၁၊ ၂။ ဘယ်ရေကြောင်း ခရီးစဉ်မျိုးကို ပေါလု သွားရမလဲ။ သူစိုးရိမ်ပူပန်တဲ့အရာတချို့က ဘာလဲ။

‘မင်း ဆီဇာဆီကို သွားရမယ်’ လို့ ပေါလုကို ဘုရင်ခံ ဖေတ္တုမင်း ပြောတယ်။ ဒီစကား ကြားတော့ ကိုယ့်ရှေ့ရေးကို ပေါလု အကြိမ်ကြိမ် စဉ်းစားနေမိမှာပဲ။ နှစ်နှစ်လုံးလုံး ထောင်ကျနေတာ။ ရောမမြို့ သွားရမယ်ဆိုတော့ အနည်းဆုံးတော့ အပြောင်းအလဲ ဖြစ်သွားတာပေါ့။ (တ. ၂၅:၁၂) ပေါလု ရေကြောင်းခရီး အများကြီး သွားဖူးတယ်။ အားလုံး အဆင်ပြေနေတာချည်းတော့ မဟုတ်ဘူး။ ဒါကြောင့် ဒီတစ်ခေါက် ခရီးစဉ်အတွက်ကော ကဲသာနဲ့ စကားပြောရမှာအတွက်ပါ စိတ်လေးနေမှာပဲ။

^၂ ‘ပင်လယ်ဘေး’ ပေါလု အကြိမ်ကြိမ် ကြုံတယ်။ သင်္ဘောပျက်တာ သုံးကြိမ် ကြုံပြီး တစ်နေ့လုံး တစ်ညလုံး ပင်လယ်ထဲမှာ မျောနေခဲ့ရတယ်။ (၂ ကော. ၁၁:၂၅၊ ၂၆) ပြီးတော့ ဒီတစ်ခေါက် ခရီးစဉ်က စိတ်လွတ်ကိုယ်လွတ် သွားခဲ့တဲ့ သာသနာပြု ခရီးစဉ်တွေနဲ့ မတူဘူး။ အကျဉ်းသားအဖြစ် သွားရမှာ။ ကဲသရိမြို့ကနေ ရောမမြို့ကို မိုင် ၂,၀၀၀ လောက် ခရီးဝေး နှင်ရမယ်။ ဘေးမသီ ရန်မခ ရောက်ပါ့မလား။ လမ်းမှာ ဘေးကင်းရင်တောင် ရောမမြို့ ရောက်တဲ့အခါ သေဒဏ် ပေးခံရမလား။ အဲဒီခေတ် အဲဒီအခါက စာတန့်လောကမှာ သြဇာအာဏာအကြီးဆုံး ကမ္ဘာ့အင်ပါယာက သူ့ကို တရားစီရင်မှာ။

၃။ ပေါလု ဘာဆုံးဖြတ်ထားသလဲ။ ဒီအခန်းမှာ ဘာအကြောင်း ဆွေးနွေးမလဲ။

^၃ လေ့လာခဲ့တာတွေကနေ ပေါလုအကြောင်း သင် တော်တော် သိနေပြီ။ ရှေ့မှာ ကြုံရနိုင်တာတွေကြောင့် ပေါလု မျှော်လင့်ချက် မဲ့ပြီး စိတ်ဓာတ်ကျနေမယ် ထင်သလား။ မျှော်လင့်ချက် မဲ့မနေဘူး။ စိတ်ဓာတ်ကျမနေဘူး။ ရှေ့မှာ အခက်အခဲတွေ ကြုံရမယ်ဆိုတာ သိပေမဲ့ ဘယ်လို အခက်အခဲမျိုးလဲ မသိဘူး။ ကိုယ်မသိသေးတာတွေ၊ မထိန်းချုပ်နိုင်တာတွေအတွက် စိုးရိမ်နေလို့ အကျိုးမရှိဘူး၊ စိုးရိမ်နေရင် အမှုဆောင်လုပ်ငန်းကနေ ရတဲ့ ရွှင်လန်းမှု ပျောက်ဆုံးသွားမယ်ဆိုတာ ပေါလု သိတယ်။ (မ. ၆:၂၇၊ ၃၄) နိုင်ငံတော် သတင်းကောင်းကို အခွင့်အရေး ရတိုင်း ဟောဖို့၊ အာဏာပိုင်တွေကိုတောင် ဟောဖို့ ယေဟောဝါ အလိုရှိကြောင်း သိတယ်။ (တ. ၉:၁၅) ဒါကြောင့် ဘာပဲ ဖြစ်လာပါစေ တာဝန် ကျေပွန်ဖို့ ပေါလု ဆုံးဖြတ်ထားတယ်။ ကျွန်တော်တို့လည်း အဲဒီလို ဆုံးဖြတ်သင့်တယ် မဟုတ်လား။ အခု၊ ပေါလုရဲ့ ရေကြောင်း ခရီးစဉ်အကြောင်း လေ့လာကြမယ်။ လေ့လာတဲ့အခါ ပေါလုရဲ့ စံနမူနာကနေ ဘာအကျိုးရနိုင်မလဲဆိုတာ စဉ်းစားပါ။

“လေကြောင်းမသင့်တဲ့အတွက်” (တ. ၂၇:၁-၇)

၄။ ပေါလု ဘယ်လို သင်္ဘောမျိုးနဲ့ ရေကြောင်းခရီး စတင်သလဲ။ သူ့အဖော်တွေက ဘယ်သူတွေလဲ။

^၄ ပေါလုနဲ့ အကျဉ်းသားတွေကို ရောမတပ်မှူး ယုလိလက်ထဲ အပ်လိုက်ကြတယ်။ ကဲသရိမြို့ကို ဆိုက်လာတဲ့ ကုန်တင်သင်္ဘောနဲ့ လိုက်သွားဖို့ ယုလိ ဆုံးဖြတ်တယ်။ သင်္ဘောက အာရှမိုင်းနား အနောက်ဘက် ကမ်းရိုးတန်းမှာ ရှိတဲ့ အာဒြမုတ္တိ ဆိပ်ကမ်းမြို့ကနေ လာပြီး လဲစ်ဘာ့စ်ကျွန်းပေါ်မှာ ရှိတဲ့ မိတုလင်မြို့နားက ဖြတ်လာတာ။ မြောက်ဘက်၊ အဲဒီနောက် အနောက်ဘက်ကို ရွက်လွှင့်မှာ ဖြစ်ပြီး ကုန်တင်ကုန်ချဖို့ ဆိပ်ကမ်းတွေမှာ ရပ်မယ်။ ခရီးသည်တင် သင်္ဘော မဟုတ်လို့ သက်သောင့်သက်သာ ရှိမှာ မဟုတ်ဘူး။ အကျဉ်းသားတွေအတွက်ဆိုရင် ပိုတောင် ဆိုးဦးမယ်။ (“ပင်လယ်ခရီးနဲ့ ကုန်သွယ်ရေးလမ်းကြောင်းများ” လေးထောင့်ကွက်ကို ကြည့်ပါ။) ကျေးဇူးတင်စရာက အကျဉ်းသား အုပ်စုထဲမှာ ခရစ်ယာန်ဆိုလို့ ပေါလု တစ်ယောက်တည်း ဖြစ်မနေဘူး။ အနည်းဆုံး ညီအစ်ကိုနှစ်ယောက် လိုက်လာတယ်။ တစ်ယောက်က အာရိတ္တာခု။ နောက်တစ်ယောက်ကတော့ ဒီမှတ်တမ်းကို ရေးတဲ့ လုကာပါ။ သင်္ဘောခ ပေးပြီး လိုက်လာကြသလား၊ ပေါလုရဲ့ အစေခံတွေအဖြစ် လိုက်လာကြသလားဆိုတာတော့ ကျွန်တော်တို့ မသိရဘူး။—တ. ၂၇:၁၊ ၂။

၅။ ပေါလု ဆိုင်ဒုန်မြို့မှာ ဘာပေါင်းသင်းမှု လုပ်နိုင်ခဲ့သလဲ။ ကျွန်တော်တို့ ဘာသင်ယူနိုင်သလဲ။

^၅ ပင်လယ်ခရီး တစ်ရက် သွားအပြီး မြောက်ဘက်ကို မိုင် ၇၀ လောက် ရွက်လွှင့်လာပြီးနောက် ဆီးရီးယား ကမ်းရိုးတန်း ဆိုင်ဒုန်မြို့မှာ သင်္ဘော ဆိုက်တယ်။ ခါတိုင်း ရာဇဝတ်သားတွေကို ဆက်ဆံသလို ပေါလုကို ယုလိ မဆက်ဆံဘူး။ ပေါလုဟာ ပြစ်ဒဏ် ချမခံရသေးတဲ့ ရောမနိုင်ငံသား ဖြစ်လို့ နေမယ်။ (တ. ၂၂:၂၇၊ ၂၈။ ၂၆:၃၁၊ ၃၂) ကမ်းပေါ် တက်ပြီး ယုံကြည်သူချင်းတွေနဲ့ သွားတွေ့ခွင့် ပေးတယ်။ အကြာကြီး ထောင်ကျခဲ့တဲ့ တမန်တော်ကို ပြုစုခွင့် ရလို့ ညီအစ်ကို/မတွေ တအား ဝမ်းသာကြမှာပဲ။ သင်လည်း တခြားသူတွေကို မေတ္တာထားပြီး ဧည့်ဝတ်ပြုနိုင်မယ့် အခွင့်အရေး ရှာကြည့်ပါ။ ဧည့်ဝတ်ပြုတဲ့အခါ အားပေးမှု ပြန်ရတယ်။—တ. ၂၇:၃။

၆-၈။ ဆိုင်ဒုန်မြို့ကနေ ကနိဒ်မြို့အထိ ပေါလုရဲ့ ခရီးစဉ် ဘယ်လို ရှိသလဲ။ ဟောပြောဖို့ ဘာအခွင့်အရေးတွေ ပေါလု ရခဲ့ပုံ ရှိသလဲ။

