ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင်မှာပါတဲ့ အညွှန်းများ
နိုဝင်ဘာ ၇-၁၃
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၅–၆
“ငါတို့ဘက်ကလူတွေဟာ သူတို့ဘက်ကလူတွေထက် ပိုများတယ်”
it-1 ၇၁၆ ပိုဒ်. ၄
ဧလိရှဲ
ဆီးရီးယားလက်ကနေ အစ္စရေးတွေ လွတ်မြောက်။ အစ္စရေးဘုရင် ယောရံ အုပ်ချုပ်ချိန်မှာ ဆီးရီးယားတွေက အစ္စရေးကို ရုတ်တရက် တိုက်ခိုက်ဖို့ ကြံစည်တယ်။ ဗင်ဟာဒဒ် ၂ ရဲ့ အကြံအစည်တွေကို ဧလိရှဲက ဘုရင်ယောရံကို ပြောပြတဲ့အတွက် အကြိမ်ကြိမ် အကြံပျက်ခဲ့တယ်။ အစပိုင်းမှာတော့ ဗင်ဟာဒဒ်က သစ္စာဖောက် ရှိနေတယ်လို့ ထင်နေတယ်။ ဒါပေမဲ့ အကြောင်းရင်းမှန်ကို သိသွားတဲ့အခါ ဧလိရှဲကို ဖမ်းဖို့ မြင်းတွေ၊ စစ်မြင်းရထားတွေ ပါတဲ့ စစ်တပ်ကြီးကို ဒေါသန်မြို့ဆီ စေလွှတ်လိုက်တယ်။ ဧလိရှဲရဲ့ နောက်လိုက် ကြောက်လန့်သွားလို့ မျက်စိ ဖွင့်ပေးဖို့ ဘုရားဆီ ဧလိရှဲ ဆုတောင်းတယ်။ “ဧလိရှဲပတ်လည်က တောင်တန်းဒေသတစ်ခုလုံးမှာ မီးလိုတောက်ပတဲ့ မြင်းတွေ၊ စစ်မြင်းရထားတွေ ပြည့်နေတာကို သူမြင်တယ်။” ဆီးရီးယားတပ်တွေ ဆင်းလာတဲ့အခါ ဧလိရှဲက “ဒီလူတွေ မျက်စိကွယ်သွားအောင် လုပ်ပေးပါ” ဆိုပြီး ဆန့်ကျင်ဘက် အံ့ဖွယ်အမှု လုပ်ပေးဖို့ ယေဟောဝါဆီ ဆုတောင်းတယ်။ ဧလိရှဲက ဆီးရီးယားတွေကို လက်ဆွဲခေါ်သွားတာ မဟုတ်ဘဲ “ကျွန်တော့်နောက် လိုက်ခဲ့ကြ” လို့ ပြောတာကို ကြည့်ရင် သူတို့ မျက်စိကွယ်တာဟာ ပကတိ မဟုတ်ဘဲ စိတ်ပိုင်းဆိုင်ရာ ဖြစ်ပုံရတယ်။ သူတို့ လာဖမ်းတဲ့ ဧလိရှဲကို မမှတ်မိကြတော့တာ၊ သူတို့ကို ဘယ်ခေါ်သွားနေမှန်း မသိကြတော့တာ ဖြစ်တယ်။—၂ဘု ၆:၈-၁၉။
မီးမြင်းရထားတွေကို ဧလိရှဲ မြင်တွေ့ခဲ့—သင်ကော မြင်သလား
ဒေါသန်မြို့မှာ ဧလိရှဲဟာ ရန်သူတွေ ဝိုင်းတာကို ခံရပေမဲ့ တည်တည်ငြိမ်ငြိမ်ပဲ။ ဘာကြောင့်လဲဆိုတော့ သူ့မှာ ယေဟောဝါအပေါ် ခိုင်ခံ့တဲ့ ယုံကြည်ခြင်း ရှိလို့ပဲ။ ကျွန်ုပ်တို့လည်း ခိုင်ခံ့တဲ့ ယုံကြည်ခြင်း ရှိဖို့ လိုတယ်။ ဒါကြောင့် ဘုရားသခင့် စွမ်းအားတော်အတွက် ဆုတောင်းကြစို့။ အဲဒီလိုဆိုရင် ကျွန်ုပ်တို့ဟာ ယုံကြည်ခြင်းအပြင် စွမ်းအားတော်ကြောင့် ဖြစ်ပေါ်စေတဲ့ တခြားအရည်အသွေးတွေကိုပါ ပြသနိုင်မှာဖြစ်တယ်။—လု. ၁၁:၁၃; ဂလ. ၅:၂၂၊ ၂၃။
it-1 ၃၄၃ ပိုဒ်. ၁
မျက်စိကွယ်ခြင်း
ဧလိရှဲ စကားကြောင့် ဆီးရီးယား စစ်တပ် မျက်စိကွယ်သွားတာဟာ စိတ်ပိုင်းဆိုင်ရာ ကွယ်ခြင်း ဖြစ်ပုံရတယ်။ စစ်တပ်တစ်ခုလုံးသာ ပကတိ မျက်စိကွယ်သွားရင် သူတို့အားလုံးကို လက်ဆွဲပြီး ခေါ်သွားရမှာ။ ဒါပေမဲ့ မှတ်တမ်းမှာ ဧလိရှဲက “ခင်ဗျားတို့ လမ်းမှားနေပြီ။ ဒီမြို့ဟာ ခင်ဗျားတို့ ရှာနေတဲ့မြို့ မဟုတ်ဘူး။ ကျွန်တော့်နောက် လိုက်ခဲ့ကြ” လို့ ပြောတယ်။ ဒီဖြစ်ရပ်နဲ့ပတ်သက်ပြီး စာအုပ်တစ်အုပ် (Principles of Psychology, 1981, Vol. 1, p. 59) မှာ ဝီလီယံ ဂျိမ်းစ် ဒီလို ပြောတယ်– “ဦးနှောက် အပေါ်ယံ ပျက်ယွင်းမှုကြောင့် အဖြစ်အများဆုံး ဆိုးကျိုးဟာ စိတ်ပိုင်းဆိုင်ရာ မသိမြင်ခြင်း ဖြစ်တယ်။ မြင်ပေမဲ့ ဘာမြင်မှန်း နားလည်နိုင်စွမ်း မရှိတာ ဖြစ်တယ်။ စိတ်ပညာ သဘောအရ အမြင်အာရုံ ခံစားမှု အပိုင်းနဲ့ ဘာမြင်သလဲဆိုတာ ဖော်ထုတ်ပေးတဲ့ အပိုင်းတွေ ဆက်စပ်မှု ပျောက်သွားတာ ဖြစ်တယ်လို့ အဓိပ္ပာယ် ဖွင့်ဆိုနိုင်တယ်။” ဆီးရီးယားစစ်တပ် ရှမာရိမြို့ကို ရောက်လာချိန်မှာ အဲဒီလိုမျိုး မျက်စိကွယ်အောင် ယေဟောဝါ လုပ်ခဲ့တာ ဖြစ်နိုင်တယ်။ (၂ဘု ၆:၁၈-၂၀) သောဒုံမြို့သားတွေ ဖြစ်တာလည်း အဲဒီလို စိတ်ပိုင်းဆိုင်ရာ မသိမြင်တော့ခြင်း ဖြစ်ပုံရတယ်။ မှတ်တမ်းအရ သူတို့ လုံးလုံး မမြင်တော့တာ မဟုတ်ဘဲ လောတရဲ့ အိမ်တံခါးပေါက်ကို ရှာရင်း မောပန်းသွားကြတယ်။—က ၁၉:၁၁။
ဘုရားရေးရာ ရတနာ
ဓမ္မရာဇဝင် စတုတ္ထစောင်မှ ပေါ်လွင်ချက်များ
