ရှုံးနိမ့်သွားတာထက် ပိုဆိုးတာက ဘာဖြစ်မလဲ။ တလွဲအောင်မြင်မှုပါပဲ။ ကြိုးစားထားတာတချို့ ရှုံးနိမ့်သွားတယ်ဆိုရင် အခြေအနေကို ပြုပြင်နိုင်တယ်။ အနည်းဆုံးတော့ ကြုံရတာကနေ သင်ခန်းစာယူပြီး နောက်တစ်ခါ အဲဒီလိုမဖြစ်အောင် ရှောင်နိုင်တယ်။

တလွဲအောင်မြင်မှုကတော့ အဲဒါနဲ့မတူဘူး။ ကိုယ်ကအမှန်တကယ် ရှုံးနိမ့်နေတယ်၊ အဲဒါကို အောင်မြင်နေတယ်လို့ ထင်နေနိုင်တယ်။ အချိန်နှောင်းသွားမှ ပြောင်းလဲဖို့လိုနေပြီဆိုတာ သိလာတတ်တယ်။

ဥပမာတစ်ခုကို သုံးသပ်ကြည့်ပါ။ တစ်ခါတုန်းက၊ ယေရှုခရစ် ဒီလိုမေးခဲ့တယ်– “လူသည် တစ်လောကလုံးကို အပိုင်ရ၍ မိမိအသက် ရှုံးလျှင် အဘယ်အကျိုးရှိမည်နည်း။” (မဿဲ ၁၆:၂၆) အဲဒီစကားတွေက ငွေ၊ ငွေနဲ့ဝယ်လို့ရတဲ့အရာတွေ ပိုင်ဆိုင်ဖို့ အဓိကထားသူတွေကို ပြောနေတာဖြစ်ပြီး တလွဲအောင်မြင်မှုကိုဖော်ပြတဲ့ အကောင်းဆုံးဥပမာဖြစ်တယ်။ “ရာထူးတိုးဖို့၊ ငွေပိုရဖို့၊ ပစ္စည်းများများပိုင်ဆိုင်ဖို့ကိုပဲ စဉ်းစားနေတဲ့သူတွေဟာ မရောင့်ရဲနိုင်ကြဘူး။ အောင်မြင်မှုကို ငွေနဲ့တိုင်းတာတာက အရမ်းပေါ့ပျက်လွန်းရာရောက်ပြီး နောက်ပိုင်းမှာ အသက်ရှင်ရတာ အဓိပ္ပာယ်မဲ့နေပါလိမ့်မယ်” ဆိုပြီး အလုပ်သမားဆိုင်ရာအကြံပေးအရာရှိ တောမ် ဒန်နမ် ရေးသားခဲ့တယ်။

အဲဒါကို လူအတော်များများ လက်ခံကြပါတယ်။ အမေရိကန်မှာပြုလုပ်တဲ့ စစ်တမ်းတစ်ခုအရ “အောင်မြင်တဲ့ဘဝကို ပိုင်ဆိုင်ဖို့ အထောက်အကူပြုတဲ့အရာများ” စာရင်း ၂၂ ခုထဲမှာ “ငွေကြေးများစွာပိုင်ဆိုင်ခြင်း” ကို အမှတ်စဉ် ၂၀ မှာ ထည့်ထားတယ်။ ကျန်းမာရေးကောင်းတာ၊ လူမှုဆက်ဆံရေး၊ ကိုယ်နှစ်သက်တဲ့အလုပ် စတာတွေကို ထိပ်ဆုံးပိုင်းမှာ စာရင်းသွင်းထားကြတယ်။

ဒါကိုကြည့်ရင် လူများစွာဟာ အမေးခံရတဲ့အခါ စစ်မှန်တဲ့ အောင်မြင်မှုနဲ့ တလွဲအောင်မြင်မှုကို ခွဲခြားနိုင်ကြတယ်ဆိုတာ ဖော်ပြတယ်။ ဒါပေမဲ့ အောင်မြင်မှုနဲ့ပတ်သက်ပြီး ထားသင့်တဲ့အမြင်ကို မေးရင်တော့ ဆုံးဖြတ်ရခက်တတ်ကြပါတယ်။