^၆ ဆိုင်ဒုန်မြို့ကနေ သင်္ဘော ထွက်လာပြီးနောက် ကမ်းရိုးတန်းအတိုင်း ရွက်လွှင့်တယ်။ ပေါလုရဲ့ ဇာတိ တာရှုမြို့အနီး၊ ကိလိကိပြည်ကို ဖြတ်သွားတယ်။ “လေဆန် ဖြစ်နေတော့” ဘေးသင့်နိုင်တယ်လို့ လုကာ ဖော်ပြပေမဲ့ တခြားဆိပ်ကမ်းတွေမှာ သင်္ဘောဆိုက်တဲ့အကြောင်း မဖော်ပြဘူး။ (တ. ၂၇:၄၊ ၅) ဒါပေမဲ့ အခွင့်အရေး ရတိုင်း ပေါလု သတင်းကောင်း ဟောမယ်ဆိုတာ မြင်ယောင်ကြည့်လို့ ရတယ်။ အကျဉ်းသားတွေ၊ သင်္ဘောသားတွေ၊ စစ်သားတွေ အပါအဝင် သင်္ဘောပေါ်က တခြားသူတွေ၊ ဆိုက်သမျှ ဆိပ်ကမ်းက လူတွေကို သက်သေခံခဲ့မှာ သေချာတယ်။ ကျွန်တော်တို့ကော ဟောပြောဖို့ အခွင့်အရေးအားလုံးကို ကောင်းကောင်း အသုံးချနေရဲ့လား။

^၇ အချိန်တန်တော့ အာရှမိုင်းနား တောင်ဘက် ကမ်းရိုးတန်းမှာ ရှိတဲ့ မုရဆိပ်ကမ်းမြို့ကို သင်္ဘော ရောက်လာတယ်။ အဲဒီမှာ ရောမကို သွားမယ့် နောက်သင်္ဘောတစ်စီး ပြောင်းစီးရတယ်။ (တ. ၂၇:၆) အဲဒီခေတ်တုန်းက အီဂျစ်ပြည်ကနေ ရောမကို ဂျုံစပါး တင်ပို့လို့ ဂျုံစပါး တင်တဲ့ အီဂျစ်သင်္ဘောတွေ မုရမြို့မှာ ဆိုက်တယ်။ အဲဒီလို သင်္ဘောတစ်စီးကို ယုလိ တွေ့ပြီး စစ်သားတွေ၊ အကျဉ်းသားတွေကို သင်္ဘောပေါ် တင်တယ်။ ဒီသင်္ဘောဟာ ပထမ သင်္ဘောထက် ပိုကြီးနိုင်တယ်။ အဖိုးတန် ဂျုံစပါးအပြင် သင်္ဘောသား၊ စစ်သား၊ အကျဉ်းသားနဲ့ ရောမကို သွားမယ့် တခြားခရီးသည်တွေ အပါအဝင် လူ ၂၇၆ ယောက် သင်္ဘောပေါ် ပါလာတယ်။ သင်္ဘော ပြောင်းစီးရတော့ ဟောစရာ လူ တိုးလာပြီ။ ပေါလု အခွင့်အရေး အမိအရ ယူပြီး ဟောမှာ သေချာတယ်။

^၈ အဲဒီနောက် အာရှမိုင်းနား အနောက်တောင်ထောင့်ဘက် ကနိဒ်မြို့မှာ သင်္ဘောဆိုက်မယ်။ လေသင့်ရင် အဲဒီဆိပ်ကမ်းကို တစ်ရက်လောက်နဲ့ ရောက်နိုင်တယ်။ ဒါပေမဲ့ “ရက်အတန်ကြာ တဖြည်းဖြည်း ရွက်လွှင့်လာတဲ့အခါ ကနိဒ်မြို့ကို ခက်ခက်ခဲခဲ ရောက်လာတယ်” လို့ လုကာ မှတ်တမ်းတင်ထားတယ်။ (တ. ၂၇:၇က) လေမသင့်လို့ ရွက်လွှင့်ရ ခက်သွားတာ။ (“မြေထဲပင်လယ်မှာ တိုက်ခတ်တဲ့ လေဆန်တွေ” လေးထောင့်ကွက်ကို ကြည့်ပါ။) လှိုင်းလေကြမ်းတွေကြား သင်္ဘော လူးလိမ့်နေတုန်း သင်္ဘောပေါ်က လူတွေ ဘယ်လို ဖြစ်နေမလဲ မြင်ယောင်ကြည့်ပါ။

“လှိုင်းလုံးတွေ အပြင်းအထန် ရိုက်ခတ်” (တ. ၂၇:၇-၂၆)

၉၊ ၁၀။ ခရိကျွန်းအနီးတစ်ဝိုက်မှာ ဘာအခက်အခဲတွေ ပေါ်လာသလဲ။

^၉ ကနိဒ်မြို့ကနေ အနောက်ဘက်ကို သင်္ဘော မာလိန်မှူး ဆက်သွားချင်ပေမဲ့ “လေကြောင်း မသင့်တဲ့အတွက် ရှေ့ဆက်မသွားနိုင်ဘူး” လို့ မျက်မြင်သက်သေ လုကာ ဆိုတယ်။ (တ. ၂၇:၇) ကမ်းနဲ့ တော်တော် လှမ်းလာတော့ အနောက်မြောက်ဘက်ကနေ လေဆန်က သင်္ဘောကို တောင်ဘက် အရှိန်ပြင်းပြင်း တွန်းပို့လိုက်တယ်။ အစောပိုင်းမှာ ဆိုက်ပရပ်စ်ကျွန်းက လေကွယ်ပေးခဲ့သလို အခု ခရိကျွန်းက လေကွယ်ပေးတယ်။ ခရိကျွန်း အရှေ့ဘက်စွန်းမှာ ရှိတဲ့ သာလမုန်အငူကို ကျော်သွားတော့ အခြေအနေ နည်းနည်း ကောင်းလာတယ်။ လေကွယ်ရာဘက် ဒါမှမဟုတ် ကျွန်းရဲ့ တောင်ဘက်ပိုင်းကို ရောက်လာလို့ပဲ။ သင်္ဘောပေါ်က လူတွေ ခဏ စိတ်သက်သာသွားကြတယ်။ ဒါပေမဲ့ ဆောင်းတွင်း ရောက်တော့မှာ ဖြစ်လို့ ပင်လယ်ပြင်မှာ ရှိနေသရွေ့ စိုးရိမ်စရာ ရှိမှန်း သင်္ဘောသားတွေ သိကြတယ်။

^၁၀ “[ခရိကျွန်းအနီးကနေ] ခက်ခက်ခဲခဲ ရွက်လွှင့်လာပြီးနောက် . . . ဆိပ်ကမ်းသာလို့ ခေါ်တဲ့ နေရာကို ရောက်လာကြတယ်” လို့ လုကာ တိတိကျကျ ဖော်ပြတယ်။ ကမ်းနဲ့ နီးနေလို့ လေကြမ်း လွတ်သွားတာတောင် သင်္ဘော ထိန်းဖို့ ခက်နေတုန်းပဲ။ ဒါနဲ့ မြောက်ဘက်ကို ကမ်းရိုးတန်း ဝိုက်မသွားခင် ပင်လယ်အော်လေးတစ်ခုမှာ ကျောက်ချစရာနေရာ ရှာကြတယ်။ ဘယ်လောက်ကြာကြာ ကျောက်ချနေခဲ့ကြသလဲ။ “ရက်ပေါင်းများစွာ” လို့ လုကာ ပြောတယ်။ ဒါပေမဲ့ အချိန်ကြာလေ အန္တရာယ် များလေပဲ။ စက်တင်ဘာ/အောက်တိုဘာလတွေမှာ ရေကြောင်း ခရီးစဉ် အန္တရာယ် ပိုများတတ်လို့ပဲ။—တ. ၂၇:၈၊ ၉။

၁၁။ သင်္ဘောပေါ်က လူတွေကို ပေါလု ဘာအကြံပေးသလဲ။ ဘယ်လို ဆုံးဖြတ်ကြသလဲ။

^၁၁ မြေထဲပင်လယ်ခရီး အတွေ့အကြုံ ရှိတဲ့ ပေါလုကို ခရီးသည်တချို့ အကြံတောင်းကြတယ်။ ဆက်ရွက်မလွှင့်ဖို့ ပေါလု အကြံပေးတယ်။ ဆက်သွားရင် အကြီးအကျယ် ပျက်စီး “ဆုံးရှုံး” ရုံမက အသက်ပါ ဆုံးနိုင်တယ်။ မာလိန်မှူးနဲ့ သင်္ဘောပိုင်ရှင်ကတော့ ပိုလုံခြုံတဲ့နေရာ ရှာမှ ရမယ် ထင်လို့ ဆက်သွားချင်နေကြတယ်။ သူတို့ ပြောတာ ယုလိ လက်ခံလိုက်တယ်။ လူအများစုကလည်း ကမ်းရိုးတန်း အထက်ပိုင်းမှာ ရှိတဲ့ ဖိနိတ်ဆိပ်ကမ်းဆီ အရောက်သွားသင့်တယ်လို့ ယူဆကြတယ်။ ဆောင်းခိုဖို့ သင့်တော်တဲ့ ဆိပ်ကမ်းကြီး ဖြစ်မယ်။ ဒါကြောင့် တောင်လေ ညင်ညင်သာသာ တိုက်ခတ်လာတော့ ရွက်လွှင့်ဖို့ ကောင်းပုံ ပေါက်လို့ သင်္ဘော ထွက်လာတယ်။—တ. ၂၇:၁၀-၁၃။

၁၂။ ခရိကျွန်းကနေ သင်္ဘော ထွက်လာတာနဲ့ ဘာအန္တရာယ် ကြုံရသလဲ။ သင်္ဘော မပျက်အောင် သင်္ဘောသားတွေ ဘယ်လို ကြိုးစားကြသလဲ။

