သင်လက်လှမ်းနေသလော

“သင်းအုပ် [အကြီးအကဲ၊ ကဘ] အရာကိုတောင့်တသောသူသည် ကောင်းသောအမှုအရာကိုတောင့်တသည်။” —၁ တိမောသေ ၃:၁။

၁။ အဘယ်ပန်းတိုင်ကိုတက်လှမ်းခြင်းက ယေဟောဝါသက်သေများအတွက် အရေးအကြီးဆုံးဖြစ်သနည်း။

ယေဟောဝါသက်သေများသည် ဘုရားတရားလမ်းစဉ်အရ ညွှန်ကြားဆောင်ရွက်သည့် သင့်လျော်သောပန်းတိုင်များထားကြသည်။ ဤကား အံ့ဩစရာမဟုတ်ပေ။ အကြောင်းမှာ သူတို့၏ဘုရားသခင်သည် ကောင်းမြတ်သောရည်ရွယ်ချက်ပန်းတိုင်များရှိ၍ ရည်ရွယ်တော်မူသည်အတိုင်း အမြဲဖြစ်မြောက်အောင်မြင်စေတော်မူသည်။ (ဟေရှာယ၊ ၅၅:၈-၁၁) ကောင်းမွန်သောရည်ရွယ်ချက်ပန်းတိုင်မရှိဘဲ ကိုယ်မှလွဲ၍ အခြားမည်သူ့ကိုမျှအကျိုးမပြုသည့် အသက်ရှင်တတ်ကြသူများနှင့် ယေဟောဝါကျေးကျွန်များမတူသင့်ပေ။ ဘုရားသခင်၏သက်သေခံများအတွက် အရေးအကြီးဆုံးကား ဘုရားသခင်၏နိုင်ငံတော်သတင်းကောင်းကြေညာရခြင်း ရည်ရွယ်ချက်ကိုဖြည့်စွက်ကာ ဘုရား၏နှုတ်ကပါဌ်တော်မှအသက်ပေးပညာကို သူတပါးအားဝေမျှပေးခြင်းဖြစ်သည်။—ဆာလံ ၁၁၉:၁၀၅။ မာကု ၁၃:၁၀။ ယောဟန် ၁၇:၃။

၂။ ၁ တိမောသေ ၃:၁ တွင်ခရစ်ယာန်အမျိုးသားများအတွက် အဘယ်ရည်ရွယ်ချက်ပန်းတိုင်ကိုပေါလုတင်ပြထားသနည်း။

^၂ ယေဟောဝါအဖွဲ့အစည်းတွင် အခြားကောင်းမွန်သောရည်ရွယ်ချက်ပန်းတိုင်များလည်း ရှိပါသေးသည်။ ယင်းတို့အနက် တစ်ခုကိုတမန်တော်ပေါလုရေးသားဖေါ်ပြသည်။ “သင်းအုပ် [အကြီးအကဲ၊ ကဘ ] အရာကိုတောင့်တသောသူသည် ကောင်းသောအမှုအရာကို တောင့်တသည်ဟူသောစကားသည် မှန်သောစကားဖြစ်၏။” ဤကဲ့သို့သောသူသည် သူတစ်ပါး၏အကျိုးကိုဆောင်ရွက်လိုပေမည်။ သက်သက်သာသာနှင့် ဂုဏ်အသရေရှိရှိနေထိုင်ခြင်းမဟုတ်ဘဲ “ကောင်းသော အမှုအရာ” ကိုတောင့်တနေခြင်းကိုဆိုလိုသည်။ အခြားဘာသာပြန်ကျမ်းတစ်စောင်က “ဦးစီးရခြင်းကို စိတ်စွဲလမ်းသူသည် ချီးမွမ်းဖွယ်ရည်မှန်းချက်ပန်းတိုင်ရှိသူဖြစ်သည်ဟုဆိုခြင်းကား မှန်လှပေသည်။”—၁ တိမောသေ ၃:၁ Phillips.

အကြီးအကဲများအတွက်အန္တရယ်များ

၃၊ ၄။ အကြီးအကဲအရာသို့တက်လှမ်းနေသောသူသည် သူ၏နှလုံးကိုအဘယ်ကြောင့်စောင့်ရှောက်ပေးရန် လိုအပ်ပါသနည်း။

^၃ ခရစ်ယာန်အကြီးအကဲတစ်ဦးဖြစ်ရန် စိတ်စွဲလမ်းသူသည် “ချီးမွမ်းဖွယ်ပန်းတိုင်” ထားသည်ဟုမည်သို့ဆိုနိုင်မည်နည်း။ ရည်မှန်းချက်ပန်းတိုင်သည် ရည်ရွယ်ချက်တစ်ခုအောင်မြင်ရန် ပြင်းပြသောဆန္ဒဖြစ်သည်။ ချီးမွမ်းထိုက်သော ရည်ရွယ်ချက်ပန်းတိုင်ရှိသည်နည်းတူ ချီးမွမ်းမခံထိုက်သော ပန်းတိုင်များလည်းရှိသည်။ သို့သော် သူတစ်ပါးအစေကိုခံလို၍ အကြီးအကဲအရာကိုနှိမ့်ချသောသဘောဖြင့် တက်လှမ်းနေမည်ဆိုလျှင် သူ၏အမှုဆောင်ခြင်းသည် ရည်ရွယ်ချက်မှန်ပြီး ဝိညာဏကောင်းကျိုးများခံစားရစေသည်။ သို့ဖြစ်စေကာမူ သူ၏နှလုံးကို စောင့်ရှောက်ပေးရန်လိုအပ်ပါသည်။—သု၊ ၄:၂၃။

