သားသမီးတွေကို ကျေးဇူးသိတတ်ဖို့ သင်ပေးပါ

ကျေးဇူးသိတတ်သူတွေဟာ ပျော်ရွှင်တယ်၊ ကျန်းမာတယ်၊ အခက်အခဲတွေကို ကောင်းကောင်း ဖြေရှင်းနိုင်တယ်၊ မိတ်ဆွေမြဲတယ်။ “ကျေးဇူးသိတတ်တယ်ဆိုရင် စိတ်ဓာတ်ကို ပျက်စီးစေတဲ့ မနာလိုမှု၊ ဒေါသ၊ လောဘ၊ နာကြည်းတဲ့ ခံစားချက်တွေ မဝင်အောင် ကာကွယ်ပေးတယ်” လို့ သုတေသီ ရောဘတ် အေ အီမန် ပြောတယ်။a

ကျေးဇူးသိတတ်ရင် ကလေးတွေ ဘာအကျိုး ရမလဲ။ လူငယ် ၇၀၀ ကို လေးနှစ်ကြာ လေ့လာတဲ့အခါ ကျေးဇူးသိတတ်တဲ့ ကလေးတွေက စာမခိုးချဘူး၊ မူးယစ်ဆေးတွေ၊ အရက်တွေ မသုံးစွဲဘူး၊ ကိုယ့်ကိုယ်ကိုယ် ထိခိုက်စေတဲ့ အကျင့်ဆိုးတွေ မရှိဘူး။

• ရသင့် ရထိုက်တယ် ဆိုတဲ့ သဘောထားက ကျေးဇူးသိတတ်စိတ်ကို ပျက်စီးစေတယ်။ ကလေးအတော်များများက မိမိတို့မှာ ရှိတဲ့ ကောင်းတဲ့အရာတွေဟာ ရသင့် ရထိုက်လို့ ရထားတယ်ဆိုပြီး ယူဆကြတယ်။ ကောင်းချီးကို ဆုကျေးဇူးလို့ သဘောမထားဘဲ ရထိုက်လို့ ရတာဆိုပြီး သဘောထားရင် ကျေးဇူးသိတတ်တော့မှာ မဟုတ်ဘူး။

  အခုအချိန်မှာ အဲဒီသဘောထားကို ပိုပိုပြီး တွေ့နေရတယ်။ “ခေတ်ကိုက ကိုယ်လိုချင်တာ မှန်သမျှ ရသင့်တယ်လို့ သင်ပေးနေတယ်” ဆိုပြီး ကက်သရင်း ဆိုတဲ့ မိခင်တစ်ယောက်က ပြောတယ်။ “ကိုယ်ရသင့်တဲ့အရာတွေကို ဦးအောင် ယူသင့်တယ်ဆိုပြီး မီဒီယာတွေကလည်း မြှောက်ထိုးပင့်ကော် လုပ်နေတယ်။”

• ကျေးဇူးသိတတ်စိတ် ရှိဖို့ ငယ်စဉ်ကတည်းက သင်ပေးနိုင်တယ်။ “ကလေးတွေက သင်ပေးရ လွယ်တယ်။ ငယ်ငယ်ကတည်းက အကျင့်ကောင်းလေးတွေ သင်ပေးတာက အပင် တည့်တည့်မတ်မတ် ကြီးထွားဖို့ ထောက်ပေးတဲ့ ထောက်တိုင်နဲ့ တူတယ်” လို့ ကေး ဆိုတဲ့ မိခင်က ပြောတယ်။

ကျေးဇူးသိတတ်စိတ် ရှိအောင် သင်ပေးနိုင်ပုံ

• ကျေးဇူးတင်စကား ပြောတတ်ဖို့ သင်ပေးပါ။ တစ်ယောက်ယောက်က လက်ဆောင် ပေးရင်၊ ကြင်နာမှု ပြရင် ကျေးဇူးတင်ပါတယ် ဆိုတဲ့ စကားပြောဖို့ ကလေးငယ်တွေတောင် သင်ယူနိုင်တယ်။ ကြီးလာပြီး ရင့်ကျက်လာပြီဆိုရင် တခြားသူတွေရဲ့ ရက်ရောမှုကို ပိုပြီး ကျေးဇူးတင် လေးမြတ်တတ်လာမယ်။