^၁၂ အရှေ့မြောက်ဘက်ကနေ “လေပြင်းမုန်တိုင်း” တိုက်ခတ်လာလို့ ဒုက္ခတွေ့ကြတော့တယ်။ ဆိပ်ကမ်းသာကနေ မိုင် ၄၀ လောက် ဝေးတဲ့ “ကောဒလို့ ခေါ်တဲ့ ကျွန်းလေး” မှာ ခဏ လေရိပ်ခိုကြတယ်။ ဒါပေမဲ့ တောင်ဘက်ကို လေအဟုန်နဲ့ သင်္ဘော ပါသွားပြီး အာဖရိက ကမ်းရိုးတန်း သဲသောင်ပေါ်မှာ ပျက်သွားနိုင်တယ်။ ဒါကြောင့် သင်္ဘောသားတွေက နောက်တွဲ သမ္ဗာန်ငယ် ဆွဲတင်ကြတယ်။ သမ္ဗာန်မှာ ရေအပြည့် ဝင်နေပုံ ရလို့ မနည်း ဆွဲတင်ကြရတယ်။ သင်္ဘောဝမ်းကို ခက်ခက်ခဲခဲ ကြိုးနဲ့ ပတ်ရစ်ချည်နှောင်ပြီး ပျဉ်ပြားတွေ ပြုတ်မထွက်အောင် လုပ်ကြတယ်။ ရွက်ကြိုးတန်ဆာတွေ လျှော့လိုက်ပြီး သင်္ဘောကို လေနှင်ရာအတိုင်း သွားစေကြတယ်။ တော်တော် ထိတ်လန့်စရာ ကောင်းတယ်။ ဒီလောက် ကြိုးစားထားတာတောင် သင်္ဘောကို “လှိုင်းလုံးတွေ အပြင်းအထန် ရိုက်ခတ်” နေဆဲပဲ။ ဒါကြောင့် သင်္ဘော ဝန်ပေါ့အောင် သုံးရက်မြောက်နေ့မှာ သင်္ဘောတန်ဆာတွေ ပစ်ချကြတယ်။—တ. ၂၇:၁၄-၁၉။

၁၃။ မုန်တိုင်းထန်နေတုန်း သင်္ဘောပေါ်က လူတွေ ဘယ်လို ဖြစ်နေကြမလဲ။

^၁၃ သင်္ဘောပေါ်က အများစု ထိတ်လန့်နေကြတယ်။ ပေါလုနဲ့ အဖော်တွေကတော့ မိမိတို့ အသက်ဘေး လွတ်မယ်ဆိုတာ စိတ်ချကြတယ်။ ရောမမြို့မှာ သက်သေခံရမယ်လို့ ပေါလုကို အစောပိုင်းမှာ သခင် ကတိပြုပြီး နောက်ပိုင်းမှာ ကောင်းကင်တမန်ကလည်း ဒီကတိကို ထပ်အတည်ပြုတယ်။ (တ. ၁၉:၂၁။ ၂၃:၁၁) ဒါပေမဲ့ နှစ်ပတ်လုံးလုံး နေ့ညမပြတ် မုန်တိုင်းထန်နေတယ်။ မိုးသည်းသည်းထန်ထန် ရွာပြီး ထူထပ်တဲ့ တိမ်ထုက နေနဲ့ ကြယ်တွေကို ကွယ်ထားလို့ သင်္ဘော ဘယ်ရောက်နေတယ်၊ ဘယ်ဦးတည်နေတယ်ဆိုတာ မာလိန်မှူး မသိတော့ဘူး။ အစာအစားတောင် စားနိုင်ကြမှာ မဟုတ်ဘူး။ ဒီလို မိုးကြီးလေကြီးထဲမှာ ချမ်းချမ်းစီးစီး၊ လှိုင်းက မူး၊ ကြောက်က ကြောက်နဲ့ ဘယ်သူမှ အစာစားဖို့ အာရုံရောက်မှာ မဟုတ်ဘူး။

၁၄၊ ၁၅။ (က) သင်္ဘောပေါ် ပါလာသူတွေကို အစောပိုင်းက မိမိ သတိပေးခဲ့တဲ့စကား ပေါလု ဘာကြောင့် ပြန်ပြောသလဲ။ (ခ) ပေါလု မျှော်လင့်ခြင်း သတင်း ဝေမျှတာကနေ ကျွန်တော်တို့ ဘာသင်ယူနိုင်သလဲ။

^၁၄ ပေါလု ထရပ်လိုက်တယ်။ အစောပိုင်းက သူ သတိပေးခဲ့တာကို ပြန်ပြောပြတယ်။ ‘ငါပြောသားပဲ’ ဆိုတဲ့ သဘောမျိုးနဲ့တော့ မဟုတ်ဘူး။ အဖြစ်အပျက်တွေက ပေါလုစကားကို နားထောင်ခဲ့ဖို့ ကောင်းကြောင်း သက်သေထူနေတယ်။ “ဘာပဲဖြစ်ဖြစ် အားတင်းထားကြဖို့ ကျွန်တော် အားပေးချင်တယ်။ ခင်ဗျားတို့တစ်ယောက်မှ အသက်ဆုံးရှုံးမှာ မဟုတ်ဘူး။ သင်္ဘောတော့ ပျက်စီးသွားမယ်” လို့ ပြောလိုက်တယ်။ (တ. ၂၇:၂၁၊ ၂၂) ဒီစကားကြောင့် အားရှိသွားကြမှာပဲ။ ယေဟောဝါ ပေးတဲ့ မျှော်လင့်ချက် သတင်း သူတို့ကို ပြောပြခွင့် ရလို့ ပေါလုလည်း ဝမ်းသာနေမှာပဲ။ လူတိုင်းရဲ့ အသက်ကို ယေဟောဝါ အလေးထားကြောင်း ကျွန်တော်တို့ သတိရသင့်တယ်။ “ဘုရားသခင် စိတ်ရှည်ရတဲ့ အကြောင်းရင်းက ဘယ်သူ့ကိုမှ မပျက်စီးစေချင်လို့၊ လူအားလုံးကို နောင်တရစေချင်လို့ပါ” လို့ တမန်တော် ပေတရု ရေးတယ်။ (၂ ပေ. ၃:၉) ယေဟောဝါ ပေးတဲ့ မျှော်လင့်ခြင်း သတင်း လူများနိုင်သမျှ များများ ကြားနိုင်အောင် ကြိုးစားပြောပြဖို့ သိပ်အရေးကြီးတယ်။ ဒါ သေရေးရှင်ရေးကိစ္စပဲ။

^၁၅ သင်္ဘောပေါ်က လူတွေကို ‘ဘုရားသခင့် ကတိတော် မျှော်လင့်ချက်’ အကြောင်း ပေါလု သက်သေခံထားပြီးသား ဖြစ်မှာပါ။ (တ. ၂၆:၆။ ကော. ၁:၅) ဒါပေမဲ့ သင်္ဘောပျက်လို့ သေရတော့မယ် ထင်နေကြတဲ့ အချိန်မှာ မျှော်လင့်ချက် ရှိကြောင်း ခိုင်လုံတဲ့ အကြောင်းရင်း ပေါလု ပြောပြလိုက်နိုင်တယ်။ “ကောင်းကင်တမန်တစ်ပါးက ညတုန်းက ကျွန်တော့်အနားမှာ ပေါ်လာပြီး၊ ‘ပေါလု၊ မကြောက်ပါနဲ့။ ဆီဇာရှေ့မှောက်ကို မင်း ရောက်ရလိမ့်မယ်။ ဘုရားသခင်က မင်းနဲ့အတူ ပါလာတဲ့ လူအားလုံးကို အသက်ချမ်းသာ ပေးမှာပါ’ လို့ ပြောတယ်။ ဒါကြောင့် မိတ်ဆွေတို့၊ အားတင်းထားကြ။ ဘုရားသခင်ကို ကျွန်တော် ယုံကြည်တယ်။ ကျွန်တော့်ကို ဘုရားသခင် ပြောထားတာတွေ တကယ် ဖြစ်လာမယ်။ ဒါပေမဲ့ သင်္ဘောပျက်ပြီး ကျွန်းတစ်ကျွန်းမှာ ကျွန်တော်တို့ သောင်တင်လိမ့်မယ်” လို့ ပြောတယ်။—တ. ၂၇:၂၃-၂၆။

“လူအားလုံး အသက်ဘေးက လွတ်ပြီး ကမ်းပေါ် ရောက်သွားကြတယ်” (တ. ၂၇:၂၇-၄၄)

၁၆၊ ၁၇။ (က) ဘယ်အချိန်မှာ ပေါလု ဆုတောင်းသလဲ။ ဘာအကျိုး ရသလဲ။ (ခ) ပေါလုရဲ့ သတိပေးချက် ဘယ်လို ပြည့်စုံလာသလဲ။

^၁၆ ထိတ်လန့်ဖွယ် နှစ်ပတ်တာအတွင်း မိုင် ၅၄၀ လောက် သင်္ဘော မျောနေပြီးနောက် ထူးခြားတာတစ်ခု သင်္ဘောသားတွေ သတိထားမိသွားကြတယ်။ ကမ်းစပ်ကို လှိုင်းရိုက်ခတ်သံ ကြားတာ ဖြစ်နိုင်တယ်။ သင်္ဘော မျောမသွားအောင် ပဲ့ပိုင်းကနေ ကျောက်ဆူးတွေ ချ၊ သင်္ဘောဦးကို ကုန်းဘက် ဦးတည်ပေးပြီး သင်္ဘောကို ကမ်းပေါ် ဆွဲတင်ကြတယ်။ ဒီအချိန်မှာ သင်္ဘောသားတွေ သင်္ဘောကို စွန့်ပြီး ပြေးဖို့ ကြိုးစားပေမဲ့ စစ်သည်တွေ တားဆီးကြတယ်။ “သင်္ဘောသားတွေ သင်္ဘောပေါ်မှာ မနေရင် ခင်ဗျားတို့ အသက်ချမ်းသာရမှာ မဟုတ်ဘူး” လို့ တပ်မှူးနဲ့ စစ်သည်တွေကို ပေါလု ပြောတယ်။ သင်္ဘော နည်းနည်း ငြိမ်လာလို့ အစာစားဖို့ လူတွေကို တိုက်တွန်းပြီး အသက်ဘေး လွတ်မယ့်အကြောင်း ပေါလု ထပ်အာမခံတယ်။ အဲဒီနောက် “သူတို့အားလုံးရှေ့မှာပဲ ဘုရားသခင်ရဲ့ ကျေးဇူးတော်ကို ချီးမွမ်းတယ်။” (တ. ၂၇:၃၁၊ ၃၅) ပေါလု ကျေးဇူးတင် ဆုတောင်းတာဟာ လုကာ၊ အာရိတ္တာခုနဲ့ ဒီနေ့ ခရစ်ယာန်တွေအတွက် ပုံသက်သေပါပဲ။ လူအများရှေ့ သင့်ဆုတောင်းချက်တွေဟာ တခြားသူတွေအတွက် အားပေးမှု၊ နှစ်သိမ့်မှု ဖြစ်စေသလား။