^၄ ရည်မှန်းချက်ပန်းတိုင်မြင့်မားသူအချို့သည် ဂုဏ်အသရေရှိလိုကြသည်။ အခြားသူတို့မှာမူ လူလူချင်းအုပ်ချုပ်လိုသည်။ နာမည်ကြီးရန်၊ အာဏာရှိရန်တပ်မက်ခြင်းသည် ကြံ့ခိုင်ပုံရှိသောအပင်ကြီးကိုပင် လဲကျစေနိုင်သည့် ပုပ်ပျက်သောအမြစ်နှင့်တူပေသည်။ ခရစ်ယာန်တစ်ဦးသည်လည်း ဤသို့သောမှားယွင်းသည့်စိတ်ထား၏လှုံ့ဆော်မှုကြောင့် ရည်မှန်းချက်မှားယွင်းနိုင်သည်။ (သု၊ ၁၆:၁၈) တမန်တော်ယောဟန်က ဤသို့ဆိုသည်။ “အသင်းတော်ထံသို့ မှာစာကိုရေး၍ပေးလိုက်လေပြီ။ သို့သော်လည်းအကဲအမှူးလုပ်ချင်သော [အရာရာ၌ဦးစီးချင်သော၊ Phillips ] ဒယောတရပ်သည် ငါတို့အားအခွင့်မပေး။ ထိုကြောင့်ငါလာသောအခါ သူသည်မိမိပြုသောအမှုကို မိမိသတိရစေခြင်းငှာ ငါပြုမည်။ ထိုသူသည် ငြူစူသောစကားနှင့်ငါတို့ကို ကဲ့ရဲ့သည်သာမက ကဲ့ရဲ့ခြင်းနှင့်စိတ်မပြေဘဲလျက် ညီအစ်ကိုတို့ကိုကိုယ်တိုင်လက်မခံ၊ လက်ခံချင်သောသူတို့ကိုလည်း မြစ်တား၍ အသင်းတော်ထဲကနှင်ထုတ်တတ်၏။” (၃ ယောဟန်၊ ၉၊ ၁၀) ဒယောတရပ်၏ ရည်မှန်းချက်ပန်းတိုင်သည် ခရစ်ယာန်မပီသချေ။ မာနထောင်လွားခြင်းနှင့် သူတစ်ထူးအပေါ်အာဏာပြရန်ရည်မှန်း၍လုပ်ကိုင်ခြင်းတို့သည် ယေရှု၏တပည့်နောက်လိုက်စစ်တို့တွင် မရှိသင့်ပါ။—သု၊ ၂၁:၄။

၅။ မိမိတာဝန်များကိုအဘယ်သဘောထားမျိုးဖြင့် အကြီးအကဲများထမ်းဆောင်သင့်သနည်း။

^၅ ရည်ရွယ်ချက်မှန်ဖြင့် မိမိတာဝန်များကိုဆောင်ရွက်ရသော ခရစ်ယာန်အကြီးအကဲတစ်ဦးသည် အတ္တဆန်သောရည်မှန်းချက်များထားရှိမည်မဟုတ်ပါ။ ဤမွန်မြတ်သောခရစ်ယာန်အကြီးအကဲတာဝန်ကို ဘုရားပေးအခွင့်အရေးအနေနှင့်သူသဘောထားပြီး ဘုရားသခင်၏သိုးတော်စုကို ထိန်းကျောင်းရာတွင် “အနိုင်ထိန်းရသောကြောင့်မဟုတ်၊ မစင်ကြယ်သောစီးပွားကို တပ်မက်သောကြောင့်မဟုတ်ဘဲ၊ အလိုလိုစေတနာရှိ၍ကြည့်ရှုအုပ်ထိန်းကြ၏။ အသီးသီးအုပ်သောအသင်းတော်တို့ကို အာဏာထား၍ အစိုးတရပြုသည်မဟုတ်ဘဲ သိုးတော်စုရှေ့မှာ ပုံသက်သေကောင်းပြသောသူဖြစ်” မည်။ (၁ ပေတရု ၅:၂၊ ၃) မှန်ပေသည်။ အကြီးအကဲများသည် မာနထောင်လွှားစိတ်မရှိရန်နှင့် ဩဇာအာဏာကို အလွဲသုံးစားမပြုမိရန် သတိပြုသင့်သည်။

၆။ ဘုရားသခင်၏လူတို့ကို အကြီးအကဲတစ်ဦး အဘယ်ကြောင့်အစိုးတရမပြုသင့်သနည်း။

^၆ အကြီးအကဲတစ်ဦးသည် အခြားခရစ်ယာန်များ၏ “ယုံကြည်ခြင်းကိုအစိုးရ” သူမဟုတ်ဘဲ လုပ်ဖော်ဆောင်ဖက်များသာဖြစ်သောကြောင့် အစိုးတရပြုမည်မဟုတ်။ (၂ ကောရိန္သု ၁: ၂၄) တမန်တော်အချို့ ကျော်ကြားမှုရလိုကြသောအခါ ယေရှုဤသို့ဆိုသည်။ “သင်တို့သိသည့်အတိုင်း လောကီမင်းတို့သည် အစိုးတရပြုတတ်ကြ၏။ အကဲအမှူးတို့သည် အာဏာထားတတ်ကြ၏။ သင်တို့မူကား ထိုသို့မပြုကြနှင့်။ လူသားသည် သူတစ်ပါးအားစေစားခြင်းငှာမလာ။ သူတစ်ပါး၏အစေကိုခံခြင်းငှာလည်းကောင်း၊ မိမိအသက်ကိုစွန့်၍ လူများကိုရွေးခြင်းငှာလည်းကောင်း ကြွလာသည်ဖြစ်၍ ထိုနည်းတူ သင်တို့တွင်အကဲအမှူးပြုလိုသောသူကို သင်တို့အစေခံဖြစ်စေ။ သင်တို့တွင် အထွတ်အမြတ်လုပ်ချင်သောသူကိုလည်း သင်တို့ကျွန်ဖြစ်စေ။” (မဿဲ၊ ၂၀:၂၀-၂၈) အကြီးအကဲတစ်ဦးသည် သိုးထိန်းချုပ်မဟုတ်၊ လက်ထောက်သိုးထိန်းမျှသာဖြစ်သည်။ သိုးအုပ်ကိုသူအစိုးတရပြုမည်ဆိုလျှင် မာနထောင်လွှားသောသဘော တင်ပြနေခြင်းဖြစ်သည်။ အထူးသဖြင့် သူ၏ဝင့်ဝါသောရည်မှန်းချက်များ ဖြစ်ထွန်းလာစေရန် သူတစ်ထူးအားဖြားယောင်းသွေးဆောင်ပါက အန္တရာယ်ရှိစရာအကြောင်းရှိပေသည်။ ပညာရှိစကားတစ်ခွန်းကား ဤသို့။ “မာနကြီးသောသူအပေါင်းတို့ကို ထာဝရဘုရား [ယေဟောဝါ၊ ကဘ] စက်ဆုပ်ရွံရှာတော်မူ၏။ သူတို့သည် သင်းဖွဲ့သော်လည်း အပြစ်ဒဏ်နှင့်မလွတ်ရကြ။ —သု၊ ၁၆:၅။

