ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဒီဇင်ဘာ ၃-၉
ကျမ်းစာထဲက အဖိုးတန်ဘဏ္ဍာများ | တမန်တော် ၉-၁၁
“ရက်စက်တဲ့ နှိပ်စက်သူဟာ စိတ်ထက်သန်တဲ့ သက်သေခံတစ်ဦးဖြစ်လာ”
(တမန်တော် ၉:၁၊ ၂) ရှောလုက သခင့်တပည့်တွေကို ခြိမ်းခြောက်၊ သတ်ဖြတ်ချင်စိတ် ပြင်းထန်နေတဲ့အတွက် ပုရောဟိတ်မင်းဆီ သွားပြီး၊ ၂ ဒမတ်စကတ်မြို့က တရားဇရပ်တွေဆီ အမှာစာရေးပေးပါလို့ တောင်းဆိုတယ်။ သခင့်လမ်းစဉ်လိုက်တဲ့ အမျိုးသားအမျိုးသမီး မှန်သမျှကို ဖမ်းပြီး ဂျေရုဆလင်မြို့ဆီ ခေါ်လာနိုင်ဖို့ပဲ။
အသင်းတော်သည် “ငြိမ်သက်အေးချမ်း” လျက်ရှိ
မျက်နှာထားတင်းမာနေသော ခရီးသည်များသည် မကောင်းသောအကြံအစည်ဖြင့် ဒမတ်စကတ်မြို့အနီးသို့ ရောက်ရှိနေကြပြီ။ သူတို့မုန်းတီးသော ယေရှု၏တပည့်များကို အိမ်ထဲမှ ဆွဲထုတ်ပြီး ချည်နှောင်ကာ အရှက်ခွဲ၍ ဂျူးတရားရုံးချုပ်ရှေ့ စီရင်ခံရရန် ဂျေရုဆလင်မြို့အထိ ဆွဲခေါ်သွားကြပေလိမ့်မည်။
၂ ရှောလုအမည်ရှိသော ထိုအဖွဲ့ခေါင်းဆောင်၏ လက်များသည် သွေးစွန်းခဲ့ပြီ။ အကြောင်းမှာ မကြာသေးမီက သူသည် ဘုရားတရားကိုင်းရှိုင်းသော ယေရှု၏တပည့် သတေဖန်ကို အစွန်းရောက်သမားများ ခဲနှင့်ပေါက်သတ်မှုတွင် အလိုတူအလိုပါ ဖြစ်ခဲ့သည်။ (တ. ၇:၅၇–၈:၁) ရှောလုသည် ဂျေရုဆလင်မြို့ရှိ ယေရှု၏နောက်လိုက်များအား နှိပ်စက်ရသည်ကို အားမရသေးဘဲ နှိပ်စက်မှုမီး ကူးစက်အောင် မီးထိုးယပ်ခပ်ပေးလျက်ရှိသည်။ သူသည် “သခင်၏လမ်းစဉ်” ဟု လူသိများသော အန္တရာယ်ဂိုဏ်းကို မျိုးဖြုတ်လို၏။—တ. ၉:၁၊ ၂။ စာမျက်နှာ ၆၁ မှ “ဒမတ်စကတ်မြို့တွင် ရှောလု၏အခွင့်အာဏာ” လေးထောင့်ကွက်ကိုရှု။
(တ ၉:၁၅၊ ၁၆) ဒါပေမဲ့ သခင်က “သွားသာသွားပါ။ ဒီလူဟာ လူမျိုးခြားတွေနဲ့ ရှင်ဘုရင်တွေကိုရော အစ္စရေးလူမျိုးကိုပါ ငါ့အကြောင်း သက်သေခံဖို့ ငါရွေးချယ်ထားသူပဲ။ ၁၆ ငါ့နာမည်အကြောင်း ဟောပြောတဲ့အတွက် ဘယ်လောက် ဒုက္ခခံရမယ်ဆိုတာ သူကောင်းကောင်းသိအောင် ငါပြမယ်” လို့ ပြောတယ်။
အိုးထိန်းရှင်ယေဟောဝါကို တန်ဖိုးထားလေးမြတ်ပါ
၄ ယေဟောဝါက လူတွေကို အပြင်ပန်းလောက်ပဲ မကြည့်ဘူး။ အဲဒီအစား လူတွေရဲ့စိတ်နှလုံးကို စစ်ဆေးတယ်။ (၁ ဓမ္မရာဇဝင် ၁၆:၇ခ ကိုဖတ်ပါ။) ခရစ်ယာန်အသင်းတော်ကို ယေဟောဝါ ဖွဲ့စည်းချိန်မှာ အဲဒီအချက် ပေါ်လွင်တယ်။ လူ့အမြင်မှာ နှစ်သက်စရာမကောင်းသူလို့ ထင်ရသူများစွာကို မိမိကိုယ်တိုင်နဲ့ သားတော်ဆီ ဘုရားသခင် ဆွဲဆောင်ခဲ့တယ်။ (ယော. ၆:၄၄) အဲဒီလိုလူတွေထဲက တစ်ယောက်ကတော့ ဖာရိရှဲ ရှောလုပဲ။ သူဟာ “ဘုရားကိုစော်ကားသူ၊ ညှဉ်းပန်းနှိပ်စက်သူ၊ ရိုင်းစိုင်းသောသူ” ဖြစ်တယ်။ (၁ တိ. ၁:၁၃) ဒါပေမဲ့ ‘စိတ်နှလုံးကို စစ်’ တဲ့အရှင်ကတော့ ရှောလုကို အသုံးမဝင်တဲ့ ရွှံ့မြေအဖြစ် မယူဆဘူး။ (သု. ၁၇:၃) အဲဒီအစား နှစ်သက်စရာကောင်းသူ ဖြစ်လာအောင် ပုံသွင်းနိုင်တဲ့ရွှံ့မြေအဖြစ် ရှုမြင်တယ်။ ‘လူမျိုးခြားတွေ၊ ရှင်ဘုရင်တွေနဲ့ အစ္စရေးလူမျိုးကို’ သတင်းကောင်းဟောပြောဖို့ သူ့ကို ဘုရားရွေးကောက်ခဲ့တယ်။ (တ. ၉:၁၅) “အိုးမြတ်” အဖြစ် ပုံသွင်းဖို့ ဘုရားရွေးချယ်တဲ့ တခြားသူတွေထဲမှာ အရက်သမားတွေ၊ အကျင့်ပျက်သူတွေ၊ သူခိုးတွေ ပါဝင်တယ်။ (ရော. ၉:၂၁။ ၁ ကော. ၆:၉-၁၁) ကျမ်းစာလေ့လာပြီး ယေဟောဝါအပေါ် ယုံကြည်ခြင်း ခိုင်မာလာတာနဲ့အမျှ ယေဟောဝါ ပုံသွင်းပေးတာကို သူတို့ လက်ခံကြတယ်။
(တမန်တော် ၉:၂၀-၂၂) တရားဇရပ်တွေဆီ ချက်ချင်းသွားပြီး ယေရှုဟာ ဘုရားသခင်ရဲ့သား ဖြစ်တဲ့အကြောင်း စပြီးဟောပြောတော့တယ်။ ၂၁ ကြားတဲ့သူတွေက တအံ့တသြဖြစ်ပြီး “ဒီလူဟာ ဂျေရုဆလင်မြို့မှာရှိတဲ့ ယေရှုနာမည်ယုံကြည်သူတိုင်းကို အကြီးအကျယ် ဒုက္ခပေးတဲ့သူပဲ။ သူ ဒီကိုလာတာလည်း သူတို့ကို ဖမ်းဆီးပြီး ပုရောဟိတ်မင်းတွေဆီ ခေါ်သွားဖို့ မဟုတ်လား” လို့ ပြောကြတယ်။ ၂၂ ရှောလုက ဟောပြောရာမှာ ပိုထိရောက် ပိုင်နိုင်လာတဲ့အပြင် ယေရှုဟာ ခရစ်တော်ပဲဆိုတာကို ကျိုးကြောင်းဆင်ခြင်ပြီး ပြောပြတဲ့အတွက် ဒမတ်စကတ်မြို့မှာရှိတဲ့ ဂျူးတွေ တအံ့တသြဖြစ်ကုန်တယ်။
အသင်းတော်သည် “ငြိမ်သက်အေးချမ်း” လျက်ရှိ
၁၅ တရားဇရပ်များတွင် ယေရှုအကြောင်း ရှောလု စတင်ဟောပြောသောအခါ လူအုပ်သည် အံ့သြမှင်တက်သွားပြီး ပို၍ဒေါသထွက်လာသည်ကို သင် မြင်ယောင်ကြည့်နိုင်သလော။ “ဤသူကား ယေရှု၏နာမကို ခေါ်သောသူတို့အား ဂျေရုဆလင်မြို့၌ အကြီးအကျယ် နှိပ်စက် . . . သောသူ မဟုတ်လော” ဟုသူတို့မေးကြသည်။ (တ. ၉:၂၁) ယေရှုနှင့်ပတ်သက်၍ မိမိ၏သဘောထား ပြောင်းလဲရသည့်အကြောင်း ရှင်းပြချိန်တွင် ရှောလုက “ယေရှုသည် ခရစ်တော်ဖြစ်ကြောင်း အထောက်အထားခိုင်လုံစွာ ဖော်ပြ” ခဲ့သည်။ (တ. ၉:၂၂) သို့ရာတွင် ထိုခိုင်လုံသောအထောက်အထားကို လူတိုင်း မယုံနိုင်ကြချေ။ ၎င်းသည် ထုံးတမ်းစဉ်လာနှင့် မာန်မာနတို့၏ ချုပ်နှောင်မှုခံရသူများကို မပြောင်းလဲပေးနိုင်ပေ။ သို့တိုင် ရှောလုသည် လက်မြှောက်အရှုံးမပေးခဲ့ချေ။
ရှာဖွေလေ့လာ ဘုရားရေးရာရတနာ
(တမန်တော် ၉:၄) သူ မြေပေါ်လဲသွားတဲ့အခါ “ရှောလု၊ ရှောလု၊ ငါ့ကို ဘာလို့ နှိပ်စက်ညှဉ်းဆဲနေတာလဲ” ဆိုတဲ့အသံ ကြားလိုက်ရတယ်။
အသင်းတော်သည် “ငြိမ်သက်အေးချမ်း” လျက်ရှိ
၅ ဒမတ်စကတ်မြို့သို့ အသွားလမ်းပေါ်တွင် ရှောလုကို ယေရှုတားဆီးသောအခါ “အဘယ်ကြောင့် ငါ့တပည့်များကို ညှဉ်းဆဲသနည်း” ဟုမမေးခဲ့ချေ။ အထက်တွင် ဖော်ပြခဲ့သည့်အတိုင်း ကိုယ်တော်က “အဘယ်ကြောင့် ငါ့ကိုညှဉ်းဆဲသနည်း” ဟုမိန့်ဆို၏။ (တ. ၉:၄) မှန်ပါသည်၊ ယေရှုသည် မိမိနောက်လိုက်များ ခံစားရသော ဆင်းရဲဒုက္ခများကို မိမိကိုယ်တိုင်ခံစားရ၏။—မ. ၂၅:၃၄-၄၀၊ ၄၅။
၆ သင်သည် ခရစ်တော်ကိုယုံကြည်သည့်အတွက် ဆန့်ကျင်မှုခံရလျှင် သင်၏အခြေအနေကို ယေဟောဝါဘုရားနှင့်ယေရှု သိရှိကြောင်း ယုံကြည်စိတ်ချပါ။ (မ. ၁၀:၂၂၊ ၂၈-၃၁) လောလောဆယ်တွင် သင်၏ဆင်းရဲဒုက္ခကို ဖယ်ရှားမပေးဘဲ နေပေမည်။ သို့သော် သတေဖန်အား ကွပ်မျက်မှုတွင် ရှောလု ပါဝင်ပတ်သက်သည်ကိုလည်းကောင်း၊ ဂျေရုဆလင်မြို့တွင် သစ္စာရှိတပည့်များအား အိမ်ထဲမှ ရှောလုဆွဲချသည်ကိုလည်းကောင်း ယေရှုမြင်တွေ့ကြောင်း သတိရပါ။ (တ. ၈:၃) သို့တိုင် ယေရှုသည် ထိုအချိန်တွင် ကြားဝင်ဆောင်ရွက်ပေးခြင်း မရှိချေ။ သို့သော် သတေဖန်နှင့် တခြားတပည့်များ ဆက်လက်သစ္စာတည်ကြည်နိုင်ရန် လိုအပ်သည့်ခွန်အားကို ခရစ်တော်မှတစ်ဆင့် ယေဟောဝါဘုရား ပေးသနားတော်မူခဲ့သည်။
(တမန်တော် ၁၀:၆) ပင်လယ်ကမ်းနားက သားရေနယ်လုပ်သား ရှိမုန်ရဲ့အိမ်မှာ သူတည်းခိုနေတယ်” လို့မှာတယ်။
nwtsty တ ၁၀:၆ လေ့လာမှု မှတ်စု
