နိုင်ငံခြားဘာသာစကားပြောလယ်ကွင်းကို တိုးတက်စေခြင်း

၁။ ကျွန်ုပ်တို့၏ ခန့်အပ်ခံရပ်ကွက်တွင်ဟောပြောစဉ် အဘယ်အခွင့်အရေးများ ပေါ်ပေါက်လျက်ရှိသနည်း။

^၁ “လူမျိုးအပေါင်းတို့အတွက် သက်သေဖြစ်စေရန်” ကမ္ဘာတစ်ဝန်းတွင် သတင်းကောင်းဟောရလိမ့်မည်ဟု ယေရှုခရစ် ကြိုဟောခဲ့သည်။ ဟောပြောခြင်းနှင့် သွန်သင်ခြင်းလုပ်ငန်းတွင် ပါဝင်နေသူအားလုံးသည် ထိုစကားများ မည်မျှအရေးကြီးသည်ကို သိထားကြ၏။ (မ. ၂၄:၁၄; ၂၈: ၁၉၊ ၂၀) ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် ကျွန်ုပ်တို့ပါဝင်စဉ် ကျွန်ုပ်တို့၏ ဘာသာစကားမဟုတ်သည့် ဘာသာခြားစကားတစ်မျိုးမျိုးပြောသော လူများကို တွေ့ရပေမည်။ ကြောက်မက်ဖွယ်ကောင်းသော ယေဟောဝါ၏နေ့ကြီးမရောက်လာမီ ထိုသူတို့သည်လည်း နိုင်ငံတော်သတင်းတရားကိုကြားပြီး အမှန်တရားဘက် အခိုင်အမာရပ်တည်ရန် အခွင့်အရေးရရှိထိုက်သည်။ (မာလ. ၃:၁၈) ကျွန်ုပ်တို့၏ ခန့်အပ်ခံရပ်ကွက်တွင် နိုင်ငံခြားဘာသာစကားပြောဆိုသည့် လယ်ကွင်းကို တိုးတက်အောင် မည်သို့လုပ်ဆောင်နိုင်သနည်း။

၂။ ဘာသာခြားစကားပြောသူများကို ဟောပြောသောအခါ မည်သည့်နည်းဖြင့် ယေဟောဝါကို တုပနိုင်သနည်း။

^၂ ဘာသာခြားစကားပြောသူများအား ယေဟောဝါရှုမြင်သကဲ့သို့ ရှုမြင်ပါ– ကျွန်ုပ်တို့ရပ်ကွက်ရှိ လူတိုင်းအပေါ် မျက်နှာမလိုက်သည့် ယေဟောဝါ၏ မေတ္တာတော်ကို တုပနိုင်ရန် လူတို့မည်သည့်ဘာသာစကားပင် ပြောဆိုပါစေ လူတိုင်းကို စစ်မှန်သောဘုရားသခင် ယေဟောဝါနှင့်ပတ်သက်သည့် တိကျမှန်ကန်သောအသိပညာ ရရှိစေလိုသည့် ပြင်းပြသောဆန္ဒ ကျွန်ုပ်တို့တွင် ရှိရမည်။ (ဆာ. ၈၃:၁၈; တ. ၁၀:၃၄၊ ၃၅) ကျွန်ုပ်တို့သည် ကျွန်ုပ်တို့ပူးပေါင်းနေသည့်အသင်းတော်၏ ဘာသာစကားပြောသူများကို အဓိကအာရုံစိုက်သော်လည်း ဘာသာခြားစကားပြောဆိုသူတို့၏ လိုအပ်ရာကိုဂရုပြုကာ သူတို့ကို ဘုရားသခင့်နိုင်ငံတော်သတင်း ဝေမျှနိုင်သည့်အခွင့်အလမ်း ရှာယူရမည်ဖြစ်သည်။ ဘာသာခြားစကားပြောသူများကို လျစ်လျူရှုခြင်းက လူမျိုးအပေါင်းအား သက်သေဖြစ်စေပါဟူသည့် ယေဟောဝါ၏ရည်ရွယ်ချက်နှင့် ဆန့်ကျင်ဘက်ဖြစ်နေပါလိမ့်မည်။ သို့ဖြစ်လျှင် ဘာသာခြားစကားပြောသူများအား ကျွန်ုပ်တို့ မည်သို့ကူညီပေးနိုင်သနည်း။

