“ကျမ်းစာဖြင့်ကျိုးကြောင်းဆင်ခြင်ခြင်း” စာအုပ်ကို အသုံးပြုနည်း

သူတစ်ပါးအား ကျမ်းစာနားလည်စေရန်ကူညီရာ၌ လိုက်နာရမည့်ပုံစံကို ယေရှုခရစ်နှင့်တမန်တော်များချမှတ်ခဲ့သည်။ မေးခွန်းများဖြေကြားရာတွင် ယေရှုသည် ကျမ်းစာကိုးကားသည့်ပြင် စိတ်နှလုံးရိုးဖြောင့်သူများ သမ္မာကျမ်းစာအဆိုကိုလက်ခံနိုင်ရန် တစ်ခါတစ်ရံ သင့်လျော်သောပုံဥပမာများကိုပါအသုံးပြုတော်မူ၏။ (မ. ၁၂:၁-၁၂) တမန်တော်ပေါလုသည် ‘ကျမ်းစာဖြင့် ဆင်ခြင်ဆွေးနွေး’ ခြင်းပြုပြီး မိမိသွန်သင်ပို့ချရာများကို ‘အကိုးအကားများဖြင့်သက်သေထူ၍ ရှင်းလင်း’ လေ့ရှိပေသည်။ (တ. ၁၇:၂၊ ၃၊ ကဘ) ဤစာအုပ်ပါအကြောင်းအရာများက သင့်အား ထိုသို့ ပြုရန်အကူအညီပေးနိုင်သည်။

ကျမ်းစာဖြင့် ကျိုးကြောင်းဆင်ခြင်ခြင်း စာအုပ်သည်အကြောင်းအရာတစ်ခုစီကို ကျယ်ကျယ်ပြန့်ပြန့်၊ ယေဘုယျတင်ပြမည့်အစား ယနေ့သူငါအများမေးတတ်သည့်မေးခွန်းများကို အဓိကထားတင်ပြပါသည်။

အမှန်တရားကို မလေးစားသောလူတို့အပေါ် “စကားရည်လု၍နိုင်” ရန်​အထောက်အကူအဖြစ်ရည်သန်၍ ဤစာအုပ်ကို ပြုစုခဲ့ခြင်းမဟုတ်။ ဆင်ခြင်ဆွေးနွေးမှုကိုလက်ခံမည့်သူများနှင့် ဆင်ခြင်ဆွေးနွေးရာ၌ အသုံးပြုနိုင်မည့် အဖိုးတန်အချက်အလက်များကို ပေးထားခြင်းသာဖြစ်သည်။ သူတို့ထဲမှအချို့သည် ကျေနပ်လောက်သည့်အဖြေများအမှန်ရလိုသောသဘောဖြင့် မေးခွန်းများမေးကြမည်။ အချို့တို့သည် ပြောကြဆိုကြစဉ် မိမိတို့၏ကိုယ်ပိုင်ယုံကြည်ချက်များကိုတင်ပြခြင်းသာဖြစ်ပြီး ခံယူချက်ဖြင့်တင်ပြချင်လည်းတင်ပြကြပေမည်။ သို့သော် သူတို့သည် အခြားရှုထောင့်မှနားထောင်လိုသည့်ဆန္ဒရှိသော၊ ကျိုးကြောင်းဆင်ခြင်တတ်သူများလော။ သို့ဆိုလျှင် ကျမ်းစာအဆိုကို ထိုသူတို့အား ဝေငှနိုင်သည်။ အမှန်တရားမြတ်နိုးသူများသည် နှလုံးသားမှ လှိုက်လှိုက်လှဲလှဲတုံ့ပြန်ကြမည်သာ။

သင်လိုအပ်သည့်အကြောင်းအရာအတိအကျကို ဤလက်စွဲစာအုပ်မှမည်သို့ရှာယူနိုင်သနည်း။ ဆွေးနွေးမည့်အကြောင်းအရာ၏အဓိကခေါင်းစဉ်ကို တိုက်ရိုက်ဖွင့်လိုက်ရုံနှင့် လွယ်လင့်တကူရှာတွေ့နိုင်ပေမည်။ အဓိကခေါင်းစဉ်များအောက်တွင် ပင်ရင်းမေးခွန်းများကို အလွယ်တကူခွဲခြားတွေ့ မြင်နိုင်ပေသည်။ ယင်းတို့ကို လက်ဝဲဘက်ကပ်၍ မျက်နှာမည်းစာလုံးများဖြင့် ရိုက်နှိပ်ထားသည်။ မြန်မြန်ဆန်ဆန်ရှာမတွေ့ပါက စာအုပ်နောက်ဘက်ရှိ အက္ခရာစဉ်အညွှန်းတွင် ရှာဖွေကြည့်ပါ။