သားရေနယ်လုပ်သား ရှိမုန်– သားရေနယ်လုပ်သားတစ်ဦးဟာ တိရစ္ဆာန်အရေခွံကနေ အမွေးတွေ၊ အသားစနဲ့ အဆီစတွေကို ထုံးရည်နဲ့ ချွတ်ပြီး ဆေးကြောရတယ်။ အဲဒီသားရေကို သားရေပစ္စည်းတွေ လုပ်နိုင်အောင် ပြင်းတဲ့အရက်ထဲ စိမ်ထားရတယ်။ သားရေနယ်လုပ်ငန်းဟာ အရမ်းနံစော်တဲ့အလုပ် ဖြစ်တယ်။ ရေအတော်များများလည်း အသုံးပြုရတယ်။ ဒါကြောင့် ရှိမုန်ရဲ့အိမ်ဟာ ယုပ္ပေမြို့ပြင် ပင်လယ်ကမ်းနားမှာ ရှိတာဖြစ်နိုင်တယ်။ မောရှေပညတ်အရ တိရစ္ဆာန်အသေကောင်တွေကို အမြဲထိတွေ့နေရတဲ့ အလုပ် လုပ်သူဟာ ဘာသာရေးအရ မစင်ကြယ်ဘူး။ (ဝ ၅:၂။ ၁၁:၃၉) ဒါကြောင့် ဂျူးတွေက သားရေလုပ်သားတွေကို အထင်သေးကြလို့ သူတို့အိမ်မှာ တည်းခိုဖို့ မစဉ်းစားကြဘူး။ သားရေလုပ်ငန်းဟာ မစင်ကျုံးတဲ့ အလုပ်ထက်တောင် ပိုနိမ့်ကျတယ်လို့ နောက်ပိုင်းမှာ တာလ်မွဒ်ကျမ်းက ဖော်ပြထားတယ်။ ပေတရုကျတော့ အဲဒီလို စိတ်စွန်းကွက်တဲ့ သဘောထားမရှိလို့ ရှိမုန်ရဲ့အိမ်မှာ တည်းခိုခဲ့တာဖြစ်မယ်။ ဒီကိစ္စနဲ့ပတ်သက်လို့ ပေတရု သဘောထားကြီးတာက စိတ်ဝင်စားစရာပဲ။ အဲဒါကြောင့်လည်း ဂျူးမဟုတ်သူတစ်ဦးရဲ့ အိမ်ကို သွားဟောရတဲ့တာဝန် ရခဲ့တာ ဖြစ်နိုင်တယ်။ “သားရေလုပ်သား” (ဘိုင်စီအပ်စ်) အတွက် ဂရိစကားလုံးဟာ ရှိမုန်ရဲ့ မိသားစုအမည် ဖြစ်နိုင်တယ်လို့ ပညာရှင်တချို့က ဆိုတယ်။
ကျမ်းစာဖတ်ရှုခြင်း
(တမန်တော် ၉:၁၀-၂၂) ဒမတ်စကတ်မြို့မှာ အာနနိဆိုတဲ့ တပည့်တစ်ယောက်ရှိတယ်။ သခင်က စိတ်အာရုံထဲမှာ ပေါ်လာပြီး “အာနနိ” လို့ခေါ်တော့ အာနနိက “ရှိပါတယ်၊ သခင်” လို့ထူးတယ်။ ၁၁ သခင်က “ထပါ၊ လမ်းဖြောင့်လို့ခေါ်တဲ့ လမ်းကို သွားပါ။ တာရှုမြို့သား ရှောလုကို ယုဒရဲ့အိမ်မှာ သွားရှာပါ။ အခု သူ ဆုတောင်းနေတယ်။ ၁၂ အာနနိလို့ခေါ်တဲ့ လူတစ်ယောက် ရောက်လာပြီး လက်တင်တဲ့အခါ မျက်စိပြန်မြင်လာတဲ့အကြောင်း စိတ်အာရုံထဲမှာ သူမြင်ထားတယ်” လို့ပြောတယ်။ ၁၃ အဲဒီအခါ အာနနိက “သခင်၊ အဲဒီလူဟာ ဂျေရုဆလင်မြို့မှာ သခင့်ရဲ့ သန့်ရှင်းသူတွေကို တော်တော်ဒုက္ခပေးတယ်လို့ ပြောဆိုနေကြတာ ကျွန်တော်ကြားတယ်။ ၁၄ အခုလည်း သခင့်နာမည်ယုံကြည်သူတိုင်းကို ဖမ်းဖို့ ပုရောဟိတ်မင်းတွေဆီက ခွင့်ပြုချက်ရထားလို့ သူဒီကိုရောက်နေတာ” လို့ပြောတယ်။ ၁၅ ဒါပေမဲ့ သခင်က “သွားသာသွားပါ။ ဒီလူဟာ လူမျိုးခြားတွေနဲ့ ရှင်ဘုရင်တွေကိုရော အစ္စရေးလူမျိုးကိုပါ ငါ့အကြောင်း သက်သေခံဖို့ ငါရွေးချယ်ထားသူပဲ။ ၁၆ ငါ့နာမည်အကြောင်း ဟောပြောတဲ့အတွက် ဘယ်လောက်ဒုက္ခခံရမယ်ဆိုတာ သူကောင်းကောင်းသိအောင် ငါပြမယ်” လို့ပြောတယ်။ ၁၇ ဒါနဲ့ အာနနိက အဲဒီအိမ်ကို ရောက်သွားတဲ့အခါ ရှောလုအပေါ် လက်ကိုတင်ပြီး “ညီအစ်ကို ရှောလု၊ ဒီကိုလာတုန်းက ခင်ဗျားကို လမ်းမှာထင်ရှားပြတဲ့ သခင်ယေရှုက ကျွန်တော့်ကို လွှတ်လိုက်တာ။ ခင်ဗျားကို မျက်စိပြန်မြင်လာအောင်၊ သန့်ရှင်းသော စွမ်းအားတော်နဲ့ ပြည့်အောင် လုပ်ပေးဖို့ပါ” လို့ ပြောတယ်။ ၁၈ ချက်ချင်းပဲ ရှောလုရဲ့မျက်စိကနေ အကြေးခွံလိုမျိုး ကွာကျလာပြီး မျက်စိပြန်မြင်လာတယ်။ အဲဒီနောက် သူ ထပြီး နှစ်ခြင်းခံတယ်။ ၁၉ အစာစားပြီး အားအင်ပြန်ပြည့်လာတယ်။ ရှောလုက ဒမတ်စကတ်မြို့မှာ တပည့်တွေနဲ့ ရက်အနည်းငယ် နေပြီးတဲ့နောက်၊ ၂၀ တရားဇရပ်တွေဆီ ချက်ချင်းသွားပြီး ယေရှုဟာ ဘုရားသခင်ရဲ့သား ဖြစ်တဲ့အကြောင်း စပြီးဟောပြောတော့တယ်။ ၂၁ ကြားတဲ့သူတွေက တအံ့တသြဖြစ်ပြီး “ဒီလူဟာ ဂျေရုဆလင်မြို့မှာရှိတဲ့ ယေရှုနာမည်ယုံကြည်သူတိုင်းကို အကြီးအကျယ် ဒုက္ခပေးတဲ့သူပဲ။ သူ ဒီကိုလာတာလည်း သူတို့ကို ဖမ်းဆီးပြီး ပုရောဟိတ်မင်းတွေဆီ ခေါ်သွားဖို့ မဟုတ်လား” လို့ ပြောကြတယ်။ ၂၂ ရှောလုက ဟောပြောရာမှာ ပိုထိရောက် ပိုင်နိုင်လာတဲ့အပြင် ယေရှုဟာ ခရစ်တော်ပဲဆိုတာကို ကျိုးကြောင်းဆင်ခြင်ပြီး ပြောပြတဲ့အတွက် ဒမတ်စကတ်မြို့မှာရှိတဲ့ ဂျူးတွေ တအံ့တသြဖြစ်ကုန်တယ်။
ဒီဇင်ဘာ ၁၀-၁၆
ကျမ်းစာထဲက အဖိုးတန်ဘဏ္ဍာများ | တမန်တော် ၁၂-၁၄
“ဗာနဗနဲ့ ပေါလု ရပ်ဝေးတွေဆီသွားပြီး လူတွေကို တပည့်ဖြစ်စေကြ”
(တမန်တော် ၁၃:၂၊ ၃) သူတို့က ယေဟောဝါရဲ့ အမှုတော်ကို ဆောင်ရွက်ပြီး အစာရှောင်နေတုန်း သန့်ရှင်းသော စွမ်းအားတော်က “ဗာနဗနဲ့ ရှောလုကို ငါ့အတွက် ရွေးချယ်လိုက်ပါ။ သူတို့ကို တာဝန်ပေးစရာရှိတယ်” လို့ပြောတယ်။ ၃ ဒါနဲ့ သူတို့ အစာရှောင်ဆုတောင်းပြီးတဲ့နောက် ဗာနဗနဲ့ ရှောလုအပေါ် လက်တင်ပြီး လွှတ်လိုက်ကြတယ်။
“ဝမ်းမြောက်ခြင်းနှင့်လည်းကောင်း၊ သန့်ရှင်းသော စွမ်းအားတော်နှင့်လည်းကောင်း ပြည့်လျက်ရှိကြ”
၄ သို့သော် “အမှုတော်ကို” ဆောင်ရွက်ရန် ဗာနဗနှင့်ရှောလုကို သီးသန့်ရွေးထားဖို့ သန့်ရှင်းသောစွမ်းအားတော်က အဘယ်ကြောင့် တိတိကျကျ ညွှန်ကြားသနည်း။ (တ. ၁၃:၂) သမ္မာကျမ်းစာက မဖော်ပြပါ။ ထိုအမျိုးသားများကို ရွေးချယ်ရန် သန့်ရှင်းသောစွမ်းအားတော် ညွှန်ကြားသည်ကိုသာ ကျွန်ုပ်တို့သိကြ၏။ ထိုဆုံးဖြတ်ချက်ကို အန္တိအုတ်မြို့ရှိ ပရောဖက်များနှင့် ဆရာများက သဘောမတူကြောင်း မဖော်ပြထားပါ။ သို့အစား ထိုခန့်အပ်ချက်ကို သူတို့အပြည့်အဝ ထောက်ခံခဲ့ကြသည်။ ခရစ်ယာန်ညီအစ်ကိုများသည် မနာလိုမဖြစ်ဘဲ “အစာရှောင်၍ ဆုတောင်းပြီးလျှင် သူတို့အပေါ် လက်ကိုတင်ပြီးမှ စေလွှတ်လိုက်” သောအခါ ဗာနဗနှင့်ရှောလု မည်သို့ခံစားရမည်ကို မြင်ယောင်ကြည့်ပါ။ (တ. ၁၃:၃) ကျွန်ုပ်တို့လည်း အသင်းတော်ကြီးကြပ်မှူးများအဖြစ် ခန့်အပ်ခံရသော အမျိုးသားများအပါအဝင် သီအိုကရက်တစ်တာဝန်များ ရရှိသူတို့ကို ထောက်မပေးသင့်သည်။ ထိုသို့သောအခွင့်ထူး ရရှိသူများကို မနာလိုမဖြစ်ဘဲ “သူတို့၏အလုပ်ကို ထောက်ရှု၍ သူတို့ကို ချစ်ခြင်းမေတ္တာဖြင့် သာ၍ရိုသေလေးစား” သင့်ပါသည်။—၁ သက်. ၅:၁၃။
(တမန်တော် ၁၃:၁၂) အဲဒီအဖြစ်ကို မြင်တဲ့အခါ နယ်စားမင်းက ယေဟောဝါ နဲ့ပတ်သက်ပြီး သူသိလာတဲ့အရာတွေကြောင့် အံ့သြပြီး ယုံကြည်သူဖြစ်လာတယ်။
(တမန်တော် ၁၃:၄၈) ဒါကို လူမျိုးခြားတွေကြားတဲ့အခါ ဝမ်းသာအားရနဲ့ ယေဟောဝါရဲ့ တရားစကားကို ချီးမွမ်းကြတယ်။ ထာဝရအသက်ရဖို့ စိတ်ရင်းမှန်နဲ့ ကြိုးစားတဲ့သူတွေဟာ ယုံကြည်သူတွေ ဖြစ်လာကြတယ်။
(တမန်တော် ၁၄:၁) ပေါလုနဲ့ ဗာနဗက အိကောနိမြို့ကို ရောက်လာတဲ့အခါ ဂျူးတရားဇရပ်ထဲ ဝင်ပြီး ထိထိရောက်ရောက် ဟောပြောတဲ့အတွက် ဂျူးနဲ့ဂရိလူမျိုး အတော်များများ ယုံကြည်သူတွေ ဖြစ်လာတယ်။
“ယေဟောဝါဘုရား၏ အခွင့်အာဏာဖြင့် ရဲရင့်စွာဟောပြောကြ”
၅ ပေါလုနှင့်ဗာနဗတို့သည် ဦးဆုံး ဣကောနိမြို့တွင် ရပ်နားကြ၏။ ၎င်းမြို့သည် ဂရိယဉ်ကျေးမှုကို ထိန်းသိမ်းသောမြို့၊ ရောမလက်အောက်ခံ ဂလာတိပြည်ရှိ အရေးပါသောမြို့တစ်မြို့ ဖြစ်သည်။ ထိုမြို့တွင် ဩဇာရှိသော ဂျူးအသိုင်းအဝိုင်းတစ်ခုရှိပြီး ဂျူးလူမျိုးမဟုတ်သော ဘာသာပြောင်းဝင်လာသူ အတော်များများလည်း ရှိသည်။ ထုံးစံရှိသည့်အတိုင်း ပေါလုနှင့် ဗာနဗတို့သည် တရားဇရပ်သို့ဝင်၍ ဟောပြောကြ၏။ (တ. ၁၃:၅၊ ၁၄) သူတို့သည် “ကောင်းစွာဟောပြောသဖြင့် ဂျူးတို့နှင့် ဂရိလူ အမြောက်အမြားတို့သည် ယုံကြည်သူများ ဖြစ်လာကြ၏။”—တ. ၁၄:၁။