၅:၁၅၊ ၁၆—ဧလိရှဲသည် နေမန်၏ လက်ဆောင်ကို အဘယ်ကြောင့် လက်မခံခဲ့သနည်း။ နေမန်၏ရောဂါ အံ့ဖွယ်ပျောက်ကင်းသွားခြင်းသည် မိမိအစွမ်းဖြင့် မဟုတ်ဘဲ ယေဟောဝါ၏ တန်ခိုးတော် ဖြစ်သည်ကို ဧလိရှဲ အသိအမှတ်ပြုသောကြောင့် လက်ဆောင်ကို လက်မခံခဲ့ချေ။ သူ့အနေနှင့် ဘုရားသခင် ခန့်အပ်ထားသော အခွင့်အရာမှ အကျိုးအမြတ်ရှာရန် လုံးဝ စဉ်းစားမည် မဟုတ်ပေ။ ယနေ့ စစ်မှန်သော ဝတ်ပြုသူများသည် ယေဟောဝါ၏ လုပ်ငန်းတော်မှ အမြတ်မထုတ်ကြချေ။ “သင်တို့သည် အဖိုးမပေးဘဲ ကျေးဇူးတော်ကို ခံရကြပြီဖြစ်၍ အဖိုးမခံဘဲ ပေးကမ်းကြလော့” ဟူသော ယေရှု၏ သတိပေးချက်ကို သူတို့ နှလုံးသွင်းကြသည်။—မဿဲ ၁၀:၈။
နိုဝင်ဘာ ၁၄-၂၀
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၇–၈
“မျှော်လင့်မထားတာတွေကို ယေဟောဝါ ဖြစ်စေ”
it-1 ၇၁၆-၇၁၇
ဧလိရှဲ
ဒါပေမဲ့ နောက်ပိုင်း ဗင်ဟာဒဒ် ၂ ကျူးကျော်တိုက်ခိုက်တယ်။ ချဉ်းနင်းဝင်ရောက်တဲ့ ပုံစံနဲ့ မဟုတ်ဘဲ ရှမာရိမြို့ကို ဝိုင်းထားလိုက်တယ်။ ဝိုင်းရံထားမှုကြောင့် အခြေအနေ အတော်ဆိုးလာတဲ့အတွက် တစ်ချိန်မှာ အမျိုးသမီးတစ်ယောက် ဘုရင်ကို ပြောသလို ကိုယ့်ရဲ့ သားကို စားရတဲ့အထိ ဖြစ်လာတယ်။ “လူသတ်ကောင်” အာဟပ်ရဲ့ မျိုးနွယ်ဖြစ်တဲ့ ဘုရင် ယောရံဟာ ဧလိရှဲကို သတ်မယ်လို့ ကြိမ်းတယ်။ ဒါပေမဲ့ မသတ်ဖြစ်ခဲ့ဘူး။ လူယုံတော် တပ်မှူးနဲ့အတူ ပရောဖက်ရဲ့ အိမ်ကို ယောရံ ရောက်လာချိန်မှာ ယေဟောဝါဆီက အကူအညီ ရမယ်ဆိုတဲ့ မျှော်လင့်ချက် အားလုံး ဆုံးရှုံးပြီလို့ ပြောတယ်။ ဒါနဲ့ မနက်ဖြန် အစားအစာ အလျှံပယ် ရှိနေမယ်လို့ ဘုရင်ကို ဧလိရှဲ ကတိပေးတယ်။ ဧလိရှဲရဲ့စကားကို ဘုရင့် လူယုံတော် တပ်မှူး လှောင်တဲ့အတွက် ဧလိရှဲက “ဒါကို ခင်ဗျား မြင်ပဲ မြင်ရမယ်၊ စားရမှာတော့ မဟုတ်ဘူး” လို့ ပြောတယ်။ ဆီးရီးယားစစ်တပ်ဟာ ယေဟောဝါ ဖြစ်ပေါ်စေတဲ့ အသံကြောင့် တပ်ပေါင်းစုကြီး လာတိုက်ပြီလို့ ထင်ပြီး အစားအစာ အားလုံးနဲ့ စခန်းကို ပစ်ထားခဲ့ပြီး ထွက်ပြေးကြတယ်။ ဆီးရီးယားတွေ တပ်ဆုတ်သွားတဲ့အကြောင်း ဘုရင် ကြားတဲ့အခါ လူယုံတော် တပ်မှူးကို ရှမာရိမြို့ တံခါးမှူးအဖြစ် ခန့်လိုက်တယ်။ ငတ်ပြတ်နေတဲ့ အစ္စရေးတွေ စခန်းကို အလုအယက် သိမ်းယူကြချိန်မှာ လူယုံတော် တပ်မှူး တက်နင်းခံရပြီး သေသွားတယ်။ အစားအစာကို သူ မြင်လိုက်ရပေမဲ့ မစားလိုက်ရဘူး။—၂ဘု ၆:၂၄–၇:၂၀။
ဘုရားရေးရာ ရတနာ
it-2 ၁၉၅ ပိုဒ်. ၇
မီးခွက်
ဒါဝိဒ် မျိုးဆက်က ဘုရင်များ။ ယေဟောဝါဘုရားက ဘုရင်ဒါဝိဒ်ကို အစ္စရေးဘုရင်အဖြစ် နန်းတင်တယ်။ ဒါဝိဒ်ဟာ ဘုရားရဲ့ လမ်းညွှန်မှုအောက်မှု နိုင်ငံကို ပညာရှိရှိ ဦးဆောင် လမ်းညွှန်တယ်။ ဒါကြောင့် ဒါဝိဒ်ကို “အစ္စရေးပြည်ရဲ့ မီးခွက်” လို့ ခေါ်တယ်။ (၂ရှ ၂၁:၁၇) ယေဟောဝါက ဒါဝိဒ်နဲ့ နိုင်ငံတော် ပဋိညာဉ်ဖွဲ့ချိန်မှာ ‘မင်းရဲ့ရာဇပလ္လင် ထာဝစဉ် တည်မြဲလိမ့်မယ်’ လို့ ကတိပေးတယ်။ (၂ရှ ၇:၁၁-၁၆) ဒါကြောင့် သားတော် ရှောလမုန်ကတစ်ဆင့် ဒါဝိဒ်မျိုးဆက်ကနေ ဆင်းသက်လာတဲ့ ဘုရင်တွေဟာ အစ္စရေးပြည်ရဲ့ “မီးခွက်” ဖြစ်တယ်။—၁ဘု ၁၁:၃၆။ ၁၅:၄။ ၂ဘု ၈:၁၉။ ၂ရာ ၂၁:၇။
နိုဝင်ဘာ ၂၁-၂၇
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၉–၁၀
“ရဲစွမ်းသတ္တိရှိရှိ၊ ဆုံးဖြတ်ချက် အခိုင်အမာနဲ့ ထက်ထက်သန်သန် လုပ်ဆောင်ခဲ့”
ယေဟု စစ်မှန်တဲ့ဝတ်ပြုရေးကို ကာကွယ်သူ
အစ္စရေးနိုင်ငံရဲ့အခြေအနေ အတော်ဆိုးနေတဲ့ အချိန်မှာ ယေဟု တာဝန်တစ်ခု ရခဲ့တယ်။ နိုင်ငံက လက်ရှိအုပ်စိုးနေတဲ့ ဘုရင်ယောရံရဲ့ မယ်တော်၊ သေဆုံးသွားပြီ ဖြစ်တဲ့ ဘုရင်အာဟပ်ရဲ့ မိဖုရားဆိုး ယေဇဗေလရဲ့ လွှမ်းမိုးချုပ်ကိုင်မှုအောက် ရောက်နေတယ်။ မိဖုရားဆိုးက ယေဟောဝါကို ဝတ်ပြုမယ့်အစား ဗာလကို ဝတ်ပြုဖို့ လူတွေကို ဖိအားပေးခဲ့တယ်၊ ဘုရားသခင့် ပရောဖက်တွေကို သတ်ပြီး လူတွေကို လိင်အကျင့်ပျက်ပြားဖို့နဲ့ “ပြုစားသော အမှုများ” ကို လိုက်စားစေခြင်းအားဖြင့် ယိုယွင်းဖောက်ပြန်အောင် လုပ်ခဲ့တယ်။ (၄ ရာ. ၉:၂၂; ၃ ရာ. ၁၈:၄၊ ၁၃) ယေဟောဝါက ယောရံနဲ့ ယေဇဗေလအပါအဝင် အာဟပ်အမျိုးကို သုတ်သင်ပယ်ရှင်းဖို့ အမိန့်ထုတ်ဆင့်ခဲ့တယ်။ ဒီတာဝန်ကို ယေဟု ဦးဆောင်ပြီး လုပ်ရမှာ ဖြစ်တယ်။
