ပြင်ဆင်ခြင်း—ထိရောက်သောပြန်လည်ပတ်မှုများအတွက် သော့ချက်

၁။ အစောပိုင်းခရစ်ယာန်ဓမ္မအမှုကို အဘယ်နည်းဖြင့် တိုးချဲ့သွားရန်ဖြစ်သနည်း။

^၁ ယေရှုသည် မိမိ၏တပည့်တော်များအား “နိုင်ငံတော်နှင့်ယှဉ်သောဧဝံဂေလိတရားကို” ထိရောက်စွာဟောပြောသူများဖြစ်စေရန် ကောင်းစွာပြင်ဆင်ပေးခဲ့သည်။ (မ. ၄:၂၃; ၉:၃၅) ပါလက်စတိုင်းဒေသတွင် ဟောပြောစဉ်အတွင်း ထိုသို့ပြင်ဆင်လေ့ကျင့်ပေးခဲ့ခြင်းဖြစ်၏။ သို့သော် ‘လူမျိုးတကာတို့ကို တပည့်ဖြစ်စေ’ သည့်အထိ ခရစ်ယာန်ဓမ္မအမှုကို တိုးချဲ့လုပ်ဆောင်သွားမည်ဖြစ်ကြောင်း ကိုယ်တော် ကောင်းကင်သို့မတက်မီ အသိပေးခဲ့သည်။—မ. ၂၈:၁၉၊ ၂၀။

၂။ ‘တပည့်ဖြစ်စေပါ’ ဟူသော ယေရှု၏မိန့်မှာချက်ကို လိုက်နာရာတွင် အဘယ်အရာပါဝင်သနည်း။

^၂ တပည့်ဖြစ်စေခြင်းလုပ်ငန်းတွင် ဘုရားသခင်၏နိုင်ငံတော်သတင်းကောင်းကို စိတ်ဝင်စားသူများထံ ပြန်လည်ပတ်ခြင်း၊ ခရစ်တော်မိန့်မှာသမျှသော ပညတ်တော်များကို သူတို့ကျင့်စောင့်နိုင်ရန် သွန်သင်ပေးခြင်းတို့ပါဝင်သည်။ ထိုသို့ပြန်လည်ပတ်မှုများကို ထိရောက်စွာလုပ်ဆောင်နိုင်ရန် ကျွန်ုပ်တို့အနေဖြင့် ကောင်းစွာပြင်ဆင်ထားဖို့လိုသည်။

၃။ ဦးဆုံးအကြိမ်တွေ့ဆုံချိန်၌ပင် ပြန်လည်ပတ်မှုအတွက် မည်သို့လမ်းခင်းပေးနိုင်သနည်း။

^၃ ကြိုတင်စီစဉ်ပါ– ကြေညာသူအချို့သည် ဦးဆုံးအကြိမ်တွေ့ဆုံမှု၏နိဂုံးတွင် အိမ်ရှင်ကို မေးခွန်းတစ်ခုမေးကာ နောက်တစ်ကြိမ်ပြန်လာပြီး အဖြေကိုဆွေးနွေးမည်ဟု ကတိပေးသည်။ ထို့နောက် ပြန်လည်ပတ်ချိန်တွင် သမ္မာကျမ်းစာသွန်သင်ရာစာအုပ်မှ အကြောင်းအရာများကို ကိုးကားဖြေဆိုခြင်းက ချက်ချင်း ကျမ်းစာသင်အံမှုစတင်နိုင်သည်အထိ အကူအညီဖြစ်စေကြောင်း သူတို့တွေ့ရှိခဲ့ကြသည်။

၄။ ပြန်လည်ပတ်ရန် နောက်လထုတ်မဂ္ဂဇင်းများပေးမည့်အချိန်အထိ အဘယ်ကြောင့် မစောင့်ဆိုင်းသင့်သနည်း။

^၄ လထုတ်မဂ္ဂဇင်းတစ်စုံရရှိပြီးသောအိမ်ရှင်ထံ ပြန်လည်ပတ်ရန် ကျွန်ုပ်တို့အနေဖြင့် နောက်လထုတ်မဂ္ဂဇင်းများ ပေးမည့်အချိန်အထိ စောင့်စရာမလိုပါ။ အိမ်ရှင်ရရှိထားသောမဂ္ဂဇင်းမှ အကြောင်းအရာများကို ဆွေးနွေးခြင်းဖြင့် သူ၏စိတ်ဝင်စားမှုကို နှိုးဆွပေးနိုင်သည်။