(တမန်တော် ၁၄:၂၁၊ ၂၂) အဲဒီမြို့မှာ သတင်းကောင်းဟောပြီး လူအတော်များများကို တပည့်ဖြစ်လာစေပြီးတဲ့နောက် လုတ္တရမြို့၊ အိကောနိမြို့၊ အန္တိအုတ်မြို့ဆီ ပြန်သွားကြတယ်။ ၂၂ “ကျွန်တော်တို့က ဒုက္ခအများကြီးခံပြီးမှ ဘုရားသခင့် နိုင်ငံတော် ဝင်ရမယ်” လို့ပြောပြီး အဲဒီမြို့တွေမှာရှိတဲ့ တပည့်တွေကို ယုံကြည်ခြင်း ခိုင်ခံ့နေဖို့ အားပေးတိုက်တွန်းတယ်။
“ဆင်းရဲဒုက္ခများစွာခံ” ရတဲ့ကြားမှာ ဘုရားသခင်ကို သစ္စာရှိရှိ အမှုဆောင်ပါ
၄ ပေါလုနဲ့ ဗာနဗဟာ ဒေရဗေမြို့ကို လည်ပတ်ပြီးနောက်မှာ “လုတ္တရမြို့၊ ဣကောနိမြို့၊ အန္တိအုတ်မြို့သို့ ပြန်သွားပြီးလျှင်၊ ‘ငါတို့သည် ဆင်းရဲဒုက္ခများစွာခံ၍ ဘုရားသခင်၏နိုင်ငံတော်သို့ ဝင်ကြရမည်’ ဟုဆိုလျက် တပည့်တော်တို့ကို မြဲမြံခိုင်ခံ့စေရန် ယုံကြည်ခြင်း၌ တည်မြဲတည်နေမည်အကြောင်း အားပေးတိုက်တွန်းကြ၏။” (တ. ၁၄:၂၁၊ ၂၂) “ဆင်းရဲဒုက္ခများစွာခံ” ရမယ်ဆိုတဲ့စကားက အားပေးစကားနဲ့ မတူသလိုပဲ။ ဒါဆိုရင် ဆင်းရဲဒုက္ခများစွာခံရမယ်လို့ ပေါလုနဲ့ ဗာနဗ ပြောတဲ့စကားက တပည့်တော်တွေကို ဘယ်လိုနည်းနဲ့ “အားပေးတိုက်တွန်း” မှုဖြစ်စေခဲ့သလဲ။
၅ ပေါလုရဲ့စကားတွေမှာ အဖြေတွေ့နိုင်ပါတယ်။ သူက “ငါတို့သည် ဆင်းရဲဒုက္ခများစွာခံ၍ ဘုရားသခင်၏နိုင်ငံတော်သို့ ဝင်ကြရမည်” လို့ပြောခဲ့တာဖြစ်တယ်။ “ဆင်းရဲဒုက္ခများစွာခံရ” မယ်လို့ပဲ မပြောခဲ့ဘူး။ ပေါလုက ဘုရားသခင်အပေါ် ဆက်သစ္စာရှိသူတွေ ရရှိမယ့်ဆုအကြောင်း အလေးပေးပြောခဲ့တယ်။ ဒီဆုက စိတ်ကူးယဉ်အိပ်မက်တစ်ခု မဟုတ်ဘူး။ “အဆုံးတိုင်အောင် ခံနိုင်ရည်ရှိသူသည် ကယ်တင်ခြင်းရလိမ့်မည်” လို့ ယေရှုပြောခဲ့တယ်။—မ. ၁၀:၂၂။
ရှာဖွေလေ့လာ ဘုရားရေးရာရတနာ
(တမန်တော် ၁၂:၂၁-၂၃) လူတွေစုဝေးကြတဲ့ နေ့တစ်နေ့ မှာ ဟေရုဒ်မင်းက မင်းဝတ်တန်ဆာတွေ ဝတ်ဆင်ပြီး တရားပလ္လင်ပေါ် ထိုင်နေတယ်။ ပြည်သူတွေကို သူမိန့်ခွန်းပြောတဲ့အခါ၊ ၂၂ စုဝေးနေသူတွေက “ဒါ လူရဲ့အသံ မဟုတ်ဘူး။ ဘုရားရဲ့ အသံပဲ” လို့ ကြွေးကြော်ကြတယ်။ ၂၃ ချက်ချင်းပဲ သူ့ကို ယေဟောဝါရဲ့ ကောင်းကင်တမန် ဒဏ်ခတ်လိုက်တဲ့အတွက် သန်ကောင်ထိုးပြီး ကွယ်လွန်သွားတယ်။ ဘုရားသခင်ပဲ ရထိုက်တဲ့ ချီးမွမ်းဂုဏ်တင်မှုကို သူခံယူခဲ့လို့ပဲ။
တမန်တော်ကျမ်းမှ ပေါ်လွင်ချက်များ
၁၂:၂၁-၂၃။ ၁၄:၁၄-၁၈။ ဟေရုဒ်သည် ဘုရားသခင်ကိုသာ ပေးသင့်သော ဂုဏ်အသရေတော်ကို လွယ်လွယ်ပင်လက်ခံခဲ့သည်။ မိမိတို့မရထိုက်သောချီးမွမ်းဂုဏ်တင်မှုကို ချက်ချင်း၊ ပြတ်ပြတ်သားသားငြင်းပယ်ကြသော ပေါလု၊ ဗာနဗနှင့် အခြားကြီးခြားနားလှသည်! ယေဟောဝါ၏လုပ်ငန်းတွင် ကျွန်ုပ်တို့ရရှိကောင်းရရှိမည့် အဘယ်ပြီးမြောက်အောင်မြင်မှုအတွက်မဆို ဂုဏ်တင်ချီးမွမ်းခြင်းရလိုသည့်စိတ်မရှိသင့်ပါ။
(တမန်တော် ၁၃:၉) ပေါလုလို့လည်းခေါ်တဲ့ ရှောလုက သန့်ရှင်းသော စွမ်းအားတော်နဲ့ ပြည့်ပြီး ဧလုမကို စိုက်ကြည့်လိုက်တယ်။
nwtsty တ ၁၃:၉ လေ့လာမှု မှတ်စု
ပေါလုလို့လည်းခေါ်တဲ့ ရှောလု– ဒီအချိန်ကစပြီး ရှောလုကို ပေါလုလို့ ဖော်ပြတယ်။ သူဟာ ဟီဘရူးလူမျိုးဖြစ်ပေမဲ့ ရောမနိုင်ငံသားအဖြစ် မွေးဖွားခဲ့တယ်။ (တ ၂၂:၂၇၊ ၂၈။ ဖိ ၃:၅) ဒါကြောင့် ငယ်ငယ်ကတည်းက သူ့မှာ ဟီဘရူးအမည် ရှောလုနဲ့ ရောမအမည် ပေါလုဆိုပြီး နာမည်နှစ်မျိုး ရှိပုံပေါက်တယ်။ အဲဒီခေတ်က အထူးသဖြင့် အစ္စရေးနိုင်ငံပြင်ပမှာ နေတဲ့ ဂျူးတွေဆီမှာ နာမည်နှစ်မျိုးရှိတာ မဆန်းဘူး။ (တ ၁၂:၁၂။ ၁၃:၁) ပေါလုရဲ့ ဆွေမျိုးတချို့မှာလည်း ရောမနာမည်နဲ့ ဂရိနာမည် ရှိခဲ့ကြတယ်။ (ရ ၁၆:၇၊ ၂၁) ပေါလုဟာ “လူမျိုးခြားတွေနဲ့ဆိုင်တဲ့ တမန်တော်” ဖြစ်တဲ့အတွက် ဂျူးမဟုတ်သူတွေကို သတင်းကောင်း ဟောပြောဖို့ တာဝန်ရခဲ့တယ်။ (ရ ၁၁:၁၃) သူ့ကို လူအများ ပိုလက်ခံနိုင်လိမ့်မယ်လို့ ထင်ပြီး ရောမနာမည်ကို အသုံးပြုဖို့ ဆုံးဖြတ်ခဲ့ပုံရတယ်။ (တ ၉:၁၅။ ဂ ၂:၇၊ ၈) သေရဂိပေါလုကို ဂုဏ်ပြုတဲ့အနေနဲ့ သူ ရောမနာမည် ခံယူခဲ့တယ်လို့ တချို့က ထင်ကြေးပေးကြတယ်။ ဒါပေမဲ့ ဆိုက်ပရပ်ကျွန်းကနေ ထွက်ခွာပြီးနောက်မှာတောင် အဲဒီနာမည်ကို ဆက်ခံယူထားလို့ အဲဒီလို ဖြစ်ချင်မှဖြစ်မယ်။ ရှောလုဆိုတဲ့ ဟီဘရူးနာမည်ရဲ့ ဂရိအသံထွက်ဟာ ကားရားကားရား လျှောက်သူ (ဒါမှမဟုတ် သတ္တဝါ) လို့အဓိပ္ပာယ်ရှိတဲ့ ဂရိစကားလုံးရဲ့ အသံထွက်နဲ့တူလို့ ဟီဘရူးနာမည် မသုံးတာ ဖြစ်နိုင်တယ်ဆိုပြီး တချို့ဆိုတယ်။—တ ၇:၅၈ လေ့လာမှု မှတ်စုကို ကြည့်ပါ။
ပေါလု– လက်တင်စကား ပေါလပ်စ်ကနေ ဆင်းသက်တဲ့ ပေါလော့စ်ဆိုတဲ့နာမည်ရဲ့ အဓိပ္ပာယ်က “သေးတယ်၊ ငယ်တယ်” ဖြစ်ပြီး တမန်တော်ပေါလုနဲ့ ပတ်သက်ရင် ၁၅၇ ကြိမ်၊ ဆိုက်ပရပ်ကျွန်းက နယ်စားမင်း သေရဂိပေါလုနဲ့ ပတ်သက်ရင် တစ်ကြိမ် ခရစ်ယာန်ဂရိကျမ်းစောင်တွေမှာ အသုံးပြုထားတယ်။—တ ၁၃:၇။
ကျမ်းစာဖတ်ရှုခြင်း
(တမန်တော် ၁၂:၁-၁၇) အဲဒီအချိန်မှာ ဟေရုဒ်မင်းက အသင်းတော်ထဲက တချို့ကို စတင်ညှဉ်းဆဲတော့တယ်။ ၂ ယောဟန်ရဲ့အစ်ကို ယာကုပ်ကိုလည်း ဓားနဲ့ ကွပ်မျက်လိုက်တယ်။ ၃ ဒါကို ဂျူးတွေသဘောကျမှန်း ဟေရုဒ်မင်း သိတဲ့အခါ ပေတရုကိုလည်း ဖမ်းလိုက်တယ်။ (တဆေးမဲ့မုန့်ပွဲတော် ကျင်းပနေချိန်ဖြစ်တယ်။) ၄ပေတရုကို ဖမ်းဆီးပြီးနောက် ပသခါပွဲ ပြီးမှ လူတွေရှေ့ထုတ်ပြီး စစ်ဆေးမယ်ဆိုတဲ့အကြံနဲ့ ထောင်ချထားလိုက်တယ်။ သူ့ကို စစ်သည်လေးယောက်စီ အလှည့်ကျ စောင့်ကြပ်တယ်။ ၅ ပေတရု ထောင်ကျနေချိန်မှာ အသင်းတော်က သူ့အတွက် ဘုရားသခင်ဆီ စိတ်အားထက်သန်စွာ ဆုတောင်းပေးနေကြတယ်။ ၆ ဟေရုဒ်မင်း မထုတ်ခင်ညမှာ ပေတရုက စစ်သည်နှစ်ယောက်ကြားမှာ အိပ်ပျော်နေတယ်။ သူ့ကို သံကြိုးနှစ်ချောင်းနဲ့ ချည်နှောင်ထားပြီး ထောင်တံခါးရှေ့မှာ အစောင့်တွေ စောင့်ကြပ်နေတယ်။ ၇ အဲဒီအခါ ယေဟောဝါရဲ့ ကောင်းကင်တမန် ပေါ်လာပြီး ထောင်ခန်းတစ်ခုလုံး လင်းထိန်သွားတယ်။ ကောင်းကင်တမန်က ပေတရုရဲ့နံဘေးကို ပုတ်ပြီး “မြန်မြန်ထပါ” လို့ နှိုးတယ်။ ပေတရုလက်ကနေ သံကြိုးတွေ ကျွတ်ကျသွားတယ်။ ၈ ကောင်းကင်တမန်က “အဝတ်ကို အသေအချာဝတ်ပြီး ဖိနပ်စီးပါ” လို့ပြောတဲ့အတွက် အဲဒီအတိုင်း ပေတရုလုပ်တယ်။ “ဝတ်ရုံခြုံပြီး လိုက်ခဲ့” လို့ ထပ်ပြောတော့၊ ၉ ပေတရုလည်း ထောင်ခန်းထဲက ထွက်ပြီး နောက်ကနေ လိုက်သွားတယ်။ ကောင်းကင်တမန် လုပ်နေတာတွေကို တကယ့်အဖြစ်မှန်လို့ မထင်ဘဲ စိတ်အာရုံမြင်နေတာလို့ သူထင်နေတယ်။ ၁၀ ပထမအစောင့်တပ်နဲ့ ဒုတိယအစောင့်တပ်ကို ကျော်ဖြတ်ပြီး မြို့ထဲဝင်တဲ့ သံတံခါးနားကို ရောက်တဲ့အခါ တံခါး အလိုလိုပွင့်သွားတယ်။ သူတို့ထွက်လာပြီးနောက် လမ်းအတိုင်း