တမန်တော်များ ရဲရင့်စွာဟောပြောကြ

ယေရှု ကောင်းကင်သို့တက်ကြွပြီးနောက် ဆယ်ရက်အကြာ၊ စီအီး ၃၃ တွင် ဂျူးတို့၏ပင်တေကုတ္တေပွဲကျင်းပနေစဉ် တပည့်တော် ၁၂၀ သည် ဂျေရုဆလင်မြို့ရှိ အိမ်တစ်အိမ်၌ စုဝေးခဲ့ကြသည်။ ရုတ်တရက်၊ လေပြင်းတိုက်သံနှင့်တူသောအသံသည် အိမ်တစ်အိမ်လုံးပြည့်လေ၏။ တပည့်များသည် သူတို့မပြောတတ်ခဲ့သောဘာသာစကားများကို အံ့ဖွယ်နည်းဖြင့် စတင်ပြောဆိုခဲ့ကြသည်။ ထိုထူးဆန်းသောဖြစ်ရပ်များက အဘယ်အရာကိုဖော်ပြသနည်း။ ဘုရားသခင်သည် တပည့်များအား သန့်ရှင်းသောစွမ်းအားတော်ကို ပေးသနားခဲ့ခြင်းဖြစ်၏။

အိမ်အပြင်တွင် ပွဲတော်အတွက် ရပ်ဝေးဒေသများစွာမှရောက်လာကြသော ဧည့်သည်လူအုပ်ရှိနေသည်။ ၎င်းတို့၏မိခင်ဘာသာစကားကို ယေရှု၏တပည့်များ ကျွမ်းကျင်စွာပြောဆိုနေသည်ကိုကြားရ၍ သူတို့အလွန်အံ့သြနေကြ၏။ အဘယ်အရာဖြစ်ပျက်ခဲ့ကြောင်း ရှင်းပြရာတွင် ပေတရုက အံ့ဖွယ်ဆုကျေးဇူးများကိုပေးနိုင်သော စွမ်းအားတော်ကို ဘုရားသခင် “သွန်းလောင်း” မည်ဟူသည့် ယောလ၏ပရောဖက်ပြုချက်ကို ရည်ညွှန်းခဲ့သည်။ (ယောလ ၂:၂၈၊ ၂၉) သန့်ရှင်းသောစွမ်းအားတော်၏ ထိုအစွမ်းထက်သောသက်သေက အရေးပါသောအပြောင်းအလဲတစ်ခု ဖြစ်ပေါ်ပြီဖြစ်ကြောင်းကို ရှင်းလင်းစွာဖော်ပြနေ၏– ယင်းမှာ ဘုရားသခင့်မျက်နှာသာတော်ကို အစ္စရေးလူမျိုးမရရှိတော့ဘဲ တည်ထောင်ခါစခရစ်ယာန်အသင်းတော်က ရရှိပြီဖြစ်၏။ ယခု၊ ဘုရားသခင်နှစ်သက်လက်ခံသောနည်းဖြင့် ဝတ်ပြုလိုသူများသည် ခရစ်တော်၏နောက်လိုက်များဖြစ်ဖို့လိုသည်။

ထိုအတောအတွင်း ဆန့်ကျင်မှုများပြင်းထန်လာပြီး ရန်သူတို့က တပည့်များကို ထောင်ချကြသည်။ သို့သော် ညအချိန်တွင် ယေဟောဝါ၏ကောင်းကင်တမန်သည် ထောင်တံခါးကိုဖွင့်ပေးကာ ဆက်ဟောပြောကြရန် တပည့်များကိုမိန့်မှာသည်။ နံနက်ရောက်သော် သူတို့သည် ဝတ်ပြုရာအိမ်တော်သို့ဝင်၍ ယေရှုနှင့်ပတ်သက်သောသတင်းကောင်းကို ဆက်ဟောပြောလေသည်။ သူတို့ကိုဆန့်ကျင်သော ဘာသာရေးခေါင်းဆောင်များသည် အလွန်အမျက်ထွက်၍ ဆက်မဟောပြောရန် ပိတ်ပင်သည်။ သို့သော် တမန်တော်များက “ငါတို့သည် လူ၏စကားထက် ဘုရားသခင်၏စကားကို နားထောင်ရမည်” ဟု ရဲရင့်စွာပြန်ပြောသည်။—တမန်တော် ၅:၂၈၊ ၂၉။