၃။ ကျွန်ုပ်တို့အတွက် အဘယ်အသုံးဝင်သည့် စာအုပ်ငယ်ကို ထုတ်ဝေထားသနည်း။ ယင်းစာအုပ်ငယ်ကို အသုံးပြုနိုင်ရန် ကျွန်ုပ်တို့မည်သို့ပြင်ဆင်ထားနိုင်သနည်း။

^၃ လူမျိုးအပေါင်းမှလူတို့အတွက် သတင်းကောင်း စာအုပ်ကိုအသုံးပြုပါ– ဤစာအုပ်ငယ်ကို ဘာသာခြားစကားပြောဆိုသူများနှင့် ကျွန်ုပ်တို့ တွေ့ဆုံသည့်အခါ အသုံးပြုရန်ရည်ရွယ်၍ ထုတ်ဝေထားသည်။ ဤစာအုပ်ငယ်ကို အချိန်တိုင်းဆောင်ထားကာ စာအုပ်တွင်ပါဝင်ရာများနှင့် အကျွမ်းတဝင်ရှိပြီး ယင်းကိုအသုံးပြုရန် အသင့်ပြင်ဆင်ထားပါ။ ချက်ချင်းပြနိုင်ရန် သင့်ရပ်ကွက်တွင် တွေ့ရလေ့ရှိသည့် ဘာသာစကားအမျိုးမျိုးကို အမှတ်အသားပြုလုပ်ထားပါ။ အကယ်၍ ယင်းဘာသာစကားများဖြင့် စာပေများရနိုင်မည်ဆိုလျှင် ယင်းစာအုပ်ငယ်မှ အကြောင်းအရာကိုအသုံးပြုပြီးနောက် ထိုသူအား ဝေငှနိုင်ရန် ယင်းစာပေအချို့ကို ရယူထားမည်ဆိုလျှင် ပို၍လက်တွေ့ကျပေမည်။

၄။ ကျွန်ုပ်တို့၏ဓမ္မအမှုတွင် လူမျိုးအပေါင်း စာအုပ်ငယ်ကို မည်သို့အသုံးပြုနိုင်သနည်း။

^၄ ဓမ္မအမှုတွင် ဘာသာခြားစကားပြောဆိုသူနှင့် သင်တွေ့ဆုံသောအခါ ထိုသူမည်သည့်ဘာသာစကားပြောဆိုကြောင်း မသေမချာဖြစ်နေမည်ဆိုလျှင် စာအုပ်ငယ်၏ မျက်နှာဖုံးကိုပြပြီး အစပြုပါ။ မျက်နှာဖုံးအတွင်းရှိ ကမ္ဘာ့မြေပုံကိုလှန်ကာ သင်နေထိုင်သည့်နိုင်ငံကို ထောက်ပြပါ၊ ထို့နောက် မည်သည့်နိုင်ငံကလာကြောင်းနှင့် အဘယ်ဘာသာစကားပြောဆိုကြောင်း သင်သိလိုသည်ဟု အိမ်ရှင်အား ပြောပြပါ။ ထိုသူပြောသည့် ဘာသာစကားကို သိရှိပြီးနောက် မာတိကာပါဇယားတွင် စာမျက်နှာကိုကြည့်ပြီး သင့်တော်သောစာမျက်နှာကိုရှာပါ။ စာမျက်နှာ၏ထိပ်တွင် စာလုံးမည်းဖြင့်ရိုက်ထားသော စာကြောင်းကို အိမ်ရှင်အားပြကာ ထိုစာမျက်နှာရှိသတင်းတရားအား ဖတ်ရှုစေလိုကြောင်းပြပါ။ အိမ်ရှင်ဖတ်ရှုပြီးပါက ထိုသူ၏ဘာသာစကားဖြင့် ဝေစာတစ်စောင်ကို ဝေငှပါ သို့မဟုတ် သူ၏ဘာသာစကားဖြင့် ထုတ်ဝေထားသော စာပေတစ်စောင်နှင့်အတူ အိမ်ရှင်ထံလည်ပတ်လိုကြောင်း ဖော်ပြသည့် မီးခိုးရောင်ဖြင့် ထင်ရှားဖော်ပြထားသော စာကြောင်းကို ထောက်ပြနိုင်သည်။ ထို့နောက် စာလုံးမည်းဖြင့် ရိုက်ထားသော “ကျွန်ုပ်အမည်” စာသားကို ထောက်ပြကာ သင်၏အမည်ကို ပီပီသသ ပြောပြပါ။ ပြီးနောက် စာလုံးမည်းဖြင့်ရိုက်ထားသော “သင်၏အမည်” စာသားကို ထောက်ပြကာ အိမ်ရှင်၏တုံ့ပြန်မှုကို စောင့်ပါ။ နောက်တစ်ကြိမ် ပြန်လည်ပတ်ရန်အတွက် အသေအချာစီစဉ်ပါ။