^၁၇ ပေါလု ဆုတောင်းပြီးနောက် “လူတွေလည်း အားတက်လာပြီး အစာစားကြတယ်။” (တ. ၂၇:၃၆) ကမ်းကပ်နိုင်ဖို့ ဂျုံစပါးတွေ ပင်လယ်ထဲ ပစ်ချပြီး သင်္ဘော ဝန်ပေါ့အောင် လုပ်ကြတယ်။ မိုးလင်းတဲ့အခါ သင်္ဘောသားတွေက ကျောက်ဆူးတွေ ပင်လယ်ထဲ ဖြတ်ချပြီး ပဲ့ထိန်းတက်မကြိုးတွေ ဖြေကြတယ်။ အဲဒီနောက် သင်္ဘောဦးပိုင်းမှာ ရှိတဲ့ ရွက်ကို တင်ပြီး ကမ်းခြေဘက် ရွက်တိုက်ကြတယ်။ အဲဒီအခါ သဲသောင် ဒါမှမဟုတ် ရွှံ့နွံမှာ သင်္ဘောဦး စိုက်သွားပြီး ပဲ့ပိုင်းကတော့ လှိုင်းရိုက်လို့ ကျိုးကြေကုန်တယ်။ စစ်သည်တချို့က အကျဉ်းသားတွေ ထွက်မပြေးနိုင်အောင် သတ်ပစ်ချင်ပေမဲ့ ယုလိ တားတယ်။ လူအားလုံးကို ကုန်းဆီ ကူးသွားစေတယ်။ ပေါလု ကြိုပြောတဲ့အတိုင်း ၂၇၆ ယောက်စလုံး လွတ်မြောက်သွားတယ်။ “လူအားလုံး အသက်ဘေးက လွတ်ပြီး ကမ်းပေါ် ရောက်သွားကြတယ်။” ဒါပေမဲ့ ဘယ်နေရာ ရောက်နေကြသလဲ။—တ. ၂၇:၄၄။

“စေတနာအပြည့်နဲ့ ကူညီကြ” (တ. ၂၈:၁-၁၀)

၁၈-၂၀။ မော်လတာ ကျွန်းသားတွေ ဘယ်လို “စေတနာ အပြည့်နဲ့ ကူညီကြ” သလဲ။ ပေါလုကတစ်ဆင့် ဘုရားသခင် ဘာအံ့ဖွယ်အမှု ပြုသလဲ။

^၁၈ ဘေးလွတ်သူတွေ စစ္စလီကျွန်းတောင်ဘက်က မော်လတာကျွန်းပေါ် ရောက်နေမှန်း သိလိုက်ရတယ်။ (“မော်လတာကျွန်း—ဘယ်နေရာမှာ ရှိသလဲ” လေးထောင့်ကွက်ကို ကြည့်ပါ။) တိုင်းတစ်ပါး စကားပြော ကျွန်းသားတွေ သူတို့ကို “စေတနာ အပြည့်နဲ့ ကူညီကြတယ်။” (တ. ၂၈:၂) ရေစိုရွှဲနေလို့ ခိုက်ခိုက်တုန်အောင် ချမ်းပြီး ကျွန်းပေါ် ရောက်လာတဲ့ သူစိမ်းတွေအတွက် မီးဖိုပေးကြတယ်။ ချမ်းအေးပြီး မိုးရွာနေပေမဲ့ မီးရှိန်ကြောင့် နွေးလာကြတယ်။ အဲဒီနောက် အံ့ဖွယ်အမှု ဖြစ်လာတယ်။

^၁၉ ပေါလုက ကူညီပေးချင်လို့ ထင်းတချို့ ကောက်ပြီး မီးထဲ ထည့်လိုက်တော့ အဆိပ်ပြင်းတဲ့ မြွေပွေးတစ်ကောင် ထွက်လာပြီး သူ့လက်ကို ခဲထားတယ်။ ဒါ ပေါလုကို ဘုရားတွေ ဒဏ်ခတ်တာပဲလို့ ကျွန်းသားတွေ ယူဆသွားကြတယ်။a

^၂၀ ပေါလု မြွေကိုက်ခံရတာ မြင်တော့ “တစ်ကိုယ်လုံး ရောင်ကိုင်းလာမယ်” လို့ ဒေသခံတွေ ထင်နေကြတယ်။ အကိုးအကားစာအုပ်တစ်အုပ်အရ ဒီမှာ သုံးတဲ့ မူရင်းစကားလုံးဟာ “ဆေးပညာ အသုံးအနှုန်း” ဖြစ်တယ်။ ဒီအသုံးအနှုန်းကို “ချစ်ရတဲ့ သမားတော် လုကာ” စဉ်းစားမိတာ အံ့သြစရာ မဟုတ်ဘူး။ (တ. ၂၈:၆။ ကော. ၄:၁၄) ပေါလု အဆိပ်ပြင်းတဲ့ မြွေကို ခါချလိုက်တယ်။ ဘာဥပဒ်မှ မဖြစ်ဘူး။

၂၁။ (က) လုကာရဲ့ မှတ်တမ်းမှာ တွေ့ရတဲ့ တိကျတဲ့ အသုံးအနှုန်းတချို့က ဘာလဲ။ (ခ) ပေါလု ဘယ်အံ့ဖွယ်အမှုတွေ လုပ်ခဲ့သလဲ။ မော်လတာကျွန်းသားတွေအပေါ် ဘာအကျိုး သက်ရောက်သလဲ။

^၂၁ အဲဒီဒေသမှာ ချမ်းသာတဲ့ မြေပိုင်ရှင် ပုဗလိ နေထိုင်တယ်။ မော်လတာကျွန်းကို အုပ်ချုပ်တဲ့ ရောမ အရာရှိ ဖြစ်နိုင်တယ်။ “ကျွန်းသူကြီး” လို့ လုကာ ဖော်ပြထားတယ်။ အဲဒီလို ဂုဏ်ဘွဲ့ကို မော်လတာ ကမ္ပည်းစာနှစ်ခုမှာ တွေ့ရတယ်။ ပေါလုနဲ့ အဖော်တွေကို သုံးရက်လုံး ပုဗလိ ဧည့်ဝတ်ပြုတယ်။ ဒါပေမဲ့ ပုဗလိရဲ့ ဖခင်ဟာ မကျန်းမာဘူး။ ဒီမှာလည်း အခြေအနေကို လုကာ တိတိကျကျ ဖော်ပြပြန်တယ်။ “အဖျားဝင်ပြီး ဝမ်းကိုက်ရောဂါ စွဲနေတဲ့အတွက် အိပ်ရာထဲမှာ လဲနေတယ်” လို့ ရောဂါအကြောင်း တိတိကျကျ ဖော်ပြတယ်။ ပေါလု ဆုတောင်းပြီး သူ့အပေါ် လက်တင်လိုက်တဲ့အခါ ရောဂါ ပျောက်သွားတယ်။ ဒေသခံတွေဟာ အံ့ဖွယ်လုပ်ရပ်ကြောင့် တအား အထင်ကြီးသွားပြီး လူနာတွေကို ပေါလုဆီ ခေါ်လာကြတယ်။ ပေါလုနဲ့ အဖော်တွေကို လက်ဆောင်တွေ အများကြီး ပေးကြတယ်။—တ. ၂၈:၇-၁၀။

၂၂။ (က) ရောမကို သွားတဲ့ ရေကြောင်းခရီးစဉ်အကြောင်း လုကာရဲ့ မှတ်တမ်းကို ပါမောက္ခတစ်ယောက် ဘယ်လို ချီးမွမ်းသလဲ။ (ခ) နောက်အခန်းမှာ ဘာအကြောင်း ဆွေးနွေးမလဲ။

^၂၂ ကျွန်တော်တို့ သုံးသပ်ခဲ့တဲ့ ပေါလုရဲ့ ရေကြောင်းခရီးစဉ် မှတ်တမ်းဟာ တကယ် တိကျမှန်ကန်တယ်။ “လုကာရဲ့ မှတ်တမ်းဟာ . . . ကျမ်းစာတစ်အုပ်လုံးမှာ အပီပြင်ဆုံး ရုပ်လုံးပေါ်အောင် ရေးထားတဲ့ ရေးသားချက်တစ်ခု ဖြစ်တယ်။ ပထမရာစု ပင်လယ်ခရီးနဲ့ပတ်သက်တဲ့ အချက်အလက်တွေ၊ မြေထဲပင်လယ် အရှေ့ပိုင်း အခြေအနေတွေအကြောင်း သရုပ်ဖော် ရေးသားချက်တွေဟာ အလွန် တိကျမှန်ကန်” တဲ့အတွက် နေ့စဉ်မှတ်တမ်းကို အခြေခံပြီး ရေးသားတာ ဖြစ်ရမယ်လို့ ပါမောက္ခတစ်ယောက် ပြောတယ်။ တမန်တော် ပေါလုနဲ့အတူ ခရီးသွားချိန်မှာ လုကာ ဒီလို နေ့စဉ်မှတ်တမ်းတွေ ရေးမှတ်ခဲ့ပုံရတယ်။ ဒါဆိုရင် ဒီခရီးစဉ်ရဲ့ ကျန်အပိုင်းနဲ့ပတ်သက်ပြီး သူ ရေးမှတ်စရာ အများကြီး ရှိဦးမယ်။ ရောမကို ရောက်သွားတဲ့အခါ ပေါလု ဘာဖြစ်မလဲ ကြည့်ကြစို့။