ဆက်လျှောက်လာတဲ့အခါ ကောင်းကင်တမန်က ရုတ်တရက် ထွက်ခွာသွားတယ်။ ၁၁ ဒါဟာ အဖြစ်မှန်ပဲဆိုတာ ပေတရုသိသွားတဲ့အခါ “ယေဟောဝါ ဘုရားက ကောင်းကင်တမန်ကို စေလွှတ်ပြီး ဟေရုဒ်မင်းလက်ကနေ၊ ဂျူးတွေမျှော်လင့်ထားတဲ့ ဘေးကနေ ငါ့ကိုကယ်တင်လိုက်မှန်း ငါကောင်းကောင်းသိပြီ” လို့ပြောတယ်။ ၁၂ အဖြစ်မှန်ကို သိပြီးတဲ့နောက် ပေတရုက မာကုလို့လည်းခေါ်တဲ့ ယောဟန်ရဲ့ မိခင် မာရိအိမ်ကို သွားလိုက်တယ်။ အဲဒီမှာ တပည့်တချို့ စုရုံးပြီး ဆုတောင်းနေတယ်။ ၁၃ ပေတရု တံခါးခေါက်လိုက်တဲ့အခါ ရောဒေလို့ခေါ်တဲ့ အစေခံမလေးက တံခါးဖွင့်ပေးဖို့ လာတယ်။ ၁၄ ပေတရုရဲ့အသံကို သူ မှတ်မိသွားတဲ့အခါ တံခါးမဖွင့်ဘဲ ဝမ်းသာအားရ အထဲပြေးဝင်ပြီး တံခါးရှေ့မှာ ပေတရုရောက်နေတယ်လို့ ပြောတယ်။ ၁၅ “မင်း စိတ်မှန်သေးရဲ့လား” လို့ သူတို့ပြောပေမဲ့ သူက ပေတရု တကယ်ရောက်နေတာဆိုပြီး အထပ်ထပ် ပြောနေတော့ “ပေတရုရဲ့ ကောင်းကင်တမန်ပဲ ဖြစ်ရမယ်” လို့ပြောကြတယ်။ ၁၆ ပေတရုက တံခါးကို ဆက်ခေါက်နေတော့ သူတို့ လာဖွင့်ပေးတယ်။ ပေတရုကို မြင်တဲ့အခါ အံ့သြသွားကြတယ်။ ၁၇ ပေတရုက သူတို့ကို တိတ်တိတ်နေဖို့ လက်ရိပ်ပြပြီး သူ့ကို ထောင်ထဲကနေ ယေဟောဝါ ခေါ်ထုတ်ခဲ့ပုံကို အသေးစိတ်ပြောပြတယ်။ အဲဒီနောက် “ယာကုပ်နဲ့ ညီအစ်ကိုတွေကိုလည်း အကြောင်းကြားလိုက်ပါ” လို့မှာခဲ့ပြီး တခြားနေရာကို ခရီးဆက်သွားတယ်။
ဒီဇင်ဘာ ၁၇-၂၃
ကျမ်းစာထဲက အဖိုးတန်ဘဏ္ဍာများ | တမန်တော် ၁၅-၁၆
“ဘုရားရဲ့ တရားစကားပေါ် အခြေခံပြီး တညီတညွတ်တည်း ဆုံးဖြတ်ချက်ချခဲ့”
(တမန်တော် ၁၅:၁၊ ၂) ယုဒပြည်ကနေ လူတချို့ရောက်လာပြီး “မောရှေပညတ်အတိုင်း အရေဖျားမဖြတ်ရင် ကယ်တင်ခြင်း မရနိုင်ဘူး” ဆိုပြီး ညီအစ်ကိုတွေကို သွန်သင်ကြတယ်။ ၂ ပေါလုနဲ့ ဗာနဗက သူတို့နဲ့ သဘောထားကွဲလွဲပြီး အကြီးအကျယ် ငြင်းခုံကြတယ်။ ဒါကြောင့် အဲဒီကိစ္စနဲ့ပတ်သက်ပြီး မေးမြန်းဖို့ ပေါလု၊ ဗာနဗနဲ့ ညီအစ်ကိုတချို့ကို ဂျေရုဆလင်မြို့မှာရှိတဲ့ တမန်တော်တွေ၊ အကြီးအကဲတွေဆီလွှတ်ဖို့ စီစဉ်လိုက်ကြတယ်။
“အကြီးအကျယ် စိတ်ဝမ်းကွဲပြားလျက် ငြင်းခုံကြ၏”
၈ “ပေါလု၊ ဗာနဗတို့သည် ထိုသူ [“အချို့”] တို့နှင့် အကြီးအကျယ် စိတ်ဝမ်းကွဲပြားလျက် ငြင်းခုံကြ၏။ ထို့ကြောင့် ထိုပြဿနာနှင့်စပ်လျဉ်း၍ ပေါလုနှင့်ဗာနဗကို အခြားသော ညီအစ်ကိုအချို့နှင့်အတူ ဂျေရုဆလင်မြို့ရှိ တမန်တော်များ၊ အသက်ကြီးသူများထံသွားစေရန် [အကြီးအကဲများ] စီစဉ်ပေးကြ၏” ဟုလုကာဆက်ပြောသည်။ (တ. ၁၅:၂) သူတို့ “စိတ်ဝမ်းကွဲပြားလျက် ငြင်းခုံကြ” ခြင်းက နှစ်ဖက်စလုံး ခံစားချက်ပြင်းထန်ပြီး ခံယူချက်ခိုင်မာကြောင်း ထင်ရှား၍ ထိုပြဿနာကို အန္တိအုတ်အသင်းတော်က မဖြေရှင်းပေးနိုင်ပါ။ ထိုအခါ အသင်းတော်သည် ငြိမ်သက်မှုနှင့် စည်းလုံးမှုရှိရေးအတွက် ပထမရာစု အုပ်ချုပ်ရေးအဖွဲ့ဖြစ်သော “ဂျေရုဆလင်မြို့ရှိ တမန်တော်များ၊ အသက်ကြီးသူများထံ” ပြဿနာတင်ပြရန် ပညာရှိစွာ စီစဉ်ကြ၏။ အန္တိအုတ်မြို့ရှိ အကြီးအကဲများထံမှ ကျွန်ုပ်တို့အဘယ်အရာ သင်ယူနိုင်သနည်း။
(တမန်တော် ၁၅:၁၃-၂၀) သူတို့ ပြောလို့ပြီးသွားတဲ့အခါ ယာကုပ်က “ညီအစ်ကိုတို့၊ ကျွန်တော်ပြောတာ နားထောင်ပါ။ ၁၄ ဘုရားသခင်က လူမျိုးခြားတွေကို သတိရပြီး နာမတော်အတွက် သူတို့ထဲကနေ လူတွေကို ရွေးချယ်လိုက်တဲ့အကြောင်း ရှုမောင် အသေးစိတ် ပြောပြခဲ့ပြီပဲ။ ၁၅ အဲဒီအချက်ဟာ ပရောဖက်ကျမ်းမှာပါတဲ့ စကားတွေနဲ့ ကိုက်ညီပါတယ်။ အဲဒီမှာ– ၁၆ ‘ဒါတွေပြီးတဲ့နောက် ငါပြန်လာပြီး ပြိုကျနေတဲ့ ဒါဝိဒ်ရဲ့တဲကို ပြန်ထူမယ်။ အပျက်အစီးတွေကို ပြုပြင်ပြီး ပြန်တည်ဆောက်မယ်။ ၁၇ ကျန်ကြွင်းသူတွေက ငါ့နာမည်နဲ့ မှည့်ခေါ်ထားတဲ့ လူမျိုးခြားတွေနဲ့အတူ ယေဟောဝါကို အားတက်သရော ရှာဖွေကြလိမ့်မယ်။ ဒီအရာတွေကို လုပ်ဆောင်နေတဲ့ ယေဟောဝါ ပြောတဲ့စကားပဲ။ ၁၈ ဒီအကြောင်းတွေကို ရှေးအချိန်ကတည်းက ငါအသိပေးခဲ့တယ်’ လို့ရေးထားတယ်။ ၁၉ ဒါကြောင့် ကျွန်တော့်အမြင်ကတော့ ဘုရားသခင်ကို ကိုးကွယ်လာတဲ့ လူမျိုးခြားတွေ အခက်တွေ့အောင် မလုပ်သင့်ဘူး။ ၂၀ အဲဒီအစား ရုပ်တုကိုးကွယ်ခြင်းနဲ့ဆက်စပ်တဲ့ ညစ်ညူးတဲ့အရာ၊ လိင်အကျင့်ယိုယွင်းမှု၊ လည်ညှစ်သတ်ထားတဲ့ တိရစ္ဆာန်နဲ့ သွေးကို ရှောင်ကြဉ်ဖို့ပဲ စာရေးမှာကြားရင် ကောင်းမယ်။
ခရစ်ယာန်စစ်များ သမ္မာကျမ်းစာကို လေးမြတ်တန်ဖိုးထားကြ
၆ ပြဿနာဖြေရှင်းရာမှာ အထောက်အကူပြုခဲ့တဲ့အချက်က အာမုတ် ၉:၁၁၊ ၁၂ မှာ ပါတဲ့စကားတွေဖြစ်တယ်။ အဲဒီစကားတွေကို တမန်တော် ၁၅:၁၆၊ ၁၇ မှာ ဒီလိုကိုးကားဖော်ပြထားတယ်– ‘ငါပြန်လာ၍ ပြိုလဲလျက်ရှိသော ဒါဝိဒ်၏တဲကို ပြန်တည်ဆောက်မည်။ ထိုတဲ၏ပြိုပျက်ရာများကိုလည်း ပြုပြင်ပြီးလျှင် ပြန်လည်တည့်မတ်စေမည်။ ငါ၏နာမဖြင့်သမုတ်သော လူမျိုးခြားအပေါင်းနှင့်အတူ ကျန်ကြွင်းသောသူတို့သည် ယေဟောဝါဘုရားသခင်ကို အားထုတ်ရှာဖွေမည့်အကြောင်း ဖြစ်၏ဟု ဤအမှုကို စီရင်တော်မူသော ယေဟောဝါ မိန့်တော်မူ၏။’
၇ ဒါပေမဲ့ ဒီကျမ်းချက်က ခရစ်ယာန်ဖြစ်လာတဲ့လူမျိုးခြားတွေ အရေဖျားလှီးဖို့မလိုဘူးဆိုတဲ့အချက်ကို မဖော်ပြဘူးလို့ တချို့သူတွေ ပြောကောင်းပြောပါလိမ့်မယ်။ ဒီလိုပြောတာ မှန်ပါတယ်။ ဒါပေမဲ့ ဂျူးခရစ်ယာန်တွေက ဒီကျမ်းချက်ကို နားလည်ခဲ့ကြတယ်။ ဘာကြောင့်လဲဆိုတော့ ဂျူးခရစ်ယာန်တွေက အရေဖျားလှီးတဲ့ လူမျိုးခြားတွေကို ‘လူမျိုးခြား’ အနေနဲ့မဟုတ်ဘဲ ညီအစ်ကိုတွေအဖြစ် လက်ခံကြတယ်။ (ထွ. ၁၂:၄၈၊ ၄၉) ဥပမာ၊ ဘာ့ဂ်စတားရဲ့ စက်ပ်တွားဂျင့်ဘာသာပြန်ကျမ်းမှာ ဧသတာ ၈:၁၇ ကို ဒီလိုပြန်ဆိုထားတယ်– “လူမျိုးခြားများစွာက အရေဖျားလှီးခြင်းကိုခံပြီး ဂျူးတွေဖြစ်လာကြတယ်။” ဒါကြောင့် ကျန်ကြွင်းသောသူတို့ (ဂျူးတွေနဲ့ အရေဖျားလှီးတဲ့ ဂျူးဘာသာပြောင်းဝင်လာသူတွေ) က “လူမျိုးခြားအပေါင်း” (အရေဖျားမလှီးတဲ့လူမျိုးခြားတွေ) နဲ့အတူ ဘုရားသခင့်နာမနဲ့ သမုတ်တဲ့ လူမျိုးတစ်မျိုးဖြစ်လာမယ်လို့ ကျမ်းစာမှာ ကြိုဟောထားတယ်။ ကျမ်းစာအဖြေက ရှင်းပါတယ်။ ခရစ်ယာန်ဖြစ်လိုတဲ့ လူမျိုးခြားတွေက အရေဖျားလှီးဖို့ မလိုဘူး။
(တမန်တော် ၁၅:၂၈၊ ၂၉) လိုက်နာရမယ့် ဒီအရာတွေကလွဲလို့ တခြားဝန်ကို ခင်ဗျားတို့အပေါ် ထပ်မတင်ဖို့ သန့်ရှင်းသော စွမ်းအားတော်အကူအညီနဲ့ ကျွန်တော်တို့ သဘောတူဆုံးဖြတ်နိုင်ခဲ့တယ်– ၂၉ ရုပ်တုရှေ့ ပူဇော်ထားတဲ့အရာ၊ သွေး၊ လည်ညှစ်သတ်ထားတဲ့ တိရစ္ဆာန်၊ လိင်အကျင့်ယိုယွင်းမှုကို အမြဲရှောင်ကြဉ်ကြပါ။ ဒါတွေကို သတိထားရှောင်ကြဉ်မယ်ဆိုရင် ကောင်းစားပါလိမ့်မယ်။ ကျန်းမာကြပါစေ။”
