ဂျူးအမျိုးသမီးတစ်ဦးက သူ့ရဲ့ဘာသာရေးယုံကြည်ချက်ကို ဘာကြောင့် ပြန်ဆန်းစစ်ခဲ့သလဲဆိုတာ ရှင်းပြ

နောက်ခံကို ပြောပြနိုင်မလား။

၁၉၇၉ ခုနှစ်၊ အမေရိကန်နိုင်ငံမှာ ကျွန်မကို မွေးဖွားခဲ့ပါတယ်။ ကျွန်မသုံးနှစ်သမီးအရွယ်မှာ မိဘတွေ ကွာရှင်းခဲ့ကြတယ်။ အမေက ကျွန်မကို ဂျူးထုံးစံအတိုင်း ကျွေးမွေးပြုစုခဲ့ပြီး ယက်ရှီဗက်စ်လို့ခေါ်တဲ့ ဂျူးကျောင်းကို ပို့ခဲ့တယ်။ ကျွန်မ ခုနစ်နှစ်အရွယ်ရောက်တော့ အစ္စရေးမှာ တစ်နှစ်လောက်နေပြီး ခီဘွတ်ဇ်လို့ခေါ်တဲ့ ဂျူးအသိုင်းအဝိုင်းက ဖွင့်ထားတဲ့ကျောင်းမှာ ကျောင်းတက်ခဲ့တယ်။ နောက်၊ အမေနဲ့ကျွန်မ မက္ကဆီကို,ကို ပြောင်းရွှေ့ခဲ့တယ်။

အဲဒီမှာ ဂျူးဘုရားကျောင်းမရှိပေမဲ့ ဂျူးထုံးစံတွေကို ကျွန်မဆက်ကျင့်သုံးခဲ့တယ်။ ဥပုသ်နေ့မှာ ဖယောင်းတိုင်ထွန်းတယ်၊ တိုရာကျမ်းကိုဖတ်တယ်၊ စစ်ဒါလို့ခေါ်တဲ့ ဆုတောင်းစာအုပ်ဖတ်ပြီး ဆုတောင်းတယ်။ ကျောင်းကအခန်းဖော်တွေကို ကျွန်မရဲ့ဘာသာက ပထမဦးဆုံးဘာသာဖြစ်တယ်လို့ မကြာခဏပြောတတ်တယ်။ ယေရှုခရစ်ရဲ့အမှုဆောင်ခြင်းနဲ့ သွန်သင်ချက်တွေကို အဓိကဖော်ပြထားတဲ့ ဓမ္မသစ်ကျမ်းကိုတော့ တစ်ခါမှမဖတ်ဖူးဘူး။ တကယ်တော့ အဲဒီထဲမှာပါတဲ့ သွန်သင်မှုတွေရဲ့ မှိုင်းမိမှာစိုးလို့ အမေက မဖတ်ခိုင်းတာ။

ဓမ္မသစ်ကျမ်းကိုဖတ်ဖို့ ဘာကြောင့် ဆုံးဖြတ်ခဲ့တာလဲ။

အသက် ၁၇ နှစ်လောက်မှာ ကျောင်းပြီးဖို့အတွက် အမေရိကန်ကို ပြန်ခဲ့တယ်။ အဲဒီမှာ သူ့ကိုယ်သူ ခရစ်ယာန်ပါလို့ပြောတဲ့ အသိတစ်ယောက်က ယေရှုမပါရင် ကျွန်မရဲ့အသက်တာက မပြည့်စုံဘူးလို့ ပြောတယ်။

“ယေရှုကိုယုံကြည်တဲ့သူတွေက လှည့်စားခံနေရတာ” လို့ ကျွန်မပြန်ဖြေလိုက်တယ်။

“ဓမ္မသစ်ကျမ်း ဖတ်ဖူးသလား” လို့ သူမေးတယ်။

“မဖတ်ဘူး” လို့ ကျွန်မဖြေတယ်။

“ဘာမှမသိတဲ့အရာတစ်ခုကို ထင်မြင်ချက်ပေးတာက ပညာမဲ့ရာမကျဘူးလား” လို့ သူ ပြောတယ်။

အဲဒီစကားက ကျွန်မကို တော်တော်လေး ထိမိသွားတယ်။ ကိုယ်မသိတဲ့အရာတစ်ခုကို ထင်မြင်ချက်ပေးတာက ပညာမဲ့ရာကျတယ်လို့ ကျွန်မကိုယ်တိုင် ယူမှတ်ထားလို့ပဲ။ အောင့်သက်သက်နဲ့ သူ့ရဲ့ကျမ်းစာကို အိမ်ယူသွားပြီး ဓမ္မသစ်ကျမ်းကို စဖတ်ခဲ့တယ်။

