ခရစ်ယာန်တစ်ယောက် ဖြစ်ရခြင်းရဲ့ အဓိပ္ပာယ်—ကျမ်းစာ အဆိုက ဘာလဲ

ဒီနေ့အချိန်မှာ လူအတော်များများက ကိုယ့်ကိုယ်ကိုယ် ခရစ်ယာန်ပါလို့ ဂုဏ်ယူစွာ ပြောပြီး တခြားသူတွေကိုတော့ ထိခိုက်နှစ်နာအောင် ပြုမူဆက်ဆံတတ်ကြတယ်။ တစ်ကိုယ်ကောင်းဆန်၊ မရိုးသား၊ မကြင်နာတဲ့သူတွေ ရှိသလို အိမ်ထောင်ဖက်အပေါ် သစ္စာမရှိတဲ့သူတွေလည်း တွေ့နေရတယ်။ သူတို့ရဲ့ လုပ်ရပ်ကို ကြည့်ပြီး တချို့ ဒီလို စဉ်းစားမိနိုင်တယ်– “ဘာကိုကြည့်ပြီး လူတစ်ယောက်ကို ခရစ်ယာန်လို့ သတ်မှတ်တာလဲ။”

ခရစ်ယာန်တစ်ယောက် ဖြစ်ရခြင်းရဲ့ အဓိပ္ပာယ်မှန်

ကိုယ့်ကိုယ်ကိုယ် ခရစ်ယာန်လို့ ပြောတာ လွယ်ပါတယ်။ ဒါပေမဲ့ အပြောလောက်နဲ့ မလုံလောက်ဘူး။ ကျမ်းစာအရ ခရစ်ယာန်ဆိုတာ ယေရှုခရစ်ရဲ့ နောက်လိုက်ကို ဆိုလိုတာပါ။ (တမန်တော် ၁၁:၂၆) ယေရှုကိုယ်တိုင် ဒီလိုပြောတယ်– “ခင်ဗျားတို့သာ ကျွန်တော့်စကားကို  အမြဲလိုက်နာရင် ကျွန်တော့်တပည့်အစစ်” ဖြစ်မယ်။ ယေရှုရဲ့ စကားတွေအတိုင်း တစ်သဝေမတိမ်း လိုက်လျှောက်နိုင်တဲ့သူဆိုတာ မရှိပါဘူး။ ဒါပေမဲ့ ခရစ်ယာန်တစ်ယောက်က ယေရှုရဲ့ သွန်သင်ချက်တွေအတိုင်း အတတ်နိုင်ဆုံး လိုက်နာတယ်၊ နေ့စဉ်အသက်တာမှာ ယေရှု ချမှတ်ထားတဲ့ စံနှုန်းအတိုင်း ကြိုးစားနေထိုင်တယ်။ ဥပမာတချို့ သုံးသပ်ကြည့်ပါ။

ခရစ်ယာန်တွေ တစ်ကိုယ်ကောင်းမဆန်

ယေရှု ပြောဆိုရာ။ “‘အချင်းချင်း ချစ်ကြပါဆိုတဲ့ ပညတ်အသစ်တစ်ခု ကျွန်တော်ပေးမယ်။ ခင်ဗျားတို့ကို ကျွန်တော်ချစ်သလို အချင်းချင်း ချစ်ကြပါ။ အချင်းချင်း ချစ်မယ်ဆိုရင် ခင်ဗျားတို့ဟာ ကျွန်တော့်တပည့်တွေပဲဆိုတာ လူတွေသိလိမ့်မယ်’ လို့ပြောတယ်။”—ယောဟန် ၁၃:၃၄၊ ၃၅။

ယေရှု လုပ်ဆောင်ရာ။ ယေရှုက ဆင်းရဲချမ်းသာမရွေး၊ ဘဝနောက်ခံမရွေး လူတိုင်းကို မေတ္တာပြတယ်။ နာမကျန်းသူတွေကို ကုသပေးတယ်၊ ဆာငတ်သူတွေကို ကျွေးမွေးတယ်၊ သူ့အသက်ကိုတောင် ပေးခဲ့တယ်။—မဿဲ ၁၄:၁၄-၂၁။ ၂၀:၂၈။

ခရစ်ယာန်တွေရဲ့ အပြုအမူ။ ခရစ်ယာန်တွေက ရက်ရောတယ်၊ မျက်နှာမလိုက်ဘူး၊ ခွင့်လွတ်တယ်။ ဒီနည်းတွေနဲ့ ကိုယ်ကျိုးမငဲ့ဘဲ မေတ္တာပြကြတယ်။ အကူအညီ လိုအပ်နေသူတွေကို ကူညီပေးတယ်။ တခြားသူတွေအတွက် အနစ်နာခံဖို့ အသင့်ရှိကြတယ်။—၁ ယောဟန် ၃:၁၆။

