်မိပြီး လေတိုက်ရာလမ်းကြောင်းအတိုင်း ရွေ့ရှားသွားတဲ့ သင်္ဘောတစ်စင်းအကြောင်း ဖော်ပြရာမှာ ဒီစကားလုံးကို အသုံးပြုတယ်။ ပရောဖက်တွေနဲ့ ကျမ်းရေးသူတွေဟာ “သန့်ရှင်းသောစွမ်းအားတော် တိုက်တွန်းခြင်း” ခံကြရတယ်လို့ ကျွန်ုပ်တို့ဖတ်ရတဲ့အခါ ဒါဟာ ဘုရားသခင်က သူတို့နဲ့ဆက်သွယ်၊ သူတို့အပေါ် တန်ခိုးသက်ရောက်ပြီး ကိုယ်တော့် သန့်ရှင်းသောစွမ်းအားတော်နဲ့ လမ်းပြပေးတာကို ဆိုလိုတယ်။ ဒါကြောင့် သူတို့ရေးတာတွေက သူတို့ရဲ့ကိုယ်ပိုင်အယူအဆတွေမဟုတ်ဘဲ ဘုရားသခင့်အတွေးအခေါ် အယူအဆတွေဖြစ်တယ်။ တစ်ခါတလေ ဒီပရောဖက်တွေနဲ့ ကျမ်းရေးသူတွေဟာ သူတို့ ပရောဖက်ပြုတဲ့အရာတွေ၊ သူတို့ရေးသားရတဲ့အရာတွေကိုတောင် နားမလည်ကြဘူး။ (ဒံ. ၁၂:၈၊ ၉) ဒါကြောင့် “ကျမ်းဂန်ရှိသမျှသည် ဘုရားသခင့်စွမ်းအားတော်၏ လမ်းညွှန်မှုဖြင့် ရေးထား” တယ်ဆိုတဲ့အချက်က မှန်ကန်တယ်။ သမ္မာကျမ်းစာထဲမှာ လူ့အတွေးအခေါ်တွေ မတွေ့ရဘူး။—၂ တိ. ၃:၁၆။

၄-၆။ ရေးသားရမယ့်အကြောင်းအရာတွေကို ကျမ်းရေးသူတွေသိရှိအောင် ယေဟောဝါ ဘယ်လိုလုပ်သလဲ။ ဥပမာပေးပါ။

^၄ ဒါဆိုရင် ဘုရားသခင်က မိမိရေးစေချင်တဲ့အချက်တွေကို ကျမ်းရေးသူတွေသိအောင် ကူညီပေးရာမှာ သန့်ရှင်းသောစွမ်းအားတော်ကို ဘယ်လိုအသုံးပြုခဲ့သလဲ။ ရေးစေချင်တဲ့ စကားလုံးတွေကို အတိအကျပြောပြသလား ဒါမှမဟုတ် ရေးစေချင်တဲ့အကြောင်းအရာလောက်ကိုပဲ ပြောပြပြီး ကျမ်းရေးသူတွေက သူတို့ဘာသာ စကားလုံးစီတာလား။ စီးပွားရေးလုပ်ငန်းရှင်တစ်ဦး စာတစ်စောင်ရေးတာကို စဉ်းစားကြည့်ပါ။ တိကျမှန်ကန်တဲ့စကားလုံးတွေကို အသုံးပြုဖို့ အရေးကြီးတယ်ဆိုရင် သူကိုယ်တိုင်ရေးတယ်၊ ဒါမှမဟုတ် သူ့ရဲ့အတွင်းရေးမှူးကို စကားလုံးတစ်လုံးချင်းစီ ပြောပြပြီး ရေးခိုင်းတယ်။ အတွင်းရေးမှူးက စာရေးပြီးတဲ့နောက်မှာ စီးပွားရေးလုပ်ငန်းရှင်က လက်မှတ်ထိုးမှာဖြစ်တယ်။ တစ်ခါတလေမှာတော့ လုပ်ငန်းရှင်က သူ့အတွင်းရေးမှူးကို သူရေးစေချင်တဲ့အကြောင်းအရာ အကြမ်းဖျင်းလောက်ကိုပဲ ပြောပြမယ်၊ အတွင်းရေးမှူးက သူ့ရေးဟန်နဲ့ သူနှစ်သက်တဲ့စကားလုံးတွေကိုသုံးပြီး စာရေးတယ်။ ပြီးသွားတဲ့အခါ လုပ်ငန်းရှင်က စာကို ပြန်စစ်ဆေးပြီး ပြင်ဖို့လိုအပ်တယ်ဆိုရင် အတွင်းရေးမှူးကို ပြန်ပြင်ခိုင်းမှာဖြစ်တယ်။ စာရေးပြီးသွားတဲ့အခါ လုပ်ငန်းရှင်က အဲဒီစာကို လက်မှတ်ထိုးတယ်။ ဒီစာကိုလက်ခံတဲ့သူက စီးပွားရေးလုပ်ငန်းရှင်ရေးတဲ့စာအဖြစ် ယူမှတ်မှာဖြစ်တယ်။