၇၊ ၈။ (က) ခရစ်ယာန်အကြီးအကဲများ အဘယ်ကြောင့်နှိမ့်ချမှုရှိရန်လိုသနည်း။ (ခ) နှိမ့်ချမှုရှိသောအကြီးအကဲတစ်ဦးပုံသက်သေကိုတင်ပြပါ။

^၇ ထိုကြောင့် ခရစ်ယာန်အကြီးအကဲများသည် ဘုရားသခင်၏ “တန်ခိုးကြီးသောလက်တော်အောက်၌ ကိုယ်ကိုယ်ကိုနှိမ့်ချကြ” ရမည်။ မာန်မာနသည် ဝိညာဏအသုံးဝင်မှုအတွက် အတားအဆီးဖြစ်သည်။ အကြောင်းမူကား နှိမ့်ချသောသဘောရှိသူများသာလျှင် ဘုရားသခင်၏အလိုတော်ကိုဆောင်ရွက်ရန် စိတ်နှလုံးရှိကြသည်။ “ထောင်လွှားစော်ကားသောသူတို့ကို ဘုရားသခင်ဆီးတားတော်မူ၏။ စိတ်နှိမ့်ချသောသူတို့အား ကျေးဇူးပြုတော်မူ၏။” (၁ ပေတရု ၅:၅၊ ၆) မှန်ပေသည်။ နှိမ့်ချသောသဘောရှိသူကို ယေဟောဝါကောင်းချီးပေးတော်မူ၏။ ဤသူတို့အထဲမှ ခရစ်ယာန်အကြီးအကဲများအဖြစ်အမှုထမ်းရန် အရည်အချင်းရှိအမျိုးသားများကို ခန့်အပ်တော်မူသည်။

^၈ ယေဟောဝါသက်သေများ၏ မျက်မှောက်ခေတ်သမိုင်းသည် ဘုရားတရားကြည်ညိုသူများ၏ နှိမ့်ချစွာအမှုထမ်းခဲ့ခြင်း အတ္ထုပ္ပတ္တိများနှင့်ပြည့်နေပါသည်။ ဥပမာ၊ တစ်ချိန်ကပီလ်ဂရင်မ်ခေါ် နယ်လှည့်ကြီးကြပ်မှူး၊ နောက်ပိုင်းဗေသလလုပ်ငန်းကို ကြာမြင့်စွာထမ်းဆောင်သူတစ်ဦးဖြစ်ခဲ့သည့် နူးညံ့သိမ်မွေ့သောသဘောရှိသူ ဒဗလျူဂျေသောန် (W. J. Thorn) ကိုသုံးသပ်ပါ။ “ယနေ့ထိကျွန်တော့်ကိုအကူအညီပေးခဲ့သည့် ညီအစ်ကိုသောန်ပြောခဲ့သောစကားတစ်ခွန်းကို ဘယ်တော့မျှမမေ့နိုင်ပါ။ သူက ‘ကိုယ့်ကိုယ်ကိုအထင်ကြီးလာမိတိုင်း ကိုယ့်ကိုယ်ကိုချောင်ပိတ်ဘိသကဲ့သို့ပြုကာ “အသင်ဖုံမှုန့်၊ မာနထောင်လွှားစရာ ဘာရှိလို့လဲ” ဟူ၍ဆုံးမသည်’ ” ဟုသူ့အကြောင်းခရစ်ယာန်တစ်ဦးပြောသည်။ အကြီးအကဲများနှင့်အခြားသူများ တင်ပြသင့်သောချီးမွမ်းဖွယ်အရည်အချင်းပါတကား။ “စိတ်နှိမ့်ချခြင်း၊ ထာဝရဘုရား [ယေဟောဝါ၊ ကဘ] ကိုကြောက်ရွံ့ခြင်းကျေးဇူးကြောင့် စည်းစိမ်၊ ဂုဏ်အသရေ၊ အသက်ကိုရတတ်၏” ဟူသောစကားကိုသတိရပါ။—သု၊ ၂၂:၄။

အမှုဆောင်ရန် ဘုရားပေးဆန္ဒ

၉။ အကြီးအကဲအဖြစ်အမှုထမ်းလိုသောဆန္ဒသည် ဘုရားပေးဆန္ဒဖြစ်သည်ဟု အဘယ်ကြောင့်ဆိုနိုင်သနည်း။

^၉ အကြီးအကဲတစ်ဦးအဖြစ် အမှုထမ်းရန်အလိုဆန္ဒသည် ဘုရားပေးဆန္ဒဖြစ်သလော။ ဖြစ်ပါသည်။ အကြောင်းမူကား၊ ကိုယ်တော်၏ မြင့်မြတ်သောလုပ်ငန်းတော်ကိုဆောင်ရွက်နိုင်ရန် ယေဟောဝါ၏ဝိညာဉ်တော်သည် စိတ်ကိုလှုံ့ဆော်ပေးသည်၊ သတ္တိနှင့် ခွန်အားလည်းရှိစေသည်။ ဥပမာ၊ နှိပ်စက်ညှဉ်းပန်းခံရသော ယေရှု၏တပည့်နောက်လိုက်များသည် ဟောပြောရန်သတ္တိရှိဖို့ ဆုတောင်းခဲ့သောအခါ မည်သို့ဖြစ်ပျက်ခဲ့သနည်း။ “စုဝေးသောအရပ်သည်တုန်လှုပ်၍ ထိုသူအပေါင်းတို့သည် သန့်ရှင်းသောဝိညာဉ်တော်နှင့်ပြည့်သဖြင့် ဘုရားသခင်၏နှုတ်ကပါဌ်တရားကို ရဲရင့်စွာဟောပြောကြ၏။ (တမန်တော် ၄:၂၇-၃၁) သန့်ရှင်းသောဝိညာဉ်တော်သည် ဤရလဒ်များကိုဖြစ်ပေါ်စေသည့်အတွက် လူတစ်ဦးအားတက်လှမ်းရန် တိုက်တွန်းပေးနိုင်ပါသည်။