၁။ ပေါလုနဲ့ အဖော်တွေမှာ ဘယ်ယုံကြည်စိတ်ချမှု ရှိသလဲ။ ဘာကြောင့်လဲ။

အေဒီ ၅၉ မှာ “ဇုသ အမြွှာနတ်သား” ရုပ်ပါ ဂျုံစပါး တင်တဲ့ ကုန်သင်္ဘောကြီး မြေထဲပင်လယ် မော်လတာကျွန်းကနေ အီတလီကို ရွက်လွှင့်လာတယ်။ တမန်တော် ပေါလုနဲ့အတူ လုကာ၊ အာရိတ္တာခုတို့ လိုက်လာကြတယ်။ အကျဉ်းသား ပေါလုကို စောင့်ကြပ်မယ့် အစောင့်အကြပ်လည်း ပါတယ်။ (တ. ၂၇:၂) ယေဟောဝါကို ဝတ်ပြုသူတွေ ဖြစ်တဲ့ ပေါလုနဲ့ အဖော်တွေဟာ သင်္ဘောသားတွေလို ဂရိနတ်ဘုရား ဇုသရဲ့ သား အမြွှာညီနောင် ကယ်စတာနဲ့ ပေါ်လပ်ခ်ရဲ့ ကာကွယ်စောင့်ရှောက်မှုကို မတောင်းခံကြဘူး။ (တ. ၂၈:၁၁) ရောမမြို့မှာ ပေါလု အမှန်တရား သက်သေခံပြီး ဆီဇာရှေ့မှောက် ရောက်ရမယ်လို့ ယေဟောဝါ အသိပေးထားပြီး ဖြစ်လို့ပဲ။—တ. ၂၃:၁၁။ ၂၇:၂၄။

၂၊ ၃။ ပေါလု စီးလာတဲ့ သင်္ဘောဟာ ဘယ်လမ်းကြောင်းကနေ ရွက်လွှင့်လာသလဲ။ ခရီးစဉ် အစကတည်းက ပေါလုကို ဘယ်သူ ထောက်မပေးသလဲ။

^၂ သုရကုတ်မြို့မှာ သုံးရက်ကြာ ကမ်းကပ်ပြီးနောက် အီတလီကျွန်းဆွယ် အဖျားပိုင်းမှာ ရှိတဲ့ ရေဂျုန်မြို့ကို ရွက်လွှင့်ကြတယ်။ သုရကုတ်မြို့ဟာ စစ္စလီကျွန်းရဲ့ လှပတဲ့ မြို့တစ်မြို့ ဖြစ်ပြီး အေသင်မြို့နဲ့ ရောမမြို့လိုပဲ အရေးပါတယ်။ တောင်လေ တိုက်တဲ့အတွက် သင်္ဘောဟာ ရေမိုင် ၁၇၅ မိုင် အကွာမှာ ရှိတဲ့ အီတလီ ဆိပ်ကမ်းမြို့ ပေါတယောလိ (လက်ရှိ နေပယ်မြို့အနီး) ကို ဒုတိယနေ့မှာ ခါတိုင်းထက် စောရောက်လာတယ်။—တ. ၂၈:၁၂၊ ၁၃။

^၃ အခု ပေါလုဟာ ရောမမြို့ကို သွားတဲ့ ခရီးစဉ် နောက်ဆုံးအပိုင်းမှာ ရှိနေတယ်။ ရောမမြို့ ရောက်ရင်တော့ ဧကရာဇ် နီရိုရှေ့မှောက် ဝင်ရောက်ရမယ်။ ခရီးစဉ်တစ်လျှောက် ပေါလုနဲ့အတူ “နှစ်သိမ့်ခြင်း အမျိုးမျိုးရဲ့ အရှင်” ရှိနေတယ်။ (၂ ကော. ၁:၃) အဲဒီထောက်မမှု လျော့မသွားသလို ပေါလုရဲ့ ထက်သန်မှု လျော့မသွားကြောင်း ကျွန်တော်တို့ တွေ့ရမယ်။

‘ပေါလုဟာ ဘုရားသခင်ကို ကျေးဇူးတင်ချီးမွမ်းပြီး အားတက်လာ’ (တ. ၂၈:၁၄၊ ၁၅)

၄၊ ၅။ (က) ပေါလုနဲ့ အဖော်တွေ ပေါတယောလိမြို့မှာ ဘယ်လို ဧည့်ဝတ်ပြုခံရသလဲ။ ပေါလု ဘာကြောင့် လွတ်လပ်ခွင့် ရတာ ဖြစ်မလဲ။ (ခ) ခရစ်ယာန်တွေ အကျဉ်းကျစဉ်မှာတောင် အမူအကျင့်ကောင်းကြောင့် ဘယ်လို အကျိုးခံစားရနိုင်သလဲ။

^၄ ပေါတယောလိမြို့မှာ ညီအစ်ကိုတွေကို ပေါလုနဲ့ အဖော်တွေ သွားတွေ့ကြတယ်။ ညီအစ်ကိုတွေက သူတို့နဲ့ “ခုနစ်ရက်လောက် နေဖို့ တောင်းပန်ကြတယ်။” (တ. ၂၈:၁၄) ဧည့်ဝတ်ပျူငှာမှုနဲ့ပတ်သက်ပြီး သိပ်ကောင်းတဲ့ စံနမူနာပါပဲ။ ဧည့်ဝတ်ကျေပွန်တဲ့ အဲဒီညီအစ်ကိုတွေဟာ ပေါလုနဲ့ အဖော်တွေဆီကနေ အားပေးမှု အများကြီး ပြန်ရကြမှာ သေချာတယ်။ ဒါပေမဲ့ စောင့်ကြပ်ခံနေရတဲ့ အကျဉ်းသားတစ်ယောက် ဘာကြောင့် ဒီလောက် လွတ်လပ်ခွင့် ရသလဲ။ ရောမ အစောင့်အကြပ်တွေ ယုံကြည်စိတ်ချအောင် ပေါလု နေလို့ ဖြစ်နိုင်တယ်။

^၅ ဒီနေ့လည်း ယေဟောဝါရဲ့ ကျေးကျွန်တွေဟာ ခရစ်ယာန် အမူအကျင့်ကြောင့် အကျဉ်းထောင်တွေ၊ ချွေးတပ်စခန်းတွေမှာ အထူးလွတ်လပ်ခွင့်နဲ့ အထူးအခွင့်အရေးတွေ ရလေ့ရှိတယ်။ ဥပမာ၊ ရိုမေးနီးယားနိုင်ငံမှာ ဓားပြမှုနဲ့ ထောင် ၇၅ နှစ် ကျနေသူတစ်ယောက် ကျမ်းစာ စလေ့လာပြီးနောက် အကြီးအကျယ် ပြောင်းလဲသွားတယ်။ ဒါကြောင့် ထောင်အာဏာပိုင်တွေက သူ့ကို အစောင့်အကြပ် မပါဘဲ မြို့ထဲ သွားခွင့် ပေးပြီး အကျဉ်းထောင်အတွက် လိုအပ်တဲ့ ပစ္စည်းတွေ ဝယ်ခိုင်းတတ်တယ်။ အရေးကြီးဆုံးကတော့ ကျွန်တော်တို့ရဲ့ အမူအကျင့်ကောင်းက ယေဟောဝါရဲ့ ဘုန်းတော်ကို ချီးမွမ်းစရာ ဖြစ်စေတယ်။—၁ ပေ. ၂:၁၂။

၆၊ ၇။ ရောမမြို့က ညီအစ်ကိုတွေ ဘယ်ထူးခြားတဲ့ မေတ္တာ ပြကြ သလဲ။

^၆ ပေါလုနဲ့ အဖော်တွေဟာ ရောမမြို့ကို သွားတဲ့ အက်ပီယန်လမ်းအတိုင်း ပေါတယောလိမြို့ကနေ မိုင် ၃၀ လောက် ဝေးတဲ့ ခက်ပြူအာမြို့ဆီ ခြေကျင်လျှောက်ခဲ့ကြပုံ ရတယ်။ ချော်ခဲပြားကြီးတွေ ခင်းထားတဲ့ နာမည်ကျော် လမ်းမကြီးပေါ်ကနေ အီတလီ ကျေးလက်ဒေသရဲ့ လှပတဲ့ ရှုခင်းတွေအပြင် လမ်းတစ်လျှောက် တချို့နေရာတွေမှာ မြေထဲပင်လယ်ကို လှမ်းကြည့်နိုင်တယ်။ ခရီးသွားတွေဟာ ရောမမြို့ကနေ မိုင် ၄၀ လောက် ဝေးပြီး အပ္ပိဈေး ရှိတဲ့ ပေါန်ထိုင်းမားရှပ်စ် ဆိုတဲ့ ရွှံ့နွံထူတဲ့ အရပ်ကို ဖြတ်လျှောက်သွားကြတယ်။ “သတင်းကို ကြားပြီး” ရောမမြို့က ညီအစ်ကိုတချို့ အပ္ပိဈေးအထိ ရောက်လာကြတယ်။ တချို့ကတော့ ရောမမြို့နဲ့ မိုင် ၃၀ လောက် ဝေးတဲ့ ခရီးတစ်ထောက် နားရာ သုံးဇရပ်မှာ စောင့်နေကြတယ်။ ပေါလုကို တော်တော် ချစ်ကြတာပဲ။—တ. ၂၈:၁၅။