^၅ အဲဒီလိုပဲ သမ္မာကျမ်းစာမှာပါတဲ့ တချို့အပိုင်းတွေကို ဘုရားသခင် ကိုယ်တိုင်ရေးခဲ့တယ်။ (ထွ. ၃၁:၁၈) တိကျတဲ့စကားလုံးတွေကို သုံးဖို့အရေးကြီးတယ်ဆိုရင် ဘယ်စကားလုံးသုံးရမယ်ဆိုတာကို ယေဟောဝါက ကျမ်းရေးသူကို အသိပေးတယ်။ ဥပမာ၊ ထွက်မြောက်ရာ ၃၄:၂၇ မှာဆိုရင် ယေဟောဝါက မောရှေကို ဒီလိုပြောတယ်– “ဤစကားများကို ရေးထားလော့။ ဤစကားများလာသည်အတိုင်း သင်မှစ၍ ဣသရေလအမျိုးနှင့် ငါပဋိညာဉ်ပြုသည်။” အလားတူ ပရောဖက်ယေရမိကိုလည်း “သင့်အား ငါပြောသမျှသော စကားတို့ကို ရေးထားလော့” လို့ ပြောခဲ့တယ်။—ယေ. ၃၀:၂။

^၆ ဒါပေမဲ့ အများအားဖြင့်တော့ ဘုရားသခင်က ကျမ်းရေးသူတွေကို ဘယ်စကားလုံးတွေသုံးရမယ်လို့ အတိအကျမပြောဘူး။ ဘုရားသခင်က မိမိရဲ့ အတွေးအခေါ်တွေကို ကျမ်းရေးသူတွေရဲ့စိတ်ထဲ ထည့်ပေးလိုက်တယ်၊ အဲဒီနောက် ဘုရားသခင့်သတင်းစကားကို ကျမ်းရေးသူတွေနှစ်သက်တဲ့စကားလုံးတွေနဲ့ ပြန်ရေးဖို့ ခွင့်ပြုတယ်။ ဒေသနာ ၁၂:၁၀ (ကဘ) မှာဆိုရင် “နည်းပြဆရာက နှစ်သက်ဖွယ်စကားတွေကိုရှာဖွေပြီး တိကျမှန်ကန်တဲ့ အမှန်တရားစကားတွေကို ရေးသားခဲ့တယ်” လို့ဖော်ပြထားတယ်။ လုကာလည်းပဲ “အကြောင်းအရာအလုံးစုံကို အစမှ သေချာစွာ လေ့လာစိစစ်ထားသောကြောင့် အစီအစဉ်တကျ ရေးသားပြုစု” တယ်။ (လု. ၁:၃) လူ့မစုံလင်မှုကြောင့် မိမိရဲ့သတင်းစကားကို မထိခိုက်စေဖို့ ဘုရားသခင်က သန့်ရှင်းသောစွမ်းအားတော်ကို အသုံးပြုပြီး အသေအချာလုပ်ဆောင်တယ်။

၇။ သမ္မာကျမ်းစာကိုရေးဖို့ လူတွေကို အသုံးပြုတာက ဘုရားသခင့်ဉာဏ်ပညာကြီးမားပုံကို ဘယ်လိုဖော်ပြသလဲ။

^၇ သမ္မာကျမ်းစာကိုရေးဖို့ လူတွေကိုအသုံးပြုတာက ဘုရားသခင့်ဉာဏ်ပညာကြီးမားမှုဖြစ်တယ်။ အဲဒီမှာပါတဲ့စကားလုံးတွေက အကြောင်းအရာကိုနားလည်စေရုံသာမက စိတ်လှုပ်ရှားမှုနဲ့ ခံစားချက်တွေကိုပါ နားလည်ဖို့ အထောက်အကူပြုတယ်။ အကယ်၍ ယေဟောဝါက ကျမ်းစာရေးဖို့ ကောင်းကင်တမန်တွေကို အသုံးပြုတယ်ဆိုရင်ကော။ သူတို့တွေက ကြောက်ရွံ့တာ၊ ဝမ်းနည်းတာ၊ စိတ်ဓာတ်ကျတာ စတဲ့ လူ့ခံစားချက်တွေကို ဖော်ပြနိုင်ပါ့မလား။ ဘုရားသခင်က သူ့ရဲ့သတင်းစကားကိုရေးသားဖို့ မစုံလင်တဲ့လူတွေကိုသုံးပြီး သူတို့ရဲ့ကိုယ်ပိုင်စကားလုံးတွေနဲ့ ဖော်ပြခွင့်ပြုတဲ့အတွက် ဘုရားသခင့် သတင်းစကားကို ကျွန်ုပ်တို့ ခံစား၊ နားလည်နိုင်ကြတယ်။