နှိပ်စက်ညှဉ်းပန်းမှု ပြင်းထန်လာလေပြီ။ ဂျူးအချို့က တပည့်ဖြစ်သူသတေဖန်ကို ဘုရားသခင်အား စော်ကားသည်ဟုစွပ်စွဲ၍ ကျောက်ခဲဖြင့်ပေါက်သတ်ခဲ့သည်။ တာရှုမြို့သား လူငယ်ရှောလုသည် ထိုလူသတ်မှုကို သဘောတူလျက် ရပ်ကြည့်နေခဲ့သည်။ ထို့နောက် သူသည် ခရစ်တော်၏နောက်လိုက်မှန်သမျှကို ဖမ်းဆီးရန် ဒမတ်စကတ်မြို့သို့သွားလေ၏။ လမ်းတွင် ကောင်းကင်မှအလင်းတန်းသည် သူ့ပတ်လည်၌ ရုတ်တရက်ထွန်းလင်းကာ “ရှောလု၊ ရှောလု၊ အဘယ်ကြောင့် ငါ့ကိုညှဉ်းဆဲသနည်း” ဟူသောစကားသံကို ကြားရ၏။ ထိုအလင်းကြောင့် မျက်စိကွယ်သွားသောရှောလုက “ကိုယ်တော်သည် အဘယ်သူနည်း” ဟုမေးလျှောက်သော် ထိုအသံက “ငါကား သင်ညှဉ်းဆဲသောယေရှုဖြစ်၏” ဟုပြန်ဖြေဆိုသည်။—တမန်တော် ၉:၃-၅။

သုံးရက်လွန်သော် ယေရှုသည် အာနနိအမည်ရှိတပည့်တစ်ဦးကို စေလွှတ်၍ ရှောလု၏မျက်စိပြန်မြင်နိုင်ရန် ကုသစေသည်။ ရှောလုသည် နှစ်ခြင်းခံ၍ ယေရှုအကြောင်းကို ရဲရင့်စွာစတင်ဟောပြောလေ၏။ ရှောလုသည် တမန်တော်ပေါလုအဖြစ် လူသိများလာပြီး ခရစ်ယာန်အသင်းတော်တွင် ဇွဲထက်သန်သောအသင်းသားတစ်ဦးဖြစ်လာသည်။

ယေရှု၏တပည့်များသည် ဘုရားသခင်၏နိုင်ငံတော်သတင်းကောင်းကို ဂျူးနှင့်ရှမာရိလူတို့ကိုသာ ဟောပြောခဲ့သည်။ ယခု၊ ကောင်းကင်တမန်တစ်ပါးသည် ဘုရားသခင်ကိုကြောက်ရွံ့ရိုသေသော ရောမတပ်မှူးကော်နေလိရှေ့တွင်ပေါ်လာပြီး လူတို့ကိုစေလွှတ်၍ တမန်တော်ပေတရုကိုခေါ်ဖိတ်ရန် ပြောသည်။ အခြားသူတို့လည်း ပေတရုနှင့်အတူလိုက်ပါလာ၍ ပေတရုသည် ကော်နေလိနှင့်သူ၏အိမ်သားများကို ဟောပြောခဲ့သည်။ ပေတရုဟောပြောနေစဉ် သန့်ရှင်းသောစွမ်းအားတော်သည် ယုံကြည်သူလူမျိုးခြားများအပေါ် သက်ရောက်လေ၏။ ပေတရုသည် ယေရှု၏နာမ၌နှစ်ခြင်းယူကြရန် သူတို့ကိုညွှန်ကြားခဲ့သည်။ ယခု၊ ထာဝရအသက်သို့ပို့ဆောင်သောလမ်းသည် လူမျိုးအပေါင်းအတွက် ပွင့်သွားလေပြီ။ အသင်းတော်သည် သတင်းကောင်းကို ကျယ်ကျယ်ပြန့်ပြန့်ဟောပြောဖို့ အသင့်ရှိနေပြီ။

—တမန်တော် ၁:၁–၁၁:၂၁ ကိုအခြေခံသည်။