ဘုရားသခင့်နိုင်ငံတော်ကို ရှေ့ဦးထားခြင်း—နှုတ်ခမ်းအသီး ချီးမွမ်းခြင်းယဇ်ကို အမြဲပူဇော်ခြင်းအားဖြင့်

^၁ နိုင်ငံတော်ကို ရှေ့ဦးထားသူများသည် ယေဟောဝါအကြောင်း နှင့် ကိုယ်တော်၏နိုင်ငံတော်အကြောင်း ပြောဆိုနေရန် အမြဲသတိရှိကြသည်။ (ဆာ. ၁၄၅:၁၁-၁၃) နေ့စဉ်နေ့တိုင်း ကိုယ်တော်၏နာမတော်ကို ချီးမွမ်းရန်နှင့် သတင်းကောင်းကို ဟောပြောရန် အခွင့်ကောင်းများ ရရှိကြသည်။ (ဆာ. ၉၆:၂) “ကိုယ်တော်ရှင်အား အစဉ်အမြဲထောမနာပြု” မည်ဟု ကြွေးကြော်ခဲ့သော ဆာလံဆရာအတွက် ယေဟောဝါကို ချီးမွမ်းခြင်းသည် အားရနှစ်သက်ဖွယ်ရာ ဖြစ်ခဲ့သည်။ (ဆာ. ၄၄:၈၊ သတင်းကောင်း) ထပ်တူသဘောထားမျိုး ကျွန်ုပ်တို့တွင် ရှိမည်ဆိုလျှင် နိုင်ငံတော်ဓမ္မအမှုတွင် မှန်မှန်ပါဝင်ရန် စိတ်အားထက်သန်နေကြရမည်။

^၂ ဓမ္မအမှုတွင် အချိန်နာရီ မည်မျှပါဝင်ရမည်ဟု ယေဟောဝါ အတိအကျမတောင်းဆိုသော်လည်း ကိုယ်တော်ကို “အစဉ်” ချီးမွမ်းကြရန် တိုက်တွန်းတော်မူသည်။ (ဟေ. ၁၃:၁၅) မိမိအခြေအနေက ခွင့်ပြုမည်ဆိုလျှင် ပတ်စဉ်ပတ်တိုင်း ယေဟောဝါကို ချီးမွမ်းထောမနာပြုချိန် အနည်းအကျဉ်းရှိရန် ပန်းတိုင်ထားသင့်သည်။ ဤသို့ပြုလုပ်နေဆဲရှိသူတို့သည် ရံဖန်ရံခါ သို့မဟုတ် မှန်မှန်အရန်ရှေ့ဆောင်ရန် ကိုယ်ရေးကိုယ်တာကိစ္စများကို စီစဉ်နိုင်ပေမည်။ အရန်ရှေ့ဆောင်နေသူများဆိုလျှင် မှန်မှန်ရှေ့ဆောင်ရန် နာမည်စာရင်းသွင်းနိုင်ပေမည်။

^၃ ကိုယ်ရေးကိုယ်တာအခြေအနေများ မည်သို့ပင်ရှိစေကာမူ ကျွန်ုပ်တို့၏ချီးမွမ်းခြင်းယဇ်ကို တိုးများလာစေနိုင်မည်လော။ ဇွဲလုံ့လသည် တန်ဖိုးထားလေးမြတ်မှုမှ ပေါ်ထွက်လာခြင်းဖြစ်သည်။ ဘုရားသခင့်နှုတ်ကပါဌ်တော်ကို ကိုယ်ပိုင်လေ့လာမှုပြုလုပ်ခြင်းက တန်ဖိုးထားလေးမြတ်မှုကို ပျိုးထောင်ပေးသည်။ ထိုလေးမြတ်သောသဘောကို လက်တွေ့ကျသည့်နည်းများစွာဖြင့် တင်ပြရန် အသင်းတော်အစည်းအဝေးများက လှုံ့ဆော်ပေးသည်။ အခြားဇွဲလုံ့လရှိရှိ ချီးမွမ်းထောမနာပြုသူများနှင့် အကျွမ်းတဝင်ပေါင်းသင်းခြင်းက ‘ကောင်းသောအကျင့်ကိုကျင့်ရန် တိုက်တွန်း’ ပေးသည်။ (ဟေ. ၁၀:၂၄) အသင်းတော်မှတစ်ဆင့် ရရှိသောပြင်ဆင်ချက်များကို အပြည့်အဝအသုံးပြုခြင်းအားဖြင့် ချီးမွမ်းခြင်းယဇ်ကို တိုးပွားများပြားစေနိုင်ပါသည်။