မြင်သာတဲ့ သက်သေအထောက်အထားများ

၈။ သမ္မာကျမ်းစာက တခြားဘာသာရေးစာအုပ်တွေနဲ့ မတူဘူးလို့ ဘာကြောင့်ပြောနိုင်သလဲ။

^၈ သမ္မာကျမ်းစာက ဘုရားသခင်ဆီကလာတယ်ဆိုတာ ယုံကြည်စိတ်ချနိုင်တဲ့ အကြောင်းရင်းတွေ အများကြီးရှိတယ်။ သမ္မာကျမ်းစာက စစ်မှန်တဲ့ဘုရားသခင်ကို သိကျွမ်းဖို့ ကျွန်ုပ်တို့ကို ကူညီပေးနိုင်တဲ့အတွက် တခြားဘာသာရေးစာအုပ်တွေနဲ့ မတူဘူး။ ဥပမာ၊ ဟိန္ဒူဘာသာရေးစာအုပ်တွေမှာ ဘာသာရေးပွဲနေ့တွေ၊ အတွေးအခေါ်ပညာတွေ၊ ဒဏ္ဍာရီတွေနဲ့ ကိုယ်ကျင့်တရားနဲ့ပတ်သက်တဲ့ စည်းမျဉ်းတွေပါတယ်။ ကွန်ဖြူးရှပ်ဝါဒနဲ့ဆိုင်တဲ့စာအုပ်တွေမှာ အတိတ်ဘဝက ဖြစ်ခဲ့တဲ့အကြောင်းတွေ၊ ကျင့်ဝတ်ဆိုင်ရာစည်းမျဉ်းတွေ၊ မှော်အတတ်တွေနဲ့ ကဗျာလင်္ကာတွေပါတယ်။ အစ္စလမ်ကျမ်းမှာတော့ ဘုရားသခင်တစ်ဆူတည်းပဲရှိတယ်၊ သူက အနာဂတ်ကို ကြိုသိပြီး ထိန်းချုပ်ထားတယ်လို့ သွန်သင်တယ်၊ ဒါပေမဲ့ သမ္မာကျမ်းစာမှာ ထောင်နဲ့ချီပါရှိတဲ့ ယေဟောဝါဆိုတဲ့ ဘုရားသခင့်နာမည်ကိုတော့ အဲဒီမှာ မဖော်ပြဘူး။