၁၀။ (က) ခရစ်ယာန်အမျိုးသားတစ်ဦး တက်လှမ်းရန်မကြိုးစားခြင်းကား အဘယ်ကြောင့်ဖြစ်နိုင်သနည်း။ (ခ) လုပ်ငန်းတော်အခွင့်အရေးတစ်ခုကို ဘုရားသခင်ကျွန်ုပ်တို့အားကမ်းလှမ်းပါက အဘယ်အရာကိုလည်းစိတ်ချနိုင်ပါသနည်း။

^၁၀ ရင့်ကျက်သောခရစ်ယာန်တစ်ဦးသည် အဘယ်ကြောင့်တက်လှမ်းရန် မကြိုးစားဘဲနေကောင်းနေမည်နည်း။ သူသည်ဝိညာဏလူဖြစ်လျက်ပင် မိမိကိုယ်ကိုအရည်အချင်းမပြည့်စုံဟူ၍ စိတ်အားငယ်နေသူဖြစ်ပေမည်။ (၁ ကောရိန္သု ၂:၁၄၊ ၁၅) ကိုယ့်ကိုယ်ကိုအထင်မကြီးဘဲ ကိုယ်မစွမ်းဆောင်နိုင်သည့်အချက်များကို အသိအမှတ်ပြုသူဖြစ်ရမည်မှန်၏။ (မိက္ခာ ၆:၈) တာဝန်တစ်ခုကိုဆောင်ရွက်ရန် မိမိသည်အရည်အချင်းအရှိဆုံးသူဖြစ်သည်ဟု ရောင့်တက်ထောင်လွှားမည့်အစား “စိတ်နှိမ့်ချသောသူတို့၌ကား ပညာရှိ” ကြောင်းသတိရထားလျှင်ကောင်းပေသည်။ (သု၊ ၁၁:၂) သို့သော် လုပ်ငန်းတော်အခွင့်အရေးတစ်ခုကို ဘုရားသခင်ပေးတော်မူလျှင် ယင်းကိုထမ်းဆောင်နိုင်ရန်ခွန်အားကိုလည်း ကိုယ်တော်ပေးသနားတော်မူမည်။ ပေါလုပြောသည့်အတိုင်းပင် “ငါ့ကိုခွန်အားနှင့်ပြည့်စုံစေတော်မူသော ခရစ်တော်အားဖြင့် ခပ်သိမ်းသောအမှုကို ငါတတ်စွမ်းနိုင်၏။—ဖိလိပ္ပိ ၄:၁၃။

၁၁။ ဆုံးမသြဝါဒပေးရန် အသိပညာအလုံအလောက်မရှိဟုအထင်ရှိသောကြောင့် တက်လှမ်းရန်မကြိုးစားသောခရစ်ယာန်သည် မည်သို့ပြုလုပ်နိုင်သနည်း။

^၁၁ ဆုံးမပဲ့ပြင်ရန် ဉာဏ်ပညာအလုံအလောက်မရှိဟူသည့်အထင်နှင့် ခရစ်ယာန်တစ်ဦး မတက်လှမ်းဘဲ နေကောင်းနေမည်။ သို့ဖြစ်လျှင် ဘုရားသခင်၏နှုတ်ကပါဌ်တော်ကို ဝီရိယပိုစိုက်ထုတ်လေ့လာခြင်းဖြင့် ဉာဏ်ပညာတိုးလာနိုင်သည်။ ယင်းအတွက်လည်း သူအမှန်ဆုတောင်းသင့်သည်။ ယာကုပ်ဤသို့ရေးသားခဲ့သည်။ “သင်တို့တွင်တစ်စုံတစ်ယောက်သောသူသည် ပညာကိုလိုလျှင်ကဲ့ရဲ့ပြစ်တင်ခြင်းကိုပြုတော်မမူဘဲ ခပ်သိမ်းသောသူတို့အား စေတနာစိတ်နှင့်ပေးသနားတော်မူသော ဘုရားသခင်ကိုတောင်းစေ။ တောင်းလျှင်ရလိမ့်။ သို့ရာတွင်တွေးတောခြင်းမရှိဘဲ ယုံကြည်သောစိတ်နှင့်တောင်းရမည်။ တွေးတောခြင်းရှိသောသူသည်ကား လေခတ်၍လှုပ်ရှားတတ်သောလှိုင်းတံပိုးနှင့်တူ၏။ ထိုသို့သောသူသည် စိတ်နှစ်ခွရှိသောသူ၊ ပြုလေသမျှတို့၌ မတည်ကြည်သောသူဖြစ်၍ ထာဝရဘုရား [ယေဟောဝါ၊ ကဘ ] ၏လက်တော်မှ တစ်စုံတစ်ခုကိုရမည်ဟု မထင်မမှတ်စေနှင့်။” (ယာကုပ် ၁:၅-၈) ရှောလမုန်ဆုတောင်းခဲ့သည့်အတွက် တရားစီရင်ရာတွင် အကောင်းအဆိုးကိုထိုးထွင်းသိမြင်နိုင်ရန် “ဉာဏ်ပညာနှင့်ပြည့်စုံသောစိတ်ဝိညာဉ်” ကိုဘုရားသခင်ပေးတော်မူခဲ့သည်။ (၃ ဓမ္မရာဇဝင် ၃:၉-၁၄) ရှောလမုန်၏အဖြစ်အပျက်သည် အထူးကိစ္စဖြစ်သည်။ သို့သော်ဝီရိယစိုက်ထုတ်လေ့လာ၍ ဘုရားသခင်၏အကူအညီရသောအခါ အသင်းတော်တာဝန်အပ်နှင်းခံရသောအမျိုးသားတို့သည် သူတစ်ထူးကိုဖြောင့်မတ်မှန်ကန်စွာ ဆုံးမပဲ့ပြင်ပေးနိုင်ပါသည်။ “ထာဝရဘုရား [ယေဟောဝါ၊ ကဘ] သည်ပညာကိုပေးတော်မူတတ်၏။ နားလည်နိုင်သောဉာဏ်သည် နှုတ်ကပါဌ်တော်အားဖြင့်သာဖြစ်တတ်၏။”—သု၊ ၂:၆။

၁၂။ စိုးရိမ်မှုကြောင့် လူတစ်ဦးမတက်လှမ်းဘဲနေမည်ဆိုလျှင် သူ့အားအဘယ်အရာကအကူအညီဖြစ်စေမည်နည်း။