အောင်မြင်မှုကို ကိုယ် ဘာနဲ့တိုင်းတာသလဲဆိုတာသိအောင် ဖြစ်နိုင်ခြေရှိတဲ့ အောက်ပါအခြေအနေတွေကို သုံးသပ်ကြည့်ပါ။

ဘယ်သူ့ကို စစ်မှန်တဲ့အောင်မြင်သူလို့ ပြောမလဲ

• 

  အဲလက်စ်

  အဲလက်စ်မှာ စီးပွားရေးလုပ်ငန်းတစ်ခုရှိတယ်။ သူဟာ ရိုးသားတယ်၊ အလုပ်ကြိုးစားပြီး ဖော်ရွေပျူငှာတယ်။ အဲလက်စ်ရဲ့လုပ်ငန်း တိုးတက်လာပြီး သူနဲ့သူ့မိသားစုဟာ အဆင်ပြေပြေ နေနိုင်လာတယ်။

• 

  ခေးလ်

  ခေးလ်မှာလည်း အဲလက်စ်လို စီးပွားရေး လုပ်ငန်းတစ်ခုရှိပြီး ဝင်ငွေပိုရအောင် ကြိုးစားတယ်။ ပြိုင်ဘက်ကို အသာရဖို့ ခေးလ်ဟာ အလုပ်မှာပဲအချိန်ကုန်ပြီး ကျန်းမာရေးချို့တဲ့လာတယ်။

• 

  ဂျဲနက်

  ဂျဲနက်ဟာ အလယ်တန်းကျောင်းသူ တစ်ဦးဖြစ်ပြီး စာကြိုးစားသူ၊ ပညာကို မြတ်နိုးသူဖြစ်တယ်။ ဒါကြောင့် သူဟာ အဆင့်ကောင်းကောင်းရလာတယ်။

• 

  အယ်လင်

  အယ်လင်ဟာ ဂျဲနက်ထက် အဆင့် ပိုကောင်းပြီး စာတော်တဲ့ ကျောင်းသားတွေထဲမှာ ပါတယ်။ တကယ်တမ်းတော့ သူဟာ စာခိုးချပြီး ပညာကို အလေးမထားသူဖြစ်တယ်။

ခေးလ်နဲ့ အယ်လင် ဒါမှမဟုတ် လေးယောက်စလုံးကို အောင်မြင်သူတွေလို့ သင် ပြောမယ်ဆိုရင် ဒီလိုအခြေအနေမျိုး ဘယ်လိုရောက်လာသလဲဆိုတာ ထည့်မတွက်ဘဲ သူတို့ရဲ့ လက်ရှိအခြေအနေကိုကြည့်ပြီး သတ်မှတ်တာဖြစ်တယ်။

အဲလက်စ်နဲ့ ဂျဲနက်ကိုပဲ ရွေးမယ်ဆိုရင်တော့ သူတို့ရဲ့ အကျင့်စာရိတ္တ၊ အလုပ်အပေါ်ထားတဲ့ ကျင့်ဝတ်နဲ့ တိုင်းတာတာဖြစ်မယ်။ အဲဒီလိုတိုင်းတာခြင်းက ပိုအဓိပ္ပာယ်ရှိပါတယ်။ အောက်ပါအချက်တွေကို သုံးသပ်ကြည့်ပါ–

• ဂျဲနက်အတွက် ဘယ်အရာက ရေရှည်အကျိုးပြုမလဲ၊ အဆင့်ကောင်းတာလား၊ ပညာရေးကို မြတ်နိုးတာလား။

• အဲလက်စ်ရဲ့ ကလေးတွေအတွက် ဘယ်အရာက ပိုကောင်းသလဲ၊ ငွေနဲ့ဝယ်နိုင်တဲ့အရာတွေကို ပိုင်ဆိုင်တာလား ဒါမှမဟုတ် ကလေးတွေကိုအချိန်ပေးတဲ့ ဖခင်လား။