(တမန်တော် ၁၆:၄၊ ၅) အဲဒီနောက် သူတို့က တစ်မြို့ပြီးတစ်မြို့ ခရီးဆက်ပြီး ဂျေရုဆလင်မြို့မှာရှိတဲ့ တမန်တော်တွေနဲ့ အကြီးအကဲတွေရဲ့ ဆုံးဖြတ်ချက်တွေကို ပြောပြတယ်။ အဲဒီအတိုင်း သူတို့လိုက်နာဖို့ဖြစ်တယ်။ ၅ ဒါကြောင့် အသင်းတော်တွေဟာ ယုံကြည်ခြင်း ခိုင်ခံ့မြဲမြံလာပြီး ယုံကြည်သူအရေအတွက် တစ်နေ့ တခြား တိုးများလာတယ်။
“အသင်းတော်တို့ကို ခိုင်ခံ့မြဲမြံစေလျက်”
၁၈ ပေါလုနှင့် တိမောသေတို့သည် နှစ်ချီ၍ အတူတကွ အမှုတော်ဆောင်ခဲ့ကြသည်။ သူတို့သည် နယ်လှည့်အမှုထမ်းများအဖြစ် အုပ်ချုပ်ရေးအဖွဲ့ကိုယ်စား တာဝန်အမျိုးမျိုး ထမ်းဆောင်ခဲ့ကြ၏။ ကျမ်းစာမှတ်တမ်းက ဤသို့ဆို၏– “သူတို့သည် မြို့များကို ဖြတ်၍သွားစဉ် ဂျေရုဆလင်မြို့ရှိ တမန်တော်တို့နှင့် အသက်ကြီးသူတို့၏ စီရင်ဆုံးဖြတ်ချက်တို့ကို ကျင့်စောင့်စေရန် ပေးအပ်ကြ၏။” (တ. ၁၆:၄) အသင်းတော်များသည် ဂျေရုဆလင်မြို့ရှိ တမန်တော်များနှင့် အသက်ကြီးသူများ၏ ညွှန်ကြားချက်ကို လိုက်နာခဲ့ကြကြောင်း ထင်ရှားသည်။ ထိုနာခံမှုကြောင့်လည်း “အသင်းတော်တို့သည် ယုံကြည်ခြင်း၌ ခိုင်ခံ့မြဲမြံလာလျက် ယုံကြည်သူအရေအတွက် တစ်နေ့ ထက်တစ်နေ့ တိုးများလာ၏။”—တ. ၁၆:၅။
ရှာဖွေလေ့လာ ဘုရားရေးရာရတနာ
(တမန်တော် ၁၆:၆-၉) အာရှနယ်မှာ တရားစကား မဟောပြောဖို့ သန့်ရှင်းသော စွမ်းအားတော် တားမြစ်တဲ့အတွက် သူတို့က ဖြုဂိပြည်၊ ဂလာတိပြည်ကို ဖြတ်သွားကြတယ်။ ၇ မုသိပြည်နားကို ရောက်လာပြီး ဗိသုနိပြည်ကို သွားမယ်လုပ်တော့ စွမ်းအားတော်ကတစ်ဆင့် ယေရှုက သွားခွင့်မပေးပြန်ဘူး။ ၈ ဒါနဲ့ မုသိပြည်ကို ဖြတ်ကျော်ပြီး တရောမြို့ကို ရောက်လာတယ်။ ၉ ညရောက်တော့ ပေါလုက စိတ်အာရုံတစ်ခု မြင်တယ်။ မက်ဆီဒိုးနီးယားပြည်သားတစ်ယောက်က သူ့ရှေ့မှာ ပေါ်လာပြီး “မက်ဆီဒိုးနီးယားပြည်ကို ကူးလာပြီး ကျွန်တော်တို့ကို ကူညီပါ” လို့ ဖိတ်ခေါ်တယ်။
စောင့်နေခြင်းနဲ့ ပတ်သက်ပြီး ယေရှုရဲ့ တမန်တော်တွေထံကနေ သင်ယူပါ
၈ ဒီမှတ်တမ်းကနေ ကျွန်ုပ်တို့ ဘာသင်ယူနိုင်ပါသလဲ။ ပေါလု အာရှနယ်ကို ခရီးစထွက်ပြီးနောက်မှသာ ဘုရားသခင့်စွမ်းအားတော်က သူ့ကို စတင်ညွှန်ကြားခဲ့တယ်ဆိုတာ သတိပြုပါ။ အဲဒီနောက် ယေရှု သူ့ကို ထပ်ဆင့်ညွှန်ကြားချက်ပေးတာလည်း ဗိသုနိပြည်နားရောက်ပြီးမှသာ ဖြစ်တယ်။ နောက်ဆုံး တရောနယ်ကို ပေါလုရောက်ပြီးမှသာ မက်ဆီဒိုးနီးယားပြည်ကိုသွားဖို့ ယေရှုညွှန်ကြားခဲ့တာဖြစ်တယ်။ ခရစ်ယာန်အသင်းတော်ရဲ့ ဦးခေါင်းဖြစ်နေသေးတဲ့ ယေရှုက ကျွန်ုပ်တို့ကို အလားတူနည်းနဲ့ လမ်းညွှန်နိုင်တယ်။ (ကော. ၁:၁၈) ဥပမာ၊ သင်က ရှေ့ဆောင်လုပ်ဖို့ ဒါမှမဟုတ် သာ၍လိုအပ်တဲ့ဒေသတစ်ခုမှာ သွားအမှုဆောင်ဖို့ စဉ်းစားနေတာဖြစ်နိုင်တယ်။ ဒါပေမဲ့ ပန်းတိုင်ကိုရောက်ဖို့ သင် အစပြုကြိုးစားလုပ်ဆောင်နေမှသာ ယေရှုက ဘုရားသခင့်စွမ်းအားတော်သုံးပြီး သင့်ကိုလမ်းညွှန်တာ ဖြစ်နိုင်တယ်။ ဒါက ကားမောင်းတာနဲ့တူတယ်။ ကားကရွေ့လျားနေမှသာ ယာဉ်မောင်းက ဘယ်၊ ညာ လိုသလိုကွေ့နိုင်မှာဖြစ်တယ်။ အလားတူပဲ ကျွန်ုပ်တို့ရွေ့လျားနေမှ၊ ဆိုလိုတာက ကျွန်ုပ်တို့ရဲ့ပန်းတိုင်ကိုရောက်ဖို့ ကြိုးစားနေမှသာ ဟောပြောခြင်းလုပ်ငန်းမှာ တိုးချဲ့လုပ်ဆောင်ဖို့ ကျွန်ုပ်တို့ကို ယေရှုလမ်းညွှန်မှာဖြစ်တယ်။
(တမန်တော် ၁၆:၃၇) ဒါပေမဲ့ ပေါလုက “ရောမနိုင်ငံသားဖြစ်တဲ့ ကျွန်တော်တို့ကို စစ်ကြောမေးမြန်းတာမျိုးမလုပ်ဘဲ လူရှေ့သူရှေ့ ရိုက်နှက်၊ ထောင်ချပြီးမှ အခုလို လူမသိသူမသိ ပြန်လွှတ်မလို့လား။ ဒီလိုလုပ်လို့ ဘယ်ရမလဲ။ သူတို့ကိုယ်တိုင် လာပြီး ခေါ်ထုတ်ပါစေ” လို့ပြောတယ်။
nwtsty တ ၁၆:၃၇ လေ့လာမှု မှတ်စု
ရောမနိုင်ငံသားဖြစ်တဲ့ ကျွန်တော်တို့– ပေါလုနဲ့ သိလလည်း ရောမနိုင်ငံသားတွေ ဖြစ်တယ်။ နိုင်ငံသားတစ်ဦးကို မစစ်ဆေးမမေးမြန်းဘဲ လူအများရှေ့ ပြစ်ဒဏ်မပေးရလို့ ရောမဥပဒေမှာ ဖော်ပြထားတယ်။ လူတစ်ဦးဟာ ရောမနိုင်ငံသားဖြစ်ရင် ရောမအင်ပါယာတစ်ခွင် ဘယ်နေရာပဲသွားသွား ရပိုင်ခွင့်တွေနဲ့ အခွင့်ထူးတွေ ရှိပါတယ်။ ရောမနိုင်ငံသားတစ်ဦးဟာ ဒေသန္တရဥပဒေအောက်မှာ မဟုတ်ဘဲ ရောမဥပဒေအောက်မှာ ရှိတယ်။ စွဲချက်တင်ခံရတဲ့အခါ ဒေသန္တရဥပဒေအတိုင်း စစ်ဆေးခံဖို့ သူ သဘောတူနိုင်ပေမဲ့ ရောမတရားရုံးအထိတက်ပြီး ကြားနာစစ်ဆေးခံပိုင်ခွင့် ရှိတယ်။ သေဒဏ်ပေးတဲ့အမှုဆိုရင် ရောမဧကရာဇ်ဆီကိုတောင် အယူခံဝင်ခွင့် ရှိပါတယ်။ တမန်တော်ပေါလုဟာ ရောမအင်ပါယာအနှံ့ ဟောပြောခဲ့တယ်။ ရောမနိုင်ငံသားအခွင့်အရေးကို သူ သုံးကြိမ် အသုံးပြုခဲ့တဲ့ မှတ်တမ်းရှိတယ်။ ပထမတစ်ကြိမ်က ဖိလိပ္ပိမြို့မှာဖြစ်တယ်။ သူ့ကို ရိုက်နှက်တဲ့အတွက် ဥပဒေချိုးဖောက်နေပြီလို့ ဖိလိပ္ပိလူမျိုး တရားသူကြီးတွေကို အသိပေးခဲ့တဲ့အချိန်မှာ ဖြစ်တယ်။—နောက်နှစ်ကြိမ်နဲ့ပတ်သက်ပြီး တ ၂၂:၂၅။ ၂၅:၁၁ လေ့လာမှု မှတ်စုကို ကြည့်ပါ။
ကျမ်းစာဖတ်ရှုခြင်း
(တမန်တော် ၁၆:၂၅-၄၀) သန်းခေါင်ယံလောက်မှာ ပေါလုနဲ့ သိလက ဆုတောင်းပြီး ဘုရားသခင်ကို ချီးမွမ်းသီချင်းဆိုနေတယ်။ အကျဉ်းသားတွေ နားထောင်နေတုန်းမှာ၊ ၂၆ ရုတ်တရက် ငလျင်ကြီး လှုပ်ပြီး ထောင်ရဲ့အုတ်မြစ်တွေ လှုပ်ခါကုန်တယ်။ ထောင်တံခါးအားလုံး ချက်ချင်းပွင့်သွားသလို သံကြိုးတွေ၊ ထိတ်တုံးတွေလည်း အကုန်ပြုတ်ထွက်ကုန်တယ်။ ၂၇ ထောင်မှူး လန့်နိုးလာပြီး ထောင်တံခါးပွင့်နေတာ မြင်တော့ ထောင်သားတွေ ထွက်ပြေးကုန်ပြီထင်လို့ ဓားကိုဆွဲထုတ်ပြီး သူ့ကိုယ်သူသတ်သေဖို့ လုပ်တယ်။ ၂၈ အဲဒီအခါ ပေါလုက “အဲဒီလို မလုပ်ပါနဲ့။ ကျွန်တော်တို့အားလုံး ဒီမှာ ရှိပါတယ်” လို့ အော်ပြောတယ်။ ၂၉ ထောင်မှူးက မီးခွက်ယူလာခိုင်းပြီး အထဲပြေးဝင်လာတယ်။ ကြောက်ရွံ့တုန်လှုပ်ပြီး ပေါလုနဲ့ သိလရဲ့ခြေရင်းမှာ ပျပ်ဝပ်နေတယ်။ ၃၀ အဲဒီနောက် သူတို့ကို ထောင်ပြင်ထုတ်ပြီး “ကယ်တင်ခြင်းရဖို့ ဘာလုပ်ရမလဲ” လို့မေးတယ်။ ၃၁ သူတို့က “သခင်ယေရှုကို ယုံကြည်ပါ။ ယုံကြည်ရင် ခင်ဗျားရော အိမ်သူအိမ်သားတွေပါ ကယ်တင်ခြင်း ရလိမ့်မယ်” လို့ဖြေတယ်။ ၃၂ အဲဒီနောက် သူ့ကိုရော သူ့အိမ်မှာရှိနေတဲ့ လူအားလုံးကိုပါ ယေဟောဝါရဲ့ တရားစကားအကြောင်း ပြောပြတယ်။ ၃၃ အဲဒီညမှာပဲ ထောင်မှူးက ပေါလုနဲ့ သိလကို ခေါ်သွားပြီး ဒဏ်ရာတွေ ဆေးကြောပေးတယ်။ အဲဒီနောက် ထောင်မှူးနဲ့ အိမ်သားအားလုံး ချက်ချင်း နှစ်ခြင်းခံကြတယ်။ ၃၄ ပေါလုနဲ့ သိလကို အိမ်ခေါ်သွားပြီး တည်ခင်းကျွေးမွေးတယ်။ ဘုရားသခင်ကို ယုံကြည်သူတွေ ဖြစ်လာတဲ့အတွက် ထောင်မှူးရော အိမ်သားတွေပါ ဝမ်းသာနေကြတယ်။ ၃၅ မိုးလင်းတော့ လက်ထောက်တရားသူကြီးတွေက အစောင့်ရဲမက်တွေ လွှတ်ပြီး “အဲဒီလူတွေကို လွှတ်ပေးလိုက်” လို့ မှာတယ်။ ၃၆ အဲဒီအခါ ထောင်မှူးက “လက်ထောက်တရားသူကြီးတွေက ခင်ဗျားတို့နှစ်ယောက်ကို လွှတ်ခိုင်းလိုက်တယ်။ ဒါကြောင့် အခု၊ အေးအေးချမ်းချမ်း သွားကြပါ” ဆိုပြီး ပေါလုကို ပြောတယ်။ ၃၇ ဒါပေမဲ့ ပေါလုက “ရောမနိုင်ငံသားဖြစ်တဲ့ ကျွန်တော်တို့ကို စစ်ကြောမေးမြန်းတာမျိုးမလုပ်ဘဲ လူရှေ့သူရှေ့ ရိုက်နှက်၊ ထောင်ချပြီးမှ အခုလို လူမသိသူမသိ ပြန်လွှတ်မလို့လား။ ဒီလိုလုပ်လို့ ဘယ်ရမလဲ။ သူတို့ကိုယ်တိုင် လာပြီး ခေါ်ထုတ်ပါစေ” လို့ပြောတယ်။ ၃၈ အစောင့်ရဲမက်တွေလည်း ပေါလုပြောတဲ့အတိုင်း ပြန်ပြောပြတယ်။ သူတို့ကို ရောမနိုင်ငံသားဖြစ်မှန်း သိသွားတဲ့အခါ လက်ထောက်တရားသူကြီးတွေ ထိတ်လန့်သွားတယ်။ ၃၉ ဒါကြောင့် ကိုယ်တိုင် လာပြီး ပေါလုနဲ့ သိလကို တောင်းပန်ကြတယ်။ သူတို့ကို ခေါ်ထုတ်သွားပြီး ဒီမြို့ကနေ ထွက်သွားဖို့ မေတ္တာရပ်ခံကြတယ်။ ၄၀ ဒါပေမဲ့ ပေါလုနဲ့ သိလက ထောင်ကနေ ထွက်လာပြီး လုဒိအိမ်ကို သွားတယ်။ ညီအစ်ကိုတွေနဲ့ တွေ့ဆုံအားပေးပြီးနောက် ထွက်ခွာသွားကြတယ်။