ယေဟု စစ်မှန်တဲ့ဝတ်ပြုရေးကို ကာကွယ်သူ
သတင်းမေးတဲ့သူ နှစ်ယောက်ကို ဘာမှ ပြန်မပြောဘဲ ယေဟုက မြင်းရထားကိုယ်စီနဲ့ ထွက်လာတဲ့ ဘုရင်ယောရံနဲ့ သူ့ရဲ့မဟာမိတ် ယုဒဘုရင် အာခဇိကို သွားတွေ့တယ်။ ယောရံက “ယေဟု ငြိမ်သက်ခြင်းရှိသလော” လို့ မေးတဲ့အခါ ယေဟုက ‘သင့်အမိ ယေဇဗေလပြုသော လိင်အကျင့်ယိုယွင်းမှု၊ ပြုစားသောအမှုများသော ကာလအတွင်းတွင် အဘယ်သို့သော ငြိမ်သက်ခြင်း ရှိလိမ့်မည်နည်း’ လို့ ပြန်ဖြေတယ်။ သူ့ရဲ့အဖြေကို နားထောင်ပြီး အခြေအနေကို သဘောပေါက်သွားလို့ ယောရံက ချက်ချင်း လှည့်ပြီး ထွက်ပြေးတယ်။ ဒါပေမဲ့ ယေဟုက ခြေမြန်လက်မြန်ပဲ လေးကို တင်ပြီး ပစ်လိုက်တဲ့အခါ ယောရံရဲ့ နှလုံးကို ထိပြီး မြင်းရထားပေါ်မှာ သေဆုံးသွားတယ်။ အာခဇိ ထွက်ပြေးခဲ့ပေမဲ့ ယေဟုက အမီလိုက်ပြီး သူ့ကိုလည်း သတ်ပစ်ခဲ့တယ်။—၄ ရာ. ၉:၂၂-၂၄၊ ၂၇။
အာဟပ်မိသားစုမှာ သုတ်သင်ရမယ့် နောက်တစ်ယောက်ကတော့ မိဖုရားဆိုး ယေဇဗေလ ဖြစ်တယ်။ ယေဟုက သူ့ကို “ကျိန်အပ်သော မိန်းမ” လို့ သင့်တော်စွာပဲ ခေါ်ခဲ့တယ်။ ယေဟု မြင်းရထားနဲ့ ယေဇရေလမြို့ထဲ ဝင်တဲ့အခါ ယေဇဗေလက နန်းတော် ပြတင်းပေါက်ကနေ ငုံ့ကြည့်နေတာကို သူတွေ့လိုက်ရတယ်။ ယေဟုက အပိုတွေ ပြောမနေဘဲ ယေဇဗေလကို ပြတင်းပေါက်ကနေ ပစ်ချလိုက်ဖို့ နန်းတွင်းအရာရှိတွေကို အမိန့်ပေးလိုက်တယ်။ အဲဒီနောက် အစ္စရေးလူတွေကို ယိုယွင်းဖောက်ပြန်စေတဲ့ ဒီမိဖုရားဆိုးကို မြင်းတွေနဲ့ တက်နင်းလိုက်တယ်။ အဲဒီအပြင် ယေဟုက ဆိုးညစ်တဲ့ အာဟပ်အမျိုး မိသားစုဝင်တွေကိုလည်း သုတ်သင်ခဲ့တယ်။—၄ ရာ. ၉:၃၀-၃၄; ၁၀:၁-၁၄။
ယေဟု စစ်မှန်တဲ့ဝတ်ပြုရေးကို ကာကွယ်သူ
ယေဟုလက်မှာ သွေးအများကြီး စွန်းခဲ့တယ်ဆိုတာ အမှန်ပဲ။ ဒါပေမဲ့ သမ္မာကျမ်းစာမှာ သူ့ကို အစ္စရေးလူတွေကို ယေဇဗေလနဲ့ သူ့မိသားစုရဲ့ ဖိနှိပ်ချုပ်ချယ်မှု အောက်ကနေ လွတ်အောင် လုပ်ပေးခဲ့တဲ့ ရဲစွမ်းသတ္တိရှိသူအဖြစ် ဖော်ပြခဲ့တယ်။ ဘယ်အစ္စရေးခေါင်းဆောင်မဆို ဒီနေရာမှာ အောင်မြင်ဖို့ ရဲစွမ်းသတ္တိ၊ ခိုင်မာပြတ်သားမှုနဲ့ ဇွဲရှိရမှာ ဖြစ်တယ်။ “ဒီအလုပ်က ခက်ခဲတဲ့အပြင် မပြီးမချင်း၊ မဆုတ်မနစ် လုပ်ဆောင်ရမှာ ဖြစ်တယ်။ နူးညံ့ကြင်နာနေမယ်ဆိုရင် အစ္စရေးနိုင်ငံကနေ ဗာလဝတ်ပြုရေးကို ဖယ်ရှားတဲ့နေရာမှာ အောင်မြင်နိုင်မှာ မဟုတ်ဘူး” လို့ ကျမ်းစာ အဘိဓာန်တစ်အုပ်က ဖော်ပြတယ်။
ဒီခေတ်အခြေအနေတွေကို ခရစ်ယာန်တွေ ရင်ဆိုင်တဲ့အခါမှာလည်း ယေဟုလို အရည်အသွေးတွေ တင်ပြဖို့ လိုတယ်ဆိုတာ တွေ့နိုင်တယ်။ ဥပမာ၊ ယေဟောဝါ ပြစ်တင်ရှုတ်ချထားတဲ့ လုပ်ရပ်တစ်ခုခုကို လုပ်ဖို့ သွေးဆောင်ခံရတဲ့အခါ ဘယ်လို တုံ့ပြန်သင့်သလဲ။ တုံ့ဆိုင်းမနေဘဲ ရဲစွမ်းသတ္တိရှိရှိ၊ ပြတ်ပြတ်သားသား ငြင်းပယ်ရမှာ ဖြစ်တယ်။ ကျွန်ုပ်တို့ရဲ့ ဝတ်ပြုရေးနဲ့ပတ်သက်လာရင် ယေဟောဝါဘက်မှာ စိတ်အားကြီးရမှာ ဖြစ်တယ်။
ဘုရားရေးရာ ရတနာ
ယေဟု စစ်မှန်တဲ့ဝတ်ပြုရေးကို ကာကွယ်သူ
လွတ်လပ်တဲ့ အစ္စရေးနိုင်ငံက ယုဒနိုင်ငံနဲ့ မတူဖို့ သီးသန့်ဝတ်ပြုရေးပုံစံ တစ်မျိုး ရှိရမယ်လို့ ယေဟု ယူဆခဲ့ပုံရတယ်။ ဒါကြောင့် ယေဟုက အရင်အစ္စရေးဘုရင်တွေလိုပဲ အစ္စရေးလူတွေကို နွားသငယ်ဝတ်ပြုရေး လိုက်စားစေခြင်းအားဖြင့် ယုဒနိုင်ငံနဲ့ သီးခြားဖြစ်စေခဲ့တယ်။ ဒါပေမဲ့ ဒါက သူ့ကို ဘုရင်အဖြစ် ခန့်အပ်ခဲ့တဲ့ ယေဟောဝါကို မယုံကြည်ကြောင်း ဖော်ပြလိုက်တာပဲ။