အဓိကအချက်– တလွဲအောင်မြင်မှုကို မြင်ရတဲ့အရာနဲ့ပဲ တိုင်းတာ,တာဖြစ်ပြီး စစ်မှန်တဲ့အောင်မြင်မှုကို စံနှုန်းကောင်းတွေနဲ့ တိုင်းတာ,တာဖြစ်ပါတယ်။

အောင်မြင်မှုနဲ့ပတ်သက်ပြီး သင့်တော်တဲ့အမြင်ရှိဖို့ သမ္မာကျမ်းစာမှာ အားပေးထားတယ်။ အောင်မြင်မှုဆိုတာ ကံကြမ္မာနဲ့ပဲဆိုင်တယ်လို့တော့ မသွန်သင်ဘူး။ ဝတ္ထုစာအုပ်တွေမှာဖော်ပြတဲ့ ကိုယ်ဖြစ်ချင်တဲ့ ‘အိပ်မက်ကို အကောင်အထည်ဖော်လိုက်’ အားလုံးဖြစ်လာလိမ့်မယ် ဆိုတဲ့ အဆိုကိုလည်း မထောက်ခံဘူး။ တကယ်တော့ ကလေးဘဝကတည်းက ဘာကြိုးစားအားထုတ်မှုမှမရှိဘဲ လိုတာအားလုံးရခဲ့သူဟာ စိတ်ပျက်စရာဘဝကိုပဲ ပိုင်ဆိုင်ရတတ်ပါတယ်။

စစ်မှန်တဲ့ အောင်မြင်မှုကို လူတိုင်း ပိုင်ဆိုင်နိုင်ပါတယ်။ ဒါပေမဲ့ ကြိုးစားအားထုတ်မှုတော့ လိုတယ်။ အောက်ပါ အကြံပြုချက်တွေကို သုံးသပ်ကြည့်ပါ–

• 

  သမ္မာကျမ်းစာပြောဆိုရာ–

  “ငွေကိုတပ်မက်သောသူသည် ငွေနှင့် အလိုဆန္ဒမပြေနိုင်။ စည်းစိမ်ကိုတပ်မက်သောသူသည် စည်းစိမ်တိုးပွား သော်လည်း မရောင့်ရဲနိုင်။”—ဒေသနာ ၅:၁၀။

  ဘာကိုဆိုလိုတာလဲ– ရုပ်ပစ္စည်းကို အဓိကထားသူတွေဟာ မရောင့်ရဲနိုင်ကြဘူး။ ရလေလိုလေပဲ။ “ငွေကို အဓိကထားသူတွေဟာ တခြားသူတွေနဲ့ ရင်းနှီးတဲ့ဆက်ဆံရေးကို အဓိကထားသူတွေထက် စိတ်သောကပိုရောက်ကြပြီး ကိုယ်စိတ်ဆင်းရဲတာများတယ်” လို့ ဒေါက်တာ ဂျန် အမ် တွမ်ဂျီက သူ့ရဲ့စာအုပ် (Generation Me) မှာ ရေးသားထားတယ်။ ဒီလိုလည်း ဖော်ပြထားသေးတယ်– “ဘယ်လိုပဲ လေ့လာလေ့လာ ငွေနဲ့ ပျော်ရွှင်မှုကို ဝယ်လို့မရဘူး၊ ဝမ်းရေးအဆင်ပြေတဲ့အဆင့် ရောက်နေရင်တောင် ငွေနဲ့ ကျေနပ်ရောင့်ရဲတဲ့ဘဝ ဘယ်လိုမှမဆက်စပ်ဘူး ဆိုတာ တွေ့ရတယ်။”

  လုပ်ဆောင်နိုင်ရာ– စည်းစိမ်ဥစ္စာတွေထက် ပိုအကျိုးပြုတဲ့အရာတစ်ခု ပိုင်ဆိုင်ဖို့ ပန်းတိုင်ထားပါ။ “ခပ်သိမ်းသောတပ်မက်မှုကို သတိထားလျက် ကြဉ်ရှောင်ကြလော့။ အကြောင်းမူကား လူတစ်ဦးသည် စည်းစိမ်ကြွယ်ဝ သော်လည်း သူ၏စည်းစိမ်၌ အသက်မတည်” ဆိုပြီး ယေရှုပြောခဲ့တယ်။—လုကာ ၁၂:၁၅။