၅။ ဘာသာခြားစကားပြောသော စိတ်ဝင်စားသူများကို သင့်တော်စွာဂရုစိုက်ပေးနိုင်ရန် နောက်ထပ် ဘယ်အရာပြုလုပ်သင့်သနည်း။

^၅ ဆက်လိုက်ပေးပါ အစီအစဉ်များ– လူတို့မည်သည့်ဘာသာစကားပင် ပြောဆိုပါစေ နိုင်ငံတော်သတင်းကောင်းကို စိတ်ဝင်စားမှုတင်ပြသူတို့ထံ လည်ပတ်ရန် ကြိုးစားအားထုတ်ရမည်ဖြစ်သည်။ ဘုရားသခင်နှင့် ကိုယ်တော့်နှုတ်ကပါဌ်တော် သမ္မာကျမ်းစာအပေါ် သူတို့စိတ်ဝင်စားလာအောင် ကျွန်ုပ်တို့ပြုလုပ်ပြီးသောအခါ ကျေးဇူးပြု၍ ဆက်လိုက်ပေးပါ (S-43) ပုံစံကို ဖြည့်စွက်ကာ အသင်းတော်အတွင်းရေးမှူးထံ အမြန်ဆုံး ပေးပို့သင့်သည်။ ထိုစိတ်ဝင်စားသူထံ သူ၏ဘာသာစကားပြောသူတစ်ဦး ပြန်လည်ပတ်ဖို့ ဌာနခွဲရုံးမှ စီစဉ်ပေးနိုင်ရန် အသင်းတော်အတွင်းရေးမှူးက ထိုပုံစံကို ဌာနခွဲရုံးသို့ပေးပို့မည်ဖြစ်သည်။ ထို့နောက် ဌာနခွဲရုံးသည် ယင်းပုံစံကို သင့်တော်သော ဘာသာစကားပြောအုပ်စုထံ ပေးပို့ပေးပါလိမ့်မည်။ ယင်းပုံစံကို လက်ခံရရှိသောအခါ ထိုသူအား အမြန်ဆုံး ဆက်သွယ်ပါလိမ့်မည်။ အခြားဘာသာစကားတစ်မျိုးပြောသော စိတ်ဝင်စားသူရှိကြောင်း လုပ်ငန်းတော်ကြီးကြပ်မှူး သိရှိနိုင်ရန် အတွင်းရေးမှူးသည် ပုံစံစာရွက်၏မိတ္တူကို သူ့ထံ ပေးပို့ပါလိမ့်မည်။ အမှန်တကယ်စိတ်ဝင်စားကြောင်းတင်ပြမှသာ ယင်းပုံစံစာရွက်ကို အသုံးပြုသင့်သည်။

၆။ ကျွန်ုပ်တို့သည် ဘာသာခြားစကားပြောသော စိတ်ဝင်စားသူများနှင့် ဆုံတွေ့မည်ဆိုလျှင် ကျွန်ုပ်တို့တွင် အဘယ်တာဝန်ရှိသနည်း။

^၆ S-43 ပုံစံ ပေးပို့သည့်အချိန်မှ ထိုစိတ်ဝင်စားသူ၏ ဘာသာစကားပြောကြေညာသူတစ်ဦး ထိုသူထံ လည်ပတ်ချိန်အထိ အချိန်အတော်ကြာပေမည်။ ထို့ကြောင့် S-43 ပုံစံပေးပို့သော ကြေညာသူသည် ထိုသူ၏ဘာသာစကားပြောသူနှင့် စိတ်ဝင်စားသူ အဆက်အသွယ်မရမချင်း စိတ်ဝင်စားသူ၏ သိလိုစိတ်တိုးများလာစေရန် ကူညီပေးနိုင်သည်။ အချို့အခြေအနေများတွင် စိတ်ဝင်စားသူနှင့် ကျမ်းစာသင်အံမှုပင် ပြုလုပ်နိုင်ပေမည်။ သို့သော် ဤစပ်ကြားကာလတွင် ကြေညာသူသည် စိတ်ဝင်စားသူ၏ ဘာသာစကားဖြင့်ထုတ်ဝေသော စာပေကို မည်သို့ရယူနိုင်သနည်း။