ယေဟုက “ဖြောင့်မတ်သော အကျင့်ကိုကျင့်၍ ကောင်းမွန်စွာပြုခဲ့” တယ်လို့ ယေဟောဝါ သူ့ကို ချီးမွမ်းခဲ့တယ်။ ဒါပေမဲ့ ယေဟုက ‘အစ္စရေးအမျိုး၏ ဘုရားသခင် ယေဟောဝါ၏ တရားတော်လမ်းသို့ စိတ်နှလုံးအကြွင်းမဲ့ လိုက်ခြင်းငှာ သတိမပြု’ ခဲ့ဘူး။ (၄ ရာ. ၁၀:၃၀၊ ၃၁) အစောပိုင်းတုန်းက ယေဟု လုပ်ဆောင်ခဲ့ရာတွေကို ပြန်စဉ်းစားတဲ့အခါ သင် အံ့ဩပြီး စိတ်မကောင်း ဖြစ်နိုင်တယ်။ ဒါပေမဲ့ ဒါက ကျွန်ုပ်တို့အတွက် သင်ခန်းစာတစ်ခုပဲ။ ယေဟောဝါနဲ့ ကျွန်ုပ်တို့ရဲ့ဆက်ဆံရေးက ဘယ်တော့မှ မပြတ်တောက်နိုင်ဘူးလို့ မထင်ပါနဲ့။ နေ့စဉ် သမ္မာကျမ်းစာ လေ့လာခြင်း၊ ဆင်ခြင်သုံးသပ်ခြင်း၊ လှိုက်လှိုက်လှဲလှဲ ဆုတောင်းခြင်းအားဖြင့် ဘုရားသခင်အပေါ် ထားတဲ့ ကျွန်ုပ်တို့ရဲ့ တည်ကြည်မှုကို ခိုင်ခံ့အောင် လုပ်နေရမှာ ဖြစ်တယ်။ ဒါကြောင့် ယေဟောဝါရဲ့ တရားလမ်းအတိုင်း စိတ်နှလုံး အကြွင်းမဲ့ ဆက်လိုက်ဖို့ အတတ်နိုင်ဆုံး လုပ်ဆောင်ကြပါစို့။—၁ ကော. ၁၀:၁၂။
နိုဝင်ဘာ ၂၈–ဒီဇင်ဘာ ၄
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၁၁–၁၂
“ရည်မှန်းချက်ကြီး၊ ဆိုးညစ်တဲ့ အမျိုးသမီး ပြစ်ဒဏ်မှ မလွတ်ကင်း”
it-1 ၂၀၉
အာသလိ
မိခင် ယေဇဗေလလိုပဲ အာသလိလည်း ခင်ပွန်း ယဟောရံ အုပ်ချုပ်ချိန် ရှစ်နှစ်အတွင်း ယေဟောဝါ ရှေ့မှာ မကောင်းတာတွေ လုပ်ဖို့ တွန်းအားပေးတယ်။ (၁ဘု ၂၁:၂၅။ ၂ရာ ၂၁:၄-၆) မိခင် ယေဇဗေလလိုပဲ အပြစ်မဲ့သူတွေကို အာသလိ ကွပ်မျက်တယ်။ ဆိုးညစ်တဲ့ သားဖြစ်သူ အာခဇိ တစ်နှစ် အုပ်ချုပ်ပြီး သေဆုံးသွားတဲ့အခါ တော်ဝင်မျိုးဆက် အားလုံးကို သုတ်သင်လိုက်တယ်။ လူမမယ် ယောရှလေးကတော့ လွတ်မြောက်သွားတယ်။ ယောရှရဲ့ အဒေါ်နဲ့ ခင်ပွန်း ပုရောဟိတ်မင်း ဝှက်ထားပေးလို့ ဖြစ်တယ်။ အဲဒီနောက် ကိုယ့်ကိုယ်ကိုယ် ဘုရင်မအဖြစ် အာသလိ နန်းတင်ပြီး ဘီစီ ၉၀၅ ကနေ ၈၉၉ လောက်အထိ ခြောက်နှစ် အုပ်ချုပ်ခဲ့တယ်။ (၂ရာ ၂၂:၁၁၊ ၁၂) အာသလိရဲ့ သားတွေက ဘုရားသခင့် အိမ်တော်ထဲက သန့်ရှင်းတဲ့ ပစ္စည်းအားလုံးကို သိမ်းယူပြီး ဗာလကို ပူဇော်ကြတယ်။—၂ရာ ၂၄:၇။
it-1 ၂၀၉
အာသလိ
ယောရှ အသက် ခုနစ်နှစ်မှာ ဘုရားကို ကြောက်ရွံ့တဲ့ ပုရောဟိတ်မင်း ယောယဒက တိတ်တဆိတ် ခေါ်ထုတ်လာပြီး မင်းမြှောက်လိုက်တယ်။ အုတ်အုတ်ကျက်ကျက် ဖြစ်နေတဲ့အသံကို အာသလိ ကြားတဲ့အခါ ဗိမာန်တော်ကို ရောက်လာတယ်။ အဖြစ်အပျက်ကို တွေ့ပြီး “ဒါ ပုန်ကန်မှုပဲ။ ပုန်ကန်နေကြတာပဲ” လို့ အော်တော့တယ်။ ပုရောဟိတ်မင်း ယောယဒက ဗိမာန်တော်ကနေ အာသလိကို ခေါ်ထုတ်ပြီး နန်းတော် မြင်းတံခါးဝမှာ ကွပ်မျက်ဖို့ အမိန့်ပေးလိုက်တယ်။ အာသလိဟာ အာဟပ်အဆွေအမျိုးတွေထဲမှာ နောက်ဆုံးတစ်ယောက် ဖြစ်ပုံရတယ်။ (၂ဘု ၁၁:၁-၂၀။ ၂ရာ ၂၂:၁–၂၃:၂၁) “အာဟပ်အမျိုးနဲ့ပတ်သက်ပြီး ယေဟောဝါဘုရား ပြောခဲ့တဲ့ ယေဟောဝါရဲ့စကား တစ်ခွန်းမကျန် ပြည့်စုံလာတယ်။”—၂ဘု ၁၀:၁၀၊ ၁၁။ ၁ဘု ၂၁:၂၀-၂၄။
ဘုရားရေးရာ ရတနာ
it-1 ၁၂၆၅-၁၂၆၆
ယောရှ
ပုရောဟိတ်မင်း ယောယဒက ငယ်ရွယ်တဲ့ ဘုရင် ယောရှကို ဖခင်တစ်ယောက်လို သွန်သင်လမ်းပြပေးနေချိန် တစ်လျှောက်လုံး ယောရှ မှန်ရာကို ဆက်လုပ်တယ်။ အသက် ၂၁ နှစ်မှာ အိမ်ထောင်ပြုတယ်။ မိဖုရား နှစ်ယောက် ရှိတယ်။ တစ်ယောက်က ယုဒ္ဒန်။ ယောရှ သားသမီးတွေ ရလာတယ်။ ဒီလိုနဲ့ မေရှိယ ဆင်းသက်လာမယ့် ဒါဝိဒ်ရဲ့ မျိုးရိုး လုံးလုံး ပြတ်တောက်လုနီးပါး ဖြစ်ရာကနေ အခိုင်အမာ ပြန်တည်ရှိလာတယ်။—၂ဘု ၁၂:၁-၃။ ၂ရာ ၂၄:၁-၃။ ၂၅:၁။
ဒီဇင်ဘာ ၅-၁၁
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၁၃–၁၅
“စိတ်နှလုံး အကြွင်းမဲ့ ကြိုးစားလုပ်ဆောင်လို့ ကောင်းချီး အလျှံပယ် ခံစားရ”
သင်သည် ခရစ်တော်နောက် လုံးလုံးလိုက်နေသလော