၉၊ ၁၀။ သမ္မာကျမ်းစာကနေ ဘုရားသခင်အကြောင်း ကျွန်ုပ်တို့ ဘာတွေသင်ယူနိုင်သလဲ။

^၉ ဘာသာရေးစာအုပ်အတော်များများမှာ ဘုရားသခင်အကြောင်း အနည်းအကျဉ်းပဲပါတယ်။ ဒါပေမဲ့ သမ္မာကျမ်းစာကတော့ ယေဟောဝါဘုရားသခင်ကို သိကျွမ်းဖို့နဲ့ ကိုယ်တော်လုပ်ဆောင်ရာမှန်သမျှကို သိရှိဖို့ ကျွန်ုပ်တို့ကို ကူညီပေးတယ်။ ဘုရားသခင်ရဲ့အရည်အသွေးတွေကိုလည်း သိရှိစေတယ်။ ဘုရားသခင်က တရားမျှတတယ်၊ ဉာဏ်ပညာရှိပြီး တန်ခိုးကြီးတယ်လို့ သမ္မာကျမ်းစာက သင်ပေးတယ်။ ဘုရားသခင်က မေတ္တာရှင်ဖြစ်တယ်လို့လည်း သင်ပေးတယ်။ (ယောဟန် ၃:၁၆; ၁ ယောဟန် ၄:၁၉ တို့ကိုဖတ်ပါ။) ဒါ့အပြင် သမ္မာကျမ်းစာမှာ ဒီလိုပြောတယ်– ‘ဘုရားသခင်သည် မျက်နှာလိုက်တော်မမူ။ လူအမျိုးမျိုးတို့တွင် ဘုရားသခင်ကိုကြောက်ရွံ့၍ ဖြောင့်မတ်ခြင်းတရား ကျင့်သုံးသောသူတို့ကို နှစ်သက်လက်ခံတော်မူ၏။’ (တ. ၁၀:၃၄၊ ၃၅) သမ္မာကျမ်းစာကို ဘာသာစကားများစွာနဲ့ ဘာသာပြန်ထားတယ်။ ဒါက ဘုရားသခင် မျက်နှာမလိုက်ဘူးဆိုတဲ့အချက်ကို ဖော်ပြတယ်။ ဘာသာစကားပညာရှင်တွေက ယနေ့ ကမ္ဘာပေါ်မှာ ဘာသာစကား ၆,၇၀၀ ခန့်ရှိတယ်လို့ ပြောကြတယ်။ ကမ္ဘာ့လူဦးရေ ၉၀ ရာခိုင်နှုန်းလောက်က ဘာသာစကား ၁၀၀ လောက်ပြောတယ်။ သမ္မာကျမ်းစာကို တစ်အုပ်လုံးအနေနဲ့ရော၊ တစ်စိတ်တစ်ပိုင်းအနေနဲ့ပါ ဘာသာစကား ၂,၄၀၀ ကျော်နဲ့ ဘာသာပြန်ဆိုထားတယ်။ ဒါကြောင့် ကမ္ဘာပေါ်မှာရှိတဲ့လူတိုင်းနီးပါးက အနည်းဆုံးတော့ သူတို့ရဲ့ကိုယ်ပိုင်ဘာသာစကားနဲ့ သမ္မာကျမ်းစာရဲ့ တစ်စိတ်တစ်ပိုင်းကို ဖတ်နိုင်ပြီ။

^၁၀ ယေရှုက “ငါ့ခမည်းတော်သည် ယခုတိုင်အောင် အလုပ်လုပ်တော်မူ၏။ ထို့ကြောင့် ငါသည်လည်း အလုပ်လုပ်၏” လို့ ပြောခဲ့တယ်။ (ယော. ၅:၁၇) ယေဟောဝါက “ရှေးကာလအဆက်ဆက်ကနေ နောင်ကာလအဆက်ဆက်တိုင်အောင်” ဘုရားသခင်ဖြစ်တယ်။ ဒါကြောင့် ကိုယ်တော် လုပ်ဆောင်ခဲ့တဲ့အရာတွေအားလုံးကို စဉ်းစားကြည့်ပါ။ (ဆာ. ၉၀:၂၊ ကဘ) သမ္မာကျမ်းစာကပဲ ဘုရားသခင် အတိတ်က လုပ်ဆောင်ခဲ့တဲ့အရာတွေ၊ လက်ရှိ လုပ်နေတဲ့အရာတွေနဲ့ အနာဂတ်မှာ လုပ်ဆောင်ဦးမယ့်အရာတွေကို ဖော်ပြတယ်။ သမ္မာကျမ်းစာက ဘုရားသခင် နှစ်သက်တဲ့အရာတွေနဲ့ မနှစ်သက်တဲ့အရာတွေအကြောင်း ကျွန်ုပ်တို့ကို သင်ပေးတယ်။ “ဘုရားသခင်ထံတော်သို့ ချဉ်းကပ်” နိုင်ပုံကိုလည်း သင်ပေးတယ်။ (ယာ. ၄:၈) ကျွန်ုပ်တို့ဟာ ကိုယ်ရေးကိုယ်တာ စိတ်ဝင်စားရာတွေ၊ စိုးရိမ်ပူပန်မှုတွေကြောင့် ဘုရားသခင်နဲ့ဝေးကွာသွားဖို့ ဘယ်တော့မှ ခွင့်မပြုသင့်ဘူး။