^၁၂ စိုးရိမ်တတ်သောသဘောကြောင့် လူတစ်ဦးမတက်လှမ်းဘဲ နေကောင်းနေမည်။ အကြီးအကဲတစ်ဦး၏ ကြီးလေးသောတာဝန်ကို မိမိမထမ်းဆောင်နိုင်ဟူ၍ သူထင်ကောင်းထင်မည်။ ပေါလုကိုယ်တိုင်ဤသို့ဝန်ခံသည်။ “အသင်းတော်အပေါင်းတို့ကို စိုးရိမ်သောစိတ်နှင့်ကြည့်ရှုပြုစု၍ နေ့တိုင်းအစဉ် နှောင့်ယှက်ခြင်းကိုငါခံရ၏။” (၂ ကောရိန္သု ၁၁:၂၈) သို့သော် စိုးရိမ်စိတ်ရှိသည့်အခါ မည်သို့ပြုလုပ်ရမည်ကိုသိထားကြောင်း သူ၏ဤစာကတင်ပြသည်။ “အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ကျေးဇူးတော်ကိုချီးမွမ်းခြင်းနှင့်တကွ ဆုတောင်းပတ္ထနာပြုသောအားဖြင့် သင်တို့တောင်းပန်လိုသောအရာတို့ကို ဘုရားသခင်အားကြားလျှောက်ကြလော့။ ထိုသို့ပြုလျှင် အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် သင်တို့၏စိတ်နှလုံးတို့ကို စောင့်မလိမ့်မည်။” (ဖိလိပ္ပိ ၄:၆၊ ၇) မှန်ပေသည်။ ဆုတောင်းခြင်းနှင့် ဘုရားသခင်ကိုအားထားခြင်းကား စိုးရိမ်စိတ်ကိုပြေပျောက်လျော့နည်းစေသည်။

၁၃။ တက်လှမ်းရန်မဝံ့မရဲဖြစ်နေသူသည် မည်သို့ဆုတောင်းနိုင်သနည်း။

^၁၃ စိုးရိမ်စိတ်အနည်းငယ်ရှိမည်ဆိုလျှင် တက်လှမ်းရန်စိတ်မတင်မကျဖြစ်နေသူသည် ဒါဝိဒ်နည်းတူ ဤသို့ဆုတောင်းနိုင်ပါသည်။ “အိုဘုရားသခင်၊ အကျွန်ုပ်ကိုစစ်ကြော၍ အကျွန်ုပ်၏နှလုံးကိုသိမှတ်တော်မူပါ။ စုံစမ်း၍ စိတ်အထင်များကိုလည်းသိမှတ်တော်မူပါ။ ဆိုးသောလမ်းသို့ အကျွန်ုပ်လိုက်သည်မလိုက်သည်ကိုကြည့်ရှု၍ ထာဝရလမ်းထဲသို့သွေးဆောင်တော်မူပါ။” (ဆာလံ ၁၃၉:၂၃၊ ၂၄) ကျွန်ုပ်တို့ “စိတ်ပူစရာ” သို့မဟုတ် “စိုးရိမ်” စရာများသည် မည်သို့ပင်ရှိစေကာမူ ကျွန်ုပ်တို့ဝိညာဉ်ရေးဘက်တိုးတက်ရန် ၄င်းတို့ကိုဖြေရှင်းနိုင်ဖို့ ဘုရားသခင်ကူညီပေးနိုင်ပါသည်။ (The New International Version ကိုရှု) အခြားဆာလံတစ်ပုဒ်တွင် ဤသို့လျောက်ပတ်စွာဖော်ပြထားသည်။ “ငါခြေချော်လျက်ရှိသည်ဟု အကျွန်ုပ်ဆိုသောအခါ အိုထာဝရဘုရား [ယေဟောဝါ၊ ကဘ] ကိုယ်တော်၏ကရုဏာသည် အကျွန်ုပ်ကိုထောက်မပါ၏။ အကျွန်ုပ်၏နှလုံးထဲမှာ စိတ်များပြားသောအခါ ကိုယ်တော်သည်သက်သာစေတော်မူသဖြင့် အကျွန်ုပ်၏ဝိညာဉ်သည်ရွှင်လန်းပါ၏။”—ဆာလံ ၉၄:၁၈၊ ၁၉။

ယေဟောဝါအလိုတော်ရှိသည်အတိုင်း ရွှင်လန်းစွာအမှုတော်ထမ်း

၁၄။ တက်လှမ်းရန်မကြိုးစားသူသည် ဘုရားသခင်၏သန့်ရှင်းသောဝိညာဉ်တော်အတွက် အဘယ်ကြောင့်ဆုတောင်းသင့်သနည်း။

^၁၄ စိုးရိမ်စိတ်၊ မပြည့်စုံ၍မစွမ်းဆောင်နိုင်ဟူသော အားငယ်မှု၊ တိုက်တွန်းမှုမခံရခြင်းတို့ကြောင့် ခရစ်ယာန်တစ်ဦးသည် တက်လှမ်းရန်ပျက်ကွက်မည်ဆိုလျှင် ဘုရားသခင်၏ဝိညာဉ်တော်တန်ခိုးအတွက် ဆုတောင်းလျှင်အမှန်သင့်လျော်ပေသည်။ ယေရှုဤသို့ မိန့်တော်မူသည်။ “သင်တို့သည်အဆိုးဖြစ်လျက်ပင် ကိုယ့်သားတို့အား ကောင်းသောအရာကိုပေးတတ်လျှင်၊ ထိုမျှမက ကောင်းကင်ဘုံ၌ရှိတော်မူသော သင်တို့အဘသည် ဆုတောင်းသောသူတို့အား သန့်ရှင်းသောဝိညာဉ်တော်ကိုသာ၍ပေးမည် မဟုတ်လော။” (လုကာ ၁၁:၁၃) ငြိမ်သက်ခြင်းနှင့်ချုပ်တည်းခြင်းသည် ဝိညာဉ်အသီးများအဝင်ဖြစ်သောကြောင့် ဤဝိညာဉ်တော်သည် စိုးရိမ်စိတ်၊ မပြည့်စုံ၍မစွမ်းဆောင်နိုင်ဟုထင်သောစိတ်ထားများကို အောင်မြင်နိုင်ရန် ကူညီပေးပါလိမ့်မည်။—ဂလာတိ၊ ၅:၂၂၊ ၂၃။