၁၁ ဘုရားသခင့် လုပ်ငန်းတော်တွင် ဇွဲထက်သန်မှုရှိခြင်း၏ အရေးကြီးပုံကို ဖော်ပြရန် အစ္စရေးဘုရင် ယဟောရှ၏ အသက်တာတွင် ဖြစ်ပျက်ခဲ့သည့် အဖြစ်အပျက်ကို သတိပြုမှတ်သားပါ။ ရှုရိလက်အောက်သို့ အစ္စရေးလူမျိုး ကျရောက်တော့မည့်ဆဲဆဲတွင် ယဟောရှသည် ဧလိရှဲထံ လာ၍ ငိုကြွေးခဲ့သည်။ ပရောဖက်က ဘုရင်အား ပြတင်းပေါက်မှနေ၍ ရှုရိလူတို့ရှိရာဘက်သို့ မြားတစ်စင်း ပစ်ရန် ညွှန်ကြားခဲ့ခြင်းဖြင့် ယေဟောဝါ၏ လက်တော်ဖြင့် ထိုလူမျိုးကို အောင်မြင်မည်ဟု အရိပ်အမြွက် ဖော်ပြခဲ့သည်။ ယင်းသည် ဘုရင်အတွက် အမှန်ပင် အားရှိစရာ ဖြစ်သင့်သည်။ ဧလိရှဲသည် ယဟောရှအား မြားများကို ယူကာ မြေကြီးကို ရိုက်ရန် ပြောခဲ့သည်။ ယဟောရှသည် မြေကြီးကို သုံးကြိမ်သာ ရိုက်ခဲ့သည်။ ယင်းကြောင့် ဧလိရှဲ အမျက်ထွက်ခဲ့၏၊ အကြောင်းမှာ မြေကြီးကို ငါးကြိမ်၊ ခြောက်ကြိမ် ရိုက်မည်ဆိုလျှင် “ရှုရိလူတို့ကို အကုန်အစင် လုပ်ကြံရလိမ့်မည်” ဖြစ်သည်။ ယခုတွင်မူ ယဟောရှသည် သုံးကြိမ်သာ လုပ်ကြံနိုင်မည် ဖြစ်သည်။ ယဟောရှသည် ဇွဲထက်သန်မှု မရှိဘဲ လုပ်ဆောင်ခဲ့သောကြောင့် အကန့်အသတ်ဖြင့်သာ အောင်မြင်မှု ရခဲ့သည်။ (၄ ရာ. ၁၃:၁၄-၁၉) ထိုမှတ်တမ်းမှ အဘယ်အရာ သင်ယူနိုင်သနည်း။ ကျွန်ုပ်တို့ စိတ်နှလုံး အကြွင်းမဲ့ ဇွဲထက်သန်စွာ လုပ်ဆောင်မှသာ ယေဟောဝါ ကြွယ်၀စွာ ကောင်းချီးပေးပါလိမ့်မည်။
“မိမိအား စိတ်ထက်သန်စွာ ရှာဖွေသူကို ဆုချသောအရှင်”
ယေဟောဝါဘုရားက ဘယ်သူတွေကို ဆုချသလဲ။ “မိမိ [ဘုရားသခင်] အား စိတ်ထက်သန်စွာ ရှာဖွေသူ” တွေကို ဆုချတယ်လို့ ပေါလု ရေးသားခဲ့တယ်။ “ထက်သန်စွာရှာဖွေ” ဆိုတဲ့ ဂရိစကားလုံးဟာ ဘုရားသခင်အကြောင်း ကြိုးစားသင်ယူရုံလောက်ပဲ မဟုတ်ပါဘူး၊ ဘုရားသခင်ကို ဝတ်ပြုကိုးကွယ်ဖို့ ကြိုးစားအားထုတ်တာကို ဆိုလိုနေတာ ဖြစ်တယ်လို့ ကျမ်းစာ ဘာသာပြန်သူတွေအတွက် အကိုးအကား စာအုပ်မှာ ဖော်ပြထားတယ်။ အကိုးအကားစာအုပ် နောက်တစ်အုပ်မှာ “ရှာဖွေ” ဆိုတဲ့ ဂရိကြိယာက အားစိုက်ပြီး အပတ်တကုတ် ကြိုးစားတာကို ပြောတာ ဖြစ်တယ်လို့ ရှင်းပြထားတယ်။ ယေဟောဝါဘုရားက စိတ်နှလုံး အကြွင်းမဲ့နဲ့ မိမိကိုချစ်ပြီး ဇွဲရှိရှိ ဝတ်ပြုနေတဲ့ ယုံကြည်ခြင်းရှိသူတွေကို ဆုချပါတယ်။—မဿဲ ၂၂:၃၇။
ယေဟောဝါဘုရားက မိမိကို ယုံယုံကြည်ကြည်နဲ့ ဝတ်ပြုသူတွေကို ဘယ်လို ဆုချပါသလဲ။ သူတို့ကို ဧဒင်ဥယျာဉ်လိုမျိုး သာယာလှပတဲ့ ကမ္ဘာမြေပေါ် ထာဝစဉ်အသက်ရှင်နိုင်မယ့် ဆုကြီးကို အနာဂတ်မှာ ပေးမယ်လို့ ကတိပေးထားပါတယ်။ အဲဒီအနှိုင်းမဲ့ဆုဟာ ကိုယ်တော်ရဲ့ နက်ရှိုင်းတဲ့မေတ္တာနဲ့ ရက်ရောမှုကို ဖော်ပြနေပါတယ်။ (ဗျာဒိတ် ၂၁:၃၊ ၄) အခုချိန်မှာတောင် ယေဟောဝါဘုရားကို စိတ်ထက်သန်စွာ ရှာဖွေတဲ့သူတွေဟာ ကောင်းချီးများစွာကို ခံစားနေရကြပါတယ်။ သူတို့ဟာ ဘုရားသခင့် သန့်ရှင်းသော စွမ်းအားတော်ရဲ့ အကူအညီကို ရယူပြီး သမ္မာကျမ်းစာမှာ ပါတဲ့ ဉာဏ်ပညာကို ကျင့်သုံးနေကြတယ်။ အဲဒီအတွက် ပျော်ရွှင်ပြီး ကျေနပ်အားရစရာကောင်းတဲ့ ဘဝကို ပိုင်ဆိုင်နေကြတယ်။—ဆာလံ ၁၄၄:၁၅; မဿဲ ၅:၃။
ဘုရားရေးရာ ရတနာ
ဓမ္မရာဇဝင်စတုတ္ထစောင်မှ ပေါ်လွင်ချက်များ
၁၃:၂၀၊ ၂၁—ယင်းအံ့ဖွယ်အမှုက ဘာသာရေး အထိမ်းအမှတ်များကို ကြည်ညိုလေးမြတ်ဖို့ အားပေးပါသလော။ အားမပေးပါ။ ဧလိရှဲ၏ အရိုးကို ကြည်ညိုလေးမြတ်ခဲ့သည်ဟု သမ္မာကျမ်းစာက ဖော်ပြမထားပါ။ ဧလိရှဲ အသက်ရှင်စဉ်က ပြုလုပ်ခဲ့သော အံ့ဖွယ်အမှုများကဲ့သို့ပင် ယင်းသည်လည်း ဘုရားသခင်၏ တန်ခိုးတော်ဖြင့် ဖြစ်ပျက်လာ၏။
ဒီဇင်ဘာ ၁၂-၁၈
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၁၆–၁၇
“ယေဟောဝါရဲ့ စိတ်ရှည်မှု အကန့်အသတ်ရှိ”
it-2 ၉၀၈ ပိုဒ်. ၅
ရှာလမနေဇာ
အစ္စရေးတွေကို ကြီးစိုးခဲ့။ အစ္စရေးဘုရင် ဟောရှာ (ဘီစီ ၇၅၈ ခန့်-၇၄၀) အုပ်ချုပ်ချိန်မှာ ရှာလမနေဇာ ၅ က ပါလက်စတိုင်းကို တိုက်ခိုက်တဲ့အတွက် ဟောရှာက သူ့ဆီမှာ လက်အောက်ခံပြီး ဆက်ကြေးပေးရတယ်။ (၂ဘု ၁၇:၁-၃) ဒါပေမဲ့ နောက်ပိုင်းမှာ ဟောရှာက ဆက်ကြေး မပေးဘဲ အီဂျစ်ဘုရင် သွာနဲ့ လျှို့ဝှက်ပူးပေါင်းတယ်။ ဒါကြောင့် ရှာလမနေဇာက ဟောရှာကို အကျဉ်းချထားလိုက်တယ်။ နောက်ပိုင်း၊ ရှမာရိမြို့ကို သုံးနှစ် ဝိုင်းရံထားတယ်။ အခိုင်အမာ တည်ဆောက်ထားတဲ့ မြို့တော် ကျသွားချိန်မှာ အစ္စရေးတွေ ပြည်နှင်ခံရတယ်။—၂ဘု ၁၇:၄-၆။ ၁၈:၉-၁၂။ ဟော ၇:၁၁။ ယဇ ၂၃:၄-၁၀ တို့နဲ့ နှိုင်းယှဉ်ပါ။