^၇ အပ္ပိဈေးဟာ ပင်ပန်းနွမ်းနယ်နေတဲ့ ခရီးသည်တွေ သက်သောင့်သက်သာ နားလို့ရတဲ့ နေရာ မဟုတ်ဘူး။ “သင်္ဘောသားတွေနဲ့ ရိုင်းစိုင်းတဲ့ တည်းခိုခန်း ပိုင်ရှင်တွေ ပြွတ်သိပ်နေတဲ့” နေရာ ဖြစ်တယ်လို့ ရောမ ကဗျာဆရာ၊ သရော်စာ ရေးသူ ဟောရေးစ် ဖော်ပြတယ်။ “ရေလည်း အရမ်း ညစ်ပတ်နံစော်” တယ်လို့ ပြောတယ်။ အဲဒီနေရာမှာ သူ ညစာတောင် မစားဘူး။ အဲဒီလို အဆင်မပြေမှုတွေ ရှိပေမဲ့ ရောမမြို့က ညီအစ်ကိုတွေဟာ ပေါလုနဲ့ အဖော်တွေရဲ့ ခရီးစဉ် နောက်ဆုံးအပိုင်းမှာ လိုက်ပါပို့ဆောင်ပေးဖို့ ဝမ်းသာအားရ လာကြိုကြတယ်။

၈။ ညီအစ်ကိုတွေကို ပေါလု “မြင်တော့” ဘာကြောင့် ဘုရားသခင်ကို ကျေးဇူးတင်ချီးမွမ်းသလဲ။

^၈ ပေါလု “သူတို့ကို မြင်တော့ ဘုရားသခင်ကို ကျေးဇူးတင်ချီးမွမ်းပြီး အားတက်လာတယ်” လို့ မှတ်တမ်းက ဆိုတယ်။ (တ. ၂၈:၁၅) ချစ်ရတဲ့ ညီအစ်ကိုတွေကို တွေ့ရရုံနဲ့ ပေါလု အားတက်လာပြီး စိတ်သက်သာရာ ရခဲ့တယ်။ အဲဒီထဲမှာ ပေါလုနဲ့ ရင်းနှီးတဲ့ မိတ်ဆွေတချို့ ပါမှာပဲ။ ပေါလု ဘာကြောင့် ဘုရားသခင်ကို ကျေးဇူးတင်ချီးမွမ်းခဲ့သလဲ။ ဒီလို ကိုယ်ကျိုးမငဲ့တဲ့ မေတ္တာဟာ ဘုရားသခင့် စွမ်းအားတော်ကြောင့် ဖြစ်ပေါ်လာတဲ့ အရည်အသွေး ဖြစ်မှန်း သိလို့ပဲ။ (ဂလ. ၅:၂၂) ဒီနေ့လည်း အချင်းချင်းအတွက် ကိုယ်ကျိုးစွန့် အနစ်နာခံဖို့၊ လိုအပ်သူတွေကို နှစ်သိမ့်ပေးဖို့ သန့်ရှင်းသော စွမ်းအားတော်က ခရစ်ယာန်တွေကို လှုံ့ဆော်ပေးတယ်။—၁ သက်. ၅:၁၁၊ ၁၄။

၉။ ပေါလုကို သွားကြိုကြတဲ့ ညီအစ်ကိုတွေရဲ့ သဘောထားမျိုးကို ကျွန်တော်တို့ ဘယ်လို ပြနိုင်သလဲ။

^၉ ဥပမာ၊ သန့်ရှင်းသော စွမ်းအားတော်ရဲ့ လှုံ့ဆော်မှုကြောင့် ဧည့်ဝတ်ကျေပွန်တဲ့ ညီအစ်ကို/မတွေဟာ တိုက်နယ်ကြီးကြပ်မှူးတွေ၊ သာသနာပြုတွေ အချိန်ပြည့် အမှုထမ်းတွေရဲ့ လိုအပ်ရာကို ဖြည့်ဆည်းပေးကြတယ်။ အချိန်ပြည့် အမှုထမ်းများစွာဟာ ယေဟောဝါအတွက် ပိုအပြည့်အဝ အမှုဆောင်ဖို့ အကြီးအကျယ် စွန့်လွှတ်အနစ်နာခံထားကြတာ။ ‘တိုက်နယ်ကြီးကြပ်မှူးရဲ့ လည်ပတ်မှုကို ထောက်မဖို့၊ တိုက်နယ်က အိမ်ထောင်သည်ဆိုရင် သူတို့ဇနီးမောင်နှံကို ဧည့်ဝတ်ပြုဖို့ ငါ ဘာတွေ လုပ်နိုင်သေးသလဲ။ သူတို့နဲ့အတူ တွဲအမှုဆောင်ဖို့ စီစဉ်နိုင်မလား’ လို့ စဉ်းစားကြည့်ပါ။ သင် ကောင်းချီး အများကြီး ပြန်မှာ။ ဥပမာ၊ ပေါလုနဲ့ အဖော်တွေဆီကနေ တည်ဆောက်မှု ဖြစ်စေတဲ့ တွေ့ကြုံမှုတွေ ကြားရတဲ့အခါ ရောမမြို့က ညီအစ်ကိုတွေ အင်မတန် ဝမ်းမြောက်ခဲ့ပုံကို မြင်ယောင်ကြည့်လိုက်ပါ။—တ. ၁၅:၃၊ ၄။

“အရပ်တကာမှာ မကောင်းပြောခံရ” (တ. ၂၈:၁၆-၂၂)

၁၀။ ရောမမြို့မှာ ပေါလုရဲ့ အခြေအနေ ဘယ်လို ရှိသလဲ။ မြို့ရောက်ပြီး မကြာခင် ဘာလုပ်သလဲ။

^၁၀ ခရီးသည်အုပ်စု ရောမမြို့ကို ရောက်တဲ့အခါ “ပေါလုဟာ အစောင့်စစ်သည်နဲ့အတူ သီးခြားနေခွင့် ရတယ်။” (တ. ၂၈:၁၆) အိမ်အကျယ်ချုပ် ချခံရသူတွေ ထွက်ပြေးလို့ မရအောင် အစောင့်နဲ့အတူ တွဲပြီး သံကြိုးချည်နှောင်ထားလေ့ ရှိတယ်။ နိုင်ငံတော်သတင်း ကြွေးကြော်သူ ပေါလုဟာ ချည်နှောင်ခံထားရပေမဲ့ မဟောဘဲ မနေဘူး။ ခရီးပန်းလာလို့ သုံးရက် အနားယူပြီးနောက် ရောမမြို့မှာ ရှိတဲ့ ဂျူးခေါင်းဆောင်တချို့ကို ဖိတ်ပြီး ကိုယ့်ကိုယ်ကိုယ် မိတ်ဆက်တယ်။ သက်သေခံတယ်။

၁၁၊ ၁၂။ ပေါလုဟာ ဂျူးတွေနဲ့ စကားပြောတဲ့အခါ သူတို့မှာ ရှိနေနိုင်တဲ့ စိတ်စွန်းကွက်မှုကို ဖယ်ရှားဖို့ ဘယ်လို ကြိုးစားခဲ့သလဲ။

^၁၁ အဲဒီနောက် ပေါလု ဒီလိုပြောတယ်– “ညီအစ်ကိုတို့၊ ကျွန်တော်က လူမျိုးချင်းတွေကိုရော၊ ဘိုးဘေးတွေရဲ့ ထုံးတမ်းစဉ်လာကိုရော မဆန့်ကျင်ဘဲနဲ့ ဂျေရုဆလင်မြို့မှာ အကျဉ်းချခံရပြီး ရောမလူတွေလက်ထဲ ရောက်ခဲ့ပါတယ်။ ရောမတွေ စစ်ဆေးမေးမြန်းပြီးတဲ့နောက် သေထိုက်တဲ့အပြစ် မတွေ့တဲ့အခါ ကျွန်တော့်ကို သူတို့ လွှတ်ပေးချင်တယ်။ ဒါပေမဲ့ ဂျူးတွေ ကန့်ကွက်နေလို့ ဆီဇာဆီမှာ ကျွန်တော် အယူခံဝင်လိုက်ရတာပါ။ လူမျိုးချင်းတွေကို စွဲချက်တင်စရာ ရှိလို့ မဟုတ်ဘူး။”—တ. ၂၈:၁၇-၁၉။

^၁၂ ဂျူးပရိသတ်ကို “ညီအစ်ကိုတို့” လို့ ပေါလု ခေါ်တယ်။ သူတို့မှာ ရှိနေနိုင်တဲ့ စိတ်စွန်းကွက်မှုကို ဖယ်ရှားဖို့ ကြိုးစားလိုက်တာပဲ။ (၁ ကော. ၉:၂၀) ဂျူးအချင်းချင်းကို အပြစ်တင်ဖို့ မဟုတ်ဘဲ ဆီဇာရှေ့ အယူခံဝင်ဖို့ ဒီကို ရောက်နေတာ ဖြစ်ကြောင်းလည်း ရှင်းပြတယ်။ ဒါပေမဲ့ ပေါလု အယူခံဝင်တဲ့အကြောင်း ဒေသခံ ဂျူးတွေ အခုမှ ကြားကြတာ။ (တ. ၂၈:၂၁) ဒီကိစ္စကို ယုဒပြည်က ဂျူးတွေ ဘာကြောင့် အကြောင်းမကြားသလဲ။ ရည်ညွှန်းစာအုပ် တစ်အုပ်က ဒီလိုဆိုတယ်– “ပေါလု ပါလာတဲ့ သင်္ဘောဟာ ဆောင်းအကုန် အီတလီကို ဦးဆုံး ဆိုက်တဲ့ သင်္ဘော ဖြစ်မယ်။ ဆောင်းတွင်းဘက် ရေကြောင်းခရီး သွားခဲလို့ ဂျေရုဆလင်မြို့မှာ ရှိတဲ့ ဂျူးအာဏာပိုင် ကိုယ်စားလှယ်တွေ မရောက်နိုင်တာ ဒါမှမဟုတ် အဲဒီအကြောင်းပါတဲ့ စာ မရောက်နိုင်တာ ဖြစ်မယ်။”

