ပညာအလိမ္မာ ၁၆:၃—“ကိုယ်ပြုသောအမှုတို့ကို ထာဝရဘုရား၌ အပ်လော့”

“လုပ်ဆောင်လေသမျှ ယေဟောဝါဆီ ပုံအပ်ထားပါ။ ဒါဆိုရင် အစီအစဉ်တွေ အောင်မြင်လိမ့်မယ်။”—ပညာအလိမ္မာ ၁၆:၃၊ ကမ္ဘာသစ်ဘာသာပြန်ကျမ်း။

“ကိုယ်ပြုသောအမှုတို့ကို ထာဝရဘုရား၌ အပ်လော့။ သို့ပြုလျှင် သင်၏အကြံအစည်တို့သည် တည်ကြလိမ့်မည်။”—သုတ္တံ ၁၆:၃၊ ယုဒသန်ကျမ်း။

ပညာအလိမ္မာ ၁၆:၃ ရဲ့အဓိပ္ပာယ်

စစ်မှန်တဲ့ဘုရားကို ကိုးကွယ်သူတွေဟာ ကိုယ်တော့်ကို ကိုးစားပြီး လမ်းညွှန်မှုအတိုင်း လုပ်ဆောင်ရင် အစီအစဉ်တွေ အောင်မြင်မယ်ဆိုတာကို ဒီကျမ်းပိုဒ်က စိတ်ချစေတယ်။

“လုပ်ဆောင်လေသမျှ ယေဟောဝါဆီ ပုံအပ်ထားပါ။” ယေဟောဝါaကို ကိုးကွယ်သူတွေဟာ ဆုံးဖြတ်ချက်တွေ မချခင်မှာ ဘုရားဆီ လမ်းညွှန်မှု တောင်းခံကြတယ်။ (ယာကုပ် ၁:၅) ဘာကြောင့်လဲ။ တစ်ချက်ကတော့ လူတွေဟာ ကိုယ့်ဘဝအပေါ် သက်ရောက်မှုရှိတဲ့ ဖြစ်ရပ်တွေကို အနည်းငယ်လောက်ပဲ ထိန်းချုပ်နိုင် ဒါမှမဟုတ် လုံးဝမထိန်းချုပ်နိုင်ကြဘူး။ (ဒေသနာ ၉:၁၁။ ယာကုပ် ၄:၁၃-၁၅) ဒီအပြင်၊ ဆန္ဒရှိတာတွေ လုပ်ဆောင်ဖို့ ဉာဏ်ပညာ လိုနေနိုင်တယ်။ ဒီအကြောင်းရင်းတွေကြောင့် လူအတော်များများဟာ ပညာရှိစွာနဲ့ မိမိတို့ရဲ့အမှုကိစ္စတွေကို ဘုရားဆီ အပ်နှံကြတယ်။ လမ်းညွှန်မှုအတွက် ဘုရားထံ ဆုတောင်းခြင်း၊ ကျမ်းစာမှာ ရေးသားဖော်ပြထားတဲ့ ဘုရားအလိုတော်နဲ့အညီ လုပ်ဆောင်ခြင်းအားဖြင့် ဘုရားဆီ အပ်နှံကြတယ်။—ပညာအလိမ္မာ ၃:၅၊ ၆။ ၂ တိမောသေ ၃:၁၆၊ ၁၇။

“ကိုယ်ပြုသောအမှုတို့ကို ထာဝရဘုရားb၌အပ်လော့” လို့ပြောတာက စာသားအရ “ဘုရားသခင်အပေါ် ကိုယ့်အလုပ်တွေကို လှိမ့်တင်လိုက်” လို့ ဆိုလိုတယ်။ ရည်ညွှန်းစာအုပ်တစ်အုပ်အရ ဒီအသုံးအနှုန်းက “လူတစ်ယောက်ဟာ သူ့ကျောပေါ်က ဝန်ထုပ်ကို ပိုအားသန်တဲ့၊ ပိုထမ်းနိုင်တဲ့ သူဆီ ရွှေ့ပြောင်းလိုက်တာ” ကို ဖော်ပြတယ်။ နှိမ့်ချစိတ်နဲ့ ဘုရားကို “အားကိုး” တဲ့သူကို ဘုရား ကူညီထောက်မမယ်ဆိုတာ စိတ်ချနိုင်ပါတယ်။ —ဆာလံ ၃၇:၅။ ၅၅:၂၂။