it-1 ၄၁၄-၄၁၅
သုံ့ပန်း
မြောက်ပိုင်း အစ္စရေး ဆယ်နွယ်နိုင်ငံရော တောင်ပိုင်း ယုဒ နှစ်နွယ်နိုင်ငံပါ သုံ့ပန်းဘဝ ရောက်သွားရတဲ့ အကြောင်းရင်း အတူတူပဲ။ ယေဟောဝါရဲ့ စစ်မှန်တဲ့ ဝတ်ပြုရေးကို စွန့်ပြီး မှားယွင်းတဲ့ ဘုရားတွေကို ဝတ်ပြုသွားကြလို့ပဲ။ (တရ ၂၈:၁၅၊ ၆၂-၆၈။ ၂ဘု ၁၇:၇-၁၈။ ၂၁:၁၀-၁၅) ပရောဖက်တွေကို ယေဟောဝါ မပြတ် စေလွှတ်ပြီး သတိပေးပေမဲ့ အရာမရောက်ဘူး။ (၂ဘု ၁၇:၁၃) အစ္စရေး ဆယ်နွယ်နိုင်ငံက ဘုရင်တစ်ပါးမှ ဦးဆုံးဘုရင် ယေရောဗောင် အစပြုခဲ့တဲ့ မှားယွင်းတဲ့ ဝတ်ပြုရေးကို အပြီးအပိုင် မဖယ်ရှားနိုင်ကြဘူး။ ညီမဖြစ်သူ တောင်ဘက် ယုဒနိုင်ငံလည်း ယေဟောဝါရဲ့ တိုက်ရိုက် သတိပေးချက်တွေကို နားမထောင်ဘူး။ သုံ့ပန်းဘဝ ရောက်သွားတဲ့ အစ္စရေးနိုင်ငံဆီကနေ သင်ခန်းစာ မယူဘူး။ (ယေ ၃:၆-၁၀) နှစ်နိုင်ငံစလုံးက ပြည်သားတွေ ပြည်နှင်ခံရတာ တစ်ကြိမ်မကဘူး။
ဘုရားရေးရာ ရတနာ
it-2 ၈၄၇
ရှမာရိလူ
ကျမ်းစာထဲမှာ “ရှမာရိလူတွေ” ဆိုတဲ့ အသုံးအနှုန်းကို ဘီစီ ၇၄၀၊ ဆယ်နွယ်နိုင်ငံ ရှမာရိမြို့ကို သိမ်းပိုက်အောင်မြင်ပြီးနောက်ပိုင်း ပထမဆုံး တွေ့ရတယ်။ အဲဒီလို မသိမ်းပိုက်ခင် မြောက်ပိုင်းနိုင်ငံမှာ နေထိုင်ကြသူတွေကို ခေါ်တာ။ နောက်ပိုင်း၊ အဆီးရီးယား အင်ပါယာ တခြားဒေသတွေကနေ ခေါ်လာတဲ့ တိုင်းတစ်ပါးသားတွေနဲ့ ခွဲခြားဖို့ ဖြစ်တယ်။ (၂ဘု ၁၇:၂၉) အဆီးရီးယားတွေဟာ အစ္စရေးအားလုံးကို မဖယ်ရှားပုံ ရတယ်။ ၂ ရာဇဝင်ချုပ် ၃၄:၆-၉ မှတ်တမ်းအရ (၂ဘု ၂၃:၁၉၊ ၂၀ နဲ့ နှိုင်းယှဉ်ပါ) ဘုရင်ယောရှိ အုပ်ချုပ်ချိန်အတွင်း အဲဒီမှာ နေထိုင်တဲ့ အစ္စရေးတွေ ရှိနေသေးတယ်။ နောက်ပိုင်း၊ “ရှမာရိလူတွေ” ဆိုတာ ရှမာရိပြည်မှာ ကျန်ခဲ့သူတွေ၊ အဆီးရီးယားတွေ ခေါ်ဆောင်လာခဲ့သူတွေကို ခေါ်တဲ့ အသုံးအနှုန်း ဖြစ်လာတယ်။ သူတို့ အိမ်ထောင်ပြုပြီး မွေးလာကြသူတွေလည်း ပါမှာ သေချာတယ်။ နောက်ပိုင်းကာလတွေမှာတော့ လူမျိုး၊ နိုင်ငံသားကို မဆိုလိုတော့ဘဲ သာဘာတရားတစ်ခုအနေနဲ့ ခေါ်ဝေါ်လာကြတယ်။ “ရှမာရိလူမျိုး” ဆိုတာ ရှေးခေတ် ရှေခင်မြို့နဲ့ ရှမာရိမြို့အနီးတစ်ဝိုက်မှာ ထွန်းကားခဲ့တဲ့ ဘာသာရေးဂိုဏ်း အဖွဲ့ဝင်တွေ၊ ဂျူးဘာသာနဲ့ မတူတဲ့ အယူအဆတချို့ စွဲကိုင်ထားသူတွေကို ရည်ညွှန်းတယ်။—ယဟ ၄:၉။
ဒီဇင်ဘာ ၁၉-၂၅
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၁၈–၁၉
“ကျွန်တော်တို့ အားနည်းသွားအောင် ဆန့်ကျင်သူတွေ ကြိုးစားကြ”
ဓမ္မရာဇဝင်စတုတ္ထစောင်မှ ပေါ်လွင်ချက်များ
၁၈:၁၉-၂၁၊ ၂၅—ဟေဇကိသည် အီဂျစ်ပြည်နှင့် မဟာမိတ်ဖွဲ့ခဲ့သလော။ မဖွဲ့ခဲ့ပါ။ ရာဗရှာခ၏ စွပ်စွဲချက်သည် မှား၏၊ ‘ယေဟောဝါ၏အခွင့်’ နှင့်လာသည်ဟု သူပြောဆိုသကဲ့သို့ပင် ဖြစ်သည်။ သစ္စာရှိဘုရင်ဟေဇကိသည် ယေဟောဝါကိုသာ အကြွင်းမဲ့ ကိုးစားသည်။
‘မကြောက်နှင့်။ ငါ မစမည်’
ရာဗရှာခသည် ဘုရားသခင်၏လူများ သံသယဝင်စေရန် ကောက်ကျစ်စဉ်းလဲသည့် ကျိုးကြောင်းဆင်ခြင်မှုကို အသုံးပြုခဲ့သည်။ သူ ဤသို့ပြောသည်– ‘ယေဟောဝါ၏ မြင့်ရာဌာနနှင့် ပူဇော်ရာနေရာများကို ဟေဇကိမင်း ဖယ်ရှားခဲ့ပြီ မဟုတ်လော။ ဤပြည်ကို ချီတက်ဖျက်ဆီးလော့ဟု ကျွန်ုပ်အား ယေဟောဝါ မိန့်ဆိုတော်မူ၏။’ (၄ ရာ. ၁၈:၂၂၊ ၂၅၊ သမ) ဤသို့ဖြင့် ရာဗရှာခက ယေဟောဝါသည် မိမိ၏လူမျိုးကို မနှစ်မြို့သောကြောင့် သူတို့ဘက်မှ တိုက်မည်မဟုတ်ကြောင်း ပြောခဲ့သည်။ သို့သော် ယင်းသည် မမှန်ကန်ပါ။ ယေဟောဝါသည် ဟေဇကိနှင့် စစ်မှန်သော ဝတ်ပြုရေးသို့ ပြန်လှည့်လာသည့် ဂျူးများကို နှစ်သက်တော်မူသည်။—၄ ရာ. ၁၈:၃-၇။