  

  ကျမ်းစာ အခြေခံမူ– “ကျေးဇူးသိတတ်ကြပါ။”—ကောလောသဲ ၃:၁၅။

  “သုံးနှစ်သား မြေးလေးက ‘ကျေးဇူးတင်တယ်၊’ တစ်ခုခု တောင်းရင် ‘ကျေးဇူးပြု၍’ လို့ အမြဲ ပြောတယ်။ အဲဒါကို မိဘတွေရဲ့ အပြော၊ အလုပ်ကနေ သူ သင်ယူထားတာ။”—ဂျက်ဖရီ။

• ကျေးဇူးတင်ကြောင်း ပြတဲ့ လုပ်ရပ်တွေ သင်ပေးပါ။ လက်ဆောင် ရတဲ့အခါ ကျေးဇူးတင် စာတိုလေး ရေးဖို့ ကလေးကို သင်ပေးပါ။ အိမ်မှုကိစ္စလေးတွေ လုပ်ဖို့ ကလေးတွေကို သင်ပေးရင် မိသားစုမှာ အလုပ် ဘယ်လောက် များတယ်ဆိုတာ သိလာမယ်၊ အဲဒီအလုပ်တွေအတွက် ကျေးဇူးတင်တတ်လာမယ်။

  

  ကျမ်းစာ အခြေခံမူ– “ရယူခြင်းထက် ပေးကမ်းခြင်းက ပိုပျော်ရွှင်စေတယ်။”—တမန်တော် ၂၀:၃၅။

  “ကျွန်မရဲ့ ကလေးနှစ်ယောက်က အစားအသောက် ပြင်ဆင်တာ၊ ချက်ပြုတ်တာ၊ အိမ်မှုကိစ္စတွေမှာ ကူညီပေးတယ်။ အဲဒါကြောင့် မိဘတွေ ဘယ်လောက် အလုပ်များတယ်ဆိုတာ သိလာပြီး ကျေးဇူးတင်တတ် လာတယ်။”—ဘယ်ဗလီ။

• ရှိသင့်တဲ့ စိတ်ထား ရှိဖို့ သင်ပေးပါ။ နှိမ့်ချမှု ရှိရင် ကျေးဇူးသိတတ်စိတ် အလိုလို ပေါ်လာတယ်။ နှိမ့်ချသူဟာ ဘာပဲ လုပ်လုပ် အကူအညီ လိုတယ်ဆိုတာ သိတယ်။ အကူအညီ ရတဲ့အခါ ကျေးဇူးတင်ကြောင်း ဖော်ပြတယ်။

  

  ကျမ်းစာ အခြေခံမူ– “စိတ်နှိမ့်ချကြပါ၊ သူတစ်ပါးကို ကိုယ့်ထက် သာတယ်လို့ သဘောထားပါ။ ကိုယ့်အကျိုးကိုပဲ အာရုံမစိုက်ပါနဲ့၊ သူတစ်ပါးအကျိုးကိုလည်း ထည့်စဉ်းစားပေးကြပါ။”—ဖိလိပ္ပိ ၂:၃၊ ၄။

  “အစာစားတဲ့အခါတွေမှာ ကျေးဇူးတင်တယ်ဆိုတဲ့ စကားလုံးတွေ ပြောတတ်ဖို့ ကလေးတွေကို သင်ပေးတယ်။ ဘာအတွက် ကျေးဇူးတင်တယ်ဆိုတာ အလှည့်ကျ ပြောခိုင်းတယ်။ အဲဒါက အပျက်သဘော၊ တစ်ကိုယ်ကောင်းစိတ်အစား အပြုသဘော၊ ကျေးဇူးသိတတ်စိတ် ရှိစေတယ်။”—တမ်မာရာ။

အကြံပြုချက်– ပုံသက်သေ ပြပါ။ တခြားသူတွေကိုရော၊ ကလေးတွေကိုပါ ကျေးဇူးတင်ကြောင်း သင် အမြဲ ပြောမယ်ဆိုရင် ကလေးတွေလည်း အကျင့်ရသွားမယ်။