ဓမ္မသစ်ကျမ်းကိုဖတ်တော့ ဘယ်လိုနေလဲ။

ဓမ္မသစ်ကျမ်းကိုရေးတဲ့သူတွေက ဂျူးတွေဖြစ်တယ်ဆိုတာ သိလိုက်ရတော့ တော်တော်အံ့သြသွားတယ်။ ကျွန်မပိုဖတ်လေလေ၊ ယေရှုဟာ ကြင်နာတတ်တဲ့၊ နှိမ့်ချတဲ့၊ သူတစ်ပါးကို ကူညီချင်တဲ့၊ သူတစ်ပါးအပေါ် အမြတ်မထုတ်တတ်တဲ့ ဂျူးတစ်ဦးဖြစ်တယ်ဆိုတာ ပိုရှင်းလာတယ်။ ကျွန်မ စာကြည့်တိုက်ကိုတောင်သွားပြီး ယေရှုအကြောင်းရေးတဲ့စာအုပ်တွေကို ငှားဖတ်ခဲ့တယ်။ ဒါပေမဲ့ အဲဒီစာအုပ်တွေက ယေရှုဟာ မေရှိယ (ဘုရားသခင်ခန့်အပ်တဲ့မင်း)ဖြစ်တယ်ဆိုတာ ကျွန်မယုံကြည်အောင် သက်သေမပြနိုင်ဘူး။ တချို့နေရာမှာ ယေရှုဟာ ဘုရားဖြစ်တယ်လို့ ရေးထားတယ်၊ အဲဒါက ကျွန်မအတွက် အဓိပ္ပာယ်မရှိဘူး။ ယေရှု ဘယ်သူ့ဆီဆုတောင်းတာလဲ၊ သူ့ကိုယ်သူလား။ နောက်တစ်ခုက ကျမ်းစာမှာ ဘုရားသခင်က “သေခြင်းနှင့်ကင်းလွတ်” တယ်လို့ ဖော်ပြထားပေမဲ့ ယေရှုက သေဆုံးခဲ့တယ်။a

အဲဒီမေးခွန်းတွေနဲ့ပတ်သက်တဲ့အဖြေကို ဘယ်လိုရှာတွေ့ခဲ့သလဲ။

အမှန်တရားဆိုတာ ရှေ့နောက်ကိုက်ညီနေရမယ်။ အမှန်တရားကိုရှာဖို့ ကျွန်မ ဆုံးဖြတ်လိုက်တယ်။ ဒါကြောင့် မျက်ရည်ကျပြီး စိတ်ထဲရှိတဲ့အတိုင်း ဘုရားသခင်ဆီ ဆုတောင်းလိုက်တယ်။ ဒါက ဆုတောင်း စာအုပ်အကူအညီမပါဘဲ ပထမဆုံး ဆုတောင်းတာဖြစ်တယ်။ ဆုတောင်းပြီးလို့ မကြာခင်မှာပဲ ကျွန်မရဲ့အိမ်တံခါးကို ယေဟောဝါသက်သေ အမျိုးသမီးနှစ်ယောက် လာခေါက်တယ်။ သူတို့က သမ္မာကျမ်းစာလေ့လာဖို့အကူအညီဖြစ်စေတဲ့ စာအုပ်တစ်အုပ်ပေးသွားတယ်။ နောက်ပိုင်း အဲဒီစာအုပ်နဲ့ပဲ သူတို့နဲ့ ကျမ်းစာကို ဆွေးနွေးဖြစ်ခဲ့တယ်။ သူတို့ရဲ့ယုံကြည်ချက်တွေက ကျမ်းစာပေါ်အခြေခံတယ်ဆိုတာ ကျွန်မ ယုံကြည်လာတယ်။ ဥပမာ၊ ယေဟောဝါသက်သေတွေက ယေရှုကို လက်ခံတယ်။ ဒါပေမဲ့ သုံးပါးတစ်ဆူထဲက ဘုရားအနေနဲ့မဟုတ်ဘူး။ “ဘုရားသခင်၏သားတော်၊”b “ဘုရားသခင့်ဖန်ဆင်းခြင်း၏အစ”c ဖြစ်တယ်ဆိုတာ အသိအမှတ်ပြုတယ်။

သိပ်မကြာခင်မှာပဲ မက္ကဆီကို,ကို ကျွန်မပြန်ပြောင်းလာခဲ့တယ်။ အဲဒီမှာ ယေဟောဝါသက်သေတွေနဲ့ မေရှိယနဲ့ဆိုင်တဲ့ ကြိုဟောချက်တွေကို ဆက်လေ့လာခဲ့တယ်။ ကြိုဟောချက်တွေ ဒီလောက်အများကြီးရှိတာကိုတွေ့ရတော့ အံ့သြလို့ကိုမဆုံးဘူး။ ဒါပေမဲ့ ကျွန်မသံသယရှိနေတုန်းပဲ။ ‘ယေရှုတစ်ယောက်ကပဲ ဒီမှတ်တမ်းတွေအားလုံးနဲ့ ကိုက်ညီတဲ့သူလား။ ယေရှုက တမင်သက်သက်ဟန်ဆောင်တာကော မဖြစ်နိုင်ဘူးလား’ လို့ ကျွန်မစဉ်းစားမိတယ်။