သိုးထိန်း ခုနစ်ယောက်နဲ့ မင်းညီမင်းသား ရှစ်ယောက်က ယနေ့ ကျွန်ုပ်တို့အတွက် ဘာအဓိပ္ပာယ်ရှိသလဲ
၁၄ အဆီးရီးယား ဘုရင်နဲ့ သူ့ရဲ့စစ်တပ်ဟာ ဂျေရုဆလင် အနောက်တောင်ဘက်မှာရှိတဲ့ လာခိရှမြို့မှာ တပ်ချခဲ့တယ်။ အဲဒီကနေ တမန်သုံးယောက်ကို ဂျေရုဆလင်ကို စေလွှတ်ပြီး လက်နက်ချ အညံ့ခံဖို့ အမိန့်ပေးခဲ့တယ်။ အဓိက ပြောရေးဆိုခွင့်ရှိတဲ့ ရာဗာရှာခဟာ ဂျေရုဆလင်မြို့သားတွေကို ဟေဗြဲစကားနဲ့ ပြောခဲ့တယ်။ အရင်ဆုံး သူက ဂျေရုဆလင်ကလူတွေ ဟေဇကိ ပြောတာကို နားမထောင်ဘဲ အဆီးရီးယားတွေဆီမှာ လက်အောက်ခံဖို့ ပြောခဲ့တယ်။ အဲဒီနောက် သူတို့ကို ဇိမ်ကျကျ နေရမယ့်ပြည်ကို ပို့ပေးမယ်လို့ လိမ်ညာပြီး ကတိပေးခဲ့တယ်။ (၄ ဓမ္မရာဇဝင် ၁၈:၃၁၊ ၃၂ ကိုဖတ်ပါ။) တခြားလူမျိုးတွေရဲ့ ဘုရားတွေက သူတို့ကို ဝတ်ပြုတဲ့လူတွေကို မကာကွယ်နိုင်ဘူး၊ ယေဟောဝါလည်း ဂျူးတွေကို ကာကွယ်နိုင်မှာ မဟုတ်ဘူးလို့ ရာဗာရှာခက ပြောတယ်။ လူတွေဟာ ပညာရှိရှိပဲ အဲဒီအလိမ်အညာစကားနဲ့ စွပ်စွဲချက်တွေကို လျစ်လျူရှုခဲ့ကြတယ်။ ယနေ့အချိန်မှာလည်း ယေဟောဝါရဲ့ကျေးကျွန်တွေဟာ သူတို့ရဲ့စံနမူနာကို လိုက်လျှောက်ကြတယ်။—၄ ဓမ္မရာဇဝင် ၁၈:၃၅၊ ၃၆ ကိုဖတ်ပါ။
yb74 ၁၇၇ ပိုဒ်. ၁
အပိုင်း ၂—ဂျာမနီ
SS စစ်သားတွေဟာ ယုံကြည်ချက်ကို စွန့်လွှတ်တယ်ဆိုတဲ့ ကြေညာချက်မှာ လူတွေ လက်မှတ်ထိုးဖို့ အညစ်ပတ်ဆုံး လှည့်ကွက်တွေ သုံးလေ့ ရှိတယ်။ ဒါပေမဲ့ တကယ်လည်း လက်မှတ်ထိုးပြီးရော အရင်ကထက် ပိုဒုက္ခပေးတတ်ကြတယ်။ ကားလ် ကတ်စ် ဒီလို ပြောတယ်– “ချွေးတပ်စခန်းတွေမှာ ယေဟောဝါသက်သေတွေဟာ တခြားသူတွေထက် ပိုဉာဏ်ဆင်ခံရတယ်။ ဒီလိုနည်းနဲ့ ကြေညာချက်မှာ လက်မှတ်ထိုးအောင် သူတို့ကို သွေးဆောင်နိုင်မယ်လို့ စစ်သားတွေ ယူဆနေကြတယ်။ ကျွန်တော်တို့ကို အကြိမ်ကြိမ် သွေးဆောင်ကြတယ်။ လက်မှတ်ထိုးတဲ့သူ တချို့ရှိပေမဲ့ အများစုက လွတ်ဖို့ တစ်နှစ်ကျော်လောက် စောင့်ကြရတာ။ အဲဒီအတောအတွင်း SS စစ်သားတွေက သူတို့ကို အယောင်ဆောင်တွေ၊ သူရဲဘောကြောင်သူတွေလို့ မကြာခဏ လူသိရှင်ကြား ကဲ့ရဲ့ရှုတ်ချကြပြီး စခန်းကနေ ထွက်ခွာခွင့် မပြုခင် ညီအစ်ကိုတွေရှေ့ ‘ဂုဏ်ပြုလမ်းလျှောက်ခြင်း’ ဆိုတဲ့ ပုံစံမျိုး အတင်းအကျပ် လျှောက်ခိုင်းကြတယ်။”
ဘုရားရေးရာ ရတနာ
it-1 ၁၅၅ ပိုဒ်. ၄
ရှေးဟောင်းသုတေသနပညာ
ဥပမာ၊ အဆီးရီးယားဘုရင် သနာခရိပ်ကို သားတော် အာဒရာမေလက်နဲ့ ရှရေဇာက လုပ်ကြံပြီး သားတော် ဧသရဟဒုန်က ထီးနန်းဆက်ခံတယ်လို့ ကျမ်းစာမှာ မှတ်တမ်းတင်ထားတယ်။ (၂ဘု ၁၉:၃၆၊ ၃၇) ဒါပေမဲ့ ဗာဗုလုန်ရဲ့ သမိုင်းမှာတော့ တေဗက်လ ၂၀ ရက်နေ့မှာ သနာခရိပ်ကို သူ့သား ပုန်ကန်ပြီး လုပ်ကြံတယ်လို့ ဖော်ပြထားတယ်။ ဘီစီ သုံးရာစုက ဗာဗုလုန် ပုရောဟိတ် ဘာရာဆက်စ်ရော ဘီစီ ခြောက်ရာစုက ဗာဗုလုန်ဘုရင် နဗိုနိုက်ဒက်စ်ကပါ သနာခရိပ်ကို သားတော်တစ်ပါးကပဲ လုပ်ကြံတယ်လို့ ဖော်ပြကြတယ်။ ဒါပေမဲ့ မကြာသေးခင်က ရှာဖွေတွေ့ရှိတဲ့ သနာခရိပ်နေရာ ဆက်ခံတဲ့ ဧသရဟဒုန်ရဲ့ ထုလုံးရှည် ကျောက်စာ အပိုင်းအစမှာ သူ့ရဲ့နောင်တော်တွေ (အများကိန်း) က ခမည်းတော်ကို ပုန်ကန်၊ လုပ်ကြံပြီး ထွက်ပြေးသွားကြောင်း ရှင်းရှင်းလင်းလင်း ဖော်ပြထားတယ်။ ဒါနဲ့ပတ်သက်ပြီး ဖိလစ် ဘိုင်ဘာဖဲက်က သူ့ရဲ့ စာအုပ် (Universal Jewish History, 1948, Vol. I, p. 27) မှာ ဒီလို ဖော်ပြတယ်– “နဗိုနိုက်ဒက်စ်နဲ့ ဘာရာဆက်စ်ရဲ့ ဗာဗုလုန် ရာဇဝင်က မှားနေပြီး ကျမ်းစာမှတ်တမ်းပဲ မှန်ကန်တယ်။ ဒါကို ဧသရဟဒုန်ရဲ့ ကျောက်စာ အသေးစိတ်အချက်က အတည်ပြုပေးတယ်။ ဗာဗုလုန်-အဆီးရီးယား သမိုင်းဖြစ်ရပ်နဲ့ပတ်သက်ပြီး ဗာဗုလုန်တွေကိုယ်တိုင်ရဲ့ မှတ်တမ်းထက် ကျမ်းစာမှတ်တမ်း ပိုတိကျကြောင်း သက်သေထူတယ်။ ကျမ်းစာနဲ့ မညီတဲ့ ခေတ်ပြိုင် မှတ်တမ်းတွေကို သေသေချာချာ ဆန်းစစ်ဖို့ အရေးကြီးကြောင်း ဖော်ပြပါတယ်။
