“ယေဟောဝါသည် ကျွန်တော့်ဆုတောင်းချက်များကို နားညောင်းတော်မူသည်!”

ကမ္ဘာတစ်ဝန်းရှိ ယေဟောဝါသက်သေများသည် ဘုရားသခင်၊ လူသားများအတွက် ကိုယ်တော်၏အံ့ချီးဖွယ်ရည်ရွယ်တော်မူချက်တို့နှင့်ပတ်သက်သည့် တိကျမှန်ကန်သောအသိပညာရဖို့ စိတ်ဝင်စားကြသောသူများနှင့် အိမ်တွင်းကျမ်းစာသင်အံမှု ငါးသန်းနီးပါးကျင်းပနေကြသည်။ ယေဟောဝါသက်သေ ကလေးသူငယ်များပင် ဤလုပ်ငန်းတွင် ပါဝင်နေကြသည်။ ဥပမာ ဂျိုအဲအမည်ရှိ လူငယ်လေးကို သုံးသပ်ကြည့်ပါ။ သူလေးသည် အသက်ကိုးနှစ်အရွယ်တွင် ယေဟောဝါထံ ဆက်ကပ်အပ်နှံမှုကို အထိမ်းအမှတ်ပြုကာ နှစ်ခြင်းခံခဲ့သည်။ တစ်နှစ်ကြာပြီးနောက် ဤတွေ့ ကြုံမှုကို သူတွေ့ ကြုံခဲ့ရသည်–

“အမှုဆောင်သွားရင်း ကဲန်ဒီအမည်ရှိ အမျိုးသမီးကို ကျွန်တော်တွေ့ခဲ့ပါသည်။ ကျွန်တော် သူမကို ‘ကြည့်ရှုလော့! ငါသည် ခပ်သိမ်းသောအရာတို့ကို အသစ်ဖန်ဆင်းသည်’ ဘရိုရှာကို ဝေငှလိုက်သည်။ သူမမှာ ရပြီးသားဖြစ်နေရာ သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည် စာအုပ်ကို ဝေငှလိုက်သည်။ ထိုစာအုပ်လည်း သူမတွင်ရှိနေပြန်ပါသည်။ သို့နှင့် ‘ဒီအမျိုးသမီးကို ကျမ်းစာသင်အံမှု ကမ်းလှမ်းမယ်’ ဟု တွေးလိုက်သည်။ သူမလက်ခံလိုက်သည်!

“ကင်ဆာဝေဒနာသည်ဖြစ်သူ ကဲန်ဒီ၏ညီမသည် သူမနှင့်အတူလာနေသည်။ ထို့အပြင် ကဲန်ဒီသည် သူနာပြုသင်တန်းတက်နေသူဖြစ်သည်။ ထို့ကြောင့် အချိန်တော်တော်ကြာကြာ ကျမ်းစာသင်အံမှု ပြတ်သွားသည်။ သို့သော် ကျွန်တော့်မိဘများနှင့် ကျွန်တော်သည် သူမနှင့် သူမခင်ပွန်းဖြစ်သူ ဒစ်ခ်ထံတွင် မဂ္ဂဇင်းများ ထားပေးခဲ့ခြင်းဖြင့် ဆက်၍အဆက်အသွယ်လုပ်ခဲ့သည်။ သူမသည် မဂ္ဂဇင်းများကို အိပ်ရာဘေးတွင်ထားကာ ညဘက်များတွင် ဖတ်လေ့ရှိကြောင်း ဒစ်ခ်က ကျွန်တော်တို့ကို ပြောပြသည်။

“နောက်ဆုံးတွင် ကဲန်ဒီ၏ညီမ ဆုံးသွားရှာသည်။ အဖေ၊ အမေနှင့် ကျွန်တော်တို့သည် သေသူ၏အခြေအနေအကြောင်း ကဲန်ဒီကို ပြောပြခဲ့ကြသည်။ သူသည် ကျမ်းစာသင်အံမှုကို ပြန်စဖို့ ဆုံးဖြတ်ခဲ့သည်။ ကဲန်ဒီနှင့်အတူ သင်ပြီး မိသားစုသင်အံမှု လုပ်ချင်ပါသလားဟု သီးခြားနေ့တစ်နေ့တွင် ကျွန်တော်တို့က ဒစ်ခ်ကို မေးခဲ့ကြသည်။ အကြံဉာဏ်ကောင်းပဲဟု သူယူမှတ်ခဲ့သည်။ ထို့ကြောင့် ယခုဆိုလျှင် ကျွန်တော်သည် အဖေနှင့်အတူ ဒစ်ခ်နှင့် ကဲန်ဒီတို့နှစ်ဦးစလုံးကို သင်ပေးနေပါသည်။ သူတို့သည် ကောင်းကောင်းတိုးတက်နေကြပြီး ကျမ်းစာသင်အံမှုအတွက် ကျေးဇူးတင်ကြောင်း ဖော်ပြကြသည်။

“ကျမ်းစာသင်အံမှုတစ်ခုပေးဖို့ ကျွန်တော်ဆုတောင်းခဲ့ရာ ကျွန်တော့်ဆုတောင်းချက်များကို ယေဟောဝါ နားညောင်းတော်မူခဲ့ပါသည်!”