အဲဒီသံသယ ဘယ်လိုရှင်းသွားသလဲ။

ဘယ်သူမှဟန်ဆောင်လို့မရတဲ့ ကြိုဟောချက်တွေကို သက်သေခံတွေက ပြခဲ့တယ်။ ဥပမာ၊ ပရောဖက်မိက္ခာက မေရှိယ ဟာ ယုဒပြည်၊ ဘက်သလီဟင်မြို့မှာ မွေးမယ်ဆိုတာ နှစ်ပေါင်း ၇၀၀ ကျော် ကြိုဟောခဲ့တယ်။d ကိုယ်ဘယ်မှာမွေးမယ်ဆိုတာကို ဘယ်သူထိန်းချုပ်နိုင်မှာလဲ။ ဟေရှာယက မေရှိယဟာ ရာဇဝတ်သားလို မထီမဲ့မြင်ပြုခံရပြီး အသတ်ခံရမယ်၊ ဒါပေမဲ့ သေပြီးရင် သူဌေးလိုသင်္ဂြိုဟ်ခံရမယ်လို့ ကြိုပြောခဲ့တယ်။e အဲဒီကြိုဟောချက်အားလုံးက ယေရှုမှာပြည့်စုံခဲ့တယ်။

အထူးထင်ရှားတဲ့အချက်ကတော့ ယေရှုရဲ့ဆွေစဉ်မျိုးဆက်စာရင်းဖြစ်တယ်။ သမ္မာကျမ်းစာမှာ မေရှိယဟာ ဘုရင်ဒါဝိဒ်ရဲ့မျိုးရိုးကနေ ဆင်းသက်မယ်လို့ ပြောထားတယ်။f ရှေးတုန်းက ဂျူးတွေက ပြည်သူပိုင်နဲ့ ကိုယ်ပိုင်ဆွေစဉ်မျိုးဆက်မှတ်တမ်းထားရှိတယ်။ တကယ်လို့ ယေရှုဟာ ဒါဝိဒ်ရဲ့ဆွေစဉ်မျိုးဆက်မဟုတ်ဘူးဆိုရင် သူ့ရဲ့ရန်သူတွေက မဟုတ်ကြောင်း လူသိရှင်ကြား ကြေညာလိုက်မယ့်ဖြစ်ခြင်း။ ဒါပေမဲ့ ယေရှုဟာ ဒါဝိဒ်မင်းဆက်ကဖြစ်တယ်ဆိုတာကို သူတို့ လုံးဝမငြင်းနိုင်ခဲ့ဘူး။ လူအုပ်ကတောင် “ဒါဝိဒ်၏သားတော်”g လို့ခေါ်ဆိုခဲ့တယ်။

ယေရှုသေဆုံးပြီး ၃၇ နှစ်အကြာ အေဒီ ၇၀ မှာ ရောမစစ်တပ်က ဂျေရုဆလင်ကို သိမ်းကျုံးဖျက်ဆီးလိုက်တဲ့အခါမှာ ဆွေစဉ်မျိုးဆက်နဲ့ဆိုင်တဲ့မှတ်တမ်းတွေ ပျောက်ဆုံးပျက်စီးသွားတယ်။ ဒါကြောင့် ဆွေစဉ်မျိုးဆက်စာရင်းနဲ့ ကိုက်ကြည့်နိုင်ဖို့အတွက် မေရှိယဟာ အေဒီ ၇၀ မတိုင်ခင်မှာ ပေါ်ခဲ့တာဖြစ်ရမယ်။

ဒီနားလည်မှုက ဘာအကျိုးထွက်ပေါ်စေသလဲ။

တရားဟောရာ ၁၈:၁၈၊ ၁၉ [ကဘ] မှာ ဘုရားသခင်က အစ္စရေးလူမျိုးထဲကနေ မောရှေလို ပရောဖက်ပေါ်ထွန်းစေမယ်လို့ ပြောခဲ့တယ်။ ဘယ်သူမဆို “ငါ့နာမည်နဲ့ သူပြောတဲ့ ငါ့စကားတွေကို နားမထောင်တဲ့လူဆီကနေ ငါဖြေရှင်းချက်တောင်းမယ်” လို့ဘုရားသခင်ပြောတယ်။ ကျမ်းစာတစ်အုပ်လုံးကို ကောင်းကောင်းလေ့လာပြီးတဲ့အခါ နာဇရက်မြို့သားယေရှုဟာ အဲဒီပရောဖက်ဖြစ်တယ်ဆိုတာ အပြည့်အဝယုံကြည်စိတ်ချသွားတယ်။