• 

  သမ္မာကျမ်းစာပြောဆိုရာ–

  “မာနသည်ပျက်စီးခြင်းအရင်၊ ထောင်လွှားသောသဘောသည် ရှုတ်ချခြင်းအရင်၌ နေရာကျတတ်၏။” —သုတ္တံ ၁၆:၁၈။

  ဘာကိုဆိုလိုတာလဲ– ရည်မှန်းချက်ကြီးတာ၊ ဘဝင်မြင့်တာတွေက စစ်မှန်တဲ့အောင်မြင်မှု မရစေဘူး။ နှစ်ပေါင်းများစွာ အောင်မြင်နေတဲ့ ကုမ္ပဏီဦးဆောင်သူတွေဟာ “နှိမ့်ချသူ၊ သိုသိုသိပ်သိပ်နေသူတွေဖြစ်ပြီး ကုမ္ပဏီ သုံးပုံနှစ်ပုံကို ဦးဆောင်နေသူတွေကတော့ အတ္တကြီးသူတွေဖြစ်ကြတဲ့အတွက် ကုမ္ပဏီကို ပျက်စီးစေတယ် ဒါမှမဟုတ် တိုးတက်မှုမရှိဘူး” ဆိုပြီး စာအုပ်တစ်အုပ် (Good to Great) မှာ ဖော်ပြထားတယ်။ သင်ခန်းစာက ဘာလဲ။ ကိုယ့်ကိုယ်ကိုယ် အထင်ကြီးလွန်းတာ၊ အတ္တကြီးလွန်းတာက အောင်မြင်မှုမရစေဘဲ ရှုံးနိမ့်ဖို့ အကြောင်းပိုများတယ်။

  လုပ်ဆောင်နိုင်ရာ– ထင်ပေါ်ကျော်ကြားအောင် ကြိုးစားမယ့်အစား နှိမ့်ချစိတ်ကို မွေးမြူပါ။ “မည်သူမဆို ဘာမျှမဟုတ်ဘဲလျက် ငါသည် အရေးပါသူဖြစ်သည်ဟု ထင်မှတ်လျှင် ထိုသူသည် မိမိကိုယ်ကို လှည့်ဖြားသောသူ ဖြစ်၏” လို့ ကျမ်းစာကဆိုတယ်။—ဂလာတိ ၆:၃။

• 

  သမ္မာကျမ်းစာပြောဆိုရာ–

  ‘ပင်ပင်ပန်းပန်းလုပ်ဆောင်မှုကနေ ပျော်ရွှင်မှုခံစားတာထက်ပိုကောင်းတာ ဘာမှမရှိဘူး။’ —ဒေသနာ ၂:၂၄၊ ကဘ။

  ဘာကိုဆိုလိုတာလဲ– သင့်မှာ အလုပ်နဲ့ပတ်သက်ပြီး ကျင့်ဝတ်ကောင်းရှိမယ်ဆိုရင် အလုပ်မှာ ပျော်ပါလိမ့်မယ်။ ဒေါက်တာ မက်ဒလင်း လာဗင်က သူ့ရဲ့စာအုပ် (Teach Your Children Well) မှာ ဒီလိုဖော်ပြထားတယ်– “အောင်မြင်တယ်လို့ ခံစားရတာက အလုပ်ပြီးမြောက်လို့ဖြစ်တယ်။ အလုပ်ပြီးမြောက်တာကလည်း ဇွဲရှိရှိ ကြိုးစားလို့ပါ။” အဲဒီထဲမှာ အခက်အခဲတွေကို ခံနိုင်ရည်ရှိရှိ ကိုင်တွယ်ဖြေရှင်းတာလည်း ပါတယ်။