ဒီဇင်ဘာ ၂၄-၃၀
ကျမ်းစာထဲက အဖိုးတန်ဘဏ္ဍာများ | တမန်တော် ၁၇-၁၈
“ဟောပြောခြင်းနဲ့ သွန်သင်ခြင်းမှာ တမန်တော်ပေါလုကို အတုယူပါ”
(တမန်တော် ၁၇:၂၊ ၃) ပေါလုက ခါတိုင်းလိုပဲ တရားဇရပ်ထဲဝင်ပြီး ဥပုသ်နေ့သုံးနေ့တိုင်တိုင် ကျမ်းစာသုံးပြီး သူတို့နဲ့ ကျိုးကြောင်းဆင်ခြင်တယ်။ ၃ ခရစ်တော်ဟာ ဆင်းရဲဒုက္ခခံရမယ်၊ သေရာကနေ အသက်ပြန်ရှင်ရမယ်ဆိုတဲ့ အကိုးအကားတွေကို သူထောက်ပြပြီး “ကျွန်တော်ပြောနေတဲ့ ယေရှုဟာ ခရစ်တော်ပဲ” လို့ ရှင်းပြတယ်။
nwtsty တ ၁၇:၂၊ ၃ လေ့လာမှု မှတ်စု
ကျိုးကြောင်းဆင်ခြင်တယ်– ပေါလုက သတင်းကောင်း ပြောရုံပဲ ပြောတာမဟုတ်ဘူး။ ဟီဘရူး ကျမ်းစာစောင်တွေကနေ ရှင်းပြတယ်၊ သက်သေပြတယ်။ ကျမ်းချက်တွေ ဖတ်ပြရုံမက ကျိုးကြောင်းဆင်ခြင်တယ်။ ပရိသတ်သဘောပေါက်အောင် ကျိုးကြောင်းဆင်ခြင်တယ်။ ဂရိကြိယာ ဒိုင်အလီဂိုမိုင်ကို “အပြန်အလှန်စကားပြောခြင်း၊ ဆွေးနွေးခြင်း” လို့ အဓိပ္ပာယ်ဖွင့်ဆိုထားတယ်။ လူတွေနဲ့ စကားပြောဆိုဆက်သွယ်တာကို ဆိုလိုတယ်။ ဒီဂရိစကားလုံးကို တ ၁၇:၁၇။ ၁၈:၄၊ ၁၉။ ၁၉:၈၊ ၉။ ၂၀:၇၊ ၉ တို့မှာလည်း အသုံးပြုထားတယ်။
အကိုးအကားတွေကို သူထောက်ပြ– ဂရိစကားလုံးရဲ့ အဓိပ္ပာယ်က “နှင့်အတူထား (ကပ်ထား)” ဖြစ်တယ်။ ဟီဘရူးကျမ်းစောင်တွေမှာပါတဲ့ မေရှိယနဲ့ဆိုင်တဲ့ ပရောဖက်ပြုချက်တွေဟာ ယေရှုရဲ့ဘဝမှာ ဘယ်လိုပြည့်စုံခဲ့တယ်ဆိုတာကို ပေါလု အသေအချာ နှိုင်းယှဉ်လေ့လာခဲ့တယ်လို့ ပြောနေတာဖြစ်နိုင်တယ်။
(တမန်တော် ၁၇:၁၇) ဒါနဲ့ သူက တရားဇရပ်မှာရှိတဲ့ ဂျူးတွေ၊ ဘုရားသခင်ကို ကိုးကွယ်တဲ့သူတွေ၊ စျေးမှာ နေ့တိုင်းတွေ့ရတဲ့သူတွေနဲ့ ကျိုးကြောင်းဆင်ခြင်တယ်။
nwtsty တ ၁၇:၁၇ လေ့လာမှု မှတ်စု
စျေးမှာ– ခရော်ပလပ်စ်ရဲ့ အနောက်မြောက်ဘက်မှာရှိတဲ့ အေသင်စျေးဟာ ၅ ဟက်တာ (၁၂ ဧက) လောက်ကျယ်တယ်။ ဒီစျေးဟာ အရောင်းအဝယ်လုပ်တဲ့ နေရာသာမကဘူး။ အေသင်မြို့ရဲ့ စီးပွားရေး၊ နိုင်ငံရေး၊ ယဉ်ကျေးမှုအတွက် အချက်အချာနေရာလည်း ဖြစ်တယ်။ အေသင်မြို့သားတွေဟာ လူအများစုဆုံတဲ့ ဒီနေရာကိုလာပြီး ပညာရပ် အမျိုးမျိုးအကြောင်း ဆွေးနွေးကြတယ်။
(တမန်တော် ၁၇:၂၂၊ ၂၃) ပေါလုက အာရေတောင်မှာ ရပ်ပြီး “အေသင်မြို့သားတို့၊ ခင်ဗျားတို့ဟာ တခြားသူတွေထက် အရာရာမှာ နတ်ဘုရားတွေကို အင်မတန် ကြည်ညိုသူတွေဖြစ်မှန်း ကျွန်တော် သတိထားမိတယ်။ ၂၃ သွားရင်းလာရင်းနဲ့ ခင်ဗျားတို့ ကြည်ညိုကိုးကွယ်တဲ့အရာတွေကို ဂရုတစိုက် လိုက်ကြည့်တဲ့အခါ ‘ငါတို့မသိတဲ့ ဘုရားသခင်အတွက်’ ဆိုပြီး ကမ္ပည်းထိုးထားတဲ့ ယဇ်ပလ္လင်တစ်ခုကို တွေ့တယ်။ ဒါကြောင့် ခင်ဗျားတို့မသိဘဲ ကိုးကွယ်နေတဲ့ ဘုရားသခင်အကြောင်း ကျွန်တော် ပြောပြချင်တယ်။
nwtsty တ ၁၇:၂၂၊ ၂၃ လေ့လာမှု မှတ်စု
ငါတို့မသိတဲ့ ဘုရားသခင်အတွက်– အာဂ်နိုစတွိုင်သီအွိုင် ဆိုတဲ့ ဂရိစကားလုံးတွေကို အေသင်မြို့က ယဇ်ပလ္လင်တစ်ခုပေါ်မှာ ကမ္ပည်းထိုးထားတယ်။ ဗိမာန်တွေ၊ ယဇ်ပလ္လင်တွေ ဆောက်ထားတာကို ကြည့်ရင် အေသင်မြို့သားတွေဟာ နတ်ဘုရားတွေကို ကြောက်မှန်း ထင်ရှားတယ်။ ကျော်ကြားမှု၊ ကျိုးနွံမှု၊ အားထုတ်မှု၊ သွေးဆောင်မှု၊ သနားကြင်နာမှု စတဲ့ စိတ်ကူးယဉ် နတ်ဘုရားတွေအတွက်တောင် ယဇ်ပလ္လင်တွေ ဆောက်ကြတယ်။ “ငါတို့မသိတဲ့ ဘုရားသခင်အတွက်” ဆိုတဲ့ ယဇ်ပလ္လင်တစ်ခုကိုလည်း ဆောက်ထားတယ်။ နတ်ဘုရားတစ်ပါးပါးကို ချန်ထားမိရင် အဲဒီနတ်ဘုရား စိတ်ဆိုးသွားမှာကို စိုးရိမ်လို့ ဖြစ်နိုင်တယ်။ အဲဒီနည်းနဲ့ သူတို့မသိတဲ့ ဘုရားတစ်ပါး ရှိတယ်ဆိုတာ အသိအမှတ်ပြုတယ်။ ပေါလုက ဒီယဇ်ပလ္လင်ကို အခြေခံပြီး သူတို့မသိသေးတဲ့ စစ်မှန်တဲ့ဘုရားအကြောင်း ကျွမ်းကျင်လိမ္မာစွာ ဟောပြောခဲ့တယ်။
ရှာဖွေလေ့လာ ဘုရားရေးရာရတနာ
(တမန်တော် ၁၈:၁၈) ပေါလုက အဲဒီမြို့မှာ ရက်အနည်းငယ်နေတယ်။ ညီအစ်ကိုတွေကို နှုတ်ဆက် စကားပြောပြီးတဲ့နောက် ပြစ်ကိလနဲ့ အာကုလကို ခေါ်ပြီး ဆီးရီးယားပြည်ကို ရွက်လွှင့်သွားတယ်။ ဘုရားသခင်ကို သစ္စာကတိပြုထားတဲ့အတွက် ကင်ခြေမြို့မှာ ဆံပင်တိုတို ညှပ်လိုက်တယ်။
တမန်တော်ကျမ်းမှ ပေါ်လွင်ချက်များ
၁၈:၁၈—ပေါလုသည် အဘယ်ကတိ ပြုခဲ့သနည်း။ ကျမ်းပညာရှင်အချို့က နာဇရိသစ္စာကတိပြုခဲ့သည်ဟု ယူမှတ်ကြသည်။ (တော. ၆:၁-၂၁) သို့သော် ပေါလု အဘယ်ကတိပြုခဲ့သည်ကို သမ္မာကျမ်းစာ မဖော်ပြထားပါ။ ထို့ပြင် ပေါလု ဘာသာမပြောင်းမီ သို့မဟုတ် ဘာသာပြောင်းပြီးနောက် ကတိပြုခဲ့ခြင်းလော၊ သို့မဟုတ် စတင်ကတိပြုခဲ့ခြင်း သို့မဟုတ် အဆုံးသတ်ခြင်းလောဟူ၍ ကျမ်းစာတွင် အဘယ်အရာမျှ မဖော်ပြထားပါ။ မည်သို့ပင်ဖြစ်ပါစေ၊ ထိုသို့ကတိပြုခြင်းသည် အပြစ်မရှိပါ။
(တမန်တော် ၁၈:၂၁) “ယေဟောဝါဘုရား အလိုရှိရင် ခင်ဗျားတို့ဆီ ကျွန်တော် ပြန်လာဦးမှာပါ” လို့ နှုတ်ဆက်စကားပြောပြီး ဧဖက်မြို့ကနေ ရွက်လွှင့်သွားတယ်။
nwtsty တ ၁၈:၂၁ လေ့လာမှု မှတ်စု
ယေဟောဝါဘုရား အလိုရှိရင်– ဘာပဲလုပ်လုပ်၊ ဘာအစီအစဉ်ပဲဆွဲဆွဲ ဘုရားအလိုတော်ကို ထည့်စဉ်းစားဖို့လိုတယ်လို့ အလေးအနက်ဖော်ပြတဲ့ အသုံးအနှုန်းဖြစ်တယ်။ တမန်တော်ပေါလုက အဲဒီမူကို စိတ်စွဲမှတ်ထားတယ်။ (၁က ၄:၁၉။ ၁၆:၇။ ဟီ ၆:၃) တပည့်တော်ယာကုပ်ကလည်း “ယေဟောဝါဘုရား အလိုတော်ရှိရင် ကျွန်တော်တို့ အသက်ဆက်ရှင်ပြီး ဒါတွေဒါတွေ လုပ်ကြမယ်” လို့ပြောဖို့ အားပေးခဲ့တယ်။ (ယ ၄:၁၅) အဲဒီလိုစကားတွေကို အချည်းနှီး မပြောသင့်ဘူး။ “ယေဟောဝါဘုရား အလိုရှိရင်” လို့ စိတ်ရင်းမှန်နဲ့ ပြောသူဟာ ယေဟောဝါရဲ့ အလိုတော်နဲ့အညီ လုပ်ဆောင်ရမယ်။ အဲဒီစကားကို အမြဲ အသံထွက် ပြောဆိုနေစရာမလိုဘဲ စိတ်ထဲမှာသာ ပြောတတ်ကြတယ်။—တ ၂၁:၁၄။ ၁က ၄:၁၉။ ယာ ၄:၁၅ လေ့လာမှု မှတ်စုတွေနဲ့ နောက်ဆက်တွဲ ဂ ကိုကြည့်ပါ။
ကျမ်းစာဖတ်ရှုခြင်း