၁၁။ သမ္မာကျမ်းစာမှာ ဘယ်ပညာရှိအကြံဉာဏ်ကို တွေ့ရသလဲ။

^၁၁ သမ္မာကျမ်းစာထဲမှာ ကြီးမြတ်တဲ့ဉာဏ်ပညာအကြောင်း ဖော်ပြထားတယ်။ ဒါက သမ္မာကျမ်းစာဟာ ဘုရားသခင်ဆီကလာတယ်ဆိုတာ ယုံကြည်နိုင်တဲ့ နောက်ထပ်အထောက်အထားတစ်ခုဖြစ်တယ်။ ပရောဖက်ဟေရှာယက သူ့အချိန်မှာ အသက်ရှင်ခဲ့တဲ့လူတွေကို ဒီလိုမေးခဲ့တယ်– “ယေဟောဝါရဲ့စွမ်းအားတော်ကို ချိန်တွယ်တဲ့သူက ဘယ်သူလဲ။ ကိုယ်တော့်ကိုအကြံပေးပြီး အရာရာကိုသိရှိစေတဲ့သူက ဘယ်သူလဲ။ (ဟေရှာ. ၄၀:၁၃၊ ကဘ) နောက်ပိုင်းမှာ တမန်တော်ပေါလုကလည်း အလားတူမေးခွန်းတစ်ခု မေးခဲ့တယ်– ‘ယေဟောဝါဘုရားသခင်ကို သွန်သင်နိုင်မည်အကြောင်း ကိုယ်တော်၏စိတ်တော်ကို မည်သူသိသနည်း။’ (၁ ကော. ၂:၁၆) အဖြေကတော့ ဘယ်သူမှ မသိဘူးဆိုတာပါပဲ၊ အကြောင်းကတော့ ယေဟောဝါထက် ပိုသိတဲ့သူ မရှိလို့ပဲ။ ဒါကြောင့် အလုပ်၊ အိမ်ထောင်၊ သားသမီး၊ အပန်းဖြေမှု၊ ရိုးသားမှု၊ ကိုယ်ကျင့်တရားနဲ့ အပေါင်းအသင်း စတဲ့ကဏ္ဍတွေမှာ သမ္မာကျမ်းစာရဲ့အကြံပြုချက်ကို လိုက်နာတဲ့အခါ အကောင်းဆုံးရလဒ်တွေ ရရှိနိုင်တယ်။ သမ္မာကျမ်းစာက ဘယ်တော့မှ မကောင်းတဲ့အကြံဉာဏ်မပေးဘူး။ ဒါပေမဲ့ လူတွေမှာတော့ အမြဲတမ်းမှန်ကန်တဲ့အကြံဉာဏ်ပေးနိုင်တဲ့ ဉာဏ်ပညာမရှိဘူး။ (ယေ. ၁၀:၂၃) သူတို့ပေးတဲ့အကြံဉာဏ်က မှားနေတယ်ဆိုတာ သိလာတဲ့အခါ ပြောင်းလဲလိုက်ရ၊ အသစ်ပြုပြင်လိုက်ရတယ်။ “လူတွေရဲ့အကြံအစည်တွေက အခိုးအငွေ့လိုပဲ” လို့ သမ္မာကျမ်းစာကပြောတယ်။—ဆာ. ၉၄:၁၁၊ ကဘ။

၁၂။ သမ္မာကျမ်းစာကိုဖျက်ဆီးဖို့ လူတွေ ဘယ်လိုကြိုးစားခဲ့ကြသလဲ။

^၁၂ သမ္မာကျမ်းစာက ဘုရားသခင်ဆီကလာတယ်ဆိုတာ ယုံကြည်နိုင်တဲ့ အကြောင်းရင်းတွေကို သမိုင်းကလည်း ဖော်ပြတယ်။ အတိတ်ကလူများစွာဟာ ဘုရားသခင့်သတင်းစကားဖြစ်တဲ့ သမ္မာကျမ်းစာကို ဖျက်ဆီးဖို့ ကြိုးစားခဲ့ကြတယ်။ ဘီစီ ၁၆၈ က ဆီးရီးယားဘုရင် အန်တီအုပ်ကပ် ၄ ဟာ ပညတ်ကျမ်းအားလုံးကို ရှာဖွေပြီး မီးရှို့ဖျက်ဆီးပစ်ဖို့ အမိန့်ထုတ်ခဲ့တယ်။ အေဒီ ၃၀၃ မှာ ရောမအင်ပါယာရဲ့အုပ်စိုးရှင် ဒိုင်အိုကလီရှန်က ခရစ်ယာန်တွေစုဝေးတဲ့နေရာအားလုံးကို ဖျက်ဆီးပစ်ဖို့နဲ့ သူတို့ရဲ့ကျမ်းစာတွေကို မီးရှို့ဖျက်ဆီးပစ်ဖို့ အမိန့်ထုတ်ခဲ့တယ်။ ဒီတိုက်ခိုက်ဖျက်ဆီးမှုက ဆယ်နှစ်လောက်ကြာခဲ့တယ်။ ပုပ်ရဟန်းမင်းတွေက သမ္မာကျမ်းစာအကြောင်း လူတွေကို မသိစေချင်ဘူး၊ ဒါကြောင့် သာမန်လူတွေနားလည်တဲ့ ဘာသာစကားနဲ့ သမ္မာကျမ်းစာကို ဘာသာပြန်တဲ့လုပ်ငန်းကို တားဆီးဖို့ နှစ်ရာနဲ့ချီပြီး နည်းအမျိုးမျိုးနဲ့ ကြိုးစားခဲ့ကြတယ်။ စာတန်နဲ့ သူ့နောက်လိုက်တွေက သမ္မာကျမ်းစာကို ဖျက်ဆီးဖို့ ကြိုးစားနေတဲ့ကြားက ဒီနေ့အထိ အဲဒီစာအုပ် တည်ရှိနေဆဲဖြစ်တယ်။ လူသားတွေကို ပေးထားတဲ့လက်ဆောင်ကို ဖျက်ဆီးဖို့ ယေဟောဝါ ဘယ်သူ့ကိုမှ ခွင့်မပြုခဲ့ဘူး။