၁၃၊ ၁၄။ နိုင်ငံတော်သတင်းကို ပေါလု ဘယ်လို စဟောသလဲ။ သူ့ကို ဘယ်လို အတုယူနိုင်သလဲ။

^၁၃ ပေါလုဟာ ဂျူးပရိသတ် စိတ်ဝင်စားမယ့် အသုံးအနှုန်းနဲ့ နိုင်ငံတော်သတင်း စဟောတယ်။ “ဒါကြောင့် ခင်ဗျားတို့နဲ့ တွေ့ပြီး အခုလို စကားပြောခွင့် တောင်းရတာပါ။ အစ္စရေးတွေရဲ့ မျှော်လင့်ချက်ကြောင့် ကျွန်တော် အခုလို သံကြိုးနဲ့ ချည်နှောင်ခံနေရတာပါ” လို့ ပြောတယ်။ (တ. ၂၈:၂၀) အဲဒီမျှော်လင့်ချက်မှာ ခရစ်ယာန်တွေ ကြေညာနေတဲ့ မေရှိယနဲ့ နိုင်ငံတော်အကြောင်း ပါတယ်။ ဂျူးအကြီးအကဲတွေက “ဒီဂိုဏ်းဟာ အရပ်တကာမှာ မကောင်းပြောခံရမှန်း ကျွန်တော်တို့ သိတယ်။ ဒါကြောင့် ခင်ဗျားရဲ့ သဘောထားကို နားထောင်သင့်တယ်လို့ ယူဆတယ်” လို့ ပြောကြတယ်။—တ. ၂၈:၂၂။

^၁၄ ကျွန်တော်တို့လည်း သတင်းကောင်း ဟောပြောခွင့် ရတဲ့အခါ နားထောင်သူတွေ စိတ်ဝင်စားလာဖို့ သူတို့ကို စဉ်းစားစေတဲ့ အချက်တွေ၊ မေးခွန်းတွေ သုံးခြင်းအားဖြင့် ပေါလုကို အတုယူနိုင်တယ်။ ကျမ်းစာဖြင့် ကျိုးကြောင်းဆင်ခြင်ခြင်း၊ သီအိုကရက်တစ် ဓမ္မအမှုကျောင်း ပညာရေးမှ အကျိုးရယူ၊ ဖတ်ရှုခြင်းနဲ့ သွန်သင်ခြင်းမှာ ကြိုးစားပါ စတဲ့ စာအုပ်တွေမှာ သိပ်ကောင်းတဲ့ အကြံပြုချက်တွေ ပါတယ်။ ဒီကျမ်းစာလေ့လာမှု အထောက်အကူပြု စာပေတွေကို သင် ကောင်းကောင်း အသုံးချနေသလား။

“စေ့စေ့စပ်စပ် သက်သေခံ” ခြင်း—ကျွန်တော်တို့အတွက် စံနမူနာ (တ. ၂၈:၂၃-၂၉)

၁၅။ ပေါလု သက်သေခံပုံကနေ ဘယ်သင်ခန်းစာ လေးခု ယူနိုင်သလဲ။

^၁၅ ချိန်းထားတဲ့နေ့မှာ ဒေသခံဂျူး “အများကြီး” ပေါလုဆီ “ရောက်လာ” ကြတယ်။ ပေါလုဟာ “မနက်ကနေ ညနေအထိ ဘုရားသခင်ရဲ့ နိုင်ငံတော်အကြောင်း စေ့စေ့စပ်စပ် သက်သေခံတယ်။ မောရှေပညတ်ကျမ်းနဲ့ ပရောဖက်ကျမ်းတွေကို ကိုးကားပြီး ယေရှုအကြောင်း သူတို့ နားလည်လက်ခံလာအောင် ရှင်းပြတယ်။” (တ. ၂၈:၂၃) ပေါလု သက်သေခံပုံကနေ သင်ခန်းစာ လေးခု ယူနိုင်တယ်။ ပထမ၊ ဘုရားသခင့် နိုင်ငံတော်အကြောင်းကို အာရုံစိုက်တယ်။ ဒုတိယ၊ နားထောင်သူတွေ နားလည်လက်ခံလာမယ့် နည်းနဲ့ ပြောတယ်။ တတိယ၊ ကျမ်းစာကို အခြေခံပြီး ကျိုးကြောင်းဆင်ခြင်တယ်။ စတုတ္ထ၊ “မနက်ကနေ ညနေအထိ” သက်သေခံခြင်းအားဖြင့် ကိုယ်ကျိုးမငဲ့တဲ့ သဘောထား ပြတယ်။ သိပ်ကောင်းတဲ့ စံနမူနာပါပဲ။ ဘာရလဒ် ရသလဲ။ ‘တချို့ ယုံကြ’ တယ်။ တချို့ မယုံကြဘူး။ အချင်းချင်း သဘောထား ကွဲပြီး “ထွက်သွား” တယ်လို့ လုကာ ပြောတယ်။—တ. ၂၈:၂၄၊ ၂၅။

၁၆-၁၈။ ရောမမြို့မှာ ရှိတဲ့ ဂျူးတွေရဲ့ တုံ့ပြန်ပုံကို ပေါလု ဘာကြောင့် မအံ့သြသလဲ။ သတင်းတရားကို လူတွေ ငြင်းပယ်တဲ့အခါ ကျွန်တော်တို့ ဘယ်လို တုံ့ပြန်သင့်သလဲ။

^၁၆ သူတို့ရဲ့ တုံ့ပြန်ပုံကို ပေါလု မအံ့သြဘူး။ ကျမ်းစာမှာ ကြိုဟောထားပြီးသား၊ ကြုံဖူးပြီးသား ဖြစ်လို့ပဲ။ (တ. ၁၃:၄၂-၄၇။ ၁၈:၅၊ ၆။ ၁၉:၈၊ ၉) ဒါကြောင့် ထွက်သွားတော့မယ့် တုံ့ပြန်မှု မရှိတဲ့ ပရိသတ်ကို ပေါလု ဒီလိုပြောတယ်– “ပရောဖက် ဟေရှာယအားဖြင့် ခင်ဗျားတို့ ဘိုးဘေးတွေကို သန့်ရှင်းသော စွမ်းအားတော် ပြောခဲ့တာ သိပ်မှန်တာပဲ။ ‘ဒီလူမျိုးကို သွားပြောပါ– “မင်းတို့ဟာ ကြားလျက်နဲ့ လုံးဝ နားလည်မှာ မဟုတ်ဘူး။ ကြည့်လျက်နဲ့ လုံးဝ မြင်မှာ မဟုတ်ဘူး။ ဒီလူတွေဟာ စိတ်တံခါးကို ပိတ်ထားတယ်။ ကြားပေမဲ့ မလိုက်နာဘူး။ ဘာမှ မကြားရ၊ မမြင်ရအောင် နားမျက်စိကို ပိတ်ထားတယ်။ ဒါကြောင့် ဆိုလိုရင်းကို နားမလည်ကြဘူး။ ငါ့ဆီ ပြန်မလှည့်လာတော့ ငါလည်း သူတို့ပြန်ကောင်းလာအောင် ကုသပေးလို့ မရဘူး။”’” (တ. ၂၈:၂၅-၂၇) “စိတ်တံခါး ပိတ်” လို့ ပြန်ဆိုထားတဲ့ မူရင်းစကားလုံးဟာ “ထုံထိုင်း” ဒါမှမဟုတ် “အဆီပိတ်” တဲ့ နှလုံးလို့ အဓိပ္ပာယ် ရတယ်။ ဒါကြောင့် သူတို့ကို နိုင်ငံတော်သတင်း မတိုးတာ။ ဝမ်းနည်းစရာပါပဲ။

^၁၇ ဂျူးပရိသတ်နဲ့ မတူဘဲ “လူမျိုးခြားတွေ” ကတော့ “တကယ် နာယူကြလိမ့်မယ်” လို့ ပေါလု နိဂုံးချုပ်လိုက်တယ်။ (တ. ၂၈:၂၈။ ဆာ. ၆၇:၂။ ဟေရှာ. ၁၁:၁၀) ပေါလု အဲဒီလို တပ်အပ် ပြောနိုင်တာက နိုင်ငံတော် သတင်းတရားကို လူမျိုးခြားများစွာ တုံ့ပြန်တာ မြင်ဖူးထားလို့ပဲ။—တ. ၁၃:၄၈။ ၁၄:၂၇။

^၁၈ သတင်းကောင်းကို လူတွေ ငြင်းတဲ့အခါ ပေါလုလိုပဲ ကျွန်တော်တို့ စိတ်မထိခိုက်ကြဘူး။ လူနည်းနည်းပဲ အသက်လမ်း တွေ့မယ်ဆိုတာ ကျွန်တော်တို့ သိကြတယ်။ (မ. ၇:၁၃၊ ၁၄) စစ်မှန်တဲ့ ဝတ်ပြုရေးမှာ ကျွန်တော်တို့နဲ့အတူ စိတ်ရင်းမှန်သူတွေ ပူးပေါင်းလာတဲ့အခါမှာတော့ ဝမ်းသာအားရ ကြိုဆိုကြပါစို့။—လု. ၁၅:၇။

‘ဘုရားသခင်ရဲ့ နိုင်ငံတော်အကြောင်း ဟောပြောသွန်သင်ပေးနေ’ (တ. ၂၈:၃၀၊ ၃၁)

၁၉။ မိမိအခြေအနေကို ပေါလု ဘယ်လို အကျိုးရှိရှိ အသုံးချသလဲ။

^၁၉ “ပေါလုဟာ ငှားထားတဲ့ အိမ်မှာ နှစ်နှစ်ပတ်လုံး နေထိုင်ပြီး လာသမျှလူတွေကို ကြိုဆိုလက်ခံတယ်။ အတားအဆီး မရှိဘဲ ရဲရဲဝံ့ဝံ့ ပြောဆိုခွင့် ရပြီး ဘုရားသခင့် နိုင်ငံတော်အကြောင်း၊ သခင်ယေရှုခရစ်အကြောင်း ဟောပြောသွန်သင်ပေးနေတယ်” ဆိုပြီး အားရှိစရာကောင်းတဲ့ မှတ်ချက်နဲ့ ဇာတ်ကြောင်းကို လုကာ နိဂုံးချုပ်လိုက်တယ်။ (တ. ၂၈:၃၀၊ ၃၁) ပေါလုဟာ ဧည့်ဝတ်ပြုရာမှာ၊ ယုံကြည်ခြင်း ရှိရာမှာ၊ စိတ်ထက်သန်ရာမှာ တကယ် ထူးခြားတဲ့ စံနမူနာပါပဲ။