ခရစ်ယာန်တွေ ရိုးသားကြ

ယေရှု ပြောဆိုရာ။ ‘ကျွန်တော်ဟာ အမှန်တရား ဖြစ်တယ်။’—ယောဟန် ၁၄:၆။

ယေရှု လုပ်ဆောင်ရာ။ ယေရှုက အမြဲ ရိုးရိုးသားသား ပြောဆိုပြုမူတယ်။ လူတွေကို ဘယ်တော့မှ မလှည့်စားဘူး။ တလွဲအဓိပ္ပာယ် ကောက်စေနိုင်တဲ့ စကားမျိုး မပြောဘူး။ ယေရှုကို ရိုးသားသူအဖြစ် လူသိများတယ်။ အခက်တွေ့နိုင်တဲ့ အခြေအနေမျိုးမှာတောင် ရိုးသားတဲ့စကားတွေပဲ ပြောတယ်။—မဿဲ ၂၂:၁၆။ ၂၆:၆၃-၆၇။

ခရစ်ယာန်တွေရဲ့ အပြုအမူ။ ခရစ်ယာန်တွေက မလိမ်ညာကြဘူး။ အခွန်မရှောင်ဘူး၊ မခိုးဘူး၊ အလုပ်မှာလည်း ရေသာမခိုဘူး။ (ရောမ ၁၃:၅-၇။ ဧဖက် ၄:၂၈) တခြားသူတွေကို ကလိမ်ကကျစ် လုပ်တာ၊ စာခိုးချတာ၊ အလုပ်ဖောင်နဲ့ စာရွက်စာတမ်းတွေကို မမှန်မကန် ဖြည့်တာမျိုး မလုပ်ဘူး။—ဟီဘရူး ၁၃:၁၈။

ခရစ်ယာန်တွေ ကြင်နာကြ

ယေရှု ပြောဆိုရာ။ “‘ဝန်ပိလို့ ပင်ပန်းနေသူတို့၊ ကျွန်တော့်ဆီ လာကြပါ။ ခင်ဗျားတို့ကို လန်းဆန်းစေမယ်။ ကျွန်တော့်ထမ်းပိုးကို ထမ်းပြီး ကျွန်တော့်ဆီကနေ သင်ယူကြပါ။ ကျွန်တော်ဟာ နူးညံ့သိမ်မွေ့ပြီး စိတ်နှိမ့်ချတယ်။ ခင်ဗျားတို့ လန်းဆန်းရလိမ့်မယ်။ ကျွန်တော့်ထမ်းပိုးဟာ ထမ်းလွယ်တယ်။ ဝန်လည်း ပေါ့ပါတယ်’ လို့ ပြောတယ်။”—မဿဲ ၁၁:၂၈-၃၀။

ယေရှု လုပ်ဆောင်ရာ။ ယေရှုဟာ ဖော်ရွေတယ်၊ စိတ်ထားလည်း နူးညံ့တယ်။ ကလေးတွေကအစ သူ့ကို မရှိန်ဘူး။ စိတ်ကြေကွဲသူတွေကို နှစ်သိမ့်အားပေးတယ်။ လူတိုင်းကို ဂုဏ်သိက္ခာရှိရှိ ဆက်ဆံတယ်။—မာကု ၁၀:၁၃-၁၅။ လုကာ ၉:၁၁။

ခရစ်ယာန်တွေရဲ့ အပြုအမူ။ ခရစ်ယာန်တွေက ကြင်ကြင်နာနာ ပြောဆိုကြတယ်။ ရိုင်းစိုင်းတဲ့၊ ထိခိုက်နစ်နာစေတဲ့ စကားတွေ မပြောဘူး။ (ဧဖက် ၄:၂၉၊ ၃၁၊ ၃၂) လူတွေကို စိတ်ဝင်တစား ရှိတယ်၊ ကူညီပေးနိုင်တဲ့ အခွင့်အရေးကို ရှာကြတယ်။

ခရစ်ယာန်တွေ အိမ်ထောင်ဖက်အပေါ် သစ္စာရှိ

ယေရှု ပြောဆိုရာ။ “ဘုရားသခင် တွဲဖက်ထားသူတွေကို ဘယ်သူမှ မခွဲကြနဲ့။”—မာကု ၁၀:၉။

ယေရှု လုပ်ဆောင်ရာ။ ယေရှုက အိမ်ထောင်မပြုပေမဲ့ အိမ်ထောင်သည်တွေကို သစ္စာရှိဖို့ တိုက်တွန်းတယ်။ (မဿဲ ၁၉:၉) အိမ်ထောင်ပြိုကွဲစေနိုင်တဲ့ လုပ်ရပ်တွေအကြောင်းလည်း သတိပေးတယ်။—မဿဲ ၅:၂၈။

ခရစ်ယာန်တွေရဲ့ အပြုအမူ။ ခရစ်ယာန်တွေက အိမ်ထောင်ကို ညစ်ညူးစေနိုင်တဲ့ ဘယ်လုပ်ရပ်ကိုမဆို ရှောင်တယ်။ (ဟီဘရူး ၁၃:၄) အိမ်ထောင်ဖက်အပေါ် ကြင်ကြင်နာနာ၊ လေးလေးစားစား ဆက်ဆံကြတယ်။—ဧဖက် ၅:၂၈၊ ၃၃။