ဆွေးနွေးမှုမပြုမီ ကြိုတင်ပြင်ဆင်ခြင်းသည် အမြဲအကျိုးရှိ၏။ သို့သော် သင့်အနေနှင့် ဤစာအုပ်ပါအချို့အပိုင်းကို အကျွမ်းမဝင်သေးသည်တိုင်​ဤစာအုပ်ကို​ကောင်းစွာအသုံးချနိုင်ပေသည်။ မည်သည့်နည်းဖြင့်နည်း။ သင်ဆွေးနွေးလိုသည့်အချက်နှင့် အနီးစပ်ဆုံးသောမေးခွန်းကိုတွေ့သောအခါ ယင်းအောက်ရှိ ခေါင်းစဉ်ငယ်တစ်ခုခုကို ကြည့်ပါ။ ယင်းခေါင်းစဉ်ငယ်များကို မျက်နှာမည်းစာလုံးစောင်းများဖြင့် ရိုက်နှိပ်ထားပြီး ဆိုင်ရာမေးခွန်းများအောက် ချိုင့်၍ရိုက်နှိပ်ဖော်ပြထားသည်။ သင်သည် အကြောင်းအရာကိုအတန်ငယ်သိနှင့်ပါက ထိုခေါင်းစဉ်ငယ်များကိုပြန်လည်စစ်ဆေးပြီး ယင်းတို့အောက်ရှိအကြောင်းအရာများကို ဖျတ်ခနဲကြည့်လိုက်ရုံဖြင့် လိုရာကိုရရှိနိုင်ပေမည်။ ယင်းတို့သည် အကူအညီဖြစ်စေမည့်ကျိုးကြောင်းဆင်ခြင်နည်းကို ပေးထားသည်။ ကိုယ်ပိုင်စကားဖြင့်တင်ပြရန် နှုတ်မနှေးပါနှင့်။

ဤမျှနှင့်မလုံလောက်၊​—​ပကတိကျမ်းချက်များ၊ ၎င်းကျမ်းချက်များနှင့်ပတ်သက်သော ဆင်ခြင်ပုံဆင်ခြင်နည်းအပြင်၊ သမ္မာကျမ်းစာအဆိုဆီလျော်မှန်ကန်ကြောင်း ရှင်းလင်းစေသော ဥပမာများ​ထပ်ဆင့်လိုအပ်သည်ထင်သလော။ လိုအပ်လျှင် တစ်ဖက်သားအား ဤစာအုပ်ပါအချက်အလက်များကိုပြပြီး သူ့အမေးနှင့်သက်ဆိုင်သည့်အပိုင်းကို သူနှင့်အတူ ဖတ်ရှုနိုင်ပေသည်။ ကြိုတင်လေ့လာမထားသည့်တိုင် ယင်းကိုသုံး၍ ကျေနပ်လောက်သည့်အဖြေကိုပေးနိုင်သည်။ ဤစာအုပ်တွင် လိုအပ်သမျှအကြောင်းအရာပါရှိပြီးဖြစ်သည်။ ရိုးရိုးရှင်းရှင်း ကျစ်လစ်တိုတုတ်စွာဖော်ပြထားသည်။

ဤစာအုပ်သည် အဖေးအမမျှသာဖြစ်ကြောင်း သတိရပါ။ သမ္မာကျမ်းစာသာလျှင် အာဏာပိုင်၊ ဘုရားသခင်၏နှုတ်ကပါဌ်တော်ဖြစ်သည်။ ကိုးကားချက်များသည်​သမ္မာကျမ်းစာထဲမှဖြစ်လျှင်​ထိုသို့ ဖြစ်ကြောင်း​တစ်ဖက်သားအား​သတိပြုစေပါ။ ဖြစ်နိုင်သည့်အခါတိုင်း သူ့ကျမ်းစာကိုထုတ်ပြီး ဖွင့်ဖတ်စေပါ။ သို့မှသာ သူက​သင်ပြောနေသည့်အချက်သည်​တကယ်ပင် သူ့ကျမ်းစာထဲကအတိုင်းဖြစ်ကြောင်း​သိမြင်ပါလိမ့်မည်။ အကယ်၍​အများကြိုက်ဘာသာပြန်ကျမ်းက​ကျမ်းချက်၏အဓိကအပိုင်းကို ခြားနားစွာပြန်ဆိုထားလျှင်​ထိုသို့ ပြန်ဆိုထားကြောင်း ဤစာအုပ်ကထောက်ပြလေ့ရှိပြီး ဘာသာပြန်ကျမ်းအမျိုးမျိုးကိုပါ နှိုင်းယှဉ်နိုင်ရန်​တင်ပြထားပေသည်။