“လုပ်ဆောင်လေသမျှ” လို့ သုံးနှုန်းထားတဲ့အတွက် လူတွေရဲ့ အကြံအစည်တိုင်းကို ဘုရား နှစ်သက်တယ်၊ ကောင်းချီးပေးတယ်လို့ မဆိုလိုပါဘူး။ ယေဟောဝါဘုရားရဲ့ ကောင်းချီးရဖို့ အကြံအစည်တွေဟာ ဘုရားရဲ့စံနှုန်း၊ ဘုရားရဲ့အလိုတော်နဲ့ ကိုက်ညီရပါမယ်။ (ဆာလံ ၁၂၇:၁၊ ၁။ ၁ ယောဟန် ၅:၁၄) ဘုရားက နာခံမှုမရှိသူတွေကို ကောင်းချီး မပေးဘူး။ အဲဒီအစား “လူဆိုးတွေရဲ့ အစီအစဉ်တွေကိုတော့ ပျက်ပြားစေတယ်။” (ဆာလံ ၁၄၆:၉) တစ်ချိန်တည်းမှာ ကျမ်းစာမှာပါတဲ့ စံနှုန်းတွေကို လေးစားပြီး ဘုရားကို လက်အောက်ခံကြောင်း တင်ပြသူတွေကို ဘုရား ထောက်မပေးတယ်။—ဆာလံ ၃၇:၂၃။

“ဒါဆိုရင် အစီအစဉ်တွေ အောင်မြင်လိမ့်မယ်။” ဘာသာပြန်ကျမ်းတချို့က ဒီအသုံးအနှုန်းကို “သင်၏အကြံအစည်တို့သည် တည်ကြလိမ့်မည်” လို့ ပြန်ဆိုတယ်။ ဟီဘရူးကျမ်းစောင်များ ဒါမှမဟုတ် လူတွေခေါ်လေ့ရှိတဲ့ ဓမ္မဟောင်းကျမ်းမှာ သုံးနှုန်းထားတဲ့ “တည်ကြလိမ့်မည်” ဆိုတဲ့စကားလုံးဟာ အုတ်မြစ်ချတဲ့သဘော သက်ရောက်တယ်။ များသောအားဖြင့် ဘုရားဖန်ဆင်းထားရာတွေ အခိုင်အမာ တည်ရှိနေတာကို ရည်ညွှန်းလေ့ရှိတယ်။ (ပညာအလိမ္မာ ၃:၁၉။ ယေရမိ ၁၀:၁၂) အလားတူပဲ ဘုရားအလိုတော်နဲ့အညီ မှန်ရာလုပ်ဆောင်နေသူတွေရဲ့ အစီအစဉ်တွေကို တည်စေမယ်။ သူတို့ကို လုံခြုံ၊ တည်ငြိမ်ပြီး ပျော်ရွှင်တဲ့ဘဝရဖို့ ဘုရား ကူညီပေးပါလိမ့်မယ်။—ဆာလံ ၂၀:၄။ ပညာအလိမ္မာ ၁၂:၃။

ပညာအလိမ္မာ ၁၆:၃ အထက်အောက်စကား

ဒီပညာအလိမ္မာစကားကို ဘုရင်ရှောလမုန် ရေးခဲ့တာပါ။ ပညာအလိမ္မာကျမ်းထဲက အများစုကို သူပြုစုခဲ့တာဖြစ်တယ်။ ဘုရားသခင်က ရှောလမုန်ကို ဉာဏ်ပညာပေးတဲ့အတွက် ပညာအလိမ္မာစကား ထောင်နဲ့ချီကို သူ ပြောနိုင်ခဲ့တယ်။—၁ ဘုရင်များ ၄:၂၉၊ ၃၂။ ၁၀:၂၃၊ ၂၄။

အခန်းကြီး ၁၆ မှာ ရှောလမုန်က ဘုရားရဲ့ ဉာဏ်ပညာကို ချီးမွမ်းတာနဲ့ အစချီထားပြီး စိတ်ကြီးဝင်သူတွေကိုတော့ ရွံရှာတဲ့အကြောင်း ဖော်ပြထားတယ်။ (ပညာအလိမ္မာ ၁၆:၁-၅) ပြီးတဲ့နောက် ပညာအလိမ္မာကျမ်းမှာ ထပ်တလဲလဲတွေ့ရတဲ့ အမှန်တရားကို စာရှုသူ နားလည်စေဖို့ ကူညီပေးခဲ့တယ်။ အဲဒီအမှန်တရားကတော့ လူတွေဟာ နှိမ့်ချစိတ်ရှိမှ၊ ဘုရားရဲ့ လမ်းညွှန်မှုကို ခံယူမှပဲ အမှန်တကယ် ပညာရှိနိုင်တယ် ဆိုတာပါပဲ။ (ပညာအလိမ္မာ ၁၆:၃၊ ၆-၈၊ ၁၈-၂၃) ဒီအခြေခံအမှန်တရားကို ကျမ်းစာထဲမှာ မကြာခဏ ဖော်ပြထားပါတယ်။—ဆာလံ ၁:၁-၃။ ဟေရှာယ ၂၆:၃။ ယေရမိ ၁၇:၇၊ ၈။ ၁ ယောဟန် ၃:၂၂။

ပညာအလိမ္မာကျမ်းကို ခြုံငုံသုံးသပ်ထားတဲ့ ဒီဗီဒီယိုအတိုကို ကြည့်ပါ။