  လုပ်ဆောင်နိုင်ရာ– အလုပ်ကို ကျွမ်းကျင်လာအောင် ကြိုးစားပါ။ အခက်အခဲတွေ ကြုံရတဲ့အခါ လက်မလျှော့ပါနဲ့။ ကိုယ့်မှာ ကလေးတွေရှိမယ်ဆိုရင် သူတို့ရဲ့အသက်အရွယ်၊ လုပ်နိုင်မှုပေါ်မူတည်ပြီး သူတို့ရဲ့ပြဿနာကို သူတို့ကိုယ်တိုင်ဖြေရှင်းဖို့ အခွင့်ပေးပါ။ သူတို့ရဲ့ပြဿနာတွေကို ကိုယ်က ဒိုင်ခံဖြေရှင်းပေးတာမျိုး မလုပ်ပါနဲ့။ ကလေးတွေ ခံနိုင်ရည်ရှိလာတဲ့အခါ စိတ်ကျေနပ်မှု ခံစားရပြီး အဲဒါက လူကြီးဘဝအတွက် လိုအပ်တဲ့ လေ့ကျင့်ပေးမှုလည်းဖြစ်တယ်။

• 

  သမ္မာကျမ်းစာပြောဆိုရာ–

  ‘အသက်ရှင်သောခွေးသည် သေသောခြင်္သေ့ထက် သာ၍ကောင်း၏။’—ဒေသနာ ၉:၄။

  ဘာကိုဆိုလိုတာလဲ– ဝမ်းရေးအတွက် သင် အလုပ်လုပ်တာဖြစ်မယ်ဆိုရင် သင့်ဘဝတစ်ခုလုံးကို အလုပ်ထဲမှာပဲ ပုံအပ်မထားသင့်ဘူး။ အလုပ်မှာတော့ သင်ဟာ ထိပ်တန်းရောက်နေပေမဲ့လည်း ကျန်းမာရေးထိခိုက်လာမယ်၊ မိသားစုရဲ့ လေးစားမှုမရတော့ဘူးဆိုရင် အောင်မြင်တယ်လို့ ပြောနိုင်ပါ့မလား။ တကယ်အောင်မြင်သူတွေဟာ အလုပ်၊ ကျန်းမာရေး၊ မိသားစု စတာတွေကို သူ့နေရာနဲ့သူ ထားတတ်ကြတယ်။

  လုပ်ဆောင်နိုင်ရာ– ကျန်းမာရေးကို ဂရုစိုက်ပါ။ လုံလောက်စွာ အနားယူပါ။ ကျန်းမာရေး၊ မိသားစုနဲ့ မိတ်ဆွေတွေကို အဆုံးရှုံးခံပြီး အလုပ်ကိုပဲ မဲလုပ်နေရင် တလွဲအောင်မြင်မှုဖြစ်ပြီး အကျိုးမရှိပါဘူး။

• 

  သမ္မာကျမ်းစာပြောဆိုရာ–

  “ဘုရားသခင်ကို မှီခိုရန် လိုကြောင်း သိမှတ်သူတို့သည် ပျော်ရွှင်ကြ၏။”—မဿဲ ၅:၃။

  ဘာကိုဆိုလိုတာလဲ– သမ္မာကျမ်းစာကိုလေ့လာပြီး ကျမ်းစာလမ်းညွှန်ချက်တွေအတိုင်း ကျင့်သုံးတာက စစ်မှန်တဲ့အောင်မြင်မှုရစေတယ်။ ဝတ်ပြုရေးကို ပထမနေရာထားတာက ရုပ်ပစ္စည်းအတွက် စိုးရိမ်ပူပန်မှုတွေ လျော့နည်းသွားစေတယ်ဆိုတာကို သန်းနဲ့ချီတဲ့ ယေဟောဝါသက်သေတွေ တွေ့ရှိထားကြတယ်။—မဿဲ ၆:၃၁-၃၃။

  လုပ်ဆောင်နိုင်ရာ– စစ်မှန်တဲ့အောင်မြင်မှုရဖို့ သမ္မာကျမ်းစာက ဘယ်လိုကူညီပေးနိုင်သလဲဆိုတာ လေ့လာကြည့်ပါ။ ထပ်ဆင့်သိချင်တယ်ဆိုရင် ယေဟောဝါသက်သေတွေနဲ့ ဆက်သွယ်ပါ၊ www.pr418.com/mya မှာ ဝင်ကြည့်ပါ။