၁၅။ လုပ်ငန်းတော်အခွင့်အရေးများအတွက် အသင့်ရှိစေရန် လှုံ့ဆော်မှုမခံရသူများကို မည်ကဲ့သို့သောဆုတောင်းချက်များသည် အကူအညီဖြစ်စေမည်နည်း။

^၁၅ တိုက်တွန်းလှုံ့ဆော်မှု မခံရလျှင်ကော။ နှစ်ခြင်းခံပြီးသားခရစ်ယာန်များအနေနှင့် ဘုရားသခင့်အလိုတော်နှင့်တွေ့မည့်အရာများကိုပြုလုပ်ကြဖို့ ကိုယ်တော်တိုက်တွန်းပေးပါရန် ဆုတောင်းဖို့လိုသည်။ ဒါဝိဒ်ဤသို့ အသနားခံခဲ့သည်။ “အိုထာဝရဘုရား [ယေဟောဝါ၊ ကဘ] ကိုယ်တော်၏လမ်းတို့ကို အကျွန်ုပ်အားပြညွှန်၍ ခရီးတော်တို့ကိုသွန်သင်တော်မူပါ။ ကိုယ်တော်၏သမ္မာတရားကိုပြ၍ အကျွန်ုပ်ကိုသွန်သင်တော်မူပါ။” (ဆာလံ ၂၅:၄၊ ၅) ဤသို့သောဆုတောင်းချက်များက လမ်းမှားကိုရှောင်ကြဉ်ရန် အကူအညီပေးပါလိမ့်မည်။ တက်လှမ်းရန်လှုံ့ဆော်မှုမခံရလျှင် ထပ်တူနည်းအတိုင်းဆုတောင်းနိုင်ပါသည်။ အမှန်မှာ ဘုရားသခင့်ဝိညာဉ်တော်အတွက်ဆုတောင်းပြီး ၄င်း၏လမ်းညွှန်မှုကိုခံယူမည်ဆိုလျှင် လုပ်ငန်းတော်အခွင့်အရေးများရရှိလာပါက လက်ခံယူရန်အသင့်ရှိနေမည်။ တကယ်ဆိုလျှင် ဘုရားသခင်၏ကျေးကျွန်များသည် အဘယ်နည်းနှင့်မျှကိုယ်တော်၏ဝိညာဉ်တော်ကို ငြင်းပယ်လိုကြမည်မဟုတ်ပါ။—ဧဖက် ၄:၃၀။

၁၆။ အသင်းတော်တာဝန်အတွက်တက်လှမ်းရန် အဘယ်စိတ်ထားကပြင်းပြစွာလှုံ့ဆော်ပေးသနည်း။

^၁၆ “ခရစ်တော်စိတ်” ရှိထားမည်ဆိုလျှင် ဘုရားသခင့်အလိုတော်ဆောင်ရွက်ရာ၌ အားရရွှင်လန်းမည်ဖြစ်သည်။ (၁ ကောရိန္သု ၂:၁၆) “အကျွန်ုပ်၏ဘုရားသခင်၊ ကိုယ်တော်၏အလိုတော်ကိုဆောင်ရာ၌ အကျွန်ုပ်သည်အားရဝမ်းမြောက်ပါ၏။ ကိုယ်တော်၏တရားသည်လည်း အကျွန်ုပ်နှလုံးထဲမှာရှိပါ၏” ဟုပြောခဲ့သောဆာလံဆရာ၏စိတ်ထားမျိုး ယေရှု၌ရှိတော်မူသည်။ (ဆာလံ ၄၀:၈) ခရစ်တော်ဤသို့မိန့်တော်မူသည်။ “အိုဘုရားသခင်၊ အကျွန်ုပ်သည်ကိုယ်တော်၏အလိုကိုဆောင်အံ့သောငှာသွားပါမည်။” နှက်တိုင်ပေါ်သေသည်အထိ ထိုသို့ပြုလုပ်သွားတော်မူသည်။ (ဟေဗြဲ ၁၀:၉၊ ၁၀) ယေဟောဝါ၏လုပ်ငန်းတော်တွင် တတ်နိုင်သည့်အရာအားလုံးကိုလုပ်ကိုင်လိုစိတ်သည် အသင်းတော်တာဝန်များကိုလက်ခံယူရန် တက်လှမ်းဖို့လှုံ့ဆော်အားပေသည်။

အနာဂတ်သို့ရှု

၁၇။ (က) တစ်ချိန်ကကဲ့သို့ ယခုအပြည့်အဝအမှုမထမ်းနေသောအမျိုးသားများသည် အဘယ်ကြောင့်စိတ်ဓာတ်မကျသင့်သနည်း။ (ခ) အကြီးမြတ်ဆုံးအခွင့်အရေးကားအဘယ်နည်း။

^၁၇ တစ်ချိန်ကအသင်းတော်၏အရေးကြီးတာဝန်များကိုထမ်းဆောင်ခဲ့သူအချို့သည် ကျန်းမာရေးပြဿနာများ၊ သို့မဟုတ်အခြားအကြောင်းများကြောင့် ယခုဤအခွင့်အရေးများမရရှိတော့ပေ။ ဤသူတို့သည် စိတ်ဓာတ်မကျသင့်ပါ။ တစ်ချိန်ကကဲ့သို့ အပြည့်အဝအမှုမထမ်းနိုင်ကြတော့သည့် သစ္စာရှိသူအမျိုးသားများစွာတို့သည် ယခုထိပင်သမာဓိစောင့်သိသူများအဖြစ် ခိုင်ခံ့မြဲမြံစွာရပ်တည်နေကြသည်။ (ဆာလံ ၂၅:၂၁) နှိမ့်ချကျိုးနွံသောအကြီးအကဲအရာကိုကြာမြင့်စွာခံယူထားသူတို့သည် အကြီးအကဲအဖွဲ့တွင်ဆက်ပါဝင်နေခြင်းဖြင့် သူတို့၏အတွေ့အကြုံကို အသုံးခံစေနိုင်ပါသေးသည်။ အသက်အရွယ် သို့မဟုတ် မသန်မစွမ်းမှုများကြောင့် ချို့ငဲ့နေမည်ဖြစ်သော်လည်း အခွင့်အရေးကိုစွန့်လွှတ်စရာမလိုပါ။ တစ်ချိန်တည်းတွင် ယေဟောဝါ၏သက်သေတစ်ဦးစီသည် အထူးတကာ့အထူးမြတ်ဆုံးသောအခွင့်အရေးဖြစ်သည့် နာမတော်မြတ်ကိုချီးမြှောက်သူအနေနှင့် ‘ဘုရားသခင့်နိုင်ငံတော်၏ဘုန်းအသရေတော်ကို ဖော်ပြပြောဆိုခြင်း’ ကိုတန်ဖိုးထားကြစို့လေ။—ဆာလံ ၁၄၅:၁၀-၁၃။