၇။ ကျွန်ုပ်တို့ ဆုံတွေ့နိုင်သူတို့၏ ကိုယ်ပိုင်ဘာသာစကားဖြင့် စာပေများရရှိနိုင်ရန် အဘယ်ပြင်ဆင်ပေးချက်ရှိသနည်း။

^၇ ဘာသာခြားစကားများဖြင့်ထုတ်ဝေသောစာပေ– အသင်းတော်များသည် ဘာသာခြားစကားများဖြင့်ထုတ်ဝေသော စာပေအမြောက်အမြားကို လက်ဝယ်မထားရှိသင့်ချေ။ သို့သော် ဘာသာခြားစကားတစ်မျိုးမျိုးပြောသူတို့သည် အမှန်တရားအပေါ် ပိုစိတ်ဝင်စားမှုရှိလာသည်ဟု လုပ်ငန်းတော်ကြီးကြပ်မှူးက ဆုံးဖြတ်လျှင် ကြေညာသူများဝေငှနိုင်ရန် ထိုဘာသာစကားဖြင့်ထုတ်ဝေသောစာပေ အတော်အသင့်ထားရှိခြင်းသည် သင့်တော်ကြောင်း သူတွေ့ရှိပေမည်။ အကယ်၍ အသင်းတော်တွင် စာပေမရှိပါက မှာယူနိုင်ပါသည်။ ဘာသာစကားတစ်မျိုးမျိုးဖြင့် စာပေများ ရောက်ရှိရန်မှာ အချိန်အတော်အတန်လိုပေမည်။ ထို့ကြောင့် www.watchtower.org မှစာပေများကို ကူးယူနိုင်ရန် အစီအစဉ်တစ်ရပ် ပြင်ဆင်ပေးထားပါသည်။ ထိုတွင် ရာနှင့်ချီသောဘာသာစကားဖြင့် စာပေများတင်ထားသောကြောင့် စိတ်ဝင်စားသူများ၊ ကြေညာသူများ တိုက်ရိုက်ဝင်ရောက်ကြည့်ရှုနိုင်ပါသည်။ ဘာသာစကားအမျိုးမျိုးပြောသူတို့၏စိတ်ဝင်စားမှုကို တိုးများအောင်ပြုလုပ်ရာတွင် ယင်းပြင်ဆင်ပေးချက်သည် အမှန်ပင်အသုံးဝင်မည်မှာ သေချာပါသည်။

၈။ ဘာသာခြားစကားပြောသူများ၏ စိတ်ဝင်စားမှုကို ပြုစုပျိုးထောင်ရာ၌ အသင်းတော်သည် အဘယ်အခန်းကဏ္ဍမှ ပါဝင်သနည်း။

^၈ အသင်းတော်၏ အခန်းကဏ္ဍ– အချို့အခြေအနေများတွင် နိုင်ငံခြားဘာသာစကားပြော စိတ်ဝင်စားသူများ တိုးများလာသော်လည်း အနီးအနားတွင် ထိုဘာသာစကားဖြင့် အစည်းအဝေးကျင်းပသော အသင်းတော် မရှိဘဲ ဖြစ်နေပေမည်။ ထို့ကြောင့် ဘာသာခြားစကားပြောဆိုသော စိတ်ဝင်စားသူများကို သင့်အစည်းအဝေးများသို့ တက်ရောက်ရန် ဖိတ်ခေါ်သင့်သည်။ လှိုက်လှဲသောကြိုဆိုမှုနှင့် ပုဂ္ဂိုလ်ရေးစိတ်ဝင်စားမှုတို့က ကျွန်ုပ်တို့နှင့်မှန်မှန်ပေါင်းသင်းရန် သူတို့အတွက် တွန်းအားဖြစ်စေပေမည်။ အစပိုင်းတွင် ဘာသာစကားနှင့်ယဉ်ကျေးမှုတွင် အတားအဆီးရှိမည်မှန်သော်လည်း ယေဟောဝါသက်သေများ၏ ကမ္ဘာချီညီအစ်ကိုအသင်းအပင်းရှိ ခရစ်ယာန်မေတ္တာတွင် မည်သည့်အတားအဆီးမျှမရှိပေ။ (ဇေ. ၃:၉; ယော. ၁၃:၃၅) သင်သည် အခြားဘာသာစကားတစ်မျိုးမျိုးကို ကျွမ်းကျွမ်းကျင်ကျင် ပြောဆိုတတ်ပါသလော။ အကယ်၍ ပြောဆိုတတ်ပြီး ထိုဘာသာစကားဖြင့် လည်ပတ်မှုများပြုလုပ်လိုလျှင် သင့်အသင်းတော်အတွင်းရေးမှူးထံ အကြောင်းကြားပါ၊ သို့မှသာ အတွင်းရေးမှူးက ယင်းအချက်အလက်ကို ဌာနခွဲရုံးသို့ ပို့ပေးနိုင်မည်ဖြစ်သည်။ ဌာနခွဲရုံးမှ စိတ်ဝင်စားသူအားကူညီပေးရန် ကြေညာသူတစ်ဦးကို ရှာဖွေသောအခါ ယင်းက အကူအညီဖြစ်စေပါလိမ့်မည်။