လူတွေယုံကြည်ရတဲ့အကြောင်းရင်း

၁၃။ သမ္မာကျမ်းစာက ဘုရားသခင်ထံကလာတယ်ဆိုတာကို ကျွန်ုပ်တို့ ဘာကြောင့် ယုံကြည်နိုင်သလဲ။

^၁၃ သမ္မာကျမ်းစာက ဘုရားသခင်ဆီကလာတယ်ဆိုတာ ယုံကြည်နိုင်တဲ့ နောက်ထပ်အကြောင်းရင်းတွေရှိသေးတယ်။ ကျမ်းစာမှာပါတဲ့အကြောင်းအရာတွေက တစ်ခုနဲ့တစ်ခု ဆန့်ကျင်ကွဲလွဲမှုမရှိဘူး၊ သိပ္ပံပညာနဲ့လည်း ကိုက်ညီတယ်၊ ကျမ်းစာပရောဖက်ပြုချက်တွေက ပြည့်စုံတယ်၊ ကျမ်းရေးသူတွေက မကွယ်မဝှက်ဘဲ အမှန်အတိုင်း ရေးတယ်။ ဒါ့အပြင် သမ္မာကျမ်းစာမှာ လူ့အသက်တာတွေကို ပြောင်းလဲပေးနိုင်တဲ့အစွမ်းတန်ခိုးရှိတယ်။ သမိုင်းအရလည်း တိကျမှန်ကန်မှုရှိပြီး အပိုဒ် ၁ မှာပါတဲ့ မေးခွန်းတွေရဲ့ ကျေနပ်ဖွယ်အဖြေလည်း ပါတယ်။ သမ္မာကျမ်းစာက ဘုရားသခင်ထံကလာတယ်ဆိုတာ တချို့သူတွေကို ယုံကြည်စေတဲ့ အချက်တချို့ကို သုံးသပ်ကြည့်ကြစို့။

၁၄-၁၆။ (က) သမ္မာကျမ်းစာဟာ ဘုရားသခင်ထံကလာတယ်ဆိုတာကို လူသုံးယောက်က ဘာကြောင့် ယုံကြည်ခဲ့တာလဲ။ (ခ) သမ္မာကျမ်းစာက ဘုရားသခင်ထံကလာတယ်ဆိုတာကို လူတွေယုံကြည်လာအောင် အမှုဆောင်လုပ်ငန်းမှာ သင် ဘယ်အချက်ကို အသုံးပြုလိုသလဲ။

^၁၄ အန်ဝါa ဟာအရှေ့အလယ်ပိုင်းနိုင်ငံတစ်ခုမှာ ကြီးပြင်းလာတဲ့ မွတ်စလင်တစ်ဦးဖြစ်တယ်။ သူ မြောက်အမေရိကမှာနေတုန်းက ယေဟောဝါသက်သေတွေ သူ့အိမ်ကို ရောက်လာတယ်။ အန်ဝါက ‘ခရစ်ယာန်တွေလုပ်ခဲ့တဲ့ အရင်က မကောင်းမှုတွေကြောင့် ခရစ်ယာန်ဘာသာကို ကျွန်တော်မကြိုက်ဘူး။ ဒါပေမဲ့ ကျွန်တော်က လေ့လာရတာကိုကြိုက်တဲ့အတွက် သမ္မာကျမ်းစာလေ့လာဖို့ သဘောတူခဲ့တယ်’ လို့ပြောပြတယ်။ သိပ်မကြာခင်မှာပဲ အန်ဝါက သူ့နိုင်ငံကို ပြန်သွားခဲ့ပြီး သက်သေခံတွေနဲ့ အဆက်အသွယ်ပြတ်သွားတယ်။ နှစ်တွေကြာပြီးတဲ့နောက်မှာ သူ ဥရောပကိုပြောင်းသွားပြီး ကျမ်းစာကို ပြန်စလေ့လာတယ်။ နောက်ပိုင်းမှာ သူဒီလိုပြောခဲ့တယ်– ‘သမ္မာကျမ်းစာဟာ ဘုရားသခင်ဆီကလာတယ်ဆိုတာ ကျွန်တော် ယုံကြည်လာတယ်၊ ဘာကြောင့်လဲဆိုတော့ ကျမ်းစာပရောဖက်ပြုချက်တွေက ပြည့်စုံတယ်၊ သမ္မာကျမ်းစာတစ်အုပ်လုံးရဲ့ အခြေခံအကြောင်းအရာက တစ်ခုတည်းပဲ၊ ကျမ်းစာမှာပါတဲ့အကြောင်းအရာတွေက တစ်ခုနဲ့တစ်ခု ဆန့်ကျင်ကွဲလွဲမှု မရှိဘူး၊ ယေဟောဝါကို ၀တ်ပြုသူတွေက တစ်ယောက်ကိုတစ်ယောက် ချစ်ကြတယ်။’ အန်ဝါဟာ ၁၉၉၈ ခုနှစ်မှာ နှစ်ခြင်းခံခဲ့တယ်။