ဒီဇင်ဘာ ၂၆–ဇန်နဝါရီ ၁
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၂၀–၂၁
“ဆုတောင်းခြင်းက ယေဟောဝါ ကြားဝင်လုပ်ဆောင်ဖို့ လှုံ့ဆော်ပေး”
ဘုရင်တစ်ပါး၏ ယုံကြည်ခြင်း ဆုချခံရ
၂၃ ယုဒပြည်ကို သနာခရိပ် ဦးဆုံးလာတိုက်သည့် အချိန်လောက်တွင် ဟေဇကိသည် အသည်းအသန် နာမကျန်း ဖြစ်နေသည်။ ဟေရှာယက သူသည် သေတော့မည်ဟု ပြော၏။ (ဟေရှာယ ၃၈:၁) အသက် ၃၉ နှစ်အရွယ် ဘုရင်သည် ဝမ်းနည်းပက်လက် ဖြစ်သွားသည်။ သူ၏ စိုးရိမ်ပူပန်မှုသည် သူ၏ ကျန်းမာရေးအတွက်သာ မဟုတ်၊ ပြည်သားများ၏ အနာဂတ်ရေးအတွက်လည်း ပါသည်။ ယေရုရှလင်နှင့် ယုဒသည် အာရှုရိ၏ ကျူးကျော်တိုက်ခိုက်ခံရမည့် အန္တရာယ်နှင့် ကြုံနေရသည်။ ဟေဇကိ သေဆုံးသွားခဲ့လျှင် မည်သူ ဦးဆောင်၍ တိုက်မည်နည်း။ ထိုအချိန်တွင် ဟေဇကိ၌ မင်းရိုက်ရာ ဆက်ခံမည့် သား မရှိပါ။ ဟေဇကိသည် မိမိအား ကရုဏာပြရန် ယေဟောဝါအား စိတ်ထက်သန်စွာ အသနားခံတောင်းပန်သည်။—ဟေရှာယ ၃၈:၂၊ ၃။
၁၆ နောက်ပိုင်း ဟေဇကိ သေလုမြောပါး ဖျားနာခဲ့တယ်။ ယေဟောဝါဘုရားရှေ့မှာ ဘယ်လို ကျင့်ကြံခဲ့ကြောင်း အမှတ်ရဖို့ အသနားခံခဲ့တယ်။ (၄ ဓမ္မရာဇဝင် ၂၀:၁-၃ ကိုဖတ်ပါ။) အံ့ဖွယ်ကုသမှုဖြစ်စေ၊ အသက်ပိုရှည်ဖို့ဖြစ်စေ ဘုရားသခင်ဆီက မမျှော်လင့်နိုင်တဲ့အချိန်မှာ ကျွန်တော်တို့ အသက်ရှင်နေကြကြောင်း ကျမ်းစာအရ သိရတယ်။ ဒါပေမဲ့ ဟေဇကိလိုပဲ “အကျွန်ုပ်သည် ရှေ့တော်၌ သစ္စာစောင့်လျက်၊ စုံလင်သော စိတ်နှလုံးနှင့် ကျင့်” ကြံပါတယ်လို့ ဆုတောင်းနိုင်တယ်။ ဖျားနာချိန်မှာ သင့်ကို ယေဟောဝါ ထောက်မပေးနိုင်စွမ်းရှိကြောင်း၊ ထောက်မပေးလိုကြောင်း ယုံကြည်ပါသလား။—ဆာ. ၄၁:၃။
န၀၁ ၇/၂၂ ၁၃ ပိုဒ်. ၄
ဆုတောင်းခြင်းကနေ အကူအညီ ဘယ်လို ရနိုင်သလဲ
ကျမ်းစာခေတ်တုန်းက ယုံကြည်ခြင်းရှိသူ အမျိုးသားတချို့ရဲ့ ဆုတောင်းချက်တွေဟာ တိုက်ရိုက် ဖြေကြားခံရ၊ အံ့ဖွယ်နည်းနဲ့တောင် ဖြေကြားခံရတယ်။ ဥပမာ၊ ဘုရင်ဟေဇကိ သေလုမြောပါး ဖျားနေချိန်မှာ ဘုရားသခင်ဆီ တိုးလျှိုးအသနားခံ ဆုတောင်းခဲ့တယ်။ ဘုရားသခင်က “မင်းရဲ့ဆုတောင်းသံကို ငါကြားတယ်။ မင်းရဲ့မျက်ရည်ကိုလည်း ငါမြင်တယ်။ အခု မင်းရဲ့ရောဂါပျောက်ကင်းအောင် လုပ်ပေးမယ်” လို့ တုံ့ပြန်တယ်။ (၂ ဘုရင်များ ၂၀:၁-၆) ဘုရားသခင်ကို ကြောက်ရွံ့တဲ့ တခြား အမျိုးသား အမျိုးသမီးတွေလည်း ဘုရားရဲ့ ကြားဝင်လုပ်ဆောင်မှုကို အလားတူ ကြုံတွေ့ခဲ့ကြရတယ်။—၁ ရှမွေလ ၁:၁-၂၀။ ဒံယေလ ၁၀:၂-၁၂။ တမန်တော် ၄:၂၄-၃၁။ ၁၀:၁-၇။
ဘုရားရေးရာ ရတနာ
it-2 ၂၄၀ ပိုဒ်. ၁
ရေချိန်/ချိန်သီး
အဆောက်အအုံတစ်ခုကို စနစ်တကျ ဆောက်လုပ်ရာမှာ ဒါမှမဟုတ် တိကျမှု ရှိမရှိ စမ်းသပ်ရာမှာ ရေချိန်ကို အသုံးပြုနိုင်တယ်။ ထင်ရာစိုင်းတဲ့ ဂျေရုဆလင်နဲ့ပတ်သက်ပြီး ယေဟောဝါက “ရှမာရိမြို့ကို တိုင်းတဲ့ ကြိုး၊ အာဟပ်အမျိုးကို တိုင်းတဲ့ ရေချိန်နဲ့ ဂျေရုဆလင်မြို့ကို ငါတိုင်းမယ်” လို့ ပြောတယ်။ ဘုရား တိုင်းတာလိုက်တဲ့အခါ ရှမာရိမြို့နဲ့ ဘုရင် အာဟပ်အမျိုးဟာ ကိုယ်ကျင့်တရား ယိုယွင်းပျက်စီးနေတဲ့အတွက် ဖျက်ဆီးခံရတယ်။ အလားတူပဲ၊ ဂျေရုဆလင်နဲ့ အုပ်ချုပ်သူတွေကို ဘုရား တရားစီရင်မယ်။ သူတို့ရဲ့ ဆိုးညစ်မှုကို ဖော်ထုတ်ပြီး မြို့ကို ပျက်စီးစေမယ်။ အဲဒီအတိုင်း ဘီစီ ၆၀၇ မှာ ဖြစ်ခဲ့တယ်။ (၂ဘု ၂၁:၁၀-၁၃။ ၁၀:၁၁) ဆိုးညစ်တဲ့ ကြွားဝါသူတွေ၊ ဂျေရုဆလင်မြို့ရဲ့ အုပ်စိုးရှင်တွေ ကြုံရမယ့် ဘေးဆိုးကို ဟေရှာယကတစ်ဆင့် ယေဟောဝါ ဒီလို ကြေညာတယ်– “ငါက တရားမျှတမှုကို တိုင်းကြိုးအဖြစ် သုံးမယ်။ ဖြောင့်မတ်မှုကို ရေချိန် အဖြစ် သုံးမယ်။” ဘယ်သူ ဘုရား ကျေးကျွန်ဖြစ်တယ်၊ မဖြစ်ဘူးဆိုတာကို စစ်မှန်တဲ့ တရားမျှတမှု၊ မှန်ကန်တဲ့ ဖြောင့်မတ်မှု စံနှုန်းက ဖော်ပြမှာ ဖြစ်ပြီး ကယ်တင်ခံရမလား၊ ဖျက်ဆီးခံရမလားဆိုတာ သိစေပါလိမ့်မယ်။—ရှာ ၂၈:၁၄-၁၉။