၅။ ဦးတည်ချက်ရှိခြင်း၏ အကျိုးကျေးဇူးကား အဘယ်နည်း။

^၅ ဦးတည်ချက်တစ်ခုထားရှိပါ– ပြန်လည်ပတ်မှုမတိုင်မီ သင့်မှတ်စုကို အချိန်ယူသုံးသပ်ပြီး သင်အဘယ်အရာဖြစ်မြောက်လိုကြောင်း ဆုံးဖြတ်ပါ။ ဥပမာ၊ သင်ဝေငှခဲ့သောစာပေမှ အချက်တစ်ချက်ကိုဆွေးနွေးပါ။ သို့မဟုတ် နောက်ဆုံးအကြိမ်တွေ့ဆုံချိန်တွင် ပြောဆိုခဲ့သောအကြောင်းအရာနှင့်သက်ဆိုင်သည့် စာပေကို ဝေငှပါ။ နောက်ဆုံးအကြိမ်တွေ့ဆုံချိန်တွင် သင် မေးခွန်းတစ်ခုမေးခဲ့ပါက သင်၏ဦးတည်ချက်မှာ ထိုမေးခွန်းကိုဖြေဆိုရန် ဖြစ်ပေမည်။ ယင်းအချက်ကိုထောက်ခံသည့် ကျမ်းချက်ကို တိုက်ရိုက်ဖတ်ပြရန် ကြိုးစားပါ။

၆။ ပြန်လည်ပတ်ရာတွင် ကျွန်ုပ်တို့၏ပန်းတိုင်မှာ အဘယ်နည်း။

^၆ ကျွန်ုပ်တို့၏ပန်းတိုင်– ကျွန်ုပ်တို့၏ပန်းတိုင်မှာ ကျမ်းစာသင်အံမှုစတင်နိုင်ရန်ဖြစ်သည်။ ညီအစ်ကိုတစ်ဦးသည် ပြန်လည်ပတ်ချိန်တွင် ကျမ်းစာသင်အံမှုကမ်းလှမ်းခဲ့သော်လည်း အိမ်ရှင်အမျိုးသားမှာ လက်မခံခဲ့ပါ။ ထိုအခါ ညီအစ်ကိုသည် နောက်ဆုံးထုတ်မဂ္ဂဇင်းများကိုယူကာ ပြန်သွား၍ “ကျွန်တော်တို့ ရောက်တုန်းရောက်ခိုက် လူတွေအတွက် ကျမ်းစာမေးခွန်းတစ်ခုရဲ့ အဖြေကို ပြောပြချင်ပါတယ်” ဟုဆိုသည်။ အိမ်ရှင်အမျိုးသား၏တုံ့ပြန်မှုကို ရရှိပြီးနောက် ထိုညီအစ်ကိုသည် ကျမ်းချက်တစ်ချက်နှင့် ကျမ်းစာသင်အံမှုတွင်သုံးသော စာပေတစ်ခုမှ သက်ဆိုင်သောအပိုဒ်တစ်ပိုဒ်ကို ဖတ်ပြသည်။ ယင်းက ပုံမှန်ကျမ်းစာသင်အံရန် လမ်းပွင့်သွားစေသည်။

၇။ ကောင်းစွာပြင်ဆင်ခြင်းသည် ကျမ်းစာသင်အံမှုတစ်ခု စတင်နိုင်ရန် သင့်ကို မည်သို့ကူညီပေးခဲ့သနည်း။

^၇ ပြန်လည်ပတ်မှုအတွက် အချိန်ယူ၍ပြင်ဆင်ခြင်းက အကျိုးနပ်ပါသည်။ ယင်းကြောင့် ကျွန်ုပ်တို့ ပိုမိုပျော်ရွှင်လာမည်၊ ထို့ပြင် အသက်လမ်းစဉ်တွင် “ထာဝရအသက်ကို လိုလားသူ” တစ်ဦးကို ကူညီပေးနိုင်သည့် အခွင့်ထူးရရှိပေမည်။—တ. ၁၃:၄၈၊ ကဘ။