ဉာဏ်ပညာက အသံလွှင့်ပြီး ကြွေးကြော်နေပါတယ်—သင် ကြားပါသလား

ဉာဏ်ပညာကို အဖိုးဖြတ်လို့မရဘူး။ ဉာဏ်ပညာသာမရှိရင် အမှားတွေ တစ်ခုပြီးတစ်ခု လုပ်မိနေမှာဖြစ်တယ်။ ဒါဆိုရင် စစ်မှန်တဲ့ဉာဏ်ပညာကို ဘယ်မှာရှာတွေ့နိုင်မလဲ။ သုတ္တံကျမ်းကို ရေးခဲ့တဲ့သူဟာ ယေဟောဝါဘုရားသခင်ရဲ့ အတိုင်းအဆမဲ့ ဉာဏ်ပညာကို စိတ်ထဲထားပြီး ရေးခဲ့တာဖြစ်တယ်။ ဘယ်သူမဆို ဘုရားသခင်ရဲ့ ဉာဏ်ပညာကို သမ္မာကျမ်းစာကနေ ရယူနိုင်ပါတယ်။ အောက်ပါအချက်တွေကို သုံးသပ်ကြည့်ပါ–

• ကမ္ဘာ့စွယ်စုံကျမ်း မှာ ဒီလိုပြောထားတယ်– သမ္မာကျမ်းစာဟာ “သမိုင်းမှာ အထုတ်ဝေရဆုံး စာအုပ်ဖြစ်တယ်။ တခြားစာအုပ်တွေအားလုံးထက် သမ္မာကျမ်းစာကို ဘာသာပြန်ထားတဲ့ ဘာသာစကားတွေက ပိုများတယ်။” အခုအချိန်မှာ သမ္မာကျမ်းစာကို တစ်အုပ်လုံးအနေနဲ့ဖြစ်စေ၊ တစ်စိတ်တစ်ပိုင်းအနေနဲ့ဖြစ်စေ ဘာသာစကားပေါင်း ၂,၆၀၀ နီးပါးနဲ့ ထုတ်ဝေထားလို့ လူ့မိသားစု ၉၀ ရာခိုင်နှုန်းကျော် ဖတ်ရှုနိုင်ပါတယ်။

• ဉာဏ်ပညာဟာ မပြတ်တမ်း ‘အသံလွှင့်ပြီး ကြွေးကြော်’ နေတာ တကယ်ပါပဲ။ ဘာဖြစ်လို့လဲဆိုတော့ “လူမျိုးအပေါင်းတို့အတွက် သက်သေဖြစ်စေရန် နိုင်ငံတော်နှင့်ဆိုင်သော ဤသတင်းကောင်းကို လူနေရာ မြေတစ်ပြင်လုံး၌ ဟောပြောရလိမ့်မည်။ သို့ပြီးမှ [ဒီလောကစနစ်၏] အဆုံးသည် ရောက်လိမ့်မည်” လို့ မဿဲ ၂၄:၁၄ မှာဆိုတဲ့အတိုင်းပဲ ဖြစ်နေလို့ပါ။

အဲဒီ “သတင်းကောင်း” ဟာ စစ်မှန်တဲ့ဉာဏ်ပညာ ဖြစ်ပါ တယ်။ အကြောင်းကတော့ လူ့ပြဿနာတွေကို ဖြေရှင်းပေးမယ့် ဘုရားသခင့်နိုင်ငံတော်ကို ဖော်ပြပေးလို့ပါပဲ။ ဘုရားသခင့်နိုင်ငံတော်ဟာ ဘုရားသခင်တည်ထောင်တဲ့ အစိုးရ တစ်ခုဖြစ်ပြီး တစ်ကမ္ဘာလုံးကို အုပ်ချုပ်သွားမယ်။ အဲဒီအခါ တစ်ကမ္ဘာလုံးမှာ အစိုးရတစ်ခုပဲ ရှိပါလိမ့်မယ်။ (ဒံယေလ ၂:၄၄၊ ၄၅; ၇:၁၃၊ ၁၄) ဒါကြောင့် ယေရှုက “နိုင်ငံတော် လာပါစေ။ အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်၌လည်း ပြည့်စုံပါစေ” ဆိုပြီး ဆုတောင်းခဲ့တာဖြစ်တယ်။—မဿဲ ၆:၉၊ ၁၀။

ယေဟောဝါသက်သေတွေဟာ နိုင်ငံပေါင်း ၂၃၉ နိုင်ငံမှာ ဘုရားသခင့်နိုင်ငံတော်အကြောင်း ကြေညာရတာကို အခွင့်ထူးအဖြစ် ယူမှတ်ကြပါတယ်။ အမှန်တကယ်ပါပဲ၊ ဘုရားသခင့်ဉာဏ်ပညာကို “အိမ်တံခါးဝမှာ ကြွေးကြော်” နေပါတယ်။ သင် ကြားပါသလား။