(တမန်တော် ၁၇:၁-၁၅) အဲဒီနောက် သူတို့က အံဖိပေါလိမြို့၊ အာပေါလောနိမြို့ကို ဖြတ်ကျော်ပြီး သက်သာလောနိတ်မြို့ကို ရောက်လာတယ်။ အဲဒီမြို့မှာ ဂျူးတရားဇရပ် ရှိတယ်။ ၂ ပေါလုက ခါတိုင်းလိုပဲ တရားဇရပ်ထဲဝင်ပြီး ဥပုသ်နေ့သုံးနေ့တိုင်တိုင် ကျမ်းစာသုံးပြီး သူတို့နဲ့ ကျိုးကြောင်းဆင်ခြင်တယ်။ ၃ ခရစ်တော်ဟာ ဆင်းရဲဒုက္ခခံရမယ်၊ သေရာကနေ အသက်ပြန်ရှင်ရမယ်ဆိုတဲ့ အကိုးအကားတွေကို သူထောက်ပြပြီး “ကျွန်တော်ပြောနေတဲ့ ယေရှုဟာ ခရစ်တော်ပဲ” လို့ ရှင်းပြတယ်။ 4 ဒါကြောင့် လူတချို့ ယုံကြည်သူတွေ ဖြစ်လာပြီး ပေါလု၊ သိလတို့နဲ့ ပူးပေါင်းလာကြတယ်။ ဘုရားသခင်ကို ကိုးကွယ်တဲ့ ဂရိလူအတော်များများနဲ့ အထင်ကရ အမျိုးသမီးတချို့လည်း ယုံကြည်သူတွေ ဖြစ်လာကြတယ်။ ၅ မနာလိုဖြစ်နေတဲ့ ဂျူးတချို့ကတော့ ဈေးထဲမှာ ယောင်လည်လည်လုပ်နေတဲ့ လူဆိုးတချို့နဲ့ အုပ်စုဖွဲ့ပြီး တစ်မြို့လုံး ရုတ်ရုတ်သဲသဲဖြစ်အောင် လုပ်ကြတယ်။ အဲဒီနောက် ပေါလုနဲ့ သိလကို လူတွေရှေ့ ဆွဲထုတ်ဖို့ ယာသုန်ရဲ့အိမ်ထဲ ဝင်သွားကြတယ်။ ၆ သူတို့နှစ်ယောက်ကို ရှာမတွေ့တဲ့အခါ ယာသုန်နဲ့ ညီအစ်ကိုတချို့ကို မြို့အရာရှိတွေဆီ ဆွဲခေါ်သွားပြီး “အရပ်တကာမှာ ပြဿနာဖြစ်အောင်လုပ်တဲ့လူတွေ ဒီအထိတောင် ရောက်လာကြပြီ။ ၇ ယာသုန်ကလည်း သူတို့ကို အိမ်မှာ လက်ခံထားတယ်။ အဲဒီလူတွေက ယေရှုဆိုတဲ့ ဘုရင်တစ်ပါးရှိသေးတယ်လို့ ပြောပြီး ဆီဇာရဲ့ အမိန့်ကို အာခံနေတယ်” လို့ အော်ကြတယ်။ ၈ ဒါကိုကြားတဲ့အခါ မြို့အရာရှိတွေ၊ လူတွေ ထိတ်လန့်ကုန်တယ်။ ၉ ဒါနဲ့ ယာသုန်နဲ့ တခြားလူတွေဆီက အာမခံငွေ ယူပြီး သူတို့ကို လွှတ်လိုက်တယ်။ ၁၀ မိုးလည်းချုပ်ရော ညီအစ်ကိုတွေက ပေါလုနဲ့ သိလကို ဗေရိမြို့ဆီ ထွက်သွားခိုင်းတယ်။ အဲဒီမြို့ကို သူတို့ရောက်တော့ ဂျူးတရားဇရပ်ထဲ ဝင်ကြတယ်။ ၁၁ ဗေရိမြို့သားတွေဟာ သက်သာလောနိတ်မြို့သားတွေထက် သဘောထားကြီးတဲ့အတွက် တရားစကားတော်ကို အားတက်သရော ခံယူတယ်။ ကြားခဲ့တာတွေ မှန်မမှန် သိနိုင်ဖို့ ကျမ်းစာကို နေ့တိုင်း အသေအချာ ဆန်းစစ်ကြတယ်။ ၁၂ ဒါကြောင့် လူအတော်များများ ယုံကြည်သူတွေ ဖြစ်လာတယ်။ ဂုဏ်အသရေရှိ ဂရိအမျိုးသမီးတချို့နဲ့ အမျိုးသားတချို့လည်း ယုံကြည်လာကြတယ်။ ၁၃ တရားစကားတော်ကို ဗေရိမြို့မှာ ပေါလုဟောပြောနေမှန်း သက်သာလောနိတ်မြို့က ဂျူးတွေသိသွားတဲ့အခါ ဗေရိမြို့ကို လာပြီး လူအုပ်ဆူပူအောင် သွေးထိုးလှုံ့ဆော်ကြတယ်။ ၁၄ အဲဒီအခါ ညီအစ်ကိုတွေက ပေါလုကို ပင်လယ်ဆိပ်ကမ်းဆီ ချက်ချင်း ထွက်သွားခိုင်းတယ်။ သိလနဲ့ တိမောသေကတော့ နေရစ်ခဲ့တယ်။ ၁၅ အေသင်မြို့အထိ ပေါလုကို လိုက်ပို့တဲ့သူတွေလည်း ရှိတယ်။ သူတို့ပြန်တဲ့အခါ ပေါလုက သိလနဲ့ တိမောသေကို ဖြစ်နိုင်ရင် အမြန်ဆုံးလိုက်ခဲ့ဖို့ မှာကြားလိုက်တယ်။
ဒီဇင်ဘာ ၃၁–ဇန်နဝါရီ ၆
ကျမ်းစာထဲက အဖိုးတန်ဘဏ္ဍာများ | တမန်တော် ၁၉-၂၀
“ကိုယ့်ကိုယ်ကိုယ် သတိထားကြပါ။ သိုးတော်တစ်စုလုံးကိုလည်း ဂရုတစိုက် ထိန်းကျောင်းကြပါ”
(တမန်တော် ၂၀:၂၈) ဘုရားသခင်က သားတော်ရင်းရဲ့သွေးနဲ့ ဝယ်ထားတဲ့ အသင်းတော်ကို ထိန်းကျောင်းဖို့ ခင်ဗျားတို့ကို ကြီးကြပ်မှူးတွေအဖြစ် သန့်ရှင်းသော စွမ်းအားတော်နဲ့ ခန့်အပ်ထားတဲ့အတွက် ကိုယ့်ကိုယ်ကိုယ် သတိထားကြပါ။ သိုးတော်တစ်စုလုံးကိုလည်း ဂရုတစိုက် ထိန်းကျောင်းကြပါ။
‘သင်တို့စောင့်ရှောက်နေသော ဘုရားသခင့် သိုးတော်စုကို ထိန်းကျောင်းကြလော့’
၅ အသက်ကြီးသူတွေက ‘ဘုရားသခင့်သိုးတော်စုကို ထိန်းကျောင်း’ နေရတာဖြစ်တယ်လို့ တမန်တော်က ရေးခဲ့တယ်။ သိုးတော်စုက ယေဟောဝါနဲ့ ယေရှုခရစ်တို့ရဲ့ ပိုင်ဆိုင်ရာဖြစ်တယ်ဆိုတဲ့ အလွန်အရေးကြီးတဲ့အချက်ကို သူတို့သတိရ,ရမှာဖြစ်တယ်။ အကြီးအကဲတွေက သိုးတွေကို ထိန်းကျောင်းပုံနဲ့ပတ်သက်ပြီး ယေဟောဝါထံ စာရင်းရှင်းရမယ်။ သင့်ရဲ့ရင်းနှီးတဲ့မိတ်ဆွေတစ်ဦးက သူခရီးသွားနေတုန်း သူ့ရဲ့ကလေးတွေကို ကြည့်ထားပေးဖို့ သင့်ကို အကူအညီတောင်းတယ်ဆိုပါစို့။ သင် ကလေးတွေကို သေသေချာချာ ကြည့်ရှုစောင့်ရှောက်ပြီး ကျွေးမွေးမယ်မဟုတ်လား။ အကယ်၍ တစ်ယောက်ယောက်က ဖျားနာမယ်ဆိုရင် လိုအပ်သလို ဆေးကုပေးမယ်မဟုတ်လား။ အလားတူပဲ အသင်းတော်အကြီးအကဲတွေက ဘုရားသခင်ရဲ့ “သားတော်ရင်း၏အသွေးနှင့် ဝယ်ထားတော်မူသော အသင်းတော်ကို ထိန်းကျောင်း” ရတဲ့သူတွေဖြစ်တယ်။ (တ. ၂၀:၂၈) သိုးတစ်ကောင်ချင်းစီက ခရစ်တော်ယေရှုရဲ့ အဖိုးတန်တဲ့အသွေးနဲ့ ဝယ်ယူထားတယ်ဆိုတာ သူတို့စိတ်စွဲမှတ်ထားကြတယ်။ အကြီးအကဲတွေက ဘုရားသခင်ထံစာရင်းရှင်းရမယ်ဆိုတာကို သိထားပြီး သိုးအုပ်ကို ကျွေးမွေး၊ ကာကွယ်၊ စောင့်ရှောက်ကြတယ်။
(တမန်တော် ၂၀:၃၁) “ဒါကြောင့် နိုးကြားနေကြပါ။ ကျွန်တော်က ခင်ဗျားတို့အားလုံးကို သုံးနှစ်ပတ်လုံး နေ့ညမပြတ် မျက်ရည်နဲ့ ဆုံးမသွန်သင်ပေးခဲ့တာ ပြန်အမှတ်ရကြပါ။
ခရစ်ယာန်အကြီးအကဲများ—‘ဝမ်းမြောက်ခြင်းအတွက် လုပ်ဖော်ဆောင်ဖက်များ’
၁၅ အကြီးအကဲတွေက အရမ်းကြိုးစားအားထုတ်ကြတယ်။ သူတို့တွေဟာ ညီအစ်ကိုညီအစ်မတွေအတွက် စိုးရိမ်ပြီး တစ်ခါတလေ အိပ်မပျော်တဲ့ညတွေရှိနိုင်တယ်၊ သူတို့အတွက် ဆုတောင်းပေးဖို့ ဒါမှမဟုတ် သူတို့ကိုကူညီပေးဖို့ ညသန်းခေါင်မှာ အိပ်ရာက ထရတဲ့အခါတွေလည်း ရှိနိုင်တယ်။ (၂ ကော. ၁၁:၂၇၊ ၂၈) ဒါပေမဲ့ အကြီးအကဲတွေဟာ ပေါလုလိုပဲ သူတို့ရဲ့တာဝန်ကို အပြည့်အဝနဲ့ ပျော်ပျော်ရွှင်ရွှင် လုပ်ဆောင်ကြတယ်။ ပေါလုက “ငါမူကား သင်တို့အတွက် ရှိသမျှကိုသာမက ကိုယ်ကိုပင် အလွန်ဝမ်းမြောက်စွာပေးမည်” လို့ ကောရိန္သုက ညီအစ်ကိုတွေကို စာရေးခဲ့တယ်။ (၂ ကော. ၁၂:၁၅) ပေါလုက ညီအစ်ကိုတွေကို ချစ်တဲ့အတွက်ကြောင့် မိမိရဲ့အစွမ်းခွန်အားရှိသမျှကိုသုံးပြီး သူတို့ကို အားပေးခဲ့တယ်။ (၂ ကောရိန္သု ၂:၄ ကိုဖတ်ပါ။ ဖိ. ၂:၁၇။ ၁ သက်. ၂:၈) အဲဒါကြောင့် ပေါလုကို ညီအစ်ကိုတွေက အရမ်းချစ်ကြတာဖြစ်တယ်။—တ. ၂၀:၃၁-၃၈။
(တမန်တော် ၂၀:၃၅) ဒီနည်းနဲ့ ခင်ဗျားတို့လည်း အလုပ်ကြိုးစားပြီး အားနည်းသူတွေကို ထောက်မပေးဖို့၊ ‘ရယူခြင်းထက် ပေးကမ်းခြင်းက ပိုပျော်ရွှင်စေတယ်’ ဆိုတဲ့ သခင်ယေရှုရဲ့စကားကို အမြဲအမှတ်ရနေဖို့ အရာရာမှာ ကျွန်တော် ပုံနမူနာပြခဲ့တယ်” လို့ပြောတယ်။
‘လူအပေါင်းတို့၏သွေးပြစ်နှင့် ငါကင်းလွတ်၏’
၂၀ နောက်ပိုင်းတွင် မိမိတို့အကျိုးအမြတ်အတွက် သိုးတော်စုကို အသုံးချမည့်သူများနှင့် ပေါလု၏အသက်တာလမ်းစဉ်သည် လုံးဝကွာခြား၏။ သူသည် ကိုယ့်ကိုယ်ကိုယ် ထောက်ပံ့နိုင်ရန် အလုပ်လုပ်ပြီး အသင်းတော်ကို ဝန်ထုပ်ဝန်ပိုးမဖြစ်စေခဲ့ပါ။ ယုံကြည်သူချင်းများအတွက် သူ၏ကြိုးစားအားထုတ်မှုများသည် ကိုယ်ကျိုးအတွက် မဟုတ်ပေ။ ဧဖက်မြို့မှအကြီးအကဲများကို ကိုယ်ကျိုးစွန့်စိတ်ဓာတ် တင်ပြရန် ပေါလုတိုက်တွန်းခဲ့၏။ “သင်တို့သည်လည်း . . . အားနည်းသောသူတို့ကို မစရမည်၊” “‘ခံယူခြင်းထက် ပေးကမ်းခြင်း၌ သာ၍ပျော်ရွှင်သည်’ ဟုသခင်ယေရှုကိုယ်တိုင် မိန့်တော်မူသောစကားကို အောက်မေ့ရမည်” ဟူ၍သူတို့ကို သူပြောခဲ့၏။—တ. ၂၀:၃၅။