ပေါလုသည် အာသင်မြို့၌ဟောပြောစဉ် “ငါတို့မသိသော ဘုရားသခင်အဖို့” ဟူသောယဇ်ပလ္လင်အကြောင်းကို ညွှန်းဆိုသည့်ပြင် အများလက်ခံသော လောကီရေးရာသာဓကများကို ကိုးကားခဲ့သည်ဖြစ်ရာ (တ. ၁၇:၂၂-၂၈)၊ ဤစာအုပ်လည်း​ထိုနမူနာနှင့်အညီ လောကီသမိုင်း၊ စွယ်စုံကျမ်း၊ ဘာသာရေးဆိုင်ရာ ကျမ်းကိုးများအပြင် သမ္မာကျမ်းစာဘာသာရပ်အဘိဓာန်များကို​အကန့်အသတ်ဖြင့် ကိုးကားပါသည်။ ထို့ကြောင့် ဤစာအုပ်သည် မှောက်မှားသောဘာသာရေးဓလေ့များ၏ဇာစ်မြစ်နှင့် အယူဝါဒအချို့ပေါ်ပေါက်လာပုံ၊ ဟေဗြဲနှင့်ဂရိဘာသာဝေါဟာရများ၏အဓိပ္ပာယ်တို့နှင့်ပတ်သက်၍ တရားသေပြောဆိုမည့်အစား အဘယ်ကြောင့် ဤသို့ ဤပုံရေးသားတင်ပြကြောင်း အကျိုးအကြောင်းပြဆိုပေသည်။ မည်သို့ဆိုစေ သမ္မာကျမ်းစာသည် အမှန်တရား၏အခြေအမြစ်ဖြစ်ကြောင်း အာရုံပြုစေသည်။

အခြားသူများအား ကျမ်းစာအမှန်တရားဝေမျှဖို့လမ်းဖွင့်ရာ၌ ထပ်ဆင့်ကူညီသည့်အနေဖြင့် ဤစာအုပ်၏ကနဦးအပိုင်းများတွင် “လယ်ကွင်းဓမ္မအမှုတော်သုံး နိဒါန်းများ” တသီတတန်းပေးထားပြီး “စကားဆက်ပြတ်စေနိုင်သူများအား မည်သို့တုံ့ ပြန်နိုင်ပုံ” နှင့်ပတ်သက်သော အကြံပြုချက်များကို စုစည်းတင်ပြထားသည်။ အခြားသော “စကားဆက်ပြတ်စေနိုင်သူ” အများထုသည် သီးခြားယုံကြည်ချက်များနှင့် သက်ဆိုင်သဖြင့် ထိုယုံကြည်ချက်များနှင့် ပတ်သက်သောအကြောင်းများကို ပင်မအခန်းတစ်ခုစီ၏အဆုံးတွင် ဆင်ခြင်သုံးသပ်တင်ပြထားသည်။ ဤတုံ့ ပြန်ဖြေဆိုနည်းများကို အလွတ်ကျက်ထားရန်အတွက်မရည်ရွယ်ပါ။ သို့သော် ယင်းတို့ကို အခြားသူများအသုံးပြုရာ၌ အဘယ်ကြောင့်ထိရောက်သည်ကို သုံးသပ်ကြည့်လျှင် သင့်အဖို့ ဧကန်အကူအညီဖြစ်စေပေမည်။ သုံးသပ်ပြီးနောက် အကြောင်းအရာများကို ကိုယ်ပိုင်စကားဖြင့်တင်ပြပါလေ။

ဤလက်စွဲစာအုပ်ကိုအသုံးပြုလျှင် ကျမ်းစာဖြင့် ဆင်ခြင်ဆွေးနွေးနိုင်စွမ်းကို ပြုစုပျိုးထောင်နိုင်သည့်ပြင် ကျမ်းစာကိုထိရောက်စွာသုံးပြီး “ဘုရားသခင်၏ကြီးကျယ်ခန့်ညားသည့် အမှုတော်များ” ကို အခြားသူများသိရှိနိုင်ရန်ကူညီပေးရာ၌ အထောက်အကူဖြစ်မည်တည်း။​—တ. ၂:၁၁၊ ကဘ။