၉။ အဘယ်အချိန်တွင် ကြေညာသူများအတွက် ဘာသာစကားသင်တန်း ပြုလုပ်ပေးမည်နည်း၊ ယင်းကို မည်သို့ပြုလုပ်သနည်း။

^၉ ဘာသာစကားသင်တန်း– သင်သည် ဘာသာခြားစကားပြောသူကို ကူညီပေးသောအခါ ဖြစ်နိုင်မည်ဆိုလျှင် သူ၏ကိုယ်ပိုင်ဘာသာစကားဖြင့်ကျင်းပသော အသင်းတော်တစ်ခုကို စတင်တက်ရောက်ရန် အားပေးခြင်းသည် အကောင်းဆုံးဖြစ်သည်။ သို့သော် ယင်းသို့မဖြစ်နိုင်သည့်အခါမျိုးတွင် ကြေညာသူအချို့သည် စိတ်ဝင်စားသူများအား ထိရောက်စွာ အကူအညီပေးနိုင်ရန် ဘာသာခြားစကားကို သင်ယူရန် ဆုံးဖြတ်ပေမည်။ အကယ်၍ ပြောင်းရွှေ့နေထိုင်သူများ သို့မဟုတ် တိုင်းရင်းသားများ တိုးများလာကာ အနီးအနားတွင် အသင်းတော်မရှိလျှင် ဘာသာစကားသင်တန်းတစ်ခုသည် အကူအညီဖြစ်စေနိုင်သည်ဟု ဌာနခွဲရုံးမှ ဆုံးဖြတ်ကောင်းဆုံးဖြတ်ပါလိမ့်မည်။ ဤအစီအစဉ်လိုအပ်သည်ဆိုလျှင် ဌာနခွဲရုံးသည် ယင်းသို့လိုအပ်နေသော အနီးအနားရှိ အသင်းတော်များအား ဘာသာစကားသင်တန်းတစ်ခုနှင့်ပတ်သက်၍ ကြေညာမည်ဖြစ်သည်။ ထိုဘာသာစကားသင်တန်းသို့ တက်ရောက်ရန်လျှောက်ထားသူများသည် ထိုဘာသာစကားပြောလယ်ကွင်းကို တိုးတက်စေရန် အကူအညီပေးဖို့ ထိုအုပ်စု သို့မဟုတ် ထိုအသင်းတော်သို့ ပြောင်းရွှေ့မည့်ပန်းတိုင် ရှိသင့်သည်။

၁၀။ နိုင်ငံခြားဘာသာစကားပြောအုပ်စုကိုဖွဲ့စည်းရန် အဘယ်တောင်းဆိုချက်များကို ပြည့်မီရမည်နည်း။ အတည်ပြုချက်ရရှိရန် အကြီးအကဲများ မည်သို့ပြုလုပ်ရမည်နည်း။