^၁၅ အသက် ၁၆ နှစ်ရှိတဲ့ အီရှာနဲ့ သူ့မိသားစုက ဟိန္ဒူဘာသာဝင်တွေဖြစ်တယ်။ သူ ဒီလိုပြောတယ်– ‘ကျွန်မက ဘုရားကျောင်းကိုသွားတဲ့အခါ၊ အခက်အခဲတွေ ကြုံတွေ့ရတဲ့အခါမှသာ ဆုတောင်းတယ်။ ကျွန်မ အဆင်ပြေနေတဲ့အချိန်ဆိုရင် ဘုရားသခင်အကြောင်း ဘယ်တော့မှ မစဉ်းစားဘူး။ တစ်နေ့ ယေဟောဝါသက်သေတွေ ကျွန်မရဲ့တံခါးကို လာခေါက်တယ်၊ အဲဒီနေ့မှာ ကျွန်မဘဝ လုံးလုံးပြောင်းလဲသွားတယ်။’ အီရှာက သမ္မာကျမ်းစာကို လေ့လာပြီး ဘုရားသခင်ကို သူ့ရဲ့မိတ်ဆွေတစ်ဦးလို သိကျွမ်းလာတယ်။ သမ္မာကျမ်းစာက ဘုရားသခင်ဆီကလာတယ်ဆိုတာ သူ ဘာကြောင့် ယုံကြည်ခဲ့တာလဲ။ ‘ကျွန်မသိချင်တဲ့ မေးခွန်းအားလုံးကို သမ္မာကျမ်းစာက ဖြေပေးတယ်။ ဘုရားကျောင်းသွားပြီး မျက်စိနဲ့မြင်ရတဲ့အရာတွေကို ဝတ်ပြုကိုးကွယ်ဖို့မလိုဘဲ ယုံကြည်ခြင်းရှိလာဖို့ သမ္မာကျမ်းစာက ကူညီပေးတယ်’ လို့ သူမပြောပြတယ်။

^၁၆ ပေါ်လာဟာ ကက်သလစ်ဘာသာဝင်တစ်ဦးအဖြစ် ပြုစုပျိုးထောင်ခံခဲ့ရတယ်။ ဒါပေမဲ့ သူ ကြီးလာတဲ့အခါမှာ ဘုရားသခင် တကယ်ရှိမရှိဆိုတာ သူ သေချာမသိဘူး။ အဲဒီနောက် အဖြစ်အပျက်တစ်ခု ဖြစ်ပျက်ခဲ့တယ်။ သူမ ဒီလိုပြောတယ်– ‘မတွေ့တာ လနဲ့ချီကြာနေပြီဖြစ်တဲ့ သူငယ်ချင်းတစ်ယောက်နဲ့ ပြန်တွေ့တယ်။ အဲဒီအချိန်တုန်းကဆိုရင် လူတွေက ဆံပင်ရှည်ထားပြီး မူးယစ်ဆေးဝါးတွေ သုံးကြတယ်။ ဒါပေမဲ့ သူ ပြောင်းလဲသွားပြီ။ မုတ်ဆိတ်ရိတ်ပြီး ဆံပင်ညှပ်ထားတယ်၊ သူ့ကိုကြည့်ရတာ ပျော်နေတယ်။ ဒါနဲ့ သူ ဘာကြောင့် အဲဒီလိုပြောင်းလဲသွားတာလဲ၊ ဘယ်တွေသွားနေတာလဲလို့ မေးလိုက်တယ်။ သူက သူ ယေဟောဝါသက်သေတွေနဲ့ ကျမ်းစာလေ့လာခဲ့တဲ့အကြောင်းပြောပြပြီး ကျွန်မကို သက်သေခံတယ်။’ သမ္မာကျမ်းစာက သူ့ရဲ့သူငယ်ချင်းကို ပြုပြင်ပြောင်းလဲပေးလိုက်တာကို တွေ့ရလို့ ပေါ်လာ ကျမ်းစာကို စိတ်ဝင်စားလာပြီး သမ္မာကျမ်းစာက ဘုရားသခင်ဆီကလာတယ်ဆိုတာ ယုံကြည်ခဲ့တယ်။