၂၀၊ ၂၁။ ရောမမြို့မှာ ပေါလု ကူညီပေးခဲ့သူ တချို့ကို ဖော်ပြပါ။

^၂၀ ပေါလု ကြင်ကြင်နာနာ လက်ခံကြိုဆိုခဲ့သူ တစ်ယောက်ကတော့ ကောလောသဲမြို့က ကျွန်ပြေး သြနေသိမ်ပါ။ သြနေသိမ် ခရစ်ယာန်တစ်ယောက် ဖြစ်လာအောင် ပေါလု ကူညီပေးခဲ့တယ်။ ဒီလိုနဲ့ သြနေသိမ်ဟာ ပေါလုအတွက် “ချစ်ရတဲ့ ညီအစ်ကို၊” “သစ္စာရှိတဲ့သူ” ဖြစ်လာတယ်။ “သားအရင်းလို” ဖြစ်လာတယ်လို့တောင် ပေါလု ပြောတယ်။ (ကော. ၄:၉။ ဖိလေ. ၁၀-၁၂) သြနေသိမ်ကြောင့် ပေါလု အားတက်ခဲ့မှာ သေချာတယ်။a

^၂၁ ပေါလုရဲ့ ပုံသက်သေကောင်းကနေ တခြားသူတွေလည်း အကျိုးခံစားရတယ်။ ဖိလိပ္ပိ အသင်းသားတွေဆီ ပေါလု ဒီလိုရေးခဲ့တယ်– “ကျွန်တော် ကြုံနေရတဲ့ အခြေအနေက သတင်းကောင်း ပျံ့နှံ့ဖို့ အထောက်အကူ ဖြစ်စေတယ်ဆိုတာ ခင်ဗျားတို့ကို သိစေချင်တယ်။ ခရစ်တော်ကို ယုံကြည်လို့ ကျွန်တော် အကျဉ်းကျနေမှန်း နန်းတော်စောင့်တပ် တစ်တပ်လုံးရော ကျန်တဲ့လူတွေပါ သိကြတယ်။ အဲဒီအပြင် သခင့်အမှုကို ဆောင်နေတဲ့ ညီအစ်ကိုတွေက ကျွန်တော် အကျဉ်းကျနေတဲ့အတွက် ယုံကြည်စိတ်ချမှု ပိုရှိလာပြီး ဘုရားသခင်ရဲ့ တရားစကားကို သတ္တိရှိရှိ၊ မကြောက်မရွံ့ ဟောပြောနေကြတယ်။”—ဖိ. ၁:၁၂-၁၄။

၂၂။ ပေါလုဟာ ရောမမြို့မှာ အကျယ်ချုပ် ကျနေချိန်ကို ဘယ်လို အကျိုးရှိရှိ အသုံးချသလဲ။

^၂၂ ရောမမြို့မှာ အကျယ်ချုပ် ကျနေချိန်ကို အကျိုးရှိရှိ အသုံးချပြီး ပေါလု စာတွေ ရေးတယ်။ နောက်ပိုင်းမှာ အဲဒီစာတွေဟာ ခရစ်ယာန် ဂရိကျမ်းစောင်ဝင် ဖြစ်လာတယ်။b အဲဒီစာတွေကနေ ပထမရာစု ခရစ်ယာန်တွေ အကျိုးရခဲ့ကြတယ်။ ကျွန်တော်တို့လည်း အကျိုးရနေကြတယ်။ စွမ်းအားတော် လမ်းညွှန်မှုနဲ့ ရေးထားတဲ့ ပေါလုရဲ့ အကြံဉာဏ်တွေဟာ ရေးသားချိန်ကလိုပဲ ဒီနေ့လည်း လက်တွေ့ကျနေဆဲ ဖြစ်လို့ပါ။—၂ တိ. ၃:၁၆၊ ၁၇။

၂၃၊ ၂၄။ ပေါလုလိုပဲ ဒီနေ့ခေတ် ခရစ်ယာန်တွေ မတရား ထောင်ချခံရပေမဲ့ အကောင်းမြင်စိတ် ဆက်ရှိနေကြောင်း ဘယ်လို ပြကြသလဲ။

^၂၃ တမန်တော်ကျမ်းမှာ ဖော်ပြမထားပေမဲ့ လေးနှစ်ကြာပြီးနောက် ပေါလု လွတ်လာတယ်။ ကဲသရိမြို့မှာ ထောင် နှစ်နှစ်၊ ရောမမြို့မှာ အကျယ်ချုပ် နှစ်နှစ် ကျခဲ့တာ။c (တ. ၂၃:၃၅။ ၂၄:၂၇) ဒါပေမဲ့ ပေါလု အကောင်းမြင်စိတ် ရှိနေတုန်းပဲ။ အတတ်နိုင်ဆုံး ဘုရားအမှု ဆောင်တယ်။ ဒီနေ့လည်း ယေဟောဝါရဲ့ ကျေးကျွန်တွေဟာ ယုံကြည်ချက်ကြောင့် မတရား ထောင်ချခံရပေမဲ့ ရွှင်လန်းမှု မပျောက်ဘဲ ဆက်ဟောပြောကြတယ်။ ခရစ်ယာန် ကြားနေမှုကြောင့် စပိန်နိုင်ငံမှာ ထောင်ချခံရတဲ့ အာဒေါ့လ်ဖိုအကြောင်း သုံးသပ်ကြည့်ပါ။ “မင်းကိုတော့ တကယ် လက်ဖျားခါတယ်။ ထောင်ထဲမှာ မင်း အနေရခက်အောင် ငါတို့ လုပ်ကြည့်တယ်။ အနေရခက်အောင် လုပ်လေ မင်း ပိုပြုံးလေပဲ။ ငါတို့ကိုလည်း ကြင်ကြင်နာနာ စကားပြောတယ်” လို့ အရာရှိတစ်ယောက် ပြောတယ်။

^၂၄ နောက်ပိုင်း၊ အာဒေါ့လ်ဖိုရဲ့ အကျဉ်းခန်းတံခါး ဖွင့်ထားတဲ့အထိ စစ်သားတွေ ယုံကြည်စိတ်ချလာကြတယ်။ အာဒေါ့လ်ဖိုဆီ လာလည်ပြီး ကျမ်းစာမေးခွန်းတွေ မေးကြတယ်။ အစောင့်တစ်ယောက်ဆိုရင် အာဒေါ့လ်ဖိုရဲ့ အကျဉ်းခန်းထဲ ဝင်ပြီး ကျမ်းစာဖတ်နေလို့ အာဒေါ့လ်ဖိုက ထွက်စောင့်ပေးရတယ်။ အကျဉ်းသားက အစောင့်ကို ပြန် “စောင့်ကြပ်” ပေးနေရတာ။ သစ္စာရှိ အဲဒီသက်သေခံတွေရဲ့ စံနမူနာကောင်းက ခက်ခဲတဲ့ အခြေအနေမှာတောင် “ဘုရားသခင်ရဲ့ တရားစကားတော်ကို သတ္တိရှိရှိ၊ မကြောက်မရွံ့ ဟောပြောနေ” ဖို့ ကျွန်တော်တို့ကို လှုံ့ဆော်ပေးတယ်။

၂၅၊ ၂၆။ အနှစ် ၃၀ မပြည့်ခင်မှာပဲ ဘယ်အံ့ဖွယ် ပရောဖက်ပြုချက် ပြည့်စုံတာကို ပေါလု မြင်တွေ့ရသလဲ။ ကျွန်တော်တို့ခေတ်နဲ့ ဘယ်လို နှိုင်းယှဉ်နိုင်သလဲ။

^၂၅ မိမိဆီ လာသမျှ လူတွေကို “ဘုရားသခင်ရဲ့ နိုင်ငံတော်အကြောင်း” အိမ်အကျယ်ချုပ် ကျနေတဲ့ တမန်တော် ပေါလု “ဟောပြောသွန်သင်ပေးနေတယ်။” အားရှိစရာ မှတ်တမ်းနဲ့ တမန်တော်ကျမ်းကို နိဂုံးချုပ်ထားတာပဲ။ “ခင်ဗျားတို့ သန့်ရှင်းသော စွမ်းအားတော် ရတဲ့အခါ တန်ခိုး ရပြီး ဂျေရုဆလင်မြို့၊ ယုဒပြည်တစ်ဝန်းလုံး၊ ရှမာရိပြည်၊ ကမ္ဘာမြေအစွန်အဖျားအထိ ကျွန်တော့်အကြောင်း သက်သေခံကြလိမ့်မယ်” လို့ နောက်လိုက်တွေကို ယေရှု တာဝန်ပေးတဲ့အကြောင်း အခန်းတစ်မှာ ကျွန်တော်တို့ ဖတ်ရတယ်။ (တ. ၁:၈) အနှစ် ၃၀ မပြည့်ခင်မှာပဲ “ကမ္ဘာမြေအရပ်ရပ်မှာ ရှိတဲ့ လူတိုင်းကို သတင်းကောင်း ဟောပြောခဲ့ပြီ။”d (ကော. ၁:၂၃) ဘုရားသခင့် စွမ်းအားတော် တန်ခိုးကြီးကြောင်း အထောက်အထားပါပဲ။—ဇာ. ၄:၆။

^၂၆ ဒီနေ့လည်း နိုင်ငံဒေသပေါင်း ၂၄၀ ကျော်မှာ “ဘုရားသခင်ရဲ့ နိုင်ငံတော်အကြောင်း” ဆက်ပြီး “စေ့စေ့စပ်စပ် သက်သေခံ” ဖို့ ခရစ်တော်ရဲ့ ညီ အကြွင်းအကျန်တွေနဲ့ သူတို့ရဲ့ အပေါင်းပါ “တခြားသိုးတွေ” ကို ဒီစွမ်းအားတော်ကပဲ ခွန်အားရှိနေစေတာ။ (ယော. ၁၀:၁၆။ တ. ၂၈:၂၃) အဲဒီလုပ်ငန်းမှာ သင် အပြည့်အဝ ပါဝင်နေရဲ့လား။