၁၈။ (က) အကြီးအကဲ သို့မဟုတ် ဓမ္မအမှုထမ်းတစ်ဦးသည် ထုတ်ပယ်ခံရလျှင် အဘယ်အရာလိုအပ်မည်နည်း။ (ခ) ထုတ်ပယ်ခံရသောအကြီးအကဲတစ်ဦးသည် အဘယ်မွန်မြတ်သောစိတ်ထားတင်ပြခဲ့သနည်း။

^၁၈ တစ်ချိန်ကသင်သည် အကြီးအကဲသို့မဟုတ်ဓမ္မအမှုထမ်းတစ်ဦးဖြစ်ခဲ့၍ ယခုထိုအခွင့်အရာကိုမခံယူရတော့လျှင် သင့်အားဘုရားသခင်ဂရုစိုက်နေသေးကြောင်း၊ နောင်အနာဂတ်တွင် မမျှော်လင့်သောအခွင့်ထူးတစ်မျိုးမျိုးကို ပေးကောင်းပေးတော်မူမည်ဖြစ်ကြောင်း စိတ်ချနေပါ။ (၁ ပေတရု ၅:၆၊ ၇) ပြုပြင်စရာအနည်းငယ်ရှိနေမည်ဆိုလျှင် မိမိအမှားကိုဝန်ခံရန်အသင့်ရှိပြီး ဘုရားသခင်အကူအညီဖြင့် ပြုပြင်နိုင်ရန်ကြိုးစားပါ။ အကြီးအကဲအဖြစ်မှထုတ်ပယ်ခံရသူအချို့သည် ခရစ်ယာန်မပီသသောသဘောထားများတင်ပြခဲ့ကြသည်။ အချို့မှာဝိညာဉ်ရေးဘက်မလှုပ်ရှားတော့သူ၊ သို့မဟုတ် သမ္မာတရားလမ်းမှသွေဖည်သူများဖြစ်သွားသည်။ သို့သော်မွန်မြတ်သောစိတ်ဓာတ်တင်ပြခဲ့သူများနှင့်တူခြင်းကား ပညာရှိလှသည်တကား။ ဥပမာ၊ အလယ်ပိုင်းအမေရိကရှိ အကြီးအကဲတစ်ဦးအဖြစ် နှစ်ချီအမှုထမ်းခဲ့သောသူတစ်ဦးသည် ထုတ်ပယ်ခံရသောအခါ သူဤသို့ဆိုသည်။ “ကျွန်တော်နှစ်ချီတန်ဖိုးထားခဲ့တဲ့အခွင့်အရေးကိုဆုံးရှုံးလိုက်ရတဲ့အတွက် စိတ်တကယ်ထိခိုက်တယ်။ ဒါပေမယ့် ကျွန်တော့်ကိုညီအစ်ကိုများအသုံးပြုချင်တဲ့အဘယ်နည်းနဲ့မဆို အသုံးခံနိုင်ဖို့ကြိုးစားမယ်။ လုပ်ငန်းတော်အခွင့်အရေးများပြန်ရလာနိုင်ဖို့ ကြိုးစားအားထုတ်မယ်။” အတန်ကြာသော် ဤညီအစ်ကိုသည် အကြီးအကဲအဖြစ်အမှုပြန်ထမ်းဆောင်ခွင့်ရရှိခဲ့သည်။

၁၉။ အကြီးအကဲ သို့မဟုတ် ဓမ္မအမှုထမ်းအဖြစ်မှ ထုတ်ပယ်ခံရသူအား အဘယ်လျောက်ပတ်သောအကြံပေးချက်ပေးထားသနည်း။

^၁၉ အကြီးအကဲတစ်ဦး သို့မဟုတ် ဓမ္မအမှုထမ်းတစ်ဦးအဖြစ်မှ ထုတ်ပယ်ခံရမည်ဆိုလျှင် နှိမ့်ချသောသဘောကိုအမြဲတင်ပြပါ။ နောက်နောင်အခွင့်အရေးများကိုပိတ်ပင်စေသည့် စိတ်နာကြည်းနေသောသဘောထားမျိုးကိုရှောင်ပါ။ ဘုရားတရားစိတ်ဓာတ်သည် လေးစားမှုခံရစေသည်။ စိတ်ဓာတ်ကျမည့်အစား သင့်ဓမ္မအမှုသို့မဟုတ်သင့်အိမ်ထောင်ကို ယေဟောဝါမည်သို့ကောင်းချီးပေးနေကြောင်း ပြန်သုံးသပ်ပါ။ သင့်အိမ်ထောင်၏ဝိညာဉ်ရေးကို တည်ဆောက်ပေးပါ။ ဖျားနာသူတို့ထံလည်ပတ်ပါ။ အားနည်းသူများကို အားပေးတိုက်တွန်းပါ။ ထိုထက်ကား ဘုရားသခင်ကိုချီးမွမ်းခွင့်ရခြင်း၊ ယေဟောဝါသက်သေတစ်ဦးအနေနှင့် သတင်းကောင်းဟောပြောခွင့်ရှိခြင်းကို တန်ဖိုးထားပါ။—ဆာလံ ၁၄၅:၁၊ ၂။ ဟေရှာယ ၄၃:၁၀-၁၂။

၂၀။ ယခင်ကအကြီးအကဲသို့မဟုတ်ဓမ္မအမှုထမ်းဖြစ်ခဲ့ဖူးသူအား အကြီးအကဲအဖွဲ့သည် မည်သို့ကူညီပေးနိုင်မည်နည်း။

