ပုဂ္ဂိုလ်ရေးစိတ်ဝင်စားမှုပြပါ—မျက်စိရှင်ရှင်ထားခြင်းဖြင့်

^၁ ယေဟောဝါဘုရားသခင်နှင့် ခရစ်တော်ယေရှုတို့သည် လူတို့၏သတ်သတ်မှတ်မှတ်လိုအပ်ရာများကို ကောင်းစွာသိရှိပြီး ကူညီပေးတော်မူသည်။ (၆ ရာ. ၁၆:၉; မာ. ၆:၃၄) ဓမ္မအမှုတွင် တွေ့ဆုံရသူများ၏ စိတ်ဝင်စားမှုများနှင့် စိုးရိမ်မှုများကို ကျွန်ုပ်တို့သိရှိသည့်အခါ သတင်းကောင်းတင်ဆက်မှုကို ယင်းနှင့်အညီ အလိုက်သင့်ပြောင်းလဲပေးနိုင်သည်။

^၂ အသေးစိတ် အာရုံစိုက်ပါ– ယေရှုသည် မျက်စိရှင်သူဖြစ်၏။ (မာ. ၁၂:၄၁-၄၃; လု. ၁၉:၁-၆) ထိုနည်းတူ ကျွန်ုပ်တို့သည် အိမ်တံခါးဝမှ ဘာသာရေးအဆင်အပြင်များ၊ ယာဉ်များပေါ်ရှိဆောင်ပုဒ်များ၊ ဝင်းခြံတွင်းရှိကစားစရာများကို သတိထားကြည့်ခြင်းဖြင့် သတင်းကောင်းကို ထိရောက်စွာဟောပြောခွင့် ရရှိနိုင်ကြမည်။

^၃ လူတစ်ဦး၏ ကိုယ်နှုတ်အမူအရာတို့သည် သူ၏ခံစားချက်ကို ပေါ်လွင်စေနိုင်သည်။ (သု. ၁၅:၁၃) သူသည် ချစ်မြတ်နိုးရသူတစ်ဦး သေဆုံးသွားသောကြောင့်ဖြစ်စေ၊ စိတ်ဆင်းရဲစရာ အခြေအနေတစ်ခုခုကြောင့်ဖြစ်စေ နှစ်သိမ့်မှုလိုအပ်နေပေမည်။ ယင်းတို့နှင့်သက်ဆိုင်သည့် ကျမ်းချက်တချို့ ဖတ်ပြခြင်းကို ကျေးဇူးတင်လေးမြတ်ကြပေမည်။ (သု. ၁၆:၂၄) အိမ်ရှင်သည် အပြင်သွားရန် စိတ်လောနေသလော။ ငိုနေသောကလေးကို ချီထားသလော။ သို့ဆိုလျှင် နောက်တစ်ကြိမ်မှ လည်ပတ်ရန် စီစဉ်ခြင်းသည် သာ၍ကောင်းပေမည်။ ထောက်ထားမှုပြပြီး “စာနာစိတ်တင်ပြခြင်း” အားဖြင့် ကျွန်ုပ်တို့ ပြန်လည်ပတ်သောအခါ သူသည် နားထောင်လိုစိတ်ရှိလာပေမည်။—၁ ပေ. ၃:၈၊ ကဘ။

^၄ သင်၏ပြောဆိုမှုများကို အလိုက်သင့်ပြောင်းလဲပါ– အာသင်မြို့တွင် “ငါတို့မသိသောဘုရားသခင်အဖို့” ဟူ၍ အက္ခရာတင်ထားသော ယဇ်ပလ္လင်တစ်ခုကို တမန်တော်ပေါလု တွေ့ရှိခဲ့သည်။ ယင်းက သတင်းကောင်းကို ပေါလုတင်ဆက်သည့်နည်းအပေါ် အကျိုးသက်ရောက်ခဲ့သည်။ “သင်တို့သည် မသိဘဲလျက် ကိုးကွယ်သောဘုရားသခင်၏အကြောင်းကို ငါဟောပြော၏” ဟုပေါလုပြောခဲ့သည်။ ပေါလု၏လိမ္မာပါးနပ်စွာ ချဉ်းကပ်နည်းသည် ရောက်ရှိနေသူအချို့အား နိုင်ငံတော်သတင်းတရားကို ဆင်ခြင်သုံးသပ်စေပြီး ယုံကြည်သူများဖြစ်လာစေရန် လှုံ့ဆော်ပေးခဲ့သည်။—တ. ၁၇:၂၃၊ ၃၄။

^၅ ထိုနည်းတူ ကျွန်ုပ်တို့၏မျက်စိရှင်မှုအားဖြင့် လူတစ်ဦး၏စိတ်ဝင်စားမှုကို ပိုင်းခြားသိမြင်ပြီး ကျွန်ုပ်တို့၏ချဉ်းကပ်နည်းကို အလိုက်သင့်ပြောင်းလဲနိုင်သည်။ အိမ်ရှင် စကားပြောလာစေနိုင်သည့် မေးခွန်းများကိုမေးပါ။ သူစိတ်ဝင်စားနိုင်မည့် ကျမ်းချက်များကို စဉ်းစားပါ။ (သု. ၂၀:၅) ကျွန်ုပ်တို့၏မျက်စိရှင်ရှင်ထားမှုနှင့် သူတစ်ပါးအပေါ် စိတ်ရင်းမှန်နှင့် ပုဂ္ဂိုလ်ရေးစိတ်ဝင်စားမှုရှိကြောင်း ဖော်ပြခြင်းတို့က သတင်းကောင်းကို ကျွမ်းကျင်ပိုင်နိုင်စွာ ဟောပြောစေနိုင်သည်။