^၄ ယေဟောဝါ၏လုပ်ငန်းတော်ကို ဆောင်ရွက်ရာတွင် ပရောဖက်မ အန္နသည် ပုံသက်သေကောင်းဖြစ်သည်။ အသက် ၈၄ နှစ်ရှိသော်လည်း သူမသည် “နေ့ညမပြတ် ဘုရားဝတ်ကိုပြု၍ ဗိမာန်တော်နှင့် မခွာဘဲနေ” သည်။ (လု. ၂:၃၇) အသင်းတော်၏ လုပ်ငန်းဆောင်တာများတွင် စိုးလ်အပြည့်ပါဝင်ခြင်းမှ သူမ အားရကျေနပ်မှုများစွာရရှိခဲ့သည်။ သူမ၏ သစ္စာရှိလုပ်ငန်းကို သမ္မာကျမ်းစာတွင် မှတ်တမ်းတင်ထားခြင်းက ယနေ့ ကျွန်ုပ်တို့အတွက် အားပေးတည်ဆောက်မှု ဖြစ်စေသည်။

^၅ “အားရှိသော ငါတို့သည် . . . အားနည်းသောသူတို့၏ အားနည်းခြင်းကို သည်းခံရကြမည်” ဟုပေါလုအားပေးထားသည်။ (ရော. ၁၅:၁) သင်၏ ကြင်နာမှုပါပါ အားပေးကူညီခြင်းမှ အကျိုးခံစားရမည့်သူများ သင့်အသင်းတော်တွင် ရှိကောင်းရှိပေမည်။ လုပ်ငန်းတော်တွင် သင်နှင့်အတူလိုက်ပါရန် ဖိတ်ခေါ်ဖို့သာ လိုနေပေမည်။ ကြေညာသူတစ်ဦးသည် သွားဖော်သွားဖက်၊ လုပ်ဖော်ကိုင်ဖက် လိုအပ်နေပေမည်။ အခြားသူတစ်ဦးမှာမူ ပြဿနာတစ်ခုခုကြောင့် စိတ်ဓာတ်ကျဆင်းနေပေမည်။ နိုင်ငံတော်လုပ်ငန်းတွင် ထိုသူသည် တစ်ဖန်ပြန်၍ ဇွဲရှိနိုင်ရန် လိုအပ်သည့် အားပေးတည်ဆောက်မှုကို အသင်ပေးနိုင်ပေမည်။ (၁ သက်. ၅:၁၄) သင်သည် “သန့်ရှင်းသူတို့ ဆင်းရဲသောအခါ ဝေငှပေးကမ်း” လိုစိတ်ရှိခြင်းက ယေဟောဝါ၏နာမတော်ကို တိုး၍ချီးမွမ်းလိုစိတ် ပြင်းပြကြောင်း ထင်ရှားစေသည်။—ရော. ၁၂:၁၃။

^၆ ကျွန်ုပ်တို့အတွက် ယေဟောဝါ စီရင်တော်မူနှင့်ပြီးသောအရာများနှင့် ပြုလုပ်တော်မူမည့်အရာများကို ရေတွက်၍ မကုန်နိုင်ပါ။ ဤကောင်းချီးများအတွက် ကိုယ်တော်အား ကျေးဇူးပြန်ဆပ်၍ မကုန်နိုင်ပါ။ ‘သက်ရှိအားလုံး ယေဟောဝါကို ချီးမွမ်း’ သင့်သည့်အကြောင်း များလှပါသည်တကား!—ဆာ. ၁၅၀:၆။