^၂၀ ယခင်ကအကြီးအကဲ သို့မဟုတ် ဓမ္မအမှုထမ်းဖြစ်ဖူးသူတစ်ဦးသည် ထိုအခွင့်အရေးကိုသူကိုယ်တိုင်စွန့်ခဲ့ဦးတော့ ထုတ်ပယ်ခံရခြင်းကြောင့် သူ့အတွက်စိတ်မချမ်းသာမှုဖြစ်နိုင်ကြောင်း အကြီးအကဲအဖွဲ့ အသိအမှတ်ပြုသင့်သည်။ အသင်းမှသူ့အားမနှင်ထုတ်သော်လည်း ထိုညီအစ်ကိုသည် စိတ်ဓာတ်ကျနေကြောင်း အကြီးအကဲများသတိပြုမိလျှင် မေတ္တာပါပါ ဝိညာဏအကူအညီပေးသင့်သည်။ (၁ သက်သာလောနိတ် ၅:၁၄) အသင်းတော်တွင် သူ့အကူအညီလိုအပ်ကြောင်း သူ့အားသိမြင်စေပါ။ ဆုံးမခံရရန်လိုအပ်ခဲ့သော်လည်း နှိမ့်ချကျိုးနွံ၍ ကျေးဇူးသိတတ်သောသူတစ်ဦးသည် အသင်းတော်တွင်အခွင့်အရေးများပြန်ရနိုင်ရန် ကြာမြင့်စွာစောင့်စရာလိုမည်မဟုတ်ကြောင်း နားလည်စေပါ။

၂၁။ လုပ်ငန်းတော်အခွင့်အရေးများအတွက် မည်သူတို့စောင့်ဆိုင်းခဲ့သနည်း။ ယနေ့ယင်းအတွက်စောင့်မျှော်နေသူများအား အဘယ်အကြံပေးချက်ရှိသနည်း။

^၂၁ သင်သည်တက်လှမ်းနေသူဖြစ်ပါက လုပ်ငန်းတော်အခွင့်အရေးများထပ်ဆင့်ရရှိနိုင်ရန် ခေတ္တစောင့်ဆိုင်းရပေမည်။ စိတ်မရှည်နိုင်သည့်သဘောမရှိပါနှင့်။ အီဂျစ်ပြည်တွင် ကျွန်ဘဝမှဣသရေလလူမျိုးကိုလွတ်မြောက်စေရန် ဘုရားသခင်၏အသုံးတော်ခံဖြစ်ဖို့ မောရှေသည်နှစ်ပေါင်း ၄၀ စောင့်ခဲ့ရသည်။ (တမန်တော် ၇:၂၃-၃၆) မောရှေနောက်ဆက်ခံသူအဖြစ်ခန့်အပ်မခံရမီ မောရှေ၏အစေအပါးအဖြစ် ယောရှုကြာမြင့်စွာအမှုထမ်းခဲ့သည်။ (ထွက်မြောက်ရာ ၃၃:၁၁။ တောလည်ရာ ၂၇:၁၄-၂၃) ဣသရေလနိုင်ငံတွင်နန်းတင်ခံရရန် ဒါဝိဒ်ကြာမြင့်စွာစောင့်ခဲ့ရသည်။ (၂ ဓမ္မရာဇဝင် ၂:၇။ ၅:၃) ပေတရုနှင့်ယောဟန်မာကုတို့သည် စမ်းသပ်စစ်ဆေးခြင်းအမျိုးမျိုးခံခဲ့ရပုံရှိသည်။ (မဿဲ ၂၆:၆၉-၇၅။ ယောဟန် ၂၁:၁၅-၁၉။ တမန်တော် ၁၃:၁၃။ ၁၅:၃၆-၄၁။ ကောလောသဲ ၄:၁၀) ထိုကြောင့်အသင်းတော်တာဝန်များကို ယခုသင်မထမ်းဆောင်ရဦးတော့ အတွေ့အကြုံရင့်ကျက်လာစေရန် သင့်အားယေဟောဝါပုံသွင်းပေးနေပေမည်။ မည်သို့ပင်ဆိုစေကာမူ သင်တက်လှမ်းရာတွင် ဘုရားသခင်၏အကူအညီကိုရှာယူတောင်းခံပါ။ ထပ်ဆင့်အခွင့်အရေးများကိုပေးခြင်းဖြင့် သင့်အားကောင်းချီးများပေးတော်မူမည်။ ဤအချိန်အတောအတွင်း အသင်းတော်တာဝန်များထမ်းဆောင်ခွင့်အတွက် အရည်အချင်းရှိသူတစ်ဦးဖြစ်လာရန် ကြိုးစားအားထုတ်ပါ။ ဒါဝိဒ်၏စိတ်ထားမျိုးတင်ပြပါ။ “ထာဝရဘုရား [ယေဟောဝါ၊ ကဘ ] ကိုချီးမွမ်းလျက်ငါမြွက်ဆိုမည်။ ခပ်သိမ်းသောလူတို့သည် သန့်ရှင်းသောနာမတော်ကိုကမ္ဘာအဆက်ဆက်ကောင်းချီးပေးကြစေ။”—ဆာလံ ၁၄၅:၂၁။

သင်မည်သို့ဖြေမည်နည်း

▫ အဘယ်အန္တရာယ်များကို ခရစ်ယာန်အကြီးအကဲများသတိပြုရမည်နည်း။

▫ စိုးရိမ်မှုသို့မဟုတ်အရည်အချင်းမရှိဟုထင်သော အားငယ်စိတ်ကြောင့် မတက်လှမ်းသူများကို မည်သို့ကူညီပေးနိုင်မည်နည်း။

▫ အသင်းတော်တာဝန်များကိုလက်ခံယူရန်အသင့်ရှိဖို့ လူတစ်ဦးအား အဘယ်အရာကလှုံ့ဆော်ပေးမည်နည်း။

▫ ယခင်ကအကြီးအကဲသို့မဟုတ်ဓမ္မအမှုထမ်းများဖြစ်ခဲ့ဖူးသူများသည် အဘယ်သဘောထားမျိုးဖြင့် ရှေ့ရေးကို ရှုမျှော်သင့်သနည်း။

[စာမျက်နှာ ၁၀ ပါ ရုပ်ပုံ]

ဒဗလျူဂျေသောန်သည် နှိမ့်ချသောအကြီးအကဲအဖြစ် ပုံသက်သေကောင်းတင်ပြခဲ့

[စာမျက်နှာ ၁၂ ပါ ရုပ်ပုံ]

ယေရှုနည်းတူ ယေဟောဝါလုပ်ငန်းတော်တွင် အတတ်နိုင်ဆုံးပါဝင်လုပ်ကိုင်ရန် သင်အသင့်ရှိပါသလော