‘စကားတော်သည် အကျွန်ုပ်ခြေရှေ့မှာ မီးခွက်ဖြစ်’

၁၇။ သမ္မာကျမ်းစာကို နေ့စဉ်ဖတ်ပြီး တွေးတောဆင်ခြင်တယ်ဆိုရင် သင် ဘယ်လိုဖြစ်လာမလဲ။

^၁၇ သမ္မာကျမ်းစာဟာ သန့်ရှင်းသောစွမ်းအားတော်ကတစ်ဆင့် ယေဟောဝါပေးတဲ့ လက်ဆောင်မွန်တစ်ခုဖြစ်တယ်။ ကျမ်းစာကို နေ့စဉ် နှစ်နှစ်ခြိုက်ခြိုက်ဖတ်ပါ၊ သမ္မာကျမ်းစာနဲ့ ဘုရားသခင်ကိုချစ်တဲ့ သင့်မေတ္တာ တိုးများလာပါလိမ့်မယ်။ (ဆာ. ၁:၁၊ ၂) ကျမ်းစာကို ဖတ်တဲ့အခါတိုင်း သင်ဖတ်တာတွေကို နားလည်နိုင်ဖို့ စမဖတ်ခင်မှာ သန့်ရှင်းသောစွမ်းအားတော်ပေးဖို့ ဘုရားသခင်ထံဆုတောင်းပါ။ (လု. ၁၁:၁၃) သမ္မာကျမ်းစာမှာ ဘုရားသခင့် အတွေးအခေါ်တွေပါတယ်။ အဲဒီမှာပါတဲ့အကြောင်းအရာတွေကို သင် တွေးတောဆင်ခြင်မယ်ဆိုရင် ဘုရားသခင် တွေးသလို သင်တွေးတတ်လာပါလိမ့်မယ်။

၁၈။ သင် ဘာကြောင့် သမ္မာကျမ်းစာကို ဆက်လေ့လာလိုသလဲ။

^၁၈ သမ္မာကျမ်းစာအမှန်တရားကို သင် ဆက်လေ့လာတာနဲ့အမျှ သိလာတဲ့အချက်တွေကို လက်တွေ့ကျင့်သုံးပါ။ (ဆာလံ ၁၁၉:၁၀၅ ကိုဖတ်ပါ။) ကျမ်းစာဖတ်တာက မှန်ကြည့်တာနဲ့တူတယ်။ သင် ပြုပြင်ပြောင်းလဲရမယ့်အချက်တွေကို သိလာတဲ့အခါ ပြုပြင်ပြောင်းလဲပါ။ (ယာ. ၁:၂၃-၂၅) ဘုရားသခင့်တရားစကားတော်က ဓားနဲ့တူတယ်။ သင့်ရဲ့ယုံကြည်ချက်တွေကို အဲဒါနဲ့ ကာကွယ်နိုင်တယ်။ စိတ်နူးညံ့သိမ်မွေ့သူတွေရဲ့ နှလုံးထဲမှာစွဲနေတဲ့ မှားယွင်းတဲ့သွန်သင်ချက်တွေကို ဖယ်ရှားရာမှာလည်း အဲဒါကို အသုံးပြုနိုင်တယ်။ (ဧ. ၆:၁၇) သင် သမ္မာကျမ်းစာကို အသုံးပြုတဲ့အခါမှာ ကျမ်းရေးသူတွေကို သန့်ရှင်းသောစွမ်းအားတော်နဲ့ တိုက်တွန်းခဲ့တာကို ကျေးဇူးတင်ပါ။

[အောက်ခြေမှတ်ချက်]

[စာမျက်နှာ ၂၉ ပါ အကျဉ်းဖော်ပြချက်]

သမ္မာကျမ်းစာကို နေ့စဉ်ဖတ်ပါ၊ ကျမ်းစာပေးတဲ့ ဘုရားသခင်ကိုချစ်တဲ့သင့်ရဲ့မေတ္တာ တိုးများလာပါလိမ့်မယ်

[စာမျက်နှာ ၂၆ ပါ ရုပ်ပုံ]

စာတစ်စောင်က အောက်မှာလက်မှတ်ထိုးထားတဲ့သူဆီက လာတယ်လို့ သတ်မှတ်ခံရ