^၁၀ အုပ်စုတစ်စုဖွဲ့စည်းခြင်း– သီးခြားဘာသာစကားဖြင့် အုပ်စုတစ်စုဖွဲ့စည်းရာတွင် အခြေခံ လိုအပ်ချက်လေးချက်နှင့် ပြည့်မီရမည်ဖြစ်သည်။ (၁) သီးခြားဘာသာစကားပြောလယ်ကွင်းတွင် စိတ်ဝင်စားသူအတော်အတန်ရှိပြီး တိုးတက်မည့်အလားအလာ ရှိသင့်သည်။ (၂) ကြေညာသူအနည်းငယ်သည် ယင်းဘာသာစကားကို တတ်ကျွမ်းသင့်သည် သို့မဟုတ် ယင်းဘာသာစကားကို သင်ယူနေဆဲဖြစ်သင့်သည်။ (၃) ထိုဘာသာစကားဖြင့် အစည်းအဝေးများကို အနည်းဆုံး တစ်ပတ်လျှင်တစ်ကြိမ် ဦးဆောင်ကျင်းပပေးနိုင်သည့် အရည်အချင်းရှိအကြီးအကဲ သို့မဟုတ် ဓမ္မအမှုထမ်းတစ်ဦးရှိသင့်သည်။ (၄) အကြီးအကဲအဖွဲ့သည် အုပ်စုကို လိုလိုလားလားတာဝန်ယူသင့်သည်။ ယင်းတောင်းဆိုချက်များနှင့် အတော်အသင့်ပြည့်မီသောအခါ အကြီးအကဲအဖွဲ့သည် သီးခြားဘာသာစကားအုပ်စုနှင့်ပတ်သက်၍ ဌာနခွဲရုံးသို့ စာရေးအကြောင်းကြားကာ နိုင်ငံခြားဘာသာစကားပြောအုပ်စုတစ်ခုအား တာဝန်ယူကူညီပေးနေသော အသင်းတော်အဖြစ် တရားဝင်အသိအမှတ်ပြုခံရရန် တောင်းခံပါလိမ့်မည်။ (ဖွဲ့စည်းထားခြင်း၊ စစ. ၁၀၆-၁၀၇) ဦးဆောင်နေသည့် အကြီးအကဲ သို့မဟုတ် ဓမ္မအမှုထမ်းသည် ထိုအုပ်စုအား တာဝန်ယူပေးနေသည့် “အုပ်စုကြီးကြပ်မှူး” သို့မဟုတ် “အုပ်စုအမှုထမ်း” အဖြစ် သတ်မှတ်ခံရပါလိမ့်မည်။

၁၁။ ကျွန်ုပ်တို့၏ ခန့်အပ်ခံရပ်ကွက်ရှိ နိုင်ငံခြားဘာသာစကားပြောလယ်ကွင်းကို တိုးတက်စေခြင်းသည် အဘယ်ကြောင့် အခွင့်ထူးတစ်ခုဖြစ်သနည်း။

^၁၁ ကျွန်ုပ်တို့၏ ခန့်အပ်ခံရပ်ကွက်အတွင်းရှိ နိုင်ငံခြားဘာသာစကားပြောလယ်ကွင်းအား တိုးတက်အောင်ပြုလုပ်ခြင်းသည် ကျွန်ုပ်တို့၏ စံနမူနာရှင် ယေရှုခရစ် လုပ်ဆောင်ခဲ့သော ကမ္ဘာချီဟောပြောခြင်းကင်ပိန်းလုပ်ငန်း၏ အရေးကြီးသည့် အစိတ်အပိုင်းဖြစ်သည်။ ကျွန်ုပ်တို့သည် ကျွန်ုပ်တို့၏ တာဝန်ကိုဇွဲထက်သန်စွာလုပ်ဆောင်ရင်း ယေဟောဝါသည် လူမျိုးအပေါင်းအားလှုပ်ခါ၍ နှစ်သက်ဖွယ်သောအရာများ ကိုယ်တော့်ထံ မည်သို့ရောက်လာမည်ကို ကျွန်ုပ်တို့အားလုံး မြင်တွေ့နိုင်ကြပါစေ။ (ဟဂ္ဂဲ ၂:၇) ဤကြိုးစားအားထုတ်မှုတွင် အပြည့်အဝပူးပေါင်းပါဝင်ရခြင်းသည် ကျေနပ်စရာကောင်းလှပေသည်။ မည်သည့်ဘာသာစကား အတားအဆီးပင်ရှိနေပါစေ ယေဟောဝါသည် ကြီးထွားစေနိုင်တော်မူကြောင်း အမြဲအမှတ်ရကာ ကျွန်ုပ်တို့၏အသင်းတော်နှင့်သက်ဆိုင်သော နိုင်ငံခြားဘာသာစကားပြောလယ်ကွင်း တိုးတက်စေရန် ကျွန်ုပ်တို့၏ တစည်းတလုံးကြိုးစားအားထုတ်မှုများအပေါ် ယေဟောဝါ ကောင်းချီးပေးပါစေ။