ရှာဖွေလေ့လာ ဘုရားရေးရာရတနာ
(တမန်တော် ၁၉:၉) ခေါင်းမာသူတချို့ကတော့ မယုံကြည်ဘဲ လူအများရှေ့မှာ သခင့်လမ်းစဉ်အကြောင်း ပုတ်ခတ်ပြောဆိုကြတယ်။ ဒါကြောင့် ပေါလုက တပည့်တွေကို ခေါ်ထုတ်ပြီး အဲဒီကနေ ထွက်သွားတယ်။ ပြီးတော့ တုရန္နုရဲ့ ကျောင်းခန်းမမှာ နေ့တိုင်း ဟောပြောတယ်။
ဆန့်ကျင်မှုကြားမှ တရားစကားတော် “အလွန်ထွန်းကားပျံ့နှံ့”
၁၁ ပေါလုသည် ထိုကျောင်းခန်းမတွင် မနက် ၁၁ နာရီခန့်မှ ညနေ ၄ နာရီခန့်အထိ နေ့စဉ်ဟောပြောခဲ့ဖွယ်ရှိသည်။ (တ. ၁၉:၉) ထိုအချိန်သည် နေ့တစ်နေ့ ၏ အေးအေးဆေးဆေးအရှိဆုံး၊ တစ်ချိန်တည်းတွင် အပူဆုံးအချိန် ဖြစ်ပုံရပြီး အများစုက ထိုအချိန်တွင် အလုပ်နားကာ စားသောက်အနားယူကြသည်။ ထိုတင်းကျပ်သောဇယားအတိုင်း နှစ်နှစ်လုံးလုံး ပေါလုလုပ်ခဲ့သည်ဆိုလျှင် သွန်သင်ခြင်းလုပ်ငန်း၌ နာရီပေါင်း ၃,၀၀၀ ကျော် သူအသုံးပြုခဲ့မည် ဖြစ်၏။ ယေဟောဝါဘုရား၏ တရားစကားတော် ထွန်းကားပျံ့နှံ့ခြင်းမှာ ထိုအချက်ကြောင့်လည်း ဖြစ်သည်။ ပေါလုသည် အလွန်အလုပ်ကြိုးစားပြီး အလိုက်သင့် ပြောင်းလဲတတ်သူလည်း ဖြစ်၏။ ရပ်ကွက်ရှိလူတို့၏ အခြေအနေနှင့်အညီ မိမိ၏အချိန်ဇယားကို ပြုပြင်ပြောင်းလဲ၍ ဓမ္မအမှုဆောင်ခဲ့သည်။ ရလဒ်ကားအဘယ်နည်း။ “အာရှနယ်ရှိ ဂျူးနှင့် ဂရိလူရှိသမျှတို့သည် သခင်၏တရားစကားတော်ကို ကြားကြရ၏။” (တ. ၁၉:၁၀) တကယ်ပင် စေ့စေ့စပ်စပ် သက်သေခံခဲ့သည်တကား။
(တမန်တော် ၁၉:၁၉) မှော်အတတ်လိုက်စားသူ များစွာလည်း သူတို့ရဲ့စာစောင်တွေ ယူလာပြီး လူအားလုံးရှေ့မှာ မီးရှို့လိုက်တယ်။ အဲဒီစာစောင်တွေကို တန်ဖိုး တွက်ချက် ကြည့်လိုက်တဲ့အခါ ငွေစ ၅၀,၀၀၀ တန်ဖိုးရှိမှန်း သိလိုက်ရတယ်။
ဆန့်ကျင်မှုကြားမှ တရားစကားတော် “အလွန်ထွန်းကားပျံ့နှံ့”
၁၅ သကေဝ၏သားများ အရှက်တကွဲဖြစ်ခြင်းကြောင့် ဘုရားသခင်ကို ကြောက်ရွံ့သူ ပိုများလာပြီး ယင်းက လူများစွာအား နတ်ဆိုးပညာလိုက်စားမှုများကို စွန့်လွှတ်၍ ယုံကြည်သူများ ဖြစ်လာစေသည်။ ဧဖက် ယဉ်ကျေးမှုကို မှော်အတတ် အလွန်သြဇာလွှမ်းမိုး၏။ ဂါထာများရွတ်ခြင်း၊ မန်းမှုတ်ခြင်းများနှင့် အဆောင်လက်ဖွဲ့များသည် အဆန်းမဟုတ်ပေ။ ၎င်းတို့နှင့်ဆိုင်သောစာပေများလည်းရှိသည်။ ယခု ဧဖက်မြို့သားများသည် မှော်အတတ်နှင့်ဆိုင်သော စာအုပ်များကို ယူလာပြီး လူအများရှေ့တွင် မီးရှို့လိုက်ကြသည်။ ထိုစာအုပ်များသည် လက်ရှိတန်ဖိုးအရဆိုလျှင် ဒေါ်လာသောင်းချီတန်၏။ “ထိုသို့ဖြင့် ယေဟောဝါဘုရား၏ တရားစကားတော်သည် အလွန်ထွန်းကားပျံ့နှံ့လေ၏” ဟုလုကာမှတ်တမ်းတင်သည်။ (တ. ၁၉:၁၇-၂၀) အမှန်တရားသည် အယူမှားဘာသာနှင့် နတ်ဆိုးများအပေါ် ထူးခြားစွာ အောင်ပွဲဆင်လိုက်ခြင်းပါတကား။ ထိုသစ္စာရှိသူများသည် ယနေ့ ကျွန်ုပ်တို့အတွက် ပုံသက်သေကောင်း ချမှတ်ခဲ့၏။ ကျွန်ုပ်တို့လည်း နတ်ဆိုးပညာ အလွန်သြဇာလွှမ်းမိုးနေသော လောကတွင် အသက်ရှင်နေရသည်။ နတ်ဆိုးပညာနှင့်ဆက်နွှယ်သော အရာတစ်ခုခု ကျွန်ုပ်တို့တွင်ရှိနေကြောင်း သိသည်ဆိုလျှင် ဧဖက်မြို့သားများနည်းတူ ယင်းကို ချက်ချင်းဖယ်ရှားပစ်ပါ။ ကျွန်ုပ်တို့ဘက်မှ မည်မျှပင်ဆုံးရှုံးနစ်နာပါစေ ရွံရှာဖွယ်ကောင်းသော ထိုလိုက်စားမှုများကို ဝေးဝေးရှောင်ကြပါစို့။
ကျမ်းစာဖတ်ရှုခြင်း
(တမန်တော် ၁၉:၁-၂၀) ကောရိန္သုမြို့မှာ အာပေါလု ရှိနေတုန်း ပေါလုကတော့ ကုန်းတွင်းပိုင်းဒေသတွေကို ဖြတ်ပြီး ဧဖက်မြို့ကို ရောက်လာတယ်။ အဲဒီမှာ တပည့်တချို့ကို တွေ့တော့၊ ၂ “ခင်ဗျားတို့ ယုံကြည်သူတွေ ဖြစ်လာချိန်မှာ သန့်ရှင်းသော စွမ်းအားတော် ရသလား” လို့မေးတယ်။ သူတို့က “သန့်ရှင်းသော စွမ်းအားတော်အကြောင်း တစ်ခါမှ မကြားဖူးဘူး” လို့ဖြေတယ်။ ၃ ပေါလုက “ဒါဆိုရင် ဘယ်လိုနှစ်ခြင်းမျိုးကို ခံခဲ့ကြတာလဲ” လို့မေးတော့ “ယောဟန်ဟောခဲ့တဲ့ နှစ်ခြင်းပါ” လို့ဖြေတယ်။ ၄ “ယောဟန်က လူတွေကို နောင်တရတဲ့ အထိမ်းအမှတ်အဖြစ် နှစ်ခြင်းပေးပြီး သူ့နောက်မှာ လာမယ့်သူ ယေရှုကို ယုံကြည်ဖို့ မှာခဲ့တယ်” ဆိုပြီး ပေါလု ပြောပြတယ်။ ၅ ဒီစကားကိုကြားတော့ သူတို့က သခင်ယေရှုရဲ့ နာမည်နဲ့ နှစ်ခြင်းခံကြတယ်။ ၆ အဲဒီနောက် ပေါလု လက်တင်တဲ့အခါ သန့်ရှင်းသော စွမ်းအားတော်ကို သူတို့ ရရှိတဲ့အတွက် ဘာသာစကားမျိုးစုံ ပြောပြီး ပရောဖက်ပြုကြတယ်။ ၇ အမျိုးသား ၁၂ ယောက်လောက်ရှိတယ်။ ၈ အဲဒီနောက် ပေါလုက တရားဇရပ်ထဲ ဝင်ပြီး သုံးလလုံးလုံး ဘုရားသခင့် နိုင်ငံတော်အကြောင်း ရဲရဲရင့်ရင့် ဟောပြောတယ်။ လူတွေ နားလည်လက်ခံလာအောင် ဆွေးနွေးတယ်။ ၉ ခေါင်းမာသူတချို့ကတော့ မယုံကြည်ဘဲ လူအများရှေ့မှာ သခင့်လမ်းစဉ်အကြောင်း ပုတ်ခတ်ပြောဆိုကြတယ်။ ဒါကြောင့် ပေါလုက တပည့်တွေကို ခေါ်ထုတ်ပြီး အဲဒီကနေ ထွက်သွားတယ်။ ပြီးတော့ တုရန္နုရဲ့ ကျောင်းခန်းမမှာ နေ့တိုင်း ဟောပြောတယ်။ ၁၀ အဲဒီမှာ နှစ်နှစ်လုံးလုံး ဟောပြောတဲ့အတွက် အာရှနယ်မှာရှိတဲ့ ဂျူးနဲ့ဂရိလူမျိုးအားလုံး ဘုရားသခင်ရဲ့ တရားစကားကို ကြားနာခွင့်ရကြတယ်။ ၁၁ ဘုရားသခင်က ပေါလုကိုသုံးပြီး အံ့ဖွယ်အမှုတွေ တစ်ခုပြီးတစ်ခု လုပ်ဆောင်တယ်။ ၁၂ ပေါလုကိုင်တွယ်အသုံးပြုတဲ့ ပဝါတွေ၊ ခါးစည်းတွေကို လူနာတွေဆီ ယူသွားပေးတဲ့အခါ ရောဂါပျောက်ကင်းသွားတယ်။ နတ်ဆိုးတွေလည်း ထွက်သွားတယ်။ ၁၃ နယ်တကာလှည့်ပြီး နတ်ဆိုးတွေကို နှင်ထုတ်တဲ့ ဂျူးတချို့က “ပေါလုပြောတဲ့ ယေရှုကို တိုင်တည်ပြီး ငါပြောမယ်– မင်းထွက်သွားစမ်း” ဆိုပြီး သခင်ယေရှုနာမည်နဲ့ နတ်ဆိုးကို နှင်ထုတ်ဖို့ ကြိုးစားကြည့်တယ်။ ၁၄ သကေဝလို့ခေါ်တဲ့ ဂျူးလူမျိုး ပုရောဟိတ်မင်းရဲ့ သားခုနစ်ယောက်လည်း အဲဒီလို လုပ်ကြတယ်။ ၁၅ ဒါပေမဲ့ နတ်ဆိုးက “ယေရှုကို ငါသိတယ်။ ပေါလုကိုလည်း သိတယ်။ မင်းတို့က ဘယ်သူတွေလဲ” လို့ပြောတယ်။ ၁၆ အဲဒီနောက် နတ်ဆိုးပူးသူက သူတို့ကို ခုန်အုပ်ပြီး တစ်ယောက်ပြီးတစ်ယောက် အနိုင်ယူလိုက်တဲ့အတွက် သူတို့ အဝတ်မပါဘဲ ဒဏ်ရာတွေနဲ့ အဲဒီအိမ်ထဲကနေ ထွက်ပြေးကြတယ်။ ၁၇ အဲဒီအကြောင်းကို ဧဖက်မြို့မှာနေတဲ့ ဂျူးတွေရော ဂရိတွေပါ ကြားသိပြီး ကြောက်ရွံ့သွားကြတယ်။ သခင်ယေရှုရဲ့ နာမည်လည်း ထင်ရှားသည်ထက် ထင်ရှားလာတယ်။ ၁၈ ယုံကြည်သူ အတော်များများ ရောက်လာပြီး သူတို့ရဲ့အကျင့်တွေကို ပွင့်ပွင့်လင်းလင်း ဖော်ပြပြီးတဲ့နောက် ဝန်ချတောင်းပန်ကြတယ်။ ၁၉ မှော်အတတ်လိုက်စားသူ များစွာလည်း သူတို့ရဲ့စာစောင်တွေ ယူလာပြီး လူအားလုံးရှေ့မှာ မီးရှို့လိုက်တယ်။ အဲဒီစာစောင်တွေကို တန်ဖိုးတွက်ချက်ကြည့်လိုက်တဲ့အခါ ငွေစ ၅၀,၀၀၀ တန်ဖိုးရှိမှန်း သိလိုက်ရတယ်။ ၂၀ ဒီလိုနဲ့ ယေဟောဝါရဲ့ တရားစကားဟာ အကြီးအကျယ် လွှမ်းမိုးပျံ့နှံ့သွားတော့တယ်။